Makũlyo Kuma Kwa Asomi Maitũ

Yesũ atwʼĩkie Mũthembi Mũnene ĩndĩĩ?

Ve ũĩkĩĩthyo wonanasya kana Yesũ atwʼĩkie Mũthembi Mũnene mwaka wa 29. Ũĩkĩĩthyo ũsu nĩ wĩva? Yĩla Yesũ wavatisiwe, nĩweeyumisye ta nthembo kĩthembeonĩ kya ngelekanyʼo, kĩla kyonanasya “kwenda” kwa Ngai. (Aka. 1:4; Aevl. 10:5-10) Nũndũ kĩthembeo kĩu kya ngelekanyʼo kĩthĩĩtwe vo kuma yĩla Yesũ wavatisiwe, no nginya yĩla ĩkalũ ĩnene ya kĩ-veva yĩthĩwe yambĩĩie ĩvindanĩ o yĩu. Ĩkalũ yĩu yonanasya mũvango ũla Yeova wĩkĩte kwĩsĩla nthembo ya wovosyo nĩ kana andũ matonye kũmũthaitha. Kĩthembeo nĩ kĩndũ kya vata ĩkalũnĩ yĩu ya kĩ-veva.—Mt. 3:16, 17; Aevl. 5:4-6.

Yu nũndũ vaĩ na ĩkalũ ĩnene ya kĩ-veva, nĩvendekaa mũthembi mũnene atongoesye maũndũ. Kwoou Yeova nĩwamwĩtĩkĩisye Yesũ mauta “kwĩsĩla veva mũtheu na amũnenga vinya” atwʼĩke Mũthembi Mũnene. (Meko 10:37, 38; Mko. 1:9-11) Ĩndĩ twĩsĩ ata kana Yesũ atwʼĩkĩthiwʼe Mũthembi Mũnene atanamba kũkwʼa na kũthayũũkwʼa? Nĩtũũkwata ũsũngĩo wa ĩkũlyo yĩu twaneenea ngelekanyʼo ya ala maĩ athembi anene ungu wa Mĩao ya Mose, ta Aluni na ala matwĩkĩe athembi anene ĩtina wake.

Nthĩnĩ wa ĩla Mĩao Yeova wanenganĩte, no mũthembi mũnene e weka walikaa vala Vandũ Vatheu Vyũ va ĩeema ya kũmbanĩa, na va ĩkalũ. Ve vasia wavakanĩtye vala Vandũ Vatheu Vyũ na vala Vandũ Vatheu. Mũthembi mũnene avĩtaa vasia ũsu Mũthenyanĩ wa Wĩwʼanĩthyo wĩ wʼoka. (Aevl. 9:1-3, 6, 7) O tondũ Aluni na athembi anene ala maĩ ĩtina wake metĩkĩawʼa mauta matwʼĩke athembi anene matanamba kũvĩtĩla ‘vasianĩ’ wa ĩeema ya kũmbanĩa, no nginya Yesũ ethĩwe ambie kũnyuvwa ta Mũthembi Mũnene wa ĩkalũ ĩnene ya kĩ-veva ya Yeova atanamba kũkwʼa, nĩ kana “kwĩsĩla mwĩĩ wake, nawʼo nĩwʼo ũelekanĩtwʼe na vasia,” evingũĩe nzĩa ya kũlika ĩtunĩ. (Aevl. 10:20) Nũndũ wa kĩtumi kĩu, mũtũmwa Vaulo aineena ĩũlũ wa Yesũ aisye kana ookie “e mũthembi mũnene,” na alikĩla “ĩeemanĩ ĩnene na ĩseo vyũ yĩtaseũvĩtwʼe na moko,” na ĩndĩ alika “ĩtunĩ mbene.”—Aevl. 9:11, 24.

Ve kĩvathũkanyʼo katĩ wa yĩla ũtianĩo mweũ walũlũmĩĩilwʼe na yĩla wambĩĩie kũthũkũma?

Vai kĩvathũkanyʼo katĩ wa yĩla ũtianĩo mweũ walũlũmĩĩilwʼe na yĩla wambĩĩie kũthũkũma. Nĩkĩ tũkwasya ũu? Yĩla Yesũ wambatie ĩtunĩ na anengane thayũ wake ũte na naĩ kwondũ witũ, asu nĩmo maĩ matambya elĩ katĩ wa atatũ ala maaĩle kwoswa nĩ kana ũla ũtianĩo mweũ ũlũlũmĩĩlwʼe. Matambya o asu nomo matumie ũtianĩo ũsu wambĩĩa kũthũkũma. Ĩndĩ matambya asu nĩ meva?

Mbee, Yesũ nĩwaũngamie mbee wa Yeova; kelĩ, nĩwanengie Yeova thayũ wake ũte na naĩ ũla waumisye ta nthembo; na mũthya, Yeova nĩweetĩkĩlile nthakame ya Yesũ ĩla yetĩkiwʼe. Ũtianĩo ũsu mweũ ndwaĩ wĩsa kwambĩĩa kũthũkũma matambya asu matosetwe.

Mbivilia ndĩtũtavĩtye nesa nĩ ĩndĩĩ Yeova weetĩkĩlile nthembo ĩla Yesũ waumisye. Na nũndũ wa ũu, tũyĩsa kũweta nesa yĩla ũtianĩo ũsu mweũ walũlũmĩĩilwʼe na wambĩĩa kũthũkũma. Ĩndĩ o na vailye ũu, nĩtwĩsĩ kana Yesũ ambatie ĩtunĩ vatiele mĩthenya ĩkũmi Vendekosito yambĩĩe. (Meko 1:3) Kavindanĩ kau kanini, nĩwanengie Yeova nthembo ĩla waumĩtye, nake amĩtĩkĩla. (Aevl. 9:12) Ũĩkĩĩthyo wa ũndũ ũsu nĩwoonekie ũtheinĩ mũthenyanĩ wa Vendekosito. (Meko 2:1-4, 32, 33) Na nũndũ wa ũu, no twasye yu ũtianĩo ũsu mweũ waĩ vo na waĩ ũnambĩĩa kũthũkũma.

Kwa ũkuvĩ, ũtianĩo ũsu mweũ walũlũmĩĩilwʼe na wambĩĩa kũthũkũma ĩtina wa Yeova kwĩtĩkĩla nthakame ya Yesũ ĩla yetĩkiwʼe. Kwoou, ũtianĩo ũsu waĩ ũtonya kũtethya andũ nũndũ yu Yesũ aĩ Mũthembi Mũnene, na nĩwe waĩ Mwĩwʼanĩthya wawʼo.—Aevl. 7:25; 8:1-3, 6; 9:13-15.