Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
© 2025 Watch Tower Bible and Tract Society of Pennsylvania
1er-7 SEPTEMBRE
ÑƖM MBƲ PƖWƐ ƐSƆTƆM TAA YƆ ADUWA 29
Kizi wɩlɩtʋ nɛ sɔnzɩ nzɩ sɩɩlakɩ nɔɔ kʋɖʋmaɣ nɛ Bibl wɩlɩtʋ yɔ
wp16.06 6, aɖakaɣ
Natʋ ndʋ tɩyɔɔdʋʋ fezuu taa ñɩma yɔɔ tɔm yɔ
Ɛyaa sakɩyɛ wɛ aleewaa sɔɔndʋ seu yomiye taa ɛzɩ salaka tʋ weyi ɛwɛ kpasɩ taa yɔ. Powoki tɩyaa tɛ, pɛlɛɣ kokoo, nɛ patɩŋɩɣnɩ maajiki lakasɩ ndɩ ndɩ yɔɔ se pakandɩyɩ pa-tɩ yɔɔ. Ɛlɛ pɩtɩpɔzɩ se ŋse aleewaa sɔɔndʋ. Bibl hɛzɩɣ ɖa-laŋa nɛ tɔm kɩbandʋ tʋnɛ: «Yehowa ɛsa wɛɛ nɛ acɔʋ tɛtʋ kpeekpe yɔɔ se ɛwɩlɩ e-ɖoŋ nɛ pɩwazɩ mba pɛsɛɣ-ɩ nɛ pa-laŋɩyɛ pilim yɔ nɛ ɛsɩnɩ-wɛ.» (2 Kroniiki 16:9) Ɛsɔ toovenim tʋ Yehowa wɛ ɖoŋ siŋŋ nɛ pɩkpaɖɩ Sataŋ, nɛ ɛkaɣ ñɔ-yɔɔ kandɩyʋʋ ye ŋtaɣ-ɩ liu yɔ.
Pɩsa nɛ Yehowa kandɩyɩ ñɔ-yɔɔ lɛ pɩpɔzʋʋ se ŋkpɛlɩkɩ nɛ ŋtɩlɩ mbʋ pɩkɛdɩɣnɩ-ɩ yɔ, nɛ ŋɖɔ ɛ-paɣtʋ yɔɔ. Mbʋ Krɩstʋ ñɩma mba paawɛ Efɛɛzɩ yɔ paalaba; paakpeɣli maajiki takayɩsɩ nzɩ paawɛna yɔ nɛ pañaɣzɩ-sɩ miŋ. (Tʋma Labʋ 19:19, 20) Mbʋ ɖɔɖɔ, pʋcɔ nɛ Yehowa kandɩyɩ ñɔ-yɔɔ lɛ pɩpɔzʋʋ se ŋse tɩyɩtʋ, sɩɩnaa latʋ, fadɩŋ kokoo, maajiki takayɩsɩ nɛ wondu lɛɛtʋ ndʋ tɩlakɩ nɔɔ kʋyʋmaɣ nɛ feziŋ kɩdɛkɛdɩŋ yaʋ yɔ.
Ñɔɔnɩ sɩm yɔɔ toovenim tɔm kpam
13 Ye ŋŋsɩŋ se sɔnzɩ nasɩyɩ wɛ ɖeu yaa sɩfɛyɩ ɖeu yɔ, pɔzɩ Yehowa adɩma taa se ɛha-ŋ lɔŋsɩnɖɛ. (Kalɩ Yakubu 1:5.) Pʋwayɩ lɛ, ŋñɩnɩ ɛgbɛyɛ takayɩsɩ taa. Ŋpɩzɩɣ ɖɔɖɔ nɛ ŋpɔzɩ ñɛ-ɛgbɛyɛ taa ɛzʋtʋyaa se pasɩnɩ-ŋ. Paakaɣ-ŋ heyuu ɛzɩma ɖeyi ɖeyi pɩwɛɛ se ŋla yɔ, ɛlɛ pakaɣ-ŋ sɩnʋʋ nɛ ŋtɩlɩ paɣtʋ kila wena pɩwɛɛ se ŋlabɩnɩ tʋmɩyɛ yɔ, ɛzɩ wena a-tɔm ɖɩyɔɔdɩ cɩnɛ yɔ. Ye ŋlakɩ mbʋ yɔ, pɩsɩɣnɩ-ŋ nɛ ‘ŋfalɩsɩ ɖoŋ weyi ŋwɛna se ŋnɩɩ tɔm taa yɔ,’ nɛ ɖoŋ ɛnɩ ɛkaɣ-ŋ sɩnʋʋ nɛ ŋɖʋ «tʋkaɣ kɩbam nɛ kɩdɛkɛdɩm pɛ-hɛkʋ taa.»—Ebr. 5:14.
«Mankaɣ ɖɔm ño-toovenim taa»
12 Sɔnzɩ nɛ lakasɩ nzɩ sɩkaɖɩɣnɩ Bibl paɣtʋ yɔ. Ðɔ-hɔʋ taa ñɩma, ɖa-tʋmɩyɛ taa taabalaa nɛ ɖa nɛ mba ɖɩlakɩ sukuli yɔ, papɩzɩɣ nɛ payaa-ɖʋ se ɖiwolo nɛ ɖa nɛ wɛ ɖɩla kazandʋ. Ɛbɛ pɩzɩɣ pɩsɩnɩ-ɖʋ nɛ ɖɩtaala kazandʋ nɛ sɔnzɩ nzɩ sɩɩɖʋʋ Yehowa hɩɖɛ yɔ? Pɩtɩpɔzɩ kpa se ɖɩsɔɔ lɩmaɣza wena Yehowa wɛnɩ lakasɩ nzɩ sɩ-yɔɔ yɔ. Lɔŋ tasʋʋ mbʋ pɩwɛ ɛgbɛyɛ takayɩsɩ taa pɩlɩɩnɩ ɖenɖe ɛjaɖɛ yɔɔ mba kazandʋ ndɩ ndɩ lɩnaa yɔ, pɩpɩzɩɣ nɛ pɩsɩnɩ-ɖʋ. Ye ɖɩtɔzʋʋ mbʋ pʋyɔɔ Bibl heyiɣ-ɖʋ se ɖɩtaala kazandʋ ndʋ yɔ pɩ-yɔɔ yɔ, pɩsɩɣnɩ-ɖʋ nɛ ɖa-taa tɛ se ɖɔ-ɖɔnɛ wɛɛ nɛ “pɩkɛdɩɣnɩ Kɩbaɣlʋ.” (Efɛz. 5:10) Ye ɖɩtaɣ liu Yehowa nɛ e-toovenim tɔm yɔ, pɩsɩɣnɩ-ɖʋ nɛ ɖɩtaatɔlɩ «ɛyʋ sɔɔndʋ seu» kpaca taa.—Adu. 29:25.
Fezuu taa ñɩm
it «Peɣzuu» § 1
Peɣzuu
Pɩkɛ ɛzɩma nɔɔyʋ tɩŋɩɣnɩ ajitu nʋmɔʋ nakʋyʋ yɔɔ nɛ ɛsaŋ lɛlʋ se ɛ-tɔm ɛkɛdɩnɩ-ɩ; ɛyɩɣyɩɣ-ɩ se ɛsɔɔlɩ ɛ-tɔm; ɛcɛtɩɣ-ɩ, ɛhaɣ-ɩ samtʋ ndʋ tɩtɩlɩɩnɩ ɛ-laŋɩyɛ taa yɔ yaa ɛɖɛyɩɣ-ɩ kadadayaɣ yɔ. Ðoŋ ɖoŋ lɛ, nɔɔyʋ lakɩ mbʋ se pɩwɩlɩ ɛzɩma ɛsɔɔlɩ ɛ-tɩ yɔ nɛ ɛzɩma weyi ɛsaŋɩ-ɩ yɔ ɛtɩlɩɩ pʋyʋ yɔ; nɛ wɛtʋ ndʋ tɩkɔŋnɩ kaɖɛ weyi ɛwɛnɩ-tʋ yɔ. Ɛ-kaɖʋwa lɛ se ɛ-tɔm ɛkɛdɩnɩ weyi epeɣziɣ-i yɔ yaa ɛlɛ ɛha-ɩ tomnaɣ yɔɔ wondu natʋyʋ yaa se eyele nɛ pɩkɛnɩ-ɩ kɩjɛyʋʋ se ɛmaɣzɩ ɛ-yɔɔ yaa ɛɖʋ-ɩ hɩɖɛ. Ðoŋ ɖoŋ lɛ, lakasɩ nzɩ sɩ-kaɖʋwa lɛ se siyele nɛ ɛyʋ lɛlʋ tɔlɩ kpaca nakʋyʋ taa. (Adu 29:5) Ye ɛyʋ nɔɔyʋ epeɣziɣ lalaa yɔ, pɩwɩlɩɣ se ɛfɛyɩnɩ lɔŋsɩnɖɛ nɖɩ ɖɩlɩnɩ hayo yɔ, ɛlɛ ɛjaɖɛ lɔŋsɩnɖɛ ɛwɛna; ɖiseɣtiɣ ɛyaa se pɛwɛɛnɩ piɖeni men-ɖeke wɛtʋ, paɖʋʋ tʋkaɣ ɛyaa taa nɛ pɛwɛɛnɩ pɩ-tɛɛ nɛ pɩ-yɔɔ lakasɩ. (Yak 3:17) Pɩ-tɛɛ nɛ pɩ-yɔɔ lakasɩ, cɛtɩm, lalaa sam se pɔsɔɔlɩ-ɖʋ yaa lalaa hɩɖɛ ɖʋʋ kadadayaɣ, lalaa wɩlʋʋ se patɩlɩɩ pʋyʋ kɛ wɛtʋ ndʋ tɩɩkɛdɩɣnɩ Ɛsɔ yɔ.—2Kɔ 1:12; Gal 1:10; Efɛ 4:25; Kol 3:9; Nat 21:8.
8-14 SEPTEMBRE
ÑƖM MBƲ PƖWƐ ƐSƆTƆM TAA YƆ ADUWA 30
«Taaha-m kʋñɔndʋtʋ yaa ñɩm»
Sɔɔlɩm mbʋ haɣ koboyaɣ siŋŋ?
10 Toovenim taa lɛ, pɩpɔzʋʋ ɖa-tɩŋa liidiye. Ðihuuzuu ɛyʋ yɔɔ nabʋyʋ taa. (Ekl. 7:12) Ɛlɛ ye ɛyʋ ɛwɛnɩ liidiye pazɩ yem se ɛcɔnɩnɩ ɛ-kɩcɛyɩm ɖeɖe yɔ, ɛpɩzɩɣ nɛ ehiɣ taa leleŋ na? Ðicosuu se ‘ɛɛɛ.’ (Kalɩ Eklezɩyasɩtɩ 5:12.) Yakee pɩyalʋ Aguuri mawa se: «Taaha-m kʋñɔndʋtʋ yaa ñɩm. Ñɩtɩ ŋyele nɛ mɔntɔɔ tɔɔnaɣ ŋga kamakɩnɩ-m yɔ.» Ðɩnɩɣ mbʋ pʋyɔɔ ɛtaasɔɔlɩ se Ɛsɔ ɛha-ɩ tanɩm, yaa mbʋ pʋyɔɔ ɛtaasɔɔlɩ se ɛwɛɛ kʋñɔndʋtʋ sɔsɔtʋ taa yɔ pɩ-taa. Ɛzɩ ɛlɩzʋʋ pɩ-taa yɔ, ɛtaasɔɔlɩ se pɩtakɩ-ɩ nɛ ɛmɩlɩ, mbʋ pʋyɔɔ yɔ mɩlɩm wɛɛkɩɣ Ɛsɔ hɩɖɛ. Ɛlɛ ɛbɛ yɔɔ ɛtɩmaa se Ɛsɔ ɛtaaha-ɩ ñɩm yɔ? Ɛlɩzɩ pɩ-taa se «Nɛ pɩtaakɛdɩ nɛ mahaɣ nɛ menkizi-ŋ nɛ mɔyɔɔdɩ se: “Anɩ Yehowa kɛ?”» (Adu. 30:8, 9) Pɩtɩla pɩtɔzʋʋ-ŋ ɛyaa mba peyebi Ɛsɔ nɛ pataɣ liu pa-ñɩm yɔ pa-taa nabɛyɛ yɔɔ.
11 Mba pɔsɔɔlɩ liidiye yɔ paapɩzɩɣ nɛ pala Ɛsɔ sɔɔlɩm. Yesu yɔɔdaa se: «Nɔɔyʋ ɛɛpɩzɩɣ nɛ ɛkɛ caanaa 2 yom; mbʋ pʋyɔɔ yɔ ɛkaɣ paɖʋʋ kʋɖʋm nɛ ɛsɔɔlɩ lɛlʋ; yaa ɛkaɣ ñɔnʋʋ kʋɖʋm nɛ eni lɛlʋ. Ɩɩpɩzɩɣ nɛ ɩkɛ Ɛsɔ yomaa nɛ ɩtɛ ɩkɛ Ñɩm yomaa.» Pʋcɔ nɛ ɛyɔɔdʋʋ tɔm ndʋ lɛ, ɛɛcalɩnɩ yɔɔdʋʋ se: «Iyele mɩ-tɩ ñɩm cazʋʋ nɛ ɩkpazɩɣ huwa tɛtʋ yɔɔ, ɖenɖe ŋgbam nɛ kalɩkɔdaɣ pɛwɛɛkɩɣ-pʋ nɛ ɖenɖe mɩlaa yɔkʋʋ nɛ pamɩlɩ yɔ. Ɛlɛ ɩcazɩ mɩ-tɩ ñɩm nɛ ɩkpazɩ huwa ɛsɔdaa, ɖenɖe ŋgbam nɛ kalɩkɔdaɣ paawɛɛkɩɣ-pʋ nɛ ɖenɖe mɩlaa ɩɩyɔkʋʋ nɛ pamɩlɩ yɔ.»—Mat. 6:19, 20, 24.
12 Pɩtasɩnɩ taa leleŋ lɛ, ɛyaa sakɩyɛ kɔm nɛ peɖiɣzina se wezuu kɛlɛʋ caɣʋ yeba nɛ pehiɣ alɩwaatʋ sakɩyɛ nɛ pɛsɛɣnɩ Yehowa. Jack wɛ Etaazuunii ɛjaɖɛ taa. Ɛpɛdɩ ɛ-tʋmɩyɛ ɖɩlaɖɛ nɛ ɖɩɣa sɔsɔɔ ŋga ɛɛwɛna yɔ, mbʋ pʋyɔɔ yɔ ɛnawa se ye ɛlabɩ mbʋ yɔ, pɩpɩzɩɣ nɛ pɩsɩnɩ-ɩ nɛ ɛpaɣzɩ paa ɖooye nʋmɔʋ lɩzʋʋ tʋmɩyɛ ɛzɩ ɛ-halʋ yɔ. Ɛtɔzʋʋ se: «Pɩtaawɛɛ-ɖʋ kɛlɛʋ se ɖɩpɛdɩ ɖɩɣa kɩbaŋa ŋga ɖɩɩwɛna yɔ nɛ pɩtasɩnɩ ɖa-ñɩm lɛɛbʋ. Ɛlɛ pɩnzɩ sakɩyɛ nzɩ sɩɖɛwa yɔ sɩ-taa man-tʋmɩyɛ taa tɩlasɩ yɔɔ lɛ, paa ɛzɩmtaa manpɩsaɣ ɖɩɣa nɛ ɛsɩñɩŋɩyɛ. Pʋbʋ taa lɛ, ma-halʋ kaakɛ nʋmɔʋ lɩzɩyʋ, nɛ ɛɛwɛ taa leleŋ taa paa ɛzɩmtaa. Ɛyɔɔdaɣ se: “Tʋmɩyɛ ñʋʋdʋ sɔsɔ weyi ɛ-wayɩ fɛyɩ yɔ mɛwɛna.” Lɛɛlɛɛyɔ ma ɖɔɖɔ manpɩsʋʋ nʋmɔʋ lɩzɩyʋ yɔ, ma nɛ ɩ ɖɩlakɩ Ɛyʋ kʋɖʋm tʋmɩyɛ na; ɛnʋ lɛ Yehowa.»
w87 15/5 30 § 8
Se Yehowa sɔɔndʋ nɛ ŋkaɣ wɛʋ taa leleŋ taa
◆ Adu 30:15, 16—Kɩɖaŋ ɩnɛ ɛbɛ ɩkpɛlɩkɩɣ-ɖʋ?
Iyeki se ɖɩna ɛzɩma ɛyʋ weyi ɛwɛnɩ ɛsa naɣ naɣ yɔ ɛɛhakɩ kaaʋ yɔ. Azʋʋmnaa ñɔʋ calɩm nɛ paahakɩ, mbʋ ɖɔɖɔ ɛyʋ weyi ɛwɛnɩ ɛsa naɣ naɣ yɔ paa ɛzɩmtaa lɛ, ɛñɩnɩɣ liidiye nɛ ɖoŋ kaahɛzaɣ. Mbʋ ɖɔɖɔ pɩlaʋ ɛɛhakɩ kaaʋ nɛ paa ɛzɩmtaa lɛ kɩha nɔɔ se kɩmʋ sɩɖaa. Lotu kaalʋlaɣ «makɩ kubusi» paa ɛzɩmtaa se tɩwɛɛnɩ piya. (Kiɖe Tɛɛ Tɔm 30:1) Wɩlɩŋ tɛtʋ ñɔʋ tɛʋ lɩm ɛlɛ piileɖiɣ lɛ tɩɖaɣnɩɣ wɩlʋʋ. Miŋ ñakɩ mbʋ paɖʋʋ ɩ-taa yɔ nɛ etiyiɣni ɛ-nzʋlʋma se añaɣ mbʋ pɩñɔtɩnɩ-ɩ yɔ. Mbʋ ɛyaa mba pɛwɛnɩ ɛsa naɣ naɣ yɔ pɛwɛɛ. Ɛlɛ mba peyeki nɛ Ɛsɔ lɔŋsɩnɖɛ ɖiyiɣ-wɛ yɔ pɛfɛyɩnɩ piɖeni men-ɖeke wɛtʋ ndʋ.
w11 1/6 10 § 4
Ɛzɩma ŋpɩzɩɣ ŋcaɣ wezuu nɛ pɩla nɔɔ kʋɖʋmaɣ nɛ mbʋ ŋwɛna yɔ
Tɔsɩ liidiye pʋcɔ nɛ ŋya mbʋ ŋsɔɔlaa yɔ. Paa pɩpɩzɩɣ nɛ pɩla ɛyaa ɛzɩ ɖooo canaaʋ taa ɛyaa tɔsaɣ liidiye pʋcɔ nɛ payakɩ mbʋ pe-liu wɛɛ kɔyɔ, tɔm lɛ se ye ɛyʋ ɛtɔsɩ liidiye pʋcɔ nɛ ɛya nabʋyʋ yɔ pɩsɩɣnɩ-ɩ se ɛtaasʋʋ nɩɣzɛ taa. Ye ɖɩlakɩ mbʋ yɔ, piyeki se ɖɩtaatɔɔ kɩma nɛ ɖitaahiɣ nɩɣzɛ wena kɩma tɔɔʋ kɔŋna yɔ; a-taa naɖɩyɛ lɛ kɛzɛɣa ŋga ɛyʋ hɛyɩɣ nɛ piyeki se liidiye nɖɩ ɛhɛyɩɣ yɔ ɖɩɖɔɔ nɛ pɩcɛzɩ mbʋ ɛyaba yɔ pi-liidiye yɔ. Bibl yɔɔdʋʋ se kayɩmaɣ kɛ «lɔŋsɩnɖʋ» mbʋ pʋyɔɔ yɔ, kɔ-tɔsʋʋ «kɔ-tɔɔnaɣ, nɛ kekpeɣliɣ-kɛ kʋmtʋ alɩwaatʋ taa» se kaalabɩnɩ tʋmɩyɛ pʋwayɩ.—Adu 6:6-8; 30:24, 25.
Wɛɛ Yehowa kizinziku tɛɛ tam
18 Pɩwɛɣ ɖeu se ɖɩmaɣzɩ nɛ ɖɩna lɩmaɣza wena ɖɩwɛnɩ liidiye yɔɔ yɔ. Pɔzɩ ña-tɩ se: «Ðoŋ ɖoŋ lɛ, mamaɣzɩɣ liidiye nɛ mbʋ manpɩzɩɣ nɛ maya yɔ pɩ-yɔɔ? Ye mankɩndɩ nɔɔyʋ cɔlɔ liidiye yɔ, maahɛyɩɣ-ɩ ɖɩ lɔŋ nɛ mamaɣzɩɣ se ɛfɛyɩ liidiye kɛdɛɖaɣ taa? Liidiye nɖɩ mɛwɛna yɔ ɖiyeki nɛ mamaɣzɩɣ se mamʋ ñɩm nɛ pɩkɩlɩ lalaa na? Pɩwɛ-m kaɖɛ se malakɩ lalaa kʋjɔŋ na? Mamaɣzɩɣ se ye koobu nɔɔyʋ ɛwɛnɩ liidiye sakɩyɛ yɔ, pɩwɩlɩɣ se ɛsɔɔlɩ liidiye nɛ pɩkɩlɩ Yehowa? Manɖʋʋ taabalɩyɛ nɛ ñɩm tɩnaa nɛ man-paa fɛyɩnɩ kʋñɔndɩnaa na?» Ðihiɣ waɖɛ sɔsɔɖɛ se ɖɩkɛ agɔma Yehowa kizinziku tɛɛ. Ye ɖɩfɛyɩ liidiye laɣzaɣ yɔ, ɖɩpɩzɩɣ nɛ ɖiwolo pɩ-yɔɔ nɛ ɖɩkɛ agɔma Yehowa kizinziku tɛɛ. Ðɩnɛ ɛlɛ Yehowa ɛɛkaɣ-ɖʋ lɔʋ kaaʋ.—Kalɩ Ebree mba 13:5.
Fezuu taa ñɩm
w09 15/4 17 § 11-13
Ðɩnaɣ Yehowa lɔŋsɩnɖɛ wondu kɩlɩzɩtʋ taa
11 Kaaŋ taa kozoŋa kɛ kpɩnɛ cikpeɖe ɛlɛ ɖɩpɩzɩɣ nɛ ɖɩkpɛlɩkɩ-ɖʋ lɔŋ sɔsɔŋ sakɩyɛ. (Kalɩ Aduwa 30:26.) Kɛ-wɛtʋ nɩɣzɩnɩ kozoŋa maɣmaɣ ɛlɛ ka-nɩŋgbaaŋ wɛ ññɩɩ nɛ ɩwɛɛ kuluŋgulu nɛ ka-nɩŋgbanzɩ tɩɖaɣlɩ ɖɔɖɔ. Kɛkɛ kpɩnɛ nɖɩ ɖɩcakɩ ageeta wena a-taa kaaŋ wɛɛ yɔ. Kaaŋ taa kozoŋa ɛsa naɣ poliŋ nɛ asɩɣnɩ-kɛ se kana ko-koyindinaa lɔŋ nɛ kɛmɛlɩ pɔŋ nɛ kaaŋ pɔŋ weyi ɩwɛ lone nɖɩ ɖɩ-taa kɛwɛɛ yɔ ɩ-taa. Palabɩ kaaŋ taa kozoŋa se ka nɛ ka-taabalaa pɛkpɛndɩ nɛ pɛwɛɛ, nɛ pɩkandɩyɩɣ kɔ-yɔɔ nɛ pisoŋuu-kɛ nikaɣ alɩwaatʋ taa.
12 Ɛbɛ kaaŋ taa kozoŋa kɩɖaʋ kpɛlɩkɩɣ-ɖʋ? Kajalaɣ lɛ, yʋsɩ se kpɩnɛ ɖɩnɛ ɖɩcakɩnɩ ɖɩ-ɛsa se ɛyaa yaa kpɩna lɛɛna ɩtaakʋ-ɖɩ. Ɛlɛ ɖɩlakɩnɩ tʋmɩyɛ camɩyɛ ɖɩ-ɛsa wena anaɣ poliŋ yɔ nɛ ɖɩnaɣ mba papɩzɩɣ nɛ pakʋ-ɖɩ yɔ ɖooo poliŋ taa; pɩtasɩ lɛ ɖiiposuuni pɔŋ nɛ kaaŋ pɔŋ weyi ɩ-taa ɖɩpɩzɩɣ nɛ ɖɩmɛlɩ nɛ pɩkandɩyɩ ɖɩ-yɔɔ yɔ. Mbʋ ɖɔɖɔ ye ɖɩwɛnɩ fezuu taa ɛsa wena anaɣ camɩyɛ yɔ, pɩsɩɣnɩ-ɖʋ nɛ ɖɩna kala wena amɛlɩ Sataŋ ɛjaɖɛ taa yɔ. Apostoloo Pɩyɛɛrɩ tasɩ Krɩstʋ mba lɔŋ ɩnɛ: «Ɩɖɔkɩ mɩ-maɣzɩm, ifeŋiɣ! Mi-koyindu Eleeu cɔʋ ɛzɩ mʋʋzʋʋ ŋgʋ kɩmakɩ kubusi yɔ, nɛ ɛñɩnɩɣ se ɛtɔɔ nɔɔyʋ.» (1 Pɩy. 5:8) Alɩwaatʋ ndʋ Yesu kaawɛ tɛtʋ yɔɔ yɔ, eewobi pɩ-yɔɔ nɛ ɛcaɣnɩ ɛ-ɛsa nɛ efeŋiɣ se Sataŋ etaapeɣzi-i nɛ elesi ɛ-cɩŋgɩlɩm wɛtʋ. (Mat. 4:1-11) Yesu ha ɛ-wayɩ tɩŋɩyaa kɩɖaʋ kɩbaŋʋ!
13 Nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩcaɣnɩ ɖɛ-ɛsa yɔ, ɩ-taa nakʋyʋ lɛ se ɖɩlabɩnɩ tʋmɩyɛ camɩyɛ wondu ndʋ Yehowa ha-ɖʋ se ɛkandɩyɩ ɖɔ-yɔɔ fezuu taa yɔ. Ðitaaleɣyini Ɛsɔtɔm kpɛlɩkʋʋ nɛ Krɩstʋ mba kediɣzisi wobu. (Luka 4:4; Ebr. 10:24, 25) Pɩtasɩ lɛ, kaaŋ taa kozoŋa ñakɩ pana se kɛwɛɛ ka-taabalaa hɛkʋ taa, mbʋ ɖɔɖɔ pɩpɔzʋʋ se ɖiwolo pɩ-yɔɔ nɛ ɖɩñɔtʋʋnɩ ɖo-koobiya Krɩstʋ mba kpam nɛ pɩsa nɛ ɖa nɛ wɛ «ɖɩpɩzɩ nɛ ɖɩkpazɩ ɖama ɖoŋ.» (Roma 1:12) Ye ɖɩlakɩ mbʋ pɩpɔzʋʋ se ɖɩla nɛ Yehowa kandɩyɩ ɖɔ-yɔɔ yɔ, ɖɩwɩlɩɣ se ɖa-lɩmaɣza lakɩ nɔɔ kʋɖʋmaɣ nɛ Daviid ñɩna, ɛmawa se: «Yehowa kɛnɩ man-kaaʋ nɛ men-tilimiye ɖoŋ ñɩnɖɛ nɛ Weyi eholuu-m yɔ. Mɛ-Ɛsɔ kɛnɩ man-kaaʋ, ɛnʋ manɖʋʋ kʋyʋʋ.»—Keɣ. 18:2.
15-21 SEPTEMBRE
ÑƖM MBƲ PƖWƐ ƐSƆTƆM TAA YƆ ADUWA 31
Lɔŋ weyi ɖoyo nɔɔyʋ tasɩ ɛ-pɩyalʋ yɔ ɛbɛ ɩkpɛlɩkɩɣ-ɖʋ?
w11 1/2 19 § 7-8
Kpɛlɩkɩ wezuu kɩbaŋʋ caɣʋ yɔɔ tɔm ñe-piya
Wɩlɩ-sɩ kʋzʋʋ yɔɔ toovenim tɔm tɩŋa. Pɩcɛyaa se papaɣ piya. (1 Kɔrɛntɩ mba 6:18; Yakubu 1:14, 15) Paa mbʋ yɔ, Bibl wɩlɩɣ se kʋzʋʋ kɛ kʋjɔʋ ŋgʋ kɩlɩnɩ Yehowa cɔlɔ yɔ, kɩtɩkɛ kpaca ŋgʋ kɩlɩnɩ Sataŋ cɔlɔ yɔ. (Aduwa 5:18, 19; Hendu taa Hendu 1:2) Ye ŋheyiɣ ñe-piya evelisi pee kɩdɛkɛda wena kʋzʋʋ kɩdɛkɛdʋʋ lʋlʋʋ yɔ a-ɖeke a-tɔm yɔ pɩpɩzɩɣ piyele nɛ sɩwɛɛnɩ lɩmaɣza wena atɩmʋna nɛ aalakɩ nɔɔ kʋɖʋmaɣ nɛ tɔm ndʋ Masɩ wɩlɩɣ kʋzʋʋ yɔɔ yɔ. Payaɣ Fransɩ ɛjaɖɛ taa pɩɣa evelaɣ nakɛyɛ se Corrina, kɔyɔɔdaa se: «Ma-lʋlɩyaa ñɩkɩɣ niye kʋzʋʋ kɩdɛkɛdʋʋ wezuu caɣʋ yɔɔ siŋŋ nɛ piyeba nɛ mɛwɛɛnɩ lɩmaɣza wena atɩtʋʋzɩ yɔ kʋzʋʋ yɔɔ.»
Yele nɛ ñe-piya tɩlɩ kʋzʋʋ yɔɔ toovenim tɔm tɩŋa. Payaɣ Mɛkɩsiiki ɛjaɖɛ taa ɖoyo nɔɔyʋ se Nadia, ɛyɔɔdaa se: «Tɔm ndʋ mañakaɣ pana paa ɛzɩmtaa se men-piya ɩnɩɩ tɩ-taa yɔ ndʋ yɔ se kʋzʋʋ kɛ pʋyʋ kɩbanʋ nɛ kɩkɛ kʋjɔʋ ŋgʋ Ɛsɔ Yehowa ha ɛyaa se pɩha-wɛ taa leleŋ yɔ. Ɛlɛ pɩkɛ kʋjɔʋ ŋgʋ pɩmʋnaa se palabɩnɩ tʋmɩyɛ nesi ɖɔkʋʋ taa ɖeke yɔ. Ɛzɩma ɖɩlakɩnɩ-kʋ tʋmɩyɛ yɔ, pɩpɩzɩɣ piyele nɛ ɖihiɣ taa leleŋ yaa pɩkɔnɩ-ɖʋ kʋñɔmɩŋ.»
ijwhf tɔm ñʋʋ 4 § 11-13
Ña nɛ ñe-piya ɩlakɩ kɛdaɣ sʋlʋm yɔɔ
Ñɩnɩ alɩwaatʋ nɛ ña nɛ ñe-piya ɩyɔɔdɩ sʋlʋm tɔm. Payaɣ Krandɩ-Pretaañɩ ɛjaɖɛ taa caja nɔɔyʋ se Mark, ɛyɔɔdaa se: «Sʋlʋm tʋmɩyɛ labɩnʋʋ pɩzɩɣ nɛ pisidi piya ñʋŋ taa. Mɔnpɔzɩ man-pɩyalʋ weyi ɛwɛnɩ pɩnzɩ 8 yɔ se ɛmaɣzɩɣ se pɩwɛ ɖeu yaa pɩfɛyɩ ɖeu se ɛyʋ ɛñɔɔ sʋlʋm. Meyeba nɛ ɖɩla kɛdaɣ ŋga ɛzɩ taabalaa yɔ, nɛ pɩsɩnɩ-ɩ nɛ ɛyɔɔdɩ ndʋ ɛmaɣzɩɣ yɔ kpayɩ.»
Ye ña nɛ ñe-piya ɩyɔɔdɩ sʋlʋm tɔm alɩwaatʋ ndɩ ndɩ taa yɔ, pɩsɩɣnɩ-sɩ siŋŋ nɛ pɩkɩlɩ. Pɩlɩɩnɩ pɩnzɩ nzɩ ñe-piya wɛna yɔ sɩ-cɔlɔ lɛ, alɩwaatʋ ndʋ ŋyɔɔdʋʋnɩ-sɩ sʋlʋm tɔm yɔ, ŋpɩzɩɣ nɛ ŋsuyi tɔm lɛɛtʋ ɛzɩ ɛzɩma sɩcɔnɩ sɩ-tɩ yɔɔ camɩyɛ habɩyɛ yɔɔ yɔ nɛ kʋzʋʋ tɔm mbʋ yɔ.
Ha-sɩ kɩɖaʋ kɩbaŋʋ. Piya wɛ ɛzɩ pɔbɔʋ yɔ, nɛ ɛzɩma lɩm sʋʋ pɔbɔʋ yɔ mbʋ ɖɔɖɔ mbʋ payɩ pɩcɔ piya nɛ pɩta yɔ pɩsʋʋ-sɩ. Ñɩnɩyaa yɔɔdʋʋ se lʋlɩyaa wezuu caɣʋ piya kɩlɩɣ maɣzɩnʋʋ. Pʋ-tɔbʋʋ lɛ se alɩwaatʋ ndʋ ɖɩwɛɣ nɩɣzɛ taa yɔ, ye ɖɩñɔʋ sʋlʋm se pɩhɛzɩ ɖa-nɩɣzɛ yɔ, piya kaɣ maɣzʋʋ se sʋlʋm kɛnɩnɩ nɩɣzɛ kɔyɛ. Ye mbʋ, ha-sɩ kɩɖaʋ kɩbaŋʋ. Labɩnɩ sʋlʋm tʋmɩyɛ ɛzɩ pɩmʋnʋʋ yɔ.
g17.6 9 § 5
Wɩlɩ ñe-piya tɩ luzuu
Seɣti-sɩ nɛ sɩlakɩ kʋjɔŋ. Sɩnɩ ña-pɩɣa nɛ kana se «taa leleŋ wɛ haʋ taa nɛ pɩkɩlɩ mʋʋ taa.» (Tʋma Labʋ 20:35) Ɛzɩma ŋpɩzɩɣ nɛ ŋla mbʋ? Ña nɛ kɛ ɩpɩzɩɣ nɛ ɩma ɛyaa mba pɩpɔzʋʋ se pasɩnɩ-wɛ yɔ pa-hɩla; pɩpɩzɩɣ nɛ pɩkɛ mba pɩpɔzʋʋ se powolo nɛ payabɩ-wɛ nabʋyʋ, pakpaɣ-wɛ nɛ powoni ɖoli, yaa pɔñɔɔzɩ-wɛ nabʋyʋ yɔ. Pʋwayɩ lɛ kpɛndɩnɩ-kɛ alɩwaatʋ ndʋ ŋsɩɣnɩ ɛyaa mba pa-taa nabɛyɛ yɔ. Yeki nɛ ña-pɩɣa naɣ ña-taa leleŋ alɩwaatʋ ndʋ ŋsɩɣnɩ ɛyaa lalaa yɔ. Ye ŋlakɩ mbʋ yɔ ŋkaɣ tɩŋnʋʋ ña-kɩɖaʋ yɔɔ nɛ ŋwɩlɩ ña-pɩɣa tɩ luzuu; nɛ mbʋ kɛnɩ nʋmɔʋ ŋgʋ kɩlakɩ tʋmɩyɛ nɛ pɩkɩlɩ yɔ.—Bibl paɣtʋ kiɖe: Luka 6:38.
Fezuu taa ñɩm
w92 1/11 11 § 7-8
Ɛzɩma pafalɩsaɣ ɛyaa Izrayɛɛlɩ taa Bibl alɩwaatʋ taa yɔ
7 Izrayɛɛlɩ taa, lʋlɩyaa falɩsaɣnɩ pe-piya; nɛ papaɣzaɣ-sɩ falɩsʋʋ kpaɣnɩ sɩ-pɩjatʋ taa. (Wayɩ Wayɩ Paɣtʋ 11:18, 19; Aduwa 1:8; 31:26) Bibl taa tazɩyʋ weyi payaɣ se E. Mangenot yɔ ɛyɔɔdɩ Fransɩɩ tɔm kpou ŋgʋ payaɣ se Dictionnaire de la Bible yɔ kɩ-taa se: «Pɩɣa ñɩtɩɣ nɛ kapaɣzɩ yɔɔdʋʋ lɛ, kɛkpɛlɩkɩɣ Paɣtʋ taa tɔm hɔɔlɩŋ nɩɩyɩ. Ko-ɖoo kalɩɣ-kɛ mayaɣ ŋga ɛñɩnɩɣ se kɔɖɔkɩ ka-ñʋʋ taa yɔ nɛ ɛlɛlɩɣ tam sakɩyɛ; kɔɖɔkʋʋ-kɛ lɛ, ɛsɔzɩ-kɛ mayaɣ lɛɛka. Pʋwayɩ lɛ, masɩ nzɩ piya ɖɔkɩ sɩ-ñʋʋ taa yɔ, pamaɣ-sɩ takayaɣ nakɛyɛ yɔɔ nɛ pɛcɛlɩ-sɩ. Mbʋ palakaɣ nɛ pasɩɣnɩ-sɩ nɛ sɩpaɣzɩɣ tɔm kalʋʋ; nɛ sɩpaɣlɩɣ lɛ, sɩpɩzɩɣ nɛ siwolo pɩ-yɔɔ sɩkpɛlɩkɩɣ pɛ-Ɛsɔ sɛtʋ taa tɔm lɛɛtʋ pɩtɩŋnɩ Kɩbaɣlʋ paɣtʋ kalʋʋ nɛ tɩ-yɔɔ maɣzʋʋ yɔɔ.»
8 Pɩwɩlɩɣ se nʋmɔʋ sɔsɔʋ ŋgʋ kɩ-yɔɔ patɩŋaɣnaɣ nɛ pafalɩsɩɣ piya yɔ lɛ se pasɩnɩ-sɩ nɛ sɩɖɔkɩ tɔm sɩ-ñʋʋ taa. Tɔm ndʋ sɩkpɛlɩkaɣ Yehowa paɣtʋ nɛ ɛzɩma ɛcɔŋnaɣ ɛ-samaɣ yɔɔ yɔ pɩɩwɛɛ se titukuni sɩ-laŋa. (Wayɩ Wayɩ Paɣtʋ 6:6, 7) Pɩɩpɔzaa se pɛwɛɛ pamaɣzɩɣ tɩ-yɔɔ. (Keɣa 77:11, 12) Patɩŋaɣnɩ nʋmɔŋ ndɩ ndɩ yɔɔ se pɩsa nɛ pasɩnɩ piya nɛ sɔsaa nɛ pɔɖɔkɩ tɔm pa-ñʋʋ taa. Palakaɣnɩ tʋmɩyɛ tɔm maʋ masɩ nzɩ payaɣ fransɩɩ taa se acrostiches yɔ. Kɩɖaŋ nɩɩyɩ wɛ keɣsi taa; pʋ-tɔbʋʋ se pama masɩ nɛ sɩtɩŋ ɖama wayɩ nɛ paa mayaɣ ŋga lɛ kapaɣzɩɣnɩ tɔm maʋ mayaɣ ŋga kɛwɛ ndɩ yɔ, nɛ pɔcɔlɩ-sɩ ɛzɩ pɔcɔlʋʋ tɔm maʋ masɩ yɔ (cɔnɩ Aduwa 31:10-31). Palabɩnɩ tʋmɩyɛ ɖɔɖɔ allitération (pʋ-tɔbʋʋ se tɔm pee wena apaɣzɩɣnɩ tɔm maʋ mayaɣ kʋɖʋmaɣ yaa a-tɛ wiu (son) kɛ kʋɖʋmʋm yɔ). Nɛ palakaɣnɩ tʋmɩyɛ ɖɔɖɔ tɔm kalʋʋ masɩ, ɛzɩ ɖɩnaʋ Aduwa ñʋʋ 30 tɛ hɔɔlʋʋ naalɛ ñɩŋgʋ taa yɔ. Pɩwɛ ɖeu se ɖɩyʋsɩ se fenasɩ takayaɣ ŋga payaɣ se Guézer yɔ, kɛkɛ ɛzɩma pamaɣaɣ tɔm Ebree kʋnʋŋ taa caanaʋ taa yɔ pɩ-tɛ kɩɖaʋ nakʋyʋ; nɛ ñɩnɩyaa nabɛyɛ maɣzɩɣ se kɛkɛ takayaɣ ŋga kɔ-yɔɔ sukulibɩɣa tɩŋaɣna nɛ kɛkpɛlɩkɩɣ ɛzɩma kɔɖɔkɩ tɔm ka-ñʋʋ taa yɔ.
22-28 SEPTEMBRE
ÑƖM MBƲ PƖWƐ ƐSƆTƆM TAA YƆ EKLEZƖYASƖTƖ 1-2
Iwolo pɩ-yɔɔ nɛ ɩfalɩsɩɣ kpaɖʋʋ ŋgʋ kɩkɔŋ yɔ
«Ðʋzɩ-tʋ abalaa siɣsiɣ tɩnaa nesi tɛɛ»
3 Ða-taa sakɩyɛ sɔɔlɩ tʋma wena palakɩ yɔ, nɛ pe-liu wɛɛ se pɛwɛɛ a-labʋ yɔɔ mbʋ tam. Ɛlɛ pɩlabɩ pʋtɔdɩyɛ se alɩwaatʋ ndʋ ɛyaa kpadɩyɩɣ yɔ, paatasɩɣ pɩzʋʋ nɛ palakɩ mbʋ palakaɣ pe-evebitu taa yɔ. (Ekl. 1:4) Ða-alɩwaatʋ tʋnɛ tɩ-taa, wɛtʋ ndʋ tɩkɔŋnɩ Yehowa sɛyaa sakɩyɛ kaɖɛ. Yehowa ɛgbɛyɛ wɛɛ nɛ ɖiwokini ɛzɩdaa nɛ ɖɩlakɩnɩ tʋmɩyɛ wondu kɩfatʋ se laŋhɛzɩyɛ tɔm ɛtalɩ ɛyaa kpeekpe. Ɛlɛ nabʋyʋ taa, pɩwɛ koobiya mba pakpadɩyaa yɔ kaɖɛ se pɛkpɛlɩkɩ nɛ patɩlɩ ɛzɩma palabɩnɩ wondu kɩfatʋ tʋmɩyɛ yɔ. (Luka 5:39) Pɩtasɩ lɛ, koobiya evebiya wɛnɩ ɖoŋ nɛ pɩkɩlɩ koobiya akpadɩyaa. (Adu. 20: 29) Pʋyɔɔ lɛ, pɩkɛnɩ lɩmaɣzɩyɛ kɩbanɖɛ se koobiya akpadɩyaa ɩfalɩsɩ koobiya mba pɛwɛnɩ po-ɖoŋ yɔ nɛ papɩzɩ pala tʋma sɔsɔna ɛgbɛyɛ taa.—Kalɩ Keɣa 71:18.
4 Nabʋyʋ taa, mba pɛwɛnɩ wala yɔ, pɩfɛyɩ-wɛ kɛlɛʋ se pafalɩsɩ evebiya nɛ pɛcɛlɩ-wɛ tʋma wena palakaɣ yɔ. Nabɛyɛ lɛ, sɔɔndʋ kpaɣ-wɛ se pɩtaala nɛ pelesi tʋma wena pɔsɔɔlɩ labʋ yɔ. Lalaa lɛ, sɔɔndʋ kpaɣ-wɛ se ye peyebini evebiya pa-tʋma yɔ, paapɩzɩɣ nɛ palabɩ-yɛ ɛzɩ pɩpɔzʋʋ yɔ. Pɩtasɩ lɛ, nabɛyɛ pɩzɩɣ nɛ pamaɣzɩ se pɛfɛyɩnɩ alɩwaatʋ se pafalɩsɩ lalaa. Ɛlɛ ye mba pɛwɛnɩ po-ɖoŋ yɔ, pamaɣzɩɣ se paahaɣ-wɛ wala lɛɛ lɛɛ ɛgbɛyɛ taa yɔ, pɩwɛɛ se pɛwɛɛnɩ suuɖu.
Fezuu taa ñɩm
it «Eklezɩyasɩtɩ» § 1
Eklezɩyasɩtɩ
Ebree hɩɖɛ Qohèlèth tɔbʋʋ lɛ se «Kpeɣliyu; Weyi ɛyaɣ ɛyaa kedizaɣ yɔ»; nɛ hɩɖɛ nɖɩ ɖɩmʋnɩ tʋmɩyɛ nɖɩ Izrayɛɛlɩ Wiyaʋ lakaɣ kewiyitu ɖʋtʋ ndʋ Yehowa laba yɔ tɩ-taa. (Ekl 1:1, 12) Wiyaʋ tʋmɩyɛ pɩɩkɛnaa se ɛsɩnɩ Ɛsɔ samaɣ nɛ kɛwɛɛ nɔɔ kʋɖʋmaɣ taa nɛ kɔɖɔkɩ ke-siɣsiɣ wɛtʋ Yehowa weyi ɛkɛ ke-Wiyaʋ toovenim taa yɔ ɛ-ɛsɩndaa. (1Aw 8:1-5, 41-43, 66) Pʋyɔɔ lɛ, ye wiyaʋ nɔɔyʋ eɖiyiɣ Izrayɛɛlɩ ɛjaɖɛ camɩyɛ nɛ samaɣ sɛɣ Yehowa camɩyɛ yɔ pɔtɔŋaɣ se ɛkɛ wiyaʋ kɩbanʋ ɛlɛ ye ɛɛlakɩ mbʋ yɔ pɔtɔŋaɣ se ɛkɛ wiyaʋ kɩdɛkɛdʋ. (2Aw 16:1-4; 18:1-6) Kpeɣliyu Salomɔɔ kaakpeɣli Izrayɛɛlɩ mba, pa-taabalaa, nɛ mba pɛkɛ agɔma Izrayɛɛlɩ ɛjaɖɛ taa yɔ tam sakɩyɛ templo taa. Eklezɩyasɩtɩ takayaɣ taa, Salomɔɔ ñaɣ pana se eposi Ɛsɔ samaɣ taa mba nɛ ɛjaɖɛ ɖɩnɛ ɖɩ-yɔɔ tʋma wena aawazɩɣ pʋyʋ yɔ, nɛ eseɣti-wɛ se pala tʋma wena akɛdɩɣnɩ pɛ-Ɛsɔ weyi paha-ɩ pa-tɩ yɔ. Grɛɛkɩ kʋnʋŋ taa Bibl ŋgʋ payaɣ se Septante yɔ kɩ-taa, pɛɖɛzɩ hɩɖɛ Qohèlèth se Ékklêsiastês (Eklezɩyasɩtɩ), nɛ nɖɩ palabɩnɩ tʋmɩyɛ Kabɩyɛ Bibl taa; ɖɩ-tɔbʋʋ lɛ se «eklezɩya nakʋyʋ taa tʋ (ɛgbɛyɛ naɖɩyɛ taa tʋ; samaɣ nakɛyɛ taa tʋ)».
29 SEPTEMBRE–5 OCTOBRE
ÑƖM MBƲ PƖWƐ ƐSƆTƆM TAA YƆ EKLEZƖYASƖTƖ 3-4
Cɛyɩsɩ ñe-nesi ɖɔkʋʋ
ijwhf tɔm ñʋʋ 10 § 2-8
Sɩɩ elɛkɩtroniiki wondu ti-lone taa
● Ye ɖɩlakɩnɩ tʋmɩyɛ camɩyɛ elɛkɩtroniiki wondu yɔ pɩpɩzɩɣ nɛ pɩwazɩ ɖe-nesi ɖɔkʋʋ. Kɩɖaʋ nakʋyʋ yɔ. Nesi ɖɔkɩyaa nabɛyɛ lakɩnɩ-tʋ tʋmɩyɛ nɛ pɔyɔɔdʋʋnɩ ɖama alɩwaatʋ ndʋ pɛfɛyɩ ɖama cɔlɔ.
«Paa tɔm pazɩ yem ŋma ñɛ-tɛŋga se “mɔnsɔɔlɩ-ŋ” yaa “mamaɣzɩɣ ñɔ-yɔɔ” yɔ piyeki nɛ mɩ-hɛkʋ taa cɛyɩsɩ nɛ pɩkɩlɩ.»—Jonathan.
● Ye ɖɩɩlakɩnɩ tʋmɩyɛ camɩyɛ elɛkɩtroniiki wondu yɔ pɩpɩzɩɣ nɛ pɩcamɩ ɖe-nesi ɖɔkʋʋ. Kɩɖaʋ nakʋyʋ yɔ. Nabɛyɛ lakɩnɩ tʋmɩyɛ elɛkɩtroniiki wondu tam, piyeki nɛ alɩwaatʋ ndʋ pɩwɛɛ se ɛyʋ ɛkpaɣ nɛ ɛ nɛ ɛ-tɛŋga pacaɣ yɔ tɩpasɩɣ, nɛ ɛɛtasɩɣ kemnuu ɛ-tɛŋga ɖɔɖɔ camɩyɛ.
«Maapɩtɩɣ se nabʋyʋ taa ye mantaañɔʋnɩ mɔn-pɔrtaabɩlɩ yɔ, ma-walʋ kaasɔɔlaa se ɛyɔɔdɩnɩ-m nɛ pɩkɩlɩ.»—Julissa.
● Nabɛyɛ yɔɔdʋʋ se pa nɛ pɛ-tɛŋga papɩzɩɣ nɛ palakɩ kɛdaɣ camɩyɛ nɛ alɩwaatʋ kʋɖʋmtʋ ndʋ tɩ-taa lɛ pɛwɛɛ nɛ palakɩnɩ tʋmɩyɛ pɛ-tɛ elɛkɩtroniiki wonuu. Lɔŋsɩnɖʋ Sherry Turkle yɔɔdaa se mbʋ payaɣ se «tʋma sakɩyɛ labʋ alɩwaatʋ kʋɖʋmtʋ taa.» Toovenim taa lɛ, tʋma sakɩyɛ labʋ alɩwaatʋ kʋɖʋmtʋ taa tɩkɛ wɛtʋ kɩbandʋ. Ɛyɔɔdaa se toovenim taa lɛ, «ye ɖɩlakɩ tʋma sakɩyɛ alɩwaatʋ kʋɖʋmtʋ taa yɔ ɖɩɩpɩzɩɣ nɛ ɖɩlabɩ-yɛ camɩyɛ.»
«Alɩwaatʋ ndʋ ma nɛ ma-walʋ ɖɩkɛdɩɣ yɔ pɩwɛ ɖeu kpem; ɛlɛ ye ɛwɛɛ nɛ ɛlakɩ tʋmɩyɛ lɛɛɖɛ alɩwaatʋ ndʋ ɖiɖiɣni kɛdʋʋ yɔ pɩɩwɛɣ ɖeu mbʋ. Ye ɛwɛɛ nɛ ɛlakɩ pʋyʋ lɛɛbʋ alɩwaatʋ kʋɖʋmtʋ ndʋ tɩ-taa yɔ manɩɣ pɩ-taa se ɛ-tɛ pɔrtaabɩlɩ tɔm kɩlɩnɩ cɛyʋʋ ɛ-ɛsɩndaa.»—Sarah.
Tobi lɛ: Ɛzɩma ŋlakɩnɩ tʋmɩyɛ elɛkɩtroniiki wondu yɔ pɩpɩzɩɣ nɛ pɩcɛyɩsɩ yaa pɩcamɩ ñe-nesi ɖɔkʋʋ.
Iyele nɛ «Ɛsɔ miŋ nzʋlʋma» wɛɛ mʋʋ yɔɔ
12 Ɛzɩma nesi ɖɔkɩyaa pɩzɩɣ nɛ pamaɣzɩnɩ Akiila nɛ Prisiili? Maɣzɩ nɛ ŋna tʋma sakɩyɛ wena pɩpɔzʋʋ se ña nɛ ñɛ-tɛŋga ɩkpɛndɩɣ nɛ ɩlakɩ yɔ. Mbʋ ɛzɩ ñe-ɖeke ŋŋlabɩ tʋma ana lɛ, ña nɛ ñɛ-tɛŋga ɩpɩzɩɣ nɛ ɩkpɛndɩ nɛ ɩlakɩ a-taa naayɛ. Akiila nɛ Prisiili pɛkpɛndaɣ nɛ posusuu tɔm. Ðoŋ ɖoŋ lɛ, mɩ ɖɔɖɔ ɩlakɩ ɖʋtʋ nɛ ɩkpɛndɩɣ nɛ isusuu tɔm na? Akiila nɛ Prisiili pɛkpɛndaɣ ɖɔɖɔ nɛ palakɩ tʋmɩyɛ. Pɩtɩla ña nɛ ñɛ-tɛŋga ɩɩlakɩ tomnaɣ yɔɔ tʋmɩyɛ kʋɖʋmɖɩyɛ, ɛlɛ ɛzɩ ɩkpɛndɩɣ nɛ ɩlakɩ ɖɩɣa tʋma na? (Ekl. 4:9) Alɩwaatʋ ndʋ ɩsɩɣnɩ ɖama nɛ ɩla tʋmɩyɛ naɖɩyɛ yɔ, piyeki nɛ ɩwɛɛ nɔɔ kʋɖʋmaɣ taa nɛ pɩkɩlɩ, nɛ pɩhaɣ-mɩ waɖɛ se ɩla kɛdaɣ. Robert nɛ Linda pɔɖɔkʋʋ nesi yɔ pɩcɛzɩɣ pɩnzɩ 50. Robert yɔɔdaa se: «Toovenim taa lɛ ɖiihikiɣ alɩwaatʋ sakɩyɛ se ɖɩkpɛndɩ nɛ ɖɩmʋ helim. Ɛlɛ alɩwaatʋ ndʋ mañalɩɣ ñanzɩ nɛ ma-halʋ mɛlɩɣ-sɩ yaa alɩwaatʋ ndʋ mɔñɔɔzʋʋ kaɖaɣ taa nɛ ɛkɔŋ mɔn-cɔlɔ se ɖɩkpɛndɩ nɛ ɖɩla tʋmɩyɛ yɔ, man-taa lakɩ leleŋ siŋŋ. Ðɩkpɛndɩɣ nɛ ɖɩlakɩ tʋma ana lɛ, piyeki nɛ ɖɩñɔtʋʋnɩ ɖama. Ðɔ-sɔɔlɩm wɛɛ nɛ pɩpaɣlɩɣ.»
13 Ɛlɛ, ɩtɔzɩ se ye halʋ nɛ ɛ-walʋ pakpakɩɣ alɩwaatʋ nɛ pacakɩ ɖama cɔlɔ yɔ, pɩɩwɩlɩɣ se paa pɩɩla ɛzɩma yɔ pakaɣ ñɔtɩnʋʋ ɖama. Breeziili ɛjaɖɛ taa halʋ nɔɔyʋ yɔɔdaa se: «Sɔnɔ pɩɖɔkʋʋnɩ-ɖʋ siŋŋ nɛ pʋyɔɔ lɛ, pɩwɛ kɛlɛʋ se ɖɩmaɣzɩ se ɖɩkpakɩɣ alɩwaatʋ nɛ ɖɩcakɩ ɖama cɔlɔ mbʋ pʋyɔɔ yɔ ɖɩwɛ ɖɩɣa kʋɖʋmaɣ taa. Menɖiɣzinaa se pɩtasɩna se pɩpɔzʋʋ se mankpakɩɣ alɩwaatʋ nɛ ma nɛ ma-walʋ ɖɩcakɩ lɛ, pɩpɔzʋʋ se mala nabʋyʋ ɖɔɖɔ. Pɩpɔzʋʋ ɖɔɖɔ se menkemsini mɛn-tɛŋga ɛzɩ pɩpɔzʋʋ yɔ.» Na ɛzɩma Bruno nɛ ɛ-halʋ Tays palakɩ se pɩsa nɛ pekemsini ɖama yɔ. Bruno yɔɔdaa se: «Alɩwaatʋ ndʋ ɖɩkpakɩɣ se ɖɩcaɣ ɖama cɔlɔ yɔ tɩ-taa, ɖɩkɛzɩɣ ɖɔ-pɔrtaabɩlɩwaa hɔɔlʋʋ nɛ ɖɩkpɛndɩɣ nɛ ɖɩnɩɣ leleŋ alɩwaatʋ ndʋ tɩ-taa.»
14 Ɛlɛ, ye alɩwaatʋ ndʋ ña nɛ ñɛ-tɛŋga ɩkpakɩɣ nɛ ɩcakɩ ɖama cɔlɔ yɔ tɩɩkɛdɩɣnɩ-mɩ yɔ, ɛbɛ pɩpɔzʋʋ se ɩla? Pɩtɩla mɩ-naalɛ ɩtɩsɔɔlɩ pʋyʋ kʋɖʋm, yaa pɩtɩla ɩɖʋʋ ɖama ɖɩwɩzɩyɛ. Ɛbɛ ɩpɩzɩɣ nɛ ɩla? Maɣzɩ miŋ kɩɖaʋ ŋgʋ kɩ-tɔm ɖɩyɔɔdaa nɛ pɩɖɛɛ yɔ kɩ-yɔɔ nɛ ŋna. Pacalɩɣ ɖʋʋ miŋ ɛnɩ lɛ, ɛɛpɩsɩɣ miŋ sɔsɔŋ kpaagbaa. Pɩpɔzʋʋ se pɛwɛɛ nɛ paɖʋʋ ɖasɩ sɔsɔsɩ miŋ ɛnɩ ɛ-taa. Pɩɩwɛɣ ɖeu se mɩ ɖɔɖɔ ɩpaɣzɩ kpaɣʋ alɩwaatʋ pazɩ paa evemiye nɖɩ nɛ ɩcakɩ ɖama cɔlɔ? Ɩlɩzɩ se ɩlakɩ mbʋ mɩ-naalɛ ɩsɔɔlaa yɔ, pɩtaakɛ mbʋ pɩkɔŋnɩ ɖama kɩɩnɩnʋʋ yɔ. (Yak. 3:18) Ye ɩpaɣzɩ labʋ mbʋ pazɩ pazɩ yɔ, sɔɔlɩm mbʋ ɩwɛnɩ ɖama yɔɔ yɔ, pɩpɩzɩɣ nɛ pɩɖaɣnɩ paɣlʋʋ.
Iyele nɛ «Yah miŋ nzʋlʋma» wɛɛ mʋʋ yɔɔ
3 Pɩsa nɛ halʋ nɛ ɛ-walʋ peyele nɛ «Yah miŋ nzʋlʋma» wɛɛ mʋʋ yɔɔ lɛ, pɩpɔzʋʋ se pa-taa paa weyi lɛ ɛñaɣ pana nɛ ɛcɛyɩsɩ ɛ nɛ Yehowa pɛ-hɛkʋ taa taabalɩyɛ. Ɛzɩma taabalɩyɛ nɖɩ ɖɩsɩɣnɩ-wɛ pe-nesi ɖɔkʋʋ taa? Taabalɩyɛ nɖɩ ɖɩwɛ nesi ɖɔkɩyaa nɛ pa-Caa weyi ɛwɛ ɛsɔdaa yɔ pɛ-hɛkʋ taa yɔ, ye ɖɩmʋ ñɩm pɛ-ɛsɩndaa yɔ petisiɣ faaa se pɔɖɔ ɛ-lɔŋ tasʋʋ yɔɔ. Nɛ lɔŋ tasʋʋ mbʋ, pɩsɩɣnɩ-wɛ se pɛfɛɛ yaa palʋbɩnɩ kala wena apɩzɩɣ ayele nɛ pɛ-hɛkʋ taa sɔɔlɩm hɛɛ yɔ. (Kalɩ Eklezɩyastɩ 4:12.) Ɛyaa mba papɩ fezuu taa yɔ, pañakɩ pana ɖɔɖɔ se pamaɣzɩnɩ Yehowa nɛ pɛwɛɛnɩ ɛ-wɛtʋ kɩbandʋ. Tɩ-taa natʋyʋ lɛ camɩyɛ lakasɩ, suuɖu nɛ kpaɣʋ nɛ kpeɣu. (Efɛz. 4:32–5:1) Ye nesi ɖɔkɩyaa ɩlɩzɩɣ wɛtʋ ndʋ nɛ pawɩlɩɣ ɖama yɔ, pɩwɛɣ-wɛ kɛlɛʋ se sɔɔlɩm mbʋ pɩwɛ pɛ-hɛkʋ taa yɔ pɩpaɣlɩ. Payaɣ koobu halɩñɩnʋ nɔɔyʋ se Lena; ɛɖɔkʋʋ nesi yɔ pɩcɛzɩɣ pɩnzɩ 25. Ɛyɔɔdaa se: «Ɛyʋ weyi ɛpɩ fezuu taa yɔ, pɩwɛ kɛlɛʋ se pɔsɔɔlɩ-ɩ nɛ pañamɩ-ɩ.»
Fezuu taa ñɩm
it «Sɔɔlɩm» § 39
Sɔɔlɩm
«Sɔɔlɩm alɩwaatʋ wɛɛ.» Mba Yehowa maɣzɩɣ se patɩmʋna se ɛwɩlɩ-wɛ sɔɔlɩm yaa palakɩ lakasɩ kɩdɛkɛdɩsɩ yɔ mba ɛɛtasɩɣ wɩlʋʋ sɔɔlɩm. Ɛsɔ wɩlɩɣ sɔɔlɩm ɛyaa kpeekpe pɩkɔɔ pɩtalɩ alɩwaatʋ ndʋ pawɩlɩɣ se papaɖɩɣ-ɩ yɔ. Ye papaɖɩɣ-ɩ yɔ eyeki-wɛ sɔɔlʋʋ. Ɛsɔ Yehowa nɛ Yesu pɔsɔɔlɩ siɣsiɣ wɛtʋ nɛ papaɖɩɣ paɣtʋ yɔɔ maʋ. (Ke 45:7; Ebr 1:9) Mba papaɖɩɣ Ɛsɔ toovenim tʋ siŋŋ yɔ patɩmʋna se pawɩlɩ-wɛ sɔɔlɩm. Toovenim taa lɛ paa ɖɩwɩlɩɣ sɔɔlɩm ɛyaa mba yɔ pɩɩwazɩɣ pʋyʋ, mbʋ pʋyɔɔ yɔ paa Ɛsɔ ɛwɩlɩ-wɛ sɔɔlɩm yɔ paakaɣ labʋ mbʋ pɩwɛ ɖeu yɔ. (Ke 139:21, 22; Iza 26:10) Pʋyɔɔ lɛ pɩmʋnɩ mbʋ se Ɛsɔ paɖɩɣ-wɛ nɛ alɩwaatʋ ndʋ ɛɖʋwa yɔ tɩtalɩɣ lɛ ɛkaɣ pa-nɩŋgbaaŋ hɔm.—Ke 21:8, 9; Ekl 3:1, 8.
6-12 OCTOBRE
ÑƖM MBƲ PƖWƐ ƐSƆTƆM TAA YƆ EKLEZƖYASƖTƖ 5-6
Ɛzɩma ɖɩwɩlɩɣ se ɖɩñaŋ Ɛsɔ siŋŋ yɔ
w08 15/8 15-16 § 17-18
Ðɩtɩŋnɩ ñamtʋ yɔɔ nɛ ɖɩwɩlɩ se ɖɩɖʋʋ hɩɖɛ Yehowa
17 Alɩwaatʋ ndʋ ɖɩsɛɣ Yehowa yɔ pɩwɛɛ se ɖɩwɩlɩ se ɖɩwɛnɩ ñamtʋ siŋŋ ɛ-yɔɔ. Eklezɩyasɩtɩ 5:1 yɔɔdʋʋ se: «Alɩwaatʋ ndʋ payɩ ŋwoki Ɛsɔ toovenim tʋ ɖɩɣa taa yɔ, cɔnɩ ñɔ-ɖɔnɛ yɔɔ.» Alɩwaatʋ ndʋ Moyizi nɛ Yozuwee paasɩŋ lone kiɖeɖeye taa yɔ peheyi-wɛ se pɔhɔzɩ pa-naataŋgbala. (Ejl. 3:5; Yoz. 5:15) Pɩɩwɛɛ se pala mbʋ nɛ pawɩlɩ se pɛwɛnɩ ñamtʋ yaa Ɛsɔ sɔɔndʋ seu. Pɩɩkɛnɩ kɩjɛyʋʋ Izrayɛɛlɩ cɔjɔnaa se posuu «pɩsatʋ cokodonaa nɛ pohuuzi pa-ndaakpeɖe yɔɔ.» (Ejl. 28:42, 43) Piyekaɣ se pataana pa-ndaakpeɖe alɩwaatʋ ndʋ palakɩ tʋmɩyɛ altaaru yɔɔ yɔ. Pɩɩwɛɛ se paa cɔjɔ hɔʋ taa tʋ weyi lɛ ɛɖɔ paɣtʋ ndʋ Ɛsɔ ɖʋwa nɛ titukuuni ñamtʋ wɛnʋʋ Ɛsɔ sɛtʋ yɔɔ yɔ tɩ-yɔɔ.
18 Ye mbʋ, ñamtʋ wɛnʋʋ Ɛsɔ sɛtʋ yɔɔ pɔzʋʋ se ɖɩɖʋ Ɛsɔ hɩɖɛ nɛ ɖɩñamɩ-ɩ. Pɩsa nɛ ɖɩmʋna se paɖʋ-ɖʋ hɩɖɛ nɛ pañam-ɖʋ lɛ pɩpɔzʋʋ se ɖɩwɛɛnɩ ñamtʋ ɖa-lakasɩ taa. Ñamtʋ ndʋ pɩpɔzʋʋ se ɖɩwɩlɩ yɔ pɩfɛyɩ se tɩkɛ ndʋ tɩnaɣ ɛsa yɔɔ yem yɔ. Pɩwɛɛ se pɩcɛzɩ mbʋ ɛyʋ ɛsa naɣ yɔ; pɩkɛ mbʋ Yehowa naɣ yɔ, pʋ-tɔbʋʋ se mbʋ pɩwɛ ɖa-laŋɩyɛ taa yɔ. (1 Sam. 16:7; Adu. 21:2) Pɩwɛɛ se ñamtʋ ɛpɩsɩ ɖɛ-ɛyʋtʋ hɔɔlʋʋ nakʋyʋ nɛ tɩwɛɛnɩ ɖoŋ ɖa-lakasɩ, ɖɛ-wɛtʋ, wɛtʋ ndʋ ɖɩwɛnɩ ɛyaa lalaa yɔɔ yɔ, halɩ pɩkpɛndɩnɩ ɛzɩma ɖɩnaɣ ɖa-tɩ nɛ lɩmaɣza wena ɖɩwɛnɩ ɖa-tɩ yɔɔ yɔ a-yɔɔ. Toovenim taa lɛ, pɩpɔzʋʋ se paa ɛzɩmtaa lɛ pana ñamtʋ tɔm ndʋ payɩ ɖɩyɔɔdʋʋ nɛ mbʋ ɖɩlakɩ yɔ pɩ-taa. Ðɔ-ɖɔnɛ, ɖa-lakasɩ, nɛ ɖo-wondu suu nɛ ɖa-tɩ ñɔɔzʋʋ hɔɔlʋʋ taa lɛ, ɖɩɖɔŋ apostoloo Pɔɔlɩ tɔm tʋnɛ tɩ-yɔɔ: «Ðiiyeki se pituuli nɔɔyʋ hɔɔlʋʋ nakʋyʋ taa, se pataana kɩwɛɛkɩtʋ natʋyʋ ɖɛ-Ɛsɔ sɛtʋ tʋmɩyɛ yɔɔ.» (2 Kɔr. 6:3, 4) ‘Ðɩcanɩɣ ɖa-Ñʋʋ Yaɖʋ Ɛsɔ wɩlɩtʋ paa hɔɔlʋʋ ŋgʋ lɛ kɩ-taa.’—Tiiti 2:10.
w09 15/11 11 § 21
Tɩŋnɩ Bibl kpɛlɩkʋʋ yɔɔ nɛ ŋyele nɛ ña-adɩma wɛɛ ɖeu nɛ pɩkɩlɩ
21 Yesu tɩmaɣnɩ ñamtʋ nɛ tisuu siŋŋ. Kɩɖaʋ nakʋyʋ yɔ. Pʋcɔ nɛ efezi Lazaarɩ lɛ «Yesu kpazɩ ɛ-ɛsa nɛ ɛsɔdaa nɛ ɛtɔ se: “Caa, mɛnsɛɣ-ŋ se ŋwelisini-m. Toovenim taa lɛ, manawa se paa ɛzɩmtaa lɛ ŋwelisiɣni-m.”» (Yoh. 11:41, 42) Ña-adɩma wɩlɩɣ se ŋwɛnɩ ñamtʋ nɛ tisuu mbʋ pɩ-ɖɔndɩ? Tazɩ kɩɖaʋ adɩma wena Yesu labɩnɩ ñamtʋ yɔ a-taa, nɛ ŋkaɣ naʋ se a-taa Yesu kam ñʋʋ nɛ Yehowa hɩɖɛ yɔɔ ñalʋʋ, e-Kewiyaɣ kɔmtʋ nɛ ɛ-sɔɔlɩm labʋ. (Mat. 6:9, 10) Maɣzɩ ña-maɣmaɣ ña-adɩma yɔɔ. Ɛzɩ awɩlɩɣ se Yehowa Kewiyaɣ, ɛ-sɔɔlɩm labʋ, nɛ ɛ-hɩɖɛ kiɖeɖeye yɔɔ ñalʋʋ mʋ ñɩm siŋŋ ñɛ-ɛsɩndaa? Pɩwɛɛ se awɩlɩ mbʋ.
«Ðuutu ndʋ ŋɖuwaa yɔ, ɖɔ tɩ-yɔɔ»
12 Ðɩtaasɔɔ se evemiye nɖɩ pamɩyɩsɩ-ɖʋ lɩm yɔ, ɖɩpaɣzɩ Ɛsɔ tʋmɩyɛ labʋ kɩpaɣzʋ. Pʋwayɩ lɛ, pɩpɔzʋʋ se ɖiwolo pɩ-yɔɔ nɛ ɖe-wezuu caɣʋ lakɩ nɔɔ kʋyʋmaɣ nɛ ɖo-ɖuutu ndʋ ɖɩlaba se ɖɩlakɩ ɛ-tʋmɩyɛ nɛ ɖa-laŋɩyɛ pilim yɔ. Pʋyɔɔ lɛ, pɩwɛɛ se ɖɩpɔzɩ ɖa-tɩ se: «Kpaɣnɩ alɩwaatʋ ndʋ pamɩyɩsɩ-m lɩm yɔ, mɛwɛɛ nɛ mɛnɖɛɣnɩ ɛsɩndaa fezuu taa? Mɛwɛɛ nɛ mɛnsɛɣ Yehowa nɛ man-laŋɩyɛ pilim? (Kol. 3:23) Mantɩmɩɣ, mankalɩɣ Bibl, mowoki kediɣzisi nɛ malakɩ mon-ɖoŋ ɖeɖe tɔm susuu tʋmɩyɛ taa? Yaa mɛwɛɛ nɛ malakɩ feendu hɔɔlɩŋ ɩnɛ ɩ-taa nɩɩyɩ taa?» Apostoloo Pɩyɛɛrɩ yɔɔdaa se ye ɖɩsɔɔlaa se ɖɩwɛɛ kpekpeka Ɛsɔ sɛtʋ tʋmɩyɛ taa yɔ, pɩwɛɛ se ɖɩsɔzɩ ɖe-tisuu yɔɔ sɩmtʋ nɛ tɩ ɖɔkʋʋ nɛ Ɛsɔ ñamtʋ.—Kalɩ 2 Pɩyɛɛrɩ 1:5-8.
Fezuu taa ñɩm
Tɔm ndʋ ɖa-takayɩsɩ kalɩyaa pɔzʋʋ yɔ
Eklezɩyasɩtɩ 5:8 yɔɔdʋʋ wiyaʋ nɔɔyʋ tɔm se ɛnazɩɣ tanɩm tɩnaa nɛ ɛlakɩ-wɛ mbʋ pɩfɛyɩ siɣsiɣ yɔ. Wiyaʋ ɛnʋ, pɩwɛɛ se ɛtɔzɩ se pɩtʋʋ fɛyɩ se nɔɔyʋ wɛɛ nɛ ɛcɔŋnɩ-ɩ, nɛ ɛlɛ wɛnɩ lone nɖɩ ɖɩkpaɖɩ ɛ-ñɩnɖɛ yɔ komina taa. Nɛ pɩtɩla, lalaa wɛnɩ lona wena akpaɖaa yɔ. Pɩlabɩ pʋtɔdɩyɛ se ɛyaa kominawaa taa lɛ, awiya tɩŋa pɩzɩɣ nɛ akɛ muluyaa, nɛ a-mulum lakasɩ nzɩ siyeki nɛ ɛyaa tɔkɩ kʋñɔŋ.
Ɛlɛ, halɩ alɩwaatʋ ndʋ pɩwɛ ɛzɩ lidaʋ nakʋyʋ fɛyɩ paa ññɩɩ yɔ, ye ɖɩnawa se Yehowa wɛɛ nɛ ɛcɔŋnɩ ɛyaa kominawaa taa ñɩma mba pɛkɛ sɔsaa yɔ, pɩpɩzɩɣ nɛ pɩhɛzɩ ɖa-laŋa. Ðɩpɩzɩɣ nɛ ɖɩpɔzɩ Ɛsɔ se ɛsɩnɩ-ɖʋ nɛ ɖɩsʋʋ-ɩ ɖa-sʋʋtʋ. (Keɣ. 55:22; Filp. 4:6, 7) Ðɩnawa se «Yehowa ɛsa wɛɛ nɛ acɔʋ tɛtʋ kpeekpe yɔɔ se ɛwɩlɩ e-ɖoŋ nɛ pɩwazɩ mba pɛsɛɣ-ɩ nɛ pa-laŋɩyɛ pilim yɔ nɛ ɛsɩnɩ-wɛ.»—2 Kro. 16:9.
Ye mbʋ, Eklezɩyasɩtɩ 5:8 tɔzʋʋ-ɖʋ wɛtʋ ndʋ tɩwɛ ɛyaa kominawaa taa yɔ tɩ-yɔɔ; ndʋ lɛ se paa ɛzɩmtaa lɛ, nɔɔyʋ wɛɛ nɛ ɛnʋ kpaɖɩnɩ ɖoŋ. Kɔzɩ kɔzɩ lɛ, mayaɣ ŋga kapɩzɩɣ nɛ kɔtɔzɩ-ɖʋ se Yehowa kpaɖɩna, ɛnʋ kɛnɩ Kɩlɩm. Lɛɛlɛɛyɔ, ɛwɛɛ nɛ ɛtɩŋɩɣnɩ ɛ-Pɩyalʋ Yesu Krɩstʋ weyi ɛkɛ Kewiyaɣ Wiyaʋ yɔ ɛ-yɔɔ nɛ ɛtɔkɩ kewiyitu. Kɩlɩm weyi ɛwɛɛ nɛ ɛcɔŋnɩ pɩtɩŋa payɩ yɔ, ɛwɛ siɣsiɣ hɔɔlɩŋ tɩŋa taa, nɛ mbʋ ɖɔɖɔ ɛ-Pɩyalʋ wɛɛ.
13-19 OCTOBRE
ÑƖM MBƲ PƖWƐ ƐSƆTƆM TAA YƆ EKLEZƖYASƖTƖ 7-8
“Wolo kʋñɔwiye ɖɩɣa taa”
it «Kʋñɔwiye» § 9
Kʋñɔwiye
Kʋñɔwiye alɩwaatʋ wɛɛ. Eklezɩyasɩtɩ 3:1, 4 yɔɔdʋʋ se: «Wiu alɩwaatʋ wɛɛ, nɛ woŋuu alɩwaatʋ wɛɛ; peenduu alɩwaatʋ wɛɛ, nɛ paʋ alɩwaatʋ wɛɛ.» Ɛzɩma ɛyaa tɩŋa sɩkɩ yɔ pʋyɔɔ lɛ, ɛyaa mba pɛwɛnɩ lɔŋsɩnɖɛ yɔ panawa se «kʋñɔwiye ɖɩɣa taa wobu» wɛ ɖeu nɛ pɩkɩlɩ kazandʋ ɖɩɣa taa wobu. (Ekl 7:2, 4; kpaɣ-tʋ nɛ ŋmaɣzɩnɩ Adu 14:13.) Pʋyɔɔ lɛ, mbʋ ɛzɩ lɔŋsɩnɖʋ kaawobi kazandʋ ɖɩɣa taa se ɛñɩnɩ leleŋ nɩʋ lɛ, ewoki sɩm ɖɩɣa taa nɛ ɛlakɩnɩ waɖɛ nɖɩ ɛwɛna yɔ tʋmɩyɛ nɛ ɛnɩɣ lalaa siziŋ nɛ ɛhɛzɩɣ pa-laŋa. Pɩsɩɣnɩ-ɩ nɛ ɛtɔzɩ se ɛ-maɣmaɣ ɛkaɣ sɩbʋ nɛ piyeki nɛ ɛwɛɛnɩ lɩmaɣza kɩbana ɛ-Lɩzɩyʋ yɔɔ.
Sɩnɩ lalaa nɛ palʋbɩnɩ nɩɣzɛ
15 William weyi elesi ɛ-halʋ pɩlakɩ pɩnzɩ cabɩ yɔ, ɛyɔɔdaa se: «Alɩwaatʋ ndʋ lalaa yɔɔdʋʋ ma-halʋ wɛtʋ kɩbandʋ tɔm yɔ, pɩkɛdɩɣnɩ-m; pɩwɩlɩɣ se ɛyaa kaasɔɔlɩ-ɩ nɛ pañaŋɩ-ɩ ɖɔɖɔ. Ɛzɩma patɩŋaɣnaɣ pɔ-tɔm tʋnɛ tɩ-yɔɔ nɛ paɖʋʋ-m nesi yɔ, pɩsɩɣaɣnɩ-m pɩdɩɩfɛyɩ. Pɩɩhɛzɩ ma-laŋɩyɛ siŋŋ mbʋ pʋyɔɔ yɔ, maasɔɔlɩ ma-halʋ tɔm pɩdɩɩfɛyɩ nɛ ɛwɛ ɛzɩ mɔ-hɔɔlʋʋ lɛɛkʋ yɔ.» Lelu weyi payaɣ se Bianca yɔ, ɛyɔɔdaa se: «Alɩwaatʋ ndʋ ma nɛ lalaa ɖɩkpɛndɩɣ nɛ ɖɩtɩmɩɣ nɛ ɖɩkalɩɣ mayaɣ paa kʋɖʋmaɣ yaa naalɛ yɔ, pɩhɛzaɣ ma-laŋɩyɛ. Alɩwaatʋ ndʋ ɛyaa yɔɔdʋʋ ma-walʋ yɔɔ tɔm yaa alɩwaatʋ ndʋ mɔyɔɔdʋʋ ɛ-yɔɔ tɔm nɛ pewelisiɣni-m yɔ, pɩsɩɣnɩ-m.»
«Mɩ nɛ mba pewiɣ yɔ, ɩkpɛndɩ iwii»
16 Taamaɣzɩ se ye ŋwobi weyi ɛwɛ laŋwɛɛkɩyɛ taa yɔ ɛ-cɔlɔ nɛ ña nɛ ɩ ɩtɩmɩ yaa ŋwɛ ñe-ɖeke nɛ ŋtɩmɩ ɛ-yɔɔ yɔ, adɩma ana afɛyɩ wazaɣ. Paa nabʋyʋ taa pɩwɛ-ŋ kaɖɛ se ŋyɔɔdɩ ña-lɩmaɣza kpayɩ kpayɩ kaɖɛ alɩwaatʋ ndʋ tɩ-taa yɔ, ña-laŋɩyɛ taa tɔm ndʋ ŋyɔɔdʋʋ adɩma taa nɛ ɛsɩtɛɣlɩm yɔ, tɩpɩzɩɣ nɛ tɩkpazɩ ɖoŋ weyi ɛwɛ laŋwɛɛkɩyɛ taa yɔ. Dalene tasɩ yɔɔdʋʋ se: «Nabʋyʋ taa koobiya kɔŋ se pakpazɩ-m ɖoŋ lɛ, mentendiɣ-wɛ se ɖɩla adɩma. Papaɣzɩɣ adɩma lɛ, pɩwɛ-wɛ kaɖɛ se pehiɣ tɔm pee wena amʋnaa yɔ, ɛlɛ pañakɩ pana nɛ pɔyɔɔdɩ tɔm pazɩ lɛ, pehikiɣ ɖoŋ nɛ pɔyɔɔdʋʋ ndʋ tɩwɛ ɖooo pa-laŋɩyɛ taa yɔ. Tisuu sɔsɔm mbʋ pɛwɛna, sɔɔlɩm mbʋ pɛwɛna, nɛ ɛzɩma pekeŋaɣni-m yɔ pɩkpazɩ men-tisuu ɖoŋ.»
«Mɩ nɛ mba pewiɣ yɔ, ɩkpɛndɩ iwii»
17 Ye nɔɔyʋ elesi ɛ-ɛyʋ kʋsɔɔlʋ nɔɔyʋ yɔ, wɛtʋ ndʋ tɩ-taa ɛwɛɣ nɛ alɩwaatʋ ɛzɩma ɛwɛɣ tɩ-taa yɔ, tɩpɩzɩɣ nɛ tɩwɛɛ ndɩ nɛ lɛlʋ ñɩndʋ. Pʋyɔɔ lɛ, pɩtasɩnɩ kɩyakʋ ŋgʋ asɛyʋʋ laba yɔ ki-wiye lɛ, pɩcɛyaa ɖɔɖɔ se ŋha ña-tɩ faaa nɛ ŋwolo pɩ-yɔɔ nɛ ŋkpazɩɣ weyi ɛwɛ laŋwɛɛkɩyɛ taa yɔ ɖoŋ, kɔzɩ kɔzɩ fenasɩ nzɩ sɩ-taa ɛyaa pɩsɩ pa-tʋma taa nɛ paatasɩɣ ɛ-cɔlɔ wobu yɔ. Bibl yɔɔdʋʋ se: «Taabalʋ kɩbanʋ wɩlɩɣ sɔɔlɩm paa ɛzɩmtaa, nɛ ɛkɛ koobu weyi palʋlɩ-ɩ se ɛsɩna kʋñɔŋ alɩwaatʋ taa yɔ.» (Adu. 17:17) Weyi elesi ɛ-ɛyʋ kʋsɔɔlʋ nɔɔyʋ yɔ, ɛpɩzɩɣ nɛ ehiɣ laŋɩyɛ hɛzʋʋ siŋŋ koobiya Krɩstʋ ñɩma cɔlɔ, paa alɩwaatʋ ɛzɩma ɛwɛɣ laŋwɛɛkɩyɛ taa yɔ.—Kalɩ 1 Tesalooniiki 3:7.
18 Tɔzɩ se weyi elesi ɛ-ɛyʋ kʋsɔɔlʋ nɔɔyʋ yɔ ɛpɩzɩɣ nɛ ɛtasɩ nɩʋ siziŋ alɩwaatʋ ndʋ ɛtɔzʋʋ avema naayɛ yɔɔ, ɛnɩɣ hendu natʋyʋ, ɛnaɣ foto nakʋyʋ, ɛlakɩ tʋma naayɛ, ɛnɩɣ nabʋyʋ sɔzɩŋ yaa nabʋyʋ taŋ; yaa pɩtalɩɣ pɩnaɣ taa alɩwaatʋ natʋyʋ lɛ. Weyi elesi ɛ-tɛŋga yɔ ɛpaɣzɩɣ tʋma naayɛ labʋ e-ɖeke, ɛzɩ alɩwaatʋ ndʋ ewoki kigbeɣliŋ yaa Yesu sɩm yɔɔ tɔzʋʋ sɔnzɩ ɖɩlaɖɛ mbʋ yɔ yɔ, ɛpɩzɩɣ nɛ ɛnɩɩ wɩzasɩ siŋŋ. Koobu abalɩñɩnʋ nɔɔyʋ kɛdaa se: «Ma-halʋ sɩm wayɩ, ɖe-nesi ɖɔkʋʋ evemiye yɔɔ tɔzʋʋ talaa lɛ, pɩtaawɛɛ kɛlɛʋ mbʋ pʋyɔɔ yɔ manawa se pɩpɩzɩɣ piyele nɛ manɖaɣnɩ nɩʋ siziŋ siŋŋ. Ɛlɛ koobiya nabɛyɛ labɩ ɖʋtʋ se ma nɛ man-taabalaa nabɛyɛ ɖɩmʋ helim pazɩ nɛ pɩsɩnɩ-m.»
19 Taasɔɔ kaaʋ se pɩpɔzʋʋ se ŋsɩnɩ mba pɛwɛ laŋwɛɛkɩyɛ taa yɔ paa ɛzɩmtaa; pɩtaasɩɩnɩ kɩyakɩŋ nɩɩyɩ taa ɖeke. Junia yɔɔdaa se: «Pɩtasɩnɩ avema wena a-yɔɔ pɩhaɣ waɖɛ ɛyaa sakɩyɛ se papɩzɩ nɛ pasɩnɩ-m lɛ, koobiya haɣaɣ pa-tɩ ɖoŋ ɖoŋ nɛ pasɩɣnɩ-m ɖɔɖɔ avema lɛɛna nɛ pɩkpazɩɣ-m ɖoŋ siŋŋ.» Toovenim taa lɛ, ɖɩɩpɩzɩɣ nɛ ɖɩhɛzɩ weyi elesi ɛ-ɛyʋ kʋsɔɔlʋ yɔ ɛ-wɩzasɩ tɩŋa yaa ɖɩɖɩɣ-sɩ kaʋ, ɛlɛ ye ɖɩñɩnɩɣ alɩwaatʋ nɛ ɖɩlakɩ mbʋ pɩpɩzɩɣ nɛ pɩhɛzɩ ɛ-laŋɩyɛ yɔ, ɖɩpɩzɩɣ nɛ ɖɩkpazɩ-ɩ ɖoŋ. (1 Yoh. 3:18) Gaby yɔɔdaa se: «Mɛnsɛɣ Yehowa se ɛtɩŋnɩ ɛgbɛyɛ taa ɛzʋtʋyaa mba pɛwɛnɩ sɔɔlɩm siŋŋ yɔ pɔ-yɔɔ nɛ ɛɖʋ-m nesi wɛtʋ kaɖɛ ñɩndʋ ndʋ tɩ-taa. Pɩtɩŋnɩ pɔ-yɔɔ lɛ, pɩɩwɛ ɛzɩ Yehowa mʋ-m atuu ɛ-nɔkɔyʋʋ taa yɔ.»
Fezuu taa ñɩm
«Pʋnɛ piyekina se ɛyaa tɩŋa ɩtɩlɩ se ɩkɛ mɔn-tɔmkpɛlɩkɩyaa»
18 Nabʋyʋ taa, ɖɩpɩzɩɣ nɛ ɖɩmaɣzɩ se pɩpɔzʋʋ se ɖɩñɔtɩnɩ ɖo-koobu Krɩstʋ tʋ weyi ɛɖʋ-ɖʋ ɖɩwɩzɩyɛ yɔ nɛ ɖɩyɔɔdɩnɩ-ɩ. Ɛlɛ kajalaɣ taa lɛ, pɩwɛɣ ɖeu se ɖɩpɔzɩ ɖa-tɩ tɔm ɛzɩ tʋnɛ yɔ: «Manɩ mbʋ pɩlaba yɔ pɩ-taa camɩyɛ na?» (Adu. 18:13) «Pɩpɩzɩɣ nɛ pɩla se koobu ɛnʋ ɛtɩɖʋ ɛ-taa faɖaɖa se ɛɖʋʋ-m ɖɩwɩzɩyɛ na?» (Ekl. 7:20) «Wiɖiyi pɩtɛm ma ɖɔɖɔ coɖuu mbʋ?» (Ekl. 7:21, 22) «Ye mɔñɔtɩnɩ ɛyʋ ɛnʋ se mɔyɔɔdʋʋnɩ-ɩ, ɛzɩ pɩkaɣ yebu nɛ tɔm tɛzɩ wɛɛkʋʋ kɩwɛɛkʋ na?» (Kalɩ Aduwa 26:20.) Ye ɖɩkpaɣ alɩwaatʋ nɛ ɖɩmaɣzɩ tɔm pɔzʋʋ mbʋ pɩ-yɔɔ yɔ, pɩpɩzɩɣ piyele nɛ ɖɩkɔ tɔm ñʋʋ se pɩwɛɛ se sɔɔlɩm mbʋ ɖɩwɛnɩ ɖo-koobu ɛnʋ ɛ-yɔɔ yɔ piseɣti-ɖʋ nɛ ɖɩsɔɔ mbʋ ɛlabɩ-ɖʋ yɔ pɩ-yɔɔ.
20-26 OCTOBRE
ÑƖM MBƲ PƖWƐ ƐSƆTƆM TAA YƆ EKLEZƖYASƖTƖ 9-10
Wɛɛnɩ lɩmaɣza kɩbana kala wena ŋkatɩɣ yɔ a-yɔɔ
w13 15/8 14 § 20-21
“Ða-taa ɛtaawɩɣnɩ Yehowa”
20 Ðɩsʋʋ sʋʋtʋ weyi ɛmʋnaa se ɖɩsʋʋ-ɩ tʋ yɔ. Ɛbɛ yɔɔ? Toovenim taa lɛ, kala wena ɖɩkatɩɣ yɔ a-taa naayɛ pɩzɩɣ nɛ alɩɩnɩ ɖɔ-cɔlɔ. Ye alɩnɩ ɖɔ-cɔlɔ yɔ ɖitisi se ɖɔ-cɔlɔ pɩlɩnaa. (Gal. 6:7) Ðɩtaañaɣ pana se ɖɩkʋ Yehowa tɔm se ɛ-cɔlɔ kala lɩɣna. Ɛbɛ yɔɔ pɩwɛɣ ɖeu se ɖɩla mbʋ? Kɩɖaʋ nakʋyʋ yɔ. Papɩzɩɣ nɛ polu lɔɔɖɩyɛ naɖɩyɛ se ɖɩpɩzɩ nɛ ɖiseɣ kpem. Kpaɣ se lɔɔɖɩyɛ sayʋ nɔɔyʋ saɣaɣ lɔɖɩyɛ nɖɩ lɛ ese nɛ pɩcɛzɩ ɛzɩma pɩpɔzaa yɔ; nɛ ɛcɔwaɣ kɔna nakʋyʋ lɛ ɛla kɛgbɛdɛsaɣ. Pɩmʋʋna se pakʋ weyi ɛlabɩ lɔɔɖɩyɛ nɖɩ yɔ ɛ-tɔm se ɛ-cɔlɔ kɛgbɛdɛsaɣ ŋga kalɩnaa? Aayɩ, pɩɩmʋʋnɩ mbʋ! Mbʋ ɖɔɖɔ Yehowa lɩzɩ-ɖʋ lɛ ɛha-ɖʋ tɩ-yɔɔ wɛʋ lɩzʋʋ waɖɛ. Ɛlɛ ɛtasɩ-ɖʋ ɖɔɖɔ lɔŋ weyi ɛsɩɣnɩ-ɖʋ se ɖɩkpaɣ lɩmaɣza kɩbana yɔ. Ye mbʋ, pɩfɛyɩ se ɖɩkʋ ɖa-Lɩzɩyʋ tɔm kpa ye picoɖi-ɖʋ nɛ ɖɩla mbʋ pɩfɛyɩ ɖeu yɔ.
21 Toovenim taa lɛ, kala wena ɖɩkatɩɣ yɔ pɩtɩkɛ a-tɩŋa alɩɣnɩ ɖɔ-cɔlɔ. Wɛtʋ natʋyʋ wɛɛ lɛ tɩlɩɣnɩ «alɩwaatʋ nɛ mbʋ ɛyʋ tɩɖʋna» yɔ pɩ-cɔlɔ. (Ekl. 9:11) Ɛlɛ kɔzɩ kɔzɩ lɛ, ɖɩtaasɔɔ kpa se Sataŋ Eleeu cɔlɔ kañatʋ lakasɩ lɩɣna. (1 Yoh. 5:19; Natʋ 12:9) Ɛnʋ kɛnɩ koyindu, pɩtɩkɛ Yehowa!—1 Pɩy. 5:8.
Yehowa sɛyaa mba pɛwɛnɩ tɩ luzuu yɔ, pamʋ ñɩm ɛ-ɛsɩndaa
10 Tɩ luzuu yeki ɖɔɖɔ nɛ wezuu caɣʋ wɛɛ-ɖʋ kɛlɛʋ. Toovenim taa lɛ, ɖɩpɩzɩɣ nɛ ɖɩkatɩ wɛtʋ natʋyʋ ɖe-wezuu caɣʋ taa nɛ pɩlakɩ-ɖʋ ɛzɩ tɩfɛyɩ siɣsiɣ yɔ. Wiyaʋ Salomɔɔ yɔɔdaa se: «Mana lɩmɖʋyaa kpaŋnaŋ yɔɔ, ɛlɛ awumbiya ñeɖiɣni ɖɔm nɩŋgbanzɩ ɛzɩ lɩmɖʋyaa yɔ.» (Ekl. 10:7) Nabʋyʋ taa lɛ, ɛyaa mba pɛwɛ niye siŋŋ yɔ, paaɖʋʋ-wɛ hɩɖɛ. Nɛ mba pɛfɛyɩ niye yɔ, nabʋyʋ taa lɛ, mba paɖʋʋ hɩɖɛ. Paa mbʋ yɔ, Salomɔɔ ɖiɣzinaa se pɩkɛɣnɩ lɔŋsɩnɖɛ se ɖitisi mbʋ pɩtalɩɣ-ɖʋ ɖe-wezuu caɣʋ taa yɔ, nɛ pɩkɩlɩ se ɖɩka ɖa-lɩmaɣza mbʋ ɖɩmaɣzɩɣ se pɩfɛyɩ siɣsiɣ yɔ pɩ-yɔɔ. (Ekl. 6:9) Ye ɖɩwɛnɩ tɩ luzuu yɔ, pɩwɛɣ-ɖʋ kɛlɛʋ se ɖitisi mbʋ pɩtalɩɣ-ɖʋ ɖe-wezuu caɣʋ taa yɔ, paa ɖɩtɩsɔɔlɩ-pʋ yɔ.
w11 15/10 8 § 1-2
Ɛzɩma ŋpɩzɩɣ ŋla nɛ ñe-helim mʋʋ alɩwaatʋ wazɩ-ŋ?
BIBL taa lɛ, ɖɩnaɣ tɔm ndʋ tɩwɩlɩɣ se pɩtasɩna se Yehowa sɔɔlaa se ɖɩcaɣ wezuu lɛ ɛsɔɔlaa ɖɔɖɔ se ɖɩnɩɩ ki-leleŋ yɔ. Kɩɖaʋ nakʋyʋ yɔ. Keɣa 104:14, 15 yɔɔdʋʋ se Yehowa lakɩ nɛ «tɔɔnaɣ ñɔʋnɩ tɛtɛɛ, ɛhaɣ vɛɛ ŋgʋ kɩlakɩ nɛ ɛyʋ laŋɩyɛ nɩɣ leleŋ yɔ, num mbʋ pɩlakɩ nɛ ɛyʋ ɛsɩndaa ñɩlɩsɩɣ yɔ, nɛ kpɔnɔ ŋgʋ kɩkpazɩɣ ɛyʋ ɖoŋ yɔ.» Toovenim taa lɛ, Yehowa lakɩ nɛ tɔɔnasɩ paɣlɩɣ nɛ sɩlʋlʋʋ pee, ɛha-ɖʋ num nɛ vɛɛ se pɩkɛ-ɖʋ tɔɔnaɣ. Ɛlɛ vɛɛ yeki ɖɔɖɔ nɛ «ɛyʋ laŋɩyɛ nɩɣ leleŋ.» Pɩɩpɔzʋʋ-ɖʋ vɛɛ se pʋcɔ nɛ ɖɩcaɣ wezuu ɛlɛ ɛsɔzɩ-ɖʋ kʋ se kɩha-ɖʋ taa leleŋ. (Ekl. 9:7; 10:19) Ɛɛɛ, Yehowa sɔɔlaa se ɖɩwɛɛ taa leleŋ taa, se «laŋhʋlʋmɩyɛ esu» ɖa-laŋa taa.—Tʋma 14:16, 17.
2 Pʋyɔɔ lɛ, ye ɖɩkpakɩɣ alɩwaatʋ natʋyʋ nɛ “ɖɩcɔŋnɩ ɛsɔdaa sumasɩ camɩyɛ” nɛ «hayɩm taa hɛtʋ,» yaa ɖɩlakɩ tʋma lɛɛna wena ahɛzɩɣ ɖa-laŋa nɛ ahaɣ-ɖʋ taa leleŋ yɔ pɩtɩwɛɛkɩ pʋyʋ. (Mat. 6:26, 28; Keɣ. 8:3, 4) Ye ɛyʋ ɛnɩɣ leleŋ e-wezuu caɣʋ taa yɔ «pɩkɛnɩ Ɛsɔ kʋjɔʋ.» (Ekl. 3:12, 13) Ye ɖɩkpakɩɣ helim mʋʋ alɩwaatʋ se tɩkɛ kʋjɔʋ yɔ, pɩkaɣ-ɖʋ seɣtuu nɛ ɖɩkpaɣ helim mʋʋ alɩwaatʋ ndʋ nɛ ɖɩlabɩnɩ mbʋ pɩkɛdɩɣnɩ Ɛsɔ yɔ.
Fezuu taa ñɩm
it «Lalaa tɔm yɔɔdʋʋ, Kɔlɔmɔtʋ» § 4, 8
Lalaa tɔm yɔɔdʋʋ, Kɔlɔmɔtʋ
Lalaa tɔm yɔɔdʋʋ pɩzɩɣ piyele nɛ ɛyʋ paɣzɩ labʋ kɔlɔmɔtʋ, nɛ weyi ɛlakɩ kɔlɔmɔtʋ yɔ pɩpɩzɩɣ nɛ pɩkɔnɩ-ɩ asɛyʋʋ. Lɔŋsɩnɖɛ tɔm ndʋ tɩwɛ Eklezɩyasɩtɩ 10:12-14 taa tɩkɛ toovenim. Tɩtɔŋ se: «Kɩmɛlɛŋ ndomee kɔŋnɩ-kʋ asɛyʋʋ. Tɔm pee wena acalɩɣ lɩʋ kɩ-nɔɔ taa yɔ, akɛ kɩmɛlɛndʋ, nɛ kɩ-kɛdɛzaɣ tɔm pee kɛ kpaanzɩyɩtʋ ndʋ tiwokini asɛyʋʋ taa yɔ. Ɛlɛ kɩmɛlɛŋ eeyeki yɔɔdʋʋ.»
Nabʋyʋ taa lalaa tɔm yɔɔdʋʋ pɩzɩɣ nɛ pɩkɔnɩ kaɖɛ pazɩ yaa kaɖɛ sɔsɔɖɛ (lalaa tɔm yɔɔdʋʋ pɩzɩɣ nɛ pɩpɩsɩ kɔlɔmɔtʋ labʋ), ɛlɛ kɔlɔmɔtʋ labʋ ñɔkɔŋnɩ kaɖɛ, laŋwɛɛkɩyɛ nɛ ñaɖʋʋ paa ɛzɩmtaa. Pɩpɩzɩɣ nɛ pɩkɛ lɩmaɣza kɩbana yaa lɩmaɣza kɩdɛkɛda seɣtiɣni nɔɔyʋ nɛ ɛlakɩ kɔlɔmɔtʋ. Paa pɩtɩɩkɛ suwe yɔ, weyi ɛlakɩ kɔlɔmɔtʋ yɔ ɛ-tɔm ɛɛkɛdɩɣnɩ Ɛsɔ, mbʋ pʋyɔɔ yɔ ‘ñaɖʋʋ kɔnʋʋ koobiya hɛkʋ taa’ kɛ mbʋ Ɛsɔ paɖɩɣ yɔ pɩ-taa nabʋyʋ. (Adu 6:16-19) Grɛɛkɩ tɔm piye diabolos pɛɖɛzaa se «kɔlɔmɔtʋ tʋ» yaa «weyi ɛkʋyʋʋ lɛlʋ yɔɔ yɔ». Palabɩnɩ ɖɔɖɔ tɔm piye nɖɩ tʋmɩyɛ Bibl taa nɛ ɖɩsɩŋnɩ Sataŋ hɩɖɛ kɩsɛsɛyɛ «Eleu»; ɛnʋ kɛnɩ mba palakɩ kɔlɔmɔtʋ Ɛsɔ yɔɔ yɔ pa-ñʋʋdʋ. (Yoh 8:44; Nat 12:9, 10; Kiɖ 3:2-5) Pɩwɩlɩɣ-ɖʋ weyi ɛ-cɔlɔ lalaa tɔm kʋʋ lɩnaa yɔ.
27 OCTOBRE–2 NOVEMBRE
ÑƖM MBƲ PƖWƐ ƐSƆTƆM TAA YƆ EKLEZƖYASƖTƖ 11-12
Wɛɛ alaafɩya camɩyɛ nɛ ŋnɩɩ wezuu leleŋ
g 3/15 13 § 6-7
Ɛzɩ helim nɛ wɩsɩ ñalɩmɩyɛ kʋʋ tuliŋ na?
Wɩsɩ ñalɩmɩyɛ ɖɔɖɔ kʋʋ tuliŋ (mikrɔbɩwaa.) Takayaɣ nakɛyɛ yɔɔdaa se: «Tuliŋ weyi ɩwɛ helim taa yɔ wɩsɩ ñalɩmɩyɛ kʋʋ-ɩ lɛɛ lɛɛ.» (Journal of Hospital Infection)
Ɛzɩma ŋpɩzɩɣ ŋla nɛ wɩsɩ ñalɩmɩyɛ wazɩ-ŋ? Pɩtɩla yɔ ŋpɩzɩɣ nɛ ŋlɩɩ awayɩ nɛ ŋcaɣ wɩsɩ taa alɩwaatʋ natʋyʋ pazɩ nɛ ŋfezi helim kɩbam. Pɩtʋʋ fɛyɩ se piyeki nɛ ŋwɛɛnɩ tomnaɣ taa alaafɩya camɩyɛ nɛ pɩkɩlɩ.
Wɩlɩ se wezuu kʋjɔʋ ŋgʋ Ɛsɔ labɩ-ɖʋ yɔ kɩmʋ ñɩm ñɛ-ɛsɩndaa
6 Bibl tɩkɛ takayaɣ ŋga keheyiɣ-ɖʋ ɛzɩma pɩwɛɛ se ɖɩcɔnɩ ɖo-tomnaɣ taa alaafɩya ɖeɖe yɔ yaa mbʋ pɩwɛɛ se ɖɩtɔɔ yɔ pɩ-tɔm. Paa mbʋ yɔ, kiheyiɣ-ɖʋ lɩmaɣza wena Yehowa wɛnɩ hɔɔlɩŋ ɛnɩ ɩ-naalɛ ɩ-taa yɔ a-tɔm. Kɩɖaʋ nakʋyʋ yɔ: Ɛtasɩɣ-ɖʋ lɔŋ se ɖɩlɔ «kɩdɛkɛdɩm» yaa mbʋ pɩpɩzɩɣ nɛ pɩkɔnɩ kaɖɛ ɖo-tomnaɣ yɔ. (Ekl. 11:10) Hiluu nɛ sʋlʋm kpaŋʋʋ kɔŋnɩ kaɖɛ ɛyʋ tomnaɣ nɛ Bibl yɔɔdʋʋ se lakasɩ nzɩ sɩfɛyɩ ɖeu. (Adu. 23:20) Yehowa sɔɔlaa se ɖɩwɛɛnɩ tɩ ɖɔkʋʋ alɩwaatʋ ndʋ ɖɩlɩzɩɣ tɔɔnaɣ ŋga ɖɩtɔɔ nɛ sʋlʋm mbʋ ɖɩñɔɔ yɔ nɛ ɖɩtaaɖɛlɛsɩ niye.—1 Kɔr. 6:12; 9:25.
7 Ye ɖɩlakɩnɩ ɖa-maɣzɩm tʋmɩyɛ camɩyɛ yɔ, ɖɩpɩzɩɣ nɛ ɖɩkpaɣ lɩmaɣza wena awɩlɩɣ se wezuu kʋjɔʋ ŋgʋ Ɛsɔ labɩ-ɖʋ yɔ kɩmʋ ñɩm siŋŋ ɖɛ-ɛsɩndaa yɔ. (Keɣ. 119:99, 100; kalɩ Aduwa 2:11.) Kɩɖaʋ nakʋyʋ yɔ: Ðɩmaɣzɩɣ mbʋ ɖɩtɔkɩ yɔ pɩ-yɔɔ camɩyɛ. Ye ɖɩsɔɔlɩ tɔɔnaɣ nakɛyɛ ɛlɛ ɖɩna se keyeki se ɖɩhɩnɩ kʋdɔŋ yɔ, ɛzɩma ɖɩmaɣzɩɣ camɩyɛ yɔ pɩsɩɣnɩ-ɖʋ se ɖikizi kɔ-tɔɔʋ. Ðɩwɩlɩɣ ɖɔɖɔ se ɖɩmaɣzɩɣ camɩyɛ ye ɖiɖou ɛzɩ pɩmʋnaʋ yɔ, ɖɩlakɩ hola aleɣya ɖoŋ ɖoŋ, ɖɩñakɩ pana se ɖo-tomnaɣ ɛwɛɛ cɩɖɩ cɩɖɩ tam, nɛ ɖɩñakɩ pana se ɖa-ɖɩsɩ ɩwɛɛ cɩɖɩ cɩɖɩ yɔ.
«Ɩpɩsɩ mba pɔɖɔŋ tɔm yɔɔ yɔ»
2 Ða Yehowa sɛyaa ɖɩkɛ samaɣ ŋga kɛwɛ koboyaɣ taa yɔ. Ɛbɛ yɔɔ? Lɩmaɣza sakɩyɛ yɔɔ, ɛlɛ a-taa nɖɩ ɖɩ-tɔm kɩlɩ cɛyʋʋ yɔ lɛ se ɖɩkalɩɣ Ɛsɔtɔm nɛ ɖɩñakɩ pana se ɖɩɖɔ tɔm ndʋ ɖɩkpɛlɩkɩɣ yɔ tɩ-yɔɔ.—Kalɩ Yakubu 1:22-25.
3 Alɩwaatʋ ndʋ ɖɩpɩsɩɣ «mba pɔɖɔŋ tɔm yɔɔ yɔ,» ɖihikiɣ wazasɩ hɔɔlɩŋ sakɩyɛ taa. Wazaɣ nakɛyɛ lɛ se ɖɔ-tɔm kɛdɩɣnɩ Yehowa. Nɛ ye ɖiɖiɣzini tɔm ndʋ yɔ, piyeki nɛ ɖɩwɛɛ koboyaɣ taa. (Ekl. 12:13) Pɩtasɩ lɛ, ye ɖɩɖɔŋ tɔm ndʋ ɖɩkalɩɣ Ɛsɔtɔm taa yɔ tɩ-yɔɔ yɔ, koboyaɣ wɛɣ ɖɔ-hɔʋ taa nɛ pɩkɩlɩ nɛ taabalɩyɛ kɩbanɖɛ wɛɣ ɖa nɛ ɖo-koobiya ɖɛ-hɛkʋ taa. Pʋtɔma, ña ɖɔɖɔ ŋhiɣ wazasɩ nzɩ sɩ-taa nasɩyɩ ñe-wezuu caɣʋ taa. Pɩtasɩ lɛ, ɛyaa mba paaɖɔŋ Yehowa paɣtʋ yɔɔ yɔ pakatɩɣ kala ndɩ ndɩ; ye ɖɩɖɔŋ Ɛsɔtɔm yɔɔ yɔ, ɖɩfɛɣ a-taa sakɩyɛ. Tɔm ndʋ ɖeyi ɖeyi Wiyaʋ Daviid yɔɔdaa. Ete hendu nɛ ɛyɔɔdɩ Yehowa paɣtʋ nɛ ɛ-tɔm hʋʋ tɔm nɛ pɩtɛ lɛ, ɛkɔ tɔm ñʋʋ se: «Ɛyʋ ɛɖɔŋ tɩ-yɔɔ yɔ, ehikiɣ kɩhɛyʋʋ sɔsɔʋ.»—Keɣ. 19:7-11.
Fezuu taa ñɩm
it «Pɩtɩŋnɩ fezuu yɔɔ» § 10
Pɩtɩŋnɩ fezuu yɔɔ
Ɛlɛ tɔm ndʋ ɖɩsɩma yɔ tɩwɩlɩɣ se abalaa mba pɔ-yɔɔ Ɛsɔ tɩŋnaa nɛ pama Masɩ yɔ, patɩla tʋmɩyɛ ɛzɩ robowaa yɔ, pataaheyiɣ-wɛ tɔm nɛ pamaɣ kɩmaʋ yem. Kɩɖaʋ nakʋyʋ yɔ. Ðɩkalɩɣ se natʋ tɔm ndʋ «Ɛsɔ tɩŋnɩ e-fezuu yɔɔ» nɛ eyele nɛ Yohanɛɛsɩ ma-tʋ Natʋ takayaɣ taa yɔ, tiyiyu nɔɔyʋ yɔɔ ɛtɩŋnaa nɛ ɛwɩlɩ-ɩ «yʋsasɩ» nɛ pʋwayɩ Yohanɛɛsɩ lɩzɩ «aseɣɖe tɔm ndʋ Ɛsɔ cɛlaa nɛ aseɣɖe nɖɩ Yesu Krɩstʋ lɩzaa yɔ pɔ-yɔɔ yɔ, ɛɛɛ, ɛlɩzɩ aseɣɖe mbʋ payɩ ɛnawa yɔ pɩ-yɔɔ.» (Nat 1:1, 2) «Pɩtɩŋnɩ fezuu yɔɔ» nɛ Yohanɛɛsɩ na ɛ-tɩ «Kɩbaɣlʋ kɩyakʋ wiye» nɛ nɔɔ nakɛyɛ heyi-i se: «Mbʋ ŋnaɣ yɔ, ma-pʋ takayaɣ kikpiyaɣ nakɛyɛ taa.» (Nat 1:10, 11) Ye mbʋ, pɩwɛ ɛzɩ Ɛsɔ maɣzaa se pɩwɛ ɖeu se ɛha Bibl mayaa waɖɛ nɛ palabɩnɩ tʋmɩyɛ pa-maɣzɩm nɛ palɩzɩ tɔm pee nɛ tɔm loyisi nzɩ pɔsɔɔlaa yɔ nɛ pɛkɛdɩ natʋ ndʋ panawa yɔ (Hab 2:2), ɛlɛ paa ɛzɩmtaa lɛ ɛɛwɛnɩ ɖoŋ pɔ-yɔɔ nɛ eɖiyiɣ-wɛ se pɩsa nɛ tɔm ndʋ pamaɣ yɔ tɩwɛɛ siɣsiɣ nɛ tɩkɛ toovenim nɛ tɩla nɔɔ kʋɖʋmaɣ nɛ ɛ-kaɖʋwa. (Adu 30:5, 6) Tɔm ndʋ tɩwɛ Ekleziyasɩtɩ 12:9, 10 taa yɔ tɩwɩlɩɣ se pɩɩwɛɛ se Bibl mayʋ ɛñaɣ pana nɛ ɛmaɣzɩ ɛ-ñʋʋ taa camɩyɛ nɛ ɛñɩnɩ tɔm tete nɛ ɛcɔlɩ lɩmaɣza se pɩsa nɛ ɛpɩzɩ nɛ ɛma «tɔm pee wena awɛ leleŋ yɔ nɛ ɛma toovenim tɔm ndʋ tɩwɛ siɣsiɣ yɔ.»—Kpaɣ-tʋ nɛ ŋmaɣzɩnɩ Luk 1:1-4