Ðe-wezuu caɣʋ nɛ ɖɛ-Ɛsɔ sɛtʋ kpɛlɩkʋʋ takayaɣ taa tɔm kɩñɩnɩtʋ
© 2025 Watch Tower Bible and Tract Society of Pennsylvania
2-8 MARS
ÑƖM MBƲ PƖWƐ ƐSƆTƆM TAA YƆ IZAAYII 41-42
«Sɔɔndʋ ɛtaakpa-ŋ»
Ña-taa pɩzɩɣ nɛ pɩtɛ se Yehowa kaɣ hɛzʋʋ ña-laŋɩyɛ
13 Yehowa kaaha Yuuda ñɩma mba pɛkɛzɩ-wɛ tɛtʋ yɔ lidaʋ kɩbaŋʋ nɛ pɩhɛzɩ pa-laŋa; paa mbʋ yɔ ɛɛnawa se pakaɣ katʋʋ kala alɩwaatʋ ndʋ eholuu-wɛ yɔ. Yehowa kaayɔɔdaa se pɩkazɩɣ alɩwaatʋ pazɩ se poholi-wɛ yomiye taa lɛ, wiyaʋ ɖoŋ tʋ nɔɔyʋ kaɣ yonuu ajɛɛ wena acɔ Babilɔɔnɩ nɛ ata yɔ nɛ pʋwayɩ lɛ, eyooni Babilɔɔnɩ. (Iza. 41:2-5) Ɛzɩ pɩɩwɛɛ se sɔɔndʋ ɛkpa Yuuda mba na? Pʋcɔ nɛ pɩtalɩ mbʋ lɛ, Yehowa kaatɛm heyuu ɛ-samaɣ laŋɩyɛ hɛzʋʋ tɔm tʋnɛ: «Sɔɔndʋ ɛtaakpa-ŋ, mbʋ pʋyɔɔ yɔ mɛwɛ ñɔ-cɔlɔ. Taanɩɣzɩ, mbʋ pʋyɔɔ yɔ mɛnkɛ ñɛ-Ɛsɔ.» (Kalɩ Izaayii 41:10-13.) Yehowa yɔɔdʋʋ se «mɛnkɛ ñɛ-Ɛsɔ» yɔ, pʋ-tɔbʋʋ lɛ suwe? Ɛtɩyɔɔdɩ mbʋ se ɛtɔzɩnɩ Yuuda mba se pɩwɛɛ se pɛsɛɛ-ɩ, mbʋ pʋyɔɔ yɔ paba kaatɛm naʋ se pɩwɛɛ se pɛsɛɛ-ɩ. Ɛlɛ ɛwɛɛ nɛ ɛtɔzʋʋ-wɛ se ɛkpɛndɩ ɛwɛ pɔ-cɔlɔ.—Keɣ. 118:6.
Izaayii 41:10—«Ña-laŋɩyɛ ɛtaalɩɩ, mbʋ yɔ mɛwɛ ñɔ-cɔlɔ»
«Mɛwɛ ñɔ-cɔlɔ.» Yehowa heyi ɛ-sɛyaa lɩmaɣzɩyɛ nɖɩ ɖɩ-yɔɔ pɩfɛyɩ se sɔɔndʋ ɛkpa-wɛ yɔ, nɖɩ lɛ se pɛfɛyɩ pe-ɖeke. Yehowa naɣ wɛtʋ ndʋ tɩ-taa pɛwɛɛ yɔ nɛ ewelisiɣ pa-adɩma, pʋyɔɔ lɛ pɩwɛ ɛzɩ ɛwɛ pɔ-cɔlɔ kpam yɔ.—Keɣa 34:15; 1 Pɩyɛɛrɩ 3:12.
«Mɛnkɛ ñɛ-Ɛsɔ.» Yehowa tɔzʋʋ ɛ-sɛyaa se ɛkɛ pɛ-Ɛsɔ nɛ ɛkpakɩɣ-wɛ se pɛkɛ ɛ-sɛyaa, nɛ ɛtɔzʋʋ-wɛ tɔm ndʋ nɛ ɛhɛzɩɣnɩ pa-laŋa. Pa-taa pɩzɩɣ nɛ pɩtɛ se wɛtʋ natʋyʋ ɛɛkaɣ yebu kpa nɛ Ɛsɔ yebi-wɛ sɩnʋʋ.—Keɣa 118:6; Roma mba 8:32; Ebree mba 13:6.
«Mankaɣ-ŋ kpazʋʋ ɖoŋ, ɛɛɛ, mankaɣ-ŋ sɩnʋʋ, toovenim taa lɛ, mankaɣ-ŋ ɖɔkʋʋ nɛ men-siɣsiɣ wɛtʋ nɩwaŋ nesi.» Yehowa labɩnɩ tʋmɩyɛ tɔm loyisi 3 nzɩ sɩ-tɔbʋʋ nɩʋ kɛ kʋɖʋmʋm yɔ se ɛwɩlɩ se paa pɩɩlabɩ ɛzɩma yɔ ɛkaɣ-wɛ sɩnʋʋ. Ɛlabɩnɩ tʋmɩyɛ tɔm pee wena awɩlɩɣ ɛzɩma ɛlakɩ alɩwaatʋ ndʋ pɩpɔzʋʋ ɛ-sɛyaa sɩnʋʋ yɔ. Ye pa-taa nɔɔyʋ ɛcaɣ tɔɔlʋʋ yɔ, eseziɣ e-nesi kɩbanzɩ nɛ ɛɖɔkɩ-ɩ se ɛtaatɔlɩ.—Izaayii 41:13.
Nʋmɔʋ sɔsɔʋ ŋgʋ kɩ-yɔɔ Ɛsɔ tɩŋɩɣna nɛ ɛkpazɩɣ ɛ-sɛyaa ɖoŋ nɛ ɛsɩɣnɩ-wɛ yɔ ŋgʋ lɛ Bibl. (Yozuwee 1:8; Ebree mba 4:12) Kɩɖaʋ nakʋyʋ yɔ: Bibl tasɩɣ lɔŋ kɩbaŋ mba pakatɩɣ kala ɛzɩ kʋñɔndʋtʋ, kʋdɔmɩŋ, yaa pɛ-ɛyʋ kʋsɔɔlʋ nɔɔyʋ sɩba yɔ. (Aduwa 2:6, 7) Ɛsɔ pɩzɩɣ ɖɔɖɔ nɛ ɛtɛŋnɩ e-fezuu kiɖeɖeu yaa e-ɖoŋ weyi ɛlakɩnɩ tʋmɩyɛ yɔ ɛ-yɔɔ nɛ ɛha ɛ-sɛyaa maɣzɩm taa laŋhɛzɩyɛ nɛ ɖoŋ weyi pɩpɔzʋʋ yɔ nɛ palʋbɩnɩ kala.—Izaayii 40:29; Luka 11:13.
«Sɔɔndʋ ɛtaakpa-ŋ. Mankaɣ-ŋ sɩnʋʋ»
Tɔm tʋnɛ, tɩhɛzɩɣ ɖa-laŋa siŋŋ. Maɣzɩ tɔm ndʋ Yehowa ñɩnɩɣ se eheyi-ɖʋ yɔ tɩ-yɔɔ nɛ ŋna. Patɩyɔɔdɩ cɩnɛ se ña nɛ Yehowa ɩɖɔkɩ ɖama nesi tɛɛ nɛ ɩɖɔŋ. Ye ña nɛ ɩ ɩwɛɛ nɛ ɩɖɔŋ yɔ, ɛɛpɩzɩɣ nɛ ɛɖɔkɩ ña-nɩwaŋ yaa ñe-nesi kɩbanzɩ, ɛlɛ ña-nɩmɩyɛ ɛɖɔkʋʋ. Ɛlɛ Bibl yɔɔdaa se Yehowa seziɣ ‘e-siɣsiɣ wɛtʋ nɩwaŋ’ yaa e-nesi kɩbanzɩ nɛ ɛɖɔkɩ ñe-nesi kɩbanzɩ. Pɩwɛ ɛzɩ ɛhɔŋɩ-ŋ se ɛlɩzɩ-ŋ kaɖɛ wɛtʋ natʋyʋ taa yɔ. Ɛɛlakɩ mbʋ lɛ, ɛkpazɩɣ-ŋ ɖoŋ nɛ eheyiɣ-ŋ se: «Sɔɔndʋ ɛtaakpa-ŋ. Mankaɣ-ŋ sɩnʋʋ.»
Ŋnaɣ Yehowa ɛzɩ Caja kʋsɔɔlʋ nɛ taabalʋ kɩbanʋ weyi ɛpɩzɩɣ ɛsɩnɩ-ŋ kaɖɛ alɩwaatʋ taa yɔ? Ɛmaɣzɩɣ ñɔ-yɔɔ siŋŋ, ɛsɔɔlaa se piɖeni-ŋ nɛ ɛñɩnɩɣ se ɛsɩnɩ-ŋ. Yehowa tɩsɔɔlɩ se sɔɔndʋ ɛkpa-ŋ alɩwaatʋ ndʋ ŋkatɩɣ kala yɔ, mbʋ pʋyɔɔ yɔ ɛsɔɔlɩ-ŋ pɩdɩɩfɛyɩ. Toovenim taa lɛ, Yehowa kɛ «sɩnɩyʋ weyi papɩzɩɣ nɛ pana-ɩ kɛlɛʋ yem kʋñɔŋ alɩwaatʋ taa yɔ.»—Keɣa 46:1.
Fezuu taa ñɩm
w01 1/10 20 § 3
Pɔtɔŋʋʋ se ɛyʋ wɛ siɣsiɣ yɔ pʋ-tɔbʋʋ le suwe?
Yehowa heyi ɛ-taabalʋ Abraham se: «Mankaɣ ñɔ-yɔɔ kandɩyʋʋ.» (Kiɖe Tɛɛ Tɔm 15:1; Izaayii 41:8) Pɩtaakɛ tɔm pee yem. Yehowa kandɩyɩ Abraham nɛ ɛ-ɖɩɣa taa mba yɔɔ nɛ ɛlɩzɩ-wɛ Farawɔɔ nɛ Abimelɛɛkɩ pe-nesi tɛɛ. Ɛsɩnɩ Abraham nɛ ɛlɛ holi Lɔɔtɩ awiya 4 nesi tɛɛ. Paa Abraham kaawɛnɩ pɩnzɩ 100 nɛ Saara ñɛwɛɛnɩ pɩnzɩ 90 yɔ, Yehowa kaayeba nɛ papɩzɩ palʋlɩ pɩɣa se pɩsa nɛ Mesiya lɩɩnɩ pa-lʋlʋʋ taa. Yehowa tɩŋaɣnɩ natʋ, ɖoza nɛ tiyiyaa yɔɔ nɛ ɛyɔɔdʋʋnɩ Abraham ɖoŋ ɖoŋ. Toovenim taa lɛ, Yehowa lɩzɩ siɣsiɣ wɛtʋ nɛ ɛwɩlɩ Abraham alɩwaatʋ ndʋ ɛɛwɛnɩ ɛ-ɛsa yɔ nɛ ɛ-sɩm wayɩ. Yehowa ɖɔm tamaɣ ŋga ɛlabɩ Abraham lʋlʋʋ taa mba, pʋ-tɔbʋʋ se Izrayɛɛlɩ mba yɔ kɔ-yɔɔ paa pataañaŋɩ-ɩ nabʋyʋ taa yɔ. Taabalɩyɛ nɖɩ ɖɩwɛ Yehowa nɛ Abraham pɛ-hɛkʋ taa yɔ ɖɩwɩlɩɣ mbʋ siɣsiɣ wɛtʋ kɛnaa yɔ, mbʋ lɛ sɔɔlɩm mbʋ patɩŋɩɣnɩ lakasɩ yɔɔ nɛ palɩzɩɣ-pʋ nɛ pawɩlɩɣ yɔ.—Kiɖe Tɛɛ Tɔm ñʋʋ 12 nɛ piwolo 25.
9-15 MARS
ÑƖM MBƲ PƖWƐ ƐSƆTƆM TAA YƆ IZAAYII 43-44
Natʋ tɔm ndʋ pama-tʋ pɩnzɩ 200 pʋcɔ nɛ tɩlakɩ yɔ
Bibl kɛ takayaɣ ŋga kɔyɔɔdʋʋ toovenim yɔ
2 Natʋ tɔm: Pʋcɔ nɛ Babilɔɔnɩ tɛtʋ pɩsɩɣ ɛjaɖɛ kpeekpe yɔɔ kewiyaɣ ŋga kakpaɖɩ ɖoŋ yɔ lɛ, Bibl mayʋ Izaayii kaayɔɔdɩ pɩnzɩ 700 waa taa P.P.Y. se pakaɣ-tʋ yɔkʋʋ. Nɛ pʋwayɩ lɛ, tɩpɩsɩɣ njɛyɛ. (Izaayii 13:17-20) Halɩ Izaayii ya weyi ɛkaɣ yɔkʋʋ tɛtʋ ndʋ yɔ ɛ-hɩɖɛ. Ɛnʋ lɛ Siiruusi. Ɛyɔɔdɩ ɖɔɖɔ ɛzɩma Siiruusi kaɣ labʋ nɛ pɔɔ ŋga kɔcɔ Babilɔɔnɩ tɛtʋ yɔ ka-taa lɩm «sɔyɩ», nɛ ɛzɩma paakaɣ ɖɩɣʋ tɛtʋ nɔnɔsɩ yɔ pɩ-tɔm.—Izaayii 44:27–45:1.
3 Ɛzɩma tɩlaba yɔ: Izaayii ma natʋ tɔm ndʋ nɛ pɩla pɩnzɩ 200 mbʋ yɔ lɛ, Pɛrɩsɩ wiyaʋ nɔɔyʋ wolo se ɛyɔkʋʋ Babilɔɔnɩ tɛtʋ. Suwe payaɣaɣ-ɩ? Siiruusi. Ɛzɩma kolonzi sɔsɔsɩ nɛ Efraatɩ pɔɔ paacɔ Babilɔɔnɩ tɛtʋ yɔ pʋyɔɔ lɛ, pɩɩwɛ kaɖɛ se pasʋʋ tɩ-taa nɛ pɔyɔkɩ-tʋ. Pʋyɔɔ Siiruusi yeba nɛ ɛ-sɔɔjanaa hɛɛ lɔɔʋ sɔsɔʋ nakʋyʋ se pɔɔ taa lɩm ekpe kɩ-taa. Pɩla mbʋ nɛ lɩm pasɩ pɔɔ taa nɛ Siiruusi sɔɔjanaa tɛzɩ-kɛ nɛ powolo pɔñɔtɩnɩ tɛtʋ kolonzi. Ðoo ana a-taa, Babilɔɔnɩ ñɩma taaɖɩɣ tɛtʋ nɔnɔsɩ. Piyeba nɛ Siiruusi nɛ ɛ-sɔɔjanaa pasʋʋ Babilɔɔnɩ tɛtʋ taa nɛ pɔyɔkɩ-tʋ.
it «Siiruusi» § 7
Siiruusi
Babilɔɔnɩ yɔkʋʋ. Lɛɛlɛɛyɔ lɛ Siiruusi ñɔɔzɩ ɛ-tɩ se eyooni tɛtʋ ɖoŋ ñɩndʋ Babilɔɔnɩ; piyeba nɛ kpaɣnɩ mbʋ lɛ natʋ tɔm ndʋ Bibl kaayɔɔdɩ ɛ-yɔɔ yɔ tɩla. Fezuu ɖiyi Izaayii nɛ ɛna natʋ natʋyʋ taa se pakaɣ ɖaɣnʋʋ maʋ Yeruzalɛm nɛ kɩ-tɛ templo. Natʋ ndʋ tɩwɩlɩɣ se Yehowa ya Pɛrɩsɩ wiyaʋ weyi ɛkaɣ yɔɔkʋʋ Babilɔɔnɩ nɛ eholi Yuuda mba yomiye taa yɔ ɛ-hɩɖɛ, nɛ tɩwɩlɩɣ ɖɔɖɔ se Yehowa lɩzɩnɩ-ɩ. (Iza 44:26–45:7) Pama natʋ tɔm ndʋ nɛ pɩcɛzɩ pɩnzɩ 150 yɔɔ pʋcɔ nɛ Siiruusi pɩsɩɣ wiyaʋ; nɛ pɩtʋʋ fɛyɩ se Yuuda mba kaawɛ yomiye taa pʋcɔ nɛ palʋlʋʋ Siiruusi; paa mbʋ yɔ Yehowa yɔɔdaa se Siiruusi kaɣ labʋ tʋmɩyɛ ɛzɩ e-ninɖiɣyu yɔ nɛ eholi Yuuda mba. (Iza 44:28; kpaɣ-tʋ nɛ ŋmaɣzɩnɩ Rom 4:17.) Ɛzɩma ɛlɩzɩ Siiruusi se ɛla tʋmɩyɛ ɛzɩ e-ninɖiɣyu yɔ pʋyɔɔ lɛ, ɛya-ɩ se «ɛ-tɛ patam num» (Ebree taa ma·shiʹach, pʋ-tɔbʋʋ se mesiya, nɛ Grɛɛkɩ taa khri·stosʹ, pʋ-tɔbʋʋ se krɩstʋ). (Iza 45:1) Ɛzɩma Ɛsɔ ‘ya-ɩ nɛ ɛ-hɩɖɛ’ (Iza 45:4) alɩwaatʋ sakɩyɛ pʋcɔ nɛ palʋlʋʋ-ɩ yɔ, pɩɩwɩlɩɣ se alɩwaatʋ ndʋ palʋlɩ-ɩ yɔ Ɛsɔ hanɩ-ɩ hɩɖɛ Siiruusi, ɛlɛ pʋ-tɔbʋʋ lɛ se Yehowa kaana ɖooo lɔŋ se pakaɣ abalʋ nɔɔyʋ yaʋ nɛ hɩɖɛ nɖɩ nɛ ɛkaɣ-ɩ ɖʋʋ tʋmɩyɛ, pʋyɔɔ ɛya-ɩ nɛ ɛ-hɩɖɛ nɛ ɛtɩyɔɔdɩ yem se abalʋ nɔɔyʋ.
Ŋnaɣ mbʋ Zakarii nawa yɔ?
YUUDA mba taa kaawɛ leleŋ siŋŋ. Yehowa Ɛsɔ «seɣti Pɛrɩsɩ wiyaʋ Siiruusi» se eyele Izrayɛɛlɩ piya; sɩɩwɛʋ yomiye taa Babilɔɔnɩ yɔ, pɩlakɩ pɩnzɩ hiŋ sakɩyɛ. Wiyaʋ heyi Yuuda mba se papɩsɩ pɛ-ɛjaɖɛ taa nɛ paɖaɣnɩ maʋ «Izrayɛɛlɩ tɛ Ɛsɔ Yehowa ɖɩɣa.» (Ɛsd. 1:1, 3) Tɔm ndʋ, tɩɩkpazɩ Yuuda mba ɖoŋ siŋŋ! Pɩwɩlaɣ se pakaɣ pɩzʋʋ nɛ paɖaɣnɩ paɣzʋʋ Ɛsɔ sɛʋ ɛzɩ pɩpɔzʋʋ yɔ ɛjaɖɛ nɖɩ ɛlɛ kaaha-wɛ yɔ ɖɩ-taa.
Fezuu taa ñɩm
Tɔm ndʋ ɖa-takayɩsɩ kalɩyaa pɔzʋʋ yɔ
Kɩɖaʋ naalɛ ñɩŋgʋ tukuuni natʋ tɔm ndʋ tɩyɔɔdʋʋ you laɖʋ Siiruusi tɔm yɔ. Natʋ ndʋ, tɩtɔŋ se ɛkaɣ lɩzʋʋ Yuuda mba yomiye taa nɛ ɛha nɔɔ se paɖaɣnɩ maʋ Yehowa templo. (Iza. 44:26–45:4) Pɛrɩsɩ Wiyaʋ Siiruusi yeba nɛ natʋ tɔm ndʋ tɩla. (Ɛsd. 1:1-4) Ɛlɛ, Siiruusi taasɛɣ Ɛsɔ toovenim tʋ. Yehowa tɩŋnɩ Siiruusi yɔɔ nɛ eyele nɛ natʋ tɔm ndʋ tɩla, ɛlɛ ɛtɩñɩɣ Siiruusi yɔɔ se ɛsɛɛ-ɩ.—Adu. 21:1.
16-22 MARS
ÑƖM MBƲ PƖWƐ ƐSƆTƆM TAA YƆ IZAAYII 45-47
«Mɛkɛnɩ Ɛsɔ, nɛ nɔɔyʋ fɛyɩ ɛzɩ ma yɔ»
«Ña-hɩɖɛ yɔɔ ɛñalɩ»
14 Sataŋ labɩ mbʋ payɩ ɛpɩzɩɣ yɔ se ɛsɩnzɩ Yehowa nɛ ɛtaatɛzɩ mbʋ ɛɖʋwa se ɛlakɩ yɔ. Ɛlɛ Sataŋ tɩpɩzɩ kaaʋ. Bibl wɩlɩɣ-ɖʋ mbʋ Yehowa kaalaba yɔ, nɛ kɩwɩlɩɣ-ɖʋ se toovenim taa lɛ Yehowa kɛnɩ Caja sɔɔlɩm tʋ nɛ Ðiyiyu weyi ɛkpaɖaa yɔ. Toovenim taa lɛ, Sataŋ kʋyɩ Ɛsɔ yɔɔ nɛ mba payɩ patɩŋ ɛ-wayɩ yɔ, peyeba nɛ pɩha Yehowa laŋwɛɛkɩyɛ sɔsɔɖɛ. (Keɣa 78:40) Paa mbʋ yɔ, ɛcɔnɩ tɔm ndʋ ti-ɖeɖe nɛ lɔŋsɩnɖɛ, suuɖu nɛ siɣsiɣ wɛtʋ. Ɛtɩŋnɩ ɖɔɖɔ nʋmɔŋ sakɩyɛ yɔɔ nɛ ɛwɩlɩ e-ɖoŋ sɔsɔŋ. Mbʋ pɩ-tɔm kɩlɩ cɛyʋʋ yɔ, mbʋ lɛ se ɛwɩlɩɣ sɔɔlɩm, mbʋ payɩ ɛlakɩ yɔ pɩ-taa. (1 Yoh. 4:8) Yehowa tiyele tʋmɩyɛ labʋ kpa se ɛñalɩ ɛ-hɩɖɛ yɔɔ.
cl 42 § 14
‘Yehowa wɛ ɖoŋ siŋŋ’
14 Ɛzɩ ɖɩnaʋ yɔ, Ɛsɔ lakɩnɩ e-ɖoŋ tʋmɩyɛ nɛ ɛlɩzɩɣ wondu, ɛɖɩzɩɣ, ɛkandɩyɩɣ nɛ ɛñɔɔzʋʋ wondu. Tobi lɛ, ɛtɩŋɩɣnɩ e-ɖoŋ yɔɔ nɛ ɛlakɩ mbʋ payɩ pɩlakɩ nɔɔ kʋɖʋmaɣ nɛ ɛ-kaɖʋsɩ yɔ. (Izaayii 46:10) Nabʋyʋ taa Yehowa lakɩnɩ e-ɖoŋ tʋmɩyɛ nɛ ɛwɩlɩɣ ɛ-wɛtʋ kɩbandʋ nɛ ɛ-paɣtʋ. Kɔzɩ kɔzɩ lɛ, ɛlakɩnɩ e-ɖoŋ tʋmɩyɛ se eyele nɛ ɛ-sɔɔlɩm la, pʋ-tɔbʋʋ se ɛtɩŋɩɣnɩ Mesiya Kewiyaɣ yɔɔ nɛ ɛñalɩ ɛ-hɩɖɛ yɔɔ nɛ pɩwɩlɩ se e-kewiyitu tɔɔʋ kpaɖɩnɩ ɖeu. Nɔɔyʋ ɛɛpɩzɩɣ kpa nɛ ɛkaɖɩnɩ kaɖʋwa ŋga.
Wɛɛnɩ tɩ luzuu alɩwaatʋ ndʋ ŋŋsɩŋ tɔm natʋyʋ yɔ
15 Ðɩɩsɩŋ mbʋ pɩkaɣ labʋ paa evemiye nɖɩ yɔ, ɛlɛ ɖɩsɩma se Yehowa labɩ-ɖʋ tamaɣ se ɛkaɣ-ɖʋ haʋ wezuu maatɛŋ paa pɩtɩɩkɛ ɛsɔdaa yaa tɛtʋ yɔɔ yɔ. Ðɩsɩma se ɛɛpɩzɩɣ nɛ ɛcɛtɩ nɛ nabʋyʋ ɛɛpɩzɩɣ nɛ pɩɖɩɣ-ɩ nʋmɔʋ se ɛtaaɖɔ ɛ-tamasɩ yɔɔ. (Tiiti 1:2) E-ɖeke ɛpɩzɩɣna nɛ ɛyɔɔdɩ «mbʋ pɩkaɣ labʋ yɔ pɩ-tɔm, nɛ ɖooo lɔndaa [ɛyɔɔdʋʋ] mbʋ pɩtɩlabɩta yɔ pɩ-tɔm.» Caanaʋ taa, tɔm ndʋ ɛɛyɔɔdaa se tɩkaɣ labʋ yɔ tɩlaba, nɛ tɔm ndʋ ɛyɔɔdaa se tɩkaɣ labʋ cee wayɩ yɔ tɩkaɣ labʋ ɖɔɖɔ. (Iza. 46:10) Ðɩsɩma se nabʋyʋ ɛɛpɩzɩɣ nɛ pɩɖɩɣ Yehowa nʋmɔʋ se ɛtaasɔɔlɩ-ɖʋ, nɛ ɖa-taa tɛmnɩ tɔm ndʋ. (Roma 8:35-39) Ɛkaɣ hɛzʋʋ ɖa-laŋɩyɛ nɛ ɛha-ɖʋ lɔŋsɩnɖɛ nɛ ɖoŋ weyi pɩpɔzʋʋ-ɖʋ se pɩsa nɛ ɖɩɖɔkɩ ɖa-laŋɩyɛ pɩtɩŋa pɩ-taa yɔ. Ða-taa pɩzɩɣ nɛ pɩtɛ se Yehowa kaɣ-ɖʋ sɩnʋʋ nɛ ɛwazɩ-ɖʋ.—Yer. 17:7, 8.
Takayaɣ ŋga kapɩzɩɣ nɛ kasɩnɩ-ɖʋ se ɖɩɖɔkɩ ɖa-laŋɩyɛ nɛ pɩkɔɔ pɩtalɩ tɩnaɣ yɔɔ yɔ
13 Alɩwaatʋ ndʋ Ebree Krɩstʋ mba kaaɖaŋ yʋsaɣ ŋga kawɩlɩɣ se alɩwaatʋ talaa se pese yɔ, pɩɩpɔzaa ɖɔɖɔ se pacaɣ wezuu kɛlɛʋ nɛ pataawɛɛnɩ «liidiye sɔɔlɩm.» (Kalɩ Ebree mba 13:5.) Ñɔɔsɩ kʋwaɣ pa-taa nabɛyɛ nɛ paakɛ kʋñɔndɩnaa. (Ebr. 10:32-34) Paa alɩwaatʋ natʋyʋ, paasɔɔlɩ faaa se pɔtɔɔ kʋñɔŋ tɔm kɩbandʋ yɔɔ yɔ, pɩtɩla nabɛyɛ kɔm nɛ papaɣzɩ maɣzʋʋ se ñɩm pɩzɩɣ nɛ pɩkandɩyɩ pɔ-yɔɔ. Ɛlɛ liidiye taapɩzɩɣ se ɖɩkandɩyɩ pɔ-yɔɔ alɩwaatʋ ndʋ paɖɩzaɣ Yeruzalɛm yɔ. (Yak. 5:3) Toovenim taa lɛ, pɩtɩla pɩɩlabɩ kaɖɛ mba paasɔɔlɩ tomnaɣ yɔɔ wondu yɔ se pese nɛ peyele pa-ɖɩsɩ nɛ mbʋ paawɛna yɔ.
14 Ye ɖɩwɛnɩ tisuu sɔsɔm se pɩkazɩ pazɩ lɛ Yehowa kaɣ ɖɩzʋʋ ɛjaɖɛ kɩdɛkɛdɩyɛ ɖɩnɛ yɔ, ɖɩnɛ ɛlɛ ɖɩɩkaɣ maɣzʋʋ se liidiye yaa wondu sakɩyɛ wɛnʋʋ tɔm cɛyaa nɛ pɩkɩlɩ. Kʋñɔŋ sɔsɔʋ alɩwaatʋ taa, liidiye ɛɛkaɣ wɛnʋʋ wazaɣ nakɛyɛ. Bibl yɔɔdʋʋ se ɛyaa kaɣ «lɔʋ pe-liidiye habɛɛ yɔɔ,» mbʋ pʋyɔɔ yɔ pakaɣ ɖiɣzinuu se «pe-liidiye nɛ pe-sika ɩɩkaɣ pɩzʋʋ nɛ pɩya pa-ñʋʋ Yehowa pana sɔsɔna kɩyakʋ wiye.» (Ezek. 7:19) Mbʋ ɛzɩ ɖɩɩkam ñʋʋ nɛ liidiye sakɩyɛ ñɩnʋʋ lɛ, pɩwɛɛ se ɖɩkpaɣ lɩmaɣza wena asɩɣnɩ-ɖʋ se ɖɩcɔnɩ ɖa nɛ ɖɔ-hɔʋ taa mba yɔɔ nɛ ɖɩtɛ ɖɩsɛɛ Yehowa yɔ. Pɩɩkɛɣnɩ lɔŋsɩnɖɛ se ɖɩtɔɔ kɩma wena a-tɔm tɩcɛyɩ yɔ yaa ɖɩkpaɣ alɩwaatʋ sakɩyɛ nɛ ɖɩcɔŋnɩ ɖo-tomnaɣ yɔɔ wondu yɔɔ. Pɩwɛɛ ɖɔɖɔ se ɖɩkpa ɖa-tɩ nɛ ɖo-tomnaɣ yɔɔ wondu tɔm ɛtaakɩlɩ cɛyʋʋ ɖe-wezuu caɣʋ taa. (Mat. 6:19, 24) Ɛjaɖɛ ɖɩnɛ ɖɩ-tɛm wɛɣ nɛ pɩñɔtʋʋ lɛ, pɩkaɣ pɔzʋʋ se ɖɩlɩzɩ se ɖɩtaɣ Yehowa liu yaa ɖɩtaɣ mbʋ ɖɩwɛna yɔ liu.
Fezuu taa ñɩm
w11 1/1 14 § 2-3
Ɛzɩ Ɛsɔ kaanawa se Aɖam nɛ Ɛva pakaɣ labʋ kɩwɛɛkɩm na?
Masɩ wɩlɩɣ ɖɔɖɔ se Yehowa kɛ Ɛsɔ weyi «e-ɖeke ɛkɛ lɔŋsɩnɖʋ yɔ.» (Roma mba 16:27) Ɛsɔ tiyiyaa mba pɛwɛ ɛsɔdaa yɔ pananɩ pɛ-ɛsa Ɛsɔ lɔŋsɩnɖɛ nɖɩ ɖɩfɛyɩnɩ kamaɣ yɔ. Pamabɩ «taa leleŋ kubusi» alɩwaatʋ ndʋ Ɛsɔ lɩzɩ wondu tɛtʋ yɔɔ yɔ. (Yɔɔb 38:4-7) Pɩtʋʋ fɛyɩ se Ɛsɔ tiyiyaa mba panaɣaɣ mbʋ pɩlakaɣ Edɛɛnɩ kaɖaɣ taa yɔ nɛ pɩkɛdɩɣnɩ-wɛ. Pɩkɛɣnɩ lɔŋsɩnɖɛ se Ɛsɔ lɔŋsɩnɖʋ ɛlɩzɩ kedeŋa nɛ kɛwɛɛ kajʋka pɩdɩɩfɛyɩ nɛ ɛlɩzɩ wondu kɩbandʋ ndɩ ndɩ tɛtʋ yɔɔ nɛ ɛlɩzɩ e-tiyiyaa ɛsɩndaa ɛyaa naalɛ mba ɛnawa se pakaɣ labʋ kɩwɛɛkɩm pʋwayɩ yɔ? Pɩnaɣ kpayɩ kpayɩ se pɩɩkɛɣnɩ lɔŋsɩnɖɛ se ɛla mbʋ.
Ɛlɛ nɔɔyʋ pɩzɩɣ nɛ ɛpɔzɩ se: ‘Ɛbɛ yɔɔ Ɛsɔ weyi ɛwɛnɩ lɔŋsɩnɖɛ siŋŋ yɔ ɛtɩpɩzɩ nɛ ɛna mbʋ pɩkaɣ labʋ yɔ?’ Toovenim taa lɛ Ɛsɔ lɔŋsɩnɖɛ sɔsɔɖɛ hɔɔlʋʋ nakʋyʋ lɛ se ɛwɛnɩ ɖoŋ se ɛtɩlɩ ‘ɖooo kiɖe tɛɛ mbʋ pɩkaɣ labʋ yɔ.’ (Izaayii 46:9, 10) Paa ɛwɛnɩ ɖoŋ weyi ɛfɛyɩ kamaɣ yɔ pɩtɩkɛ paa ɛzɩmtaa ɛlakɩnɩ ɩ-tɩŋa tʋmɩyɛ; mbʋ ɖɔɖɔ pɩtɩkɛ paa ɛzɩmtaa ɛlakɩnɩ e-ɖoŋ tʋmɩyɛ se ɛtɩlɩ mbʋ pɩkaɣ labʋ cee wayɩ yɔ. Lɔŋsɩnɖɛ nɖɩ Yehowa wɛna se ɛtɩlɩ mbʋ pɩkaɣ labʋ cee wayɩ yɔ, ɛnʋ lɩzɩɣnɩ alɩwaatʋ ndʋ ɛsɔɔlaa se ɛlabɩnɩ-ɖɩ tʋmɩyɛ yɔ. Alɩwaatʋ ndʋ ɛnawa se pɩpɔzʋʋ se ɛla mbʋ yɔ ɛlakɩ mbʋ.
23-29 MARS
ÑƖM MBƲ PƖWƐ ƐSƆTƆM TAA YƆ IZAAYII 48-49
Welisini Yehowa nɛ pɩwazɩ-ŋ
it «Wɩlɩyʋ, Tɔm wɩlʋʋ» § 2
Wɩlɩyʋ, Tɔm wɩlʋʋ
Ða-Lɩzɩyʋ Yehowa Ɛsɔ kɛnɩ ɛ-sɛyaa Wɩlɩyʋ Sɔsɔ. (1Aw 8:36; Ke 27:11; 86:11; 119:102; Iza 30:20; 54:13) Wondu kɩlɩzɩtʋ maɣmaɣ wɩlɩɣ se Ɛsɔ nɔɔyʋ wɛɛ nɛ tɩkɛ ɖɔɖɔ mbʋ ɛyaa pɩzɩɣ nɛ pɛkpɛlɩkɩ tɔm sakɩyɛ tɩ-yɔɔ yɔ. Ɛlɛ pɩtalʋʋnɩ sɔnɔ yɔ mbʋ ɛyaa pɩzaa nɛ patɩlɩ tɩ-yɔɔ yɔ pɩtɩlɩɩ pʋyʋ. (Yɔb 12:7-9) Pɩtasɩ lɛ, Yehowa Ɛsɔ tɩŋnɩ ŋgee nʋmɔŋ ndɩ ndɩ yɔɔ nɛ ɛwɩlɩ ɛyaa ɛ-hɩɖɛ, ɛ-kaɖʋsɩ nɛ ɛ-paɣtʋ. (Kpaɣ-tʋ nɛ ŋmaɣzɩnɩ Ejl 4:12, 15; 24:12; 34:5-7) Eyeba nɛ pama pɩ-tɔm Bibl taa, nɛ tɩsɩɣna se ɖɩtɩlɩ toovenim pɩlɩɩnɩ Ɛsɔ sɔɔlɩm yɔɔ. (Rom 15:4; 2Ti 3:14-17) Ɛsɔ fezuu ɖɔɖɔ lakɩ tʋmɩyɛ ɛzɩ wɩlɩyʋ yɔ.—Yoh 14:26.
ijwbq ñʋʋ 44 § 2-3
Suwe Bibl yɔɔdʋʋ tɩ-yɔɔ wɛʋ lɩzʋʋ waɖɛ yɔɔ? Ɛsɔ lɩzɩɣnɩ mbʋ ɖɩkaɣ labʋ ɖe-wezuu caɣʋ taa yɔ?
● Ɛsɔ lɩzɩ ɛyaa ɛ-lɛzʋʋ. (Kiɖe Tɛɛ Tɔm 1:26) Ðɩpɩzɩɣ nɛ ɖɩmaɣzɩnɩ ɖa-Lɩzɩyʋ wɛtʋ kɩbandʋ ɛzɩ sɔɔlɩm nɛ siɣsiɣ wɛtʋ mbʋ yɔ, ɛlɛ kpɩna ɩɩpɩzɩɣ nɛ ala mbʋ. Nɛ ɛzɩ ɖa-Lɩzɩyʋ yɔ ɖɩwɛnɩ tɩ-yɔɔ wɛʋ lɩzʋʋ waɖɛ.
● Hɔɔlɩŋ sakɩyɛ taa lɛ ɖalɩzɩɣnɩ ɖɛ-tɛ cee wayɩ. Bibl seɣtiɣ-ɖʋ se ‘ɖɩlɩzɩ wezuu, ɖiwelisi Ɛsɔ nɔɔ’ pʋ-tɔbʋʋ se ɖɩlɩzɩ se ɖɩñaŋ ɛ-paɣtʋ. (Wayɩ Wayɩ Paɣtʋ 30:19, 20) Ye ɖɩtaawɛɛnɩ tɩ-yɔɔ wɛʋ lɩzʋʋ waɖɛ yɔ, lɔŋ tasʋʋ mbʋ pɩtaawɛɛnɩ tɔbʋʋ nɩʋ nɛ halɩ pɩɩkɛ kañatʋ labʋ ɛyʋ. Mbʋ ɛzɩ Ɛsɔ kaakpa-ɖʋ nɛ ɖoŋ nɛ ɖɩla mbʋ ɛsɔɔlaa yɔ lɛ, eseɣtiɣ-ɖʋ nɛ nɔɔ kɩbaŋa se: «Ye ŋŋtisaɣ nɛ ŋwelisiɣ man-paɣtʋ! Ðɩnɛ ɛlɛ ña-laŋhɛzɩyɛ kaapɩsɩ ɛzɩ pɔɔ yɔ.»—Izaayii 48:18.
«Ɩkpa ɖoŋ mi-tisuu mbʋ pɩkɛ kiɖeɖem siŋŋ yɔ pɩ-taa»
8 Yehowa tɔzʋʋ-ɖʋ cɩnɛ se ye ɖɩñaŋɩ-ɩ yɔ ɖa pɩwazɩɣ. Ɛha-ɖʋ lidaʋ se ɖihikiɣ wazasɩ 2 ye ɖɩñaŋɩ-ɩ yɔ. Kajalaɣ lɛ, ɖa-laŋhɛzɩyɛ wɛɣ ɛzɩ pɔɔ taa lɩm yɔ, pɩɖɔʋ nɛ pikpeŋ tɛmm paa ɛzɩmtaa. Nabʋlɛ lɛ, ɖa-tʋtʋyɛ yaa ɖe-siɣsiɣ wɛtʋ kaɣ wɛʋ ɛzɩ teŋgu taa lɩm hola yɔ. Ye ŋsɩŋ teŋgu kidiiliŋ yɔɔ nɛ ŋnaɣ ɛzɩma lɩm hola lakɩ yɔ, ŋpɩzɩɣ nɛ ŋmaɣzɩ se lɩm hola kaɣ yebu wasʋʋ wiɖiyi na? Aayɩ. Pɩwɛɣ wasʋʋ yɔɔ mbʋ tam. Yehowa heyiɣ-ŋ se ñe-siɣsiɣ wɛtʋ pɩzɩɣ nɛ pɩwɛɛ mbʋ ɖɔɖɔ tam. Ye ŋwobi pɩ-yɔɔ nɛ ŋlakɩ ɛ-sɔɔlɩm yɔ, ɛɛlɔʋ-ŋ wiɖiyi kpa. (Kalɩ Keɣa 55:22.) Tɔm kɩbandʋ tʋnɛ tɩɩkpazɩɣ ɖoŋ tisuu mbʋ ŋwɛnɩ Yehowa nɛ ɛ-paɣtʋ pɔ-yɔɔ na?
Fezuu taa ñɩm
it «Kʋjɔʋ alɩwaatʋ» § 1-3
Kʋjɔʋ alɩwaatʋ
2 Kɔrɛntɩ mba 6:2 taa Pɔɔlɩ labɩnɩ tʋmɩyɛ natʋ tɔm ndʋ tɩwɛ Izaayii 49:8 taa yɔ; natʋ tɔm ndʋ yɔ: «Tɔm tʋnɛ Yehowa yɔɔdʋʋ: “Kɩbandʋ labʋ alɩwaatʋ taa lɛ, moncosi-ŋnɛ ñʋʋ yabʋ kɩyakʋ wiye lɛ, mansɩnɩ-ŋ; maawɛɛ nɛ mankandɩyɩɣ ñɔ-yɔɔ se pɩsa nɛ ŋkɛ ɛgbɛyɛ ma nɛ samaɣ ɖɛ-hɛkʋ taa, nɛ ŋɖaɣnɩ kʋsʋʋ ɛjaɖɛ, nɛ ŋyele nɛ pa-ñɩm mbʋ paaɖɛwa nɛ peyele yɔ, pɩɖaɣnɩ pɩsʋʋ pa-pʋyʋ.”» Pɩtʋʋ fɛyɩ se kiɖe tɛɛ lɛ Izaayii peheyi tɔm ndʋ nɛ ɛɛsɩŋnɩ Izrayɛɛlɩ ɛjaɖɛ. (Iza 49:3) Pɩwɩlɩɣ kpayɩ kpayɩ se natʋ tɔm ndʋ titukuuni ɛzɩma Izrayɛɛlɩ mba kaɣ pɩsʋʋ pɛ-ɛjaɖɛ taa nɛ paɖaɣnɩ-ɖɩ maʋ yɔ. Nɛ tɩlabɩ kajalaɣ ɖeɖe alɩwaatʋ ndʋ poholi Izrayɛɛlɩ mba yomiye taa yɔ; alɩwaatʋ ndʋ pamabɩ kubuka nɛ peheyi Izrayɛɛlɩ mba se ‘palɩɩ’ yomiye taa yɔ. Piyeba nɛ papɩsɩ pɛ-ɛjaɖɛ nɖɩ ɖɩɩpɩsɩ njɛyɛ yɔ ɖɩ-taa nɛ paɖaɣnɩ-ɖɩ maʋ.—Iza 49:9.
Ɛlɛ Izaayii 49:8 taa tɔm loyaɣ «maawɛɛ nɛ mankandɩyɩɣ ñɔ-yɔɔ se pɩsa nɛ ŋkɛ ɛgbɛyɛ ma nɛ samaɣ ɖɛ-hɛkʋ taa» nɛ tɔm ndʋ Yehowa yɔɔdɩ kalɩtʋ 6 taa ‘ɛ-lɩmɖʋyʋ’ yɔɔ se «ŋkɛ ajɛɛ ñalɩmɩyɛ, se pɩsa nɛ ñʋʋ yabʋ mbʋ [Ɛsɔ kɔŋna] yɔ pɩtalɩ tɛtʋ kamasɩ yɔɔ» yɔ wɩlɩɣ se natʋ tɔm ndʋ titukuuni Mesiya nɛ pʋyɔɔ lɛ natʋ tɔm ndʋ tɩwɩlɩɣ se Yesu Krɩstʋ Ɛsɔ yawa se «ma-lɩmɖʋyʋ.» (Kpaɣ Iza 42:1-4, 6, 7 nɛ ŋmaɣzɩnɩ Mat 12:18-21.) «Kʋjɔʋ alɩwaatʋ» kɛ alɩwaatʋ ndʋ Yehowa kaɣ ‘cosuu’ ɛ-lɩmɖʋyʋ nɛ ‘ɛsɩnɩ-ɩ’ yɔ, pʋyɔɔ lɛ tɩwɩlɩɣ alɩwaatʋ ndʋ Yesu kaacaɣ wezuu tɛtʋ yɔɔ yɔ; alɩwaatʋ ndʋ «ɛɛmabɩ kubusi sɔsɔsɩ nɛ etisi ɛsɩtɛɣlɩm nɛ etendi Weyi ɛɛwɛnɩ ɖoŋ se eholi-i sɩm nesi tɛɛ yɔ nɛ ɛpɔzɩ-ɩ mbʋ ɛñɩnɩɣ yɔ, nɛ ɛlɛ nɩɩnɩ-ɩ Ɛsɔ sɔɔndʋ seu mbʋ ɛɛwɛna yɔ pɩ-yɔɔ.» (Ebr 5:7-9; kpaɣ-tʋ nɛ ŋmaɣzɩnɩ Yoh 12:27, 28; 17:1-5; Luk 22:41-44; 23:46) Ye mbʋ, pɩɩkɛ Ɛsɔ Pɩyalʋ «ñʋʋ yabʋ kɩyakʋ,» pʋ-tɔbʋʋ se alɩwaatʋ ndʋ tɩ-taa ɛɖɔkɩ ɛ-cɩŋgɩlɩm wɛtʋ pilim yɔ; nɛ mbʋ pɩlɩ pɩ-taa yɔ lɛ se «ɛpɩsɩ weyi ɛ-yɔɔ pɩtɩŋɩɣna se mba payɩ pañaŋɩ-ɩ yɔ, pehiɣ tamtam ñʋʋ yabʋ yɔ.»—Ebr 5:9.
Pɩtasɩ lɛ, ɛzɩma Pɔɔlɩ labɩnɩ tʋmɩyɛ Izaayii taa natʋ tɔm yɔ pɩwɩlɩɣ se titukuuni ɖɔɖɔ Krɩstʋ ñɩma mba ɛtasɩ lɔŋ nɛ ɛtɔ se «ɩtaamʋ Ɛsɔ lootiye nɛ ɩtɩtalɩ ɖɩ-kaɖʋwa» yɔ; nɛ (ɛlabɩnɩ tʋmɩyɛ Izaayii 49:8 taa tɔm nɛ ɛtɛ lɛ) eheyi-wɛ se: «Na! Lɛɛlɛɛyɔ kpem yɔ kʋjɔʋ alɩwaatʋ. Na! Lɛɛlɛɛyɔ ñʋʋ yabʋ kɩyakʋ.» (2Kɔ 6:1, 2) Kpaɣnɩ Pantekooti 33 nɛ pɩɖɛɛ lɛ Krɩstʋ ñɩma mba papɩsɩ fezuu taa «Ɛsɔ tɛ Izrayɛɛlɩ» (Gal 6:16); ɛlɛ pɩwɛɛ se powolo pɩ-yɔɔ nɛ pawɩlɩ se pamʋnɩ Ɛsɔ lootiye, nɛ pɩsa nɛ «Kʋjɔʋ alɩwaatʋ» pɩsɩ-wɛ «ñʋʋ yabʋ kɩyakʋ.»
6-12 AVRIL
Ñɩm mbʋ pɩwɛ Ɛsɔtɔm taa yɔ IZAAYII 50-51
Welisini weyi Ɛsɔ wɩlɩ-ɩ tɔm yɔ
Pafalɩsɩ Kewiyaɣ tɔm susuyaa
5 Alɩwaatʋ talaa lɛ, Yehowa wɩlɩ ɛ-Pɩyalʋ tʋmɩyɛ nɖɩ ɛlɛ kaɣ labʋ tɛtʋ yɔɔ yɔ. Maɣzɩ natʋ tɔm tʋnɛ tɩ-yɔɔ nɛ ŋna; tɩyɔɔdʋʋ taabalɩyɛ nɖɩ ɖɩɩwɛ Wɩlɩyʋ Sɔsɔ Yehowa nɛ ɛ-Pɩyalʋ pɛ-hɛkʋ taa yɔ ɖɩ-tɔm. (Kalɩ Izaayii 50:4, 5.) Natʋ ndʋ tɩyɔɔdʋʋ se Yehowa fezaɣ ɛ-Pɩyalʋ «paa tanaŋ ŋgʋ.» Pɩwɛ ɛzɩ wɩlɩyʋ weyi ɛkʋsʋʋ e-sukulibɩɣa tanaŋ tɛɛ pala se ɛwɩlɩ-kɛ tɔm yɔ. Bibl taa tazʋʋ takayaɣ nakɛyɛ yɔɔdaa se: «Pɩwɛ ɛzɩ Yehowa wokini-i sukuli ɖaŋ taa ɛzɩ sukulibɩɣa yɔ, nɛ ɛkpɛlɩkɩɣ-ɩ ɛzɩma esusi tɔm nɛ tɔm ndʋ pɩwɛɛ se esusi yɔ.» Ɛsɔdaa «sukuli» ŋgʋ kɩ-taa, Yehowa wɩlɩ ɛ-Pɩyalʋ ‘tɔm ndʋ pɩwɛɛ se ɛyɔɔdɩ nɛ tɔm ndʋ pɩwɛɛ se ɛwɩlɩ yɔ.’ (Yohanɛɛsɩ 12:49) Yehowa wɩlɩ ɛ-Pɩyalʋ ɖɔɖɔ ɛzɩma pɩwɛɛ se ɛwɩlɩ tɔm yɔ. Yesu kɔm tɛtʋ yɔɔ lɛ, ɛlabɩnɩ falɩsʋʋ mbʋ ɛ-Caa ha-ɩ yɔ tʋmɩyɛ camɩyɛ. Ɛlabɩ ɛ-Ɛsɔ sɛtʋ tʋma camɩyɛ nɛ ɛfalɩsɩ ɛ-wayɩ tɩŋɩyaa se pala pɛ-Ɛsɔ sɛtʋ tʋma camɩyɛ ɖɔɖɔ.
cf 133 § 13
«Mɔnsɔɔlɩ Caa»
13 Pʋcɔ nɛ Yesu kɔŋ tɛtʋ yɔɔ lɛ, ɛkpɛlɩkɩ tɔm sakɩyɛ ɛ-Caa cɔlɔ nɛ taa leleŋ. Natʋ tɔm ndʋ tɩwɛ Izaayii 50:4-6 taa yɔ tɩwɩlɩɣ se Yehowa kaaha-ɩ ŋgee falɩsʋʋ mbʋ pɩsɩɣnɩ-ɩ se ɛla Mesiya tʋmɩyɛ nɖɩ ɛkaɣ-ɩ ɖʋʋ yɔ. Falɩsʋʋ mbʋ paa pɩ-taa nabʋyʋ kaayɔɔdaɣ kala wena ɛkaɣ katʋʋ mbʋ pʋyɔɔ yɔ ɛkɛ Yehowa tɛ patam num yɔ a-tɔm yɔ, ɛɛsɔɔlɩ siŋŋ se ɛkpɛlɩkɩ. Pʋwayɩ ɛkɔm tɛtʋ yɔɔ nɛ ɛpaɣlaa lɛ, ewobi pɩ-yɔɔ nɛ ɛsɔɔlɩ wobu ɛ-Caa ɖɩɣa taa nɛ ɛsɛɣ Ɛsɔ nɛ ɛkpɛlɩkɩɣ tɔm ndʋ tɩlabɩ nɔɔ kʋɖʋmaɣ nɛ Yehowa sɔɔlɩm yɔ. Bibl yɔɔdʋʋ se Yesu kaasɔɔlɩ wobu templo taa nɛ sinaagɔɔgɩ taa. (Luka 4:16; 19:47) Ye ɖɩsɔɔlaa se sɔɔlɩm mbʋ ɖɩwɛnɩ Yehowa yɔɔ yɔ pɩwɛɛ ɖoŋ tam yɔ, pɩwɛɛ se ɖiwoki Krɩstʋ mba kediɣzisi ɖoŋ ɖoŋ nɛ ɖɩsɛɣ Yehowa nɛ ɖɩkpɛlɩkɩɣ nɛ ɖɩtɩlɩɣ-ɩ nɛ pɩkɩlɩɣ nɛ ɖɩwɛɣnɩ ɛsɩmɩyɛ ɛ-yɔɔ nɛ pɩkɩlɩɣ.
Fezuu taa ñɩm
it «Ðihuyiye» § 2
«Ðihuyiye»
Yehowa tɩŋnɩ Izaayii yɔɔ nɛ ɛlabɩnɩ tʋmɩyɛ kpaɣʋ nɛ kɛzʋʋ nabʋyʋ nɛ ɛyɔɔdɩ kaaŋ ɖihuyiye naɖɩyɛ nɛ mbʋ palakɩ ɖɩ-taa yɔ pɩ-tɔm. (Iza 51:1) Mayaɣ ŋga katɩŋaa yɔ kawɩlɩɣ se pɩwɛ ɛzɩ «kaaʋ» sɩŋnɩ Abraham, weyi ɛkɛ Izrayɛɛlɩ ɛjaɖɛ tigiɖe yɔ; nɛ «ɖenɖe pohuyaa» yɔ sɩŋnɩ Saara, weyi ɛlʋlɩ Izrayɛɛlɩ mba cɔzɔ Izaakɩ yɔ. (Iza 51:2) Ɛlɛ ɛzɩma pɩtɩŋnɩ Ɛsɔ ɖoŋ nɛ piti lakasɩ yɔɔ nɛ palʋlɩ Izaakɩ yɔ pɩwɩlɩɣ se pɩtɩla yɔ ɖihuyiye nɖɩ ɖɩwɛnɩ fezuu taa tɔbʋʋ nɩʋ nabʋyʋ ɖɔɖɔ. Ye mbʋ, Wayɩ Wayɩ Paɣtʋ 32:18 wɩlɩɣ se Yehowa kɛnɩ ‘Kaaʋ ŋgʋ kɩkɛ Izrayɛɛlɩ caa’ yɔ, ‘Ɛsɔ weyi ɛlʋlɩ-ɩ yɔ’ [lakaɣ ‘lʋlʋʋ’ ɖɔɖɔ palabɩnɩ tʋmɩyɛ Iza 51:2 taa ɖeɖe pɔyɔɔdɩ Saara tɔm yɔ.]
13-19 AVRIL
ÑƖM MBƲ PƖWƐ ƐSƆTƆM TAA YƆ IZAAYII 52-53
Yesu lɩzɩ sɔɔlɩm sɔsɔm nɛ ɛwɩlɩ!
w10 15/11 7 § 2
Piya evelisi, itaayele nɛ mɩ-ɖaɣʋnaa wɛɛnɩ ɖoŋ mɩ-yɔɔ
2 Ɛzɩ ña-ɖaɣʋnaa wɛnɩ ɖoŋ ñɔ-yɔɔ? Ye ɛɛɛ yɔ, ɛbɛ yɔɔ? Ɛzɩ pɛwɛnɩ ɖoŋ ñɔ-yɔɔ mbʋ pʋyɔɔ yɔ ŋsɔɔlaa se ñɔ-tɔm ɛkɛdɩnɩ-wɛ? Ye ŋsɔɔlaa se ñɔ-tɔm ɛkɛdɩnɩ-wɛ yɔ pɩtɩwɛɛkɩ pʋyʋ. Toovenim taa lɛ, ɛyaa sɔsaa ɖɔɖɔ sɔɔlaa se pɔ-tɔm ɛkɛdɩnɩ pa-ɖaɣʋnaa. Paa ɛyʋ ɛkɛ pɩɣa yaa sɔsɔ yɔ, ye lalaa ɩtɩsɔɔlɩ-ɩ yɔ pɩɩkɛdɩɣnɩ-ɩ. Ɛlɛ tɔm kɛlɛ se ye ŋsɔɔlaa se ŋla mbʋ pɩwɛ siɣsiɣ yɔ, lalaa ɩɩkaɣ sɔɔlʋʋ ñɔ-tɔm paa ɛzɩmtaa. Halɩ Yesu ɖɔɖɔ katɩ wɛtʋ ndʋ. Ɛlɛ Yesu lakaɣ mbʋ pɩwɛ siɣsiɣ yɔ paa ɛzɩmtaa. Ɛyaa nabɛyɛ tɩŋ Ɛsɔ Pɩyalʋ nɛ papɩsɩ ɛ-tɔmkpɛlɩkɩyaa ɛlɛ lalaa ñenimi-i nɛ ‘patɩkpaɣ-ɩ nɛ payaa nabʋyʋ.’—Iza. 53:3.
Wɛɛnɩ tɩ luzuu nɛ ñɔ-tɔm kɛdɩnɩ Yehowa
15 Fenasɩ kɛdɛzaɣ ñɩnzɩ nzɩ Yesu caɣ wezuu tɛtʋ yɔɔ yɔ sɩ-taa ɛɛwɛ nɩɣzɛ taa siŋŋ. Ɛɛnawa se pakaɣ-ɩ kʋʋ nɛ ɛkaɣ nɩʋ ɖɔɖɔ siziŋ siŋŋ. (Yoh. 3:14, 15; Gal. 3:13) Fenasɩ pazɩ pʋcɔ nɛ ɛsɩkɩ lɛ, ɛyɔɔdaa se ɛnɩɣ siziŋ siŋŋ. (Luka 12:50) Nɛ kɩyakɩŋ pazɩ pʋcɔ nɛ ɛsɩkɩ lɛ, ɛyɔɔdaa se: «Mɛwɛ laŋwɛɛkɩyɛ taa.» Tɔm pee wena ɛlabɩnɩ tʋmɩyɛ alɩwaatʋ ndʋ ɛtɩmnɩ ɛ-Caa nɛ eheyi-i ɛzɩma pɩlakaɣ-ɩ yɔ awɩlɩɣ se eluzaɣ ɛ-tɩ Ɛsɔ tɛɛ nɛ ɛñaŋɩ-ɩ. Ɛyɔɔdaa se: «Caa, lɩzɩ-m ñɩɣyʋʋ kʋnɛ kɩ-taa. Ɛlɛ pʋyɔɔ mɔnkɔm ñɩɣyʋʋ kʋnɛ kɩ-yɔɔ. Caa, sa ña-hɩɖɛ.» (Yoh. 12:27, 28) Alɩwaatʋ talaa lɛ, Yesu labɩ abalɩtʋ nɛ ɛwɩlɩ ɛ-tɩ Ɛsɔ koyindinaa mba panazɩ-ɩ siŋŋ, paɖʋ-ɩ fɛyɛ nɛ pakʋ-ɩ yɔ. Paa Yesu kaawɛ nɩɣzɛ taa siŋŋ nɛ ɛnɩɣ siziŋ pɩdɩɩfɛyɩ yɔ, eluzi ɛ-tɩ nɛ ɛla Ɛsɔ sɔɔlɩm. Pɩtʋʋ fɛyɩ se ɖɩpɩzɩɣ nɛ ɖɩyɔɔdɩ se Yesu hanɩ tɩ luzuu kɩɖaʋ ŋgʋ kɩ-wayɩ fɛyɩ yɔ nɩɣzɛ alɩwaatʋ taa.—Kalɩ Izaayii 53:7, 10.
Fezuu taa ñɩm
it «Wondu» § 2
«Wondu»
Ðoŋ ɖoŋ lɛ, palakɩnɩ tʋmɩyɛ tɔm piye keliʹ nɛ pɔyɔɔdʋʋ wondu ndɩ ndɩ ndʋ palakɩnɩ tʋmɩyɛ kooka kiɖeɖeɣa taa yɔ tɩ-tɔm. Wondu ndʋ tɩ-taa natʋyʋ lɛ tɛlɛmnaa, peeɣsi, pɛɛlɩnaa, ñanzɩ, kela lɔɔyɩsɩ, miŋ ñanzɩ, wondu ndʋ paɖɩzɩɣnɩ miŋ yɔ, kpɩɖɩŋ, ñanzɩ sɔsɔsɩ nɛ kɔpʋnaa. (Ejl 25:29, 30, 39; 27:3, 19; 37:16, 23; 38:3; 1Aw 7:40-50; 2Kr 4:11-22) Ɛzɩma palakaɣnɩ wondu ndʋ tʋmɩyɛ Ɛsɔ sɛtʋ taa yɔ pʋyɔɔ lɛ tɩɩkɛ wondu «kiɖeɖetu.» (1Aw 8:4) Alɩwaatʋ ndʋ Yuuda mba kʋyɩ Babilɔɔnɩ pɩnaɣ 537 P.P.Y. se papɩsɩɣ pɛ-tɛ yɔ, paawɛnɩ waɖɛ sɔsɔɖɛ se pɛkpɛndɩnɩ wondu kiɖeɖetu ndʋ Babilɔɔnɩ wiyaʋ Nabukodonozɔɔrɩ kaakpaɣ Yeruzalɛm yɔ nɛ pʋyɔɔ lɛ pɩɩwɛɛ se pa-maɣmaɣ pɛwɛɛ kele kele Ɛsɔ sɛtʋ hɔɔlʋʋ taa nɛ wezuu kɩbaŋʋ caɣʋ hɔɔlʋʋ taa. Pʋyɔɔ lɛ natʋ tɔm tʋnɛ titukaɣni-wɛ: «Iposi mɩ-tɩ, iposi mɩ-tɩ, ɩlɩɩ peeɖe, itaatukuni azuluma pʋyʋ! Ɩlɩɩ ɛ-hɛkʋ taa, ɩwɛɛ kele kele tam, mɩ mba ɩkpakɩɣ Yehowa wondu yɔ.» (Iza 52:11) Pɩtɩkɛ mbʋ pɩnaɣ ɛsa yɔɔ yɔ pi-ɖeke pɩ-hɔɔlʋʋ taa pɩɩwɛɛ se pɛwɛɛ kele kele ɛlɛ pɩɩwɛɛ se pɛwɛɛ kele kele pa-laŋɩyɛ taa ɖɔɖɔ. Apostoloo Pɔɔlɩ maɣaɣ Kɔrɛntɩ mba takayaɣ lɛ, ɛlabɩnɩ tʋmɩyɛ Izaayii 52:11 taa tɔm nɛ ɛwɩlɩ se pɩpɔzʋʋ se Krɩstʋ mba ɩwɛɛ kele kele tomnaɣ yɔɔ nɛ fezuu taa.—2Kɔ 6:14-18; 7:1.
20-26 AVRIL
ÑƖM MBƲ PƖWƐ ƐSƆTƆM TAA YƆ IZAAYII 54-55
Ɛbɛ ŋtisiɣ se ŋkpaɣ nɛ ŋlaa nɛ pɩsa nɛ ŋmʋ Yehowa wɩlɩtʋ?
w09 15/9 21 § 3
Yehowa wɩlɩtʋ mʋ ñɩm siŋŋ nɛ pɩkpaɖɩ
3 Yehowa camɩyɛ lakasɩ yɔɔ lɛ ɛsɔɔlɩ faaa se ɛwɩlɩ ɛyaa mantɩtalɩ pilimwaa tɔm. Pɔyɔɔdaɣ patam numwaa tɔm natʋ tɔm ndʋ tɩwɛ Izaayii 54:13 taa yɔ tɩ-taa lɛ pɔyɔɔdaa se: «Yehowa kaɣ ña-pɩyalaa tɩŋa tɔm wɩlʋʋ, nɛ ña-pɩyalaa laŋhɛzɩyɛ kaɣ ɖɔʋ pɩdɩɩfɛyɩ.» Tɔm tʋnɛ titukuuni ɖɔɖɔ Krɩstʋ «heŋ lɛɛŋ.» (Yoh. 10:16) Pɩlabɩ nɔɔ kʋɖʋmaɣ nɛ natʋ lɛɛtʋ ndʋ tɩwɛɛ nɛ tɩlakɩ ɖa-alɩwaatʋ tʋnɛ tɩ-taa yɔ. Izaayii na natʋ ndʋ tɩ-taa ajɛɛ kpeekpe taa ɛyaa wɛɛ nɛ pɔlɔtʋʋ nɛ powoki kele kele Ɛsɔ sɛtʋ taa yɔ. Ɛkɛdaa se pɛwɛɛ nɛ peheyiɣ ɖama se: «Ðɩkpa Yehowa pʋʋ yɔɔ, Yakɔɔb tɛ Ɛsɔ ɖɩɣa taa. Ɛkaɣ-ɖʋ wɩlʋʋ ɛ-nʋmɔŋ, nɛ ɖɩkaɣ ɖɔm ɛ-nʋmɔsɔkasɩ taa.» (Iza. 2:1-3) Waɖɛ sɔsɔɖɛ kpem pɩkɛnaa se Yehowa ɛwɩlɩ-ɖʋ tɔm.
«Ya toovenim tɔm, taapɛdɩ-tʋ»
6 Kalɩ Izaayii 55:1-3. Tɔm ndʋ Yehowa tɩŋnɩ nayʋ Izaayii yɔɔ nɛ ɛyɔɔdɩ yɔ, tɩlɩzɩɣ mbʋ toovenim yabʋ kɛnaa yɔ pɩ-taa nɛ pɩkpaɖɩ. Bibl mayaɣ ŋga ka-taa Yehowa kpaɣ ɛ-tɔm nɛ ɛmaɣzɩnɩ lɩm, naalɩm nɛ sʋlʋm. Ɛzɩ lɩm kiniɣdim mbʋ pɩwɛ kele kele yɔ, toovenim tɔm ndʋ tɩwɛ Ɛsɔtɔm taa yɔ tɩhɛzɩɣ ɛyʋ laŋɩyɛ. Mbʋ ɖɔɖɔ, ɛzɩ naalɩm haɣʋ ɛyʋ ɖoŋ nɛ pɩsɩɣnɩ piya nɛ sɩpaɣlɩɣ yɔ, Yehowa tɔm kpazɩɣ-ɖʋ ɖoŋ nɛ tɩsɩɣnɩ-ɖʋ se ɖɩpɩɩ fezuu taa. Pɩtasɩ lɛ, Yehowa tɔm wɛ ɛzɩ sʋlʋm yɔ. Ɛzɩma tɩyɛ? Bibl wɩlaa se nɔɔ kʋɖʋmaɣ nakɛyɛ wɛ sʋlʋm nɛ taa leleŋ pɛ-hɛkʋ taa. (Keɣ. 104:15) Ye mbʋ, Yehowa heyuu ɛ-samaɣ se kaya «vɛɛ» yɔ, ɛñɩnɩɣ se eheyi-ɖʋ se ye ɖe-wezuu caɣʋ ɛlabɩ nɔɔ kʋɖʋmaɣ nɛ tɔm ndʋ payɩ ɛyɔɔdɩ Masɩ taa yɔ, ɖɩkaɣ hiɣu taa leleŋ. (Keɣ. 19:8) Kɩɖaʋ kʋnɛ kɩwɩlɩɣ wazasɩ nzɩ Ɛsɔtɔm kpɛlɩkʋʋ nɛ tɩ-yɔɔ ɖɔm kɔŋna yɔ. Ðɩpɩzɩɣ nɛ ɖɩkpaɣ pana wena ɖɩñakɩ yɔ nɛ ɖɩmaɣzɩnɩ liidiye nɖɩ pɩpɔzʋʋ se ɖɩhɛyɩ yɔ. Ye mbʋ iyele nɛ ɖɩtazɩ wondu kagbanzɩ ndʋ ɖɩpɩzɩɣ nɛ ɖɩhɛyɩ nɛ pɩsa nɛ ɖɩya toovenim tɔm yɔ tɩ-taa.
KƖLAŊ WEYI ŊLAWA SE PƖSA NƐ ŊYA TOOVENIM?
7 Alɩwaatʋ. Ɛyaa mba payɩ payakɩ toovenim yɔ, pɩwɛɛ se pɛhɛyɩ pa-alɩwaatʋ. Pɩpɔzɩ alɩwaatʋ pʋcɔ nɛ ɛyʋ pɩzɩ nɛ ewelisi Kewiyaɣ tɔm, ɛkalɩ Bibl nɛ Bibl kpɛlɩkʋʋ takayɩsɩ, ɛkpɛlɩkɩ ɛ-tɩ yɔɔ, ɛñɔɔzɩ ɛgbɛyɛ taa kediɣzisi nɛ ewobi-sɩ. Pɩwɛɛ se ‘ɖɩya’ yaa ɖɩkpaɣ alɩwaatʋ ndʋ ɖɩlakɩnɩ tʋma wena a-tɔm tɩkɩlɩ cɛyʋʋ yɔ nɛ ɖɩyabɩnɩ toovenim. (Kalɩ Efɛɛzɩ mba 5:15, 16 nɛ pɩ-tɛɛ tɔm.) Alɩwaatʋ ɛzɩma pɩpɔzʋʋ se ɛyʋ ɛkpaɣ nɛ ɛtɩlɩnɩ Bibl taa kajalaɣ wɩlɩtʋ? Pɩlɩɣnɩ wɛtʋ ndʋ tɩ-taa ɖɩwɛɛ yɔ. Mbʋ ɖɩpɩzɩɣ nɛ ɖɩkpɛlɩkɩ Yehowa lɔŋsɩnɖɛ, ɛ-nʋmɔŋ nɛ ɛ-tʋma pɔ-yɔɔ yɔ, pɩfɛyɩ tɩnaɣ. (Roma 11:33) Kajalaɣ Feŋuu Tilimiye kpaɣ toovenim tɔm nɛ ɖɩmaɣzɩnɩ «hɛɖʋʋ cikpeluu» nakʋyʋ. Ðɩyɔɔdaa se: «Ñe-liu ɛtaasɩbɩnɩ hɛɖʋʋ kʋɖʋmʋʋ yaa toovenim tɔm kʋɖʋmtʋ ɖeke. Ye hɛɖʋʋ kʋɖʋmʋʋ kaamaɣaa yɔ, hɛtʋ sakɩyɛ taawɛɛ. Kpaɣ hɛtʋ sakɩyɛ, nɛ ŋtasɩ ñɩnʋʋ hɛtʋ sakɩyɛ nɛ ŋsɔzɩ.» Pɩwɛɛ se ɖɩpɔzɩ ɖa-tɩ se: «Toovenim hɛtʋ ndʋ mɛwɛna yɔ, tɩɖɔwa?» Paa ɛyʋ ɛcakɩ wezuu tam tam yɔ, ɛɛpɩzɩɣ nɛ ɛtɛ Yehowa yɔɔ tɔm kpɛlɩkʋʋ. Sɔnɔ mbʋ pɩ-tɔm cɛyaa yɔ lɛ se ɖɩlabɩnɩ ɖa-alɩwaatʋ tʋmɩyɛ nɛ lɛɣtʋ nɛ ɖɩpɩzɩ ɖɩya toovenim tɔm sakɩyɛ. Iyele nɛ ɖɩyɔɔdɩ ɛyaa mba pañɩnaɣ siŋŋ se patɩlɩ toovenim yɔ pa-taa nɔɔyʋ tɔm.
be 14 § 3-5
«Ɩkpa mɩ-tɩ nɛ ɛzɩma iwelisiɣ yɔ»
Mbʋ pɩpɩzɩɣ nɛ pɩɖɩɣ-ɖʋ nʋmɔʋ se ɖitaawelisi camɩyɛ yɔ pɩɖɔwa. Pɩtɩla yɔ nɩɣzɛ naayɛ wɛɛ acɛyɩɣ-ɖʋ. Ðɩpɩzɩɣ nɛ ɖɩnɩɩ kɔkɔɖɛ naɖɩyɛ taŋ kpaaŋ taa yaa awayɩ nɛ pɩhɔ ɖa-lɩmaɣza. Ye ɖɩjaɣyɛ ɛfɛyɩ camɩyɛ yaa soŋaɣ yaa wɛtʋ lɛɛtʋ ɛwɛɛ yɔ, pɩpɩzɩɣ nɛ pɩwɛɛ kaɖɛ se ɖɩka ɖa-lɩmaɣza. Mba pɛwɛnɩ piya cikpesi yɔ ɖoŋ ɖoŋ lɛ pɩwɛ-wɛ kaɖɛ se paka pa-lɩmaɣza tɔm ndʋ pɔyɔɔdʋʋ kediɣzaɣ taa yɔ tɩ-yɔɔ. Ɛbɛ pɩzɩɣ nɛ pɩsɩnɩ-ɖʋ nɛ ɖɩka ɖa-lɩmaɣza kediɣzaɣ taa ɖʋtʋ yɔɔ?
Pɩsa nɛ ɖɩka ɖa-lɩmaɣza tɔm ndʋ pɔyɔɔdʋʋ kediɣzaɣ taa yɔ tɩ-yɔɔ lɛ pɩwɛɛ se ɖɩlabɩnɩ ɖɛ-ɛsa tʋmɩyɛ camɩyɛ. Ye ŋcɔŋnɩ tɔm yɔɔdɩyʋ yɔ, pɩsɩɣnɩ-ŋ nɛ ŋka ña-lɩmaɣza tɔm ndʋ ɛyɔɔdʋʋ yɔ tɩ-yɔɔ. Ye ɛya Bibl mayaɣ nakɛyɛ yɔ, paa ŋsɩm-kɛ camɩyɛ yɔ, kuli-kɛ nɛ ŋtɩŋɩ-ɩ alɩwaatʋ ndʋ ɛkalɩɣ-kɛ yɔ. Ye kɔkɔɖɛ naɖɩyɛ yaa nabʋyʋ ɛlakɩ yɔ pɩtɩkɛ paa ɛzɩmtaa pɩwɛɛ se ŋkɛzɩ ñɛ-ɛsa se ŋna se ɛbɛ lakɩ. Ye ñɛ-ɛsa ɩwɛɛ nɛ ayɛlɩɣ nɛ ña-maɣzɩm wɛɛ wondu sakɩyɛ yɔɔ yɔ, tɔm ndʋ pɛwɛɛ nɛ pɔyɔɔdʋʋ tɔm ɖɩyɔɔdɩyɛ yɔ tɩ-taa sakɩyɛ ɖɛɣ ñɔ-yɔɔ.
Ye nabʋyʋ ɛhaɣ-ŋ ‘nɩɣzɛ’ nɛ pɩwɛ-ŋ kaɖɛ se ŋka ña-lɩmaɣza kediɣzaɣ taa ɖʋtʋ yɔɔ yɔ, tɩmnɩ Yehowa se ɛhɛzɩ ña-maɣzɩm nɛ ña-laŋɩyɛ nɛ pɩsa nɛ ŋpɩzɩ ŋwelisi camɩyɛ. (Keɣ. 94:19; Filp. 4:6, 7) Tɩmɩ tam sakɩyɛ ye pɩpɔzʋʋ yɔ. (Mat. 7:7, 8) Yehowa yebina nɛ ɛgbɛyɛ taa kediɣzisi ɖʋtʋ wɛɛ. Pʋyɔɔ lɛ ña-taa pɩzɩɣ nɛ pɩtɛ se ɛsɔɔlaa se kediɣzisi ɛwazɩ-ŋ camɩyɛ.—1 Yoh. 5:14, 15.
Fezuu taa ñɩm
«Taanɩɣzɩ, mbʋ pʋyɔɔ yɔ mɛnkɛ ñɛ-Ɛsɔ»
14 Kajalaɣ lɛ, ɖɩnawa se ɖɩkɛʋ Krɩstʋ wayɩ tɩŋɩyaa yɔ, ɛyaa ɩɩkaɣ-ɖʋ naʋ nɛ ɛsɩyɛ. (Mat. 10:22) Yesu kaayɔɔdaa se pakaɣ nazʋʋ ɛ-wayɩ tɩŋɩyaa siŋŋ kɛdɛzaɣ kɩyakɩŋ taa. (Mat. 24:9; Yoh. 15:20) Nabʋlɛ lɛ, Izaayii natʋ tɔm wɩlɩ-ɖʋ se pɩtasɩnɩ se ɖo-koyindinaa ɩɩkaɣ-ɖʋ naʋ nɛ ɛsɩyɛ lɛ, pakaɣ labɩnʋʋ you wondu ndɩ ndɩ tʋmɩyɛ se pakaɖɩnɩ-ɖʋ. Tɩ-taa natʋyʋ lɛ ɛzɩma patɩŋɩɣnɩ mɛsaɣ tɛɛ nʋmɔŋ nɩɩyɩ yɔɔ se peyele nɛ pitibi-ɖʋ yɔɔɔ yɔ, cɛtɩm tɔm ndʋ pɔyɔɔdʋʋ ɖɔ-yɔɔ yɔ, nɛ nazɩm. (Mat. 5:11) Yehowa ɛɛkaɣ ɖɩɣʋ nʋmɔʋ ɖo-koyindinaa se pataalabɩnɩ tʋmɩyɛ you wondu ndʋ nɛ poyooni-ɖʋ. (Efɛz. 6:12; Natʋ 12:17) Ɛlɛ pɩtɩpɔzɩ se sɔɔndʋ ɛkpa-ɖʋ. Ɛbɛ yɔɔ?
15 Yʋsɩ tɔm kɩcɛyɩtʋ naadozo ñɩndʋ ndʋ tɩ-yɔɔ pɩtɩpɔzɩ se ɖɩsɔɔ yɔ. Yehowa yɔɔdaa se: «Paa wonuu ŋgʋ» pakpaɣaa se poyouni-ɖʋ yɔ «kɩɩkaɣ wazʋʋ pʋyʋ.» Ɛzɩ tilimiye sɔsɔɖɛ kandɩyʋʋ ɖɔ-yɔɔ se paa tɛʋ ɛnɩɣ ɛzɩma yɔ pɩtaakɔnɩ-ɖʋ kaɖɛ yɔ, mbʋ ɖɔɖɔ Yehowa kandɩyɩɣ ɖɔ-yɔɔ se «kañatʋ tɩnaa» ɩtaalabɩ-ɖʋ nabʋyʋ. (Kalɩ Izaayii 25:4, 5.) Ðo-koyindinaa ɩɩkaɣ pɩzʋʋ kpa se pɔkɔnɩ kaɖɛ ɖe-weziŋ yɔɔ tam tam.—Iza. 65:17.
27 AVRIL-3 MAI
ÑƖM MBƲ PƖWƐ ƐSƆTƆM TAA YƆ IZAAIYII 56-57
Ða-taa wɛ leleŋ se Yehowa kɛnɩ ɖɛ-Ɛsɔ
ip-2 269 § 14-16
Yehowa yeki nɛ ajamaa fezuu ɖaɣnɩ kpaʋ ɖoŋ
14 Ɛlɛ Yehowa suuɖu ɖʋʋ alɩwaatʋ kaɣ sɩʋ tɩnaɣ. Yehowa yɔɔdaɣ alɩwaatʋ ndʋ tɩ-tɔm lɛ ɛyɔɔdaa se: «Mankaɣ yebu nɛ patɩlɩ “ñe-siɣsiɣ wɛtʋ” nɛ ña-tʋma, nɛ pɩɩkaɣ-ŋ wazʋʋ. Alɩwaatʋ ndʋ ŋmakɩ kubusi se pasɩnɩ-ŋ yɔ, ña-sɩʋ kpelisi nzɩ ŋkpeɣlaa yɔ sɩɩkaɣ ña-ñʋʋ yabʋ. Helim kaɣ sɩ-tɩŋa kpaɣʋ nɛ pɩɖɛna, cɛɛkɛ helim mbʋ ɛyʋ feziɣ yɔ, pɩkaɣ-sɩ kpaɣʋ nɛ pɩɖɛna.» (Izaayii 57:12, 13a) Yehowa kaɣ kuluu nɛ ɛwɩlɩ se Yuuda mba siɣsiɣ wɛtʋ kɛ pɩ-tɛɛ nɛ pɩ-yɔɔ lakasɩ. Pɛ-tɛ pɩ-tɛɛ nɛ pɩ-yɔɔ lakasɩ ɩɩkaɣ-wɛ wazʋʋ pʋyʋ. ‘Pa-sɩʋ kpelisi nzɩ pekpeɣlaa yɔ sɩɩkaɣ pa-ñʋʋ yabʋ.’ Alɩwaatʋ ndʋ asɛyʋʋ talɩɣ yɔ, ɛsɔnaa mba pataɣ-wɛ liu yɔ cɛɛkɛ helim mbʋ ɛyʋ feziɣ yɔ, pɩkaɣ-wɛ kpaɣʋ nɛ pɩɖɛna.
15 Yehowa tɔm ndʋ tɩlabɩ pɩnaɣ 607 P.P.Y. Pɩnaɣ ŋga ka-taa Babilɔɔnɩ Wiyaʋ Nabukodonozɔɔrɩ yɔkɩ Yeruzalɛm, ɛñaɣzɩ miŋ Templo, nɛ ɛkpaɣ ɛyaa hɔɔlʋʋ sɔsɔʋ nɛ ɛɖɛnɩ yomiye taa. «Mbʋ pɩlaba nɛ pakpaɣ Yuuda mba pɛ-ɛjaɖɛ taa nɛ pɛkɛzɩ-wɛ tɛtʋ.»—2 Awiya 25:1-21.
16 Mbʋ ɖɔɖɔ sɩʋ kpelisi sakɩyɛ nzɩ mba payaɣ pa-tɩ se Krɩstʋ mba yɔ pɛwɛɛ nɛ pekpeɣliɣ yɔ sɩɩkaɣ pa-ñʋʋ yabʋ Yehowa pana kɩyakʋ wiye. (Izaayii 2:19-22; 2 Tesalooniiki mba 1:6-10) Pakaɣ ɖɩzʋʋ «Babilɔɔnɩ Sɔsɔʋ,» pʋ-tɔbʋʋ se ɛjaɖɛ yɔɔ cɛtɩm Ɛsɔ sɛtʋ agbaa tɩŋa; a-hɔɔlʋʋ nakʋyʋ lɛ mba payaɣ pa-tɩ se Krɩstʋ mba yɔ. Tɛtɛgbɩnɛ nɖɩ ɖɩsɛ cɩɩɩ yɔ nɛ ɖɩ-hɩŋ hiu ‘pakaɣ paɖʋʋ Babilɔɔnɩ Sɔsɔʋ nɛ pakaɣ wɛɛkʋʋ kɩ-ñɩm tɩŋa nɛ peyebi-kʋ ndaakpeɖe, nɛ pakaɣ tɔɔʋ ki-tomnaɣ nɛ pañaɣzɩ-kʋ miŋ caɣ caɣ.’ (Natʋ 17:3, 16, 17) Ða-taa wɛ leleŋ siŋŋ se ɖɩñam paɣtʋ tʋnɛ: «Ɩlɩɩ kɩ-taa, man-samaɣ, ye ɩtɩsɔɔlɩ se mɩ nɛ kʋ ɩkaa kɩ-kɩwɛɛkɩm yɔ, nɛ ye ɩtɩsɔɔlɩ se ihiɣ kɩ-asɛyɩŋ hɔɔlʋʋ nakʋyʋ yɔ.» (Natʋ 18:4, 5) Tɛtɛ nɛ ɖɩtaatasɩ pɩsʋʋ kɩ-taa yaa kɩ-nʋmɔŋ taa kpa.
«Men-kewiyaɣ tɩlɩɩnɩ ɛjaɖɛ yɔɔ cɩnɛ»
16 Lɛɣzɩtʋ ndʋ tɩ-tɔm cɛyɩ siŋŋ! Bibl kpaɣ ɛyaa nɛ kɩmaɣzɩnɩ teŋgu ŋgʋ kɩwɛɛ nɛ kɩwasɩɣ nɛ kɩ-lɩm hola falɩɣ yɔ, pʋ-tɔbʋʋ se kɩfɛyɩ laŋhɛzɩyɛ taa. (Iza. 17:12; 57:20, 21; Natʋ 13:1) Paa politiki labʋ eyeki nɛ ɛyaa kaɖɩɣnɩ ɖama, patayɩɣ ɖama taa nɛ palakɩ ñam ñam lakasɩ yɔ, ɖa Yehowa sɛyaa lɛ, ɖɩwɛ laŋhɛzɩyɛ nɛ nɔɔ kʋɖʋmaɣ taa. Nɛ Yehowa naɣ se ɛ-samaɣ wɛ nɔɔ kʋɖʋmaɣ taa ɛjaɖɛ nɖɩ ɖɩtayaa yɔ ɖɩ-taa lɛ, pɩlakɩ-ɩ leleŋ siŋŋ.—Kalɩ Sofonii 3:17.
it «Tɛtʋ» § 21
Tɛtʋ
Palabɩnɩ ɖɔɖɔ tʋmɩyɛ tɔm piye tɛtʋ nɛ pɩsɩŋnɩ mbʋ ɛyaa laba nɛ pɩkam camɩyɛ nɛ pɩkɩlɩ yɔ. Pakpaɣ ɛzɩma ɖʋtʋ ndʋ ɛyaa wɛna nɛ tɩlɛɣzɩɣ yem yem yɔ nɛ pamaɣzɩnɩ teŋgu ŋgʋ kɩɩpɩzɩɣ se kɩcaɣ ɖiɣ ɖiɣ yɔ.—Iza 57:20; Yak 1:6; Yud 13; kpaɣ-tʋ nɛ ŋmaɣzɩnɩ Nat 12:16; 20:11; 21:1.
it «Laŋhɛzɩyɛ» § 3
Laŋhɛzɩyɛ
Mbʋ piyeki se ɛyʋ ɛwɛɛ laŋhɛzɩyɛ taa yɔ. Yehowa kɛ laŋhɛzɩyɛ tɛ Ɛsɔ (1Kɔ 14:33; 2Kɔ 13:11; 1Te 5:23; Ebr 13:20) nɛ laŋhɛzɩyɛ hiɖe (Kɩg 6:26; 1Kr 22:9; Ke 4:8; 29:11; 147:14; Iza 45:7; Rom 15:33; 16:20); laŋhɛzɩyɛ kɛ fezuu piye. (Gal 5:22) Pʋyɔɔ lɛ mba taabalɩyɛ kɩbanɖɛ wɛ pa nɛ Ɛsɔ pɛ-hɛkʋ taa yɔ pe-ɖeke papɩzɩɣna nɛ pɛwɛɛ laŋhɛzɩyɛ taa. Ɛyʋ ɛlabɩ kɩwɛɛkɩm sɔsɔm yɔ pɩkɔŋnɩ kaɖɛ ɛ nɛ Ɛsɔ pɛ-hɛkʋ taa nɛ piyeki nɛ ɛnɩɣzɩɣ. Keɣa maɖʋ yɔɔdaa se: «Man-kɩdɛkɛdɩm yɔɔ lɛ, laŋhɛzɩyɛ fɛyɩ mɔ-mɔɔ taa.» (Ke 38:3) Pʋyɔɔ lɛ, mba pɔsɔɔlaa se pañɩnɩ laŋhɛzɩyɛ nɛ pese ɖɩ-wayɩ yɔ pɩwɛɛ se ‘paha siɣye mbʋ pɩfɛyɩ ɖeu yɔ nɛ pala mbʋ pɩwɛ ɖeu yɔ.’ (Ke 34:14) Ye siɣsiɣ wɛtʋ ɛfɛyɩ yɔ laŋhɛzɩyɛ ɛɛpɩzɩɣ nɛ ɖɩwɛɛ. (Ke 72:3; 85:10; Iza 32:17) Pʋyɔɔ ɛyaa kɩdɛkɛdaa ɩɩpɩzɩɣ nɛ pɛwɛɛ laŋhɛzɩyɛ taa. (Iza 48:22; 57:21; kpaɣ-tʋ nɛ ŋmaɣzɩnɩ Iza 59:2-8.) Ɛlɛ, mba pɔñɔʋnɩ Yehowa kiya, pɔsɔɔlɩ ɛ-paɣtʋ (Ke 119:165) nɛ pɔɖɔŋ tɩ-yɔɔ yɔ, mba tɩnɩ laŋhɛzɩyɛ.—Iza 48:18.
Fezuu taa ñɩm
w07 15/1 10 § 3
Izaayii takayaɣ taa lɩmaɣza sɔsɔna—II
Izaayii 56:6—Mba paya mayaɣ kanɛ ka-taa se «agɔma»? Nɛ pɔyɔɔdʋʋ se «pɔñɔʋnɩ [Yehowa] ɛgbɛyɛ kpam yɔ» pʋ-tɔbʋʋ lɛ suwe? «Agɔma» mba lɛ Yesu «heŋ lɛɛŋ.» (Yohanɛɛsɩ 10:16) Pɔyɔɔdʋʋ se pɔñɔʋnɩ ɛgbɛyɛ kɩfaɖɛ kpam yɔ, pɩwɩlɩɣ se pañaŋ paɣtʋ ndʋ titukuuni ɛgbɛyɛ nɖɩ yɔ, paɖʋʋ nesi kiya ɖʋtʋ ndʋ patɩŋnɩ ɛgbɛyɛ nɖɩ ɖɩ-yɔɔ nɛ pala yɔ, pɔtɔkɩ fezuu taa tɔɔnaɣ ŋga Krɩstʋ mba patam numwaa tɔkɩ yɔ, nɛ paɖʋʋ-wɛ nesi Kewiyaɣ tɔm susuu nɛ kpɛlɩkɩyaa labʋ tʋmɩyɛ taa.
w06 1/11 27 § 1
Ðɩwɛɛnɩ ñamtʋ ɖe-kediɣzisi yɔɔ
YEHOWA kpeɣli ɛ-samaɣ Krɩstʋ mba patam numwaa nɛ pa-taabalaa heŋ lɛɛŋ se pɛsɛɛ-ɩ ‘ɛ-pʋʋ kiɖeɖeu yɔɔ.’ Eyeki nɛ pɛmɛyɩɣnɩ taa leleŋ ‘ɛ-adɩma ɖɩɣa taa,’ pʋ-tɔbʋʋ se e-fezuu taa templo ŋgʋ kɩkɛ «ajɛɛ kpeekpe adɩma ɖɩɣa» yɔ ka-taa. (Izaayii 56:7; Maarɩkɩ 11:17) Pɩwɩlɩɣ se Yehowa sɛtʋ kɛ kiɖeɖetu, tɩwɛ kele kele, nɛ tɩkɛ Ɛsɔ sɛtʋ ndʋ tɩkɩlaa yɔ. Ye ɖɩwɛnɩ ñamtʋ ndʋ tɩmʋnaa yɔ ɖe-kediɣzisi nzɩ sɩ-taa ɖɩsɛɣ Yehowa nɛ ɖɩkpɛlɩkɩɣ ɛ-tɔm yɔ sɩ-yɔɔ yɔ, ɖɩwɩlɩɣ se ɖɩwɛnɩ ɛ-lɩmaɣza wondu kiɖeɖetu yɔɔ.