ĨSOMO YA 20

Kũminĩĩa Ũneeni kwa Nzĩa Nzeo

Mũtavanʼya 12:13, 14

KWA ŨKUVĨ: Ũiminĩĩa ũneeni waku, tetheesya ethukĩĩsya metĩkĩle na maiatĩĩa kĩla meemanyĩsya.

Onanyʼa ũndũ ndeto syaku sya kũminĩĩa ikonanĩtye na kĩla ũũneeneaa. Tũngĩlĩĩla maũndũ ala manene na ũndũ ũla mũnene vyũ ũũneeneaa.
Thangaasya ethukĩĩsya maku. Onyʼa ethukĩĩsya kĩla maĩle kwĩka na ũimanenga itumi nzeo sya kwĩka ũu. Neena kuma ngoonĩ na ũte na nzika.
Minĩĩa ũvoo waku kwa kũweta maũndũ o manini na kwa ũkuvĩ. Ũiminĩĩa ũvoo waku, ndũkambĩĩe kũneenea ũndũ mũnene ũteĩ ũnaũweta. Tũmĩa ndeto nguvĩ ũndũ vatonyeka ũthangaasye ethukĩĩsya mose ĩtambya.

Ndũkaminĩĩe ũvoo waku wĩkalaatĩte na ndũkaneene na wasya wĩ nthĩ. Neena ndeto sya mũthya na wasya ũkwonanyʼa ũu nĩwʼo vailye.