Kpɛlɩkɩ ɛzɩma pɩwɛɛ se ŋtasɩ lalaa lɔŋ kɩbaŋ yɔ

1. Anɩ pɩpɔzʋʋ se ɛtasɩ lɔŋ? Lɩzɩ pɩ-taa.

ŊSƆƆLAA se ŋtasɩ ɛyaa lalaa lɔŋ na? Pɩwɛ nabɛyɛ kɛlɛʋ se patasɩ lalaa lɔŋ. Ɛlɛ sɔɔndʋ kpaɣ nabɛyɛ nɛ patɩsɔɔlɩ se patasɩ lalaa lɔŋ. Paa pɩtɩɩkɛ suwe yɔ, ɖa-tɩŋa nabʋyʋ taa pɩcɛyaa se ɖɩtasɩ lalaa lɔŋ. Ɛbɛ yɔɔ? Mbʋ pʋyɔɔ yɔ Yesu yɔɔdaa se sɔɔlɩm mbʋ ɛ-wayɩ tɩŋɩyaa toovenim ñɩma wɩlɩɣ ɖama yɔ mbʋ pakaɣnɩ-wɛ tɩlʋʋ. (Yoh. 13:35) Nɛ nʋmɔŋ weyi ɩ-yɔɔ ɖɩtɩŋɩɣna nɛ ɖɩwɩlɩɣ ɖo-koobiya sɔɔlɩm yɔ ɩ-taa nakʋyʋ lɛ se ɖɩtasɩɣ-wɛ lɔŋ alɩwaatʋ ndʋ pɩpɔzʋʋ-wɛ lɔŋ tasʋʋ yɔ. Ɛsɔtɔm yɔɔdʋʋ se «lɔŋ tasʋʋ mbʋ pɩlɩnɩ ɛyʋ laŋɩyɛ taa yɔ, pɩlakɩ nɛ ɛyaa pɩsɩɣ taabalaa kɩbama.»—Adu. 27:9.

2. Ɛbɛ pɩcɛyaa se ɛgbɛyɛ taa ɛzʋtʋyaa ɩtɩlɩ? Nɛ ɛbɛ yɔɔ? (Kalɩ ɖɔɖɔ aɖakaɣ «Lɔŋ weyi patasɩɣ kpɩtaʋ hɛkʋ taa kediɣzaɣ taa yɔ.»)

² Pɩcɛyaa se ɛgbɛyɛ taa ɛzʋtʋyaa ɩtɩlɩ ɛzɩma papɩzɩɣ nɛ patasɩ lalaa lɔŋ kɩbaŋ yɔ. Yehowa tɩŋnɩ Yesu yɔɔ nɛ ɛlɩzɩ abalaa mba se peɖiyi ɛgbɛyɛ. (1 Pɩy. 5:​2, 3) Nʋmɔŋ weyi ɩ-yɔɔ patɩŋɩɣna nɛ palakɩ mbʋ yɔ, ɩ-taa nakʋyʋ lɛ lɔŋ weyi patasɩɣ ɛgbɛyɛ alɩwaatʋ ndʋ pɔyɔɔdʋʋ samaɣ taa tɔm yɔ. Patasɩɣ ɖɔɖɔ ɖa-taa paa weyi lɔŋ alɩwaatʋ ndʋ pɩpɔzʋʋ yɔ, nɛ pasɩɣnɩ ɖɔɖɔ mba peyebi Yehowa sɛʋ yɔ se papɩsɩ ɛgbɛyɛ taa. Ɛzɩma ɛgbɛyɛ taa ɛzʋtʋyaa nɛ ɖa-tɩŋa ɖɩpɩzɩɣ nɛ ɖɩtasɩ lalaa lɔŋ kɩbaŋ?

3. (a) Ɛbɛ pɩzɩɣ pɩsɩnɩ-ɖʋ nɛ ɖɩkɛ lɔŋ tasɩyaa kɩbama? (Izaayii 9:6; kalɩ ɖɔɖɔ aɖakaɣ «Maɣzɩnɩ Yesu alɩwaatʋ ndʋ ŋtasɩɣ nɔɔyʋ lɔŋ yɔ.») (b) Ɛbɛ ɖɩkaɣ naʋ tɔm ñʋʋ kʋnɛ kɩ-taa?

³ Ye ɖɩkpɛlɩkɩɣ Bibl taa ɛyaa kɩɖaŋ, kɔzɩ kɔzɩ Yesu ñɩŋgʋ yɔ, pɩsɩɣnɩ-ɖʋ nɛ ɖɩkɛ lɔŋ tasɩyaa kɩbama. Hɩla wena paaha Yesu yɔ a-taa naɖɩyɛ lɛ «Lɔŋ Tasɩyʋ Kɩbanʋ.» (Kalɩ Izaayii 9:6.) Tɔm ñʋʋ kʋnɛ kɩ-taa, ɖɩkaɣ naʋ mbʋ ɖɩpɩzɩɣ ɖɩla alɩwaatʋ ndʋ nɔɔyʋ pɔzʋʋ-ɖʋ lɔŋ tasʋʋ yɔ, nɛ mbʋ ɖɩpɩzɩɣ ɖɩla alɩwaatʋ ndʋ pɩpɔzʋʋ se ɖɩtasɩ nɔɔyʋ lɔŋ paa ɛlɛ ɛtɩpɔzɩ-ɖʋ lɔŋ tasʋʋ yɔ. Ðɩkaɣ naʋ ɖɔɖɔ mbʋ pʋyɔɔ pɩcɛyaa se ɖɩtɩŋnɩ nʋmɔʋ kɩbaŋʋ yɔɔ nɛ ɖɩtasɩ nɔɔyʋ lɔŋ, nɛ mbʋ pʋyɔɔ pɩcɛyaa ɖɔɖɔ se ɖɩla mbʋ alɩwaatʋ kɩbandʋ yɔɔ yɔ.

ALƖWAATƲ NDƲ NƆƆYƲ PƆZƲƲ-ÐƲ LƆŊ TASƲƲ YƆ

4-5. Alɩwaatʋ ndʋ nɔɔyʋ pɔzʋʋ-ɖʋ lɔŋ tasʋʋ yɔ, tɔm ndʋ pɩwɛɛ se ɖɩcalɩ ɖa-tɩ pɔzʋʋ? Ha kɩɖaʋ nakʋyʋ.

⁴ Alɩwaatʋ ndʋ nɔɔyʋ pɔzʋʋ-ɖʋ lɔŋ tasʋʋ yɔ, ɛbɛ pɩwɛɛ se ɖɩcalɩ labʋ? Ða-taa pɩzɩɣ nɛ pɩla leleŋ se ɛyʋ ɛnʋ ɛta-ɖʋ liu, pɩpɩzɩɣ piyele nɛ ɖɩsɔɔlɩ se ɖɩsɩnɩ-ɩ kpaagbaa. Ɛlɛ kajalaɣ lɛ, pɩwɛɛ se ɖɩpɔzɩ ɖa-tɩ tɔm tʋnɛ: «Mamʋnaa se mantasɩ ɛyʋ ɛnʋ lɔŋ hɔɔlʋʋ ŋgʋ kɩ-taa?» Nabʋyʋ taa, mbʋ ɖɩpɩzɩɣ ɖɩla nɛ ɖɩsɩnɩ ɛyʋ ɛnʋ yɔ lɛ se ɖɩsɩnɩ-ɩ nɛ ehiɣ ɛyʋ weyi ɛpɩzɩɣ nɛ ɛtasɩ-ɩ lɔŋ hɔɔlʋʋ ŋgʋ kɩ-taa nɛ pɩwazɩ-ɩ yɔ.

⁵ Ðɩmaɣzɩ kɩɖaʋ kʋnɛ kɩ-yɔɔ. Kpaɣ se pɩwɛɛ nɛ pɩwɩɣ ña-taabalʋ kɩbanʋ nɔɔyʋ siŋŋ. Nɛ eheyi-ŋ se ɛtɛm paɣzʋʋ ñɩnʋʋ nʋmɔŋ weyi ɩ-yɔɔ ɛpɩzɩɣ ɛtɩŋna nɛ ɛwaa ɛ-kʋdɔŋ yɔ, nɛ pʋwayɩ lɛ ɛpɔzɩ-ŋ se ŋheyi-i nʋmɔʋ ŋgʋ ŋmaɣzɩɣ se kɩwɛ ɖeu nɛ pɩkɩlɩ yɔ. Pɩtɩla ŋmaɣzɩɣ se nʋmɔŋ ɛnɩ ɩ-taa nakʋyʋ wɛ ɖeu nɛ pɩkɩlɩ, ɛlɛ ŋtɩkɛ ɖɔkɔtɔ nɛ ŋfɛyɩnɩ lɛɣtʋ natʋyʋ kʋdɔmɩŋ waʋ nʋmɔʋ taa. Pʋyɔɔ lɛ, mbʋ ŋpɩzɩɣ ŋla nɛ pɩwɛɛ ɖeu nɛ pɩkɩlɩ yɔ mbʋ lɛ se ŋsɩnɩ ña-taabalʋ ɛnʋ nɛ ehiɣ ɛyʋ weyi ɛwɛnɩ lɛɣtʋ kʋdɔmɩŋ waʋ nʋmɔʋ taa yɔ nɛ ɛsɩnɩ-ɩ.

6. Ɛbɛ yɔɔ pɩwɛɣ ɖeu se ɖɩlɩzɩ se ɖɩɖaŋɩɣ alɩwaatʋ natʋyʋ pazɩ pʋcɔ nɛ ɖɩtasɩ lɔŋ ɛyʋ weyi ɛpɔzɩ-ɖʋ lɔŋ tasʋʋ yɔ?

⁶ Paa ɖɩmaɣzɩɣ se ɖɩmʋnaa se ɖɩtasɩ lɔŋ ɛyʋ weyi ɛpɔzɩ-ɖʋ lɔŋ tasʋʋ tɔm natʋyʋ yɔɔ yɔ, ɖɩpɩzɩɣ nɛ ɖɩlɩzɩ se ɖɩɖaŋɩɣ alɩwaatʋ natʋyʋ pazɩ pʋcɔ nɛ ɖɩtasɩ-ɩ lɔŋ. Ɛbɛ yɔɔ? Aduwa 15:28 yɔɔdʋʋ se «ɛyʋ siɣsiɣ tʋ laŋɩyɛ maɣzɩɣ camɩyɛ pʋcɔ nɛ ɖicosi tɔm yɔɔ.» Nɛ ye ɖɩmaɣzɩɣ se ɖɩsɩm tɔm ndʋ ɖicosi yɔ, ɛbɛ pɩwɛɛ se ɖɩla? Pɩwɛɛ se ɖɩkpaɣ alɩwaatʋ nɛ ɖɩñɩnɩ tɔm, ɖɩtɩmɩ nɛ ɖɩmaɣzɩ tɔm ndʋ tɩ-yɔɔ. Ðɩnɛ ɛlɛ ɖa-taa pɩzɩɣ nɛ pɩtɛ nɛ pɩkɩlɩ se tɔm ndʋ ɖicosuu yɔ tɩlabɩ nɔɔ kʋɖʋmaɣ nɛ Yehowa lɩmaɣza. Iyele nɛ ɖɩna nayʋ Naataanɩ kɩɖaʋ.

7. Ɛbɛ ŋkpɛlɩkɩɣ nayʋ Naataanɩ kɩɖaʋ taa?

⁷ Wiyaʋ Daviid heyi nayʋ Naataanɩ se ɛsɔɔlaa se ɛma Yehowa templo nakʋyʋ. Naataanɩ tasɩ-ɩ lɔŋ kpaagbaa se ɛla ɛzɩ ɛyɔɔdʋʋ yɔ. Ɛlɛ pɩɩwɛɛ se Naataanɩ ɛkpaɣ alɩwaatʋ nɛ ɛpɔzɩ nɛ ɛna Yehowa lɩmaɣza nɛ pʋcɔ ecosi-i. Ɛbɛ yɔɔ? Mbʋ pʋyɔɔ yɔ pɩtɩkɛ Daviid Yehowa kaasɔɔlaa se ɛma-ɩ templo. (1 Kro. 17:​1-4) Ɛzɩ kɩɖaʋ kʋnɛ kɩwɩlʋʋ yɔ, ye nɔɔyʋ ɛpɔzɩ-ɖʋ lɔŋ tasʋʋ yɔ, pɩkɛɣnɩ lɔŋsɩnɖɛ se ‘ɖɩwɛɛ hɛɛɛ tɔm yɔɔdʋʋ taa.’—Yak. 1:19.

8. Lɩmaɣzɩyɛ lɛɛɖɛ nɖɩ yɔɔ pɩwɛɛ se ɖɩmaɣzɩ camɩyɛ nɛ pʋcɔ ɖɩtasɩ nɔɔyʋ lɔŋ?

⁸ Iyele nɛ ɖɩna lɩmaɣzɩyɛ lɛɛɖɛ nɖɩ ɖɩ-yɔɔ pɩwɛɛ se ɖɩmaɣzɩ camɩyɛ pʋcɔ nɛ ɖɩtasɩ nɔɔyʋ lɔŋ yɔ. Ye ɖɩtasɩ nɔɔyʋ lɔŋ weyi ɩfɛyɩ ɖeu yɔ nɛ ɛkpaɣ lɩmaɣzɩyɛ kɩdɛkɛdɩyɛ nɛ kaɖɛ naɖɩyɛ talɩ-ɩ yɔ, pɩlɩnɩ ɖɔ-cɔlɔ. Ye mbʋ pɩcɛyɩ siŋŋ se ɖɩmaɣzɩ camɩyɛ pʋcɔ nɛ ɖɩtasɩ nɔɔyʋ lɔŋ.

ALƖWAATƲ NDƲ PƖPƆZƲƲ SE ÐƖTASƖ NƆƆYƲ LƆŊ PAA ƐLƐ ƐTƖPƆZƖ-ÐƲ LƆŊ TASƲƲ YƆ

9. Pʋcɔ nɛ ɛzʋtʋyaa tasɩ nɔɔyʋ lɔŋ lɛ, tɔm ndʋ pɩwɛɛ se pa-taa ɩtɛmna? (Galaatii mba 6:1)

⁹ Nabʋyʋ taa ye koobu nɔɔyʋ ɛkpɛzɩ «nɩŋgbaŋaɣ kɩdɛkɛdaɣ nakɛyɛ» yɔ, pɩpɔzʋʋ se ɛzʋtʋyaa ɩtasɩ-ɩ lɔŋ. (Kalɩ Galaatii mba 6:1.) Pɩtɩla koobu nɔɔyʋ kpaɣ lɩmaɣza kɩdɛkɛda naayɛ wena apɩzɩɣ ayele nɛ ɛla kɩdɛkɛdɩm sɔsɔm nabʋyʋ yɔ. Ɛzʋtʋyaa kaɖʋwa lɛ se pasɩnɩ koobu ɛnʋ nɛ ɛtaalɩɩ wezuu maatɛŋ nʋmɔʋ taa. (Yak. 5:​19, 20) Ɛlɛ, pɩsa nɛ pɔ-lɔŋ tasʋʋ wazɩ koobu ɛnʋ lɛ, kajalaɣ lɛ pɩwɛɛ se pañɩnɩ nɛ pana se toovenim taa lɛ ɛkpɛzɩ nɩŋgbaŋaɣ kɩdɛkɛdaɣ na. Yehowa ha ɖa-taa paa anɩ waɖɛ se ɛtɩŋnɩ ɛ-maɣmaɣ ɛ-ɛhʋyɛ yɔɔ nɛ ɛkpaɣ lɩmaɣza. (Roma 14:​1-4) Ɛlɛ ye ɛzʋtʋyaa eɖiɣzinaa se koobu nɔɔyʋ kpɛzɩ nɩŋgbaŋaɣ kɩdɛkɛdaɣ nɛ pakpaɣ lɩmaɣzɩyɛ se patasɩɣ-ɩ lɔŋ yɔ, ɛzɩma pɩwɛɛ se patasɩ-ɩ lɔŋ ɛnɩ?

10-12. Ɛbɛ pɩwɛɛ se ɛzʋtʋyʋ nɔɔyʋ ɛla alɩwaatʋ ndʋ ɛtasɩɣ lɔŋ koobu weyi ɛtɩpɔzɩ-ɩ lɔŋ tasʋʋ yɔ? Ha kɩɖaʋ nakʋyʋ. (Cɔnɩ ɖɔɖɔ kɩlɛmɩŋ.)

¹⁰ Pɩfɛyɩ ɛzʋtʋyaa kɛlɛʋ se patasɩ lɔŋ koobu weyi ɛtɩpɔzɩ-wɛ lɔŋ tasʋʋ yɔ. Ɛbɛ yɔɔ? Apostoloo Pɔɔlɩ yɔɔdaa se ɛyʋ nɔɔyʋ pɩzɩɣ nɛ ɛkpɛzɩ nɩŋgbaŋaɣ kɩdɛkɛdaɣ nakɛyɛ pʋcɔ nɛ eɖiɣzina. Pʋyɔɔ lɛ pɩpɔzʋʋ se kajalaɣ lɛ, ɛzʋtʋyaa ɩla nabʋyʋ nɛ pɩsa nɛ pɩwɛɛ kɛlɛʋ ɛyʋ ɛnʋ se etisi nɛ ɛmʋ pɔ-lɔŋ tasʋʋ.

¹¹ Ye nɔɔyʋ ɛtɩpɔzɩ-ŋ lɔŋ tasʋʋ ɛlɛ ŋkpaɣ lɩmaɣzɩyɛ se ŋtasɩɣ-ɩ lɔŋ yɔ, pɩwɛ ɛzɩ haɖʋ nɔɔyʋ ñakʋʋ pana se eɖuu ɖomaɣ wɩlɩŋ tɛtʋ natʋyʋ yɔɔ yɔ. Pɩwɛɛ se ɛñɔɔzɩ tɛtʋ pʋcɔ nɛ eɖuu ɖomaɣ. Ɛtɛŋ ɖuu lɛ, pɩwɛɛ se ɛmɩzɩ lɩm nɛ pɩsɩnɩ ɖomaɣ nɛ kɔñɔ nɛ kapaɣlɩ. Mbʋ ɖɔɖɔ pʋcɔ nɛ ɛzʋtʋyʋ nɔɔyʋ tasɩ lɔŋ koobu weyi ɛtɩpɔzɩ-ɩ lɔŋ tasʋʋ yɔ lɛ, pɩwɛɣ ɖeu se ɛla nabʋyʋ nɛ pɩsa nɛ pɩwɛɛ kɛlɛʋ koobu ɛnʋ se etisi nɛ ɛmʋ ɛ-lɔŋ tasʋʋ. Kɩɖaʋ nakʋyʋ yɔ: Alɩwaatʋ ndʋ ɛzʋtʋyʋ ɛnʋ ɛcaɣ se ɛyɔɔdɩnɩ koobu ɛnʋ yɔ, pɩwɛɛ se eyele nɛ ɛlɛ ta tɛ se ɛmaɣzɩɣ ɛ-yɔɔ. Ye ɛzʋtʋyʋ ɛnʋ, pasɩmɩ-ɩ se ɛsɔɔlɩ ɛyaa lalaa nɛ ɛlakɩ-wɛ kɩbandʋ yɔ, pɩwɛɣ kɛlɛʋ se lalaa ɛmʋ ɛ-lɔŋ tasʋʋ.

¹² Ɛzʋtʋyʋ ɛnʋ, ɛpɩzɩɣ eyele nɛ pɩwɛɛ koobu ɛnʋ kɛlɛʋ se ɛmʋ lɔŋ weyi ɛtasɩɣ-ɩ yɔ ye ɛtɔzɩ-ɩ se ɖa-tɩŋa picoɖuu-ɖʋ nɛ pɩpɔzʋʋ-ɖʋ lɔŋ tasʋʋ nabʋyʋ taa yɔ. (Roma 3:23) Ɛzʋtʋyʋ ɛnʋ ɛtɩŋɩɣnɩ Masɩ yɔɔ nɛ ɛwɩlɩ koobu ɛnʋ kpayɩ kpayɩ nɛ nɔɔ kɩbaŋa nɛ ñamtʋ mbʋ pɩwɩlɩɣ se ɛkpɛzɩ nɩŋgbaŋaɣ kɩdɛkɛdaɣ nakɛyɛ yɔ. Koobu ɛnʋ ɛnɩɣ pɩ-taa se picoɖi-i lɛ, ɛzʋtʋyʋ «ɖuu ɖomaɣ» ye ɛtɩŋnɩ nʋmɔʋ kɛlɛʋ ñɩŋgʋ nakʋyʋ yɔɔ nɛ ɛsɩnɩ koobu ɛnʋ nɛ ɛlɛ na mbʋ pɩpɔzʋʋ se ɛla nɛ ɛ-wɛtʋ ñɔɔzɩ yɔ. Kɛdɛzaɣ lɛ, ɛzʋtʋyʋ «mɩzɩɣ lɩm» ɖomaɣ yɔɔ ye ɛsam koobu ɛnʋ nɛ ɛ nɛ ɩ pɛkpɛndɩ nɛ patɩmɩ yɔ.—Yak. 5:15.

13. Ɛbɛ ɛzʋtʋyaa pɩzɩɣ pala nɛ pa-taa tɛ se lɔŋ weyi patasɩ nɔɔyʋ yɔ ɛnɩ ɩ-taa camɩyɛ?

¹³ Nabʋyʋ taa, tɔm ndʋ lɔŋ tasɩyʋ ñɩnɩɣ yɔɔdʋʋ yɔ pɩtɩkɛ ndʋ weyi patasɩɣ-ɩ lɔŋ yɔ ɛnɩɣ. Ɛbɛ ɛzʋtʋyaa pɩzɩɣ pala nɛ pa-taa tɛ se tɔm ndʋ pɔyɔɔdʋʋ yɔ weyi patasɩɣ-ɩ lɔŋ yɔ ɛnɩɣ tɩ-taa? Papɩzɩɣ nɛ pɔpɔzɩ-ɩ tɔm nɛ ñamtʋ nɛ lɛɣtʋ. (Ekl. 12:11) Tɔm ndʋ ecosuu yɔ tɩsɩɣnɩ-wɛ se pana se ɛnɩ lɔŋ weyi patasɩ-ɩ yɔ ɩ-taa camɩyɛ na.

TASƖ LƆŊ ALƖWAATƲ KƖBANDƲ YƆƆ, TƖŊNƖ ÐƆÐƆ NƲMƆƲ KƖBAŊƲ YƆƆ NƐ ŊTASƖ LƆŊ

14. Ɛbɛ yɔɔ pɩtɩmʋna se ɖɩtasɩ nɔɔyʋ lɔŋ alɩwaatʋ ndʋ ɖɩwɛ pana taa yɔ?

¹⁴ Ða-tɩŋa ɖɩtɩtalɩ pilim nɛ pʋyɔɔ lɛ, nabʋyʋ taa ɖɩlakɩ nabʋyʋ yaa ɖɩyɔɔdʋʋ natʋyʋ nɛ pɩɖʋʋ lalaa ɖɩwɩzɩyɛ. (Kol. 3:13) Ɛsɔtɔm yɔɔdʋʋ se nabʋyʋ taa, nɔɔyʋ pɩzɩɣ ɛyɔɔdɩ tɔm natʋyʋ yaa ɛla nabʋyʋ nɛ pɩɖʋ-ɖʋ ɖɩwɩzɩyɛ. (Efɛz. 4:26) Ɛlɛ pɩwɛɛ se ɖɩñaɣ pana nɛ ɖɩtaatasɩ lalaa lɔŋ alɩwaatʋ ndʋ ɖɩwɛ pana taa yɔ. Ɛbɛ yɔɔ? Mbʋ pʋyɔɔ yɔ «ɛyʋ pana ɛɛlakɩ mbʋ pɩwɛ siɣsiɣ Ɛsɔ ɛsɩndaa yɔ.» (Yak. 1:20) Ye ɖɩtasɩ nɔɔyʋ lɔŋ alɩwaatʋ ndʋ ɖɩwɛ pana taa yɔ, pɩtɩla ɖɩtɛzɩɣ tɔm wɛɛkʋʋ kɩwɛɛkʋ. Ɛlɛ pɩtɩwɩlɩ se pɩtɩmʋna kpa se ɖiheyi weyi ɛɖʋ-ɖʋ ɖɩwɩzɩyɛ yɔ ndʋ ɖɩmaɣzɩɣ yɔ nɛ ɛzɩma pɩlakɩ-ɖʋ yɔ. Paa mbʋ yɔ pɩwɛɛ se ɖɩɖaŋ nɛ ɖa-pana hɛɛ pʋcɔ nɛ ɖiheyi-i ndʋ ɖɩmaɣzɩɣ yɔ. Iyele nɛ ɖɩna kɩɖaʋ kɩbaŋʋ ŋgʋ Yɔɔb lɔŋ tasɩyʋ siɣsiɣ tʋ Eliihu ha-ɖʋ yɔ.

15. Lɔŋ weyi Eliihu kɩɖaʋ kpɛlɩkɩɣ-ɖʋ? (Cɔnɩ ɖɔɖɔ kɩlɛmʋʋ.)

¹⁵ Eliihu kpaɣ kɩyakɩŋ sakɩyɛ nɛ ewelisini Yɔɔb alɩwaatʋ ndʋ ɛlɛ lʋkaɣ ɛ-tɩ yɔɔ cɛtɩm laŋɩyɛ hɛzɩyaa ɛsɩndaa yɔ. Yɔɔb tɔm kalabɩ Eliihu pʋtɔdɩyɛ. Ɛlɛ, pɩɩwɩzɩ ɖɔɖɔ Eliihu siŋŋ mbʋ pʋyɔɔ yɔ Yɔɔb yɔɔdɩ tɔm ndʋ tɩtɩtʋʋzɩ yɔ Yehowa yɔɔ, nɛ ɛɛkɩlɩ ɛ-lɩmaɣza kam ɛ-maɣmaɣ ɛ-tɩ yɔɔ. Paa mbʋ yɔ, Eliihu ɖaŋaa nɛ pɩtalɩnɩ-ɩ pʋcɔ nɛ ɛyɔɔdɩ, nɛ ɛyɔɔdaɣ lɛ ɛtasɩ Yɔɔb lɔŋ nɛ ñamtʋ nɛ hɛɛɛ wɛtʋ. (Yɔɔb 32:2; 33:​1-7) Eliihu kɩɖaʋ kpɛlɩkɩɣ-ɖʋ lɔŋ kɩbaŋ nɩɩyɩ nɛ ɛ-tɔm cɛyaa: Ye ɖiyeba nɛ ɖɔ-yɔɔ hɛɛ pʋcɔ nɛ ɖɩtasɩɣ lɔŋ nɛ ye ɖɩtasɩɣ lɔŋ nɛ ñamtʋ nɛ sɔɔlɩm yɔ pɩwɛɣ ɖeu nɛ pɩkɩlɩ.—Ekl. 3:​1, 7.

WOLO PƖ-YƆƆ NƐ ŊTASƖƔ LƆŊ NƐ ŊMƲƲ LƆŊ TASƲƲ

16. Lɔŋ weyi Keɣa 32:8 kpɛlɩkɩɣ-ŋ?

¹⁶ Tɔm ñʋʋ kʋnɛ kɩ-mayaɣ yɔɔdʋʋ se ‘Yehowa ɛsɩyɛ kaɣ wɛʋ ɖɔ-yɔɔ nɛ ɛtasɩ-ɖʋ lɔŋ.’ (Kalɩ Keɣa 32:8.) Pɩwɩlɩɣ se ɛkaɣ wobu pɩ-yɔɔ nɛ ɛsɩɣnɩ-ɖʋ. Pɩtasɩna se ɛtasɩɣ-ɖʋ lɔŋ lɛ, ɛsɩɣnɩ-ɖʋ ɖɔɖɔ se ɖɩɖɔ ɩ-yɔɔ. Pɩkɛnɩ-ɖʋ kɩɖaʋ kɩbaŋʋ siŋŋ! Alɩwaatʋ ndʋ ɖihikiɣ waɖɛ se ɖɩtasɩ nɔɔyʋ lɔŋ yɔ ɖɩmaɣzɩnɩ Yehowa nɛ ɖɛ-ɛsɩyɛ wɛɛ ɛ-yɔɔ nɛ ɖɩsɩnɩ-ɩ nɛ ɛkpaɣ lɩmaɣza kɩbana.

17. Ɛzʋtʋyaa mba patɩŋɩɣnɩ Bibl yɔɔ nɛ patasɩɣ-ɖʋ lɔŋ weyi pɩpɔzʋʋ-ɖʋ ɖeyi ɖeyi yɔ, panɩɣzɩnɩ ɛbɛ? (Izaayii 32:​1, 2)

¹⁷ Lɛɛlɛɛyɔ kpem pɩpɔzʋʋ se ɖɩtasɩɣ lalaa lɔŋ kɩbaŋ nɛ ɖa ɖɔɖɔ ɖɩmʋʋ lɔŋ tasʋʋ. (2 Tim. 3:1) Ɛzʋtʋyaa mba patɩŋɩɣnɩ Bibl yɔɔ nɛ patasɩɣ lalaa lɔŋ weyi pɩpɔzʋʋ-wɛ ɖeyi ɖeyi yɔ, pɛwɛ «ɛzɩ lɩm lemisi yɔ ɛjaɖɛ nɖɩ ɖɩ-taa lɩm fɛyɩ yɔ.» (Kalɩ Izaayii 32:​1, 2.) Ða-taabalaa mba pasɩm tɔm ndʋ ɖɩsɔɔlaa se ɖɩnɩɩ, ɛlɛ peheyiɣ-ɖʋ ndʋ pɩpɔzʋʋ se ɖɩnɩɩ yɔ palakɩ-ɖʋ kʋjɔʋ ŋgʋ kɩmʋ ñɩm «ɛzɩ sika tɩŋ pee wena awɛ ñanaɣ ŋga palabɩ-kɛ nɛ liidiye yɔ ka-taa yɔ.» (Adu. 25:11) Tɛtɛ nɛ ɖiwolo pɩ-yɔɔ nɛ ɖɩñaɣ pana nɛ ɖɩwɛɛnɩ lɔŋsɩnɖɛ nɖɩ ɖɩsɩɣnɩ-ɖʋ se ɖɩtasɩɣ lalaa lɔŋ kɩbaŋ nɛ ɖa ɖɔɖɔ ɖɩmʋʋ lɔŋ tasʋʋ yɔ.