Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
© 2024 Watch Tower Bible and Tract Society of Pennsylvania
3-9 MARS
ÑƖM MBƲ PƖWƐ ƐSƆTƆM TAA YƆ ADUWA 3
Wɩlɩ se ŋtaɣ Yehowa liu
ijwbv tɔm ñʋʋ 14 § 4-5
Aduwa 3:5, 6—«Taatɩlɩsɩnɩ ña-maɣmaɣ ñɔ-tɔm taa nɩʋ lɛɣtʋ»
«Taa Yehowa liu nɛ ña-laŋɩyɛ kpeekpe.» Ye ɖa-lakasɩ ɩlakɩ nɔɔ kʋɖʋmaɣ nɛ Ɛsɔ sɔɔlɩm yɔ, ɖɩwɩlɩɣ se ɖɩtaɣ-ɩ liu. Pɩpɔzʋʋ se ɖɩtaa Ɛsɔ liu kiya nɛ ɖa-laŋɩyɛ pilim. Bibl taa, ɖoŋ ɖoŋ lɛ laŋɩyɛ kɛnɩ ɛyʋ weyi ɖɩkɛnɩ ɖooo ɖa-taa yɔ, nɛ pitukuuni ɛzɩma pɩlakɩ ɛyʋ yɔ, mbʋ piseɣtiɣ-i yɔ, ɛ-lɩmaɣza nɛ ɛ-lakasɩ. Ye mbʋ, ye pɔtɔm se ɖɩtaa Ɛsɔ liu yɔ piitukuuni ɛzɩma pɩlakɩ-ɖʋ yɔ pi-ɖeke. Pitukuuni ɖɔɖɔ mbʋ ɖɩlɩzɩɣ se ɖɩlakɩ mbʋ pʋyɔɔ yɔ ɖa-taa tɛma kiya se ɖa-Lɩzɩyʋ sɩm mbʋ piɖeɣni-ɖʋ nɛ pɩkɩlɩ yɔ.—Roma mba 12:1.
«Taataa ña-maɣmaɣ ñɔ-tɔm taa nɩʋ lɛɣtʋ liu.» Pɩpɔzʋʋ se ɖɩtaa Ɛsɔ liu mbʋ pʋyɔɔ yɔ ɖɩɩpɩzɩɣ nɛ ɖɩtaa liu ɖa-maɣmaɣ ɖa-lɩmaɣza wena atɩtalɩ pilim yɔ. Ye ɖɩtaɣ ɖa-tɩ liu yaa ye ɖiyeba nɛ ɛzɩma pɩlakɩ-ɖʋ yɔ mbʋ ɖiyiɣni ɖe-wezuu caɣʋ yɔ, pɩpɩzɩɣ piyele nɛ ɖɩkpaɣ lɩmaɣza wena pɩlakɩ-ɖʋ ɛzɩ awɛ ɖeu yɔ, ɛlɛ pʋwayɩ lɛ alʋlʋʋ pee kɩdɛkɛda. (Aduwa 14:12; Yereemii 17:9) Ɛsɔ lɔŋsɩnɖɛ kpaɖɩ ɖɔ-lɔŋsɩnɖɛ pɩdɩɩfɛyɩ. (Izaayii 55:8, 9) Ye ɖiyeba nɛ ɛ-lɩmaɣza ɖiyiɣ-ɖʋ yɔ, piɖeɣni-ɖʋ ɖe-wezuu caɣʋ taa.—Keɣa 1:1-3; Aduwa 2:6-9; 16:20.
ijwbv tɔm ñʋʋ 14 § 6-7
Aduwa 3:5, 6—«Taatɩlɩsɩnɩ ña-maɣmaɣ ñɔ-tɔm taa nɩʋ lɛɣtʋ»
«Maɣzɩ ɛ-yɔɔ ñɔ-ɖɔnɛ kpeekpe taa.» Pɩpɔzʋʋ se ɖɩñɩnɩ nɛ ɖɩtɩlɩ Ɛsɔ lɩmaɣza ɖe-wezuu caɣʋ hɔɔlɩŋ kpeekpe taa nɛ alɩwaatʋ ndʋ ɖɩcaɣ kpaɣʋ lɩmaɣza sɔsɔna naayɛ yɔ. Ðɩlakɩ mbʋ ye ɖɩtɩmɩɣnɩ-ɩ se eɖiyi-ɖʋ nɛ ye ɖɩɖɔŋ tɔm ndʋ ɛyɔɔdʋʋ Bibl taa yɔ tɩ-yɔɔ yɔ.—Keɣa 25:4; 2 Timootee 3:16, 17.
«Ɛkaɣ labʋ nɛ ña-nʋmɔŋ tʋʋzɩ.» Ɛsɔ lakɩ nɛ ɖa-nʋmɔŋ tʋʋzʋʋ, pʋ-tɔbʋʋ lɛ se ɛsɩɣnɩ-ɖʋ se ɖɩcaɣ wezuu ŋgʋ kɩlakɩ nɔɔ kʋɖʋmaɣ nɛ ɛ-paɣtʋ yɔ. (Aduwa 11:5) Piyeki nɛ ɖɩfɛɛ kala wena a-tɔm tɩcɛyɩ yɔ nɛ ɖihiɣ taa leleŋ ɖe-wezuu caɣʋ taa nɛ pɩkɩlɩ.—Keɣa 19:7, 8; Izaayii 48:17, 18.
be 76 § 4
Wɛɛ nɛ ŋwokini ɛsɩndaa
Ðɩkatɩɣ wɛtʋ ndɩ ndɩ ɖe-wezuu caɣʋ taa; pʋyɔɔ lɛ, pɩpɩzɩɣ pɩtakɩ nɔɔyʋ nɛ ɛyɔɔdɩ se: «Maatɛm katʋʋ wɛtʋ tʋnɛ. Mansɩm mbʋ pɩwɛɛ se mala yɔ.» Pɩkɛɣnɩ lɔŋsɩnɖɛ se ɛyʋ ɛyɔɔdɩ mbʋ? Aduwa 3:7 pakɩ-ɖʋ se: «Taakɛ lɔŋsɩnɖʋ ña-maɣmaɣ ñɛ-ɛsɩndaa.» Mbʋ ɖɩkatɩ ɖe-wezuu caɣʋ taa yɔ pɩtʋʋ fɛyɩ se pɩpɩzɩɣ nɛ pɩsɩnɩ-ɖʋ nɛ ɖɩtɩlɩ mbʋ nɛ mbʋ pɩ-yɔɔ pɩwɛɛ se ɖɩmaɣzɩ alɩwaatʋ ndʋ ɖɩkatɩɣ wɛtʋ ndɩ ndɩ ɖe-wezuu caɣʋ taa yɔ. Ɛlɛ ye ɖɩwɛɛ nɛ ɖiwokini ɛsɩndaa fezuu taa yɔ, mbʋ ɖɩna ɖe-wezuu caɣʋ taa yɔ pɩwɛɣnɩ ɖoŋ ɖa-maɣzɩm nɛ ɖa-laŋɩyɛ yɔɔ nɛ ɖɩnɩɩ pɩ-taa se Yehowa wazasɩ yekina se piɖeni-ɖʋ. Ye ɖɩwɛ wɛtʋ natʋyʋ taa yɔ, ɖɩwɩlɩɣ se ɖɩwɛɛ nɛ ɖiwokini ɛsɩndaa fezuu taa ye ɖɩɩtaɣ ɖa-tɩ liu, ɛlɛ ɖɩpɩsɩɣnɩ Yehowa yɔɔ kpaagbaa se eɖiyi-ɖʋ yɔ. Ðɩwɩlɩɣ ɖɔɖɔ se ɖɩwɛɛ nɛ ɖiwokini ɛsɩndaa fezuu taa ye ɖa-taa ɛtɛma se nabʋyʋ ɛɛpɩzɩɣ nɛ pɩla ye ɛtɩha nʋmɔʋ yɔ, nɛ ye ɖiwoki pɩ-yɔɔ nɛ ɖɩtaɣ liu ɖa-Caa weyi ɛwɛ ɛsɔdaa yɔ nɛ ɖɩsɔɔlɩ-ɩ yɔ.
Fezuu taa ñɩm
w06 15/9 17 § 7
Aduwa takayaɣ taa lɩmaɣza sɔsɔna
Aduwa 3:3. Pɩwɛɛ se sɔɔlɩm siɣsiɣ ñɩmbʋ nɛ siɣsiɣ wɛtʋ yaa toovenim wɛʋ ɩmʋ ñɩm siŋŋ ɖɛ-ɛsɩndaa. Pɩwɛɛ se ɖiyele nɛ wɛtʋ kɩbandʋ ndʋ tɩnaɣ kaɣlaa, ɛzɩ lɩtʋ ndʋ tɩmʋ ñɩm siŋŋ nɛ ɖɩlɛ-tʋ ɖe-liu tɛɛ yɔ. Pɩpɔzʋʋ ɖɔɖɔ se ɖɩma wɛtʋ kɩbandʋ ndʋ ɖa-laŋɩyɛ taa nɛ ɖiyele nɛ tɩkɛ ɖɛ-ɛyʋtʋ hɔɔlʋʋ nakʋyʋ.
10-16 MARS
ÑƖM MBƲ PƖWƐ ƐSƆTƆM TAA YƆ ADUWA 4
«Kandɩyɩ ña-laŋɩyɛ yɔɔ»
Ɛzɩma ŋpɩzɩɣ nɛ ŋcɔnɩ ña-laŋɩyɛ yɔɔ camɩyɛ?
4 Aduwa 4:23 taa tɔm piye «laŋɩyɛ» sɩŋnɩ mbʋ ɖɩkɛnɩ ɖooo ɖa-taa nɛ ɛyaa lalaa ɩɩpɩzɩɣ nɛ pana yɔ yaa mbʋ ɖɩkɛnɩ «mɛsaɣ tɛɛ yɔ.» (Kalɩ Keɣa 51:6 nɛ pɩtɛɛ tɔm.) Pʋ-tɔbʋʋ se «laŋɩyɛ» sɩŋnɩ ɖa-maɣzɩm, ɛzɩma pɩlakɩ-ɖʋ yɔ, mbʋ piseɣtiɣ-ɖʋ nɛ ɖɩlakɩ nabʋyʋ yɔ, nɛ mbʋ ɖɩsɔɔlaa yɔ. Pɩtɩkɛ ɛzɩma ɛyaa naɣ-ɖʋ ɛsa yɔɔ yem yɔ pi-ɖeke, ɛlɛ pɩkɛ ɖɔɖɔ ɛyʋ weyi ɖɩkɛnɩ ɖooo ɖa-taa kiŋ yɔ.
Ɛzɩma ŋpɩzɩɣ nɛ ŋcɔnɩ ña-laŋɩyɛ yɔɔ camɩyɛ?
10 Ye ɖɩsɔɔlaa se ɖɩkandɩyɩ ɖa-laŋɩyɛ yɔɔ camɩyɛ yɔ, kajalaɣ lɛ, pɩcɛyaa se ɖɩtɩlɩ kala wena apɩzɩɣ nɛ atalɩ-ɖɩ yɔ, nɛ pʋwayɩ lɛ, ɖɩla mbʋ pɩpɔzʋʋ yɔ kpɛdɛyɛ nɛ ɖɩkandɩyɩ ɖɩ-yɔɔ. Aduwa 4:23 taa tɔm piye nɖɩ pɛɖɛzaa se «kandɩyɩ» yɔ, ɖɩtɔzʋʋ-ɖʋ tʋmɩyɛ nɖɩ feŋiyu lakaɣ yɔ ɖɩ-yɔɔ. Wiyaʋ Salomɔɔ alɩwaatʋ taa, feŋiyaa sɩŋaɣ kolonzi yɔɔ nɛ pefeŋiɣ tɛtʋ yɔɔ, nɛ ye panawa se kaɖɛ naɖɩyɛ caɣ kɔm yɔ, pahʋlɩ nɔndɔʋ. Feŋiyu tʋmɩyɛ ɖɩnɛ ɖɩsɩɣnɩ-ɖʋ se ɖɩtɩlɩ mbʋ pɩcɛyaa se ɖɩla nɛ ɖɩkandɩyɩ ɖa-tɩ yɔɔ nɛ Sataŋ etaapisi ɖa-maɣzɩm yɔ.
11 Caanaʋ taa lɛ, feŋiyaa nɛ nɔnɔsɩ yɔɔ kandɩyaa palakaɣ pa-tʋmɩyɛ nɔɔ kʋɖʋmaɣ taa. (2 Sam. 18:24-26) Pa-tɩŋa pakandɩyaɣ tɛtʋ yɔɔ, paɖɩkɩ tɩ-nɔnɔsɩ lɛɛ lɛɛ alɩwaatʋ ndʋ panaɣ se koyindu nɔɔyʋ wɛɛ nɛ ɛñɔtʋʋnɩ tɛtʋ yɔ. (Neh. 7:1-3) Ðɛ-ɛhʋyɛ nɖɩ ɖɩkpaɣ Bibl nɛ ɖɩfalɩsɩna yɔ, ɖɩpɩzɩɣ nɛ ɖɩla tʋmɩyɛ ɛzɩ feŋiyu yɔ alɩwaatʋ ndʋ ɛhʋyɛ nɖɩ ɖiyeki nɛ ɖɩtɩlɩ se Sataŋ ñɩnɩɣ se ɛwɛɛkɩ ɖa-laŋɩyɛ, pʋ-tɔbʋʋ se ɖa-maɣzɩm, ɛzɩma pɩlakɩ-ɖʋ yɔ, mbʋ piseɣtiɣ-ɖʋ nɛ ɖɩlakɩ nabʋyʋ yɔ, nɛ mbʋ ɖɩsɔɔlaa yɔ. Ye mbʋ alɩwaatʋ ndʋ ɖɛ-ɛhʋyɛ hʋlʋʋ ɛgandɩyɛ, pʋ-tɔbʋʋ se alɩwaatʋ ndʋ ɖiheyiɣ-ɖʋ se kaɖɛ naɖɩyɛ caɣ-ɖʋ talʋʋ yɔ, pɩcɛyaa se ɖiwelisini-ɖɩ nɛ ɖɩɖɩɣ ɖɔ-nɔnɔɔ pʋ-tɔbʋʋ se ɖɩla mbʋ ɖɩpɩzɩɣ yɔ nɛ ɖɩfɛɛ kaɖɩ nɖɩ.
Ɛzɩma ŋpɩzɩɣ nɛ ŋcɔnɩ ña-laŋɩyɛ yɔɔ camɩyɛ?
14 Pɩsa nɛ ɖɩcɔnɩ ɖa-laŋɩyɛ yɔɔ camɩyɛ lɛ, pɩtɩkɛ lakasɩ kɩdɛkɛdɩsɩ ɖeke pɩwɛɛ se ɖɩñaɣ pana nɛ sɩtaawɛɛnɩ ɖoŋ ɖɩ-yɔɔ, ɛlɛ pɩpɔzaa ɖɔɖɔ se ɖiyele nɛ lakasɩ kɩbanzɩ wɛɛnɩ ɖoŋ ɖɩ-yɔɔ. Ðɩɖaɣnɩ pɩsʋʋ tɛtʋ ndʋ pɔcɔzɩ-tʋ koloŋa sɔsɔɔ nɛ pakandɩyɩɣ tɩ-nɔnɔsɩ yɔɔ yɔ, tɩ-kɩɖaʋ yɔɔ. Nabʋyʋ taa lɛ, nɔnɔɔ yɔɔ kandɩyʋ ɖɩkɩ nɔnɔɔ se koyindu ɛtaasʋʋ, ɛlɛ alɩwaatʋ lɛɛtʋ taa ɖɔɖɔ lɛ, ɛtʋlʋʋ nɔnɔsɩ se papɩzɩ nɛ pasʋnɩ tɔɔnaɣ nɛ wondu lɛɛtʋ tɛtʋ taa. Ye paɖɩɣ nɔnɔsɩ nɛ paatʋlʋʋ-sɩ kaaʋ yɔ, tɛtʋ taa ɛyaa kaɣ sɩbʋ ñɔɔsɩ. Mbʋ ɖɔɖɔ pɩwɛɛ se ɖoŋ ɖoŋ lɛ, ɖikuluu ɖa-laŋɩyɛ nɛ Ɛsɔ maɣzɩm pɩzɩ nɛ pɩwɛɛnɩ ɖoŋ ɖɩ-yɔɔ.
w12 1/5 32 § 2
«Kandɩyɩ ña-laŋɩyɛ yɔɔ!»
Ɛbɛ yɔɔ pɩwɛɛ se ɖɩkandɩyɩ ɖa-laŋɩyɛ yɔɔ pʋ-tɔbʋʋ se ɛyʋ weyi ɖɩkɛnɩ ɖooo ɖa-taa yɔ ɛ-yɔɔ? Ɛsɔ seɣti Wiyaʋ Salomɔɔ nɛ ɛma se: «Kandɩyɩ ña-laŋɩyɛ yɔɔ nɛ pɩkpaɖɩ pɩtɩŋa payɩ, mbʋ pʋyɔɔ yɔ ɖɩ-taa wezuu hila lɩɣna.» (Aduwa 4:23) Pɩsa nɛ piɖeni-ɖʋ ɖe-wezuu caɣʋ taa sɔnɔ nɛ cee wayɩ lɛ, pɩlɩɣnɩ ɛyʋ weyi ɖɩkɛnɩ ɖooo ɖa-taa yɔ ɛ-cɔlɔ. Ɛbɛ yɔɔ? Mbʋ pʋyɔɔ yɔ Ɛsɔ naɣ mbʋ pɩwɛ ɖa-laŋɩyɛ taa yɔ. (1 Samɩyɛɛlɩ 16:7) Ndʋ Ɛsɔ maɣzɩɣ ɖɔ-yɔɔ yɔ pɩlɩɣnɩ ɛyʋ weyi ɖɩkɛnɩ ɖooo ɖa-taa yɔ, pʋ-tɔbʋʋ se «mbʋ pɩmɛlɩ laŋɩyɛ taa yɔ» pɩ-cɔlɔ.—1 Pɩyɛɛrɩ 3:4.
Fezuu taa ñɩm
Ŋtisiɣ faaa se ŋɖaŋ Yehowa?
4 Aduwa 4:18 heyiɣ-ɖʋ se: «Ɛyaa siɣsiɣ tɩnaa nʋmɔʋ wɛ ɛzɩ tanaŋ tɛɛ ñalɩmɩyɛ nɖɩ ɖɩwɛɣ ñandʋʋ yɔɔ nɛ pɩkɔɔ nɛ pɩsɩɩnɩ alɩwaatʋ ndʋ pɩñandɩ kiya yɔ.» Tɔm ndʋ, titukuuni nʋmɔʋ ŋgʋ kɩ-yɔɔ Yehowa tɩŋɩɣna nɛ ekuluu ɛ-tamaɣ yɔɔ nɛ ɛwɩlɩɣ ɛ-samaɣ yɔ, pʋ-tɔbʋʋ lɛ se ɛlakɩ mbʋ pazɩ pazɩ. Mayaɣ ŋga kapɩzɩɣ kasɩnɩ-ɖʋ ɖɔɖɔ nɛ ɖɩtɩlɩ ɛzɩma Krɩstʋ tʋ nɔɔyʋ lakɩ lɛɣzɩtʋ e-wezuu caɣʋ taa nɛ ɛñɔtʋʋnɩ Yehowa yɔ. Pʋcɔ nɛ ɛyʋ nɔɔyʋ ñɔtɩnɩ Yehowa lɛ, pɩkpakɩɣ alɩwaatʋ. Ye ɖɩkpɛlɩkɩɣ Ɛsɔtɔm camɩyɛ, nɛ ɖɩɖɔŋ tɩ-taa lɔŋ tasʋʋ nɛ lɔŋ weyi Yehowa ɛgbɛyɛ tasɩɣ-ɖʋ yɔ ɩ-yɔɔ yɔ, pazɩ pazɩ lɛ ɖɩkaɣ wɛnʋʋ wɛtʋ ndʋ Krɩstʋ wɛna yɔ. Pɩtasɩ lɛ, ɖɩkaɣ tɩlʋʋ Ɛsɔ camɩyɛ nɛ pɩkpaɖɩ. Iyele nɛ ɖɩna kɩɖaʋ ŋgʋ Yesu kpaɣaa nɛ ɛlɩzɩnɩ tɔm ndʋ tɩ-taa yɔ.
17-23 MARS
ÑƖM MBƲ PƖWƐ ƐSƆTƆM TAA YƆ ADUWA 5
Ise kʋzʋʋ kɩdɛkɛdʋʋ
w00 15/7 29 § 1
Ŋpɩzɩɣ nɛ ŋwolo pɩ-yɔɔ nɛ ŋwɛɛ kele kele ɛjaɖɛ nɖɩ ɖɩ-taa kʋzʋʋ kɩdɛkɛdʋʋ tɔyaa yɔ
Eduuye ɖɩnɛ ɖɩ-taa, acɛyɛ laɖʋ weyi ɛ-tɔm pɔyɔɔdaa yɔ paya-ɩ se «halʋ ɛgɔm», hayitu laɖʋ. Tɔm pee wena halʋ ɛnʋ ɛlabɩnɩ tʋmɩyɛ se epeɣzi weyi ɛsɔɔlaa se epeɣzi-i yɔ awɛ leleŋ ɛzɩ tʋŋ num yɔ nɛ awɛɛ lɛzɛ lɛzɛ ɛzɩ oliivi num yɔ. Sakɩyɛ taa lɛ, mbʋ ɛyʋ weyi ɛsɔɔlaa se ɛcaɣ kʋzʋʋ kɩdɛkɛdʋʋ wezuu yɔ ɛpaɣzɩɣna. Iyele nɛ ɖɩna halʋ nɔɔyʋ kɩɖaʋ, payaɣ-ɩ se Amy nɛ ɛkɛ takayaɣ taa mayʋ nɛ ɛwɛnɩ pɩnzɩ 27 nɛ eɖewa pɩdɩɩfɛyɩ. Ɛkɛdaa se: «Man-tʋmɩyɛ taa abalʋ nɔɔyʋ keŋni-m siŋŋ nɛ ɛñɩtɩɣ nɛ ehiɣ waɖɛ naɖɩyɛ lɛ ɛsaŋɩ-m. Ye ɛyʋ eɖiɣzinaa se pamaɣzɩɣ ɛ-yɔɔ yɔ, pɩwɛ ɖeu. Ɛlɛ pɩnaɣaɣ kpayɩ kpayɩ se kʋzʋʋ yɔɔ ɛmaɣzaɣ mɔ-yɔɔ mbʋ. Ɛlɛ maakaɣ yebu nɛ ɛkpa-m ɛ-kpaca taa kpa.» Abalʋ yaa halʋ weyi ɛñɩnɩɣ se epeɣzi nɔɔyʋ yɔ tɔm pee wena ɛlakɩnɩ tʋmɩyɛ yɔ aseɣtiɣ ɛyʋ, ɛlɛ ye ŋɖiɣzini mbʋ ɛñɩnɩɣ yɔ ɛɛkaɣ pɩzʋʋ nɛ epeɣzi-ŋ. Pʋyɔɔ lɛ, pɩpɔzʋʋ se ɖɩfalɩsɩ ɖoŋ weyi ɖɩwɛna se ɖɩmaɣzɩ ɖa-ñʋʋ taa camɩyɛ yɔ.
w00 15/7 29 § 2
Ŋpɩzɩɣ nɛ ŋwolo pɩ-yɔɔ nɛ ŋwɛɛ kele kele ɛjaɖɛ nɖɩ ɖɩ-taa kʋzʋʋ kɩdɛkɛdʋʋ tɔyaa yɔ
Pee kɩdɛkɛda wena kʋzʋʋ kɩdɛkɛdʋʋ lʋlʋʋ yɔ awɛ ñaŋ ɛzɩ tɩʋ ŋgʋ kɩwɛ ñaŋ yɔ nɛ awɛ lɔŋ ɛzɩ sɩɣa ŋga kɛwɛ lɔŋ ceemenje yɔ, ayeki nɛ ɛyʋ nɩɩ siziŋ nɛ halɩ apɩzɩɣ nɛ akɔnɩ-ɩ sɩm. Pee kɩdɛkɛda wena pɩlʋlʋʋ yɔ a-taa naayɛ yɔ: ɛhʋyɛ nɖɩ ɖɩcɛyɩɣ ɛyʋ yɔ, hoɣa ŋga ɛyʋ tɩɖʋna yɔ, yaa kʋzʋʋ kʋdɔmɩŋ. Maɣzɩ ɖɔɖɔ wɩzasɩ nzɩ abalʋ yaa halʋ weyi ɛ-tɛŋga caɣ kʋzʋʋ kɩdɛkɛdʋʋ wezuu yɔ ɛnɩɣ yɔ sɩ-yɔɔ nɛ ŋna. Kʋzʋʋ kɩdɛkɛdʋʋ wezuu ŋgʋ ɛyʋ tɛŋga cakɩ halɩ tam kʋɖʋm yɔ pɩpɩzɩɣ nɛ pɩɖʋ ɛ-tɛŋga heŋ sɔsɔŋ e-wezuu caɣʋ kpeekpe. Toovenim taa lɛ, kʋzʋʋ kɩdɛkɛdʋʋ kɔŋnɩ wɩzasɩ.
w00 15/7 29 § 5
Ŋpɩzɩɣ nɛ ŋwolo pɩ-yɔɔ nɛ ŋwɛɛ kele kele ɛjaɖɛ nɖɩ ɖɩ-taa kʋzʋʋ kɩdɛkɛdʋʋ tɔyaa yɔ
Pɩwɛɛ se ɖiposi ɖa-tɩ nɛ ɛyaa mba papɩzɩɣ nɛ piseɣti-ɖʋ nɛ ɖɩcaɣ kʋzʋʋ kɩdɛkɛdʋʋ wezuu yɔ. Pɩɩwɛɣ ɖeu se ɖiwelisiɣ minziikiwaa mba patɩmʋna yɔ, ɖɩcɔŋnɩ aleɣya wena a-taa palakɩ azuluma lakasɩ yɔ, yaa ɖɩcɔŋnɩ kʋzʋʋ kɩlɛmɩŋ nɛ ɖɩha nʋmɔʋ nɛ ɛyaa mba pɛ-wɛtʋ kɩdɛkɛdɩtʋ wɛɛnɩ ɖoŋ ɖɔ-yɔɔ. (Aduwa 6:27; 1 Kɔrɛntɩ mba 15:33; Efɛɛzɩ mba 5:3-5) Nɛ pɩkɛɣnɩ kɩmɛlɛndʋ sɔsɔtʋ kpem se ɖɩcɛbɛlɩɣ-wɛ yaa ɖɩtɩŋɩɣnɩ wondu suu mbʋ pɩtɩmʋna nɛ ɖa-tɩ ñɔɔzʋʋ mbʋ pɩtɩmʋna yɔ pɩ-yɔɔ nɛ ɖɩhɔ pa-lɩmaɣza nɛ ɖɩkɔnɩ ɖɔ-yɔɔ!—1 Timootee 4:8; 1 Pɩyɛɛrɩ 3:3, 4.
Fezuu taa ñɩm
w00 15/7 29 § 7
Ŋpɩzɩɣ nɛ ŋwolo pɩ-yɔɔ nɛ ŋwɛɛ kele kele ɛjaɖɛ nɖɩ ɖɩ-taa kʋzʋʋ kɩdɛkɛdʋʋ tɔyaa yɔ
Salomɔɔ ñɩɣ niye kaɖɛ sɔsɔɖɛ nɖɩ kʋzʋʋ kɩdɛkɛdʋʋ wezuu caɣʋ kɔŋna yɔ ɖɩ-yɔɔ. Weyi ɛlakɩ acɛyɛ yɔ elesiɣ ñamtʋ ndʋ ɛyaa wɛnɩ ɛ-yɔɔ yɔ, yaa ñamtʋ ndʋ ɛwɛnɩ ɛ-maɣmaɣ ɛ-tɩ yɔɔ yɔ. Pɩkɛɣnɩ fɛyɛ sɔsɔɖɛ siŋŋ se ɛyʋ ɛñɩnɩ se ɛkʋʋ ɛ-kʋzʋʋ kɔɖɛyɩ yaa nɔɔyʋ ñɩŋgʋ nɛ pʋyɔɔ lɛ ɛcaɣ kʋzʋʋ kɩdɛkɛdʋʋ wezuu. Ye ɖɩsʋnɩ weyi ɛtɩkɛ ɖɛ-tɛŋga yɔ, pɩwɩlɩɣ se ɖɩɩñaŋ ɖa-tɩ.
24-30 MARS
ÑƖM MBƲ PƖWƐ ƐSƆTƆM TAA YƆ ADUWA 6
Ɛbɛ ɖɩpɩzɩɣ nɛ ɖɩkpɛlɩkɩ kayɩmasɩ cɔlɔ?
it-1 927 § 3; 928 § 1
Kayɩmaɣ
‘Lɔŋsɩnɖɛ nɖɩ Ɛsɔ ɖʋ sɩ-taa yɔ.’ Kayɩmasɩ fɛyɩnɩ ñʋʋ taa lɔŋsɩnɖɛ; lɔŋsɩnɖɛ nɖɩ sɩwɛna yɔ, alɩwaatʋ ndʋ Ɛsɔ lɩzaɣ-sɩ lɛ ɛha-sɩ lɔŋsɩnɖɛ nɖɩ. Bibl yɔɔdɩ kayɩmaɣ tɔm se: «Kɔñɔɔzʋʋ kɔ-tɔɔnaɣ, nɛ kekpeɣliɣ-kɛ kʋmtʋ alɩwaatʋ taa.» (Adu 6:8) Kayɩmasɩ nzɩ sɩkɩlɩ tɔyʋʋ Palɛstiini ɛjaɖɛ taa yɔ sɩ-taa nasɩyɩ payaɣ se kʋnɖaa (Messor semirufus). Kayɩmasɩ tindimiye nɖɩ, ɖikpeɣliɣ tɔɔnasɩ kpiziɣɖe alɩwaatʋ taa nɛ lʋŋɩyɛ taa se sɩɩtɔɔ pɩnaɣ alɩwaatʋ lɛɛtʋ taa; tɩ-taa natʋyʋ lɛ yolum taa, alɩwaatʋ ndʋ tɩ-taa pɩwɛ kaɖɛ se sihiɣ tɔɔnaɣ yɔ. Ðoŋ ɖoŋ lɛ panaɣ kayɩmasɩ nzɩ tɔɔnasɩ ɖɩmaɖɛ cɔlɔ, ɖenɖe tɔɔnasɩ pee tɔyaa yɔ. Ye tɛʋ ɛnɩwa nɛ nikaɣ kpa tɔɔnaɣ pee wena sikpeɣlaa yɔ, sɩlɩɣnɩ-yɛ awayɩ nɛ sile alɩwaatʋ ndʋ wɩsɩ ñakɩ yɔ se awɩlɩ. Halɩ tɔɔnaɣ pee wena sikpeɣliɣ yɔ sɩkpalɩɣ ɖenɖe añɔʋna yɔ se ataañɔ. Nʋmɔŋ weyi ɩ-taa kayɩmasɩ nzɩ sɩɖɔŋ yɔ ɩ-taa kpɩzɩɣ camɩyɛ nɛ tɔɔnaɣ pee hutu wɛɣ sɩ-pɔŋ nɔnɔsɩ ɛsɩndaa, nɛ piyeki se patɩlɩ kayɩmasɩ tindimiye nɖɩ.
Wɛtʋ ndʋ pɩmʋnaa se ɖɩmaɣzɩna yɔ. Mbʋ ɖɩkpɛlɩkɩ pazɩ kayɩmasɩ wɛtʋ yɔɔ yɔ piyeba nɛ ɖɩna mbʋ pʋyɔɔ lɔŋ tasʋʋ pʋnɛ pɩ-tɔm cɛyaa yɔ; pɩtɔŋ: «Feendu tʋ ña, wolo nɛ ŋcɔnɩ kayɩmaɣ; cɔnɩ ka-lakasɩ nɛ ŋpɩsɩ lɔŋsɩnɖʋ.» (Adu 6:6) Pɩtɩkɛ ɛzɩma sɩñɔɔzʋʋ cee wayɩ yɔ pi-ɖeke pʋyɔɔ sɩwɛ ŋgee, ɛlɛ ɛzɩma sɩɖɔkʋʋ kpam nɛ siwoki tʋmɩyɛ nɖɩ sɩlakɩ yɔ ɖɩ-yɔɔ yɔ piyeba ɖɔɖɔ nɛ sɩwɛɛ ŋgee. Ðoŋ ɖoŋ lɛ, kayɩmasɩ nzɩ sɩsɩɣlɩɣ wondu ndʋ yɔ, tɩcɛzɩ sɩ-maɣmaɣ si-yuŋ tam nabʋlɛ yaa pɩcɛzɩ mbʋ; sɩñakɩ pana nɛ sɩlakɩ tʋma wena paɖʋ-sɩ yɔ nɛ sɩɩpɩsɩɣnɩ wayɩ paa sɩtɔlʋʋ, pituu-sɩ, yaa sɩtɔlʋʋ pɔŋ taa yɔ. Sɩlakɩ tʋmɩyɛ nɔɔ kʋɖʋmaɣ taa siŋŋ, siyeki nɛ sɩ-pɔŋ taa wɛɣ cɩɖɩ cɩɖɩ nɛ sɩmaɣzɩɣ sɩ-taabalaa mba pa nɛ sɩ palakɩ tʋmɩyɛ yɔ pɔ-yɔɔ, nɛ nabʋyʋ taa sɩsɩɣnɩ sɩ-taa nzɩ pɩkʋwa yaa pɩnɩwa yɔ se sɩpɩsɩ sɩ-pɔʋ taa.
w00 15/9 26 § 3-4
Kandɩyɩ ña-hɩɖɛ yɔɔ
Pɩɩwɛɣ ɖeu se ɖa ɖɔɖɔ ɖɩwɛɛ kpekpeka ɛzɩ kayɩmasɩ yɔ? Pɩwɛɣ ɖeu se ɖɩñaɣ pana nɛ ɖɩwɛɛ kpekpeka nɛ ɖɩkpasɩ ɖa-tʋmɩyɛ taa paa pɔcɔŋnɩ-ɖʋ yaa paacɔŋnɩ-ɖʋ yɔ. Pɩwɛɛ se ɖɩla tʋmɩyɛ nɛ ɖo-ɖoŋ kpeekpe paa pɩtɩɩkɛ sukuli taa, ɖa-tʋmɩyɛ taa, yaa tɔm susuu tʋmɩyɛ taa yɔ. Ɛzɩma kayɩmasɩ wɛ kpekpeka yɔ pɩwazɩɣ-sɩ, mbʋ ɖɔɖɔ Ɛsɔ sɔɔlaa se ‘ɖɩnɩɩ leleŋ tʋma ɖoŋ ñɩna wena payɩ ɖɩlakɩ yɔ a-taa.’ (Eklezɩyasɩtɩ 3:13, 22; 5:18) Pee wena tʋmɩyɛ ɖoŋ ñɩnɖɛ labʋ lʋlʋʋ yɔ ana yɔ: ɛhʋyɛ kele kele ñɩnɖɛ nɛ laŋɩyɛ hɛzʋʋ.—Eklezɩyasɩtɩ 5:12.
Salomɔɔ labɩnɩ tʋmɩyɛ tɔm pɔzʋʋ naalɛ se ɛñaɣ pana nɛ efezi feendu tʋ nɛ ɖom yɔɔ. Mbʋ yɔ: «Feendu tʋ ña, ŋhɩnɩɣ mbʋ nɛ pɩkɔɔ nɛ pɩsɩɩnɩ ɖooye? Ɛzɩmtaa ŋkaɣ kʋyɩnʋʋ ɖom yɔɔ?» Pʋwayɩ lɛ ɛɖʋ ɛ-tɩ feendu tʋ lone taa nɛ ɛyɔɔdɩ se: «Ðoo pazɩ, lili pazɩ, kpɛkɩ ñe-nesi nɛ ŋhɛzɩ pazɩ nɛ ña-kʋñɔndʋtʋ kaɣ kɔm ɛzɩ mɩlʋ sɔsɔ yɔ, nɛ ña-tanɩm kaɣ kɔm ɛzɩ ɛyʋ weyi ɛɖɔkɩ you wonuu yɔ.» (Aduwa 6:9-11) Alɩwaatʋ ndʋ feendu tʋ kpɛkɩɣ nesi nɛ ɛɛlakɩ tʋmɩyɛ naɖɩyɛ yɔ, kʋñɔndʋtʋ kɔŋ ɛ-yɔɔ lɛɛ lɛɛ ɛzɩ añɔndɔm nɔɔyʋ tuduu ɛyʋ yɔ, nɛ tanɩm kɔŋ ɛ-yɔɔ ɛzɩ ɛyʋ weyi ɛɖɔkɩ you wonuu yɔ. Ñɩtʋ nɛ sɔɔ ñɩtʋ suu feendu tʋ hayɩm taa lɛɛ lɛɛ. (Aduwa 24:30, 31) Piileɖiɣ pʋcɔ nɛ ɛ-tadɩyɛ ɖʋ lɩm. Alɩwaatʋ ɛzɩma tʋmɩyɛ ñʋʋdʋ nɔɔyʋ pɩzɩɣ nɛ eyele feendu tʋ ɛ-tʋmɩyɛ taa? Nɛ sukulibɩɣa ŋga kɛwɛ feendu siŋŋ nɛ katɩsɔɔlɩ kpɛlɩkʋʋ yɔ kapɩzɩɣ kataa liu se pɩkaɣ-kɛ ɖenuu sukuli taa?
Fezuu taa ñɩm
w00 15/9 27 § 3
Kandɩyɩ ña-hɩɖɛ yɔɔ
Lakasɩ kɩdɛkɛdɩsɩ 7 nzɩ sɩ-tɔm pɔyɔɔdɩ Aduwa 6:16-19 taa yɔ sɩwɩlɩɣ wɛtʋ kɩdɛkɛdɩtʋ ndʋ payɩ Yehowa paɖɩɣ yɔ. «Ɛsa wena akpazɩɣ a-tɩ yɔ» nɛ «laŋɩyɛ nɖɩ ɖɩtaŋ tamasɩ kɩdɛkɛdɩsɩ yɔ» tukuuni kɩwɛɛkɩm mbʋ ɛyʋ lakɩ ɛ-lɩmaɣza taa yɔ. «Nzʋlʋmɩyɛ nɖɩ ɖɩcɛtɩɣ yɔ» nɛ «aseɣɖe tʋ cɛtɩyʋ weyi ɛ-nɔɔ hutuu cɛtɩm tɔm yɔ» tukuuni kɩwɛɛkɩm mbʋ ɛyʋ lakɩ yɔɔdaɣ taa yɔ. «Nesi nzɩ sɩkpɛdɩɣ calɩm ɖulum yɔ» nɛ «nɩŋgbanzɩ nzɩ siseɣ lɛɛ lɛɛ se sɩla kɩdɛkɛdɩm yɔ» tukuuni kañatʋ lakasɩ. Nɛ kɔzɩ kɔzɩ lɛ, Yehowa paɖɩɣ ɛyaa mba pɔsɔɔlɩ kɔnʋʋ ɖama kɩɩnɩnʋʋ mba paawɛ laŋhɛzɩyɛ taa yɔ pɛ-hɛkʋ taa yɔ. Pakʋyʋnɩ 6 nɛ powolo 7 nɛ pɩwɩlɩɣ se pɩtɩtɛ; mbʋ pʋyɔɔ yɔ ɛyaa woki pɩ-yɔɔ nɛ palakɩ lakasɩ kɩdɛkɛdɩsɩ lɛɛsɩ.
31 MARS–6 AVRIL
ÑƖM MBƲ PƖWƐ ƐSƆTƆM TAA YƆ ADUWA 7
Se wɛtʋ ndʋ tɩpɩzɩɣ tiyele nɛ pɩtakɩ-ŋ yɔ
w00 15/11 29 § 5
«Ðɔkɩ man-paɣtʋ nɛ ŋwɛɛ wezuu»
Mondoɖebɔʋ ŋgʋ kɩ-cɔlɔ Salomɔɔ kaasɩŋaa nɛ ɛcɔŋna yɔ, paɖʋ giriyaazɩ kɩ-yɔɔ, nɛ pɩtɩla yɔ ɖaŋ palabɩnɩ-kʋ, nɛ palabɩ-kʋ nɛ lɛɣtʋ. Wɩsɩ ɖʋwa nɛ cɩkpɛndʋʋ paɣzɩ labʋ habɛɛ yɔ. Ɛna evebu nɔɔyʋ, weyi papɩzɩɣ nɛ pepeɣzi-i kɛlɛʋ yɔ. Ɛfɛyɩnɩ lɛɣtʋ, yaa ɛ-ñʋʋ taa fɛyɩ, ɛfɛyɩnɩ laŋɩyɛ. Pɩtɩla yɔ, ɛsɩm ɛyaa mba pɛwɛ egeetiye nɖɩ ɖɩ-taa ɛwɛɛ nɛ ɛɖɔŋ yɔ nɛ mbʋ pɩpɩzɩɣ nɛ pɩtalɩ-ɩ peeɖe yɔ. Evebu ɛnʋ ɛkpaɣ nʋmɔʋ ŋgʋ kiwoki nʋmayasa wena añɔtɩnɩ halʋ ɛnʋ ɛ-ɖɩɣa kpam yɔ, nɛ ɛɖɔ nɛ ewobini ɛ-ɖɩɣa yɔɔ kiŋ. Anɩ halʋ ɛnʋ ɛkɛnaa? Nɛ ɛbɛ ɛcaɣ labʋ?
w00 15/11 30 § 4-6
«Ðɔkɩ man-paɣtʋ nɛ ŋwɛɛ wezuu»
Halʋ ɛnʋ e-ndomee yɔɔ nɛ tɔm leleŋ ñɩndʋ. Ɛyɔɔdʋʋnɩ abalɩtʋ nɛ ɛsɩndaa wɩlɩɣ se ɛ-taa tɛmnɩ tɔm ndʋ ɛyɔɔdʋʋ yɔ. Tɔm ndʋ payɩ ɛyɔɔdʋʋ yɔ, ɛmaɣzɩɣ tɩ-yɔɔ camɩyɛ se pɩsa nɛ ɛpɩzɩ epeɣzi evebu ɛnʋ. Ɛtɔm se puwiye, ɛla laŋhɛzɩyɛ kɩlaŋ nɛ ɛɖɔ ɖuutu ndʋ eɖuwaa yɔ tɩ-yɔɔ. Ɛyɔɔdɩ mbʋ se ɛwɩlɩ se ɛwɛ siɣsiɣ nɛ ɛwɛnɩ fezuu taa wɛtʋ kɩbandʋ. Nandʋ, mʋlʋm, num, nɛ vɛɛ pakpakaɣ nɛ palaɣ laŋhɛzɩyɛ kɩlaŋ Yeruzalɛm templo taa. (Levitiki 19:5, 6; 22:21; Kɩgalʋʋ 15:8-10) Weyi ɛlaɣ laŋhɛzɩyɛ kɩlaŋ yɔ, pɛcɛlɩɣ-ɩ wondu ndʋ ɛlawa yɔ tɩ-taa natʋyʋ se pɩwazɩ ɛ-maɣmaɣ nɛ ɛ-hɔʋ taa mba; ye mbʋ, ɛ-tɔm ndʋ tɩwɩlɩɣ ɖɔɖɔ se tɔɔnaɣ nɛ sʋlʋm sakɩyɛ wɛ ɛ-ɖɩɣa taa. Ye mbʋ, halʋ ɛnʋ ɛ-tɔm taa tʋ kpayɩ kpayɩ: Evebu ɛnʋ ɛkaɣ nɩʋ leleŋ ɛ-ɖɩɣa taa. Ɛsɔzaa se evebu ɛnʋ ɛ-yɔɔ ɛnʋ lɩnɩ ɛ-ɖɩɣa se ɛkatɩ-ɩ. Tɔm ndʋ titukuuni weyi etisiɣ tɩ-yɔɔ yɔ. Bibl taa tazɩyʋ nɔɔyʋ yɔɔdaa se: «Pɩkɛ toovenim se ɛlɩwa se ɛkatɩ nɔɔyʋ, ɛlɛ toovenim taa lɛ ɛzɩ evebu ɛnʋ ɛ-yɔɔ keekee ɛlɩwa? Pɩkɩlaa yɔ pɩtɩla weyi ɛkɛ kɩmɛlɛŋ ɛzɩ evebu ɛnʋ yɔ, ɛnʋ pɩzɩɣna nɛ etisi ɛ-tɔm ndʋ.»
Ɛtɩŋnɩ ɛ-tɩ ñɔɔzʋʋ, tɔm pee wena apeɣziɣ yɔ, evebu ɛnʋ ɛ-yɔɔ kpɛlʋʋ, nɛ ɛ-nɔɔ taa tɔm leleŋ ñɩndʋ yɔɔ nɛ pɩtɛ lɛ, ɛñaɣ pana ɖɔɖɔ se eyele nɛ evebu ɛnʋ ɛnɩɩ mbʋ pɩwɛ ɛ-ɖɩɣa taa yɔ pɩ-sɔzɩŋ. Ɛyɔɔdaa se: «Mɔnpɔ pɩsaŋ kɩbaŋ man-kaɖʋ yɔɔ, pɩsatʋ pɩsaŋ weyi pata-ɩ tɔlɩm nɛ ɩlɩnɩ Ejipiti yɔ. Mamɩzɩ miiri tɩlaaɖɩ, alowɛɛsɩ tɩlaaɖɩ nɛ kanɛɛlɩ tɩlaaɖɩ man-kaɖʋ yɔɔ.» (Aduwa 7:16, 17) Ɛkpaɣ pɩsatʋ pɩsaŋ weyi pata-ɩ tɔlɩm nɛ ɩlɩnɩ Ejipiti yɔ nɛ tɩlaaɖɩnaa kɩbama ɛzɩ miiri tɩlaaɖɩ, alowɛɛsɩ tɩlaaɖɩ nɛ kanɛɛlɩ tɩlaaɖɩ nɛ ɛñɔɔzɩnɩ ɛ-kaɖʋ yɔɔ.
Ewobi pɩ-yɔɔ se: «Kɔɔ nɛ ɖɩñɔɔ sɔɔlɩm nɛ tɛʋ kɔɔ nɛ kife; kɔɔ nɛ ɖɩnɩɩ sɔɔlɩm leleŋ siŋŋ.» Ɛɛyaɣ-ɩ kɩyaʋ yem se ɛkɔɔ nɛ ɛ nɛ ɩ pɛkpɛndɩ nɛ pɔtɔɔ ɖanaɣ tɔɔnaɣ. Ɛlabɩ-ɩ tamaɣ se pakaɣ caɣʋ kʋzʋʋ wezuu. Evebu ɛnʋ ɛ-hɔɔlʋʋ taa lɛ, pɩkɛ tɔm kɩbandʋ ndʋ tisidi ɛ-ñʋʋ taa siŋŋ yɔ! Pɩsa nɛ ɛtɛzɩ-ɩ peɣzuu camɩyɛ lɛ ɛsɔzaa se: «Mbʋ pʋyɔɔ yɔ ma-walʋ fɛyɩ ɖɩɣa; ɛɖɛ nʋmɔʋ ɖooo poliŋ. Ɛɖɛɣaɣ lɛ, ɛkpɛndɩnɩ liidiye huyuu, fenaɣ kaɣ siɣu pʋcɔ nɛ ɛpɩsɩ.» (Aduwa 7:18-20) Eheyiɣ-i se nabʋyʋ ɛɛkaɣ-wɛ talʋʋ, mbʋ pʋyɔɔ yɔ ɛ-walʋ ɖɛ nʋmɔʋ ɖooo poliŋ se ɛla tadɩyɛ nɛ ɛɛpɩsɩɣ lɔŋ. Ɛkpaɣnɩ lɛɣtʋ kpem nɛ epeɣzi evebu ɛnʋ! «Halʋ heyi-i tɔm ndʋ tipeɣziɣ yɔ nɛ elesini-i. Epeɣzi-i nɛ tɔm leleŋ ñɩndʋ.» (Aduwa 7:21) Pʋcɔ nɛ evebu ɛnʋ ɛpɩzɩ nɛ ekizi halʋ ɛnʋ ɛ-yatʋ lɛ, pɩɩpɔzaa se ɛwɛɛ ɛzɩ Yosɛɛfʋ yɔ. (Kiɖe Tɛɛ Tɔm 39:9, 12) Evebu ɛnʋ ɛkaɣ pɩzʋʋ nɛ ekizi yatʋ ndʋ?
w00 15/11 31 § 2
«Ðɔkɩ man-paɣtʋ nɛ ŋwɛɛ wezuu»
Evebu ɛnʋ ɛtɩpɩzɩ nɛ ekizi halʋ ɛnʋ ɛ-yatʋ. Ɛsɔ wɛtʋ kɩbandʋ yɔɔ, nɛ ɛpaɣzɩ halʋ wayɩ tɩŋʋʋ «ɛzɩ nɔ abalɩñɩnʋ weyi powokini-i kʋʋ yɔ.» Ɛzɩ abalʋ weyi paɖɩ kpasɩ nɛ ɛɛpɩzɩɣ nɛ ese se pataahɔ ɛ-nɩŋgbaaŋ yɔ, mbʋ ɖɔɖɔ evebu ɛnʋ ɛsʋzɩ ɛ-tɩ kɩwɛɛkɩm taa. Ɛtaatasɩɣ naʋ kaɖɛ nɖɩ ɖɩ-taa ɛwɛɛ nɛ ɛsʋzʋʋ ɛ-tɩ yɔ, pɩkɔɔ nɛ pɩtalɩ «alɩwaatʋ ndʋ tɔʋ ñɩmɩyɛ naɖɩyɛ tʋlɩ pɔʋ ɛ-hɔyɛ yɔ,» pʋ-tɔbʋʋ se pɩkɔɔ nɛ pɩtalɩ alɩwaatʋ ndʋ ɛmʋ heŋ weyi ɛpɩzɩɣ nɛ ɛkɔnɩ-ɩ sɩm yɔ. Pɩpɩzɩɣ nɛ pɩkɛ tomnaɣ yɔɔ sɩm mbʋ pʋyɔɔ yɔ ɛ-lakasɩ nzɩ sɩpɩzɩɣ siyele nɛ kʋzʋʋ kʋdɔmɩŋ kpa-ɩ nɛ pɩkɔnɩ-ɩ sɩm. Heŋ ɛnɩ ɛpɩzɩɣ ɖɔɖɔ eyele nɛ ɛsɩ fezuu taa; «elesi e-wezuu.» Pitukuuni e-wezuu kpeekpe, nɛ ɛlabɩ kɩwɛɛkɩm sɔsɔm nɛ ɛyʋsɩnɩ Ɛsɔ siŋŋ. Ekpedisiɣ se ɛsʋʋ sɩm nesi tɛɛ ɛzɩ sumaɣ ŋga keseɣ lɛɛ lɛɛ se kaɖʋ kpaca taa yɔ.
Fezuu taa ñɩm
w00 15/11 29 § 1
«Ðɔkɩ man-paɣtʋ nɛ ŋwɛɛ wezuu»
Salomɔɔ wobi pɩ-yɔɔ se: «Hɔkɩ [man-paɣtʋ] ñe-niwee yɔɔ kpɛɛɛ; ma-tʋ ña-laŋɩyɛ taa.» (Aduwa 7:3) Ðɛ-ɛsa cɔŋnɩ ɖe-niwee paa ɛzɩmataa nɛ ɖe-niwee sɩɣnɩ-ɖʋ se ɖɩla tʋmɩyɛ nɛ ɖɩtalɩ kaɖʋsɩ nzɩ ɖɩwɛna yɔ, mbʋ ɖɔɖɔ pɩwɛɛ se lɔŋ weyi ɖɩkpɛlɩkɩ Bibl taa nɛ sɩmtʋ ndʋ Bibl kpɛlɩkʋʋ yeba nɛ ɖɩwɛɛna yɔ, pɩwɛɛ ɖɛ-ɛsɩndaa nɛ pɩtɔzʋʋ-ɖʋ nɛ piɖiyiɣ-ɖʋ mbʋ payɩ ɖɩlakɩ yɔ pɩ-taa. Pɩwɛɛ se ɖɩma lɔŋ ɛnɩ nɛ sɩmtʋ ndʋ ɖa-laŋɩyɛ taa nɛ ɖiyele nɛ piɖiyi ɖe-wezuu caɣʋ hɔɔlɩŋ kpeekpe.
7-13 AVRIL
ÑƖM MBƲ PƖWƐ ƐSƆTƆM TAA YƆ ADUWA 8
Welisi Yesu lɔŋsɩnɖɛ
cf 130-131 § 7
«Mɔnsɔɔlɩ Caa»
7 Lɔŋsɩnɖɛ yɔɔdɩ Aduwa 8:22 taa se: «Yehowa ma-m nɛ mɛnkɛ ɛ-nʋmɔʋ ɖɩbazɩyɛ, mbʋ ɛlabɩ ɖooo lɔŋ yɔ pɩ-taa kajalaɣ ñɩmbʋ.» Pɩtɩkɛ lɔŋsɩnɖɛ maɣmaɣ tɔm pɔyɔɔdʋʋ cɩnɛ, mbʋ pʋyɔɔ yɔ patɩlɩzɩ lɔŋsɩnɖɛ kɩlɩzʋ. Wɛtʋ kɩbandʋ ndʋ tɩfɛyɩnɩ ɖɩbazɩyɛ, mbʋ pʋyɔɔ yɔ Yehowa wɛ paa ɛzɩmtaa nɛ ɛkɛ lɔŋsɩnɖʋ tam. (Keɣa 90:2) Ɛlɛ Ɛsɔ Pɩyalʋ ñɛkɛ «wondu kɩlɩzɩtʋ tɩŋa taa kajalaɣ pɩɣa.» Pama-ɩ yaa palɩzɩ-ɩ kɩlɩzʋ; ɛnʋ kɛnɩ Yehowa wondu kɩlɩzɩtʋ kpeekpe taa kajalaɣ tʋ. (Koloosi mba 1:15) Ɛzɩ pɔyɔɔdʋʋ Aduwa takayaɣ taa yɔ, Yehowa lɩzɩ ɛ-Pɩyalʋ pʋcɔ nɛ ɛlɩzɩɣ tɛtʋ nɛ ɛsɔdaa. Nɛ ɛnʋ kɛnɩ Tɔm, pʋ-tɔbʋʋ se Ɛsɔ tɔm ɖɔkɩyʋ, pʋyɔɔ lɛ ɛsɩŋnɩ Yehowa lɔŋsɩnɖɛ.—Yohanɛɛsɩ 1:1.
cf 131-132 § 8-9
«Mɔnsɔɔlɩ Caa»
8 Pʋcɔ nɛ Pɩyalʋ kɔŋ tɛtʋ yɔɔ lɛ, ɛbɛ ɛlakaɣ alɩwaatʋ sakɩyɛ ndʋ ɛɛwɛ ɛsɔdaa yɔ? Aduwa 8:30 heyiɣ-ɖʋ se ɛɛwɛ Ɛsɔ cɔlɔ nɛ ɛɛkɛ «tʋmlaɖʋ weyi ɛwɛ niye yɔ.» Pʋ-tɔbʋʋ le suwe? Koloosi mba 1:16 lɩzɩ pɩ-taa se: «Mbʋ pʋyɔɔ yɔ ɛ-yɔɔ pɩtɩŋnaa nɛ palɩzɩ wondu lɛɛtʋ tɩŋa ɛsɔdaa nɛ tɛtʋ yɔɔ . . . Ɛ-yɔɔ pɩtɩŋnaa nɛ palɩzɩ wondu lɛɛtʋ tɩŋa payɩ nɛ ɛnʋ palɩzɩ-tʋ.» Ye mbʋ, Yehowa weyi ɛkɛ Lɩzɩyʋ yɔ, ɛtɩŋnɩ ɛ-Pɩyalʋ yaa Tʋmlaɖʋ weyi ɛwɛ niye yɔ ɛ-yɔɔ nɛ ɛlɩzɩ wondu kɩlɩzɩtʋ lɛɛtʋ tɩŋa: Ɛlɩzɩ Ɛsɔ tiyiyaa ɛsɔdaa nɛ ɛlɩzɩ ɖɔɖɔ kedeŋa, tɛtʋ nɛ mbʋ payɩ pɩwɛ tɩ-yɔɔ yɔ, pʋ-tɔbʋʋ se ñɩtʋ, tɩŋ nɛ kpɩna; nɛ mbʋ pɩwɛ ŋgee tɛtʋ yɔɔ nɛ pɩkɩlɩ yɔ mbʋ lɛ ɛyaa. Hɔɔlɩŋ nɩɩyɩ taa lɛ, ɖɩpɩzɩɣ ɖɩkpaɣ nɔɔ kʋɖʋmaɣ ŋga kɛwɛ Caa nɛ Pɩyalʋ pɛ-hɛkʋ taa yɔ nɛ ɖɩmaɣzɩnɩ nɔɔ kʋɖʋmaɣ ŋga kɛwɛ ñʋʋdʋ weyi ɛlakɩ ɖʋtʋ yɔ nɛ ɛ-tʋmlaɖʋ weyi ɛtɩŋɩɣnɩ ɖʋtʋ ndʋ tɩ-yɔɔ nɛ ɛlakɩ ɛ-tʋmɩyɛ yɔ. Alɩwaatʋ ndʋ ɖɩnaɣ wondu kɩlɩzɩtʋ nɛ pɩlakɩ-ɖʋ piti yɔ, Yehowa weyi ɛkɛ ɖʋtʋ laɖʋ yɔ, ɛnʋ pɩwɛɛ se ɖɩcɛlɩ samtʋ. (Keɣa 19:1) Ɛlɛ, pɩwɛɛ ɖɔɖɔ se ɖɩtɔzɩ pɩnzɩ sakɩyɛ nzɩ sɩ-taa Lɩzɩyʋ nɛ ‘ɛ-tʋmlaɖʋ weyi ɛwɛ niye yɔ’ pɛkpɛndaa nɛ pala tʋmɩyɛ nɔɔ kʋɖʋmaɣ taa yɔ sɩ-yɔɔ.
9 Alɩwaatʋ ndʋ ɛyaa mantɩtalɩ pilimwaa naalɛ kpɛndɩɣ nɛ pakalɩ tʋmɩyɛ nɛ pileɖiɣ yɔ, nabʋyʋ taa ɖama kɩɩnɩnʋʋ kɔŋ pɛ-hɛkʋ taa. Ɛlɛ pɩtɩla mbʋ Yehowa nɛ ɛ-Pɩyalʋ pɛ-hɛkʋ taa! Pɩyalʋ nɛ Caa palabɩ tʋmɩyɛ pɩnzɩ sakɩyɛ nzɩ sɩfɛyɩ kalʋʋ yɔ sɩ-taa, paa mbʋ yɔ Pɩyalʋ yɔɔdaa se: «Manɩɣaɣ leleŋ ɛ-ɛsɩndaa alɩwaatʋ tɩŋa.» (Aduwa 8:30) Toovenim taa lɛ, alɩwaatʋ ndʋ ɛ nɛ ɛ-Caa pɛwɛɛ yɔ tɩhaɣaɣ-ɩ taa leleŋ nɛ ɛ-Caa ɖɔɖɔ mbʋ. Ɛkpɛlɩkɩ ɛ-Caa wɛtʋ nɛ pazɩ pazɩ lɛ ɛwɛɛ nɛ ɛnɩɣzɩɣnɩ-ɩ nɛ pɩkɩlɩɣ. Pʋyɔɔ lɛ, pɩɩɖɩɣzɩɣ-ɖʋ se taabalɩyɛ nɖɩ ɖɩwɛ Caa nɛ Pɩyalʋ pɛ-hɛkʋ taa yɔ, ɖɩkɔm nɛ ɖɩcɛyɩsɩ siŋŋ! Ye mbʋ, pɩmʋnaa se pɔyɔɔdɩ se taabalɩyɛ nɖɩ ɖɩwɛ pɛ-hɛkʋ taa yɔ ɖɩkɛ sɔɔlɩm tomiye nɖɩ ɖɩcɛyɩsaa nɛ ɖɩpɩnaa nɛ pɩkɩlɩ yɔ kedeŋa kpeekpe yɔɔ.
w09 15/4 31 § 14
Ðitisi Yesu yɔɔ se ɛkɛ Daviid Sɔsɔ nɛ Salomɔɔ sɔsɔ
14 Ɛyʋ kʋɖʋm ɖeke lɔŋsɩnɖɛ kaakpaɖɩnɩ Salomɔɔ lɔŋsɩnɖɛ. Ɛnʋ lɛ Yesu Krɩstʋ; ɛyɔɔdɩ ɛ-maɣmaɣ ɛ-tɔm se «ɛkɩlɩ Salomɔɔ.» (Mat. 12:42) Yesu yɔɔdʋʋ «tɔm ndʋ tɩhaɣ wezuu maatɛŋ yɔ.» (Yohanɛɛsɩ 6:68) Yesu labɩnɩ tʋmɩyɛ paɣtʋ kila wena awɛ Salomɔɔ aduwa taa yɔ Pʋʋ yɔɔ tɔm yɔɔdʋʋ taa. Salomɔɔ yɔɔdɩ wondu ndɩ ndɩ ndʋ tɩhaɣ Yehowa sɛyaa koboyaɣ yɔ tɩ-tɔm. (Adu. 3:13; 8:32, 33; 14:21; 16:20) Yesu wɩlaa se koboyaɣ siŋŋ lɩɣna Yehowa sɛtʋ nɛ tamasɩ nzɩ ɛlaba nɛ sɩlakɩ yɔ pɩ-cɔlɔ. Ɛyɔɔdaa se: «Koboyaɣ tɩnaa kɛlɛ mba panawa se pɩpɔzʋʋ-wɛ fezuu taa wondu yɔ, mbʋ pʋyɔɔ yɔ mba tɩnɩ ɛsɔdaa Kewiyaɣ.» (Mat. 5:3) Mba palakɩnɩ tʋmɩyɛ paɣtʋ kila wena awɛ Yesu wɩlɩtʋ taa yɔ, pɔñɔtʋʋnɩ Yehowa weyi ɛ-cɔlɔ «wezuu hiɖe wɛɛ» yɔ. (Keɣ. 36:9; Adu. 22:11; Mat. 5:8) Krɩstʋ lɩzɩ «Ɛsɔ lɔŋsɩnɖɛ» nɛ ɛwɩlɩ. (1 Kɔr. 1:24, 30) Yesu Krɩstʋ kɛnɩ Mesiya Kewiyaɣ Wiyaʋ, nɛ ɛwɛnɩ ‘lɔŋsɩnɖɛ fezuu.’—Iza. 11:2.
Fezuu taa ñɩm
g 5/14 16
‘Lɔŋsɩnɖɛ wɛɛ nɛ ɖɩyaɣ’—Ŋkaɣ-ɖɩ welisinuu na?
▪ Takayaɣ ŋga payaɣ se The World Book Encyclopedia yɔ kɔyɔɔdʋʋ se Bibl kɛnɩ «takayaɣ ŋga pakɩlɩ tayʋʋ ɛyaa wezuu caɣʋ taa yɔ. Bibl pakɩlɩ ɖɛzʋʋ tam sakɩyɛ nɛ kʋnʋmɩŋ sakɩyɛ taa nɛ pɩkɩlɩ takayɩsɩ lɛɛsɩ.» Sɔnɔ Bibl tɩŋa yaa kɩ-hɔɔlɩŋ nɩɩyɩ wɛ kʋnʋmɩŋ ɛzɩ 2600 taa mbʋ yɔ, nɛ ye pakpaɣ ɛyaa 100 yɔ ɛyaa mba pɛcɛzɩ 90 yɔ pɛwɛnɩ-kʋ.
▪ Lɔŋsɩnɖɛ ‘wɛɛ nɛ ɖɩyaɣ’ hɔɔlʋʋ lɛɛkʋ taa ɖɔɖɔ. Ðɩkalɩɣ Maatiyee 24:14 taa se: «Nɛ pakaɣ susuu Kewiyaɣ tɔm kɩbandʋ tʋnɛ tɛtʋ kpeekpe yɔɔ se pɩkɛnɩ ajɛɛ kpeekpe aseɣɖe, nɛ ɖɩnɛ ɛlɛ ɛjaɖɛ tɛm kaɣ kɔm.»
14-20 AVRIL
ÑƖM MBƲ PƖWƐ ƐSƆTƆM TAA YƆ ADUWA 9
Kɛ lɔŋsɩnɖʋ, taakɛ ɛyaa woŋiyu
‘Welisi lɔŋsɩnɖaa tɔm’
4 Toovenim taa lɛ, pɩpɩzɩɣ nɛ pɩwɛɛ-ɖʋ kaɖɛ siŋŋ se ɖitisi nɛ ɖɩmʋ lɔŋ tasʋʋ mbʋ pɩlɩnɩ ɛyʋ nɔɔyʋ cɔlɔ kpayɩ yɔ. Halɩ ɖɩpɩzɩɣ nɛ ɖɩkɔ pana. Ɛbɛ yɔɔ? Paa ɖitisiɣ faaa se ɖɩtɩtalɩ pilim yɔ, alɩwaatʋ ndʋ ɛyʋ nɔɔyʋ heyiɣ-ɖʋ se pɩpɔzʋʋ se ɖɩlɛɣzɩ ɖɛ-ɛjandʋ natʋyʋ yɔ, pɩpɩzɩɣ nɛ pɩwɛɛ-ɖʋ kaɖɛ se ɖitisi nɛ ɖɩmʋ ɛ-lɔŋ tasʋʋ. (Kalɩ Eklezɩyasɩtɩ 7:9.) Ðɩpɩzɩɣ nɛ ɖɩñɩnɩ kawanaɣ nakɛyɛ se ɖɩlʋ ɖa-tɩ yɔɔ. Ðɩpɩzɩɣ nɛ ɖɩpɩtɩ mbʋ piseɣti ɛyʋ ɛnʋ nɛ ɛtasɩ-ɖʋ lɔŋ yɔ pɩ-yɔɔ; yaa ɛzɩma ɛkpaɣnaa nɛ ɛtasɩ-ɖʋ lɔŋ yɔ pɩpɩzɩɣ nɛ pɩcɛyɩ-ɖʋ. Halɩ ɖɩpɩzɩɣ nɛ ɖɩka ɖa-lɩmaɣza weyi ɛtasɩ-ɖʋ lɔŋ yɔ ɛ-ɛjandʋ natʋyʋ yɔɔ nɛ ɖɩyɔɔdɩ se: «Ɛnʋ anɩ nɛ ɛtasɩɣ-m lɔŋ? Ɛnʋ ɖɔɖɔ ɛwɛnɩ ɛjandʋ!» Nɛ ye lɔŋ weyi ɛyʋ ɛnʋ ɛtasɩ-ɖʋ yɔ ɛtɩkɛdɩnɩ-ɖʋ yɔ, pɩtɩla ɖiitisiɣ se ɖɩmʋ-ɩ, yaa pɩtɩla ɖɩpɔzʋʋ ɛyʋ lɛlʋ se ɛtasɩ-ɖʋ lɔŋ mbʋ pʋyɔɔ yɔ, ɖɩtaɣ liu se ɛlɛ kaɣ-ɖʋ heyuu tɔm ndʋ ɖɩsɔɔlaa se ɖɩnɩɩ yɔ.
‘Welisi lɔŋsɩnɖaa tɔm’
12 Ɛbɛ pɩzɩɣ pɩsɩnɩ-ɖʋ nɛ ɖitisi nɛ ɖɩmʋ lɔŋ tasʋʋ? Pɩpɔzʋʋ se ɖiluzi ɖa-tɩ nɛ ɖɩtɔzɩ se ɖɩtɩtalɩ pilim nɛ nabʋyʋ taa ɖɩpɩzɩɣ nɛ ɖɩla kɩmɛlɛndʋ siŋŋ. Ɛzɩ ɖɩnaʋ nɛ pɩɖɛɛ yɔ, nabʋyʋ taa Yɔɔb kaawɛnɩ lɩmaɣza wena atɩtʋʋzɩ yɔ. Ɛlɛ pʋwayɩ ɛñɔɔzɩ ɛ-lɩmaɣza, nɛ Yehowa wazɩ-ɩ pʋyɔɔ. Ɛbɛ yɔɔ? Mbʋ pʋyɔɔ yɔ, Yɔɔb luzi ɛ-tɩ. Etisaa nɛ ɛmʋ lɔŋ weyi Eliihu tasɩ-ɩ yɔ paa ɛɛkɩlɩ ɛlɛ nɛ pɩnzɩ sakɩyɛ yɔ, nɛ pɩ-yɔɔ ɛtɩŋnaa nɛ ɛwɩlɩ se ɛwɛnɩ tɩ luzuu. (Yɔɔb 32:6, 7) Mbʋ ɖɔɖɔ tɩ luzuu kaɣ-ɖʋ sɩnʋʋ nɛ ɖɩɖɔ lɔŋ weyi patasɩɣ-ɖʋ yɔ ɩ-yɔɔ, halɩ paa pɩlakɩ-ɖʋ ɛzɩ pɩtɩmʋna se patasɩ-ɖʋ lɔŋ ɛnɩ yaa paa ɖɩkɩlɩ weyi ɛtasɩɣ-ɖʋ lɔŋ yɔ. Kanadaa ɛjaɖɛ taa ɛgbɛyɛ taa ɛzʋtʋyʋ nɔɔyʋ yɔɔdaa se: «Ɛzɩma ɖɩnaɣ ɖa-tɩ yɔ, pɩtɩkɛ mbʋ ɛyaa lalaa naɣ-ɖʋ. Ye mbʋ, ɛzɩma ɖɩpɩzɩɣ nɛ ɖɩɖɛɛnɩ ɛsɩndaa ye nɔɔyʋ ɛɛtasɩɣ-ɖʋ lɔŋ yɔ?» Pɩwɛɛ se ɖa-tɩŋa payɩ ɖɩñaɣ pana nɛ ɖɩlʋlʋʋ fezuu piye nɛ pɩkɩlɩɣ nɛ ɖɩpɩsɩ tɔm kɩbandʋ susuyaa nɛ tɩ-wɩlɩyaa kɩbama nɛ pɩkɩlɩ.—Kalɩ Keɣa 141:5.
13 Kpaɣ lɔŋ tasʋʋ se pɩkɛnɩ nʋmɔŋ weyi ɩ-yɔɔ Ɛsɔ tɩŋɩɣna nɛ ɛwɩlɩɣ-ŋ sɔɔlɩm yɔ ɩ-taa nakʋyʋ. Yehowa sɔɔlaa se piɖeni-ɖʋ. (Adu. 4:20-22) Alɩwaatʋ ndʋ ɛtɩŋɩɣnɩ ɛ-Tɔm, ɛgbɛyɛ takayaɣ nakɛyɛ, yaa koobu Krɩstʋ tʋ weyi ɛpɩ fezuu taa yɔ ɛ-yɔɔ nɛ ɛtasɩ-ɖʋ lɔŋ yɔ, ɛwɩlɩɣ se ɛsɔɔlɩ-ɖʋ. Ebree mba 12:9, 10 yɔɔdʋʋ se: «Ɛlakɩ mbʋ se pɩwazɩ-ɖʋ.»
14 Ka ña-lɩmaɣza lɔŋ weyi patasɩɣ-ŋ yɔ ɩ-yɔɔ, pɩtaakɛ ɛzɩma pakpaɣnaa nɛ patasɩɣ-ŋ lɔŋ yɔ pɩ-yɔɔ. Nabʋyʋ taa, pɩtɩla pɩlakɩ-ɖʋ ɛzɩ ɛzɩma pakpaɣnaa nɛ patɩsɩ-ɖʋ lɔŋ nɩɩyɩ yɔ pɩtɩmʋna. Pɩkɛ toovenim se ye nɔɔyʋ ɛñɩnɩɣ se ɛtasɩ ɛyʋ lɛlʋ lɔŋ yɔ, pɩpɔzʋʋ se ɛñaɣ pana nɛ eyele nɛ pɩwɛɛ ɛlɛ kɛlɛʋ se ɛmʋ lɔŋ tasʋʋ mbʋ. (Gal. 6:1) Ɛlɛ, ye ɖa patasɩɣ lɔŋ yɔ, pɩwɛɣ ɖeu se ɖɩka ɖa-lɩmaɣza lɔŋ weyi ɩwɛ lɔŋ tasʋʋ mbʋ pɩ-taa yɔ ɩ-yɔɔ, paa ɖɩmaɣzɩɣ se pɩɩwɛɛ se weyi ɛtasɩ-ɖʋ lɔŋ yɔ ɛtɩŋnɩ nʋmɔʋ ŋgʋ kɩkpaɖɩ ɖeu yɔ kɩ-yɔɔ nɛ ɛla mbʋ yɔ. Ðɩpɩzɩɣ nɛ ɖɩpɔzɩ ɖa-tɩ se: «Paa ɛzɩma pakpaɣnaa nɛ patasɩ-m lɔŋ yɔ pɩtɩkɛdɩnɩ-m yɔ, ɛzɩ manpɩzɩɣ nɛ mɛnkpɛlɩkɩ lɔŋ nɩɩyɩ lɔŋ tasʋʋ mbʋ pɩ-taa? Ɛzɩ manpɩzɩɣ nɛ mohuuzi mɛ-ɛsa weyi ɛtasɩ-m lɔŋ yɔ ɛ-ɛjandʋ yɔɔ, nɛ lɔŋ tasʋʋ mbʋ pɩwazɩ-m?» Lɔŋ weyi payɩ patasɩɣ-ɖʋ yɔ, pɩkɛɣnɩ lɔŋsɩnɖɛ se ɖɩtɩŋnɩ nʋmɔʋ nakʋyʋ yɔɔ nɛ ɖiyele nɛ ɩwazɩ-ɖʋ.—Adu. 15:31.
w01 15/5 30 § 1-2
“Lɔŋsɩnɖɛ kaɣ yebu nɛ ɖe-wezuu caɣʋ kɩyakɩŋ ɖɔɔ”
Alɩwaatʋ ndʋ pakalɩɣ lɔŋsɩnɖʋ yɔ ɛzɩma ɛlakɩ yɔ pɩwɛ ndɩ nɛ ɛzɩma ɛyaa woŋiyu lakɩ yɔ. Salomɔɔ yɔɔdaa se «Kalɩ lɔŋsɩnɖʋ, nɛ ɛkaɣ-ŋ sɔɔlʋʋ. Wɩlɩ tɔm lɔŋsɩnɖʋ, nɛ ɛkaɣ wɛʋ lɔŋ nɛ pɩkɩlɩ.» (Aduwa 9:8b, 9a) Lɔŋsɩnɖʋ nawa se «nɩŋgbaŋʋʋ hɔm nabʋyʋ fɛyɩ se pɩkɛ taa leleŋ pʋyʋ lɛɛlɛɛyɔ, ɛlɛ pɩkɛ wɩzasɩ; paa mbʋ yɔ, pʋwayɩ lɛ, mba pɩfalɩsɩ-wɛ yɔ pɩlʋlʋʋ-wɛ siɣsiɣ wɛtʋ laŋhɛzɩyɛ piye.» (Ebree mba 12:11) Toovenim se lɔŋ tasʋʋ pɩzɩɣ nɛ piyele nɛ ɖɩnɩɩ siziŋ; ɛlɛ ɛzɩ pɩwɛɣ ɖeu se ɖikizi pɩ-mʋʋ yaa ɖɩkaɖɩnɩ-pʋ, ŋgʋ ɖɩnawa se ye ɖɩmʋ-pʋ yɔ piyeki nɛ ɖɩkɛ lɔŋsɩnɖaa nɛ pɩkpaɖɩ?
Salomɔɔ wobi pɩ-yɔɔ se: «Wɩlɩ tɔm ɛyʋ siɣsiɣ tʋ, nɛ ɛkaɣ sɔzʋʋ ɛ-sɩmtʋ yɔɔ.» (Aduwa 9:9b) Nɔɔyʋ ɛɛpɩzɩɣ nɛ ɛtɔ se ɛkɩlɩ wɛnʋʋ lɔŋsɩnɖɛ yaa se ɛkɩlɩ kpadɩyʋʋ nɛ pʋyɔɔ lɛ ɛɛpɩzɩɣ nɛ ewolo pɩ-yɔɔ nɛ ɛtasɩ kpɛlɩkʋʋ. Alɩwaatʋ ndʋ ɖɩnaɣ akpadɩyaa kpɛlɩkɩɣ toovenim nɛ pahaɣ pa-tɩ Yehowa yɔ, pɩkɛdɩɣnɩ-ɖʋ siŋŋ! Iyele nɛ ɖa ɖɔɖɔ ɖɩñaɣ pana nɛ ɖɩsɔɔlɩ kpɛlɩkʋʋ nɛ pɩsa nɛ ɖa-maɣzɩm wolo pɩ-yɔɔ nɛ pɩlakɩ tʋmɩyɛ camɩyɛ.
w01 15/5 30 § 5
“Lɔŋsɩnɖɛ kaɣ yebu nɛ ɖe-wezuu caɣʋ kɩyakɩŋ ɖɔɔ”
Ða-maɣmaɣ ɖa-sʋʋtʋ pɩkɛnaa se ɖɩñaɣ pana nɛ ɖɩwɛɛnɩ lɔŋsɩnɖɛ. Salomɔɔ ñɩɣ niye tɔm ndʋ tɩ-yɔɔ alɩwaatʋ ndʋ ɛyɔɔdaa se: «Ye ŋpɩsɩ lɔŋsɩnɖʋ yɔ, ña-maɣmaɣ pɩkaɣ wazʋʋ, ɛlɛ ye ŋwoŋuu ɛyaa yɔ, ñe-ɖeke ŋkaɣnɩ sɩɣlʋʋ pɩ-kɛzɛɣa.» (Aduwa 9:12) Lɔŋsɩnɖʋ lɔŋsɩnɖɛ wazɩɣ ɛ-maɣmaɣ, weyi ewoŋuu ɛyaa yɔ ɛ-maɣmaɣ ɛ-cɔlɔ ɛ-kʋñɔmɩŋ lɩɣna. Toovenim taa lɛ, ɖɩkʋŋ mbʋ ɖiɖuu yɔ. Ye mbʋ, tɛtɛ nɛ “ɖɩkʋ nɩŋgbaŋʋʋ nɛ lɔŋsɩnɖɛ.”—Aduwa 2:2.
Fezuu taa ñɩm
w06 15/9 17 § 5
Aduwa takayaɣ taa lɩmaɣza sɔsɔna
Adu 9:17—Ɛbɛ payaɣ mayaɣ kanɛ ka-taa se «lɩm mbʋ ɛyʋ mɩlɩɣ yɔ» nɛ ɛbɛ yɔɔ «pɩwɛ leleŋ»? Bibl kpakɩɣ leleŋ weyi mba pɔɖɔkɩ nesi yɔ panɩɣ kʋzʋʋ taa yɔ nɛ kɩmaɣzɩnɩ lɩm mbʋ polu hiɖe taa nɛ pɩhɛzɩɣ laŋɩyɛ yɔ; pʋyɔɔ lɛ, lɩm mbʋ pamɩlaa yɔ pɩsɩŋnɩ kʋzʋʋ kɩdɛkɛdʋʋ wezuu ŋgʋ ɛyʋ cakɩ mɛsaɣ tɛɛ yɔ. (Aduwa 5:15-17) Ɛzɩma ɛyʋ lakɩ mbʋ nɛ paanaɣ-ɩ yɔ piyeki nɛ lɩm mbʋ pɩwɛɛ ɛzɩ pɩwɛ leleŋ yɔ.
21-27 AVRIL
ÑƖM MBƲ PƖWƐ ƐSƆTƆM TAA YƆ ADUWA 10
Ɛbɛ yeki se ɖihiɣ koboyaɣ siŋŋ?
w01 15/7 25 § 1-3
«Wazasɩ wɛ ɛyʋ siɣsiɣ tʋ ñʋʋ taa»
Ɛyʋ siɣsiɣ tʋ hikiɣ wazasɩ hɔɔlʋʋ lɛɛkʋ taa ɖɔɖɔ. «Nesi nzɩ sɩwɛ feendu yɔ, sɩkaɣ kɔnʋʋ kʋñɔndʋtʋ; ɛlɛ nesi nzɩ sɩlakɩ tʋmɩyɛ nɛ kpekpeka yɔ sɩkɔŋnɩ ñɩm. Pɩɣa ŋga kalakɩnɩ lɛɣtʋ tʋmɩyɛ yɔ kakʋŋ tɔɔnaɣ, tɔɔnaɣ kʋmtʋ alɩwaatʋ taa, ɛlɛ pɩɣa ŋga kalakɩ fɛyɛ lakasɩ yɔ, koɖou siŋŋ kʋmtʋ alɩwaatʋ taa.»—Aduwa 10:4, 5.
Tɔm ndʋ Wiyaʋ Salomɔɔ yɔɔdaa yɔ titukuuni kɔzɩ kɔzɩ tʋmlaɖaa kʋmtʋ alɩwaatʋ taa. Kʋmtʋ alɩwaatʋ tɩkɛ ɖom alɩwaatʋ. Pɩkɛ alɩwaatʋ ndʋ tɩ-taa pɩpɔzʋʋ se ɛyʋ ɛla tʋmɩyɛ nɛ kpekpeka ñɩɣtʋ sakɩyɛ yɔ. Toovenim taa lɛ pɩkɛ alɩwaatʋ ndʋ tɩ-taa pɩpɔzʋʋ se pala tʋmɩyɛ kpɛdɛyɛ yɔ.
Yesu heyi ɛ-tɔmkpɛlɩkɩyaa tɔm natʋyʋ alɩwaatʋ ndʋ ɛyɔɔdaɣ kʋmtʋ natʋyʋ tɔm yɔ. Pɩtɩkɛ tɔɔnaɣ maɣmaɣ kʋmtʋ tɔm ɛyɔɔdaɣ, ɛlɛ ɛyaa kʋmtʋ tɔm. Eheyi-wɛ se: «Kʋmtʋ ɖɔwa, ɛlɛ tʋmlaɖaa wɛ ññɩɩ. Pʋyɔɔ lɛ, itendi hayɩm Tʋ se etiyini tʋmlaɖaa ɛ-hayɩm taa.» (Maatiyee 9:35-38) Pɩnaɣ 2000 taa, ɛyaa mba powobi Yesu sɩm yɔɔ tɔzʋʋ sɔnzɩ taa yɔ pɛcɛzɩ miiliyɔɔwaa 14, pʋ-tɔbʋʋ se patalɩ Yehowa Aseɣɖe Tɩnaa ñʋʋ tam nabʋlɛ nɛ pɩcɛzɩ. Ye mbʋ, apɩzɩɣ nɛ ɛkpɛzɩ se ‘hayɩm taa tɔɔnaɣ pɩwa’? (Yohanɛɛsɩ 4:35) Toovenim Ɛsɔ sɛyaa pɔzʋʋ hayɩm Tʋ se etiyini tʋmlaɖaa ɛ-hayɩm taa nɛ pɩkɩlɩ nɛ alɩwaatʋ kʋɖʋmtʋ ndʋ tɩ-taa lɛ, pañakɩ pana siŋŋ nɛ palakɩ tɔmkpɛlɩkɩyaa ɛzɩ pɔpɔzʋʋ pa-adɩma taa yɔ. (Maatiyee 28:19, 20) Nɛ Yehowa wazɩɣ pa-pana ñaɣʋ yɔɔ pɩdɩɩfɛyɩ! Teokrasɩ pɩnaɣ 2000 taa, ɛyaa mba pamɩyɩsɩ-wɛ lɩm yɔ pɛcɛzɩ 280000 yɔɔ. Ɛyaa kɩfama mba ɖɔɖɔ pañakɩ pana se pɛkɛ Ɛsɔ tɔm wɩlɩyaa. Tɛtɛ nɛ ɖiwolo pɩ-yɔɔ nɛ ɖɩwɛɛ kpekpeka tɔmkpɛlɩkɩyaa labʋ tʋmɩyɛ taa kʋmtʋ alɩwaatʋ tʋnɛ tɩ-taa nɛ ɖihiɣ taa leleŋ nɛ ɖa-laŋɩyɛ hɛɛ.
w01 15/9 24 § 3-4
Ðɔ «nʋmɔʋ ŋgʋ kɩtʋʋzaa yɔ kɩ-taa»
Salomɔɔ yɔɔdɩ mbʋ pʋyɔɔ pɩcɛyaa se ɛyʋ ɛwɛɛ siɣsiɣ yɔ pɩ-tɔm. Ɛyɔɔdaa se: «Ñɩm tʋ ñɩm kɛnɩ ɛ-tɛtʋ ɖoŋ ñɩndʋ. Kʋñɔndɩnaa asɛyʋʋ lɛ pa-kʋñɔndʋtʋ. Ɛyʋ siɣsiɣ tʋ tʋma haɣ wezuu; ɛlɛ mbʋ kañatʋ tʋ hikiɣ yɔ, piwokini kɩwɛɛkɩm taa.»—Aduwa 10:15, 16.
Ñɩm pɩzɩɣ nɛ pɩkandɩyɩ ɛyʋ yɔɔ wezuu caɣʋ taa kala ndɩ ndɩ taa, ɖɔɖɔ ɛzɩ tɛtʋ ndʋ pɔcɔzɩ-tʋ koloŋa yɔ tɩkandɩyʋʋ mba pɛwɛ tɩ-taa yɔ pɔ-yɔɔ yɔ. Nɛ kʋñɔndʋtʋ pɩzɩɣ nɛ pɩkɔnɩ asɛyʋʋ alɩwaatʋ ndʋ mbʋ ɛyʋ tɩɖʋna yɔ pɩlakɩ yɔ. (Eklezɩyasɩtɩ 7:12) Ɛlɛ, pɩtɩla la yɔ Wiyaʋ Salomɔɔ tɔm ndʋ titukuuni ɖɔɖɔ kaɖɛ nɖɩ ñɩm wɛnʋʋ yaa kʋñɔndʋtʋ pɩzɩɣ nɛ pɩkɔna yɔ. Ñɩm tʋ pɩzɩɣ nɛ ɛtaa liu ɛ-ñɩm, nɛ ɛmaɣzɩɣ se ñɩm wondu ndʋ ɛwɛna yɔ «pɩwɛ ɛzɩ koloŋa ŋga kakandɩyɩɣ ɛ-yɔɔ yɔ.» (Aduwa 18:11) Nɛ pɩpɩzɩɣ nɛ piyiɣdi kʋñɔndʋ nɛ ɛmaɣzɩ se ɛ-kʋñɔndʋtʋ yɔɔ lɛ ɛfɛyɩnɩ lidaʋ nakʋyʋ cee wayɩ yɔɔ. Nɛ pʋyɔɔ lɛ, pa-naalɛ paakaɣ wɛnʋʋ hɩɖɛ kɩbanɖɛ Ɛsɔ ɛsɩndaa.
it-1 294
Wazasɩ
Yehowa wazɩɣ ɛyaa. «Yehowa wazaɣ pɩsɩɣnɩ ɛyʋ ñɩm tʋ, nɛ ɛɛsɔzʋʋ wɩzasɩ nasɩyɩ kɔ-yɔɔ.» (Adu 10:22) Yehowa wazɩɣ mba pɔ-tɔm kɛdɩnɩ-ɩ yɔ: ɛkandɩyɩɣ pɔ-yɔɔ, eyeki nɛ pihukuuni-wɛ, eɖiyiɣ-wɛ, eyeki nɛ piɖeɣni-wɛ mbʋ palakɩ yɔ pɩ-taa, ɛcɔŋnɩ pa-kɩcɛyɩm ɖeɖe nɛ ɛwɩlɩɣ-wɛ mbʋ pɩwɛɛ se pala nɛ piɖeni-wɛ yɔ.
Fezuu taa ñɩm
w06 15/5 30 § 18
Mba pɔɖɔŋ cɩŋgɩlɩm wɛtʋ taa yɔ, pehikiɣ taa leleŋ
18 «Yehowa wazaɣ» yekina nɛ piɖeɣni Yehowa samaɣ fezuu taa. Nɛ ɖa-taa tɛma se «ɛɛsɔzʋʋ wɩzasɩ nasɩyɩ kɔ-yɔɔ.» (Aduwa 10:22) Ye mbʋ, ɛbɛ yɔɔ Yehowa sɛyaa siɣsiɣ tɩnaa sakɩyɛ katɩɣ takɩm nɛ kala nɛ piyeki nɛ palakɩ kʋñɔmɩŋ nɛ panɩɣ siziŋ? Lɩmaɣza 3 anɛ a-yɔɔ ɖɩkatɩɣ kala nɛ ɖɩlakɩ kʋñɔŋ. (1) Ðɩwɛnɩ ɛjandʋ nɛ piyeki se ɖɩla kɩwɛɛkɩm. (Kiɖe Tɛɛ Tɔm 6:5; 8:21; Yakubu 1:14, 15) (2) Sataŋ nɛ ɛ-aleewaa. (Efɛɛzɩ mba 6:11, 12) (3) Ɛjaɖɛ kɩdɛkɛdɩyɛ ɖɩnɛ. (Yohanɛɛsɩ 15:19) Paa Yehowa ɛhaɣ nʋmɔʋ se kʋñɔmɩŋ ɩtalɩ-ɖʋ yɔ, pɩtɩkɛ ɛ-cɔlɔ ɩlɩɣna. Toovenim taa lɛ, «paa kʋjɔʋ kɩbaŋʋ ŋgʋ nɛ paa haɖɛ pilim ñɩnɖɛ nɖɩ lɛ, ɖɩlɩɣnɩ hayo, ɖɩlɩɣnɩ ɛsɔdaa mintʋsʋŋ Caa cɔlɔ nɛ ɖitiki.» (Yakubu 1:17) Yehowa wazasɩ ɛɛsɔzʋʋ wɩzasɩ nasɩyɩ.
28 AVRIL–4 MAI
ÑƖM MBƲ PƖWƐ ƐSƆTƆM TAA YƆ ADUWA 11
Taayɔɔdɩ tɔm ndʋ tɩtɩmʋna yɔ!
w02 15/5 26 § 4
Cɩŋgɩlɩm wɛtʋ ɖiyiɣ ɛyaa mba pɛwɛ siɣsiɣ yɔ
Ɛyʋ siɣsiɣ tʋ cɩŋgɩlɩm wɛtʋ nɛ ɛyʋ kɩdɛkɛdʋ lakasɩ kɩdɛkɛdɩsɩ wɛnɩ ɖoŋ ɖɔɖɔ ɛyaa lalaa yɔ. Izrayɛɛlɩ Wiyaʋ Salomɔɔ yɔɔdaa se: «Weyi ɛɛñaŋ Ɛsɔ yɔ, ɛtɩŋɩɣnɩ ɛ-yɔɔdaɣ yɔɔ nɛ ɛɖʋzʋʋ e-koobu, ɛlɛ sɩmtʋ holuuni ɛyaa siɣsiɣ tɩnaa.» (Aduwa 11:9) Apɩzɩɣ nɛ ɛkpɛzɩ se kɔlɔmɔtʋ labʋ, ɛyaa yɔɔ tɔm kɩdɛkɛdɩtʋ yɔɔdʋʋ, ɛzaɣtʋ tɔm yɔɔdʋʋ, nɛ tɔm ndʋ tɩfɛyɩnɩ wazaɣ nakɛyɛ yɔ tɩ-yɔɔdʋʋ kɔŋnɩ ɛyaa lalaa kaɖɛ? Ɛlɛ ɛyʋ siɣsiɣ tʋ yɔɔdʋʋ tɔm ndʋ yɔ, tɩwɛ kele kele, ndʋ tɩ-yɔɔ ɛmaɣzɩ camɩyɛ yɔ, nɛ ndʋ tɩwɩlɩɣ se ɛmaɣzɩɣ lalaa yɔɔ yɔ. Sɩmtʋ yakɩ ɛ-ñʋʋ mbʋ pʋyɔɔ yɔ ɛ-cɩŋgɩlɩm wɛtʋ yeki nɛ pana se tɔm ndʋ mba pakaɖɩɣnɩ-ɩ yɔ pɔyɔɔdʋʋ ɛ-yɔɔ yɔ tɩkɛ cɛtɩm.
w02 15/5 27 § 2-3
Cɩŋgɩlɩm wɛtʋ ɖiyiɣ ɛyaa mba pɛwɛ siɣsiɣ yɔ
Ye tɛtʋ natʋyʋ ɛwɛɛ nɛ tɩ-taa mba nabɛyɛ lakɩ mbʋ pɩtʋʋzaa yɔ, piyeki nɛ laŋhɛzɩyɛ wɛɛ nɛ piɖeni samaɣ taa mba lalaa nɛ pɩkpazɩ-wɛ ɖoŋ. Piyeki nɛ tɛtʋ hɩɖɛ sɛɛ, pɩtɩŋa pɩɖɔŋ camɩyɛ. Mba palakɩ kɔlɔmɔtʋ, pɔyɔɔdʋʋ tɔm ndʋ tɩɖʋʋ ɖɩwɩzɩyɛ yɔ, nɛ mba pɔyɔɔdʋʋ tɔm kɩdɛkɛdɩtʋ yɔ peyeki nɛ ñam ñam lakasɩ nɛ ñaɖʋʋ pɛwɛɣ, nɛ taa leleŋ nɛ nɔɔ kʋɖʋmaɣ ɩɩwɛɣ. Nɛ pɩlakɩ mbʋ kɔzɩ kɔzɩ ye pɩlaba se ɛyaa mba pɛwɛnɩ wɛtʋ kɩdɛkɛdɩtʋ ndʋ yɔ pɛwɛnɩ lona sɔsɔna samaɣ taa yɔ. Tɛtʋ ndʋ tɩ-taa pisidiɣ yem, mulum lakasɩ wɛɣ, wezuu kɩbaŋʋ caɣʋ leki, nɛ pɩtɩla tɔsʋʋ ɛɛtasɩɣ ɖɔm camɩyɛ.
Paɣtʋ kiɖe nɖɩ ɖɩwɛ Aduwa 11:11 taa yɔ pɩwɛɛ ɖɔɖɔ se ɖiɖiyi Yehowa sɛyaa agbaa taa; papɩzɩɣ nɛ pakpaɣ-yɛ nɛ pamaɣzɩnɩ tɛtʋ. Ye ɛgbɛyɛ naɖɩyɛ taa koobiya ɩpɩ fezuu taa nɛ peyeki nɛ siɣsiɣ wɛtʋ ɖiyiɣ-wɛ yɔ, pʋbʋ lɛ pɛwɛɣnɩ ɖoŋ kɩbaŋ ɛgbɛyɛ yɔɔ nɛ piyeki nɛ ɖɩ-taa mba wɛɣ taa leleŋ taa, powoki tʋmɩyɛ yɔɔ, pasɩɣnɩ ɖama nɛ pɩɖʋʋ Ɛsɔ hɩɖɛ. Yehowa wazɩɣ ɛgbɛyɛ nɖɩ, nɛ piɖeɣni-ɖi fezuu taa. Nabʋyʋ taa lɛ, ɛgbɛyɛ taa ɛyaa nabɛyɛ taa fɛyɩ leleŋ nɛ pemiɣdiɣ nɛ pɔyɔɔdʋʋ tɔm kɩdɛkɛdɩtʋ ɛzɩma palakɩ tʋma ɛgbɛyɛ taa yɔ pɩ-yɔɔ; ɛyaa mba pɛwɛ ɛzɩ «sɔtʋ liɖe» nɖɩ ɖɩmɩzɩɣ sɔtʋ nɛ tɩtalɩɣ ɛyaa mba paakɛ ɛyaa kɩbama kiɖe tɛɛ yɔ. (Ebree mba 12:15) Ðoŋ ɖoŋ lɛ pɛkɛ ɛyaa mba pañɩnɩɣ wala se pa-hɩla ɩsɛɛ yɔ. Pɛyɛlɩɣnɩ cɛtɩm tɔm nɛ peyeki se ɛyaa ɩmaɣzɩ se siɣsiɣ wɛtʋ fɛyɩ, se palakɩ tɛ-yɔɔ tɛ-yɔɔ lakasɩ, yaa palakɩ lakasɩ kɩdɛkɛdɩsɩ lɛɛsɩ ɛgbɛyɛ taa yaa ɛgbɛyɛ taa ɛzʋtʋyaa yebina nɛ lakasɩ kɩdɛkɛdɩsɩ nzɩ sɩwɛɛ ɛgbɛyɛ taa. Toovenim taa lɛ, tɔm ndʋ pɔyɔɔdʋʋ yɔ tɩpɩzɩɣ nɛ tɩkɔnɩ tayʋʋ ɛgbɛyɛ taa. Pɩwɛɣ ɖeu se ɖitaawelisini-wɛ nɛ ɖɩñaɣ pana se ɖɩkɛ ɛyaa mba papɩ fezuu taa yɔ nɛ ɖɩsɩna nɛ laŋhɛzɩyɛ nɛ nɔɔ kʋɖʋmaɣ pɛwɛɛ ɛgbɛyɛ taa.
w02 15/5 27 § 5
Cɩŋgɩlɩm wɛtʋ ɖiyiɣ ɛyaa mba pɛwɛ siɣsiɣ yɔ
Ɛyʋ weyi ɛɛmaɣzɩɣ tɔm yɔɔ camɩyɛ yaa «weyi ɛfɛyɩnɩ laŋɩyɛ yɔ» mbʋ ɛwɛɛkɩɣ yɔ pɩɖɔwa pɩdɩɩfɛyɩ! Ɛyɔɔdʋʋ tɔm nɛ ɛɛmaɣzɩɣ ɛ-ñʋʋ taa, nɛ halɩ pɩtɛŋna se ɛyɔɔdʋʋ kɔlɔmɔtʋ tɔm yaa tɔm ndʋ tɩkɛ tʋtʋ yɔ. Pɩpɔzʋʋ se ɛgbɛyɛ taa ɛzʋtʋyaa ɩla kpɛdɛyɛ nɛ pasɩnzɩ wɛtʋ kɩdɛkɛdɩtʋ ndʋ nɛ tɩtaawɛɛnɩ ɖoŋ koobiya yɔɔ. Weyi ɛwɛnɩ lɛɣtʋ yɔ, ɛwɛ ndɩ nɛ «weyi ɛfɛyɩnɩ laŋɩyɛ yɔ»; ɛsɩm alɩwaatʋ ndʋ esu tamɩyɛ yɔ. Eekuluu mɛsaɣ tɛɛ tɔm yɔɔ, ɛlɛ ehuuzuu tɩ-yɔɔ. Ɛyʋ weyi ɛwɛ lɛɣtʋ yɔ «ɛwɛ siɣsiɣ ɛ-maɣzɩm taa,» nɛ ɛnawa se ye ɛyʋ ɛɛɖɔkʋʋ ɛ-nzʋlʋmɩyɛ camɩyɛ yɔ, ɛpɩzɩɣ nɛ ɛwɛɛkɩ wondu sakɩyɛ. Ɛlakɩ mbʋ pɩwɛ siɣsiɣ yɔ e-koobiya Krɩstʋ mba nɛ eekuluu mɛsaɣ tɛɛ tɔm ndʋ tɩpɩzɩɣ nɛ tɩkɔnɩ-wɛ kaɖɛ yɔ tɩ-yɔɔ. Wazaɣ sɔsɔɔ pɩkɛnaa se ɛyaa siɣsiɣ tɩnaa mba pɛwɛ ɛgbɛyɛ taa!
Fezuu taa ñɩm
g20.1 11, aɖakaɣ
Ɛzɩma ŋpɩzɩɣ nɛ ŋlʋbɩnɩ nɩɣzɛ yɔ
«TƖŊNƖ CAMƖYƐ LAKASƖ LABƲ YƆƆ NƐ ŊLƲBƖNƖ NƖƔZƐ»
«Ɛyʋ weyi ɛlakɩ camɩyɛ lakasɩ yɔ, ɛ-maɣmaɣ pɩwazɩɣ, ɛlɛ kañatʋ tʋ kɔŋnɩ ɛ-tɩ kʋñɔŋ.»—ADUWA 11:17
Takayaɣ ŋga payaɣ se Overcoming Stress yɔ ka-taa tɔm ñʋʋ nakʋyʋ yɔ: «Tɩŋnɩ camɩyɛ lakasɩ labʋ yɔɔ nɛ ŋlʋbɩnɩ nɩɣzɛ.» Dr. Tim Cantopher weyi ɛma takayaɣ ŋga yɔ, ɛyɔɔdɩ tɔm ñʋʋ ŋgʋ kɩ-taa se ye ɛyʋ ɛlakɩ lalaa camɩyɛ lakasɩ yɔ, pɩpɩzɩɣ piyele nɛ ɛwɛɛnɩ tɔnʋʋ taa alaafɩya nɛ ehiɣ taa leleŋ. Ɛlɛ weyi ɛɛlakɩ camɩyɛ lakasɩ yaa ɛwɛ kañatʋ yɔ, eehikiɣ taa leleŋ mbʋ pʋyɔɔ yɔ ɛyaa seɣ-i.
Pɩtasɩ lɛ, ye ɖɩlakɩ ɖa-tɩ camɩyɛ lakasɩ yɔ, pɩpɩzɩɣ piyele nɛ ɖɩɩkɩlɩɣ nɩɣzʋʋ. Kɩɖaʋ nakʋyʋ yɔ: Pɩfɛyɩ se ɖɩɖʋʋ ɖa-tɩ kaɖʋsɩ nzɩ sɩwɛ kaɖɛ nɛ ɖɩɩpɩzɩɣ nɛ ɖɩtalɩ-sɩ yɔ. Pɩtɩpɔzɩ se ɖɩmaɣzɩɣ se ɖɩtɩlɩɩ pʋyʋ yaa ɖɩfɛyɩnɩ wazaɣ nakɛyɛ. Yesu Krɩstʋ yɔɔdaa se: «Sɔɔlɩ ɛyʋ lɛlʋ ɛzɩ ña-maɣmaɣ yɔ.»—Maarɩkɩ 12:31.