Mosũngĩo Ma Makũlyo Ma Mbivilia

Nĩkĩ tũvoyaa Ũsumbĩ wa Ngai wũke?

Ũsumbĩ wa Ngai nĩ silikalĩ yĩ ĩtunĩ.Yesũ eeie aatĩĩi make nĩmavoyae Ũsumbĩ ũsu wũke nũndũ ũkaveta ũthũku na ũiete mũuo. Vai silikalĩ o na yĩva ũmũnthĩ ĩtonya kũmina vyũ mowau, kana andũ ang’endu na ala mekaa maũndũ mate malũngalu. Ĩndĩ Ũsumbĩ wa Ngai nũtonya kũveta maũndũ asu onthe, naw’o ndũkalea kwĩka ũu. Ngai anyuvĩte Mwana wake, Yesũ, ethĩwe Mũsumbĩ wa Ũsumbĩ ũsu. O na nũnyuvĩte amwe katĩ wa aatĩĩi ma Yesũ mesumbĩka na Yesũ Ũsumbĩnĩ ũsu.—Soma Luka 11:2; 22:28-30.

Ũsumbĩ wa Ngai ũkilyĩ kwananga onthe ala matendaa Ngai aimasumbĩka. Kwoou ĩla tũũvoya Ũsumbĩ wa Ngai wũke twĩthĩawa tũimũkũlya Ngai avete silikalĩ sya andũ, na aiũngamya silikalĩ yake.—Soma Ndanieli 7:13, 14; Ũvuan’yo 11:15, 18.

Nĩkĩ twĩ na mũĩkĩĩo kana Ũsumbĩ wa Ngai ũkatethya andũ?

Yesũ nĩwe waĩle kũsumbĩka nũndũ e tei. Na nũndũ nĩ Mwana wa Ngai, e na ũtonyi wa kũtethya onthe ala mamwĩkaĩlaa Ngai.—Soma Savuli 72:8, 12-14.

Ũsumbĩ wa Ngai ũkatethya onthe ala mavoyaa kuma ngoonĩ Ũsumbĩ ũsu wũke, vamwe na ala mekaa kwenda kwa Ngai. Weetĩkĩla kwĩmanyĩsya kĩla Mbivilia ĩmanyĩasya ĩũlũ wa Ũsumbĩ wa Ngai, ndũkaaĩsa kwĩlila o na vanini.—Soma Luka 18:16, 17; Yoana 4:23.