ĨSOMO YA 13

Kwonanyʼa Ũndũ Ũvoo Ũtonya Kũtũmĩwa

Nthimo 3:21

KWA ŨKUVĨ: Tetheesya ethukĩĩsya maku mamanye ũndũ ũvoo waku ũmakonetye, na ũimonyʼa ũndũ matonya kũtũmĩa kĩla mekwĩmanyĩsya.

Sũanĩa ethukĩĩsya maku. Sũanĩa nĩkĩ ethukĩĩsya maku me na vata wa kwĩwʼa ũvoo ũla ũkumya, na ũisũanĩa mũno mũno nĩ ũndũ wĩva ũvoonĩ waku ũtonya kũmatetheesya.
Ũendeee kumya ũvoo, onyʼa ethukĩĩsya kĩla maĩle kwĩka. Eka kĩla ũmwe katĩ wa ethukĩĩsya amanye kuma mwambĩĩonĩ kana ũvoo ũla ũkumya nũmũkonetye. Yĩla ũũneenea ũndũ mũnene ũvoonĩ waku, tetheesya ethukĩĩsya maku mone ũndũ matonya kũũtũmĩa. Elesya kĩla ũndũ nesa.

Neenea ũndũ myolooto ya Mbivilia ĩtonya kũtũmĩwa. Ĩka ũu kwa nzĩa ya wendo na ĩkwonanyʼa kana nũkũelewa nĩ ũndũ ethukĩĩsya maku mekwĩwʼa. Vandũ va kũtuma ethukĩĩsya maku mewʼa ta me na mavĩtyo, lũlũmĩĩlya wendo na mũĩkĩĩo woo, ũte na nzika kana ngoo syoo niũmasukuma meke kĩla kyaĩlĩte.