We no Ũtetheesye Andũ Makatwʼĩka Amanyĩwʼa?

1. Yeova ekĩte maũndũ meva kwondũ waku?

WE WATWʼĨKIE ũmwe wa Ngũsĩ sya Yeova ata? Mbee, wambie kũtavwʼa “ũvoo mũseo.” Nũtonya kwĩthĩwa wataviwʼe ũvoo ũsu nĩ asyai maku, mũndũ mwathũkũmaa ĩmwe kana mwasomaa ĩmwe, kana nĩ Ngũsĩ syatavanasya nyũmba kwa nyũmba. (Mko. 13:10) Ĩtina wa ũu, ve mũndũ watũmĩie ĩvinda yake yingĩ na vinya wake aiũmanyĩsya Mbivilia. Ũendeee kwĩmanyĩsya, nĩwambĩĩie kũmwenda Yeova, na wamanya kana o nake nũkwendete. Yeova nĩwaũkusisye ũwʼonĩ watwʼĩka mũmanyĩwʼa wa Yesũ Klĩsto, na nũndũ wa ũu, yu wĩ na wĩkwatyo wa kwĩkala thayũ tene na tene. (Yoa. 6:44) Mwa ndũlea kwĩthĩwa ũmũtũngĩaa Yeova mũvea mũno nũndũ nĩwatumie mũndũ ethĩwa na wendi wa kũũmanyĩsya ũla wʼo na akwĩtĩkĩlya ũtwʼĩke ũmwe wa athũkũmi make!

2. Twĩneenea kyaũ ĩsomonĩ yĩĩ?

² Yu nũndũ nĩtwĩsĩ ũwʼo, twĩ na kĩanda kya kũtetheesya angĩ makinyĩlae vamwe naitũ nzĩanĩ ĩla ĩelete thayũnĩ. No twĩthĩwe tũtaemawa nĩ kũtavanyʼa nyũmba kwa nyũmba, ĩndĩ ũyĩthĩa nĩtũemawa nĩ kũkũlya andũ kana no mende tũmamanyĩsye Mbivilia, kana no kwĩthĩwa tũemawa nĩ kũendeea kũmanyĩsya ala meetĩkĩla. We ũu nĩwʼo wĩwʼaa? Ethĩwa ũu nĩ wʼo, no ũtetheke wasũanĩa maũndũ ala maneenewe ĩsomonĩ yĩĩ. Nĩtũũneenea kĩla kĩtumaa twĩthĩwa na wendi wa kũtwʼĩkĩthya andũ amanyĩwʼa. O na nĩtũũneenea ũndũ tũtonya kũkĩlya vinya mawetu ala matonya kũtuma tũemwa nĩ kũmanyĩsya mũndũ Mbivilia. Ĩndĩ mbee, ekai twone nĩkĩ twaĩle kwĩthĩwa atavanyʼa na alimũ ma ũvoo mũseo.

YESŨ ATWĨAĨE TŨTAVANYʼE NA TŨIMANYĨSYA ANGĨ

3. Nĩkĩ tũtavanasya?

³ Yĩla Yesũ waĩ ĩũlũ wa nthĩ, anengie aatĩĩi make wĩa ũkuĩte maũndũ elĩ. Mbee, ameie matavanyʼe ũvoo mũseo wa Ũsumbĩ, na amamanyĩsya ũndũ matonya kwĩka ũu. (Mt. 10:7; Luka 8:1) Ũndũ ũmwe wamamanyĩisye nĩ kĩla maĩle kwĩka yĩla andũ mamavĩnga, na kĩla maĩle kwĩka yĩla andũ mendeewʼa nĩ ũvoo wa Ũsumbĩ. (Luka 9:2-5) O na nĩwathanie ũndũ ũvoo ũsu ũkatavanwʼa kũndũ kwingĩvĩte, nũndũ ameie kana aatĩĩi make makaumya “ũkũsĩ kwa mbaĩ syonthe.” (Mt. 24:14; Meko 1:8) Ũu wĩonanyʼa kana amanyĩwʼa make maaĩle kũendeea kũtavanyʼa ĩũlũ wa Ũsumbĩ wa Ngai na kĩla Ũsumbĩ ũsu ũkeanĩsya, andũ methĩwe nĩmekwĩthukĩĩsya kana maikwĩthukĩĩsya.

4. Kwosana na Mathayo 28:18-20, nĩ ũndũ ũngĩ wĩva twaĩle kwĩka eka o kũtavanyʼa ĩũlũ wa Ũsumbĩ?

⁴ Nawʼo ũndũ wa kelĩ nĩ wĩva? Yesũ atavisye aatĩĩi make moona mũndũ ũkwenda kũtwʼĩka mũmanyĩwʼa wake, mamũmanyĩsye kũkwata maũndũ onthe ala wameaĩe. Ĩndĩ wʼo wĩa ũũ wa kũtavanyʼa na kũmanyĩsya andũ waaĩle kũtethwʼa o ĩvindanĩ ya atũmwa yĩ yoka, o tondũ andũ amwe mavangaa? Aiee, na kĩtumi nũndũ Yesũ aisye kana wĩa ũũ wa vata ũkaendeea kũtethwʼa “nginya mũminũkĩlyo wa ĩvinda yĩĩ” tũtwĩe. (Soma Mathayo 28:18-20.) Yesũ nũtonya kwĩthĩwa anenganie mwĩao ũsu ĩvinda yĩla waumĩlĩĩile amanyĩwʼa mbee wa 500. (1 Ako. 15:6) O na ũvuanyʼonĩ ũla wanengie Yoana, nĩwasyokie oonanyʼa nesa kana amanyĩwʼa make onthe nĩmaĩle kũtetheesya andũ angĩ mamũmanye Yeova.—Ũvu. 22:17.

5. Kwosana na 1 Akolintho 3:6-9, Vaulo atũmĩie ngelekanyʼo yĩva ĩkwonanyʼa ũndũ wĩa wa kũtavanyʼa na kũmanyĩsya ikonanĩtye?

⁵ Mũtũmwa Vaulo aelekanilye wĩa wa kũtwʼĩkĩthya andũ amanyĩwʼa na kũĩma, nũndũ oonanisye wĩa ũsu nĩwendaa maũndũ angĩ eka o kũvuĩa mbeũ. Alilikanilye Akolintho atĩĩ: “Nyie nĩnavandie, na Avolo nĩwanyithisye . . . Nenyu mwĩ mũũnda wa Ngai ũendeee na kũĩmwa.” (Soma 1 Akolintho 3:6-9.) Ta twĩ atethya ma wĩa ‘mũũndanĩ wa Ngai,’ twavuĩa mbeũ tũiekelaa vau. Ĩndĩ, nĩtũinyithasya na tũiendeea kũsisya ũndũ iendeee. (Yoa. 4:35) Na tũendeee kũtethya wĩa ũsu, tũyũlawa kana Ngai nĩwe ũtumaa mbeũ isu iana.

6. Twaĩle kwĩka maũndũ meva yĩla tũũmanyĩsya mũndũ?

⁶ Tũmanthaa ala me na “ngoo nzeo kwondũ wa thayũ wa tene na tene.” (Meko 13:48) Ĩndĩ nĩ kana matwʼĩke amanyĩwʼa, no nginya tũmatetheesye (1) maelewe, (2) metĩkĩle, na (3) maitũmĩa maũndũ ala mekwĩmanyĩsya Mbivilianĩ. (Yoa. 17:3; Ako. 2:6, 7; 1 Ath. 2:13) Ngelekanyʼo ya onthe kĩkundinĩ no ĩtetheesye amanyĩwʼa ma Mbivilia mũno. Ũndũ ũmwe tũtonya kwĩka ũu nĩ kwa kwonyʼa ala eũ kana nĩtũmendete, na yĩla mooka maũmbanonĩ, tũimatetheesya mewʼe ta me mũsyĩ. (Yoa. 13:35) Nake mwalimũ nũtonya kwĩthĩwa aĩle kũtũmĩa ĩvinda yake yingĩ na vinya mwingĩ kũtetheesya mũmanyĩwʼa aekane na mĩĩkĩĩo na imanyĩo iilye ta “ngome syĩ vinya.” (2 Ako. 10:4, 5) No tũkue myei mingĩ tũitetheesya mũndũ maũndũnĩ asu atatũ nĩ kana ese kũvatiswa. Ĩndĩ kĩthito kitũ kĩyĩthĩawa kĩ kya mana.

WENDO NĨWʼO ŨTUMAA TWENDA KŨTWʼĨKĨTHYA ANDŨ AMANYĨWʼA

7. Nĩ kyaũ kĩtumaa twenda kũtavanyʼa na kũtwʼĩkĩthya andũ amanyĩwʼa?

⁷ Nĩkĩ tũtethasya wĩa wa kũtavanyʼa na kũtwʼĩkĩthya andũ amanyĩwʼa? Mbee, nĩkwĩthĩwa nĩtũmwendete Yeova. Wonanasya nũmwendete Ngai kwa kwĩka kyonthe kĩla ũtonya ũatĩĩe mwĩao wa kũtavanyʼa na kũtwʼĩkĩthya andũ amanyĩwʼa. (1 Yoa. 5:3) Kwasũanĩa ũndũ ũũ: Kũmwenda Yeova nĩkwʼo kwatumie wambĩĩa kũtavanyʼa nyũmba kwa nyũmba. Kwʼo kũatĩĩa mwĩao ũsu kwaĩ laisi? Nĩvatonyeka kũkethĩwa kũtaĩ laisi. Yĩla wathengeeie mũomo wa mbee ũitavanyʼa, nĩweewʼaa ũtelemete? Vate nzika, weewʼaa ũu! Ĩndĩ nũndũ nĩweesĩ kana wĩa ũsu nĩwʼo Yesũ ũkwenda ũtethye, nĩwaatĩĩie mwĩao wake. Na ĩndĩ ĩtina wa kũtavanyʼa kwa kavinda, wia waku nĩwaolekile. Ĩndĩ nao nata kũmanyĩsya mũndũ Mbivilia? Kũsũanĩa kĩu nĩkũtumaa ũtelema? Ĩĩ, nĩvatonyeka. Ĩndĩ Yeova no atume wĩthĩwa na wendi wa kũtwʼĩkĩthya andũ amanyĩwʼa, wamũvoya aũtetheesye ũeke kũkĩa na wĩthĩwe na ũkũmbaũ wa kũkũlya mũndũ kana no ende ũmũmanyĩsye Mbivilia.

8. Kwosana na Maliko 6:34, nĩ ũndũ ũngĩ wĩva ũtonya kũtuma twenda kũmanyĩsya angĩ?

⁸ Kelĩ, kwenda atũi maitũ nĩkũtumaa tũmamanyĩsya ũwʼo. Kwa ngelekanyʼo, ve ĩvinda Yesũ na amanyĩwʼa make meewʼaa manoete nũndũ wa kũtinda mũthenya wʼonthe matavanĩtye. Nũndũ wa ũu, nĩmaendie vandũ me oka mathũmũe, ĩndĩ ĩkomano ya andũ nĩyamanyie vala maĩ. Yĩla Yesũ wayonie nĩwayĩwʼĩie tei mwingĩ, na ambĩĩa kũyĩmanyĩsya “maũndũ maingĩ.” (Soma Maliko 6:34.) Na no twasye kana nũndũ nĩwanoete, nĩweekĩie kĩthito kingĩ nĩ kana eke ũu. Nĩkĩ? Kĩtumi nũndũ nĩweeyĩkĩie iatũnĩ sya andũ ala maĩ ĩkomanonĩ yĩu. Nĩwoonie ũndũ manyamaaa na ũndũ mendaa mũndũ amanenge wĩkwatyo, na kĩu kyatuma enda kũmatetheesya. Andũ ũmũnthĩ mailye o ta asu. Ndũkakengeke nĩ kwona mailye ta atanu kana ta eanĩe. Mailye ta malondu mau mate na mũĩthi ũmatongoesya. Nake mũtũmwa Vaulo aisye kana andũ asu mayĩthĩawa na Ngai, o na mayĩthĩawa na wĩkwatyo. (Aev. 2:12) Methĩawa nzĩanĩ ĩla “ĩelete wanangĩkonĩ”! (Mt. 7:13) Kwoou yĩla twasũanĩa ũndũ andũ kĩsionĩ kitũ me na vata mũnene wa kũtetheewʼa kĩ-veva, wendo na ĩnee nitũsukumaa tũmatetheesye. Na vai nzĩa ĩngĩ nzeo tũtonya kwĩka ũu eka o kũmakũlya kana no mende tũmamanyĩsye Mbivilia.

9. Kwosana na Avilivi 2:13, Yeova atonya kũũtetheesya ata?

⁹ Nũtonya kwĩthĩwa ũemawa nĩ kũkũlya mũndũ ũmũmanyĩsye Mbivilia nũndũ nĩwĩsĩ kwĩka ũu kwĩkua ĩvinda yaku yingĩ. Ethĩwa ũu nĩwʼo vailye, mũtavye Yeova ũndũ ũkwĩwʼa. Mũkũlye aũtetheesye wĩthĩwe na wendi wa kũmantha mũndũ ũmũmanyĩsya Mbivilia, na ũiendeea kwĩthĩwa na wendi wa kũmũmanyĩsya. (Soma Avilivi 2:13.) Mũtũmwa Yoana nũtũĩkĩĩthĩtye kana Ngai nũsũngĩaa mboya ila syosanĩte na kwenda kwake. (1 Yoa. 5:14, 15) Kwoou ĩkĩĩa vyũ kana Yeova nũkũũtetheesya wĩthĩwe na wendi wa kũtethya wĩa wa kũtwʼĩkĩthya andũ amanyĩwʼa.

MAWETU ANGĨ TŨTONYA KŨKĨLYA VINYA

10-11. Nĩ kyaũ kĩtonya kũtuma twona ve vinya kũmanyĩsya mũndũ Mbivilia?

¹⁰ Nĩtwonaa wĩa witũ wa kũmanyĩsya wĩ wa vata, o na kau nĩtũkomanaa na mawetu matonya kũtuma tũteka kyonthe kĩla tũkwenda wĩanĩ ũsu. Ekai twone mawetu amwe tũtonya kũkomana namo, na ũndũ tũtonya kũmakĩlya vinya.

¹¹ Nĩtũtonya kwĩthĩwa twĩ avinyĩĩe nĩ maũndũ maitũ nginya ũkethĩa twĩona ta tũteanĩsya maũndũ maingĩ ũndũ tũkwenda. Kwa ngelekanyʼo, atavanyʼa amwe nĩ akũũ na angĩ nĩmathĩnawʼa nĩ mwĩĩ. We wĩ ũmwe katĩ wa asu? Ethĩwa nĩ wʼo, kwasũanĩa ũndũ ũmwe twĩmanyĩĩtye ĩvindanĩ yĩĩ ya ũwau wa COVID-19. Twĩthĩĩte kaĩ no tũmanyĩsye andũ Mbivilia tũtũmĩĩte syĩndũ ta simũ! Kwoou no wambĩĩe kũmanyĩsya mũndũ Mbivilia na ũiendeea kũmũmanyĩsya wĩ o mũsyĩ kwaku. Na ve kaũndũ kangĩ kaseo twonete. Andũ amwe no methĩwe mayenda kwĩmanyĩsya Mbivilia, ĩndĩ ũyĩthĩa maitonya kũkwatĩkana saa ila ana-a-asa maitũ mavangĩĩe kũtavanyʼa. No methĩwe matonya kũkwatĩkana kĩoko tene kana ũtukũ. We no wĩvange nesa ũkatetheesya andũ ta asu masaa ala meũkwatĩkana? O nake Yesũ eekie ũu. Amanyĩisye Nikotemo ũtukũ nũndũ saa isu nĩsyo Nikotemo waĩ atonya kũkwatĩkana.—Yoa. 3:1, 2.

12. Nĩ maũndũ meva matumaa tũĩkĩĩa kana no twĩthĩwe alimũ aseo?

¹² No twĩthĩwe tũyĩwʼa ta tũtatoetye kũmanyĩsya mũndũ Mbivilia. No twĩthĩwe twonaa ta twaĩle kwamba kwongela ũmanyi witũ kana ũtũĩka witũ. Ethĩwa ũu nĩwʼo wĩwʼaa, kwasũanĩa maũndũ aa atatũ matonya kũtuma wĩyĩĩkĩĩa mũnango. Mbee, Yeova ndethĩawa na nzika kana nũtonya kũtethya wĩa ũũ nesa. (2 Ako. 3:5) Kelĩ, o na kau Yesũ nĩwe wĩ na “ũkũmũ wʼonthe ĩtunĩ na kũũ nthĩ,” nũkũnengete wĩa wa kũmanyĩsya angĩ, na ũu wĩonanyʼa kana nũkũĩkĩĩe. (Mt. 28:18) Na katatũ, ala angĩ no makũtetheesye. Yesũ nĩweekwatasya Ĩthe wake amũmanyĩsye kĩla ũkũweta na kũneena, na o naku no wĩke o take. (Yoa. 8:28; 12:49) O na no ũkũlye mũsyaĩĩsya wa kĩkundi kyaku kya ũtavanyʼa, vainia wĩ na ũtũĩka, kana mũtavanyʼa ũngĩ wĩ na ũmanyi aũtetheesye kwambĩĩa kũmanyĩsya mũndũ Mbivilia na kũendeea kũmũmanyĩsya. Na ũndũ ũngĩ ũtonya kwĩka nĩ kana wĩyĩĩkĩĩe mũnango nĩ kwĩthĩwa vo yĩla mũtavanyʼa ũmwe katĩ wa asu ũkũmanyĩsya mũmanyĩwʼa wake Mbivilia.

13. Nĩkĩ twaĩle kwĩkĩa kĩthito tũmanyĩe nzĩa nzaũ sya kũmanyĩsya?

¹³ No kwĩthĩwa twĩwʼaa wĩ ũndũ wĩ vinya kũmanyĩa nzĩa nzaũ na syĩndũ nzaũ sya kũmanyĩsya. Yu nzĩa ĩla tũnatũmĩaa kũmanyĩsya andũ Mbivilia nĩvĩndũkĩte. Ũmũnthĩ tũtũmĩaa ĩvuku Tanĩa Thayũ Tene na Tene! Nũndũ wa ũu, nzĩa ĩla tũtũmĩaa kwĩyũmbanyʼa na kũmanyĩsya yĩ kĩvathũkanyʼo na ĩla tũnatũmĩaa tene. Yu tũsomaa o tũlungu tũnini na tũmanyĩasya mũmanyĩwʼa ta tũkũea ngewa nake. Na yĩla tũũmanyĩsya, tũtũmĩaa mũno vitio na syĩndũ ingĩ syĩ simũnĩ, ta JW Library^®. Ethĩwa ndũkwĩwʼa ta wĩsene na syĩndũ isu, kũlya mũndũ wĩsene nasyo aũmanyĩsye kũitũmĩa. Ithyĩ twĩ andũ, na twamanyĩa kaũndũ ti laisi kũkaeka. Kĩu kĩtumaa twĩwʼa ve vinya kũmanyĩa nzĩa nzaũ sya kwĩka maũndũ. Ĩndĩ wamũkũlya Yeova aũtetheesye na weetĩkĩla ũtethyo wa ala angĩ, ndũkewʼa ve vinya kũmanyĩa nzĩa nzaũ na ũkatanĩa mũnango kũmanyĩsya andũ. O tondũ vainia ũmwe waisye, nzĩa ĩno nzaũ ya kũmanyĩsya “nĩtumaa mũmanyĩwʼa na mwalimũ matanĩa kwĩmanyĩsya.”

14. Nĩ kyaũ twaĩle kũlilikana ethĩwa ve vinya kũkwata mũndũ tũmanyĩsya Mbivilia kĩsionĩ kitũ, na ĩandĩko ya 1 Akolintho 3:6, 7 yĩtwĩkĩa vinya ata?

¹⁴ No kwĩthĩwa kĩsionĩ kĩla twĩkalaa ve vinya kũkwata mũndũ tũmũmanyĩsya Mbivilia. Andũ no methĩwe matendeeawʼa nĩ ũvoo witũ kana matũvĩngaa. Nĩ kyaũ kĩtonya kũtũtetheesya tũendeee kwĩthĩwa na woni mũseo? Nĩ kũlilikana kana tũtwĩe nthĩ nthũku na maũndũ ma andũ nĩmavĩndũkaa mĩtũkĩ vyũ, na kwoou andũ ala matanendeeawʼa nĩ ũvoo witũ no mambĩĩe kũmanya kana me na nzaa ya kĩ-veva. (Mt. 5:3) Kwa ngelekanyʼo, ve andũ amwe tene maleaa mavuku maitũ vyũ, ĩndĩ nĩmesie kwĩtĩkĩla kwĩmanyĩsya Mbivilia. Ũndũ ũngĩ ũtonya kũtũtetheesya nĩ kũlilikana kana Yeova nĩwe Mũnene wa ngetha. (Mt. 9:38) O na kau endaa tũendeee kũvanda mbeũ na kũinyithya, nĩwe ũtumaa iana. (1 Ako. 3:6, 7) Ũndũ ũngĩ ũtwĩkĩaa vinya nĩ kũlilikana kana o na ethĩwa vai mũndũ tũũmanyĩsya Mbivilia yu tũi, Yeova atũathimaa asyaĩtye kĩthito kĩla twĩkĩaa, ĩndĩ ti mosyao ala tũkwataa ũtavanyʼanĩ.b

TANĨAA KŨTWʼĨKĨTHYA ANDŨ AMANYĨWʼA

15. Yeova ewʼaa ata mũndũ eetĩkĩla kũmanyĩwʼa Mbivilia na atũmĩa kĩla ũkwĩmanyĩsya?

¹⁵ Yeova atanaa mũno yĩla mũndũ weetĩkĩla ũwʼo wa Mbivilia na ambĩĩa kũtavya andũ angĩ ũwʼo ũsu. (Nth. 23:15, 16) Na no nginya ethĩwe atanaa mũnango oona kĩla twĩanĩĩtye ũmũnthĩ! Kwa ngelekanyʼo, o na kau mwakanĩ wa ũthũkũmi wa 2020 kũnaĩ ũwau mũthũku nthĩ yonthe, tũnaĩ na amanyĩwʼa ma Mbivilia 7,705,765, na nĩtũnatetheeisye andũ 241,994 meeyumya mamũthũkũme Yeova na mavatiswa. O namo asu nĩmeũmanyĩsya angĩ na maimatetheesya matwʼĩke amanyĩwʼa. (Luka 6:40) Vate nzika, Yeova nũtanaa mũno oona tũitethya wĩa wa kũtwʼĩkĩthya andũ amanyĩwʼa.

16. Nĩ mũvango wĩva mũseo tũtonya kwĩthĩwa nawʼo?

¹⁶ Kwa wʼo, wĩa wa kũtwʼĩkĩthya andũ amanyĩwʼa wĩ mawetu mawʼo, ĩndĩ tweetĩkĩla Yeova atũtetheesye, tũkavota kũmanyĩsya angĩ mamwende Ĩthe witũ wa ĩtunĩ. We no wĩke mũvango ũmanthe mũndũ o ũmwe ũmũmanyĩsya Mbivilia, na ũyĩkĩa kĩthito ũendeee kũmũmanyĩsya? Nĩtũtonya kũsengwʼa mũno nĩ mosyao ala tũtonya kũkwata twatũmĩa kĩla kamwanya kaumĩla kũkũlya kĩla mũndũ twakomana nake kana no ende tũmũmanyĩsye. Na no twĩkale twĩsĩ kana tweeka ũu, Yeova ndelea kũathima kĩthito kitũ.

17. Tũkwataa kyaũ twavota kũmanyĩsya mũndũ Mbivilia?

¹⁷ Nĩ ndaĩa nene ta kĩ kũtavanyʼa na kũmanyĩsya angĩ ũwʼo! Wĩa ũũ ũtumaa twĩthĩwa na ũtanu wa wʼo. Mũtũmwa Vaulo nĩweeyoneie kĩu yĩla watetheeisye andũ aingĩ ndũanĩ ya Thesalonika matwʼĩka amanyĩwʼa. Aisye: “Wĩkwatyo witũ kana ũtanu witũ kana ngovia ya ũtanu witũ mbee wa Mwĩaĩi Yesũ nĩ kyaũ? Tyo inywʼĩ? Ĩĩ, ninywʼĩ ndaĩa yitũ na ũtanu witũ.” (1 Ath. 2:19, 20; Meko 17:1-4) Ve aingĩ ũmũnthĩ matonya kwasya o take. Kwa ngelekanyʼo, mwĩĩtu-a-asa wĩtawa Stéphanie e na mũũme nĩmatetheetye andũ kauta makavatiswa, na easya, “Vai ũtanu ũvĩtũkĩte ũla mũndũ ũkwataa atetheesya andũ meyumye mamũthũkũme Yeova.”