Kũmanyĩsya Ũla Wʼo

1, 2. (a) Nĩ wĩa wĩva Yesũ woonaa wĩ wa vata vyũ, na nĩkĩ? (b) Twaĩlĩte kwĩka ata nĩ kana tũtwʼĩke “atethya ma wĩa vamwe na Ngai” me na mosyao maseo?

YESŨ KLĨSTO aĩ vundi wa mbwaũ na mũthũkũmi wa Ngai. (Mko. 6:3; Alo. 15:8) Mawĩa asu elĩ amatethisye nesa na ũtũĩka. Yĩla waĩ vundi, nĩweemanyĩisye kũtũmĩa nesa mĩio ya wĩa nĩ kana aseũvye syĩndũ nzeo. O ta ũu, yĩla waĩ mũtavanyʼa wa ũvoo mũseo, nĩwatũmĩie nesa ũmanyi mwingĩ ũla waĩ nawʼo wa Maandĩko nĩ kana atetheesye andũ maelewe ũwʼo ũla wĩ Ndetonĩ ya Ngai. (Mt. 7:28; Luka 24:32, 45) E na myaka 30 nĩwaekanie na wĩa wake wa ũvundi, nũndũ nĩweesĩ kana vai wĩa ũngĩ wa vata ta kũmũthũkũma Ngai. We mwene aisye kana kĩndũ kĩmwe kyatumie atũmwa kũũ nthĩ nĩ kũtavanyʼa ũvoo mũseo wa Ũsumbĩ wa Ngai. (Mt. 20:28; Luka 3:23; 4:43) Vai kĩndũ kĩngĩ Yesũ woonaa kĩ kya vata ta kũtavanyʼa, na nĩwendaa angĩ malike wĩanĩ ũsu.—Mt. 9:35-38.

² Noĩthwa tũte mavundi ma mbwaũ, ĩndĩ ithyonthe twĩ atavanyʼa ma ũvoo mũseo. Wĩa ũsu nĩ wa vata vyũ nũndũ o na Ngai nũũtethasya. Nĩkyo kĩtumi twĩtawa “atethya ma wĩa vamwe na Ngai.” (1 Ako. 3:9; 2 Ako. 6:4) Nĩtwĩtĩkĩlaa kana “ndeto [ya Yeova] yonthe nĩ wʼo.” (Sav. 119:159, 160) Nũndũ wa kĩtumi kĩu, nĩtwendaa kũĩkĩĩthya vyũ kana yĩla twĩ ũtavanyʼa ‘nĩtũũvathũkanyʼa [kana, nĩtũũtũmĩa] ũndũ waĩle ndeto ya ũla wʼo.’ (Soma 2 Timotheo 2:15.) Kwoou nĩtwaĩle kũendeea kwĩkĩa kĩthito twĩmanyĩsye kũtũmĩa Mbivilia nesa vyũ, nĩkwĩthĩwa nĩyo kĩndũ kĩla kya vata vyũ tũtũmĩaa mũno kũmanyĩsya angĩ ũwʼo ĩũlũ wa Yeova, Yesũ, na Ũsumbĩ. Nĩ kana tũtwʼĩke atavanyʼa aseo, ũseũvyo nũsyokete ũkatũmanthĩa syĩndũ ingĩ sya vata ila twaĩle kwĩthĩwa twĩsene nasyo. Isu nĩsyo tũsyĩtaa “Syĩndũ Ila Tũtũmĩaa Mũno Kũmanyĩsya.”

3. Wĩa witũ ũla mũnene kavindanĩ kaa katiele waĩle kwĩthĩwa wĩ wĩva? Kwosana na Meko ma Atũmwa 13:48, twaĩle kũmantha aaũ?

³ Nũtonya kwĩkũlya nĩkĩ tũsyĩtaa Syĩndũ Ila Tũtũmĩaa Mũno Kũmanyĩsya na ti Syĩndũ Ila Tũtũmĩaa Mũno Kũtavanyʼa. “Kũtavanyʼa” nĩ kũtavya angĩ ũvoo mũna, ĩndĩ “kũmanyĩsya” nĩ kũelesya mũndũ ũvoo ũsu aũelewe, ũlike ngoonĩ, na ũituma atũmĩa kĩla weemanyĩsya. Kavindanĩ kaa katiele nthĩ ĩno ĩtanamba kwanangwa, wĩa witũ ũla mũnene waĩlĩte kwĩthĩwa ne kũmantha andũ tũmamanyĩsye Mbivilia na tũimamanyĩsya ũla wʼo. Nĩ kana twĩanĩsye wĩa ũsu, twaĩlĩte kwĩthĩwa na kĩthito kingĩ kya kũmantha onthe ala me na “ngoo nzeo kwondũ wa thayũ wa tene na tene,” na tũimatetheesya matwʼĩke athaithi ma Yeova.—Soma Meko ma Atũmwa 13:44-47, na ũisoma mũsoa wa 48 nthĩnĩ wa maelesyo ma kwongeleela.a

4. Tũtonya kũmanya ata ala me na “ngoo nzeo kwondũ wa thayũ wa tene na tene,” na tũtonya kũmakwata ata?

⁴ Tũtonya kũmanya ata kana mũndũ e na “ngoo nzeo kwondũ wa thayũ wa tene na tene”? O ta atũmwa, tũkwataa andũ ta asu o kwa kũtavanyʼa. Kwoou twaĩle kwĩka o ũũ Yesũ weeaie: “Ndũa kana mũsyĩ o ũla mwĩvota, manthai vo mũndũ ũla mwaĩlu.” (Mt. 10:11) Nĩtwĩsĩ kana ti laisi andũ mate na ngoo nzeo, me na mĩtũlyo, kana matekwenda kũmanya ĩũlũ wa Ngai methukĩĩsye ũvoo mũseo. Nũndũ wa ũu, tũmanthaa andũ ala me na ngoo nzeo, menyivĩtye, na mekwenda mũno kũmanya ũla wʼo. Wĩa wa kũmantha andũ ta asu no tũũelekanyʼe na wĩa ũla Yesũ ũtonya kwĩthĩwa atethasya yĩla waĩ vundi. Yesũ nĩwoosaa ĩvinda akamantha mũtĩ ũtonya kuma mbwaũ nzeo sya kũseũvya mĩio ya nyũmba, mĩomo, masoki, kana syĩndũ ingĩ. Akwata mũtĩ ũla ũkwenda nĩwoosaa mĩio yake, akatũmĩa ũtũĩka wake, na aiseũvya kĩla ũvangĩte. No nginya twĩke o take wĩanĩ ũũ wa kũtwʼĩkĩthya ala me na ngoo nzeo amanyĩwʼa.—Mt. 28:19, 20.

5. Twaĩlĩte kwĩthĩwa twĩsĩ ata ĩũlũ wa kĩla kĩmwe katĩ wa syĩndũ ila tũtũmĩaa mũno kũmanyĩsya? Nengane ngelekanyʼo. (Sisya visa ĩthangũnĩ ya 11.)

⁵ Kĩla mũio wa wĩa wĩthĩawa na vata wawʼo. Kwasũanĩa mĩio ĩla Yesũ wĩthĩwa atũmĩaa.b Nĩwaaĩle kwĩthĩwa na mĩio ya kũthima mbwaũ na kũvana ithimo syake, mĩio ya kũtilanga i mbwaũ, ya kũtheketha maima, ya kwasa syĩkale ũndũ ũkwenda, ya kũkũna landa, ya kũilũnga, na ĩngĩ ya kũikwatanyʼa. O ta ũu, kĩla kĩmwe katĩ wa syĩndũ ila tũtũmĩaa mũno kũmanyĩsya kĩthĩawa na vata wakyo. Kwoou ekai twone nĩ syĩndũ syĩva tũnengetwe na tũyĩmanyĩsya ũndũ tũtonya kũitũmĩa.

SYĨNDŨ ILA ITETHEEASYA ANDŨ KŨTŨMANYA

6, 7. (a) We ũtũmĩĩte ata kaati sya kwelekelya andũ kĩsesenĩ kitũ? (b) Tũvalũa twa kũthokanyʼa maũmbanonĩ twĩanĩasya maũndũ meva elĩ?

⁶ Kaati sya Kwelekelya Andũ Kĩsesenĩ. Tũũ no tũkaati tũnini, ĩndĩ nĩ tũseo mũno twa kũtetheesya andũ matũmanye na kũmaelekelya kĩsesenĩ kitũ. Malika kĩsesenĩ no mamanye maũndũ maingĩ ĩũlũ witũ, na no makũlye mamanyĩwʼe Mbivilia. Andũ mbee wa 400,000 nĩmatũmĩĩte kĩsese kya jw.org kũkũlya mamanyĩwʼe Mbivilia, na angĩ maana maingĩ nĩmakũlasya kĩla mũthenya! No ũseo kĩla mũthenya ũkakuaa kaati isu nĩ kana mwanya wa kumya ũkũsĩ waumĩla ũitũmĩe.

⁷ Valũa sya Kũthokanyʼa. Kavalũa kala tũkothaa kũnenga andũ tũimathokya ũmbano keanĩasya maũndũ elĩ. Kethĩawa kaandĩkĩtwe: “Wĩmũthokye wĩmanyĩsye Mbivilia na Ngũsĩ sya Yeova.” Na ĩndĩ nĩkethĩawa konanĩtye kana no wĩmanyĩsye Mbivilia “maũmbanonĩ maitũ ma Kĩklĩsto,” “kana wĩ na mũndũ wa kũũmanyĩsya.” Kwoou kavalũa kau katethasya kũndũ kwĩlĩ: katavasya andũ nithyĩ aaũ, na kaisyoka kaithokya ala me na “ũkya wa ngoo” memanyĩsye Mbivilia naitũ. (Mt. 5:3) Ĩndĩ ũu ti kwasya andũ mayũka maũmbanonĩ ethĩwa mainetĩkĩla kũmanyĩwʼa Mbivilia. Mooka makeeyoneaa ũndũ matonya kwĩmanyĩsya maũndũ maingĩ ma wʼo Mbivilianĩ.

8. Nĩkĩ ve vata mũnene wa andũ kũka maũmbanonĩ maitũ o na ethĩwa meũka o ĩmwe? Nengane ngelekanyʼo.

⁸ Ve vata mũnene wa kũendeea kũthokya andũ moke maũmbanonĩ maitũ, o na ethĩwa meũka o ĩmwe. Nĩkĩ? Nũndũ mooka nĩmekwĩthĩa kaĩ Ngũsĩ sya Yeova imanyĩasya ũwʼo ũla wĩ Mbivilianĩ na nitetheeasya andũ mamũmanye Ngai, ĩndĩ ũu tiwʼo ndĩni sya ũvũngũ syĩkaa! (Isa. 65:13) Mwana-a-asa wĩtawa Ray na mũka, Linda, mekalaa Amelika, na nĩmeeyoneie kĩu myaka yĩ navu ĩtina. Ĩvinda yĩmwe nĩmatwie kwambĩĩa kũthi kanisanĩ. Nĩmaĩkĩĩaa kana kwĩ Ngai, na nĩmeewʼaa mayenda mũno kũmũmanya. Nũndũ wa ũu, nĩmambĩĩe kũthi makanisanĩ onthe ala me taoninĩ kwoo, yĩmwe ĩtina wa yĩla yĩngĩ. Taoni ĩsu yaĩ na ndĩni mbingĩ mũno. Ray na Linda nĩmavangie kana malika kanisanĩ makasiasya maũndũ elĩ nĩ kana mamanye ethĩwa nĩmeũtwʼĩka ma kanisa ũsu kana maitwʼĩka. Maisye mbee, makasiasya ethĩwa ve kĩndũ kya vata meemanyĩsya ũthaithinĩ sua ũsu, na kelĩ, makasiasya ethĩwa ala me ũthaithinĩ nĩmailye ta andũ ma Ngai. Ĩtina wa myaka kauta, maĩ manakomanyʼa makanisa onthe vau taoni, ĩndĩ vaiĩ yĩmwe maĩ masya yĩ kavaa. Vai ũndũ wa vata maaĩmanyĩsya mothaithinĩ asu, na athaithi mayeekĩaa ngũa syĩ na ndaĩa. Mauma kanisanĩ wa mũthya ũla mavangĩte kũthi, Linda asyokie wĩanĩ, nake Ray akwata nzĩa enũke. E nzĩanĩ, nĩwoonie Nyũmba ya Ũsumbĩ na asya, ‘No nĩlika ngona kĩla kĩendeee.’ Kĩla woonie ndaĩ aakyona vangĩ. Kĩla mũndũ aĩ mũtanu na nĩwendeeawʼa nĩ ũla ũngĩ, na onthe meekĩĩte ngũa nesa. Ray aendie kwĩkala kĩvĩla kya mbee, na nĩwatanĩie mũno kĩla kyamanyĩawʼa! Kĩu kĩtũlilikanyʼa ũndũ mũtũmwa Vaulo waisye ĩũlũ wa mũndũ ũla ũkaa maũmbanonĩ ya mbee na ayasya: “Nĩ wʼo Ngai e katĩ wenyu.” (1 Ako. 14:23-25) Kuma vau, Ray ndaakosa maũmbano angĩ ma Wakyumwa. Na aendeangĩe nĩwambĩĩe kũthi maũmbanonĩ ma katĩ katĩ wa kyumwa. O nake Linda nĩwambĩĩe kũmbana, na o na kau maĩ na myaka 70 na kĩndũ, nĩmeetĩkĩlile mamanyĩwʼe Mbivilia na mavatiswa.

SYĨNDŨ ILA TŨTŨMĨAA KWAMBĨĨSYA ŨNEENANYʼA

9, 10. (a) Nĩkĩ tulakiti syĩ laisi kũtũmĩa? (b) Elesya ũndũ tũtonya kũtũmĩa tulakiti Ũsumbĩ wa Ngai Nĩ Kyaũ?

⁹ Tulakiti. Twĩ na tulakiti nyanya tũtesa kũemwa nĩ kũinengane, na nitũtetheeasya kwambĩĩsya ũneenanyʼa. Tulakiti ta mbilioni itano nitumbĩthĩtwʼe kuma yĩla syambĩĩe kumwʼa mwaka wa 2013! Ũseo wa tulakiti isu nĩ kana wamanya kũtũmĩa ĩmwe, ndũkaemawa nĩ kũtũmĩa ila ingĩ nũndũ syonthe nivwʼanene. Ũtonya ata kwambĩĩsya ũneenanyʼa na mũndũ ũitũmĩa tulakiti?

¹⁰ Twasye wĩenda kũtũmĩa tulakiti Ũsumbĩ wa Ngai Nĩ Kyaũ? Onyʼa ũla ũũneena nake ĩthangũ ya mbee na ũimũkũlya: “Waaĩsa kwĩkũlya wʼo Ũsumbĩ wa Ngai nĩ kyaũ? We no wasye Ũsumbĩ ũsu nĩ . . . ?” Ĩtina wa ũu mũkũlye anyuve ũsũngĩo ũmwe katĩ wa mosũngĩo atatũ ala monanĩtwʼe. Asũngĩa ndũkatinde ũimũtavya nĩwavĩtya kana nĩwoosa. Vua ngalĩko ya nthĩnĩ vala vaandĩkĩtwe “Mbivilia Yaĩtye Ata?” na ĩndĩ ũisoma nake maandĩko aa me vau: Ndanieli 2:44 na Isaia 9:6. Ethĩwa mwanya wĩ vo, no mũendeee kũea ngewa. Mũthya, mũkũlye ĩkũlyo yĩĩ yĩ ĩthangũnĩ ya mũthya vala vaandĩkĩtwe, “Kwasũanĩa Ĩkũlyo Yĩĩ”: “Kũkeethĩwa kũilyĩ ata ĩla Ũsumbĩ wa Ngai wĩsumbĩka?” Weeka ũu, ũkeethĩwa watia kĩndũ mũtonya kũneenea ĩvinda yĩla yĩngĩ. Yĩla wĩsyoka, wĩneenea ĩsomo ya 7 ya mbulosua Ũvoo Mũseo Kuma kwa Ngai! Mbulosua ĩsu nĩ ĩmwe katĩ wa syĩndũ ila tũtũmĩaa yĩla tũkwambĩĩa kũmanyĩsya andũ Mbivilia.

SYĨNDŨ ILA ITUMAA ANDŨ MENDEEWʼA

11. Makaseti maitũ maseũvawʼa matonya kwĩka ata, ĩndĩ twaĩlĩte kũmanya kyaũ ĩũlũ wamo?

¹¹ Makaseti. Makaseti ma Mũsyaĩĩsya na Amkeni! nĩmo makaseti ala matumbĩthawʼa na makaalyũlwa kwa wingĩ vyũ ĩũlũ wa nthĩ! Na nũndũ masomawa nthĩ mbingĩ, kyongo kĩla kĩthĩawa ĩthangũnĩ ya mbee makasetinĩ asu kĩthĩawa kĩnyuvĩtwe nesa nĩ kana wĩthĩe no kyendeesye andũ onthe, o na ethĩwa maumĩte va. Twaĩlĩte kũmatũmĩa kũtetheesya andũ masũanĩe mũno ĩũlũ wa maũndũ ala ma vata thayũnĩ. Ĩndĩ nĩtwaĩlĩte kũmanya kĩla ĩkaseti yĩandĩkĩwe ũũ nĩ kana wĩthĩe twamũnenga nĩwatetheka.

12. (a) Ĩkaseti ya Amkeni! yĩseũvĩwʼe aaũ, na kĩeleelo kyayo nĩ kĩva? (b) Wonete moseo meva nũndũ wa kũnengane ĩkaseti yĩu?

¹² Ĩkaseti ya Amkeni! yĩseũvĩwʼe ala matesĩ Mbivilia kana mamĩsĩ o vanini. No kwĩthĩwa matesĩ momanyĩsyo ma Kĩklĩsto, makethĩwa mataĩkĩĩaa ndĩni mũno, kana makethĩwa matesĩ kana Mbivilia no ĩmatethye. Kĩeleelo kĩmwe kĩnene kya ĩkaseti yĩu nĩ kũtetheesya ũla ũkũyĩsoma aĩkĩĩe kwĩ Ngai. (Alo. 1:20; Aevl. 11:6) Kĩeleelo kĩngĩ nĩ kũtetheesya mũndũ aĩkĩĩe vyũ kana kwa wʼo Mbivilia nĩ “ndeto ya Ngai.” (1 Ath. 2:13) Makaseti ma Amkeni! ma 2018 maneeneete syongo ii itatũ: “Njia ya Maisha Inayoleta Furaha,” “Siri 12 za Mafanikio Katika Familia,” na “Kukabiliana na Huzuni ya Kufiwa.”

13. (a) Ĩkaseti ya Mũsyaĩĩsya ya andũ onthe yĩseũvĩwʼe aaũ? (b) Wonete moseo meva nũndũ wa kũnengane ĩkaseti yĩu?

¹³ Ĩkaseti ya Mũsyaĩĩsya ya andũ onthe yĩthĩawa yĩseũvĩtwʼe yĩtetheesye ala matonya kwĩthĩwa manengete Ngai na Ndeto yake ndaĩa makwatye momanyĩsyo ma Mbivilia. No methĩwe mesĩ Mbivilia o vanini, ĩndĩ ũyĩthĩa mai na ũmanyi wa wʼo ĩũlũ wa kĩla ĩmanyĩasya. (Alo. 10:2; 1 Tim. 2:3, 4) Makaseti ma Mũsyaĩĩsya ma 2018 maneeneete makũlyo aa: “Mbivilia no Ĩtũtethye Ũmũnthĩ?,” “Ĩvinda Yũkĩte Yĩkeethĩwa Yĩilyĩ Ata?,” na “We Ngai Nũkũthĩnĩkĩaa?”

SYĨNDŨ ILA ITHANGAASYA ANDŨ

14. (a) Ila vitio inya syĩ katĩ wa syĩndũ ila tũtũmĩaa mũno kũmanyĩsya itethasya ata? (b) Wonete moseo meva nũndũ wa kũtũmĩa vitio isu?

¹⁴ Vitio. Ĩvinda ya Yesũ, vundi wa mbwaũ atũmĩaa mĩio ya kwʼoko. Ĩndĩ ũmũnthĩ mavundi nĩmatũmĩaa masinĩ. Kwa ngelekanyʼo, nĩmethĩawa na masinĩ sya kũtila mbwaũ, kũtheketha maima, kũtendesya, kana kũathĩĩa mĩsumaa. Eka mavuku, ũmũnthĩ nĩtũseũvĩwʼe vitio nzeo mũno sya kwonyʼa andũ. Vitio ii inya nĩ katĩ wa syĩndũ ila tũtũmĩaa mũno kũmanyĩsya: Nĩkĩ Waĩle Kwĩmanyĩsya Mbivilia?, Twĩkaa Ata Ĩla Tũũmanyĩsya Mũndũ Mbivilia?, Nĩ Kyaũ Kĩendeeaa Nyũmbanĩ ya Ũsumbĩ?, na Ithyĩ Ngũsĩ sya Yeova Twĩ Aaũ? Nũseo yĩla wathi kwa mũndũ ya mbee ũkatũmĩa vitio ila itavĩtũkĩtye ndatĩka ilĩ. No tũtũmĩe ila ndaasanga twasyoka kana tweethĩa mũndũ wĩ na ĩvinda yingĩ. Isu nĩ vitio nzeo mũno na no itume mũndũ enda kwĩmanyĩsya Mbivilia na kũka maũmbanonĩ.

15. Nengane ngelekanyʼo ĩkwonanyʼa ũndũ mũndũ ũtonya kũtetheka mũno eeloela vitio ya kĩthyomo kyake.

¹⁵ Ngelekanyʼo nzeo ya ũndũ ũsu nĩ ya mũndũ mũka ũneenaa kĩthyomo kya Yapese wathamie kwoo Micronesia athi kũndũ kũngĩ. Mũndũ mũka ũsu eethĩiwe nĩ mwĩĩtu-a-asa wamwonisye vitio Nĩkĩ Waĩle Kwĩmanyĩsya Mbivilia? ya kĩthyomo kya Yapese. Vitio yambĩĩa oou, mũndũ mũka ũsu aisye: “Mbona kĩu nĩ kĩthyomo kyakwa! O na ndikũĩkĩĩa! Mũneenele ũsu nĩ wa ala mekalaa kĩthamanĩ kya kwitũ. Aneenete vyũ ũndũ tũneenaa!” Vitio yathela aisye nũkũlika kĩsesenĩ kya jw.org nĩ kana asome na ayĩloela kyonthe kĩla kĩ vau kya kĩthyomo kyake. (Sianĩsya na Meko ma Atũmwa 2:8, 11.) Ngelekanyʼo ĩngĩ nĩ ĩno. Ve mwĩĩtu-a-asa wĩ Amelika watũmĩie mwanake wa mwana-a-inyia wĩ mũingo vala ũtonya kũkwata vitio o ĩsu na kĩthyomo kyake. Mwanake ũsu nĩwamĩsyaisye na amũandĩkĩa e-mail yaĩtye: “Nĩnendie mũno vala vandũ vawetete kyũmbe kĩthũku kĩsumbĩkĩte nthĩ. Nĩnĩnakũlilye nĩmanyĩwʼe Mbivilia.” Ũsu nĩ ũndũ mũseo mũno nũndũ mwanake ũsu atwĩe nthĩ wĩa witũ ũsiĩĩtwe!

SYĨNDŨ ILA TŨTŨMĨAA KŨMANYĨSYA ŨWʼO

16. Elesya kĩeleelo kya mbulosua: (a) Mwĩthukĩĩsye Ngai Wĩkale Tene na Tene. (b) Ũvoo Mũseo Kuma kwa Ngai! (c) Naaũ Mekaa Kwenda kwa Yeova Ũmũnthĩ?

¹⁶ Mbulosua: Ũtonya ata kũmanyĩsya mũndũ ũwʼo ethĩwa ndesĩ kũsoma nesa kana vaiĩ ĩvuku o na yĩmwe ya kwĩmanyĩsya Mbivilia yĩtumbĩthĩtwʼe na kĩthyomo kyake? Mbulosua Mwĩthukĩĩsye Ngai Wĩkale Tene na Tene ĩtumbĩthĩtwʼe kwondũ wa vata ũsu.c O nayo mbulosua Ũvoo Mũseo Kuma kwa Ngai! no ĩkũtetheesye nesa kwambĩĩa kwĩmanyĩsya na mũndũ. No wonyʼe ũla ũũneena nake ĩthangũ ya ĩtina vala ve masomo onthe 14, na ũimũkũlya anyuve yĩla ũkwenda. Anyuva, ambĩĩa kwĩmanyĩsya nake ũtũmĩĩte ĩsomo yĩu. We waaĩsa kwĩka ũu yĩla wasyokea mũndũ ũkwendeewʼa? Mbulosua ya katatũ katĩ wa syĩndũ ila tũtũmĩaa mũno kũmanyĩsya nĩ ĩla yĩtawa Naaũ Mekaa Kwenda kwa Yeova Ũmũnthĩ? Kĩeleelo kyayo nĩ kũtetheesya amanyĩwʼa ma Mbivilia maelewe ũseũvyo witũ. Nĩ kenda ũmanye ũndũ ũtonya kũmĩtũmĩa yĩla ũũmanyĩsya, sisya Mwĩkalĩle wa Aklĩsto na Wĩa wa Kũtavanyʼa—Kavuku ka Kwĩmanyĩsya ka Ũmbano ka Mwei wa 3, 2017.

17. (a) Elesya kĩeleelo kya ala mavuku elĩ tũtũmĩaa kũmanyĩsya. (b) Ala mekwĩka maendeeo maĩlĩte kwĩka ata o na ethĩwa nĩ avatise, na nĩkĩ?

¹⁷ Mavuku. Wambĩĩa kũmanyĩsya mũndũ Mbivilia ũtũmĩĩte mbulosua, nue waĩle kũnyuva nĩ ĩndĩĩ ũkwenda kwambĩĩa kũtũmĩa ĩvuku Mbivilia Ĩtũmanyĩasya Kyaũ? Ĩvuku yĩu nĩyĩtetheeasya mũndũ aelewe nesanga momanyĩsyo ala ma mũsingi ma Mbivilia. Ethĩwa nĩmwayĩmina na nĩwoona mũmanyĩwʼa nĩwĩkĩte maendeeo, endeea kwĩmanyĩsya nake ũtũmĩĩte ĩvuku “Ĩyĩkalyei Ene Wendonĩ wa Ngai.”d Ĩvuku yĩu yĩmanyĩasya mũmanyĩwʼa ũndũ ũtonya kũtũmĩa myolooto ya Mbivilia maũndũnĩ onthe. Lilikana kana o na mũndũ amina kũvatiswa aĩlĩte kũendeea kũmanyĩwʼa mũvaka amine mavuku asu elĩ. Kwĩka ũu nĩkũmũtetheeasya ethĩwe na mũĩkĩĩo mũlũmu na aiendeea kũlũmanyʼa na Yeova.—Soma Akolosai 2:6, 7.

18. (a) Ĩandĩko ya 1 Timotheo 4:16 yĩtwĩkĩĩte vinya twĩke ata, na kwĩka ũu kwĩ ũseo mwaũ? (b) Twaĩlĩte kũtũmĩa syĩndũ ila tũtũmĩaa mũno kũmanyĩsya twĩ na kĩeleelo kĩva?

¹⁸ Ithyĩ Ngũsĩ sya Yeova nĩtũnengetwe wĩa wa kũmanyĩsya andũ ‘ndeto ya ũla wʼo wa ũvoo mũseo,’ nũndũ nĩyo ĩtonya kũtuma andũ mesa kũkwata thayũ ũtathela. (Ako. 1:5; soma 1 Timotheo 4:16.) Kĩu nĩkyo kĩtumi tũnengetwe syĩndũ ila twaĩle kũtũmĩa mũno kũmanyĩsya. (Sisya vala vaandĩkĩtwe “Syĩndũ Ila Tũtũmĩaa Mũno Kũmanyĩsya.”) Ekai mwa tũtate ũndũ tũtonya tũtũmĩe syĩndũ isu nesa. Mũtavanyʼa nĩwe ũtonya kwĩnyuvĩa nĩ kĩndũ kĩva katĩ wa isu ũtonya kũtũmĩa yĩla ũkũneena na mũndũ ũkwendeewʼa, na ekĩtũmĩa ĩndĩĩ. Ĩndĩ kĩeleelo kitũ kĩnene ti kũaĩa andũ mavuku. O na tũyaĩlĩte kũnenga andũ mavuku ethĩwa maikwenda kũtwĩthukĩĩsya. Kĩeleelo kitũ nĩ kũmanyĩsya ala me na ngoo nzeo, menyivĩtye, na mekwenda kũmũmanya Ngai nĩ kana tũmatwʼĩkĩthye amanyĩwʼa. Asu nĩmo ala me na “ngoo nzeo kwondũ wa thayũ wa tene na tene.”—Meko 13:48, NWT; Mt. 28:19, 20.