Ndeto sya Yesũ Nĩsyatelemilye Andũ Aingĩ

Yesũ e ĩsinakokenĩ yaĩ Kavelinaumi nĩwamanyĩisye kana we nĩwe mũkate wa wʼo kuma ĩtunĩ. Veonekana ũndũ ũsu Yesũ wamanyĩasya wakindĩlĩĩlaa ndeto ila waĩ anatavya andũ ala masyokie kuma ngalĩko ya wumĩlonĩ wa syũa ya Kalilii. Andũ asu nĩ ala maĩe mĩkate na makũyũ yĩla Yesũ weekie kyama.

Yesũ nĩwaendeeie na ũneeni wake kwa kwasya atĩĩ: “Aa-ũmae menyu nĩmaĩe mana weũnĩ ĩndĩ makwʼa.” Ĩndĩ kĩvathũkanyʼo na ũu, Yesũ aisye: “Nyie ninyie mũkate wĩ thayũ ũla watheeie kuma ĩtunĩ. Ethĩwa mũndũ o na wĩva akaya mũkate ũũ akekala tene na tene; na vate nzika mũkate ũla nganengane nĩ mwĩĩ wakwa kwondũ wa thayũ wa nthĩ.”—Yoana 6:48-51.

Ĩvindanĩ ya Vasaka ya mwaka wa 30, Yesũ nĩwamũtavisye Nikotemo kana Ngai nĩwendie nthĩ mũno nginya aumya Mwana wake ethĩwe Mũtangĩĩi. Ĩvindanĩ yĩĩ Yesũ nĩwakindĩlĩĩile vata wa kũya mwĩĩ wake kwa kwĩthĩwa na mũĩkĩĩo nthĩnĩ wa nthembo ĩla waĩ vakuvĩ kumya. Ĩsu nĩyo yaĩ nzĩa ya kũkwata thayũ wa tene na tene.

Ĩndĩ andũ nĩmaleanile na ndeto sya Yesũ. Makũlanilye atĩĩ: “Mũndũ ũũ atonya ata kũtũnenga mwĩĩ wake tũye?” (Yoana 6:52) Yesũ aneenaa kwa nzĩa ya ngelekanyʼo na kwoou ndoonanasya kana nĩmaĩle kũya mwĩĩ wake. Ndeto ila waendeeie kũmatavya nĩsyaĩkĩĩthisye ũu.

Ameie atĩĩ: “Mũtaĩte mwĩĩ wa Mwana wa mũndũ na kũnywʼa nthakame yake, mũi na thayũ nthĩnĩ wenyu. Mũndũ o na wĩva ũla ũĩsaa mwĩĩ wakwa na kũnywʼa nthakame yakwa e na thayũ wa tene na tene, . . . nũndũ mwĩĩ wakwa nĩ kyaũya kya wʼo na nthakame yakwa nĩ kyaũnywʼa kya wʼo. Mũndũ o na wĩva ũla ũĩsaa mwĩĩ wakwa na kũnywʼa nthakame yakwa aendeeaa kwĩthĩwa na ngwatanĩo vamwe nakwa.”—Yoana 6:53-56.

Ayuti mayaaendeewʼa nĩ ndeto isu sya Yesũ! Nĩkĩ tũkwasya ũu? Nũndũ noĩthwa masũanĩaa kana Yesũ ameaa maĩsae nyama sya andũ na maitũla mwĩao wa Ngai ĩũlũ wa nthakame. (Mwambĩlĩlyo 9:4; Alivai 17:10, 11) Ĩndĩ Yesũ ndoonanasya kana maĩle kũya nyama ya mũndũ kana kũnywʼa nthakame. Oonanasya kana onthe ala mekwenda kũkwata thayũ wa tene na tene maĩle kũĩkĩĩa nthembo ĩla waĩ vakuvĩ kumya kwĩsĩla mwĩĩ wake ũte na naĩ, na kwĩtĩkya nthakame yake. Ĩndĩ o na aingĩ ma amanyĩwʼa make mayaaelewa ũndũ ũsu wamanyĩasya. Amwe maisye atĩĩ: “Ũneeni ũũ nĩ wa kũtelemya; nũũ ũtonya kũwĩthukĩĩsya?”—Yoana 6:60.

Nũndũ Yesũ nĩwamanyie kana amanyĩwʼa amwe make nĩmanyungunyĩasya, amakũlilye-ĩ: “Ũndũ ũsu nũkũmũlulutĩkya? Nata ĩndĩ, ethĩwa mũkoona Mwana wa mũndũ ambatĩte kũla waĩ mbeenĩ? . . . Ndeto ila namũtavya nĩsyo veva na nĩsyo thayũ. Ĩndĩ ve amwe menyu mate kũĩkĩĩa.” Nũndũ wa ũu, amanyĩwʼa aingĩ nĩmamũtiie na mayaasyoka kũmũatĩĩa ĩngĩ.—Yoana 6:61-64.

Kwoou, Yesũ nĩwamakũlilye atũmwa make 12 atĩĩ: “O nenyu mũikwenda kũthi, kana nĩmũkwenda?” Vetelo amũsũngĩie amwĩa: “Mwĩaĩi, twĩthi kũla kwĩ ũũ? We wĩ na ndeto sya thayũ wa tene na tene. Nĩtũĩkĩĩĩte na tũkamanya kana we wĩ Ũla Mũtheu wa Ngai.” (Yoana 6:67-69) Atũmwa nĩmoonanisye vyũ kana nĩmalũmanĩtye na Yesũ o na kau Vetelo na atũmwa ala angĩ mayaĩ manaelewa nesa kĩla wamanyĩasya!

O na kau Yesũ nĩwendeeiwʼe nĩ ndeto sya Vetelo, asyokie kwĩa atũmwa make atĩĩ: “Namũnyuvie mwĩ ĩkũmi na elĩ, kana ti wʼo? Ĩndĩ ũmwe wenyu nĩ mũsukani.” (Yoana 6:70) Yesũ awetaa Yutasi Isikalioti. Noĩthwa ĩvindanĩ yĩĩ Yesũ amanyie kana Yutasi nĩwambĩĩe kwĩka maũndũ kwosana na wendi wake mũthũku.

O na ũu wĩ o vo, Yesũ aĩ mwĩanĩe nĩkwĩthĩwa nĩwamanyie kana Vetelo na atũmwa ala angĩ mayaalulutĩkwʼa makaeka kũmũatĩĩa, kana makaeka kũkwata mbau wĩa wa Yesũ wa kũtangĩĩa mathayũ.