Ũndũ Ngai Ũkekana na Ũthũku

Mbivilia nĩtũtavĩtye nesa vyũ ũndũ Yeova na Mwana wake, Yesũ Klĩsto, makekana na ũthũku ũla ũetawe nĩ Satani, ũla nĩ Ndevili. Yaĩtye ũũ: “Kwondũ wa ũu [Yesũ] Mwana wa [Ngai] nĩwonaniw’e, nĩ kana anange mawĩa ma ndevili.” (1 Yoana 3:8) Kwoou, nthĩ ĩno yusũĩtwe nĩ ĩtomo, kĩmena, na meko mathũku ĩkaanangwa. Nao nata ĩũlũ wa Satani ũla nĩ Ndevili, “mũnene wa nthĩ”? Yesũ athanĩte kana “akekw’a nza.” (Yoana 12:31) Ĩtina wa ũu, nthĩ ndĩkethĩwa ĩtonya kwaw’a nĩ Satani, na kwoou ĩkausũa ũlũngalu na mũuo.—2 Vetelo 3:13.

Nao nata ala matendaa kũalyũka, ala maendeeaa kwĩka mothũku? Kwasũanĩa ĩũlũ wa watho ũũ wĩ Mbivilianĩ: “Nũndũ ala alũngalu makatũa ĩ nthĩ, na ala eanĩu makamĩkalaa. Ĩndĩ ala athũku makavetwa kuma ĩ nthĩ, na nzeleke ikakũanĩw’a na mĩi syume nthĩnĩ wayo.” (Nthimo 2:21, 22) Andũ athũku maikethĩwa kw’o ĩngĩ. Nũndũ wa mũuo ũla ũkethĩwa kw’o, o kavola kwa kavola andũ ala ewi makavetewa naĩ ĩla matiĩwe nĩ Atamu.—Alomi 6:17, 18; 8:21.

Ngai akavetanga ũthũku ata nthĩ nzaũ? Ndakeka ũu kwa kũvena andũ mũthĩnzĩo ũla wamanengie wa kwĩnyuvĩa maũndũ na aimatw’ĩkĩthya ta masinĩ. Vandũ va ũu, akamanyĩsya andũ kĩla wendaa meke na aimatetheesya maekane na mosũanĩo na meko mathũku.

Nao Ngai akekana ata na mĩisyo ĩla ĩkwataa andũ ĩtataĩĩwe? Nũtwathĩte kanaŨsumbĩ wake ũkilyĩ ũnasumbĩka nthĩ. Mũsumbĩ ũla Ngai ũnyuvĩte esumbĩka nĩ Yesũ Klĩsto, ũla wĩ na ũtonyi wa kũvosya mowau. (Mathayo 14:14) O na ĩngĩ Yesũ e na ũtonyi wa kũsiĩĩa mĩisyo. (Maliko 4:35-41) Kwoou mathĩna ala maetawe nĩ “ĩvinda na ĩvuso,” kana maũndũ matataĩĩwe, makathela. (Mũtavan’ya 9:11) Ĩvindanĩ ya ũsumbĩki wa Klĩsto vai ũthũku ũkakwata andũ.—Nthimo 1:33.

Nao nata ĩũlũ wa andũ aseo milioni mbingĩ ala mooaiwe nĩ mĩisyo? Yesũ atanamba kũmũthayũũkya mũnyanyae Lasalo aisye atĩĩ: “Ninyie ũthayũũkyo, na ninyie thayũ.” (Yoana 11:25) Ĩĩ, Yesũ e ũtonyi wa kũthayũũkya ala makwie!

Ethĩwa nĩwatanĩa kũmanya kana andũ aseo makekala ĩũlũ wa nthĩ mateũkwatwa nĩ mathĩna, wĩona ata ũkosa ĩtambya ya kwongela ũmanyi ĩũlũ wa Ngai ũla wa w’o na kĩeleelo kyake kwa kwĩmanyĩsya Mbivilia? Ngũsĩ sya Yeova ila syĩ kĩsionĩ kyaku ikatanĩa kũũtetheesya ũkwate ũmanyi ũsu. Nĩtũũkũthokya ũneene na Ngũsĩ sya Yeova ila syĩ kĩsionĩ kyaku, kana ũandĩkĩe aumĩthya ma ĩkaseti yĩĩ.