KPƐLƖKƲƲ 4
Eyeba nɛ ɛ-caa nɛ Yehowa pa-taa la leleŋ
Yeftee kaaɖuwaa nɛ eheyi Yehowa suwe?
Yeftee pɛlɛ taabalaa wokaɣ ɛ-cɔlɔ paa pɩnaɣ ŋga nɛ panaɣ-ɩ
Ŋsɩm halɩbɩɣa ŋga kɛwɛ kɩlɛmʋʋ kʋnɛ kɩ-yɔɔ yɔ?— Abalʋ weyi payaɣ se Yeftee yɔ ɛ-pɛlɛ lɛ. Bibl tiheyi-ɖʋ ka-hɩɖɛ, ɛlɛ ɖɩnawa se keyeba nɛ ka-caa nɛ Yehowa pa-taa la leleŋ. Yele nɛ ɖɩkpɛlɩkɩ ka nɛ ka-caa pɔ-yɔɔ tɔm pazɩ.
Yeftee kaakɛ ɛyʋ kɩbanʋ weyi ɛñakaɣ pana siŋŋ nɛ ɛwɩlɩɣ ɛ-pɛlɛ Yehowa tɔm camɩyɛ yɔ. Ɛɛkɛ ɖɔɖɔ abalʋ weyi ɛwɛ ɖoŋ nɛ ɛtɩlɩ ɛyaa ɖiyuu camɩyɛ yɔ. Pʋyɔɔ Izrayɛɛlɩ piya kaaheyi-i se ɛɖɛɛ-wɛ nɔɔ nɛ pala you nɛ po-koyindinaa.
Peeɖe Yeftee tɩmnɩ Ɛsɔ se ɛsɩnɩ-ɩ nɛ ɛwa. Eheyi Yehowa se, ye ɛwaba yɔ, ɛɛpɩsɩɣ lɛ ɛyʋ kajalaɣ tʋ weyi ɛlɩɣnɩ ɛ-ɖɩɣa taa nɛ ɛkatɩ-ɩ yɔ, ɛkaɣ-ɩ kpaɣʋ nɛ ɛcɛlɩ Yehowa. Ɛyʋ ɛnʋ ɛkaɣ kpaɣʋ e-wezuu kpeekpe nɛ ɛlabɩnɩ Ɛsɔ tʋmɩyɛ kediɣzaɣ kuduyuu tɛɛ. Kediɣzaɣ kuduyuu kɛnɩ lone nɖɩ ɖɩ-taa pɛsɛɣaɣ Yehowa yɔ. Pɩla mbʋ lɛ, Yeftee wolo nɛ ɛwa you! Ɛlɛ ɛpɩsaɣ ɖɩɣa lɛ, ŋsɩm weyi ɛcalɩ katʋʋ yɔ?—
Ɛ-pɛlɛ maɣmaɣ! Ɛ-pɛlɛ ɛnʋ e-ɖeke ɛlʋlɩ mbʋ. Lɛɛlɛɛyɔ, ɛnʋ pɩwɛɛ se Yeftee ɛkpaɣ nɛ ɛha Yehowa ɛzɩ ɛɛyɔɔdʋʋ yɔ. Tɔm tʋnɛ tɩtɩlabɩ-ɩ leleŋ kpem! Ɛlɛ tɔzɩ se ɛtɛm ɖuuu Yehowa ɛzɩdaa. Peeɖe ɛ-pɛlɛ pɩsɩnɩ-ɩ se: ‘Caa, ye ŋtɛm ɖuunuu Yehowa yɔ, la ɛzɩ ŋɖuu yɔ.’
Pɩɩlabɩ Yeftee pɛlɛ kaɖɛ, ɛlɛ ɛɖɔm ndʋ ɛ-caa ɖuwaa yɔ, tɩ-yɔɔ
Yeftee pɛlɛ taa fɛyɩ leleŋ ɖɔɖɔ. Mbʋ pʋyɔɔ yɔ, ye ewobi kediɣzaɣ kuduyuu tɛɛ yɔ, ɛɛkaɣ pɩzʋʋ ɛwalɩ nɛ ɛlʋlɩ piya. Paa mbʋ yɔ, ɛɛsɔɔlɩ siŋŋ se ɛɖɔ ɛ-caa tɔm yɔɔ nɛ Yehowa taa la leleŋ. Ɛ-ɛzɩdaa lɛ, mbʋ cɛyɩnɩ siŋŋ nɛ pɩkɩlɩ walʋʋ nɛ piya wɛnʋʋ. Pʋyɔɔ ɛkʋyaa nɛ ɛɖɛɛ ɛcaɣ kediɣzaɣ kuduyuu tɛɛ e-wezuu kɩyakɩŋ kpeekpe.
Ŋmaɣzɩɣ se mbʋ ɛlabɩ mbʋ yɔ, pɩlabɩ ɛ-caa nɛ Yehowa leleŋ na?— Ɛɛɛ, pa-taa labɩ leleŋ pɩdɩɩfɛyɩ! Ye mbʋ, ye ŋkɛ pɩɣa ŋga kañaŋ ɛyaa nɛ kɔsɔɔlɩ Yehowa yɔ, ŋkaɣ wɛʋ ɛzɩ Yeftee pɛlɛ yɔ. Ña ɖɔɖɔ, ŋkaɣ yebu nɛ Yehowa nɛ ña-lʋlɩyaa pa-taa la leleŋ.