Juillet

Pɩwɛɛ se taabalɩyɛ ɛwɛɛ ɖa nɛ Yesu ɖɛ-hɛkʋ taa nɛ pɩsa nɛ pocosi ɖa-adɩma yɔɔ. Ye mbʋ, pɩwɩlɩɣ se pɩtasɩnɩ tɔm ndʋ ɖɩtɛzɩɣnɩ ɖa-adɩma nɛ ɖɩyɔɔdʋʋ ɖoŋ ɖoŋ se “Yesu hɩɖɛ taa” yɔ lɛ, pɩwɛɛ se ɖɩla nabʋyʋ ɖɔɖɔ. Pɩpɔzʋʋ se ɖɩtɩlɩ ɛzɩma Yehowa tɩŋɩɣnɩ Yesu yɔɔ nɛ ecosuu ɖa-adɩma yɔɔ yɔ. Yesu heyi apostoloowaa se: “Mbʋ payɩ ɩpɔzʋʋ ma-hɩɖɛ taa yɔ, mankaɣ-pʋ labʋ.” (Yoh. 14:13) Paa Yehowa ewelisiɣni ɖa-adɩma nɛ ecosuu a-yɔɔ yɔ, ɛha Yesu ɖoŋ se ɛɖɔ Ɛ-lɩmaɣza yɔɔ. Ye mbʋ, pʋcɔ nɛ Ɛsɔ cosi ɖa-adɩma yɔɔ lɛ, ɛcɔŋna nɛ ɛna se ɖɩɖɔm lɔŋ weyi Yesu tasaa yɔ ɩ-yɔɔ. Kɩɖaʋ nakʋyʋ yɔ, Yesu yɔɔdaa se: “Ye ikpeɣu ɛyaa pa-kɩwɛɛkɩm yɔ, mɩ-Caa weyi ɛwɛ ɛsɔdaa yɔ, ɛkaɣ-mɩ kpeɣu ɖɔɖɔ; ɛlɛ ye iikpeɣu ɛyaa pa-kɩwɛɛkɩm yɔ, mɩ-Caa weyi ɛwɛ ɛsɔdaa yɔ, ɛɛkaɣ-mɩ kpeɣu ɖɔɖɔ mɩ-kɩwɛɛkɩm.” (Mat. 6:14, 15) Ye mbʋ pɩcɛyɩ siŋŋ se ɖɩla lalaa mbʋ Yehowa nɛ Yesu palakɩ-ɖʋ yɔ! w20.04 22 § 6

Apostoloo Pɔɔlɩ ɖiɣzini mbʋ pɩ-tɔm kɛdɩnɩ mba pewelisiɣni-i yɔ nɛ ɛlɛɣzɩ tɔm ndʋ esusuu yɔ nɛ tɩmʋnɩ pɛ-wɛtʋ. Kɩɖaʋ nakʋyʋ yɔ. Ɛyaa mba esusaɣ-wɛ tɔm Lisɩtrɩ yɔ, paasɩŋ tɔm sakɩyɛ Masɩ yɔɔ yaa paatɩɩsɩŋ tɔm natʋyʋ sɩ-yɔɔ. Pʋyɔɔ ɛzɩma Pɔɔlɩ yɔɔdɩnɩ-wɛ yɔ, piyeba se papɩzɩ nɛ panɩɩ pɩ-taa. Ɛyɔɔdɩ tɔɔnaɣ sakɩyɛ kʋmtʋ nɛ ɛzɩma papɩzɩ nɛ panɩɩ wezuu caɣʋ leleŋ yɔ, pɩ-tɔm. Ɛlabɩnɩ tʋmɩyɛ tɔm pee nɛ kɩɖaŋ weyi ɛ-tɔm welisiyaa pɩzɩɣ nɛ panɩɩ ɩ-taa kɛlɛʋ yɔ. Tɩŋnɩ lɛɣtʋ yɔɔ nɛ ŋyʋsɩ mbʋ pɩkɛdɩɣnɩ ɛyaa mba pɛwɛ ño-kooka taa yɔ, nɛ ŋlɛɣzɩ ñɛ-kɛdaɣ nɛ kamʋnɩ pɛ-wɛtʋ. Ŋwɛɣ nɛ ŋñɔtʋʋnɩ nɔɔyʋ yaa ɛ-ɖɩɣa lɛ, ɛbɛ pɩzɩɣ pɩsɩnɩ-ŋ nɛ ŋyʋsɩ mbʋ pɩkɛdɩɣnɩ-ɩ yɔ? Kɛ weyi ɛcɔŋnɩ camɩyɛ yɔ. Pʋtɔma ɛwɛɛ nɛ ɛñɔɔzʋʋ kaɖaɣ taa, ɛkalɩɣ takayaɣ nakɛyɛ, ɛñɔɔzʋʋ lɔɔɖɩyɛ yaa ɛlakɩ tʋmɩyɛ naɖɩyɛ. Pɩtɩla ŋpɩzɩɣ nɛ ŋtɩŋnɩ tʋmɩyɛ nɖɩ ɛwɛɛ nɛ ɛlakɩ yɔ ɖɩ-yɔɔ nɛ ña nɛ ɩ ɩpaɣzɩ kɛdaɣ. (Yoh. 4:7) Ɛyʋ nɔɔyʋ wondu suu pɩzɩɣ nɛ pɩwɩlɩ ɛjaɖɛ nɖɩ ɖɩ-taa ɛlɩnaa yɔ, tʋmɩyɛ nɖɩ ɛlakɩ yɔ, yaa hola aleɣya ɛgbɛyɛ nɖɩ ɛkɩlɩ sɔɔlʋʋ yɔ. w20.04 11 § 11-12

Koobiya nabɛyɛ lʋkɩnɩ nɩɣzɛ siŋŋ nɛ pʋyɔɔ lɛ, pɩwɩzɩɣ-wɛ siŋŋ nɛ pɩcɛyɩɣ-wɛ, alɩwaatʋ ndʋ pa nɛ lalaa pakatɩɣ wɛtʋ ndɩ ndɩ taa paa evemiye nɖɩ yɔ. Pɩpɩzɩɣ nɛ pɩwɛɛ-wɛ kaɖɛ se pɛwɛɛ ɖenɖe ɛyaa ɖɔwa yɔ, ɛlɛ pɛwɛɛ nɛ powoki kediɣzisi, kigbeɣliŋ nɛ kigbeɣliŋ sɔsɔŋ. Pɩwɛ-wɛ kaɖɛ se pɔyɔɔdɩnɩ ɛyaa mba paasɩŋ-wɛ yɔ, ɛlɛ pɔyɔɔdʋʋnɩ lalaa tɔm susuu taa. Ye mbʋ pɩwɛ ñɔ-hɔɔlʋʋ taa yɔ, ña-taa ɛtɛ se pɩtɩkɛ ñe-ɖeke. Pɩlakɩ ɛyaa sakɩyɛ ɛzɩ pɩlakʋʋ-ŋ yɔ. Tɔzɩ se pana wena ŋñakɩnɩ ña-kalɩzaɣ pilim yɔ akɛdɩɣnɩ Yehowa. Ɛzɩma ŋɖiɣni wobu pɩ-yɔɔ nɛ ŋñakɩ pana yɔ, pɩwɩlɩɣ se ɛwɛɛ nɛ ɛwazɩɣ-ŋ nɛ ɛhaɣ-ŋ ɖoŋ weyi pɩpɔzʋʋ-ŋ yɔ. (Fil. 4:6, 7) Ye ŋkɛ ɛjam yaa ŋwɛ nɩɣzɛ taa, ɛlɛ ŋwɛɛ ŋwoki pɩ-yɔɔ nɛ ŋsɛɣ Yehowa yɔ, ña-taa pɩzɩɣ nɛ pɩtɛ se ñɔ-tɔm kɛdɩɣnɩ-ɩ. Ða-taa sakɩyɛ kɛ ajamaa, paa mbʋ yɔ ɖɩwɛɛ nɛ ɖiwoki pɩ-yɔɔ nɛ ɖɩɖɔkʋʋ ɖa-tɩ. (2 Kɔr. 4:16) Pɩtɩŋnɩ Yehowa sɩnʋʋ yɔɔ lɛ, ɖa-tɩŋa ɖɩkaɣ seu seya nɛ ɖɩtɛm-yɛ! w20.04 31 § 20-21

Ðɩcɔŋnɩ ɛzɩma Ɛsɔ labɩ tɛtʋ yɔ lɛ, ɖɩnaɣ se ɛkɛ lɔŋsɩnɖʋ. (Ebr. 3:4) Tɛtʋ wayɩ fɛyɩ mbʋ pʋyɔɔ yɔ, tɩ-yɔɔ ɖeke mbʋ payɩ pɩpɔzʋʋ se pɩsa nɛ ɛyʋ caɣ wezuu yɔ, pɩwɛɛ. Hɔɔlɩŋ nɩɩyɩ taa lɛ, tɛtʋ wɛ ɛzɩ mɛlɛ ŋgʋ kɩwɛɛ nɛ kɩɖɔŋ teŋgu yɔɔ yɔ. Ɛlɛ hɔɔlɩŋ ndɩ ndɩ taa lɛ, tʋkaɣ sɔsɔɔ wɛ mɛlɛ ŋgʋ ɛyʋ luba nɛ ɛyaa su kɩ-taa yɔ nɛ ɖɛ-tɛtʋ pɛ-hɛkʋ taa. Kɩɖaʋ nakʋyʋ yɔ: Alɩwaatʋ ɛzɩma ɛyaa mba pɛwɛ mɛlɛ nakʋyʋ taa yɔ papɩzɩɣ nɛ pacaɣ wezuu ye pɩpɔzʋʋ se pa-maɣmaɣ polubini helim kɩbam mbʋ pefeziɣ yɔ, pañɩnɩ tɔɔnaɣ nɛ lɩm nɛ ye paapɩzɩɣ se pɔlɔ mbʋ payɩ pɩkɛ kʋzɔɔtʋ wondu yɔ? Piileɖiɣ lɛ, ɛyaa mba pɛwɛ mɛlɛ ŋgʋ kɩ-taa yɔ pasɩkɩ. Ɛlɛ tɛtʋ ñɛwɛ ndɩ. Tɩpɩzɩɣ nɛ tɩɖɔkɩ ɛyaa nɛ kpɩna miiliyaarɩwaa sakɩyɛ weziŋ. Tɩhaɣ-ɖʋ helim kɩbam, tɔɔnaɣ nɛ lɩm mbʋ pɩpɔzʋʋ-ɖʋ yɔ, nɛ wondu ndʋ tɩtɔyɩ paa ɛzɩmtaa. Paalɩzɩɣ tɛtʋ yɔɔ kʋzɔɔtʋ wondu nɛ pɔlɔʋ ɖoli; paa mbʋ yɔ, tɩkɛ lone nɖɩ ɖɩwɛ kajʋka nɛ papɩzɩɣ nɛ pacaɣ ɖɩ-taa yɔ tam. Ɛbɛ yɔɔ pɩwɛ mbʋ? Yehowa labɩ tɛtʋ se tɩpɩzɩ nɛ tɩlɛɣzɩ kʋzɔɔtʋ wondu, nɛ tʋtʋ pɩsɩ pʋyʋ kɩbam mbʋ papɩzɩɣ nɛ patasɩ labɩnʋʋ tʋmɩyɛ yɔ. w20.05 20 § 3-4

Sataŋ kaawɛɛ nɛ eheyiɣ Ɛva se Yehowa kɛ cɛtɩyʋ. Pɩtɩŋnɩ pʋyɔɔ lɛ, Sataŋ pɩsɩ Eleeu yaa kɔlɔmɔtʋ tʋ. Sataŋ peɣzi Ɛva siŋŋ; nɛ ɛlɛ tisi ɛ-tɔm yɔɔ. (1 Tim. 2:14) Ɛva ta-ɩ liu nɛ pɩkɩlɩ Yehowa. Piyeba nɛ Ɛva kpaɣ lɩmaɣzɩyɛ kɩdɛkɛdɩyɛ kɛlɛʋ yem. Ɛlɩzaa se ɛɛñaŋ Yehowa nɛ ɛpaɣzɩ tɔɔʋ tɩʋ piye nɖɩ Yehowa kaaɖʋ-ɩ paɣtʋ se ɛtaatɔɔ yɔ. Pʋwayɩ lɛ, ɛha tɩʋ piye nɖɩ ɖɔɖɔ Aɖam. (Kiɖe 3:6) Maɣzɩ pazɩ nɛ ŋna tɔm ndʋ Ɛva pɩzaɣ se eheyi Sataŋ yɔ. Maɣzɩ se eheyi-i tɔm ɛzɩ tʋnɛ yɔ: “Maasɩŋ weyi ŋkɛnaa yɔ, ɛlɛ mansɩm man-Caa Yehowa nɛ mɔnsɔɔlɩ-ɩ nɛ mantaɣ-ɩ liu. Mbʋ payɩ ma nɛ Aɖam ɖɩwɛna yɔ, ɛnʋ hanɩ-ɖʋ. Waɖɛ nɖɩ ŋwɛna se ŋyɔɔdɩ tɔm kɩdɛkɛdɩtʋ natʋyʋ ɛ-yɔɔ? Ðɛɛ mɔ-yɔɔ!” Pɩtʋʋ fɛyɩ se ye Yehowa pɛlɛ kʋsɔɔlʋ ɛnʋ ɛɛyɔɔdɩ siɣsiɣ tɔm tʋnɛ yɔ, Yehowa taa kaalabɩ leleŋ siŋŋ se ɛnɩɩ-tʋ! (Adu. 27:11) Ɛlɛ, Ɛva taawɛɛnɩ sɔɔlɩm mbʋ pɩwɛ siɣsiɣ yɔ Yehowa yɔɔ; Aɖam ɖɔɖɔ taawɛɛnɩ sɔɔlɩm mbʋ. Pataawɛɛnɩ sɔɔlɩm mbʋ pa-Caa yɔɔ, mbʋ yebina nɛ patɩpɩzɩ nɛ palʋ se nɔɔyʋ ɛtaayɔɔdɩ cɛtɩm tɔm ɛ-hɩɖɛ yɔɔ. w20.06 4 § 10-11

Ðo-koobiya halɩñɩma mʋnɩ samtʋ tʋma wena payɩ palakɩ Yehowa sɛtʋ taa yɔ a-yɔɔ. A-taa naayɛ lɛ se pamaɣ kuduyuŋ nɛ pɔcɔŋnɩ ɩ-yɔɔ, paɖʋʋ nesi agbaa cikpena wena a-taa pɔyɔɔdʋʋ kʋnʋmɩŋ lɛɛŋ yɔ, nɛ pahaɣ pa-tɩ faaa nɛ palakɩ tʋma Betɛɛlɩwaa taa. Paɖʋʋ nesi nɛ pasɩɣnɩ koobiya alɩwaatʋ ndʋ asɛyʋʋ nakʋyʋ talɩɣ-wɛ yɔ, pɛɖɛzɩɣ ɖa-takayɩsɩ, nɛ pɛkɛ ɖɔɖɔ nʋmɔʋ lɩzɩyaa nɛ Ɛsɔtɔm tiyiyaa. Pɩtasɩ lɛ, halaa sɩɣnɩ pa-walaa se paba ɩla tʋma sɔsɔna wena pɛwɛnɩ ɛgbɛyɛ taa yɔ. Koobiya abalɩñɩma mba, pɛkɛ ‘ɛyaa kʋjɔŋ’ nɛ palakɩ tʋma sakɩyɛ nɛ pasɩɣnɩ lalaa. Ɛlɛ, ye pa-halaa ɩtaaɖʋʋ-wɛ nesi yɔ, tʋma ana a-labʋ kaawɛ-wɛ kaɖɛ nɛ pɩkɩlɩ. (Efɛz. 4:8) Ɛgbɛyɛ taa ɛzʋtʋyaa mba pɛwɛnɩ lɔŋsɩnɖɛ yɔ, peɖiɣziɣna se koobiya halɩñɩma kɛ “yoyaa samaɣ sɔsɔɔ” ŋga kɔsɔɔlɩ tʋmɩyɛ labʋ faaa yɔ, nɛ ɖoŋ ɖoŋ lɛ, pɛwɛ niye siŋŋ tɔm kɩbandʋ susuu taa. Pɩtasɩ lɛ, ɛgbɛyɛ taa ɛzʋtʋyaa ɖiɣziɣna se koobiya halɩñɩma siɣsiɣ ñɩma mba papɩ fezuu taa yɔ, pɛwɛ niye siŋŋ nɛ pasɩɣnɩ koobiya halɩñɩma mba pɛkɛ piya pelesi yɔ alɩwaatʋ ndʋ paba katɩɣ kala yɔ. (Tiiti 2:3-5) Pɩwɩlɩɣ kpayɩ kpayɩ se ɖo-koobiya halɩñɩma mʋnɩ samtʋ! w20.09 23-24 § 13-14

Yehowa ɛɛsɔʋ ɛyaa mba paasɛ-ɩ nɛ pɩɖɛɛ ɛlɛ pɔkɔɔ poposini ɛ-samaɣ alɩwaatʋ natʋyʋ yɔ pɔ-yɔɔ. Nɛ ɛɛsɔʋ ɖɔɖɔ tʋmɩyɛ nɖɩ paalabɩ ɛ-sɛtʋ taa yɔ ɖɩ-yɔɔ. (Ebr. 6:10) Nayʋ Izaayii yɔɔdɩ kɩɖaʋ kɩbaŋʋ nakʋyʋ tɔm se ɛwɩlɩnɩ ɛzɩma Yehowa cɔŋnɩ ɛ-samaɣ yɔɔ yɔ. Ɛmawa se: “Ɛzɩ ninɖiɣyu calʋʋ e-wondu yɔ, ekpeɣliɣ heɣsi ɛ-nɔkɔyʋʋ taa nɛ ɛkpakɩɣ-sɩ nɛ ɛnʋkɩ.” (Iza. 40:11) Alɩwaatʋ ndʋ heu nɔɔyʋ posuuni ewiɖe yɔ, ɛzɩma pɩlakɩ Ninɖiɣyu Sɔsɔ Yehowa? Yesu wɩlɩ ɛzɩma pɩlakɩ Yehowa yɔ alɩwaatʋ ndʋ ɛpɔzɩ tɔm tʋnɛ ɛ-tɔmkpɛlɩkɩyaa yɔ. Ɛpɔzɩ-wɛ se: “Suwe ɩmaɣzɩɣ? Ye ɛyʋ nɔɔyʋ ɛwɛnɩ heŋ 100 nɛ ɩ-taa kʋɖʋm le, ɛɛkaɣ yebu heŋ 99 pʋŋ taa nɛ ewolo ɛñɩnɩ kʋɖʋm weyi eleba yɔ? Nɛ ye ɛna-ɩ yɔ, meheyiɣ-mɩ toovenim taa se, ɛ-taa lakɩ-ɩ nɛ leleŋ nɛ pɩkɩlɩ heŋ 99 weyi itile yɔ.”—Mat. 18:12, 13. w20.06 19-20 § 8-9

Pɩkɛnɩ-ɖʋ waɖɛ se ɖɩtɩŋnɩ nʋmɔŋ weyi payɩ ɖɩpɩzɩɣ yɔ ɩ-yɔɔ nɛ ɖɩla Yehowa tʋma. (Keɣa 26:4; 83:11) Ye koobu abalɩñɩnʋ nɔɔyʋ ɛsɔɔlaa se ɛla tʋma Yehowa ɛgbɛyɛ taa nɛ pɩkpaɖɩ yɔ, pɩwɛ ɖeu. Paa mbʋ yɔ, alɩwaatʋ ndʋ ɛwɛɣnɩ waɖɛ naɖɩyɛ yɔ, pɩfɛyɩ se ɛmaɣzɩ ɛ-maɣmaɣ ɛ-tɩ yɔɔ nɛ pɩcɛzɩ ɛzɩma pɩwɛɛ se ɛmaɣzɩ yɔ. (Luka 17:7-10) Pɩwɛɛ se ɛ-kaɖʋwa ɛkɛna se ɛɖʋʋ lalaa lɩm nɛ tɩ luzuu. (2 Kɔr. 12:15) Bibl yɔɔdʋʋ ɛyaa nabɛyɛ tɔm se pakɩlaɣ pa-maɣmaɣ pa-tɩ yɔɔ maɣzʋʋ. Diyotrefɛɛsɩ kaawɛnɩ tɩ kpazʋʋ. Ɛɛsɔɔlaa se ɛwɛɛnɩ “kajalaɣ lone” ɛgbɛyɛ taa. (3 Yoh. 9) Uziya kaakpazɩ ɛ-tɩ nɛ ɛñaɣ pana se ɛla tʋmɩyɛ nɖɩ Yehowa taaha-ɩ waɖɛ se ɛla yɔ. (4 Aw. 26:16-21) Absalɔm kaasɔɔlaa se ɛpɩsɩ wiyaʋ, pʋyɔɔ ɛlakaɣ ɛzɩ ɛsɔɔlɩ samaɣ yɔ se pɩsa nɛ kaka tisi nɛ ɛpɩsɩ wiyaʋ. (2 Sam. 15:2-6) Ɛzɩ Bibl kɛdɛsɩ sɩnɛ sɩwɩlʋʋ kpayɩ yɔ, Yehowa taa ɛɛlakɩ leleŋ nɛ ɛyaa mba pañɩnɩɣ pa-maɣmaɣ pa-samtʋ yɔ. (Adu. 25:27) Ɛyaa mba pakpazɩɣ pa-tɩ nɛ pañɩnɩɣ se lalaa ɩsam-wɛ yɔ, alɩwaatʋ kaaɖɛɣ lɛ, pakatɩɣ tɩlasɩ.—Adu. 16:18. w20.07 4 § 7-8

Krɩstʋ ñɩma hɔŋ nɩɩyɩ kʋyaa nɛ iwolo ajɛɛ lɛɛna taa se ɩɖʋ kʋyʋʋ yaa se ɩñɩnɩ tʋmɩyɛ. Pʋyɔɔ lɛ, pɩtɩla ajɛɛ kɩfana wena a-taa koobiya mba powoba yɔ, a-kʋnʋŋ pɔyɔɔdʋʋ sukulinaa mba pa-taa powokini pe-piya yɔ. Pɩpɩzɩɣ nɛ pɩpɔzɩ se lʋlɩyaa ɖɔɖɔ ɩkpɛlɩkɩ ɛjaɖɛ nɖɩ ɖɩ-taa powoba yɔ ɖɩ-kʋnʋŋ se pɩsa nɛ pehiɣ tʋmɩyɛ. Ye ɛgbɛyɛ naɖɩyɛ yaa Ɛgbɛyɛ cikpeɖe naɖɩyɛ ɛwɛ peeɖe nɛ pɔyɔɔdʋʋ pa-kʋnʋŋ ɖɩ-taa yɔ, ɛbɛ pɩpɔzʋʋ se pala? Ɛgbɛyɛ nɖɩ taa pɩpɔzʋʋ se hɔʋ ewolo? Pɩwɛɛ se kiwolo ɛgbɛyɛ nɖɩ ɖɩ-taa pɔyɔɔdʋʋ ɛjaɖɛ nɖɩ ɖɩ-kʋnʋŋ yɔ ɖɩ-taa yaa ɛgbɛyɛ nɖɩ ɖɩ-taa pɔyɔɔdʋʋ kʋnʋŋ ŋgʋ hɔʋ yɔɔdʋʋ yɔ ɖɩ-taa? Pɩwɛɛ se hɔʋ ñʋʋdʋ ɛkpaɣ lɩmaɣza pɩlɩɩnɩ ɛgbɛyɛ nɖɩ ɖɩ-taa pɩwɛɛ se ɛ-hɔʋ ewolo yɔ. Paa weyi pɩwɛɛ se ɛkpaɣ lɩmaɣza hɔɔlʋʋ ŋgʋ kɩ-taa nɛ pʋyɔɔ lɛ, pɩwɛɛ se ɛmaɣzɩ mbʋ pɩwazɩɣ ɛ-hɔʋ yɔ pɩ-yɔɔ. Pɩwɛɛ se ɖɩña lɩmaɣzɩyɛ nɖɩ hɔʋ ñʋʋdʋ kpakɩɣ yɔ. Paa lɩmaɣzɩyɛ nɖɩ ɛkpaɣaa yɔ, pɩpɔzʋʋ se ɖitisi ɖɩ-yɔɔ nɛ ɖɩmʋ ɛ nɛ ɛ-hɔʋ camɩyɛ nɛ ɖɩwɩlɩ se ɖɩsɔɔlɩ-kʋ.—Roma 15:7. w20.08 30 § 17-18

Ye ɖɩsɔɔlaa se Yehowa ɛha-ɖʋ ɖoŋ yɔ, pɩtɩpɔzɩ se ɖɩmaɣzɩ se ɖoŋ weyi ɖɩwɛnɩ tomnaɣ yɔɔ yɔ, sukuli ŋgʋ ɖɩlaba yɔ, ɖenɖe ɖɩcaɣaa nɛ ɖɩpaɣlɩ yɔ yaa tomnaɣ yɔɔ ñɩm mbʋ ɖɩwɛna yɔ, mbʋ wɩlɩɣna se ɖɔ-tɔm cɛyaa yaa pɩtɩcɛyɩ. Pɩtɩkɛ wondu ndʋ tiyekina se ɖɩwɛɛ wazaɣ Yehowa ɛ-ɛsɩndaa. Toovenim taa lɛ, pɩtɩkɛ Ɛsɔ samaɣ taa ɛyaa sakɩyɛ kɛnɩ “lɔŋsɩnɖaa tomnaɣ taa, nɛ sakɩyɛ tɩkɛ ɖoŋ tɩnaa, nɛ sakɩyɛ tɩkɛ mba palʋlɩ-wɛ hɔŋ sɔsɔŋ taa yɔ.” (1 Kɔr. 1:26) Ye mbʋ, paa ŋfɛyɩnɩ wondu ndʋ tɩ-tɔm ɖɩyɔɔdɩ tayʋʋ pʋnɛ pɩ-ɖɩbazɩyɛ yɔ, ŋpɩzɩɣ nɛ ŋsɛɛ Yehowa. Ɛlɛ, wɛɛnɩ lɩmaɣza kɩbana wɛtʋ ndʋ tɩ-taa ŋwɛɛ yɔ tɩ-yɔɔ. Ɛzɩma ŋpɩzɩɣ nɛ ŋla mbʋ? Tɔzɩ se ye ŋfɛyɩnɩ wondu ndʋ tiyeki nɛ ɛyaa mʋʋ ñɩm ɛjaɖɛ ɛsɩndaa yɔ, ŋpɩzɩɣ nɛ ŋna ɛzɩma Yehowa haɣ-ŋ ɖoŋ yɔ. Kɩɖaʋ nakʋyʋ yɔ: Ye sɔɔndʋ ɛkpaɣ-ŋ nɛ ɛyaa mba pakaɖɩɣnɩ ñe-tisuu yɔ, tɩmnɩ Yehowa se ɛha-ŋ abalɩtʋ nɛ ŋyɔɔdɩ mbʋ pɩ-yɔɔ ŋtisiɣ yɔ pɩ-tɔm. (Efɛz. 6:19, 20) Yaa ye ŋwɛ kala taa mbʋ pʋyɔɔ yɔ ŋwɛ kʋdɔŋ sɔsɔʋ nakʋyʋ taa yɔ, pɔzɩ Yehowa se ɛha-ŋ ɖoŋ weyi pɩpɔzʋʋ-ŋ yɔ se pɩsa nɛ ŋwolo pɩ-yɔɔ nɛ ŋlakɩ ño-ɖoŋ ɖeɖe ɛ-tʋmɩyɛ taa. Alɩwaatʋ ndʋ payɩ ŋnaɣ se Yehowa wɛɛ nɛ ɛsɩɣnɩ-ŋ yɔ, ñe-tisuu paɣlɩɣ nɛ ŋwɛɛ ɖoŋ nɛ pɩkpaɖɩ. w20.07 16 § 9

Ye ɖɩsɔɔlaa se ɖɩsɩɩ Kewiyaɣ kajalaɣ lone taa ɖe-wezuu caɣʋ taa yɔ, pɩpɔzʋʋ se ɖɩwɛɛ ɛzɩ Abraham yɔ. Eetisi faaa se ɛlaa kɩlaŋ nɛ ɛ-tɔm kɛdɩnɩ Ɛsɔ. (Mark. 10:28-30; Ebr. 11:8-10) Taamaɣzɩ se ŋŋkaɣ katʋʋ kala ñe-wezuu caɣʋ taa. Mba pakpakɩɣ pe-wezuu kpeekpe nɛ pɛsɛɣnɩ Yehowa yɔ, pakatɩɣ kala ɖɔɖɔ. (Yak. 1:2; 1 Pɩy. 5:9) Sɔnɔ, lɩmaɣza wena a-yɔɔ pɩpɔzʋʋ se ɖɩmaɣzɩɣ cee wayɩ yɔɔ yɔ, aɖɔwa nɛ pɩkpaɖɩ. Mbʋ pɩwɛɛ nɛ pɩlakɩ ɛjaɖɛ yɔɔ yɔ, pɩwɩlɩɣ kpayɩ kpayɩ se ɖɩwɛ ɛjaɖɛ ɖɩnɛ ɖɩ-kɛdɛzaɣ kɩyakɩŋ ɖɩdɛnɖɛ taa. Ɛsɔ Kewiyaɣ paɣzɩɣ ɖiyuu tɛtʋ lɛ, wazasɩ sakɩyɛ nzɩ ɖɩkaɣ hiɣu yɔ sɩ-taa nakɛyɛ lɛ se pakaɣ fezuu ɖɛ-ɛyaa kʋsɔɔlaa mba pasɩba yɔ nɛ ɖɩna-wɛ. Alɩwaatʋ ndʋ tɩ-taa lɛ, Yehowa kaɣ hɛyʋʋ Abraham e-tisuu nɛ e-suuɖu pɔ-yɔɔ: Yehowa kaɣ fezuu ɛ nɛ ɛ-hɔʋ taa ñɩma nɛ paɖaɣnɩ caɣʋ wezuu tɛtʋ yɔɔ. Ŋkaɣ wɛʋ peeɖe nɛ ŋmʋ-wɛ camɩyɛ na? Ŋpɩzɩɣ nɛ ŋwɛɛ peeɖe ye ɛzɩ Abraham yɔ, ŋsɔɔlɩ faaa se ŋlaa kɩlaŋ Ɛsɔ Kewiyaɣ yɔɔ yɔ, ye ŋɖɔkʋʋ ñe-tisuu paa ŋkatɩɣ kala yɔ, nɛ ye ŋkpɛlɩkɩɣ ɛzɩma ŋɖaŋ Yehowa nɛ suuɖu yɔ.—Mik. 7:7. w20.08 5-6 § 13-14; 7 § 17

Ðɩnawa se ye ɖo-koyindinaa ɩkʋ-ɖʋ yɔ, Yehowa kaɣ-ɖʋ fezuu. Ða-taa tɛma se mbʋ payɩ palakɩ yɔ, pɩɩpɩzɩɣ piyele nɛ ɖiyele Yehowa sɛʋ. (Roma 8:35-39) Yehowa wɩlaa se ɛwɛnɩ lɔŋsɩnɖɛ siŋŋ mbʋ pʋyɔɔ yɔ, ɛha-ɖʋ sɩɖaa fezuu lidaʋ! Pʋyɔɔ lɛ, sɔɔndʋ ɛɛkpaɣ-ɖʋ nɛ mba paɖʋʋ Sataŋ nesi nɛ pañazɩɣ-ɖʋ se pakʋʋ-ɖʋ ye ɖɩɩlakɩ mbʋ pɔsɔɔlaa yɔ. Pɩtasɩ lɛ, pɩhaɣ-ɖʋ abalɩtʋ siŋŋ se ɖɩɖɔkɩ ɖe-siɣsiɣ wɛtʋ Yehowa ɛsɩndaa. Ye mba papaɖɩɣ Yehowa yɔ, pɔyɔɔdaa se pakʋʋ-ŋ yɔ, ŋkaɣ taʋ Yehowa liu se ɛkaɣ-ŋ fezuu na? Ɛzɩma ŋpɩzɩɣ nɛ ŋtɩlɩ se ŋkaɣ taʋ Yehowa liu alɩwaatʋ ndʋ tɩ-taa yaa ŋŋtaɣ-ɩ? Nʋmɔʋ nakʋyʋ lɛ se ŋpɔzɩ ña-tɩ se: ‘Lɩmaɣza cikpena wena mankpakɩɣ paa ɖooye yɔ, awɩlɩɣ se mantaɣ Yehowa liu na?’ (Luka 16:10) Ŋpɩzɩɣ nɛ ŋpɔzɩ ña-tɩ ɖɔɖɔ se: ‘Wezuu ŋgʋ mancakɩ yɔ, kɩwɩlɩɣ se mantaɣ liu tamaɣ ŋga Yehowa laba se ɛcɔŋnɩ mon-tomnaɣ yɔɔ kɩcɛyɩm ɖeɖe ye mancalɩɣnɩ ñɩnʋʋ Kewiyaɣ yɔ?’ (Mat. 6:31-33) Ye ŋcosi tɔm pɔzʋʋ mbʋ pɩtɩŋa pɩ-yɔɔ se ɛɛɛ yɔ, ŋkaɣ pɩzʋʋ nɛ ŋkaɖɩnɩ tɩlasɩ nzɩ ŋkaɣ katʋʋ nɛ ɛsɩndaa yɔ.—Adu. 3:5, 6. w20.08 17-18 § 15-16

Pɩpɔzʋʋ se ɖɩwɛɛ niye ɛzɩma ɖɩlakɩnɩ tʋmɩyɛ Ɛsɔtɔm yɔ pɩ-hɔɔlʋʋ taa. Ðɩpɩzɩɣ nɛ ɖɩkpɛlɩkɩ ɛzɩma ɖɩwɛɛ niye hɔɔlɩŋ nɩɩyɩ taa yɔ kediɣzisi taa. Ɛlɛ ye ɖɩsɔɔlaa se ɖɩsɩnɩ lalaa nɛ petisi se Bibl taa toovenim tɔm pɩzɩɣ nɛ tɩwazɩ-wɛ yɔ, pɩpɔzʋʋ se ɖɩkpɛlɩkɩɣ-kʋ ɖoŋ ɖoŋ. Pɩpɔzʋʋ se ɖɩlabɩnɩ tʋmɩyɛ Ɛsɔtɔm nɛ ɖɩkpazɩ ɖe-tisuu ɖoŋ. Pɩwɩlɩɣ se Bibl kalʋʋ ɖeke tɩmaɣ. Pɩpɔzʋʋ se ɖɩmaɣzɩ tɔm ndʋ ɖɩkalɩɣ yɔ tɩ-yɔɔ nɛ ɖɩñɩnɩ ɛgbɛyɛ takayɩsɩ taa nɛ pɩsa ɖɩnɩɩ Masɩ taa camɩyɛ nɛ ɖɩlabɩnɩ-sɩ tʋmɩyɛ. (1 Tim. 4:13-15) Ye ɖɩlakɩ mbʋ yɔ, ɖɩkaɣ pɩzʋʋ nɛ ɖɩlabɩnɩ Ɛsɔtɔm tʋmɩyɛ nɛ ɖɩwɩlɩ tɔm lalaa. Pɩwɩlɩɣ se pɩtɩkɛ Bibl taa masɩ ɖeke ɖɩkalɩɣ-wɛ. Ðɩsɔɔlaa se ɖɩsɩnɩ ɖɔ-tɔm welisiyaa nɛ panɩɩ mayaɣ ŋga ɖɩkalɩ-wɛ yɔ ka-taa nɛ patɩlɩ ɛzɩma kotukuuni-wɛ yɔ. Ye ɖɩkpɛlɩkɩɣ Bibl ɖa-tɩ yɔɔ ɖoŋ ɖoŋ yɔ, piyeki nɛ ɖɩwɛɛ niye Ɛsɔtɔm wɩlʋʋ taa nɛ pɩkɩlɩ.—2 Tim. 3:16, 17. w20.09 28 § 12

Ye ɖɩmaɣzɩɣ mbʋ payɩ Yehowa wɛɛ nɛ ɛlakɩ se ɛsɩnɩ-ɖʋ yɔ pɩ-yɔɔ yɔ, pɩpɩzɩɣ pɩsɩnɩ-ɖʋ nɛ ɖɩka ɖa-lɩmaɣza tɔm susuu tʋmɩyɛ yɔɔ. Kɩɖaŋ nɩɩyɩ yɔ: Ɛwɛɛ nɛ ɛhaɣ-ɖʋ fezuu taa tɔɔnasɩ sakɩyɛ. Sɩ-taa nasɩyɩ lɛ takayɩsɩ nzɩ ɛgbɛyɛ lɩzɩɣ yɔ, takayɩsɩ nzɩ papɩzɩɣ nɛ pakpaɣ pɔrtaabɩlɩwaa, taabɩlɛɛtɩwaa nɛ ordinatɛɛrɩwaa yɔɔ yɔ; tɔm ndʋ pakalɩ tatasɩ yɔɔ yɔ, videowaa nɛ JW Tɔm Ðɩyɔɔdɩyɛ yɔɔ ɖʋtʋ. Maɣzɩ tɔm tʋnɛ tɩ-yɔɔ nɛ ŋna: Tɔm ndʋ tɩwɛ ɖɛ-tɛ intɛrnɛɛtɩ lone yɔɔ yɔ, tɩwɛ kʋnʋmɩŋ weyi ɩcɛzɩ 1 000 yɔ ɩ-taa. (Mat. 24:45-47) Nʋmɔʋ lɛɛkʋ ŋgʋ kɩ-yɔɔ ɖɩpɩzɩɣ ɖɩtɩŋna nɛ ɖɩka ɖa-lɩmaɣza tɔm susuu yɔɔ yɔ, ŋgʋ lɛ se pɩwɛɛ se ɖɩmaɣzɩnɩ Yesu kɩɖaʋ. Etaayele nɛ nabʋyʋ kɛzɩ ɛ-lɩmaɣza se ɛtaalɩzɩ aseɣɖe toovenim tɔm yɔɔ. (Yoh. 18:37) Etiyele nɛ pɩtakɩ-ɩ alɩwaatʋ ndʋ Sataŋ heyi-i se ɛcɛlɩɣ-ɩ “ɛjaɖɛ yɔɔ kewiyisi tɩŋa nɛ si-ɖoŋ” yɔ. Etiyele nɛ pɩtakɩ-ɩ ɖɔɖɔ alɩwaatʋ ndʋ ɛyaa lalaa kaasɔɔlaa se pasɩɩ-ɩ wiyaʋ yɔ. (Mat. 4:8, 9; Yoh. 6:15) Etaayele nɛ tomnaɣ yɔɔ ñɩm lɩmaɣza wɛɛnɩ ɖoŋ ɛ-yɔɔ, nɛ sɔɔndʋ taakpa-ɩ alɩwaatʋ ndʋ pakaɖɩnɩ-ɩ siŋŋ yɔ. (Luka 9:58; Yoh. 8:59) Alɩwaatʋ ndʋ pɩtakɩɣ ɖe-tisuu yɔ, ye ɖɩtɔzʋʋ sɔnɔ evemiye mayaɣ taa lɔŋ weyi apostoloo Pɔɔlɩ tasaa yɔ ɩ-yɔɔ yɔ, nabʋyʋ ɛɛkɛzɩɣ ɖa-lɩmaɣza. w20.09 9-10 § 6-7

Ða-taa wɛ leleŋ siŋŋ se koobiya halɩñɩma sakɩyɛ wɛ ɛgbɛyɛ taa, nɛ pañakɩ pana pɩdɩɩfɛyɩ! Pocosuu tɔm nɛ palakɩ tʋma kediɣzisi taa, nɛ posusuu tɔm. Nabɛyɛ ɖʋʋ nesi nɛ pɔcɔŋnɩ Kewiyaɣ Kpaaŋ yɔɔ, nɛ pawɩlɩɣ se pamaɣzɩɣ po-koobiya yɔɔ. Ɛlɛ, pakatɩɣ kala. Pa-taa nabɛyɛ cɔŋnɩ pa-lʋlɩyaa mba pakpadɩyaa yɔ pɔ-yɔɔ. Lalaa ɖɔkʋʋ pa-tɩ alɩwaatʋ ndʋ pɔ-hɔʋ taa ñɩma kaɖɩɣnɩ-wɛ yɔ. Nɛ lalaa lɛ, pe-ɖeke pañakɩnɩ pana siŋŋ nɛ pɔcɔŋnɩ pe-piya yɔɔ. Ɛbɛ yɔɔ pɩpɔzʋʋ se ɖɩɖʋ ɖo-koobiya halɩñɩma nesi? Mbʋ pʋyɔɔ yɔ, ɛjaɖɛ ɛɛhaɣ halaa ñamtʋ ndʋ pɩmʋnaa yɔ paa ɛzɩmtaa. Pɩtasɩ lɛ, Bibl seɣtiɣ-ɖʋ se ɖɩɖʋ-wɛ nesi. Kɩɖaʋ nakʋyʋ yɔ: Apostoloo Pɔɔlɩ heyi Roma ɛgbɛyɛ taa ñɩma se pamʋ Feebee nɛ ‘pasɩnɩ-ɩ hɔɔlɩŋ weyi ɩ-taa payɩ pɩpɔzʋʋ se pasɩnɩ-ɩ yɔ.’ (Roma 16:1, 2) Pɔɔlɩ lɩnɩ ɛyaa mba pakpakaɣ halaa ɛzɩ patɩlɩɩ pʋyʋ yɔ pɛ-hɛkʋ taa. Nɛ pa-lakasɩ wɩlaɣ toovenim taa se halaa tɩlɩɩ pʋyʋ. Ɛlɛ, ɛpɩsɩ Krɩstʋ tʋ nɛ pɩtɛ lɛ, ɛmaɣzɩnɩ Yesu nɛ ɛha ñamtʋ halaa nɛ ɛlabɩ-wɛ camɩyɛ lakasɩ. w20.09 20 § 1-2

Pɩsa nɛ ɖɩsɩnɩ Bibl kpɛlɩkɩyaa nɛ pɔsɔɔlɩ se posusi tɔm kɩbandʋ lɛ, ɖɩpɩzɩɣ nɛ ɖɩpɔzɩ-wɛ tɔm ɛzɩ tʋnɛ yɔ: “Ŋɖɔm tɔm ndʋ Bibl wɩlɩɣ yɔ tɩ-yɔɔ lɛ, ɛzɩma pɩñɔɔzɩ ñe-wezuu caɣʋ? Ŋmaɣzɩɣ se pɩwɛɛ se lalaa ɩnɩɩ Bibl wɩlɩtʋ ndʋ? Ɛbɛ ŋpɩzɩɣ ŋla nɛ ŋsɩnɩ-wɛ?” (Adu. 3:27; Mat. 9:37, 38) Tɔzɩ se Yesu ɖʋ-ɖʋ paɣtʋ se ɖɩwɩlɩ ɛyaa lalaa nɛ “pɔɖɔ tɔm ndʋ payɩ” ɛwɩlaa yɔ tɩ-yɔɔ. Pɩtʋʋ fɛyɩ se paɣtʋ sɔsɔtʋ naalɛ tʋnɛ tɩwɛ pɩ-taa: Sɔɔlɩ Ɛsɔ nɛ ŋsɔɔlɩ ña-taabalʋ. Tɩ-naalɛ tɩlabɩ nɔɔ kʋɖʋmaɣ nɛ tɔm susuu nɛ kpɛlɩkɩyaa labʋ tʋmɩyɛ. (Mat. 22:37-39) Mbʋ piseɣtiɣ-ɖʋ nɛ ɖisusuu tɔm yɔ, mbʋ lɛ sɔɔlɩm. Toovenim taa lɛ, alɩwaatʋ ndʋ Bibl kpɛlɩkɩyaa nabɛyɛ naɣ se pɩpɔzʋʋ se posusi tɔm yɔ, sɔɔndʋ pɩzɩɣ nɛ pɩkpa-wɛ. Ɛlɛ ɖɩpɩzɩɣ nɛ ɖɩsɩnɩ Bibl kpɛlɩkɩyaa mba nɛ pa-taa tɛ se Yehowa kaɣ-wɛ sɩnʋʋ nɛ pazɩ pazɩ lɛ pawa ɛyʋ sɔɔndʋ seu.—Keɣa 17:2-4; Adu. 29:25. w20.11 3 § 6-8

Ŋŋñɔɔzʋʋ ña-tɩ lɛ, tɩmnɩ Yehowa Bibl kpɛlɩkɩyʋ nɛ ɛ-kɩcɛyɩm pɔ-yɔɔ. Tɩmnɩ Yehowa se ɛsɩnɩ-ŋ nɛ ŋŋwɩlɩɣ ɛyʋ nɔɔyʋ tɔm lɛ, ŋtɩlɩ ɛzɩma ŋtɩŋnɩ Bibl yɔɔ nɛ ŋtukuni ɛ-laŋɩyɛ yɔ. Taasɔɔ se ña-kaɖʋwa lɛ se ŋsɩnɩ-ɩ nɛ ɛɖɛɛnɩ ɛsɩndaa nɛ pamɩyɩsɩ-ɩ lɩm. Pɩwɛɛ se Bibl kpɛlɩkɩyʋ nɛ Yehowa pɔyɔɔdʋʋ. Ɛzɩma tɩyɛ? Pɩcɛyaa se ewelisini Yehowa nɛ ɛyɔɔdɩnɩ-ɩ ɖɔɖɔ. Ɛpɩzɩɣ nɛ ewelisini Ɛsɔ, ye ɛkalɩɣ Bibl paa ɖooye yɔ. (Yoz. 1:8; Keɣa 1:1-3) Ɛpɩzɩɣ nɛ ɛtɩmɩɣ paa ɖooye nɛ ɛyɔɔdʋʋnɩ Yehowa. Ye mbʋ, tɩmnɩ ña-laŋɩyɛ pilim alɩwaatʋ ndʋ ɩpaɣzɩɣ kpɛlɩkʋʋ yɔ nɛ alɩwaatʋ ndʋ ɩtɛŋ yɔ; nɛ ŋŋtɩmɩɣ lɛ, tɩmɩ ñe-Bibl kpɛlɩkɩyʋ yɔɔ. Ɛwɛɣ nɛ ewelisiɣ ña-adɩma lɛ, ɛkaɣ kpɛlɩkʋʋ ɛzɩma ɛtɩmnɩ ɛ-laŋɩyɛ pilim nɛ ɛyɔɔdɩnɩ Yehowa Ɛsɔ, Yesu hɩɖɛ taa yɔ. (Mat. 6:9; Yoh. 15:16) Maɣzɩ nɛ ŋna ɛzɩma Bibl kalʋʋ paa ɖooye (Yehowa welisinuu) nɛ adɩma (Yehowa yɔɔdɩnʋʋ) kaɣ sɩnʋʋ ñe-Bibl kpɛlɩkɩyʋ nɛ ɛñɔtɩnɩ Ɛsɔ nɛ pɩkpaɖɩ yɔ!—Yak. 4:8. w20.10 8 § 8; 9 § 10-11

Yehowa ɛgbɛyɛ ñakɩ pana siŋŋ se ɖiyele nɛ pɩtɩŋa pɩtʋʋzɩ cɔlɩɩɩ nɛ laŋhɛzɩyɛ wɛɛ Krɩstʋ ñɩma agbaa taa ɛzɩ pɩɩwɛʋ kajalaɣ Krɩstʋ ñɩma alɩwaatʋ taa yɔ. (Tʋma 16:4, 5) Kɩɖaʋ nakʋyʋ yɔ: Ye ŋcaɣ wobu ɛgbɛyɛ lɛɛɖɛ taa Feŋuu Tilimiye Kpɛlɩkʋʋ alɩwaatʋ taa, paa pɩkɛ ñɛ-ɛjaɖɛ taa yaa ɛjaɖɛ lɛɛɖɛ taa yɔ, ŋsɩm ɛzɩma kpɛlɩkʋʋ kaɣ ɖɔm yɔ, nɛ tɔm ñʋʋ ŋgʋ pakaɣ kpɛlɩkʋʋ yɔ. Ŋkaɣ naʋ kpaagbaa se ŋtɩkɛ ɛgɔm! Ɛsɔ fezuu ɖeke pɩzɩɣna nɛ kiyele nɛ nɔɔ kʋɖʋmaɣ ŋga kɛwɛɛ. (Sof. 3:9) Ɛbɛ ŋpɩzɩɣ nɛ ŋla? Pɔzɩ ña-tɩ se: ‘Mañakɩ pana se meyele nɛ nɔɔ kʋɖʋmaɣ nɛ laŋhɛzɩyɛ wɛɛ ɛgbɛyɛ taa? Mañaŋ mba pɛɖɛɣ nɔɔ ɛgbɛyɛ taa yɔ? Lalaa pɩzɩɣ nɛ pata-m liu, kɔzɩ kɔzɩ ye mɛwɛnɩ wala ɛgbɛyɛ taa yɔ? Mɔnɖɔŋ alɩwaatʋ yɔɔ, nɛ mɔnsɔɔlʋʋ faaa se manɖʋ lalaa nesi na?’ (Yak. 3:17) Ye ŋnawa se pɩpɔzʋʋ se ŋñaɣ pana hɔɔlɩŋ nɩɩyɩ taa yɔ, tɩmɩ nɛ ŋpɔzɩ fezuu kiɖeɖeu. Ye ŋyeki se kɩwɛɛnɩ ɖoŋ ñɛ-ɛyʋtʋ nɛ ña-lakasɩ yɔɔ nɛ pɩkpaɖɩ yɔ, ño-koobiya kaɣ-ŋ sɔɔlʋʋ nɛ ŋmʋʋ ñɩm pɛ-ɛsɩndaa nɛ pɩkpaɖɩ. w20.10 23 § 12-13

Ɛsɔtɔm pɩzɩɣ nɛ tɩwɛɛ ɖɛ-ɛsɩndaa ɛzɩ ñɩnʋʋ yɔ. (Yak. 1:23-25) Ða-taa sakɩyɛ cɔŋnɩ ñɩnʋʋ taa paa tanaŋ ŋgʋ lɛ kɩ-tɛɛ pʋcɔ nɛ palɩɣ ɖɩɣa. Ðɩcɔŋnɩ ñɩnʋʋ taa mbʋ lɛ, pɩsɩɣnɩ-ɖʋ se ɖɩna se pɩpɔzaa se ɖɩñɔɔzɩ nabʋyʋ pʋcɔ nɛ lalaa na-ɖʋ yaa we. Mbʋ ɖɔɖɔ ye ɖɩkalɩɣ Bibl paa ɖooye yɔ, ɖɩkaɣ naʋ nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩñɔɔzɩ ɖa-maɣzɩm nɛ ɖɛ-wɛtʋ yɔ. Ɛyaa sakɩyɛ ɖiɣzinaa se pakalɩɣ evemiye mayaɣ paa tanaŋ ŋgʋ pʋcɔ nɛ palɩɣ ɖɩɣa lɛ, pɩsɩɣnɩ-wɛ. Peyeki nɛ tɔm ndʋ pakalaa yɔ tɩwɛɣnɩ ɖoŋ pa-maɣzɩm yɔɔ. Piyeki nɛ evemiye kpeekpe lɛ, pañɩnɩɣ nʋmɔŋ weyi ɩ-yɔɔ patɩŋna nɛ pɔɖɔ lɔŋ weyi pɛkpɛlɩkɩ Ɛsɔtɔm taa yɔ ɩ-yɔɔ yɔ. Pɩtasɩ lɛ, pɩwɛɛ se ɖɩkpɛlɩkɩɣ nɛ ɖɩmaɣzɩɣ Ɛsɔtɔm yɔɔ paa ɖooye. Pɩ-labʋ pɩzɩɣ nɛ pɩwɛɛ kɛlɛʋ, ɛlɛ pɩcɛyaa kpem se ɖɩlakɩ mbʋ; mbʋ pʋyɔɔ yɔ mbʋ pɩpɩzɩɣ pɩsɩnɩ-ɖʋ nɛ ɖiwolo pɩ-yɔɔ nɛ ɖɩɖɔŋ wezuu nʋmɔʋ ŋgʋ kɩwɛ sɔɖɩɩɩ yɔ kɩ-taa yɔ, pɩ-taa nabʋyʋ lɛ se ɖɩkalɩɣ Bibl nɛ ɖɩmaɣzɩɣ ndʋ ɖɩkalɩɣ yɔ tɩ-yɔɔ. Hɔɔlʋʋ nakʋyʋ taa lɛ, Ɛsɔtɔm wɛ ɛzɩ menziini ŋgʋ pewiliɣni ɛyʋ tomnaɣ taa se pana mbʋ pɩcɛyɩɣ-ɩ yɔ. Ɛlɛ pɩwɛɛ se ɖɩwɛɛnɩ tɩ luzuu nɛ pɩsa nɛ ɖɩɖɔ Bibl lɔŋ tasʋʋ yɔɔ, yaa Ɛsɔ lone taa caɣyaa lɔŋ tasʋʋ yɔɔ. w20.11 18 § 3; 20 § 8

Paa panazaɣ kajalaɣ pɩnzɩ mɩnʋʋ taa Krɩstʋ ñɩma ɖoŋ ɖoŋ yɔ, paahiɣ laŋhɛzɩyɛ alɩwaatʋ ndɩ ndɩ taa ɖɔɖɔ. Ɛbɛ tɔmkpɛlɩkɩyaa mba, palabɩ alɩwaatʋ ndɩ ndɩ ndʋ tɩ-taa? Abalaa nɛ halaa siɣsiɣ ñɩma mba, paawobi pɩ-yɔɔ nɛ posusuu tɔm kɩbandʋ kaahɛzaɣ. Kɛdaɣ ŋga kɛwɛ Tʋma Labʋ takayaɣ taa yɔ, kɔyɔɔdʋʋ se ‘pañaŋaɣ Yehowa.’ Powobi pɩ-yɔɔ nɛ posusuu tɔm kɩbandʋ, nɛ mbʋ pɩlɩ pɩ-taa yɔ lɛ se ‘pɛwɛɛ nɛ pɛtɛzɩɣ huuu.’ Pɩwɩlɩɣ kpayɩ kpayɩ se Yehowa kaawazɩ ɛzɩma posusi tɔm nɛ kpekpeka laŋhɛzɩyɛ alɩwaatʋ ndɩ ndɩ ndʋ tɩ-taa yɔ. (Tʋma 9:26-31) Kajalaɣ pɩnzɩ mɩnʋʋ taa Krɩstʋ ñɩma kaatɩŋnɩ wala wena payɩ paawɛna yɔ a-yɔɔ nɛ posusi tɔm kɩbandʋ. Kɩɖaʋ nakʋyʋ yɔ: Alɩwaatʋ ndʋ Pɔɔlɩ ɖiɣzinaa se ɛpɩzɩɣ nɛ esusi ɛyaa sakɩyɛ tɔm Efɛɛzɩ tɛtʋ taa yɔ, ɛcaɣ tɛtʋ ndʋ tɩ-taa nɛ esusi tɔm. (1 Kɔr. 16:8, 9) Tɔmkpɛlɩkɩyaa ñaɣ pana siŋŋ nɛ posusi “Yehowa tɔm kɩbandʋ.” (Tʋma 15:30-35) Ɛbɛ lɩ pɩ-taa? Sɔnɔ evemiye mayaɣ cosi tɔm ndʋ tɩ-yɔɔ. w20.09 16 § 6-8

Alɩwaatʋ ndʋ Aɖam labɩ kɩwɛɛkɩm yɔ, ɛkɔnɩ asɛyʋʋ ɛ-maɣmaɣ nɛ e-liɖe taa mba yɔɔ. Halɩ nɛ sɔnɔ ɖɩwɛɛ nɛ ɖɩlakɩ kʋñɔŋ siŋŋ ɛ-kaañamtʋ lakasɩ yɔɔ. Ɛlɛ, Ɛsɔ fezi ɛ-Pɩyalʋ nɛ pʋyɔɔ lɛ, ɖɩpɩzɩɣ nɛ ɖihiɣ cee wayɩ kɩbaŋʋ. “Mbʋ ɖɔɖɔ sɩɖaa femtu tɩŋɩɣnɩ ɛyʋ nɔɔyʋ yɔɔ nɛ pɩkɔɔ,” ɛyʋ ɛnʋ lɛ Yesu. Apostoloo Pɔɔlɩ lɩzɩ pɩ-taa se: “Mbʋ pʋyɔɔ yɔ, ɛzɩ pe-kpeekpe pasɩkʋʋ Aɖam taa yɔ, mbʋ ɖɔɖɔ pakaɣ pe-kpeekpe haʋ wezuu Krɩstʋ taa.” (1 Kɔr. 15:22) Pɔɔlɩ yɔɔdʋʋ se “pe-kpeekpe [pasɩkɩ] Aɖam taa yɔ” pʋ-tɔbʋʋ lɛ suwe? Ɛyaa kpeekpe tɔm Pɔɔlɩ yɔɔdaɣ, mba Aɖam ɖɛzɩ-wɛ kɩwɛɛkɩm nɛ mantɩtalɩ pilim wɛtʋ nɛ pasɩkɩ yɔ. (Roma 5:12) Aɖam fɛyɩ mba ‘pakaɣ-wɛ haʋ wezuu’ yɔ pa-taa. Krɩstʋ kɩhɛyʋʋ pʋ-ñʋʋ taa ɛɛwazɩɣ Aɖam, mbʋ pʋyɔɔ yɔ ɛɛtalɩ pilim ɛlɛ ɛlɩzɩ se ɛɛñaŋ Ɛsɔ. Mbʋ pɩtalɩ Aɖam yɔ, mbʋ ɖɔɖɔ kaɣnɩ talʋʋ mba “ɛyʋ Pɩyalʋ” kaɣ-wɛ hʋnʋʋ tɔm nɛ ɛyaa-wɛ se “pʋŋ” yɔ, mba kaɣnɩ wobu “ɖɩzʋʋ maatɛŋ taa.”—Mat. 25:31-33, 46; Ebr. 5:9. w20.12 5 § 13-14

Ye patɩha-ŋ waɖɛ naɖɩyɛ yɔ, maɣzɩ Ɛsɔ tiyiyaa siɣsiɣ ñɩma kɩɖaʋ kɩbaŋʋ yɔɔ nɛ ŋna. Wiyaʋ Ahaabɩ kewiyitu tɔɔʋ alɩwaatʋ taa, Yehowa pɔzɩ tiyiyaa se pɔyɔɔdɩ nʋmɔʋ ŋgʋ kɩ-yɔɔ papɩzɩɣ patɩŋna nɛ pepeɣzi wiyaʋ kɩdɛkɛdʋ Ahaabɩ yɔ. Tiyiyaa nabɛyɛ yɔɔdɩ pa-lɩmaɣza. Ɛlɛ, Ɛsɔ lɩzɩ tiyiyu kʋɖʋm nɛ eheyi-i se ɛ-lɩmaɣzɩyɛ kaɣ labʋ. (1 Aw. 22:19-22) Ɛzɩ pitibi tiyiyaa siɣsiɣ ñɩma lalaa yɔɔɔ nɛ halɩ pamaɣzɩ se: ‘Ɛbɛ yɔɔ mɛwɛɛkɩ ma-alɩwaatʋ nɛ mɔyɔɔdɩ ma-lɩmaɣzɩyɛ?’ Pɩtʋʋ fɛyɩ se aayɩ. Toovenim taa lɛ, Ɛsɔ tiyiyaa luzuu pa-tɩ nɛ pɔsɔɔlaa se paɖʋ Yehowa hɩɖɛ hɔɔlɩŋ kpeekpe taa. (Th. 13:16-18; Natʋ 19:10) Tɔzɩ se waɖɛ sɔsɔɖɛ nɖɩ ɖɩpɩzɩɣ nɛ ɖɩwɛɛna yɔ, nɖɩ lɛ se ɖɩkɛ Yehowa Aseɣɖe Tʋ nɛ ɖisusi e-Kewiyaɣ tɔm. Pɩtɩkɛ wala yekina se ɖɩmʋ ñɩm Ɛsɔ ɛsɩndaa. Alɩwaatʋ ndʋ ɖɩwɛɣnɩ tɩ luzuu yɔ, ɖɩmʋʋ ñɩm siŋŋ Yehowa nɛ ɖo-koobiya ɛsɩndaa. Ye mbʋ tendi Yehowa se ɛsɩnɩ-ŋ nɛ ŋwɛɛnɩ tɩ luzuu tam. Maɣzɩ Yehowa sɛyaa mba paha tɩ luzuu kɩɖaŋ kɩbaŋ Bibl taa yɔ pa-tɩŋa pɔ-yɔɔ. Tɩŋnɩ nʋmɔŋ weyi payɩ ɩ-yɔɔ ŋpɩzɩɣ yɔ nɛ ŋsɩnɩ ño-koobiya faaa.—1 Pɩy. 5:5. w20.12 26 § 16-17

Ñʋʋ yabɩtʋ ñɩɣyʋʋ hulaɣ kɛnɩnɩ lidaʋ ŋgʋ Yehowa haɣ-ɖʋ yɔ. Ɛha-ɖʋ lidaʋ se ɛkaɣ yabʋ ɖa-ñʋʋ sɩm nesi tɛɛ, nɛ ɛkaɣ hɛyʋʋ mba payɩ palakɩ ɛ-sɔɔlɩm yɔ. (1 Tes. 5:8; 1 Tim. 4:10; Tiiti 1:1, 2) Ñʋʋ yabɩtʋ lidaʋ huuzuu ɖa-maɣzɩm yɔɔ. Piyeki se ɖɩka ɖa-lɩmaɣza Ɛsɔ tamasɩ yɔɔ nɛ pɩsɩɣnɩ-ɖʋ se ɖɩtaakɩlɩɣ nɩɣzʋʋ kala wena ɖɩkatɩɣ yɔ a-yɔɔ. Ðɩpaŋ ñɩɣyʋʋ hulaɣ ŋga ye ɖiwoki pɩ-yɔɔ nɛ ɖiyeki se ɖa-maɣzɩm ɛla nɔɔ kʋɖʋmaɣ nɛ Ɛsɔ maɣzɩm yɔ. Ðɩɩɖʋʋ ɖe-lidaʋ ñɩm mbʋ paapɩzɩɣ nɛ pataa-pʋ liu yɔ pɩ-yɔɔ, ɛlɛ Ɛsɔ yɔɔ ɖɩɖʋʋ-kʋ. (Keɣa 25:2; 103:34; 1 Tim. 6:17) Fezuu laɣɖɛ kɛnɩnɩ Ɛsɔtɔm, Bibl. Laɣɖɛ nɖɩ, ɖɩwɛnɩ ɖoŋ se ɖikuli paa cɛtɩm mbʋ lɛ pɩ-yɔɔ nɛ ɖɩsɩnɩ ɛyaa nɛ palɩɩ cɛtɩm wɩlɩtʋ nɛ lakasɩ kɩdɛkɛdɩsɩ yomiye taa. (2 Kɔr. 10:4, 5; 2 Tim. 3:16, 17; Ebr. 4:12) Alɩwaatʋ ndʋ ɖɩkpɛlɩkɩɣ ɖa-tɩ yɔɔ nɛ ɖɩmʋʋ falɩsʋʋ Yehowa ɛgbɛyɛ taa yɔ, pɩwɩlɩɣ se ɖɩwɛɛ nɛ ɖɩkpɛlɩkɩɣ ɛzɩma ɖɩlabɩnɩ laɣɖɛ nɖɩ tʋmɩyɛ camɩyɛ yɔ.—2 Tim. 2:15. w21.03 27 § 4; 29 § 10-11

Halɩ alɩwaatʋ ndʋ paɖʋ Yohanɛɛsɩ salaka se ɛwɛɛ nɛ esusuu Yesu tɔm yɔ, ɛɛwɩlaa se ɛwɛɛ nɛ ɛmaɣzɩɣ lalaa yɔɔ. Ɛma Natʋ takayaɣ nɛ etiyini-kɛ agbaa se pɩsa nɛ atɩlɩ “mbʋ piileɖiɣ lɛ, pɩwɛɛ se pɩla yɔ.” (Natʋ 1:1) Pʋwayɩ, pɩwɛ ɛzɩ palɩzɩ-ɩ Patɩmoosɩ salaka taa lɛ, ɛma Yesu wezuu caɣʋ nɛ ɛ-tɔm susuu tʋmɩyɛ tɔm ɛ-tɛ Evaŋgilim taa yɔ. Ɛma ɖɔɖɔ takayɩsɩ naadozo se pɩsa nɛ eseɣti e-koobiya nɛ ɛkpazɩ-wɛ ɖoŋ. Ŋpɩzɩɣ nɛ ŋmaɣzɩnɩ Yohanɛɛsɩ tɩ laʋ lɩmaɣza nɛ ŋtɩŋnɩ mbʋ ŋlɩzɩɣ se ŋlakɩnɩ ñe-wezuu yɔ pɩ-yɔɔ nɛ ŋwɩlɩ se ŋsɔɔlɩ ɛyaa lalaa. Sataŋ ɛjaɖɛ sɔɔlaa se ŋmaɣzɩ ñe-ɖeke ñɔ-yɔɔ, nɛ ŋñaɣ pana nɛ ŋñɩnɩ liidiye yaa ŋyele nɛ ña-hɩɖɛ sɛɛ. Ɛlɛ, Kewiyaɣ tɔm susuyaa mba pɛwɛ ɛjaɖɛ kpeekpe yɔɔ yɔ, palakɩ po-ɖoŋ ɖeɖe nɛ posusuu tɔm kɩbandʋ nɛ pasɩɣnɩ ɛyaa se pɔñɔtɩnɩ Yehowa. w21.01 10 § 9-10

Yonataanɩ pɩzaɣ se ɛsʋsɩ Daviid. Yonataanɩ kaakɛ wiyaʋ Sɔɔlɩ pɩyalʋ nɛ pʋyɔɔ lɛ, ɛpɩzaɣ se ɛyɔɔdɩ se ɛnʋ mʋnɩna se ɛpɩsɩ wiyaʋ ɛ-caa lone taa. (1 Sam. 20:31) Ɛlɛ, Yonataanɩ kaaluzi ɛ-tɩ nɛ ɛñɔɔnɩ Yehowa kpam. Pʋyɔɔ lɛ, ɛɖʋ nesi lɩmaɣzɩyɛ nɖɩ Yehowa kpaɣaa nɛ ɛlɩzɩ Daviid se ɛkɛ wiyaʋ pʋwayɩ yɔ nɛ ɛ-laŋɩyɛ pilim. Ɛɛñɔnɩ Daviid kpam ɖɔɖɔ paa piiyeba nɛ Sɔɔlɩ mʋ pana siŋŋ yɔ. (1 Sam. 20:32-34) Yonataanɩ kaawɛnɩ sɔɔlɩm sɔsɔm Daviid yɔɔ nɛ pʋyɔɔ lɛ, ɛtaasʋsʋʋ-ɩ. Yonataanɩ kaakɛ tɔʋ tɔyʋ weyi ɛwɛ niye yɔ nɛ you laɖʋ weyi ɛwɛ abalɩtʋ yɔ. Paasɩm ɛ nɛ ɛ-caa Sɔɔlɩ se “pakɩlɩɣ seu kpeliŋ” nɛ “paakpaɖɩ ɖoŋ mʋʋzɩŋ.” (2 Sam. 1:22, 23) Pʋyɔɔ lɛ, Yonataanɩ pɩzaɣ se ɛkpazɩ ɛ-tɩ tʋma sɔsɔna wena ɛlaba yɔ a-yɔɔ. Ɛlɛ Yonataanɩ taañakɩ pana se ɛkpaɖɩ Daviid nɛ ɛtaasʋsʋʋ-ɩ tʋma kɩbana wena ɛlɛ laba yɔ a-yɔɔ. Daviid tɔm kaakɛdɩnɩ Yonataanɩ mbʋ pʋyɔɔ yɔ ɛɛwɛ abalɩtʋ nɛ ɛtaɣaɣ Yehowa liu. Toovenim taa lɛ, Daviid kʋ Gooliyaatɩ nɛ pɩtɛ lɛ, Yonataanɩ paɣzɩ-ɩ sɔɔlʋʋ ɛzɩ ɛ-maɣmaɣ yɔ. w21.01 21 § 6; 22 § 8-9

Yesu Krɩstʋ kɛnɩ Krɩstʋ ñɩma tɩŋa ñʋʋdʋ. Ɛlɛ, alɩwaatʋ ndʋ halʋ Krɩstʋ tʋ nɔɔyʋ ɖɔkʋʋ nesi yɔ, ɛ-walʋ pɩsɩɣ ɛ-ñʋʋdʋ nɛ ɛlɛ tɩtalɩ pilim. Pɩfɛyɩ kɛlɛʋ paa ɛzɩmtaa se halʋ eluzi ɛ-tɩ ɛ-walʋ tɛɛ. Ye mbʋ, halʋ kaamaɣzɩɣ weyi ɛ nɛ ɩ pakaɣ ɖɔkʋʋ nesi yɔ ɛ-yɔɔ lɛ, pɩwɛɣ ɖeu se ɛpɔzɩ ɛ-tɩ se: ‘Ɛbɛ wɩlɩɣ se koobu abalɩñɩnʋ ɛnɛ ɛkaɣ kɛʋ hɔʋ ñʋʋdʋ kɩbanʋ? Ɛzɩ fezuu taa tʋma tɔm cɛyɩ e-wezuu caɣʋ taa? Ye pɩtɩkɛ mbʋ, ɛbɛ yeki nɛ mamaɣzɩɣ se ɖɩɖɔkʋʋ nesi nɛ pɩtɛ lɛ, ɛkaɣ kɛʋ hɔʋ ñʋʋdʋ kɩbanʋ fezuu taa?’ Toovenim taa lɛ, pɩwɛɣ ɖeu se koobu halɩñɩnʋ ɛpɔzɩ ɛ-tɩ ɖɔɖɔ se: ‘Wɛtʋ kɩbandʋ ndʋ mɛwɛna nɛ tɩkaɣ-ɖʋ wazʋʋ ɖe-nesi ɖɔkʋʋ taa? Mɛnkɛ suuɖu tʋ nɛ kʋjɔʋ tʋ na? Ma nɛ Yehowa ɖa-taabalɩyɛ cɛyɩsaa?’ (Ekl. 4:9, 12) Ye halʋ nɔɔyʋ ɛkpaɣ lɩmaɣza kɩbana pʋcɔ nɛ ɛɖɔkɩ nesi yɔ, pɩpɩzɩɣ pɩsɩnɩ-ɩ nɛ piɖeni-i e-nesi ɖɔkʋʋ taa nɛ ehiɣ taa leleŋ. Ðo-koobiya halɩñɩma miiliyɔɔwaa sakɩyɛ luzuu pa-tɩ pa-walaa tɛɛ, nɛ pɛkɛnɩ kɩɖaʋ kɩbaŋʋ siŋŋ. Pamʋnɩ samtʋ. w21.02 8 § 1-2

Pɩnzɩ nzɩ sɩɖɛwa pitileɖita yɔ sɩ-taa, tɔm susuyaa sakɩyɛ ɖʋ pa-tɩ kaɖʋwa se pɛkpɛlɩkɩɣ kʋnʋŋ lɛɛkʋ nɛ pɩsa nɛ pawalɩsɩ pɔ-tɔm susuu tʋmɩyɛ nɛ paɖʋ nesi agbaa lɛɛna wena a-taa pɩpɔzʋʋ tɔm susuyaa yɔ. Krɩstʋ ñɩma mba, pa-maɣmaɣ pakpaɣnɩ lɩmaɣzɩyɛ nɖɩ se pɩsa nɛ Kewiyaɣ tʋma ɖɛɛnɩ ɛsɩndaa. Paa pɩpɩzɩɣ nɛ pɩpɔzɩ se pakpaɣ pɩnzɩ sakɩyɛ nɛ pɛkpɛlɩkɩnɩ kʋnʋŋ kɩfalʋʋ nɛ pɔyɔɔdɩ-kʋ camɩyɛ yɔ, pasɩɣnɩ ɛgbɛyɛ hɔɔlɩŋ sakɩyɛ taa. Pɛ-wɛtʋ kɩbandʋ nɛ pɛ-lɛɣtʋ kpazɩɣ ɖoŋ ɛgbɛyɛ taa koobiya. Koobiya mba, pɛwɛnɩ tɩ laʋ lɩmaɣza nɛ pamʋ ñɩm ɖɛ-ɛsɩndaa! Pɩtɩpɔzɩ se ɛgbɛyɛ taa ɛzʋtʋyaa ŋgbɛyɛ naɖɩyɛ ekizi se paahaɣ koobu abalɩñɩnʋ nɔɔyʋ waɖɛ se ɛkɛ ɛgbɛyɛ taa ɛzʋtʋyʋ yaa ɛgbɛyɛ taa tʋmlaɖʋ, mbʋ pʋyɔɔ yɔ ɛɛyɔɔdʋʋ kʋnʋŋ ŋgʋ kɩ-taa palakɩ kediɣzisi ɛgbɛyɛ taa yɔ camɩyɛ. Ɛgbɛyɛ taa ɛzʋtʋyaa kaatazɩɣ se pana se koobu nɔɔyʋ mʋnaa se paha-ɩ waɖɛ naɖɩyɛ yaa ɛtɩmʋna lɛ, pɩwɛɛ se pamaɣzɩ wɛtʋ ndʋ Bibl pɔzʋʋ ɛzʋtʋyaa nɛ ɛgbɛyɛ taa tʋmlaɖaa se pɛwɛɛna yɔ tɩ-yɔɔ, nɛ pɩtaakɛ ɛzɩma koobu ɛnʋ ɛyɔɔdʋʋ ɛgbɛyɛ taa kʋnʋŋ yɔ pɩ-yɔɔ.—1 Tim. 3:1-10, 12, 13; Tiiti 1:5-9. w20.08 30 § 15-16

Ɛyaa maɣzɩɣ se ye pɛwɛnɩ tɔnʋʋ taa alaafɩya camɩyɛ, pɛwɛɛnɩ liidiye sakɩyɛ nɛ laŋhɛzɩyɛ wɛɛ pɔ-hɔʋ taa yɔ, pi-ɖeke pɩpɩzɩɣ piyele nɛ pehiɣ taa leleŋ. Ɛlɛ taa leleŋ weyi ɛ-tɔm Yakubu yɔɔdaa yɔ, ɛkɛnɩ piye nɖɩ Ɛsɔ fezuu kiɖeɖeu lʋlʋʋ yɔ ɖɩ-hɔɔlʋʋ nakʋyʋ, nɛ taa leleŋ ɛnɩ ɛɛlɩɣnɩ wɛtʋ ndʋ tɩ-taa ɛyʋ wɛɛ yɔ tɩ-cɔlɔ. (Gal. 5:22) Krɩstʋ tʋ pɩzɩɣ nɛ ɛwɛɛ taa leleŋ taa yaa ɛwɛɛ koboyaɣ taa siŋŋ, ye ɛnawa se ɛ-tɔm kɛdɩnɩ Yehowa yaa ɛmaɣzɩɣnɩ Yesu yɔ. (Luka 6:22, 23; Kol. 1:10, 11) Ðɩpɩzɩɣ nɛ ɖɩkpaɣ ɖa-taa leleŋ nɛ ɖɩmaɣzɩnɩ kanɖʋ taa miŋ. Kanɖʋ yaɖɛ huzuu kanɖʋ taa miŋ yɔɔ se paa helim ɛmakɩ yaa tɛʋ ɛnɩɣ yɔ, ɛtaaɖɩ. Ða ɖɔɖɔ ɖɩpɩzɩɣ nɛ ɖɩwɛɛ taa leleŋ taa mbʋ tam, paa ɛbɛ ɛtɩɩlakɩ ɖe-wezuu caɣʋ taa yɔ. Ðɩɩkaɣ lesuu taa leleŋ ɛnɩ alɩwaatʋ ndʋ ɖɩhɩnɩɣ kʋdɔŋ yaa ɖɩɩwɛɣnɩ liidiye sakɩyɛ yɔ. Nɛ halɩ ɖɩkaɣ wɛʋ taa leleŋ taa alɩwaatʋ ndʋ ɛyaa hoŋuu-ɖʋ yaa ɖɔ-hɔʋ taa mba yaa lalaa kaɖɩɣnɩ-ɖʋ yɔ. Ða-taa leleŋ pɩzɩɣ nɛ ɛpaɣlɩ alɩwaatʋ ndʋ payɩ ɛyaa ñakɩ pana se pala nɛ ɖilesi-i yɔ. Takɩm mbʋ ɖɩkatɩɣ ɖe-tisuu yɔɔ yɔ, pɩwɩlɩɣ se ɖɩkɛ Krɩstʋ tɔmkpɛlɩkɩyaa toovenim ñɩma. (Mat. 10:22; 24:9; Yoh. 15:20) Pʋyɔɔ Yakubu ma sɔnɔ evemiye taa tɔm. w21.02 28 § 6

Alɩwaatʋ ndʋ ŋkalɩɣ Bibl taa masɩ nasɩyɩ nɛ sɩwɩlɩɣ se pɩcɛyɩ siŋŋ se ɖɩcaɣ ɖiɣ ɖiɣ nɛ ɖɩtaa Yehowa liu yɔ, ñaɣ pana nɛ ŋɖɔkɩ-sɩ ña-ñʋʋ taa. Pɩsa nɛ ŋɖɔkɩ-sɩ ña-ñʋʋ taa lɛ, ŋpɩzɩɣ nɛ ŋkalɩ-sɩ nɛ nɔɔ kɩkʋyaɣ yaa ŋma sɩ-taa tɔm takayaɣ nakɛyɛ yɔɔ nɛ ŋkalɩɣ-tʋ ɖoŋ ɖoŋ. Yehowa kaaheyi Yozuwee se ɛkalɩɣ Paɣtʋ takayaɣ ɖoŋ ɖoŋ e-liu tɛɛ nɛ pɩsa nɛ pɩɖɔmnɩ-ɩ ɖeu. Tɔm ndʋ ɛkalɩɣ Paɣtʋ takayaɣ taa yɔ, tɩkaɣ-ɩ sɩnʋʋ ɖɔɖɔ nɛ sɔɔndʋ ɛtaakpa-ɩ nɛ ɛwɛɛ abalɩtʋ nɛ eɖiyi Ɛsɔ samaɣ. (Yoz. 1:8, 9) Masɩ sakɩyɛ wɛ Ɛsɔtɔm taa nɛ sɩpɩzɩɣ sɩsɩnɩ-ŋ nɛ ŋcaɣ ɖiɣ ɖiɣ alɩwaatʋ ndʋ ŋkatɩɣ wɛtʋ ndʋ tiyeki se ɖoŋ ɖoŋ lɛ, ŋwɛɛ nɩɣzɛ taa yaa sɔɔndʋ ɛkpa-ŋ yɔ. (Keɣa 26:1-3; Adu. 3:25, 26) Ðe-kediɣzisi taa, samaɣ taa tɔm yɔɔdʋʋ, ɖo-koobiya tɔm cosuu, nɛ kɛdɛsɩ nzɩ ɖa nɛ ɖo-koobiya ɖɩlakɩ se ɖɩkpazɩnɩ ɖama ɖoŋ yɔ, sɩwazɩɣ-ɖʋ. (Ebr. 10:24, 25) Ðɩpɩzɩɣ ɖɔɖɔ nɛ ɖihiɣ ɖoŋ kpazʋʋ siŋŋ ye ɖiheyiɣ ɛgbɛyɛ taa taabalaa mba ɖɩtaɣ-wɛ liu yɔ ɛzɩma pɩlakɩ-ɖʋ yɔ. w21.01 6 § 15-16

Alɩwaatʋ ndʋ pamɩyɩsɩ-ŋ lɩm yɔ, ŋwɩlaa se ŋwɛnɩ tisuu sɔsɔm nɛ ŋtaɣ Yehowa liu. Nɛ Yehowa taa labɩ leleŋ nɛ ɛha-ŋ waɖɛ se ŋpɩsɩ ɛ-hɔʋ taa tʋ. Nɛ lɛɛlɛɛyɔ lɛ, pɩwɛɛ se ŋwolo pɩ-yɔɔ nɛ ŋtaɣ Yehowa liu. Pɩpɩzɩɣ nɛ pɩwɛ-ŋ kɛlɛʋ se ŋtaa Yehowa liu alɩwaatʋ ndʋ pɩpɔzʋʋ se ŋkpaɣ lɩmaɣza sɔsɔna ñe-wezuu caɣʋ taa yɔ. Ɛlɛ ɛzɩma ŋkaɣ labʋ alɩwaatʋ lɛɛtʋ taa? Pɩcɛyɩ siŋŋ se ɖɩtaa Yehowa liu alɩwaatʋ ndʋ ɖɩkpakɩɣ lɩmaɣza yɔ, pɩkpɛndɩnɩ alɩwaatʋ ndʋ ɖɩlɩzɩɣ aleɣya wena ɖɩkaɣ labʋ yɔ, tʋmɩyɛ nɖɩ ɖɩkaɣ labʋ yɔ nɛ kaɖʋsɩ nzɩ ɖɩkaɣ ɖʋʋ ɖa-tɩ yɔ. Taataa ña-maɣmaɣ ñɔ-lɔŋsɩnɖɛ liu. Ñɩnɩ Bibl paɣtʋ kila wena asɩɣnɩ-ŋ se ŋkpaɣ lɩmaɣzɩyɛ kɩbanɖɛ yɔ nɛ pʋwayɩ lɛ, ŋɖɔ Bibl paɣtʋ kila ana a-yɔɔ. (Adu. 3:5, 6) Ye ŋlakɩ mbʋ yɔ, Yehowa taa kaɣ labʋ leleŋ nɛ ɛgbɛyɛ taa mba kaɣ-ŋ ñam. Toovenim taa lɛ, ɛzɩ ɖa-tɩŋa payɩ yɔ, ña ɖɔɖɔ ŋtɩtalɩ pilim nɛ nabʋyʋ taa piyiɣdiɣ-ŋ. Ɛlɛ pɩtɩpɔzɩ se pɩɖɩɣ-ŋ nʋmɔʋ nɛ ŋtaala ño-ɖoŋ ɖeɖe Yehowa sɛtʋ taa. w21.03 6 § 14-15

Ñɔ-hɔʋ taa mba wɛɛ nɛ pakaɖɩɣnɩ-ŋ mbʋ pʋyɔɔ yɔ ŋsɛɣ Yehowa? Yaa ŋwɛ ɛjaɖɛ nɖɩ ɖɩ-taa paɖɩɣ Yehowa samaɣ tʋma naayɛ yaa ka-tʋma kpeekpe nʋmɔʋ yɔ? Ye mbʋ yɔ, ye ŋkalɩ 2 Timootee 1:12-16 nɛ 4:6-11, 17-22 yɔ, pɩpɩzɩɣ nɛ pɩkpazɩ-ŋ ɖoŋ. Apostoloo Pɔɔlɩ kaawɛ salaka taa lɛ, ɛma masɩ sɩnɛ. Pʋcɔ nɛ ŋkalɩ Bibl masɩ nzɩ lɛ, heyi Yehowa kaɖɛ nɖɩ ŋwɛɛ nɛ ŋkatɩɣ yɔ nɛ ɛzɩma ɖiyeki nɛ pɩlakɩ-ŋ yɔ. Heyi-i ɛzɩma ɖeyi ɖeyi pɩlakɩ-ŋ yɔ. Pʋwayɩ lɛ, pɔzɩ Yehowa se ɛsɩnɩ-ŋ nɛ ŋna paɣtʋ kila wena awɛ kɛdɛsɩ nzɩ sɩyɔɔdʋʋ mbʋ pɩtalɩ Pɔɔlɩ yɔ sɩ-taa yɔ. Paɣtʋ kila ana akaɣ-ŋ sɩnʋʋ se ŋtɩlɩ mbʋ pɩwɛɛ se ŋla yɔ. Yehowa kaapaɣ Pɔɔlɩ se ɛzɩma ɛkɛ Krɩstʋ tʋ yɔ pʋyɔɔ lɛ, ɛkaɣ katʋʋ nazɩm. (Tʋma 21:11-13) Ɛzɩma Yehowa sɩnɩ Pɔɔlɩ? Ecosi Pɔɔlɩ adɩma yɔɔ, nɛ alɩwaatʋ wɛɛ nɛ tɩɖɛɣ lɛ, ɛkpazɩ-ɩ ɖoŋ. Paaheyi Pɔɔlɩ se kɩhɛyʋʋ ŋgʋ kɩ-yɔɔ ɛñaɣ pana siŋŋ yɔ, ɛkaɣ-kʋ mʋʋ. Yehowa tɩŋnɩ ɖɔɖɔ Pɔɔlɩ taabalaa kɩbama yɔɔ nɛ ɛsɩnɩ-ɩ. w21.03 17-18 § 14-15, 19