Ũndũ Tũtonya Kwĩthĩwa Atavanyʼa Aseo—Kũtũmĩa Makũlyo Nesa

NĨKĨ NĨ ŨNDŨ WA VATA: Ethĩwa “ũtao [kana, mosũanĩo] ngoonĩ ya mũndũ nĩ ta kyũngũ;” no twasye kana makũlyo no matũmĩwe ta ndoo ya kũuta kĩwʼũ nĩ kana matũtetheesye kũmanya mosũanĩo ala me ngoonĩ. (Nth 20:5) Makũlyo nĩmatetheeasya kĩlĩko kya mũndũ ũla tũũneena nake kĩikelelũke. Ĩla twakũlya makũlyo maitũ nesa na masũngĩwa ũndũ vaĩle, mavinda maingĩ nĩtũmanyaa woni wa mũndũ ĩũlũ wa ũndũ mũna. Yesũ nĩwatũmĩaa makũlyo nesa. Tũtonya kũatĩĩa ngelekanyʼo yake ata?

ŨTONYA KWĨKA ŨU ATA?:

• Kũlya makũlyo meũtuma andũ maelesya mawoni moo. Yesũ nĩwakũlilye amanyĩwʼa make makũlyo nĩ kana amanye woni woo ĩũlũ wa ũndũ mũna. (Mt 16:13-16; be-SW 238 ¶3-5) Ũtonya kũkũlya makũlyo ta meva maũtetheesye ũmanye mawoni ala mũndũ wĩ namo ĩũlũ wa ũndũ mũna?

• Kũlya makũlyo makũtetheesya mũndũ aelewe ũndũ mũna kana ethĩwe na woni waĩle. Nĩ kana Yesũ alũnge mosũanĩo ma Vetelo, nĩwamũkũlilye makũlyo na amũnenga mosũngĩo ala mamũtetheeisye aelewa ũndũ mũna. (Mt 17:24-26) Nĩ makũlyo ta meva ũtonya kũkũlya nĩ kana matetheesye mũndũ aelewe ũndũ mũna?

• Katha ũla ũũneena nake. Yesũ nĩwakathie mũandĩki ũmwe ‘wasũngĩie na ũmanyi’ ĩkũlyo wamũkũlĩtye. (Mk 12:34) Nĩ kwa nzĩa yĩva ũtonya kũkatha mũndũ wasũngĩa ĩkũlyo wĩĩmũkũlĩtye?

ĨLOELEI KĨLUNGU KYA MBEE KYA VITIO YĨ NA KYONGO, TETHYA WĨA ŨLA YESŨ WATETHASYA—MANYĨASYA, NA ĨNDĨ MŨISŨNGĨA MAKŨLYO AA:

• Nĩkĩ nzĩa ĩsu ya kũmanyĩsya ĩte nzeo, o na kau maũndũ ala mawetwa nĩ ma wʼo?

• Ve vata mwaũ wa kwĩka maũndũ angĩ ĩla tũũmanyĩsya eka o kũelesya maũndũ tũ?

ĨLOELEI KĨLUNGU KYA KELĨ KYA VITIO ĨSU, NA ĨNDĨ MŨISŨNGĨA MAKŨLYO AA:

• Nĩ kwa nzĩa yĩva mwana-a-asa watũmĩa makũlyo nesa?

• Nĩ maũndũ angĩ meva weeka aimanyĩsya tũtonya kwĩka?