Ɛyʋ sɩkɩ nɛ sɔnzɩ nzɩ palakɩ yɔ, suwe Yehowa Aseɣɖe Tɩnaa maɣzɩɣ sɩ-yɔɔ?
Alɩwaatʋ ndʋ ɛyʋ nɔɔyʋ sɩkɩ yɔ, ɖɩñakɩ pana se ɖa-maɣzɩm nɛ sɔnzɩ nzɩ payɩ ɖɩlakɩ yɔ, sɩla nɔɔ kʋɖʋmaɣ nɛ Bibl wɩlɩtʋ. Wɩlɩtʋ ndʋ tɩ-ta natʋyʋ yɔ:
Pɩtɩwɛɛkɩ pʋyʋ se ɛyʋ ewii ɛ-ɛyʋ kʋsɔɔlʋ weyi ɛsɩba yɔ. Yesu tɔmkpɛlɩkɩyaa wi alɩwaatʋ ndʋ pelesi pɛ-ɛyaa kʋsɔɔlaa yɔ. (Yohanɛɛsɩ 11:33-35, 38; Tʋma Labʋ 8:2; 9:39) Pʋyɔɔ lɛ, ye nɔɔyʋ ɛsɩba yɔ, ɖɩɩmaɣzɩɣ se pɩkɛnɩ-ɖʋ kazandʋ. (Eklesɩyastɩ 3:1, 4; 7:1-4) Ɛlɛ ɖɩmaɣzɩɣ se pɩkɛ alɩwaatʋ ndʋ pɩwɛɛ se ɖɩsɩnɩ wɩzasɩ nɩʋ mba pɛ-ɛyʋ sɩba yɔ.—Roma 12:15.
Sɩɖaa ɩɩtasɩɣ natʋyʋ sɩm. Paa le ɖɩtɩɩlɩnaa yaa paa sɔnzɩ nzɩ ɖɩtɩɩwɛna yɔ, ɖikiziɣ sɔnzɩ yaa lakasɩ nzɩ ɛyaa mba pamaɣzɩɣ se sɩɖaa wɛnɩ pɛ-ɛsa ɖoli, nɛ papɩzɩɣ pɛwɛɛnɩ ɖoŋ ɛsadɩnaa yɔɔ yɔ palakɩ yɔ; mbʋ pʋyɔɔ yɔ pa-maɣzɩm mbʋ pɩtɩla nɔɔ kʋɖʋmaɣ nɛ Bibl wɩlɩtʋ. (Eklesɩyastɩ 9:5, 6, 10) Sɔnzɩ nzɩ sɩ-taa nasɩyɩ yɔ: Ɛsa caɣnʋʋ yaa veillée, soo sʋzʋʋ, lesi labʋ, sɩm yɔɔ tɔzʋʋ kazandʋ, kɩlaŋ labʋ sɩɖaa, sɩɖaa yɔɔdɩnʋʋ, sɩɖaa tɩmnʋʋ, nɛ lelitu. Ðɩɖɔŋ Bibl paɣtʋ ndʋ tɩtɔŋ se, “Ɩlɩɩ mba yɔ pɛ-hɛkʋ taa nɛ ɩsɩŋ kɩjaʋ. Ɩtaatukuni azuluma pʋyʋ” yɔ tɩ-yɔɔ; pʋyɔɔ ɖikiziɣ sɔnzɩ nɛ lakasɩ nzɩ.—2 Kɔrɛntɩ 6:17.
Lidaʋ wɛɛ se sɩɖaa kaɣ fem. Bibl wɩlʋʋ se sɩɖaa kaɣ fem, nɛ sɩm ɛɛkaɣ tasʋʋ wɛʋ. (Tʋma Labʋ 24:15; Natʋ 21:4) Lidaʋ ŋgʋ kɩsɩɣnɩ-ɖʋ se ɖɩtaakɩlɩ caɣʋ kʋñɔwiye ɛzɩ kɩɩsɩnʋʋ kajalaɣ Krɩstʋ mba yɔ.—1 Tesalooniiki 4:13.
Bibl tasɩɣ-ɖʋ lɔŋ se ɖɩtɩlɩ ɖo-ɖoŋ kamaɣ. (Aduwa 11:2) Alɩwaatʋ ndʋ ɖɛ-ɛyʋ nɔɔyʋ sɩkɩ yɔ, ɖɩɩmaɣzɩɣ se pɩkɛnɩ-ɖʋ waɖɛ se ɖɩla “ñɩm kuuni” yaa ɖɩwɩlɩ ɛyaa lalaa lone nɖɩ ɖɩwɛnɩ samaɣ taa yɔ. (1 Yohanɛɛsɩ 2:16) Ðɩɩlakɩ ɖɔɖɔ kazandʋ se mba pɔkɔma yɔ pɩkɛdɩnɩ-wɛ yaa ɖɩɩyakɩ aɖakaɣ ŋga kamʋ liidiye kpem yɔ, yaa ɖiisuu wondu ndʋ tɩmʋ ñɩm siŋŋ yɔ se ɛyaa ɩna se ɖɩwɛ ñɩm.
Ðɩɩñɩkɩɣ ɛyaa yɔɔ se pɛwɛɛnɩ ɖa-lɩmaɣza. Hɔɔlʋʋ kʋnɛ kɩ-taa lɛ, ɖɩɖɔŋ paɣtʋ kiɖe ɖɩnɛ ɖɩ-yɔɔ: “Ða-taa paa weyi lɛ, ɛkaɣ Ɛsɔ ɛsɩndaa sɩŋʋʋ se pahʋʋnɩ-ɩ ɛ-maɣmaɣ ɛ-ñʋʋ taa tɔm.” (Roma 14:12) Paa mbʋ yɔ, ye ɖihiɣ waɖɛ yɔ, ɖɩñakɩ pana se ɖɩlɩzɩ mbʋ pɩ-yɔɔ ɖitisiɣ yɔ pɩ-taa ɛyaa lalaa nɛ “nɔɔ kɩbaŋa nɛ ñamtʋ.”—1 Pɩyɛɛrɩ 3:15, 16.
Ye nɔɔyʋ ɛsɩba, ɛzɩma Yehowa Aseɣɖe Tɩnaa lakɩ nɛ pepiŋi-i?
Lone: Ye ɛyʋ nɔɔyʋ ɛsɩba yɔ, ɛ-hɔʋ taa mba lɩzɩɣnɩ lone nɖɩ pɩmʋnaa se pala mbʋ pɩpɔzʋʋ pʋcɔ nɛ pepimi-i yɔ. Papɩzɩɣ palɩzɩ Kewiyaɣ Kpaaŋ, ɖɩɣa nakɛyɛ, pɩlaŋ yɔɔ yaa lona lɛɛna.
Mbʋ palakɩ yɔ: Pɔyɔɔdʋʋ samaɣ taa tɔm natʋyʋ nɛ patɩŋnɩ Bibl yɔɔ nɛ palɩzɩ wɛtʋ ndʋ tɩ-taa sɩɖaa wɛɛ yɔ nɛ lidaʋ ŋgʋ ɖɩwɛnɩ sɩɖaa yɔɔ yɔ pɩ-taa nɛ pakpazɩnɩ ɖoŋ mba pɛ-ɛyʋ sɩba yɔ. (Yohanɛɛsɩ 11:25; Roma 5:12; 2 Pɩyɛɛrɩ 3:13) Papɩzɩɣ nɛ pɔtɔzɩ wɛtʋ kɩbandʋ ndʋ weyi ɛsɩba yɔ ɛɛwɛna yɔ, nɛ pɩtɩla, pañɩɣ niye lɔŋ weyi ɖɩpɩzɩɣ nɛ ɖɩkpɛlɩkɩ e-siɣsiɣ wɛtʋ taa yɔ ɩ-yɔɔ.—2 Samɩyɛɛlɩ 1:17-27.
Papɩzɩɣ petee hendu ndʋ palɩzɩnɩ Masɩ taa yɔ tɩ-taa natʋyʋ. (Koloosi 3:16) Pɛtɛzɩɣnɩ adɩma.—Filiipi 4:6, 7.
Paapɛlɩɣ kɩmɩyɛ nɛ paacɔʋ liidiye: Ðɩɩpɛlɩɣ ɖɛ-ɛgbɛyɛ taa mba liidiye Ɛsɔ sɛtʋ tʋma wena ɖɩlakɩ yɔ a-yɔɔ yaa mbʋ ɖɩlakɩ alɩwaatʋ ndʋ nɔɔyʋ sɩkɩ yɔ pɩ-yɔɔ; nɛ ɖɩɩcɔʋ liidiye ɖɔɖɔ ɛyaa cɔlɔ ɖe-kediɣzisi taa.—Maatiyee 10:8.
Mba pɔkɔŋ yɔ: Mba patɩkɛ Aseɣɖe Tɩnaa yɔ, papɩzɩɣ nɛ pɔkɔɔ nɛ pewelisi ɖibinɖe tɔm yɔɔdʋʋ Kewiyaɣ Kpaaŋ taa. Ɛyaa pɩzɩɣ nɛ pɔkɔɔ Yehowa Aseɣɖe Tʋ nɔɔyʋ ɖibinɖe tɔm ɖɩyɔɔdɩyɛ faaa ɛzɩ ɖe-kediɣzisi lɛɛsɩ taa yɔ.
Ye Ɛsɔ sɛtʋ ɛgbɛyɛ naɖɩyɛ taa mba ɩlakɩ sɔnzɩ nasɩyɩ se pʋcɔ pepi ɛyʋ nɔɔyʋ, Yehowa Aseɣɖe Tɩnaa woki sɩ-ɖɩlaɖɛ na?
Paa Aseɣɖe Tʋ weyi lɛ, ɛlakɩnɩ tʋmɩyɛ ɛ-ɛhʋyɛ nɖɩ ɛfalɩsɩ nɛ Bibl yɔ nɛ ɛkpaɣ lɩmaɣzɩyɛ hɔɔlʋʋ ŋgʋ kɩ-taa. (1 Timootee 1:19) Ɛlɛ ɖiiwoki Ɛsɔ sɛtʋ sɔnzɩ nzɩ ɖɩnawa se sɩtɩla nɔɔ kʋɖʋmaɣ nɛ Bibl paɣtʋ yɔ sɩ-ɖɩlaɖɛ.—2 Kɔrɛntɩ 6:14-17.