Tũmĩa Kavuku Ĩmanyĩsye Kĩla kĩ Ndetonĩ ya Ngai Kwambĩĩa Ũneenanyʼa
1. Nĩ kyaũ twakwatie kĩtonya kũtũtetheesya ũtavanyʼanĩ?
1 Ũmbanonĩ wa mĩthenya ĩtatũ ũla waĩ na kyongo “Endeeai Kũmantha Ũsumbĩ wa Ngai Mbee!” nĩvaumiwʼe kavuku ke na kyongo Ĩmanyĩsye Kĩla kĩ Ndetonĩ ya Ngai. Tũtonya kũtũmĩa kavuku kau ata ĩla tũkwĩyũmbanĩsya ũtavanyʼa? Nũndũ maandĩko mavangĩtwe ungu wa kyongo kĩmwe kya Mbivilia o ũndũ ĩvuku ya Kutoa Sababu yĩvangĩtwe, no katũtetheesye kwambĩĩsya ũneenanyʼa.
2. Tũtonya kũtũmĩa ata kavuku Ĩmanyĩsye Kĩla kĩ Ndetonĩ ya Ngai ũtavanyʼanĩ?
2 Nũtonya kũtũmĩa ĩkũlyo ya 8 na ũyasya: “Twĩthokeaa andũ kwa ũkuvĩ nũndũ andũ aingĩ nĩmethĩĩtwe mayĩkũlya, ‘Ngai nĩwe ũetae mathĩna?’ [Nthĩnĩ wa isio imwe wĩthĩaa nũseo ũkonyʼa mwene nyũmba ĩkũlyo yĩu.] We wĩona ata? [Eteela asũngĩe.] Mbivilia nĩsũngĩĩte ĩkũlyo yĩu nesa.” Soma na ũielesya ĩandĩko yĩmwe kana maingĩ ala monanĩtwʼe vau. Ethĩwa mwene nyũmba nĩwendeewʼa, no ũmwonyʼe makũlyo 20 ala me mwambĩĩonĩ na ũimũkũlya anyuve yĩmwe nĩ kana mwĩyĩneenea wasyoka. Kana ũkamũnenga ĩvuku yĩmwe katĩ wa ala ma kwĩmanyĩsya yĩla yĩeleetye maũndũ maingangĩ ĩũlũ wa kĩla mwaneenea.
3. Tũtonya kũtũmĩa ata kavuku Ĩmanyĩsye Kĩla kĩ Ndetonĩ ya Ngai kwambĩĩsya ũneenanyʼa isionĩ ila andũ matethĩawa me ma ndĩni sya Kĩklĩsto?
3 No tũtũmĩe ĩkũlyo ya 4 na ya 13 nginya ya 17, ĩla tũũtavanyʼa isionĩ ila andũ matethĩawa me ma ndĩni sya Kĩklĩsto. Kwa ngelekanyʼo, no tũtũmĩe ũvoo ũla wĩ ĩkũlyonĩ ya 17 na tũyasya atĩĩ: “Twĩthokeaa andũ ala me na mĩsyĩ o kwa ũkuvĩ nĩ kana tũmatetheesye. Tyo wĩtĩkĩlane nakwa kana mĩsyĩ yĩ na mathĩna maingĩ ũmũnthĩ? [Eteela asũngĩe.] Andũ aingĩ ala matwaanĩte nĩmatetheewʼe nĩ ndeto ii nzeo: ‘Kĩveti nĩkĩmũkĩe mũũme.’ [Ti lasima ũwete kana ndeto isu syumĩte ĩandĩkonĩ ya Aeveso 5:33. Ethĩwa wĩneena na mũndũ mũka no ũwete ndeto ila syĩ ĩandĩkonĩ ya Aeveso 5:28.] We wĩona andũ ala matwaanĩte makaatĩĩa ndeto ii ta itonya kũmatetheesya?”
4. Ũtonya kwĩka ata ũiminĩĩa kũneena na mwene nyũmba wĩthĩawa ate wa ndĩni sya Kĩklĩsto?
4 Ũiminĩĩa kũneena na mwene nyũmba ĩka mũvango nĩ kana mwĩendeesya ũneenanyʼa wenyu ĩvinda yĩngĩ. No ũvange kũneenea ĩandĩko yĩngĩ yĩ ungu wa ĩkũlyo yĩla mũũneeneaa. Ĩvinda yĩla yaĩle yavika, elesya mwene nyũmba kana ndeto nzeo ila wĩthĩĩtwe ũimũtavya syumĩte Mbivilianĩ. Mũnenge ĩvuku yĩla ũkwona yĩtonya kũmwendeesya kwosana na maũndũ ala mwĩthĩĩtwe mũineenea, na woni wake ĩũlũ wa Mbivilia.—Sisya ũvoo ũla wĩ kathangũnĩ ka nthĩnĩ ka Ũthũkũmi Witũ wa Ũsumbĩ wa Mwei wa 12, 2013.