Nĩkĩ Kũmanya Kana Mbivilia Yumĩte Vaasa Nĩ Ũndũ wa Vata?

Vai ĩvuku yĩngĩ ya ndĩni yĩilyĩ ta Mbivilia. O na kwa ĩvinda ĩasa no Mbivilia yoka ĩtetheesye andũ aingĩ makethĩwa na mũĩkĩĩo mũlũmu. Vai ĩvuku yĩngĩ andũ maaendeewʼa nĩ kũyĩsoma ta Mbivilia na yaaneenewa naĩ ta Mbivilia.

Kwa ngelekanyʼo, asomi amwe monaa Mbivilia ila twĩ nasyo ite sya kwĩkwatwʼa nũndũ maandĩko ala me vo ti mo ala maandĩkiwe nĩ aandĩki ma Mbivilia. Mũsomi ũmwe wa maũndũ ma ndĩni aĩtye atĩĩ: “Tũitonya kwĩthĩwa na mũĩkĩĩo kana maũndũ ala maandĩkĩtwe Mbivilianĩ maumĩĩiwʼe nesa kuma mavukunĩ ala maĩ ma mbee vyũ.” Aendeee kwasya, “Maandĩko ala twĩ namo me mavĩtyo maingĩ, na maingĩ ma mo maandĩkiwe myaka mingĩ mũno aandĩki ma Mbivilia maminie kũandĩka, na kwoou me kĩvathũkanyʼo kĩnene mũno na mavuku asu maandĩkĩtwe mbee.”

Andũ angĩ nĩmethĩawa na nzika ĩũlũ wa maũndũ ala me Mbivilianĩ nũndũ wa maũndũ ma ndĩni ala mamanyĩĩtwʼe. Kwa ngelekanyʼo, mũndũũme wĩtawa Faizal amanyĩiwʼe nĩ asyai make ala mataĩ Aklĩsto kana Mbivilia nĩ ĩvuku ĩtheu ĩndĩ nĩyavĩndũiwe na ti ũndũ yailyĩ mwambĩĩonĩ. Faizal aĩtye atĩĩ: “Ũndũ ũsu nĩwatumaa nĩthĩwa na nzika ĩla mũndũ wambĩĩa kũneena nakwa ĩũlũ wa Mbivilia.” Eekaa ũu nũndũ asũanĩaa kana Mbivilia nĩyavĩndũiwe, na ti ũndũ yailyĩ mwambĩĩonĩ!

Wʼo nĩ ũndũ wa vata kũmanya kana Mbivilia ĩilyĩ ũndũ yailyĩ mwambĩĩonĩ kana nĩyavĩndũiwe? Nĩ kana tũmanye kana nĩ ũndũ wa vata, kwasũanĩa makũlyo aa: We no ũĩkĩĩe maũndũ maseo ala mathanĩtwe Mbivilianĩ ethĩwa ndwĩsĩ kana mawathani asu maĩ amwe katĩ wa ndeto ila Yeova waneenie? (Alomi 15:4) No ũtũmĩe mĩao ĩla yĩ Mbivilianĩ ĩla ũkwĩka motwi maito ĩũlũ wa wĩa, maũndũ ma mũsyĩ, kana ũthaithi, ethĩwa Mbivilia ila twĩ nasyo syĩ mavĩtyo maingĩ na ti Ndeto ya Ngai?

O na kau mavuku ma mbee ala maandĩkiwe nĩ aandĩki ma Mbivilia nĩmathelile, no tũkwate mavuku ma tene ala maumĩĩiwʼe kumana na mavuku asu, o vamwe na mavuku ngili mbingĩ ma tene ala matũmĩawa kũalyũla Mbivilia. Kweethĩiwe ata mavuku asu ma tene maema kwoa, kwanangwa, na andũ maema kũvĩndũa kĩla kyaandĩkĩtwe nthĩnĩ? Kwĩthĩwa Mbivilia ĩtaanangwa nĩ syĩndũ isu syonthe kwĩtũĩkĩĩthya ata kana Mbivilia ila twĩ nasyo nĩ sya wʼo? Soma ĩkaseti yĩĩ nĩ kana ũkwate mosũngĩo ma makũlyo asu.