Ũvoo ũla mũnene ũneenewe Mbivilianĩ ũkonetye Ũsumbĩ wa Ngai. Yeova akatũmĩa Ũsumbĩ ũsu kwĩanĩsya kĩeleelo kĩla waĩ nakyo mbeenĩ kwelekela nthĩ. Ĩndĩ Ũsumbĩ ũsu nĩ kyaũ? Twĩsĩ ata kana yu nũsumbĩkĩte? Kũvikĩĩa vau wĩanĩĩtye maũndũ meva? Na ũkeka maũndũ meva ĩvindanĩ yũkĩte? Ĩsomo yĩĩ na masomo angĩ elĩ ala maatĩĩe nĩmeũsũngĩa makũlyo asu.

1. Ũsumbĩ wa Ngai nĩ kyaũ na Mũsumbĩ wa Ũsumbĩ ũsu nũũ?

Ũsumbĩ ũsu nĩ Silikalĩ ĩseũvĩtwʼe nĩ Yeova Ngai. Mũsumbĩ wa Ũsumbĩ ũsu, ũla nĩ Yesũ Klĩsto, yu nũsumbĩkĩte ĩtunĩ. (Mathayo 4:17; Yoana 18:36) Mbivilia yaĩtye ũu ĩũlũ wa Yesũ: “Akasumbĩka e Mũsumbĩ . . . tene na tene.” (Luka 1:32, 33) Yĩla Yesũ ũkasumbĩka nthĩ, akasumbĩka andũ onthe.

2. Naaũ makasumbĩka vamwe na Yesũ?

Yesũ ndakasumbĩka e weka. “Andũ kuma kwa kĩla ũko na kĩthyomo na andũ na mbaĩ . . . makasumbĩka nthĩ me asumbĩ.” (Ũvuanyʼo 5:9, 10) Nĩ andũ meana ata ala makasumbĩka na Klĩsto? Kuma yĩla waĩ vaa ĩũlũ wa nthĩ, Aklĩsto milioni mbingĩ nĩmatwʼĩkĩte aatĩĩi make. Ĩndĩ katĩ wa asu no andũ 144,000 makathi ĩtunĩ nĩ kana makasumbĩke na Yesũ. (Soma Ũvuanyʼo 14:1-4.) Aklĩsto ala angĩ makatiwa vaa ĩũlũ wa nthĩ, makasumbĩkwa nĩ Ũsumbĩ ũsu wa Ngai.—Savuli 37:29.

3. Nĩkĩ tũtonya kwasya kana Ũsumbĩ wa Ngai nĩ mũseo kwĩ silikalĩ sya andũ?

O na yĩla asumbĩ amwe ma andũ matata kwĩka maũndũ maseo, mayĩthĩawa na ũtonyi wa kwĩka maũndũ onthe ala mekwenda. Ĩtina wa ĩvinda nĩmaumawʼa kĩvĩlanĩ nĩ andũ angĩ ala matonya kwĩthĩwa mateũthĩnĩkĩa mavata ma andũ ala angĩ. Ĩndĩ Mũsumbĩ wa Ũsumbĩ wa Ngai, ũla nĩ Yesũ, ndakesa kumwʼa kĩvĩlanĩ nĩ mũndũ o na wĩva. Ngai aũngamĩtye “ũsumbĩ ũtakaanangĩka tene na tene.” (Ndanieli 2:44) Yesũ akasumbĩka nthĩ yonthe na ndakethĩwa na kyende. Yesũ nĩ Mũsumbĩ wĩ wendo, tei, ũsilaa katĩ, na akamanyĩsya andũ onthe mekalanasye o kwa nzĩa ĩsu, me na wendo, tei na ũsili wa katĩ.—Soma Isaia 11:9.

4. Nthĩ yonthe ĩkasumbĩkwa nĩ silikalĩ yĩ vinya mũno

Yesũ Klĩsto e vinya mwingĩ mũno kwĩ mũsumbĩ o na wĩva waasumbĩka vaa ĩũlũ wa nthĩ. Somai Mathayo 28:18, na ĩndĩ mũineenea ĩkũlyo yĩĩ:

• Ũtonya kwasya Yesũ e vinya wĩana ata aelekanwʼa na asumbĩ ma andũ?

Silikalĩ sya andũ ivĩndũkaa kĩla ĩvinda na kĩla mũsumbĩ asumbĩkaa o kĩsio kĩnini kya nthĩ. Ĩndĩ nata Ũsumbĩ wa Ngai? Somai Ndanieli 7:14, na ĩndĩ mũineenea makũlyo aa:

• Nĩkĩ nĩ ũndũ wa kwendeesya kũmanya kana Ũsumbĩ wa Ngai ‘ndũkanangĩka’?

• Nĩkĩ nĩ ũndũ wa kwendeesya kũmanya kana ũkasumbĩka nthĩ yonthe?

5. Silikalĩ sya andũ nĩsyaĩle kũvetangwa

Nĩkĩ Ũsumbĩ wa Ngai ũkavetanga silikalĩ sya andũ? Ĩloelei VITIO, na ĩndĩ mũineenea ĩkũlyo yĩla yĩatĩĩe.

VITIO: Ũsumbĩ wa Ngai Nĩ Kyaũ?—Kalungu ka Vitio (1:41)

• Ũsumbĩki wa andũ ũtumĩte maũndũ methĩwa mailye ata?

Mbivilia yaĩtye kana ‘mũndũ amũsumbĩkaa mũndũ kwa kũmũũmĩsya.’ (Mũtavanyʼa 8:9, NWT) Neeneai makũlyo aa:

• We nũkwona Ũsumbĩ wa Ngai ta waĩlĩte kũvetanga silikalĩ sya andũ? Nĩkĩ wasũngĩa ũu?

6. Ala makasumbĩka Ũsumbĩnĩ wa Ngai nĩmatũeleawa

Nũndũ Mũsumbĩ witũ Yesũ nĩwekalile vaa ĩũlũ wa nthĩ e mũndũ, nũtonya “kũtwĩwʼĩa tei mawonzunĩ maitũ.” (Aevelania 4:15) O namo aũme na aka aĩkĩĩku 144,000 ala makasumbĩka vamwe na Yesũ, manyuvĩtwe nĩ Yeova kuma “kĩla ũko na kĩthyomo na andũ na mbaĩ.”—Ũvuanyʼo 5:9.

• We nĩweewʼa wakiakiwʼa wamanya kana Yesũ na ala ũkasumbĩka namo nĩmesĩ mathĩna ala matũkwataa twĩ andũ? Nĩkĩ wasũngĩa ũu?

7. Mĩao ya Ũsumbĩ wa Ngai nĩ mĩseo kwĩ mĩao ya andũ

Silikalĩ nĩsyumasya mĩao ya kũsũvĩa na kũtethya andũ kwa nzĩa syĩ kĩvathũkanyʼo. O nawʼo Ũsumbĩ wa Ngai nĩwĩthĩawa na mĩao ĩla ala masumbĩkĩtwe nĩwʼo maĩlĩte kũatĩĩa. Somai 1 Akolintho 6:9-11, na ĩndĩ mũineenea makũlyo aa:

• We wĩona nthĩ ta ĩkethĩwa yĩilye ata yĩla kĩla mũndũ ũkethĩwa ayĩatĩĩa mĩao ya Ngai ya mwĩkalĩle?a

• We nũkwona Yeova ta waĩlĩte kũtavya andũ manenge ndaĩa mĩao ya Ũsumbĩ wake? Nĩkĩ wasũngĩa ũu?

• Nĩ kyaũ kĩkwonanyʼa kana andũ ala mataatĩĩaa mĩao ĩsu no maalyũke?—Sisya mũsoa wa 11.

KĨLA TWEEMANYĨSYA

Ũsumbĩ wa Ngai nĩ silikalĩ ya wʼo ya ĩtunĩ ĩla ĩkasumbĩka nthĩ yonthe.

Makũlyo ma Kũsyokeleela

• Naaũ makasumbĩka Ũsumbĩnĩ wa Ngai?

• Nĩ kwa nzĩa yĩva tũtonya kwasya kana Ũsumbĩ wa Ngai nĩ mũseo vyũ kwĩ silikalĩ sya andũ?

• Yeova endaa ala makasumbĩkwa nĩ Ũsumbĩ wake meke ata?

MAŨNDŨ ANGĨ MA KWĨMANYĨSYA

Soma wone ũndũ Yesũ wamanyĩisye ĩũlũ wa vala Ũsumbĩ wa Ngai ũkethĩwa.

“Wʼo Ũsumbĩ wa Ngai wĩ Ngoonĩ Yaku?” (Ũvoo wĩ kĩsesenĩ)

Nĩkĩ Ngũsĩ sya Yeova inyuvaa kũlũmanyʼa na Ũsumbĩ wa Ngai vandũ va kũlũmanyʼa na silikalĩ sya andũ?

Nĩmeyumĩtye Kũlũmanyʼa na Ũsumbĩ wa Ngai (1:43)

Ĩmanyĩsye wone kĩla Mbivilia ĩwetete ĩũlũ wa Aklĩsto 144,000 ala Yeova ũnyuvĩte mesumbĩka vamwe na Yesũ.

“Naaũ Maendaa Ĩtunĩ?” (Ũvoo wĩ kĩsesenĩ)

Nĩ kyaũ kyaĩkĩĩthisye mũndũ mũka ũmwe waĩ yela kana Ngai e weka no we ũtonya kũete ũsili wa katĩ ĩũlũ wa nthĩ?

“Ũndũ Namanyie Ũla Ũkaete Ũsili wa Katĩ” (Amkeni!, Mwei wa 11, 2011)

Ũsumbĩ wa Ngai wambĩĩie kũsumbĩka ĩtunĩ mwaka wa 1914. Na mwakanĩ o ũsu nowʼo mĩthenya ya mũminũkĩlyo ya kũsumbĩka kwa andũ yambĩĩie. Twĩsĩ ũu ata? Sisya wone ũndũ Mbivilia yathanie, na ũndũ maũndũ methĩĩtwe mailye vaa ĩũlũ wa nthĩ kuma mwaka wa 1914, o vamwe na mĩtuo ya andũ.

1. Wathani wa Mbivilia wĩonanyʼa ata?

Ĩvuku ya Ndanieli nĩyonanĩtye kana Ũsumbĩ wa Ngai waĩ wambĩĩe kũsumbĩka mũthyanĩ wa ĩvinda yĩtĩtwe “mavinda mũonza.” (Ndanieli 4:16, 17) Ĩtina wa myaka mingĩ Yesũ nĩwesie kwĩta ĩvinda yĩu “mavinda ala manyuve ma mbaĩ ingĩ,” na oonanyʼa kana mayaĩ mathelu. (Luka 21:24) O tondũ tũkwona, mavinda asu mũonza mathelile mwakanĩ wa 1914.

2. Kuma mwaka wa 1914, maũndũ methĩĩtwe mailye ata vaa ĩũlũ wa nthĩ?

Amanyĩwʼa ma Yesũ mamũkũlilye atĩĩ: “Wonanyʼo nĩ wĩva wa kwĩthĩwa vo kwaku, na wa mũminũkĩlyo wa ĩvinda yĩĩ?” (Mathayo 24:3) Yesũ amasũngĩie amatavya kana ve maũndũ maingĩ ala maĩ mekĩke ĩtina wa ambĩĩa kũsumbĩka ĩtunĩ e Mũsumbĩ wa Ũsumbĩ wa Ngai. Maũndũ asu nĩ ta makaũ, ũnyivu wa lĩu, na ithingitho sya nthĩ. (Soma Mathayo 24:7.) O na ĩngĩ, Mbivilia nĩyasyokie yathana kana nũndũ wa mĩkalĩle ĩla andũ maĩ methĩwe nayo “mĩthenyanĩ ya mũminũkĩlyo,” mavinda maĩ methĩwe me “momũ.” (2 Timotheo 3:1-5) Maũndũ asu onthe nĩmonekete ũtheinĩ, na mũno mũno kuma mwaka wa 1914.

3. Nĩkĩ maũndũ methĩĩtwe me mathũku kuma yĩla Ũsumbĩ wa Ngai wambĩĩie kũsumbĩka?

Ĩtina wa ĩvinda ĩkuvĩ Yesũ amina kwĩthĩwa Mũsumbĩ wa Ũsumbĩ wa Ngai, nĩwokitie na Satani na ndaimoni syake. Satani nĩwasindiwe kaũnĩ ũsu. Mbivilia yaĩtye atĩĩ: “Ekwʼa nthĩ, na alaĩka make mekwʼa nthĩ vamwe nake.” (Ũvuanyʼo 12:9, 10, 12) Satani e na ũthatu mwingĩ mũno nũndũ nĩwĩsĩ okĩte kwanangwa. Kwoou nĩwe ũtumĩte kwĩthĩwa na mathĩna vaa ĩũlũ wa nthĩ. Ti ũsengyʼo kwĩthĩwa maũndũ mathũkĩte ũu! Ĩndĩ Ũsumbĩ wa Ngai ũkamina mathĩna asu onthe.

ĨMANYĨSYE MŨNANGO

4. Wathani wa Mbivilia wonanĩtye kana Ũsumbĩ wa Ngai wambĩĩie kũsumbĩka mwaka wa 1914

VITIO: Ũsumbĩ wa Ngai Wambĩĩie Kũsumbĩka 1914 (5:02)

Kwĩsĩla ndotonĩ, Ngai nĩwoonisye Mũsumbĩ Nevukatilesa wa Mbaviloni kĩla kyaĩ kĩkĩke ĩvindanĩ yũkĩte. Kwosana na ũndũ Ndanieli waeleisye, ndoto ĩsu yakonetye ũsumbĩ wa Nevukatilesa, na Ũsumbĩ wa Ngai.—Somai Ndanieli 4:17.a

Somai Ndanieli 4:20-26, na ĩndĩ mũitũmĩa maũndũ ala me kyatinĩ kũsũngĩa makũlyo aa maatĩĩe:

• (A) Nevukatilesa oonie kyaũ ndotonĩ yake? —Sisya mũsoa wa 20, na 21.

• (B) Ũla mũtĩ waĩ wĩkwe ata?—Sisya mũsoa wa 23.

• (C) Vesaa kwĩthĩwa ata mũthyanĩ wa ala “mavinda mũonza”?—Sisya mũsoa wa 26.

Ũndũ Ũla Mũtĩ Ũkonanĩtye na Ũsumbĩ wa Ngai

WATHANI (Ndanieli 4:20-36)

Ũsumbĩki

(A) Mũtĩ mũnene

Ũsumbĩki nĩwatilĩĩilwe

(B) “Tema mũtĩ ũvalũke” na “mavinda mũonza mavĩte”

Ũsumbĩki nĩwatũngĩĩiwe

(C) “Ũsumbĩ waku ũkeethĩwa wĩ mũlũmu kwaku”

Yĩla wathani ũsu weanĩie kwa ĩvinda ya mbee . . .

• (D) Mũtĩ ũsu woonanasya ũũ?—Sisya mũsoa wa 22.

• (E) Ũsumbĩki wake watilĩĩilwe ĩndĩĩ?​—Somai Ndanieli 4:29-33.

• (F) Veekĩkie ata kwa Nevukatilesa ĩtina wa ala “mavinda mũonza”?​—Somai Ndanieli 4:34-36.

KWĨANĨWʼA KWA ĨVINDA YA MBEE

Ũsumbĩki

(D) Mũsumbĩ Nevukatilesa wa Mbaviloni

Ũsumbĩki nĩwatilĩĩilwe

(E) Ĩtina wa Mwaka wa 606 mbee wa Klĩsto, Nevukatilesa nĩwawaie mũtwe na eethĩwa atatonya kũsumbĩka kwa ĩvinda ya myaka mũonza

Ũsumbĩki nĩwatũngĩĩiwe

(F) Nevukatilesa nĩwavoie na asyoka ũsumbĩnĩ wake

Yĩla wathani ũsu weanĩie kwa ĩvinda ya kelĩ . . .

• (G) Mũtĩ ũsu woonanasya aaũ? —Somai 1 Mavinda 29:23.

• (H) Ũsumbĩki woo watilĩĩilwe ata? Twĩsĩ ata kana mayaendeee na kũsumbĩka yĩla Yesũ waĩ vaa ĩũlũ wa nthĩ? —Somai Luka 21:24.

• (I) Ũsumbĩki ũsu watũngĩĩiwe va, na ĩndĩĩ?

KWĨANĨWʼA KWA ĨVINDA YA KELĨ

Ũsumbĩki

(G) Asumbĩ ma Isilaeli ala maũngamĩe Ũsumbĩ wa Ngai

Ũsumbĩki nĩwatilĩĩilwe

(H) Yelusaleme nĩyaanangiwe, na ũsumbĩki wa asumbĩ ma Isilaeli weethĩwa ũte vo vandũ va myaka 2,520

Ũsumbĩki nĩwatũngĩĩiwe

(I) Yesũ nĩwambĩĩie kũsumbĩka ĩtunĩ e Mũsumbĩ wa Ũsumbĩ wa Ngai

5. Nthĩ nĩvĩndũkĩte mũno kuma mwaka wa 1914

Ĩloelei VITIO.

VITIO: Nthĩ Nĩvĩndũkĩte Kuma Mwaka wa 1914 (1:10)

Yesũ nĩwathanie ũndũ maũndũ maĩ methĩwe mailye vaa ĩũlũ wa nthĩ ĩtina wa ambĩĩa kũsumbĩka. Somai Luka 21: 9-11, na ĩndĩ mũineenea ĩkũlyo yĩĩ:

• Nĩ maũndũ meva katĩ wa aa, wĩyoneete kana ũkewʼa ĩũlũ wamo?

Mũtũmwa Vaulo nĩwoonanisye ũndũ andũ maĩ methĩwe mailye mĩthenyanĩ ya mũminũkĩlyo. Somai 2 Timotheo 3:1-5, na ĩndĩ mũineenea ĩkũlyo yĩĩ:

• We nĩwonete andũ me na mĩkalĩle ta ĩsu?

6. Onanyʼa nũĩkĩĩe kana Ũsumbĩ wa Ngai yu nũsumbĩkĩte

Somai Mathayo 24:3, 14, na ĩndĩ mũineenea makũlyo aa:

• Nĩ wĩa wĩva wa vata ũkwonanyʼa kana yu Ũsumbĩ wa Ngai nũsumbĩkĩte?

• We ũtonya kũkwata wĩa ũũ mbau ata?

Yu Ũsumbĩ wa Ngai nũsumbĩkĩte ĩtunĩ, na o mĩtũkĩ nũkwambĩĩa kũsumbĩka vaa ĩũlũ wa nthĩ. Somai Aevelania 10:24-25, na ĩndĩ mũineenea ĩkũlyo yĩĩ:

• Twaĩlĩte kwĩka ata nũndũ nĩtũkwona “mũthenya ũsu nũthengeee”?

KĨLA TWEEMANYĨSYA

Wathani wa Mbivilia na maũndũ ala maendeee vaa ĩũlũ wa nthĩ nĩ ũĩkĩĩthyo wa kana Ũsumbĩ wa Ngai yu nũsumbĩkĩte. Twonanasya kana nĩtũĩkĩĩĩte ũu kwa kũtavanyʼa ĩũlũ wa Ũsumbĩ ũsu na kũendaa maũmbanonĩ ma kĩkundi.

Makũlyo ma Kũsyokeleela

• Nĩ kyaũ kyeekĩkie mũthyanĩ wa ala mavinda mũonza mawetetwe ĩvukunĩ ya Ndanieli?

• Nĩ kyaũ kĩũkũĩkĩĩthya kana Ũsumbĩ wa Ngai wambĩĩie kũsumbĩka ĩtunĩ mwaka wa 1914?

• Ũtonya kwonanyʼa ata nũĩkĩĩĩte vyũ kana yu Ũsumbĩ wa Ngai nũsumbĩkĩte ĩtunĩ?

MAŨNDŨ ANGĨ MA KWĨMANYĨSYA

Soma wone ũndũ andũ ala maandĩkaa maũndũ ma isitoli, na andũ angĩ, mawetete ĩũlũ wa moalyũku ala methĩĩtwe vaa ĩũlũ wa nthĩ kuma mwaka wa 1914.

“Ĩvinda Yĩla Mĩkalĩle ya Andũ Yathũkie Mĩtũkĩ” (Amkeni!, Mwei wa 4, 2007)

Soma wone ũndũ wathani ũla wĩ nthĩnĩ wa Mathayo 24:14, watumie mũndũũme ũmwe avĩndũka.

“Ndyaĩ Nĩkala Ndathaũkĩte Mũvĩla wa Baseball!” (Mũsyaĩĩsya Na. 3 2017)

Twĩsĩ ata kana wathani ũla wĩ nthĩnĩ wa Ndanieli kĩlungu kya kana ũkonetye Ũsumbĩ wa Ngai?

“Ũsumbĩ wa Ngai Wambĩĩe Kũsumbĩka Ĩndĩĩ? (Kĩlungu kya 1)” (Mũsyaĩĩsya, Mwei wa 10, 2014)

Nĩ kyaũ kĩkwonanyʼa kana ala “mavinda mũonza” mawetetwe ĩvukunĩ ya Ndanieli kĩlungu kya kana mathelile mwakanĩ wa 1914?

“Ũsumbĩ wa Ngai Wambĩĩe Kũsumbĩka Ĩndĩĩ? (Kĩlungu kya 2)” (Mũsyaĩĩsya, Ĩtukũ 1, Mwei wa 11, 2014)

Yu Ũsumbĩ wa Ngai nũsumbĩkĩte ĩtunĩ. Na o mĩtũkĩ nũkwĩka moalyũku manene kũũ ĩũlũ wa nthĩ. Eka tũsisye maũndũ amwe maseo ala tweteele Ũsumbĩ ũsu wĩanĩsye.

1. Ũsumbĩ wa Ngai ũkaete ata mũuo na ũsili wa katĩ?

Yesũ, ũla nĩwe Mũsumbĩ wa Ũsumbĩ wa Ngai, akaananga andũ athũku na silikalĩ sya andũ kaũnĩ wa Alimaketoni. (Ũvuanyʼo 16:14, 16) Ĩvindanĩ yĩu, watho ũũ wĩ Mbivilianĩ ũkeanĩa vyũ: “Vatiele ĩvinda ĩnini, na mũthũku ndakethĩwa.” (Savuli 37:10) Kwĩsĩla Ũsumbĩ ũsu, Yesũ akaĩkĩĩthya kana nĩkweethĩwa mũuo na ũsili wa katĩ kũũ ĩũlũ wa nthĩ.—Soma Isaia 11:4.

2. Kũkeethĩwa kũilye ata yĩla kwenda kwa Ngai kũkekwa ĩũlũ wa nthĩ?

Nũndũ wa Ũsumbĩ wa Ngai, “ala alũngalu makatiĩwa nthĩ, na makatũa vo kũvika tene na tene.” (Savuli 37:29) Kwasũanĩa ũtwĩe nthĩ vala kĩla mũndũ nĩ mũlũngalu, na nũmwendete Yeova vamwe na mũtui wake! Vai mũndũ ũkethĩawa e mũwau, na andũ onthe makekala tene na tene.

3. Ũsumbĩ wa Ngai ũkeanĩsya kyaũ andũ athũku mamina kwanangwa?

Andũ ala athũku mamina kwanangwa, Yesũ akasumbĩka kwa myaka 1,000. Ĩvindanĩ yĩu, e vamwe na ala 144,000 makasumbĩka nake, makatetheesya andũ kwĩthĩwa me alũngalu na mate na naĩ. Mũthyanĩ wa myaka ĩsu, nthĩ ĩkeethĩwa yĩ nzeũvye ĩkatwʼĩka valatiso mbanake, na andũ onthe makeethĩwa me atanu nũndũ wa kũatĩĩa mĩao ya Yeova. Kuma vu, Yesũ akatũnga Ũsumbĩ kwa Ĩthe wake, Yeova. ‘Ĩsyĩtwa ya Yeova yĩkataĩwa’ kũte ĩvinda yĩngĩ o na yĩva. (Mathayo 6:9, 10) Vakeethĩwa vaĩkĩĩthĩtwʼe vyũ kana Yeova nĩ Mũsumbĩ mũseo ũla ũsũvĩaa andũ make. Ĩtina wa ũu, Yeova akaananga Satani, ndaimoni, na ala makanyuva kũleana na Ũsumbĩ wake. (Ũvuanyʼo 20:7-10) Maũndũ onthe maseo ala makaetwe nĩ Ũsumbĩ wa Ngai, makekala tene na tene.

ĨMANYĨSYE MŨNANGO

4. Ũsumbĩ wa Ngai ũkamina silikalĩ sya andũ

‘Mũndũ nũmũsumbĩkaa mũndũ kwa kũmũũmĩsya.’ (Mũtavanyʼa 8:9, NWT) Yeova akatũmĩa Ũsumbĩ wake kũmina ũsili ũsu ũte wa katĩ.

Somai Ndanieli 2:44 na 2 Athesalonika 1:6-8, na ĩndĩ mũineenea makũlyo aa:

• Yeova na Mwana wake, Yesũ, makeekana ata na silikalĩ sya andũ vamwe na ala maikwataa mbau?

• Maũndũ ala wĩmanyĩĩtye ĩũlũ wa Yeova na Yesũ mekũĩkĩĩthya ata kana matambya ala makosa makoonanyʼa ũsili wa katĩ, na maikethĩwa na kyende?

5. Yesũ nĩ Mũsumbĩ mũseo vyũ

E Mũsumbĩ wa Ũsumbĩ wa Ngai, Yesũ akeeka maũndũ maingĩ makatethya andũ ala ũkethĩwa asumbĩkĩte kũũ ĩũlũ wa nthĩ. Ĩloelei VITIO mwone ũndũ Yesũ wonanĩtye kana e na wendi wa kũtethya andũ, na kana Ngai nũmũnengete ũtonyi wa kwĩka ũu.

VITIO: Yesũ Nĩwoonanisye Maũndũ Ala Makeanĩwʼa Nĩ Ũsumbĩ wa Ngai (1:13)

Maũndũ ala Yesũ weekie e ĩũlũ wa nthĩ, maĩ ngelekanyʼo ya kĩla Ũsumbĩ wa Ngai ũkeanĩsya ĩvinda yũkĩte. Nĩ moathimo meva katĩ wa aa monanĩtwʼe, weteele mũno kwona mayĩanĩa? Somai maandĩko ala monanĩtwʼe nĩ kana mũelewe moathimo asu nesanga.

6. Ũsumbĩ wa Ngai ũkatuma ĩvinda yũkĩte yĩthĩwa yĩ ĩseo

VITIO: Maũndũ Maseo Ala Tweteele Ĩvinda Yũkĩte (4:38)

Somai Savuli 145:16, na ĩndĩ mũineenea ĩkũlyo yĩĩ:

• We weewʼa ata wamanya kana Yeova nũvangĩte “kwĩanĩsya kwenda kwa kĩla kĩndũ kĩ thayũ”?

KĨLA TWEEMANYĨSYA

Ũsumbĩ wa Ngai ũkeanĩsya kĩla Ngai wendaa. Ũkatũngĩĩa nthĩ yĩthĩwe yĩ nzaũ, na andũ ala aseo maitũa vo tene na tene maendeee kũmũthaitha Yeova.

Makũlyo ma Kũsyokeleela

• Ũsumbĩ wa Ngai ũkathesya ĩsyĩtwa ya Yeova ata?

• Nĩkĩ tũte na nzika kana Ũsumbĩ wa Ngai ũkeanĩsya mawatho ala mawetetwe Mbivilianĩ?

• Katĩ wa maũndũ ala makeanĩwʼa nĩ Ũsumbĩ wa Ngai, nĩ wĩva ũweteele na mea mũno?

MAŨNDŨ ANGĨ MA KWĨMANYĨSYA

Soma nĩ kana ũmanye Alimaketoni nĩ kyaũ.

“Kaũ wa Alimaketoni Nĩ Kyaũ?” (Ũvoo wĩ kĩsesenĩ)

Soma wone maũndũ ala makekĩka ĩvindanĩ ya ũla “thĩna mũnene”—Mathayo 24:21.

“Ũla Thĩna Mũnene Nĩ Kyaũ?” (Ũvoo wĩ Kĩsesenĩ)

Ĩloele vitio wone ũndũ ala me na mĩsyĩ matonya kũvindĩĩsya me vamwe moathimo ala makaetwe nĩ Ũsumbĩ.

Sũanĩa wĩ Nthĩ Nzaũ (1:50)

Soma ngewa yĩ na kyongo, “Nĩnathĩnĩkaa na Kwĩkũlya Makũlyo Maingĩ,” wone ũndũ mũndũ ũmwe waleanaa na siasa sya nthĩ yake wakwatie mosũngĩo ma makũlyo mamũthĩnĩtye mũno.

“Mbivilia Nĩalyũlaa Andũ” (Mũsyaĩĩsya, Ĩtukũ 1, Mwei wa 1, 2012)