ŨNDŨ ŨTONYA KŨSINDA KĨMENA

3 | Vetanga Vyũ Kĩmena Kĩlĩkonĩ Kyaku

Kĩla Mbivilia Ĩmanyĩasya:

“[Alyũkai] kwa kwĩthĩwa na kĩlĩko kyeũ, nĩ kana mwĩyĩĩkĩĩthye inywʼĩ ene kwenda kwa Ngai kũla kũseo na kwĩtĩkĩlĩka na kwĩanĩu.”—ALOMI 12:2.

Kĩla Yĩthĩawa Ĩyonanyʼa:

Ngai nĩwosaa kwa ũito mosũanĩo maitũ. (Yelemia 17:10) Tũyaĩle o kwĩvathana na ndeto kana meko mekwonanyʼa twĩ na kĩmena. Kĩmena kyumanaa na maũndũ ala me ilĩkonĩ sitũ na ngoonĩ sitũ. Kwoou no nginya tũvetange vyũ mosũanĩo onthe ala matonya kũtuma twambĩĩa kũmenana. Kwĩka ũu no kwʼo kũtonya kũtuma ‘tũalyũka’ vyũ na tũisinda kĩmena.

Ũndũ Ũtonya Kwĩka:

Sũanĩa mũno maũndũ ala wĩsilasya ĩũlũ wa andũ angĩ, na mũno mũno andũ ma ũko ũngĩ kana ma nthĩ ĩngĩ. Kwekũlye-ĩ: ‘Nyie nĩmonaa ata? Nĩ kyaũ kĩtumaa nĩmona ũu? Nĩ kĩla nĩsĩ ĩũlũ woo, kana nĩ kĩla nĩsũanĩaa ĩũlũ woo? Ĩvathane na isese sya kũea ngewa, sinema, kana maũndũ ma kwĩtanĩthya meũtuma andũ methĩwa na kĩmena na ũngʼendu.

Ndeto ya Ngai no ĩtũtetheesye kũvetanga kĩmena ilĩkonĩ na ngoonĩ sitũ

Ti laisi mavinda onthe kũmanya mosũanĩo maitũ nĩ maseo kana nĩ mathũku. Ĩndĩ Ndeto ya Ngai no ĩtũtetheesye “kũmanya mosũanĩo na kwenda kwa ngoo.” (Aevelania 4:12) Kwoou endeea kwĩmanyĩsya Mbivilia. Sianĩsya momanyĩsyo mayo na mosũanĩo maku, na ũyĩka kyonthe kĩla ũtonya ũlũnge mosũanĩo maku mosane na momanyĩsyo ma Mbivilia. Ndeto ya Ngai no ĩtũtetheesye kũsinda kĩmena, o na ethĩwa kĩmena kĩu kĩilye ta “ngome syĩ vinya” ilĩkonĩ na ngoonĩ sitũ.—2 Akolintho 10:4, 5.

Ngewa—STEPHEN

Nĩwaalyũlile Mosũanĩo Make

Stephen na andũ ma mũsyĩ woo nĩmamenetwe nĩ andũ ma kĩkonde kyeũ, na kwondũ wa ũu, nĩmamathĩnasya. Na nũndũ wa ũu, nĩwalikanile na kyama kya siasa kĩla kyateteaa na kũkitĩa mavata ma ene nthĩ. Ĩtina wa ĩvinda, nĩwambĩĩie kwĩka maũndũ ma ũngʼendu nũndũ wa kũmenana. Stephen aĩtye: “Ĩvinda yĩmwe nĩ na anyanyawa nĩtwasyaisye sinema syoonanasya ũndũ andũ ma Africa ala maĩ ngombo mathĩnĩawʼa nthĩ ya United States. Nĩtwathatiwʼe mũno nĩ ũndũ ũsu, na twamavũa andũ ma mũika asũngũ ala mookĩte kũsisya sinema. Ĩtina wa ũu, twaendie isionĩ ila syaĩ vakuvĩ syekalaa asũngũ tũimamantha tũmavũe.”

Stephen nĩwavĩndũie woni wake vyũ yĩla wambĩĩie kwĩmanyĩsya Mbivilia na Ngũsĩ sya Yeova. Aĩtye: “Nũndũ kwa myaka mingĩ nĩnekalanasya na andũ mamenete andũ ala mataĩ ma mbaĩ yoo, ve maũndũ amwe Ngũsĩ syeekaa manzengʼasya. Kwa ngelekanyʼo, ĩla mũsũngũ ũmwe waĩ Ngũsĩ wavangie kũthi nthĩ ĩngĩ, atiie syana syake iyĩewa nĩ mũsyĩ ũmwe wa andũ aiũ. O na ĩngĩ, mũsyĩ ũmwe wa mũsũngũ nĩwoosie kamwana kamwe ka mũndũ mwiũ kala kataĩ na vandũ kekala.” Stephen nĩwamanyie kana Ngũsĩ sya Yeova syĩkalaa ta andũ ma mũsyĩ ũmwe, na kana nĩmo meanĩasya mwĩao ũla Yesũ wanengie aatĩĩi make wa kwendana.—Yoana 13:35.

Kyo nĩ kyaũ kyamũtetheeisye kũekana na ũngʼendu na kĩmena? Atetheeiwʼe nĩ ĩandĩko ya Alomi 12:2. Easya: “Nĩnamanyie kana naaĩlĩte kũalyũla mosũanĩo makwa. Yaĩ no nginya nĩvĩndũe mosũanĩo makwa nĩ kana nĩthĩwe na mũuo na andũ ala angĩ, na ndyona ũsu wĩ ũndũ wa vata vyũ thayũnĩ wakwa.” Yu kwa ĩvinda ya myaka mbee wa 40, Stephen nĩwĩkalĩte ate na kĩmena ngoonĩ yake.