We Nĩwĩsĩ?

Nĩ kyaũ kyatetheeisye mũmanyĩwʼa Sitivini ekala auĩtye vyũ yĩla wanyamaawʼa?

VE ĨVINDA Sitivini wakomanie na aũme matamwendeaa ũseo. Aũme asu maĩ asili 71 ma koti ũla mũnene vyũ Isilaeli weetawa Nzama ya Ayuti. Ala maĩ nzamanĩ ĩsu maĩ katĩ wa andũ ala maĩ ũkũmũ mũnene vyũ mbaĩnĩ ĩsu. Moombanĩtwʼe nĩ mũthembi mũnene weetawa Kaiava. Mũthembi ũsu no we waũngamĩe koti ũsu myei yĩana ũna mĩvĩtu yĩla Yesũ watwʼĩĩwe kũawa. (Mt. 26:57, 59; Meko 6:8-12) Maũngamisye ngũsĩ sya ũvũngũ ikũsĩĩe Sitivini ũvũngũ, ĩndĩ kĩu kĩendeee masyaisye ũthyũ wake moona ũndũ wa ũsengyʼo. Moonie ũthyũ wake “ũilyĩ ta ũthyũ wa mũlaĩka.”—Meko 6:13-15.

Nĩ kyaũ kyatetheeisye Sitivini ekala auĩtye vyũ maũndũ mathũkĩte ũu mathũkĩte? Atanamba kũtwawa mbee wa Nzama, aĩ na kĩthito kingĩ mũno kya kwĩanĩsya ũthũkũmi wake atetheewʼe nĩ veva wa Ngai. (Meko 6:3-7) Na ĩndĩ yĩla wavikiwʼe mbee wa Nzama ĩsu, veva ũsu nowʼo wamũtetheeasya akwate ũkiakĩsyo na aililikana maandĩko. (Yoa. 14:16) Ĩvuku ya Meko ma Atũmwa kĩlungu kya 7 nĩyĩeleetye ũndũ Sitivini weeteteie na ũkũmbaũ. Ĩvindanĩ yĩu veva mũtheu nĩwamũlilikanilye ilungu ta 20, kana o mbingangĩ, syĩ nthĩnĩ wa Maandĩko ma Kĩevelania. (Yoa. 14:26) Ĩndĩ mũĩkĩĩo wake nĩweekĩiwe vinya mũnango yĩla wooniwʼe woninĩ Yesũ aũngye ngalĩ ya kwʼoko kwa aũme kwa Ngai.—Meko 7:54-56, 59, 60.

O naitũ nĩtũtonya kwĩsa kũtelemwʼa kana kũthĩnwʼa. (Yoa. 15:20) Ĩndĩ nĩ kana twĩtetheewʼa nĩ veva wa Yeova, nĩtwaĩle kũsomaa Ndeto yake tũteũtĩĩa na kwĩthĩwa na kĩthito kingĩ ũthũkũminĩ. O naitũ tũkakwata vinya wa kũmĩĩsya mathĩna tũuĩtye.—1 Vet. 4:12-14.