Kɩbam nɛ kɩdɛkɛdɩm: Bibl lɔŋ tasʋʋ wazɩɣ
Iyele nɛ ɖɩna wezuu caɣʋ hɔɔlɩŋ 4 weyi ɩ-taa ɛyaa miiliyɔɔwaa sakɩyɛ ɖiɣzinaa se Bibl lɔŋ tasʋʋ wazɩɣ nɛ papɩzɩɣ pataa-pʋ liu yɔ.
1. Nesi ɖɔkʋʋ
Ɛyaa wɛnɩ lɩmaɣza ndɩ ndɩ nesi ɖɔkʋʋ yɔɔ nɛ mbʋ pɩhaɣ koboyaɣ nesi ɖɔkʋʋ taa yɔ pɩ-yɔɔ.
BIBL YƆƆDƲƲ SE: «Paa mbʋ yɔ, pɩwɛɛ se mɩ-taa paa weyi ɛsɔɔlɩ ɛ-halʋ ɛzɩ ɛsɔɔlʋʋ ɛ-maɣmaɣ ɛ-tɩ yɔ; ɛlɛ pɩwɛɛ se halʋ ɛña ɛ-walʋ siŋŋ.»—Efɛɛzɩ mba 5:33.
PƲ-TƆBƲƲ: Ɛsɔ cɔlɔ nesi ɖɔkʋʋ ɖʋtʋ lɩnaa, pʋyɔɔ lɛ ɛsɩm mbʋ pɩpɔzʋʋ nesi ɖɔkɩyaa se pehiɣ koboyaɣ yɔ. (Maarɩkɩ 10:6-9) Ye halʋ nɛ ɛ-walʋ paakaŋ pa-lɩmaɣza pɛ-kɛzɛsɩ yɔɔ, ɛlɛ pakaŋ-yɛ mbʋ pa-taa paa weyi pɩzɩɣ ɛla nɛ ɛcɛyɩsɩ pe-nesi ɖɔkʋʋ yɔ pɩ-yɔɔ yɔ, piyeki nɛ pehiɣ koboyaɣ. Abalʋ weyi ɛsɔɔlɩ ɛ-halʋ yɔ, ɛcɔŋnɩ ɛ-yɔɔ camɩyɛ nɛ ɛhɛndɩɣnɩ-ɩ. Nɛ halʋ weyi ɛñaŋ ɛ-walʋ yɔ, ɛtɩŋɩɣnɩ ɛ-yɔɔdaɣ nɛ ɛ-lakasɩ yɔ nɛ ɛlakɩ mbʋ.
BIBL LƆŊ TASƲƲ WAZƖƔ: Quang nɛ Thi pɛkɛ Vɩyɛtɩnam mba, nɛ pamaɣzaɣ se paakaɣ hiɣu koboyaɣ pe-nesi ɖɔkʋʋ taa kpa. Ðoŋ ɖoŋ lɛ Quang taawɛɛnɩ camɩyɛ lakasɩ. Ɛyɔɔdaa se: «Mantaamaɣzɩɣ Thi yɔɔ nɛ ɖoŋ ɖoŋ lɛ manɖʋwaɣ-ɩ fɛyɛ.» Thi kaasɔɔlaa se pɛcɛ pe-nesi ɖɔkʋʋ. Ɛyɔɔdaa se: «Mamaɣzaɣ se maakaɣ pɩzʋʋ nɛ mantasɩ taʋ liu ma-walʋ yaa mañamɩ-ɩ.»
Pʋwayɩ lɛ, Quang nɛ Thi pɛkpɛlɩkɩ tɔm ndʋ Bibl wɩlɩɣ yɔ nɛ ɛzɩma palabɩnɩ tʋmɩyɛ Efɛɛzɩ mba 5:33 pe-nesi ɖɔkʋʋ taa yɔ. Quang yɔɔdaa se: «Mayaɣ ŋga, kasɩnɩ-m nɛ mana se pɩpɔzʋʋ se mɛwɛɛnɩ camɩyɛ lakasɩ nɛ meyele nɛ Thi na se mɔnsɔɔlɩ-ɩ, mɔncɔŋnɩ ɛ-yɔɔ tomnaɣ yɔɔ, nɛ mɛhɛndɩɣnɩ-ɩ. Manpaɣzɩ labʋ mbʋ lɛ ɛpaɣzɩ-m sɔɔlʋʋ nɛ ɛñaŋɩ-m.» Thi yɔɔdaa se: «Malakaɣnɩ tʋmɩyɛ Efɛɛzɩ mba 5:33 nɛ mañaŋ ma-walʋ nɛ pɩkɩlɩɣ lɛ, eyekaɣ nɛ manaɣ se ɛsɔɔlɩ-m nɛ ɛkandɩyɩɣ mɔ-yɔɔ nɛ pɩkɩlɩɣ, nɛ maawɛ pɛɛyɛ taa nɛ pɩkɩlɩ.»
Ye ŋsɔɔlaa se ŋtɩlɩ nesi ɖɔkʋʋ yɔɔ tɔm nɛ pɩkɩlɩ yɔ, kalɩ Réveillez-vous! No. 2 2018, kɩ-ñʋʋ yɔ «12 clés du bonheur familial»; kɩwɛ jw.org yɔɔ.
2. Wɛtʋ ndʋ pɩwɛɛ se ɖɩwɛɛnɩ lalaa yɔɔ yɔ
Ðoŋ ɖoŋ lɛ ɛyaa lakɩ kañatʋ lalaa po-tomnaɣ tɔlɩm yɔɔ, ɛjaɖɛ nɖɩ ɖɩ-taa palɩnaa yɔ pɩ-yɔɔ, pɛ-wɛtʋ yɔɔ, pɛ-Ɛsɔ sɛtʋ ɛgbɛyɛ yɔɔ, yaa lɩmaɣza wena pɛwɛnɩ kʋzʋʋ yɔɔ yɔ pɩ-yɔɔ.
BIBL YƆƆDƲƲ SE: «Ɩɖʋ hɩɖɛ ɛyaa ndɩ ndɩ.»—1 Pɩyɛɛrɩ 2:17.
PƲ-TƆBƲƲ: Bibl ɛɛwɩlɩɣ-ɖʋ se ɖɩpaɖɩ ɛyaa po-tomnaɣ tɔlɩm yaa ɛjaɖɛ nɖɩ ɖɩ-taa palɩnaa yɔ pɩ-yɔɔ, yaa mba palɩzaa se pasʋʋnɩ mba pa nɛ wɛ paka kʋzʋʋ piliŋa yɔ. Ɛlɛ kiseɣtiɣ-ɖʋ se ɖɩña ɛyaa tɩŋa, paa tomnaɣ tɔlɩm mbʋ yaa ɛjaɖɛ nɖɩ ɖɩ-taa palɩnaa, paa pɛkɛ ñɩm tɩnaa yaa kʋñɔndɩnaa yɔ. (Tʋma Labʋ 10:34) Paa ɖɩfɛyɩnɩ lɩmaɣza kʋɖʋma mbʋ pʋyɔɔ lalaa tisuu yaa pa-lakasɩ yɔɔ yɔ, ɖɩpɩzɩɣ nɛ ɖiwolo pɩ-yɔɔ nɛ ɖɩlakɩ-wɛ camɩyɛ lakasɩ nɛ ɖɩñaŋ-wɛ.—Maatiyee 7:12.
BIBL LƆŊ TASƲƲ WAZƖƔ: Pawɩlɩ Daniel se ɛkpaɣ Aazii mba ɛzɩ mba papaɖɩɣ ɛ-ɛjaɖɛ yɔ. Piyeba nɛ ɛpaɖaɣ mba payɩ palɩnɩ Aazii yɔ, nɛ ɖoŋ ɖoŋ lɛ ɛtʋwaɣ-wɛ samaɣ taa. Daniel yɔɔdaa se: «Mamaɣzaɣ se maawɛɛ nɛ manɖʋʋ nesi mɛ-ɛjaɖɛ lɛ mbʋ yɔ. Halɩ mantaamaɣzɩ kpa se ma-lɩmaɣza nɛ ma-lakasɩ taatʋʋzɩ.»
Pʋwayɩ lɛ, Daniel kpɛlɩkɩ tɔm ndʋ Bibl wɩlɩɣ yɔ. Daniel yɔɔdaa se: «Pɩɩpɔzaa se mɛlɛɣzɩ ma-lɩmaɣza kiya. Pɩwɛɛ se manaɣ ɛyaa ɛzɩ Ɛsɔ naʋ-wɛ yɔ, pʋ-tɔbʋʋ se ɖa-tɩŋa ɖɩkɛ kʋɖʋm paa le ɖɩtɩɩlɩnaa yɔ.» Daniel kɛdɩ ɛzɩma pɩlakɩ-ɩ lɛɛlɛɛyɔ alɩwaatʋ ndʋ ɛkatɩɣ ɛyaa yɔ. Ɛkɛdaa se: «Ðoŋ ɖoŋ lɛ, maamaɣzɩɣ ɖenɖe palɩnaa yɔ pɩ-yɔɔ. Mɔnsɔɔlɩ ɛyaa ndɩ ndɩ lɛɛlɛɛyɔ nɛ mɛwɛnɩ taabalaa kɩbama mba palɩnɩ ɛjaɖɛ kpeekpe yɔɔ yɔ.»
Ye ŋsɔɔlaa se ŋtɩlɩ nɛ pɩkɩlɩ yɔ, kalɩ Réveillez-vous! No. 3 2020, kɩ-ñʋʋ yɔ «Y a-t-il un remède contre les préjugés?»; kɩwɛ jw.org yɔɔ.
3. Liidiye
Ɛyaa sakɩyɛ ñakɩ pana se pɛkɛ ñɩm tɩnaa nɛ pɩsa nɛ pehiɣ koboyaɣ nɛ piɖeni-wɛ cee wayɩ.
BIBL YƆƆDƲƲ SE: «Lɔŋsɩnɖɛ kandɩyɩɣ ɛyʋ yɔɔ ɛzɩ liidiye ɖɔɖɔ kandɩyʋʋ ɛyʋ yɔɔ yɔ, ɛlɛ sɩmtʋ kɛzɛɣa yɔ: Lɔŋsɩnɖɛ ɖɔkʋʋ weyi ɛwɛnɩ-ɖɩ yɔ e-wezuu.»—Eklezɩyasɩtɩ 7:12.
PƲ-TƆBƲƲ: Pɩpɔzʋʋ-ɖʋ liidiye, paa mbʋ yɔ pɩtɩkɛ nɖɩ yekina se ɖihiɣ koboyaɣ yaa piɖeni-ɖʋ cee wayɩ. (Aduwa 18:11; 23:4, 5) Ɛlɛ pɩsa nɛ ɛyʋ hiɣ koboyaɣ siŋŋ nɛ piɖeni-i cee wayɩ lɛ, pɩpɔzʋʋ se ɛlabɩnɩ tʋmɩyɛ lɔŋsɩnɖɛ nɖɩ ɖɩlɩnɩ Ɛsɔ cɔlɔ nɛ ɖɩwɛ Bibl taa yɔ.—1 Timootee 6:17-19.
BIBL LƆŊ TASƲƲ WAZƖƔ: Payaɣ abalʋ nɔɔyʋ se Cardo nɛ ɛwɛ Ɛndoneezii, ɛɛkam ñʋʋ nɛ ñɩm ñɩnʋʋ. Ɛyɔɔdaa se: «Maawɛnɩ mbʋ payɩ ɛyaa hɔɔlʋʋ sɔsɔʋ sɔɔlaa se pɛwɛɛna yɔ. Mowokaɣ nʋmɔŋ nɛ mayakaɣ man-tɩ wondu ndʋ tɩwɛ liidiye siŋŋ yɔ, mayakaɣ ɖɔɖɔ lɔɔɖa nɛ ɖɩsɩ.» Ɛlɛ ɛ-ñɩm mbʋ pitileɖi. Cardo yɔɔdaa se: «Nɔɔyʋ peɣzi-m nɛ ɛmɩlɩ liidiye nɖɩ mañaɣ pana pɩnzɩ sakɩyɛ nɛ mɛwɛɛna yɔ. Mañaɣ pana siŋŋ pɩnzɩ sakɩyɛ nɛ mɛwɛɛnɩ ñɩm, ɛlɛ pɩtɛmnaa se pitibi-m yɔɔɔ mbʋ pʋyɔɔ yɔ mantɩtasɩ wɛnʋʋ nabʋyʋ nɛ pɩlakɩ-m ɛzɩ mɛnfɛyɩ wazaɣ yɔ.»
Cardo kɔm nɛ ɛpaɣzɩ ɖɔm lɔŋ weyi Bibl tasɩɣ liidiye hɔɔlʋʋ taa yɔ ɩ-yɔɔ. Ɛlɩzaa se ɛɛtasɩɣ kpaɣʋ e-ɖoŋ kpeekpe nɛ ɛñɩnɩnɩ ñɩm, ɛlɛ ɛcakɩ wezuu kɛlɛʋ. Ɛyɔɔdaa se: «Lɛɛlɛɛyɔ taabalɩyɛ kɩbanɖɛ wɛ ma nɛ Ɛsɔ ɖɛ-hɛkʋ taa nɛ mbʋ kɛnɩ ñɩm siŋŋ. Paa ɖoo wena mahɩnɩɣ nɛ monɖou camɩyɛ nɛ mɛwɛ koboyaɣ taa siŋŋ.»
Ye ŋsɔɔlaa se ŋtɩlɩ tɔm ndʋ Bibl yɔɔdʋʋ pɩlɩɩnɩ liidiye yɔɔ yɔ, wolo jw.org yɔɔ nɛ ŋkalɩ tɔm ñʋʋ «Sukuli nɛ liidiye pɩzɩɣ piyele nɛ piɖeni-ŋ cee wayɩ?», kɩwɛ Feŋuu Tilimiye No. 3 2021 taa.
4. Kʋzʋʋ
Ɛyaa wɛnɩ lɩmaɣza ndɩ ndɩ kʋzʋʋ lakasɩ nzɩ sɩmʋnaa yɔ sɩ-yɔɔ.
BIBL YƆƆDƲƲ SE: «Ikizi kʋzʋʋ kɩdɛkɛdʋʋ. Pɩwɛɛ se mɩ-taa paa weyi lɛ, ɛtɩlɩ ɛzɩma ɛɖɔkɩ ɛ-maɣmaɣ e-tomnaɣ kele kele wɛtʋ taa nɛ hɩɖɛ ɖʋʋ taa yɔ, pɩtaakɛnɩ kʋzʋʋ kɔɖɛyɩ ŋgʋ kɩ-taa ɛyaa ɩɩpɩzɩɣ pa-tɩ ɖɔkʋʋ, ŋgʋ paañɩɣzɩɣ yɔ kɩ-taa ɛzɩ ajɛɛ wena aasɩŋ Ɛsɔ yɔ alakʋʋ yɔ.»—1 Tesalooniiki mba 4:3-5.
PƲ-TƆBƲƲ: Kʋzʋʋ kɔɖɛyɩ wɛnʋʋ hɔɔlʋʋ taa lɛ, Bibl ɖʋʋ-ɖʋ kamasɩ. Acɛyɛ, hayitu, mba patɩɖɔkɩ nesi nɛ pasʋʋnɩ ɖama yɔ, kʋzʋʋ piliŋa kʋɖʋmaɣ tɩnaa ɖama sʋnʋʋ nɛ kpɩna sʋnʋʋ kɛ «kʋzʋʋ kɩdɛkɛdʋʋ.» (1 Kɔrɛntɩ mba 6:9, 10) Kʋzʋʋ kɛ kʋjɔʋ ŋgʋ kɩlɩnɩ Ɛsɔ cɔlɔ yɔ, nɛ halʋ nɛ abalʋ mba pɔɖɔkɩ nesi yɔ pe-ɖeke ɛha nʋmɔʋ se pasʋʋnɩ ɖama.—Aduwa 5:18, 19.
BIBL LƆŊ TASƲƲ WAZƖƔ: Payaɣ halʋ nɔɔyʋ se Kylie nɛ ɛwɛ Ositralii, ɛyɔɔdaa se: «Mɛnkɛ ɛɖanɛ, pʋyɔɔ lɛ mamaɣzaɣ se ye ma nɛ nɔɔyʋ ɖɩsʋnɩ ɖama yɔ piyeki nɛ menɖiɣzina se ɛsɔɔlɩ-m nɛ mɛwɛɛ pɛɛyɛ taa. Ɛlɛ pɩtɩkɛ mbʋ pɩlaba. Mɛnfɛyɩ pɛɛyɛ taa nɛ mɛwɛ laŋwɛɛkɩyɛ taa.»
Pʋwayɩ lɛ, Kylie kpɛlɩkɩ ndʋ Bibl wɩlɩɣ kʋzʋʋ yɔɔ yɔ nɛ ɛɖɔŋ tɩ-yɔɔ. Ɛyɔɔdaa se: «Menɖiɣzinaa se Ɛsɔ paɣtʋ nɛ ɛ-paɣtʋ kila kandɩyɩɣ ɛyʋ yɔɔ se ɛtaanɩɩ siziŋ nɛ ɛ-laŋɩyɛ ɛtaawɛɛkɩ. Mɛwɛɛ nɛ malakɩ mbʋ Yehowa pɔzʋʋ-ɖʋ se ɖɩla yɔ lɛ, piyeba nɛ lɛɛlɛɛyɔ mɛwɛɛ pɛɛyɛ taa nɛ menɖiɣzinaa se ɛyaa sɔɔlɩ-m. Bibl lɔŋ tasʋʋ yɔɔ ɖɔm sɩnɩ-m nɛ mɛnfɛɛ laŋɩyɛ taa wɩzasɩ sakɩyɛ!»
Ye ŋsɔɔlaa se ŋtɩlɩ nɛ pɩkɩlɩ yɔ, kalɩ tɔm ñʋʋ «Vivre en couple sans être mariés: Qu’en dit la Bible?», kɩwɛ jw.org yɔɔ.
Ða-Lɩzɩyʋ sɩɣnɩ-ɖʋ se ɖɩtɩlɩ mbʋ pɩkɛ kɩbam nɛ mbʋ pɩkɛ kɩdɛkɛdɩm yɔ. Paa pɩfɛyɩ kɛlɛʋ paa ɛzɩmtaa se ɖɩñɔɔnɩ lɔŋ weyi ɛtasɩɣ-ɖʋ wezuu kɩbaŋʋ caɣʋ nʋmɔʋ taa yɔ ɩ-yɔɔ yɔ, ye ɖɩñaɣ pana nɛ ɖɩla mbʋ yɔ pɩwazɩɣ-ɖʋ. Ða-taa pɩzɩɣ nɛ pɩtɛ se pɩkaɣ yebu nɛ ɖihiɣ koboyaɣ tam.