We no Ũĩkĩĩe Ndĩni Maũndũnĩ Makonetye Mbesa?

Mũndũ mũka wĩtawa Estellea wĩ na syana mũonza ndaakosa kũthi kanisanĩ. Mũndũ mũka ũsu easya: “Nĩnatavisye mũtavanyʼa wa ĩkanisa yitũ kana nĩngwenda kwĩmanyĩsya Mbivilia.” Ĩndĩ mũtavanyʼa ũsu ndaaĩsa kũmũmanyĩsya Mbivilia. Ĩtina, Estelle nĩwaekie kũi kanisanĩ. Aendee kwasya: “Atumĩa ma kanisa nĩmambandĩkĩe valũa mambĩĩte ethĩwa nditonya kũvika, nĩtũmae mbesa. Neesililye, ‘Mayonaa ta ũndũ naema kũi; kĩla mekwenda no mbesa syakwa.’”

Nake mũndũ mũka ũngĩ wĩtawa Angelina ũla wĩthĩĩtwe e wa kanisa aisye: “Kanisanĩ ĩla naendaa nĩvavĩtĩlawʼa kakavũ ka nthembo mavinda atatũ ĩla ũthaithi ũendee, na kĩla ĩvinda nĩtwendekaa tumye o kĩndũ. Maatindĩaa o kwĩtya mbesa. Neesililye, ‘Andũ aa mai na veva wa Ngai.’”

Ndĩni sya kwenyu nĩsyĩthĩwa itũmĩaa maũĩ kwĩtya mbesa kana ikalasimĩthya andũ masyumye? Ũndũ ũsu nĩwosanĩte na Mbivilia?

MBIVILIA ĨMANYĨASYA ATA?

Yesũ, ũla nĩwe mwambĩlĩlya wa Ũklĩsto, aisye: “Nĩmwosete mana, nenganai mana.” (Mathayo 10:8) Ũvoo ũla wĩ Mbivilianĩ ndũthooeka, na kĩla mũndũ wawenda nĩwaĩle kũũkwata.

Aklĩsto ma mbee maumasya mbesa va sya kũũngamĩa ngalama sya ũthaithi?

Kĩla ũmwe wa Aklĩsto asu aumasya ‘o tondũ ũtwʼĩte ngoonĩ yake: ti kwa kũlea kwenda, kana kwa kũingĩĩwʼa: nũndũ Ngai endete mũndũ ũnenganae na ũtanu.’ (2 Akolintho 9:7) Mũtũmwa Vaulo aisye: “Tũkĩtethya wĩa ũtukũ na mũthenya, nĩ kana tũikethĩwe mũio kwa mũndũ o na wĩva wenyu, twamũtavisye ũla ũvoo mũseo.” (1 Athesalonika 2:9) Nĩ kana Vaulo aũngamĩe ngalama syake wĩanĩ wake wa ũtavanyʼa, athũkũmaa wĩa wa kũtuma maeema.—Meko ma Atũmwa 18:2, 3.

NGŨSĨ SYA YEOVA SYĨKAA ATA?

Ngũsĩ sya Yeova syũmbanĩaa nyũmbanĩ ite mathĩmbĩĩ maingĩ syĩtawa Nyũmba sya Ũsumbĩ. Ĩndĩ iũngamĩaa ngalama syoo sya ũthaithi ata? Iivĩtĩlasya tũthũngĩ twa kwosanyʼa nthembo, o na iitũmĩaa vaasya kũsangĩthya mbesa. Vandũ va ũu, andũ ala mendeewʼa nĩ maũmbano maitũ nĩmatonya kwĩkĩa mũvothi ĩsandũkũnĩ ya mĩvothi yĩla yĩ Nyũmbanĩ ya Ũsumbĩ.

Vai nzika kana nĩvatũmĩkĩte ngalama kũkyavĩthya ĩkaseti yĩĩ na kũyĩnyaĩĩkya. Ĩndĩ ndũkesa kwĩwʼa yĩikathĩĩwa matangaasonĩ ma viasala kana kwĩwʼa andũ mayĩtya mbesa. Kĩeleelo kyoo kĩnene nĩ kũnyaĩĩkya ũvoo ũla wĩ Mbivilianĩ.

We wĩona ata: Nzĩa ĩsu ya kũĩvĩa ngalama nĩyosanĩte na ndeto sya Yesũ na ũndũ Aklĩsto ma mbee meekaa?