Cee wayɩ yɔɔ toovenim tɔm

Yesu wɩlɩ-ɖʋ mbʋ pɩkaɣ-ɖʋ sɩnʋʋ nɛ ɖɩtɩlɩ se “Ɛsɔ Kewiyaɣ ñɔtaa” yɔ. (Luka 21:31) Ɛyɔɔdaa se mbʋ pɩkaɣ labʋ yɔ, pɩ-taa nabʋyʋ lɛ yoŋ sɔsɔŋ, tɛtʋ ñamsʋʋ, ñɔɔsɩ nɛ kʋdɔmɩŋ sɔsɔŋ, nɛ wɛtʋ ndʋ ɖɩwɛɛ nɛ ɖɩnaɣ sɔnɔ.—Luka 21:10-17.

Bibl tasɩ wɩlʋʋ se mbʋ pɩkaɣ labʋ ɛyaa kewiyitu tɔɔʋ tɛ “kɛdɛzaɣ kɩyakɩŋ” alɩwaatʋ taa yɔ, pɩ-taa nabʋyʋ lɛ lakasɩ kɩdɛkɛdɩsɩ nzɩ ɛyaa kaɣ wɛnʋʋ yɔ. Ŋpɩzɩɣ nɛ ŋkalɩ lakasɩ nzɩ sɩ-yɔɔ tɔm 2 Timootee 3:1-5 taa. Ŋnaɣ lakasɩ nzɩ sɔnɔ lɛ, pɩtʋʋ fɛyɩ se ŋtisiɣ se tɔm ndʋ Bibl yɔɔdaa pɩlɩɩnɩ kɛdɛzaɣ kɩyakɩŋ yɔɔ yɔ tiɖiɣni labʋ.

Ɛbɛ pɩwɩlɩɣ-ɖʋ? Pɩwɩlɩɣ se alɩwaatʋ ñɔtaa se Ɛsɔ Kewiyaɣ ɛla lɛɣzɩtʋ sɔsɔtʋ ndʋ tɩkaɣ yebu nɛ wezuu caɣʋ ɖe tɛtʋ yɔɔ nɛ pɩkɩlɩ yɔ. (Luka 21:36) Ɛsɔ yɔɔdɩ lɛɣzɩtʋ kɩbandʋ ndʋ ɛkaɣ labʋ tɛtʋ yɔɔ yɔ, nɛ tamaɣ kɩbaŋa ŋga ɛlabɩ mba pakaɣ caɣʋ tɩ-yɔɔ yɔ, pɩ-tɔm Bibl taa. Kɩɖaŋ nɩɩyɩ yɔ.

KEWIYAƔ KƖBAŊA

“Nɛ pɛcɛlɩ-ɩ ɖoŋ nɛ samtʋ nɛ kewiyaɣ; nɛ ɛyaa kpeekpe, cejewe nɛ yɔɔdasɩ paɖʋʋ-ɩ lɩm: E-ɖoŋ kɛ tam tam ɖoŋ weyi paakaɣ-ɩ mʋʋ yɔ, nɛ e-kewiyaɣ yɔ, kɛkɛ ŋga kaakaɣ tɛm yɔ.” —DANƖYƐƐLƖ 7:14.

Ɛbɛ pɩwɩlɩɣ-ɖʋ? Ŋpɩzɩɣ nɛ ŋnɩɩ leleŋ ɛjaɖɛ kpeekpe yɔɔ komina ŋgʋ Ɛsɔ sɩwa nɛ ɛ-Pɩyalʋ kɛ ki-Wiyaʋ yɔ kɩ-tɛɛ.

TƆNƲƲ TAA ALAAFƖYA

“Tɛtʋ taa ɛyʋ nɔɔyʋ ɛɛkaɣ tɔm se: ‘Pɩwɩɣ-m.’”—IZAAYII 33:24.

Ɛbɛ pɩwɩlɩɣ-ɖʋ? Ŋŋkaɣ tasʋʋ hɩnʋʋ kʋdɔŋ nɛ ŋŋkaɣ tasʋʋ wɛnʋʋ ɛjandʋ natʋyʋ, ŋkaɣ caɣʋ wezuu tam.

LAŊHƐZƖYƐ KIYA

“Ɛsɩnzɩ yoŋ tɩŋa piwolo pɩtalɩ tɛtʋ kamaɣ yɔɔ.”—KEƔA 45:10.

Ɛbɛ pɩwɩlɩɣ-ɖʋ? You nɛ kʋñɔmɩŋ weyi you kɔŋna yɔ pɩsɩɣ tɩnaɣ.

ƐYAA KƖBAMA ÐEKE KAƔNƖ WƐƲ TƐTƲ YƆƆ

“Kɩdɛkɛdʋʋ mʋkɩ . . . ‘ɖɛfɛɛ tɩnaa’ hikiɣ tɛtʋ.”—KEƔA 36:10, 11.

Ɛbɛ pɩwɩlɩɣ-ɖʋ? Ɛyaa kɩdɛkɛdaa ɩɩkaɣ tasʋʋ wɛʋ, ɛlɛ mba pañaŋ Ɛsɔ nɛ pa-laŋɩyɛ pilim yɔ, pe-ɖeke pakaɣnɩ wɛʋ.

TƐTƲ KPEEKPE KAƔ PƖSƲƲ PARADISUU

“Pakaɣ maʋ ɖɩsɩ nɛ pasʋʋ sɩ-taa nɛ pakaɣ sɔʋ viiñi tɩŋ nɛ pɔtɔɔ i-pee.”—IZAAYII 65:21, 22.

Ɛbɛ pɩwɩlɩɣ-ɖʋ? Tɛtʋ kpeekpe kaɣ wɛʋ kajʋka siŋŋ. Ɛsɔ kaɣ cosuu adɩma wena ɖɩlakɩ se ɛ-sɔɔlɩm “ɛla tataa” yɔ a-yɔɔ.—Maatiyee 6:10.