Endeea Kũmũthũkũma Yeova wĩ Mũtanu
KWASŨANĨA nĩ mavinda meva wĩwʼaa mũyo wamalilikana. Nĩ ĩla watwaanie kana watwaiwe, kana nĩ ĩla mwasyaie kana kenyu ka mbee? Nao nĩwĩthĩwa ne mũthenya ũla wavatisiwe? Mũthenya ũsu waĩle kwĩthĩwa newʼo mũthenya wa vata vyũ thayũnĩ waku na waĩle kũtana mũno vyũ waũlilikana. Namo Aklĩsto ala angĩ matanie mũno ĩla moonie woonanyʼa ũtheinĩ kana nĩwendete Ngai na ngoo yaku yonthe, na thayũ waku wʼonthe, na kĩlĩko kyaku kyonthe, na vinya waku wʼonthe!—Mko. 12:30.
No nginya wĩthĩwe ũtanĩĩte mũno kũmũthũkũma Yeova kuma ĩla wavatisiwe. Ĩndĩ atavanyʼa amwe ma Ũsumbĩ nĩmaekete kwĩthĩwa me atanu tondũ mailyĩ tene. Nĩkĩ vekalĩte ũu? Twĩ na itumi syĩva sya kũendeea kũmũthũkũma Yeova twĩ atanu?
KĨLA KĨTUMĨTE AMWE MAEKA KŨMŨTHŨKŨMA YEOVA ME ATANU
Ũvoo wa Ũsumbĩ nũtumaa tũtana mũno. Ũvoo ũsu nĩ kana o mĩtũkĩ Yeova nũkwananga nthĩ ĩno nthũku na aiete nthĩ ĩngĩ nzaũ. O na ĩngĩ ĩandĩko ya Nzevania 1:14 yĩtũĩkĩĩthasya ũũ: “Mũthenya mũnene wa Yeova wĩ vakuvĩ, wĩ vakuvĩ na nĩwĩkalaatĩte mũno.” Ĩndĩ nĩtũtonya kwona mũthenya wa Yeova ta wĩkalĩte mũno kũte ũndũ twasũanĩaa. Kĩu nĩ kĩndũ kĩtonya kũtuma twasya ũtanu na tũileela ũthũkũminĩ witũ.—Nth. 13:12.
Kwĩthĩwa na ngwatanĩo ya kwaka vamwe na andũ ma Ngai nĩkũtwĩkĩaa vinya tũendeee kũmũthũkũma Yeova twĩ atanu. O na no kwĩthĩwa mwĩkalĩle wa athũkũmi ma Yeova nowʼo watumie twenda ũla wʼo na watuma twambĩĩa kũmũthũkũma twĩ atanu. (1 Vet. 2:12) Ĩndĩ nata Mũklĩsto akosewa ĩtambya nũndũ wa kũema kwĩkala kwosana na mĩao ya Ngai? Vekala ũu amwe ala mendeeiwʼe nĩ ũwʼo nũndũ wa kwona mwĩkalĩle mũseo wa andũ ma Yeova nĩmatonya kũkwʼa ngoo na maieka kwĩthĩwa me atanu.
Kwenda malĩ mũno o nakwʼo nĩkũtonya kũtuma Mũklĩsto aeka kwĩthĩwa e mũtanu ta tene. Ndevili atũmĩaa nthĩ ĩno yake nĩ kana atume tũĩkĩĩa kana twaĩle kũthooa syĩndũ mbingĩ o na ila ite sya vata. Ĩndĩ nũseo tũkalilikanaa ndeto ii sya Yesũ: “Kũi mũndũ ũtonya kũthũkũma mavwana elĩ: nũndũ akamũmena ũmwe, na akamwenda ũla ũngĩ; kana akalũmanʼya na ũmwe, na akamũvũthya ũla ũngĩ. Mũitonya kũthũkũma Ngai o na ũthwii.” (Mt. 6:24) Vaitonyeka tũkamũthũkũma Yeova twĩ atanu na ũyĩthĩa ngalĩko ĩla ĩngĩ twĩkĩĩte kĩthito twĩthĩwe na syĩndũ syonthe ila tũtonya kũkwata nthĩ ĩno.
‘KŨTANĨA NGAI WA ŨTANGĨĨO WITŨ’
Ala mendete Yeova mayĩwʼaa vinya wa kũmũthũkũma. (1 Yoa. 5:3) Lilikana kana Yesũ aisye: “Ũkai kwakwa, inywʼothe ala mũthĩnĩaa wĩa na ala mwĩ na mĩio mĩito, nakwa ngamũthũmũsya. Ĩyĩkĩei ĩsoki yakwa, na mũimanyĩwʼa ninyie; nũndũ nyie nĩ mũuu na nĩ na wĩnyivyo ngoonĩ: nenyu mũkasyonea ngoo syenyu ũthũmũo. Nũndũ ĩsoki yakwa yĩti vinya, na mũio wakwa nawʼo nĩ mũvũthũ.” (Mt. 11:28-30) Kwoou kwĩyĩkĩa ĩsoki ya Ũklĩsto wa wʼo kũtumaa tũtana na twĩwʼa twathũmũa. Na vate nzika, twĩ na kĩtumi kya kwĩthĩwa na ũtanu mwingĩ mũno ĩla tũũmũthũkũma Yeova. Ekai ĩndĩ tũneenee maũndũ atatũ ma vata ala meũtwonyʼa nĩkĩ nĩtũtonya ‘kũtanĩa Ngai wa ũtangĩĩo witũ.’—Ava. 3:18.
Tũthũkũmaa ũla watũnengie thayũ, nake nĩ Ngai mũtanu. (Meko 17:28) Nĩtwĩsĩ kana keka ti va Mũmbi witũ tũyĩthĩwa vo. Na kwoou o na ethĩwa vavĩtĩte myaka yĩana ata kuma twavatiswa, tũendeeaa kũmũthũkũma twĩ atanu.
Kĩla kĩtetheeasya Héctor ekale e mũtanu nĩ kũlilikana kĩla Ũsumbĩ ũkatwĩka vamwe na kwĩthĩwa na kĩthito kya kũmũthũkũma Yeova
Kwasũanĩa mwana-a-asa wĩtawa Héctor, ũla wamũthũkũmie Yeova e mũsyaĩĩsya wa kũthyũlũlũka kwa ĩvinda ya myaka 40. O na ‘e mũkũu’ no ũendeee kũtanĩa kũmũthũkũma Yeova. (Sav. 92:12-14) Mũka nĩ mũwau na kĩu nĩkĩtumĩte Héctor ethĩwa atatonya kũtũmĩa ĩvinda yingĩ aimũthũkũma Ngai ta tene. Ĩndĩ thĩna ũsu ndũtumĩte aeka kwĩthĩwa e mũtanu. Aĩtye atĩĩ: “O na kau ndyĩwʼaa mũyo noona kĩveti kyakwa kĩithĩnwʼa nĩ mwĩĩ na kũkĩsũvĩa ti ũndũ wĩ laisi, ndyaaĩsa kwĩtĩkĩlya ũndũ ũsu ũtume nĩeka kũtanĩa kũmũthũkũma ũla Ngai wa wʼo. Kĩla kĩndetheeasya kũmwenda Yeova vyũ na kũmũthũkũma na ngoo yonthe nĩ kũmanya kana nĩwe ũtumĩte nĩendeea kwĩthĩwa nĩ thayũ na kana oombie mũndũ e na kĩtumi. Nĩ kana ndikaeke kwĩthĩwa nĩ mũtanu, nĩtataa mũno nĩthĩwe na kĩthito ũtavanyʼanĩ na nĩnĩtataa kwĩkala nĩlilikene maũndũ ala Ũsumbĩ ũkatwĩka.”
Yeova nĩwatũnengie nthembo ya wovosyo, na kwoou atuma twĩthĩwa tũtonya kwĩkala twĩ atanu. Nĩ wʼo vyũ, nũndũ “Ngai nĩwendete nthĩ, nĩwanenganie mwana wake e ũmwe, nĩ kana o ũla ũmwĩtĩkĩlaa ndakae, ĩndĩ ethĩwe na thayũ ũtathela.” (Yoa. 3:16) Kwoou nĩtũtonya kũekewa naĩ sitũ na tũyĩthĩwa na wĩkwatyo wa thayũ ũtathela twaĩkĩĩa nthembo ya Yesũ ĩla Ngai watũnengie nũndũ nũtwendete. Ve kĩtumi kĩseo ta kĩu kya kũmũtũngĩa Ngai mũvea? Na tyo wʼo kana ethĩwa nĩtũtũngaa mũvea nũndũ wa nthembo ya wovosyo, tũilea kwĩthĩwa tũimũthũkũma Yeova twĩ atanu?
Jesús nĩweetheeangisye kĩlasi na kuma vu aminie myaka aimũthũkũma Yeova e mũtanu
Mwana-a-asa Jesús kuma Mexico aisye ũũ: “Wĩa wakwa wandwʼĩte ngombo, na mavinda amwe nathũkũmaa masaa maingĩ mũno o na kau ndyaĩ lasima nĩke ũu. Nathũkũmaa ũu nĩ kana nzeũvye mbesa mbingangĩ. Ĩndĩ nĩnesie kwĩmanyĩsya ĩũlũ wa Yeova na ũndũ waumisye Mwana wake mwendwa kwondũ wa andũ. Kyu kyatumie nĩthĩwa na wendi mwingĩ mũno wa kũmũthũkũma. Nĩneeyumisye nĩmũthũkũme Yeova, na natia kambunĩ ĩla nathũkũmĩe vandũ va myaka 28 nĩ kana nĩtwʼĩke mũthũkũmi wa ĩvinda yonthe.” Kuma vu aminie myaka aimũthũkũma Yeova e mũtanu.
Mwĩkalĩle ũla yu twĩ nawʼo ndũtumaa twĩmakĩa, ĩndĩ ũtumaa tũtana mũno. Nũlilikene ũndũ wekalaa ũtambĩte kwĩmanyĩsya ĩũlũ wa Yeova? Mũtũmwa Vaulo aandĩkĩe Aklĩsto ala maĩ Lomi amalilikanĩtye kana ĩvinda yĩmwe maĩ “ngombo sya naĩ,” ĩndĩ nĩmaalyũkĩte makatwʼĩka “ngombo sya ũlũngalu.” Ũsyao wa Aklĩsto asu ‘nĩwavikĩte kũvathĩka,’ kana kwa ndeto ingĩ, mwĩkalĩle woo waĩ mũtheu, na kwoou waĩ ũtonya kũtuma mesa kũkwata thayũ ũtathela. (Alo. 6:17-22) O naitũ twĩkalaa mwĩkalĩle mũtheu, na kwoou tũyĩmakĩaa nũndũ tũikwatawa nĩ mathĩna ala makwataa andũ me na mwĩkalĩle mũthũku na wa ũngʼendu. We wĩona ũsu ta ũtanu wĩana ata?
“Myaka ĩla mĩseo vyũ ya thayũ wakwa nĩ ĩla nĩthĩĩtwe ngĩmũthũkũma Yeova.”—Jaime
Kwasũanĩa ĩũlũ wa Jaime. Tene ndaĩkĩĩaa kana kwĩ Ngai na ndaĩkĩĩaa kana syĩndũ syeekie kũmbwa. O na nĩwathaũkaa ĩthaũ ya kũkita yĩtawa boxing. Nĩwambĩĩe kũthi maũmbanonĩ ma Kĩklĩsto na endeewʼa mũno nĩ wendo ũla woonie vau. Ĩndĩ nĩ kana aekane na mwĩkalĩle wake, eethĩie no nginya amũvoye Yeova amũtetheesye aĩkĩĩe kana e kwʼo. Jaime easya atĩĩ: “O kavola kwa kavola nesie kũmanya kana kwĩ Asa ũtwendete na we nĩ Ngai wĩ tei.” Aendeee kwasya: “Kũkwata ĩla mĩao mĩlũngalu ya Yeova nĩkwĩthĩĩtwe kũinzũvĩa. Keka ndyaalyũka nĩthĩwa nakwie o tondũ amwe ala twathaũkaa ĩmwe yĩla ĩthaũ ya boxing makwie. Myaka ĩla mĩseo vyũ ya thayũ wakwa nĩ ĩla nĩthĩĩtwe ngĩmũthũkũma Yeova.”
NDŨKANOE!
We wĩona ta twaĩle kwĩwʼa ata kavindanĩ kaa tweteele mũthya wa nthĩ ĩno nthũku? Lilikana kana ‘tũvuĩaa ũla veva,’ na kwoou ‘tũkaketha thayũ ũtathela.’ Nũndũ wa ũu, “tũikanoe nĩ kwĩka nesa: nũndũ kyathĩ kyavika tũkaketha, ethĩwa tũileela.” (Aka. 6:8, 9) Kwoou kwa vinya wa Yeova, ekai tũendeee kũmĩĩsya, tũendeee kwĩkĩa kĩthito twĩthĩwe na nguma ila itonya kũtũtetheesya twĩvonoka “thĩnanĩ ũla mũnene,” na nĩtũendeee kũmũthũkũma Yeova twĩ atanu o na twakwatwa nĩ mathĩna.—Ũvu. 7:9, 13, 14; Yak. 1:2-4.
No twĩthĩwe na mũĩkĩĩo kana tũkanewa ĩtuvi twoomĩĩsya. Twĩ na mũĩkĩĩo ũsu nũndũ Ngai nĩwonaa nesa vyũ ũndũ tũmũthũkũmaa, na nĩwĩsĩ nesa kana nĩtũmwendete na nĩtwendete ĩsyĩtwa yake. Twaendeea kũmũthũkũma Yeova twĩ atanu, tũkekala ta mũandĩki wa Savuli, Ndaviti, ũla waisye atĩĩ: “Nĩmwiĩte Yeova mbee wakwa mavinda onthe: nĩkwĩthĩwa e kwʼokonĩ kwakwa kwa aũme, ndikathingithangwʼa. Kwondũ wa ũu ngoo yakwa yĩ na ũtanu, na ũnene wakwa nũtanaa: mwĩĩ wakwa nawʼo ũkatũaa vate mũisyo.”—Sav. 16:8, 9.