We No Wĩtĩkĩle Kũsianĩsya Kĩla Ũĩkĩĩaa na Kĩla Mbivilia Ĩmanyĩasya?

WE WĨTHĨAWA wĩ Mũklĩsto? Ethĩwa wĩ Mũklĩsto, wĩ ũmwe katĩ wa andũ mbee wa mbilioni ilĩ ĩũlũ wa nthĩ ala maasya kana nĩ Aklĩsto. Ũmũnthĩ, kwĩ ndĩni mbingĩ syĩyĩtaa sya Kĩklĩsto, ĩndĩ syĩthĩawa ĩvathũkene nũndũ wa maũndũ ala kĩla ĩmwe yĩĩkĩĩaa. Kwoou mũĩkĩĩo waku nũtonya kwĩthĩwa wĩ kĩvathũkanyʼo vyũ na wa ala angĩ maasya kana nĩ Aklĩsto. Yo nĩ ũndũ wa vata mũndũ kũtinda aithĩnĩka nũndũ wa kĩla ũĩkĩĩaa? Ĩĩ, mũndũ nĩwaĩle kũthĩnĩka ethĩwa nũkwenda kũatĩĩa Ũklĩsto wa wʼo kwosana na ũndũ wonanĩtwʼe Mbivilianĩ.

Aatĩĩi ma tene ma Yesũ Klĩsto nĩmo matwʼĩkie “Aklĩsto.” (Meko ma Atũmwa 11:26) Vayaĩ vata wa kũmantha masyĩtwa angĩ ma kũmavathũkanyʼa nũndũ maĩ na mũĩkĩĩo ũmwe. Aklĩsto asu nĩmaatĩĩaa momanyĩsyo ma ũla wambĩĩisye Ũklĩsto, nake nĩ Yesũ Klĩsto mwene. Nao nata ĩũlũ wa ndĩni ĩla ũendaa? Nĩmanyĩasya kĩla Klĩsto wamanyĩasya na kĩla aatĩĩi make ma tene maĩkĩĩaa? Ũtonya kũmanya ata kana kwa wʼo nĩyĩkaa ũu? Vai nzĩa ĩngĩ ĩtonya kũũtetheesya ate o kũtũmĩa Mbivilia.

Kwasũanĩa ũndũ ũũ: Yesũ Klĩsto nĩwanengete Maandĩko ndaĩa nũndũ nĩweesĩ nĩmo Ndeto ya Ngai. Ndeetĩkĩlanaa na andũ ala maatĩĩaa syĩthĩo sya andũ vandũ va kũatĩĩa momanyĩsyo ma Mbivilia. (Maliko 7:9-13) Vate nzika, maũndũ ala aatĩĩi ma wʼo ma Yesũ maĩkĩĩaa maĩle kwosana na kĩla kĩ Mbivilianĩ. Kwoou, kĩla Mũklĩsto aĩle kwĩkũlya atĩĩ: “Mo momanyĩsyo ma ndĩni ĩla nĩendaa nĩmosanĩte na kĩla Mbivilia ĩmanyĩasya?” Nĩ kana ũsũngĩe ĩkũlyo yĩu, sianĩsya kĩla ũĩkĩĩaa na kĩla Mbivilia ĩmanyĩasya.

Yesũ aisye kana ũthaithi witũ kwa Ngai waĩle kwĩthĩwa wosanĩte na ũwʼo ũla wĩ Mbivilianĩ. (Yoana 4:24; 17:17) O nake mũtũmwa Vaulo aisye kana ũtangĩĩo witũ wumanaa na “kũmanya ũla wʼo.” (1 Timotheo 2:4) Kwoou, nĩ ũndũ wa vata maũndũ ala tũĩkĩĩaa makethĩwa mosanĩte na ũwʼo ũla wĩ Mbivilianĩ nũndũ ũndũ ũsu no ũtume tũkwata thayũ kana tũkaũkosa!

ŨNDŨ TŨTONYA KŨSIANĨSYA MAŨNDŨ ALA TŨĨKĨĨAA NA KĨLA MBIVILIA ĨMANYĨASYA

Twĩũkũlya ũsome makũlyo aa thanthatũ na ũisisya ũndũ masũngĩĩtwe Mbivilianĩ. Soma maandĩko ala monanĩtwʼe, na ũisũanĩa kwa ũliku mosũngĩo ala manenganĩtwe. Wamina kwĩka ũu ĩkũlye-ĩ, ‘Mo momanyĩsyo ma ndĩni ĩla nĩendaa nĩmosanĩte na kĩu Mbivilia ĩmanyĩasya?’

Makũlyo asu nĩmatonya kũũtetheesya kũsianĩsya momanyĩsyo ma ndĩni ĩla ũendaa na kĩla Mbivilia ĩmanyĩasya na ũndũ ũsu ũkaũtethya mũno. No wende kũsianĩsya momanyĩsyo angĩ ala ndĩni ĩla ũendaa ĩmanyĩasya na kĩla Mbivilia ĩmanyĩasya? Ngũsĩ sya Yeova no iũtetheesye kũmanya nesa kĩla Mbivilia ĩmanyĩasya. No ũkũlye ũmwe woo aũmanyĩsye Mbivilia vate ndĩvi. O na no ũvingũe Kĩsese kitũ kya indaneti kya jw.org/kam.

1 ĨKŨLYO: Ngai nũũ?

ŨSŨNGĨO: Nĩ Yeova, Ĩthe wa Yesũ, na nĩwe Ngai mwene vinya wʼonthe na Mũmbi wa syĩndũ syonthe.

ŨNDŨ MBIVILIA YAASYAA:

“Nĩtũũtũngĩa Ngai mũvea, Ĩthe wa Mwĩaĩi waitũ Yesũ Klĩsto, tũkĩmũvoyea mavinda onthe.”—Akolosai 1:3.

“Nue Yeova, o we wĩ weka; nue woombie ĩtu, ĩtu yĩla yĩ ĩũlũ wa matu, vamwe na nguthu yonthe yamo, na nthĩ na syĩndũ syonthe syĩ ĩũlũ wayo, na maũkanga na syonthe syĩ nthĩnĩ wamo, na nue wisũvĩaa syonthe; na nguthu ya ĩtunĩ nĩkũthaithaa.”—Neemia 9:6.

No ũsisye Yoeli 2:32; 1 Timotheo 1:17.

2 ĨKŨLYO: Yesũ Klĩsto nũũ?

ŨSŨNGĨO: Yesũ nĩwe Mwana mũsyawa wa mbee wa Ngai. Yesũ nĩwoombiwe, na kwoou aĩ na mwambĩlĩĩlyo. Yesũ nũmwĩnyivĩasya Ngai na nĩwĩkaa kwenda Kwake.

ŨNDŨ MBIVILIA YAASYAA:

“Asa nĩ mũnene kwĩ nyie.”—Yoana 14:28.

“[Yesũ] nĩ mũvwʼano wa Ngai ũtonekaa, mũsyawa ũla wĩ mbee wa syũmbe syonthe.”—Akolosai 1:15.

No ũsisye Mathayo 26:39; 1 Akolintho 15:28.

3 ĨKŨLYO: Veva mũtheu nĩ kyaũ?

ŨSŨNGĨO: Veva mũtheu nĩ vinya wa Ngai ũla ũtũmĩaa kwĩanĩsya kwenda kwake, ĩndĩ ti mũndũ. Andũ no mausũwe nĩ veva mũtheu na ũkamanenga vinya.

ŨNDŨ MBIVILIA YAASYAA:

“Yĩla Elisavethi wewie ngethi ya Meli, kana kathaka ĩvunĩ yake; na Elisavethi ausũwa nĩ Veva Mũtheu.”—Luka 1:41.

“Mũkoosa vinya, yĩla Veva Mũtheu wĩũka ĩũlũ wenyu.” —Meko ma Atũmwa 1:8.

No ũsisye Mwambĩlĩlyo 1:2; Meko ma Atũmwa 2:1-4; 10:38.

4 ĨKŨLYO: Ũsumbĩ wa Ngai nĩ kyaũ?

ŨSŨNGĨO: Nĩ silikalĩ ya Ngai ya ĩtunĩ. Yesũ nĩwe Mũsumbĩ wa Ũsumbĩ wa Ngai. O mĩtũkĩ, Ũsumbĩ ũsu nũkatuma kwenda kwa Ngai kwĩkwa nthĩ yonthe.

ŨNDŨ MBIVILIA YAASYAA:

“Na mũlaĩka wa mũonza avuva soo; na kweethĩwa mawasya manene ĩtunĩ, nao masya, Ũsumbĩ wa nthĩ nũtwʼĩkĩte ũsumbĩ wa Mwĩaĩi waitũ, na wa Klĩsto wake: nake akasumbĩka kũvika tene na tene.”—Ũvuanʼyo 11:15.

No ũsisye Ndanieli 2:44; Mathayo 6:9, 10.

5 ĨKŨLYO: Andũ ala aseo onthe makathi ĩtunĩ?

ŨSŨNGĨO: Aiee. Kĩkundi kya andũ anini aĩkĩĩku ala metawa “ĩĩthya ĩnini” nĩmo manyuvĩtwe nĩ Ngai methi ĩtunĩ. Makasumbĩka vamwe na Yesũ ĩũlũ wa nthĩ.

ŨNDŨ MBIVILIA YAASYAA:

“Manyai ũkĩa, inywʼĩ ĩĩthya ĩnini; nũndũ Ĩthe wenyu nĩwendeewʼe nĩ kũmũnenga ũsumbĩ.”—Luka 12:32.

‘Makeethĩwa athembi ma Ngai na ma Klĩsto, na makasumbĩka vamwe nake myaka ngili.’—Ũvuanʼyo 20:6.

No ũsisye Ũvuanʼyo 14:1, 3.

6 ĨKŨLYO: Ngai e na mũvango mwaũ kwondũ wa nthĩ na andũ?

ŨSŨNGĨO: Ungu wa Ũsumbĩ wa Ngai, nthĩ ĩkatwʼĩka nzaũ na andũ aĩkĩĩku maitanĩa kwĩthĩwa mate kũwaa, matanĩe mũuo ũtakathela, na mayĩkala tene na tene.

ŨNDŨ MBIVILIA YAASYAA:

“Ala auu makatiĩwa nthĩ, Na makeetanʼya mũuonĩ mwingĩ.”—Savuli 37:10, 11.

“Akavyaĩa methoi onthe methonĩ moo; na kĩkwʼũ kĩikethĩwa vo ĩngĩ; o na kũikethĩwa ĩngĩ kũmeta, kana kũĩa, kana woo: maũndũ ma mbee nĩ mavĩtu.”—Ũvuanʼyo 21:3, 4.

No ũsisye Savuli 37:29; 2 Vetelo 3:13.