Tɔm kɩsɔzɩtʋ

Lɔŋ tasʋʋ lʋlɩyaa Krɩstʋ ñɩma:

Ɛzɩ paa lʋlɩyʋ kɩbanʋ weyi yɔ, ɩsɔɔlaa se ɩsɩnɩ mi-piya nɛ sɩsɔɔlɩ Yehowa nɛ sɩha-ɩ sɩ-tɩ. Ɛbɛ ɩpɩzɩɣ ɩla nɛ ɩsɩnɩ-sɩ nɛ sɩñɔɔzɩ sɩ-tɩ nɛ pamɩyɩsɩ-sɩ lɩm? Alɩwaatʋ ndʋ sɩpɩzɩɣ nɛ sɩkpaɣ lɩmaɣzɩyɛ sɔsɔyɛ nɖɩ?

Yesu kaaheyi ɛ-tɔmkpɛlɩkɩyaa se: “Ɩla ajɛɛ tɩŋa taa ɛyaa nɛ papɩsɩ tɔmkpɛlɩkɩyaa, ɩmɩyɩsɩ-wɛ lɩm.” (Mat. 28:19) Ye mbʋ, pʋcɔ nɛ pamɩyɩsɩ ɛyʋ lɩm lɛ, pɩwɛɛ se ɛcalɩ kɛʋ tɔmkpɛlɩkɩyʋ weyi ɛnɩɣ Krɩstʋ wɩlɩtʋ taa, etisiɣ tɩ-yɔɔ nɛ ɛɖɔŋ ɖɔɖɔ ɛ-nɩŋgbanzɩ taa yɔ. Nɛ paa pɩɣa evelaɣ ŋga lɛ, kapɩzɩɣ nɛ kala mbʋ.

Ɩha mi-piya kɩɖaʋ kɩbaŋʋ nɛ ɩkpɛlɩkɩ-sɩ Yehowa wɩlɩtʋ. (Wp. 6:6-9) Ɩpɩzɩɣ nɛ ɩtɩŋnɩ takayɩsɩ nzɩ payaɣ se Tɔm ndʋ Bibl wɩlɩɣ? nɛ Ɛbɛ ɖɩla nɛ ɖɩwɛɛ Ɛsɔ sɔɔlɩm taa? yɔ, sɩ-yɔɔ nɛ ɩkpɛlɩkɩ-sɩ Bibl taa kajalaɣ wɩlɩtʋ, nɛ ɩsɩnɩ-sɩ nɛ sɩtɩlɩ ɛzɩma sɩpɩzɩɣ sɩkpaɣ Bibl paɣtʋ kila nɛ sɩlabɩnɩ tʋmɩyɛ yɔ. Ɩsɩnɩ mi-piya nɛ sɩtɩŋnɩ sɩ-maɣmaɣ sɩ-tɔm pee yɔɔ nɛ sɩyɔɔdɩ si-tisuu tɔm. (1 Pɩy. 3:15) Tɩlɩtʋ nɛ ɖoŋ kpazʋʋ mbʋ mi-piya mʋʋ mɩ-cɔlɔ, tɩ-yɔɔ kpɛlɩkʋʋ, hɔʋ taa Ɛsɔ sɛtʋ, kediɣzisi nɛ taabalɩyɛ kɩbanɖɛ ɖʋʋ pa-taa yɔ, pɩsɩɣnɩ-sɩ se sɩha sɩ-tɩ nɛ pamɩyɩsɩ-sɩ lɩm nɛ siwobini ɛsɩndaa fezuu taa. Ɩsɩnɩ-sɩ nɛ sɩɖʋ sɩ-tɩ fezuu taa kaɖʋsɩ.

Aduwa 20:11 tɔŋ se: “Aleɣya ɖeɖe patɩlɩɣ pɩɣa se ka-lakasɩ kaɣ wɛʋ kele kele nɛ siɣsiɣ.” Pɩɣa evelaɣ yaa pɩɣa peleɣa lakasɩ nzɩ wɩlɩɣ se kapɩsɩ Yesu Krɩstʋ tɔmkpɛlɩkɩyʋ nɛ kamʋnaa se pamɩyɩsɩ-kɛ lɩm?

Pɩɣa ŋga kɛwɛɛ nɛ kowokini ɛsɩndaa se pamɩyɩsɩ-kɛ lɩm yɔ, pɩwɛɛ se kaña ka-lʋlɩyaa. (Tʋm 5:29; Kol. 3:20) Alɩwaatʋ ndʋ Yesu kaawɛnɩ pɩnzɩ 12 yɔ, Bibl yɔɔdaa se ewobi pɩ-yɔɔ nɛ “eluzuu ɛ-tɩ [ɛ-lʋlɩyaa tɛɛ].” (Luka 2:51) Toovenim, mɩ-pɩɣa tɩtalɩ pilim nɛ kaapɩzɩɣ nɛ kala mbʋ pɩtʋʋzaa yɔ paa ɛzɩmtaa. Ɛlɛ pɩɣa ŋga kɔsɔɔlaa se pamɩyɩsɩ-kɛ lɩm yɔ, pɩwɛɛ se kañaɣ pana nɛ kamaɣzɩnɩ Yesu kɩɖaʋ nɛ kawɩlɩ kpayɩ kpayɩ se kañaŋ ka-lʋlɩyaa.

Pɩwɛɛ se kawɩlɩ ɖɔɖɔ se kɔsɔɔlɩ kpɛlɩkʋʋ Bibl taa toovenim tɔm. (Luka 2:46) Ña-pɩɣa sɔɔlɩ wobu kediɣzisi nɛ kocosuu tɔm sɩ-taa? (Keɣa 121:1) Kɛwɛnɩ paa ɖooye Bibl kalʋʋ ɖʋtʋ nɛ kɔsɔɔlɩ tɩ-yɔɔ kpɛlɩkʋʋ na?—Mat. 4:4.

Pɩɣa ŋga kɔsɔɔlaa se pamɩyɩsɩ-kɛ lɩm yɔ, kañakɩ pana se kasɩɩ Kewiyaɣ tʋma kajalaɣ lone taa ke-wezuu caɣʋ taa. (Mat. 6:33) Kawɩlɩɣ se kanɩ pɩ-taa se waɖɛ sɔsɔɖɛ pɩkɛnɩ-kɛ se keheyi ke-tisuu tɔm lalaa. Kalakɩnɩ tʋmɩyɛ tɔm susuu nʋmɔŋ ndɩ ndɩ, nɛ fɛyɛ ɛɛkpaɣ-kɛ se keyele nɛ sukulibiya lɛɛsɩ nɛ ka-wɩlɩyaa tɩlɩ se kɛkɛ Yehowa Aseɣɖe Tʋ. Kalakɩ tʋma wena paɖʋʋ-kɛ Ðe-wezuu caɣʋ nɛ ɖɛ-Ɛsɔ sɛtʋ tʋmɩyɛ kediɣzaɣ taa yɔ camɩyɛ.

Kañakɩ pana ɖɔɖɔ se kacaɣ wezuu kɩbaŋʋ nɛ kekiziɣ taabalɩyɛ kɩdɛkɛdɩyɛ ɖʋʋ. (Ad. 13:20; 1 Kɔr. 15:33) Hendu ndʋ pɩɣa welisiɣ yɔ, aleɣya wena kalakɩ yɔ nɛ filimwaa nɛ mbʋ payɩ kɔcɔŋnɩ teelee yaa intɛrnɛɛtɩ yɔɔ yɔ, mbʋ wɩlɩɣna se keseɣ taabalɩyɛ kɩdɛkɛdɩyɛ.

Lʋlɩyaa sakɩyɛ pana ñaɣʋ lʋlɩ pee kɩbana. Pe-piya tisaa nɛ sɩmʋ toovenim nɛ pamɩyɩsɩ-sɩ lɩm si-evebitu alɩwaatʋ taa. Tɛtɛ Yehowa wazɩ pana wena ɩñakɩ se ɩsɩnɩ mi-piya, nɛ sɩkpɛzɩ nɩŋgbaŋaɣ sɔsɔɔ kanɛ se pɩsa nɛ sɩkɛ Yehowa taabalaa yɔ a-yɔɔ.

Lɔŋ tasʋʋ tɔm susuyu patɩmɩyɩsɩtɩ-m lɩm:

Pɩkɛnɩ-ŋ waɖɛ sɔsɔɖɛ se ŋkɛ tɔm susuyu weyi patɩmɩyɩsɩtɩ-ɩ lɩm yɔ ɛgbɛyɛ taa. Ŋmʋnɩ samtʋ mbʋ pʋyɔɔ yɔ, ŋñaɣ pana nɛ ŋwobini ɛsɩndaa fezuu taa. Ŋkpɛlɩkɩ Bibl nɛ ŋtɩlɩ toovenim Ɛsɔ yɔɔ nɛ ŋwɩlɩ ɖɔɖɔ se ŋwɛnɩ tisuu e-lidaʋ tɔm yɔɔ.—Yoh. 17:3; Ebr. 11:6.

Pɩtɩla, pʋcɔ nɛ ña nɛ Yehowa Aseɣɖe Tɩnaa ɩpaɣzɩ Bibl kpɛlɩkʋʋ lɛ, ŋwokaɣ Ɛsɔ sɛtʋ ɛgbɛyɛ naɖɩyɛ taa yaa ŋtaawɛɛ naɖɩyɛ taa. Pʋtɔma ɖɔɖɔ yɔ, ŋlakaɣ mbʋ pɩkaɖɩɣnɩ Bibl paɣtʋ kila yɔ. Ɛlɛ lɛɛlɛɛyɔ lɛ, ŋkpiɖi ña-kɩwɛɛkɩm yɔɔ nɛ ŋwɩlɩ se ŋwɛnɩ tisuu nɛ ŋlɛɣzɩ ñe-wezuu caɣʋ nɛ ŋtɛ ña-taa se ŋlakɩ mbʋ pɩtʋʋzɩ Ɛsɔ ɛsɩndaa yɔ.—Tʋma 3:19.

Pɩtɩla ɖɔɖɔ yɔ, “ɖooo pɩjatʋ taa ŋsɩm takayɩsɩ kiɖeɖesi” nɛ pɩkandɩyɩ ñɔ-yɔɔ se ŋtaaɖɔ ɖɔnɛ nɖɩ ɖɩtɩtʋʋzɩ yɔ nɛ ŋla kɩdɛkɛdɩm sɔsɔm nabʋyʋ. (2 Tim. 3:15) Ŋkpɛlɩkaa nɛ ŋtɩlɩ ɛzɩma ŋkaɖɩnɩ ña-taabalaa mba peseɣtiɣ-ŋ se ŋla mbʋ pɩfɛyɩ ɖeu Yehowa ɛsɩndaa yɔ. Ŋñɔnɩ toovenim Ɛsɔ sɛtʋ nɛ ŋheyiɣ lalaa ñe-tisuu tɔm nɛ pɩwɩlɩɣ se ŋwɛnɩ tisuu. Pafalɩsɩ-ŋ se ŋkɛ tɔm susuyu kɩbanʋ. Nɛ lɛɛlɛɛyɔ lɛ, ña-maɣmaɣ ŋsɛtɩ ña-tɩ tɔm se ŋsɛɣ Yehowa nɛ ŋpɩsɩ tɔm susuyu weyi patɩmɩyɩsɩtɩ-ɩ lɩm yɔ.

Paa ɖooo ña-pɩjatʋ taa pɛkpɛlɩkɩ-ŋ Yehowa tɔm yaa ña-maɣmaɣ ñɛkpɛlɩkɩnɩ-tʋ pʋwayɩ yɔ, ŋpɩzɩɣ nɛ ŋkpɛzɩ lɛɛlɛɛyɔ nɩŋgbanzɩ naalɛ nzɩ siyeki nɛ ŋwobini ɛsɩndaa fezuu taa yɔ; nzɩ yɔ: Tɩ-haʋ nɛ lɩm mɩyɩsʋʋ. Ŋhaɣ ña-tɩ Yehowa, alɩwaatʋ ndʋ ŋheyiɣ-i adɩma taa se ŋkpaɣ ña-tɩ nɛ ŋcɛlɩ-ɩ se ŋsɛɣ-ɩ tam yɔ. (Mat. 16:24) Nɛ pʋwayɩ lɛ, ŋyele nɛ pamɩyɩsɩ-ŋ lɩm nɛ pɩwɩlɩ kaɣlaa se ŋkpaɣ ña-tɩ nɛ ŋha Yehowa. (Mat. 28:19, 20) Tɩ-haʋ nɛ lɩm mɩyɩsʋʋ yɔɔ ŋtɩŋɩɣna nɛ ŋpɩsɩ Yehowa Ɛsɔ lɩmɖʋyʋ. Pɩkɛnɩ waɖɛ sɔsɔɖɛ kpem!

Ɛzɩ ŋkpɛlɩkʋʋ Bibl taa yɔ, pʋtɔma yɔ ŋkaɣ katʋʋ kala ndɩ ndɩ. Tɔzɩ se pamɩyɩsɩ Yesu lɩm nɛ pitileɖi lɛ, “fezuu woni Yesu kañɩmbusuu taa se Eleeu ɛtakɩ-ɩ.” (Mat. 4:1) Pamɩyɩsɩɣ-ŋ lɩm nɛ ŋpɩsɩ Yesu wayɩ tɩŋɩyʋ lɛ, ŋkaɣ katʋʋ takɩm. (Yoh. 15:20) Takɩm mbʋ, pɩkaɣ wɛʋ ndɩ ndɩ. Ñɔ-hɔʋ taa mba pɩzɩɣ nɛ pakaɖɩnɩ-ŋ. (Mat. 10:36) Ña nɛ mba ɩlakɩ sukuli yɔ, ña nɛ mba ɩlakɩ tʋmɩyɛ yɔ, yaa ña-taabalaa kɩbɩma pɩzɩɣ nɛ pohoŋi-ŋ. Paa ɛzɩmtaa lɛ, tɔzʋʋ tɔm ndʋ Yesu yɔɔdɩ Maarkɩ 10:29, 30 taa yɔ tɩ-yɔɔ. Ɛtɔm se: “Toovenim taa lɛ, meheyiɣ-mɩ se nɔɔyʋ tiyele ɖɩɣa yaa ɖalaa yaa newaa yaa kɔɔnaa yaa ɖoo yaa caa yaa piya yaa hayɩm mɔ-yɔɔ nɛ tɔm kɩbandʋ yɔɔ nɛ eehikiɣ tam 100 nɛ pɩkɩlɩ, alɩwaatʋ tʋnɛ tɩ-taa ɖɩsɩ, ɖalaa, newaa, kɔɔnaa, ɖoonaa, piya nɛ hayɩm, nɛ nazɩm, nɛ wezuu maatɛŋ ɛjaɖɛ yɔɔ ɖʋtʋ ndʋ tɩkaɣ kɔm yɔ tɩ-taa.” Ye mbʋ, wolo pɩ-yɔɔ nɛ ŋñakɩ pana se ŋñɔtɩnɩ Yehowa kpam nɛ ŋlakɩ ɛ-sɔɔlɩm.

Ye ŋñɩnɩɣ se pamɩyɩsɩ-ŋ lɩm yɔ, pɩwɛɛ se ŋheyi ɛgbɛyɛ taa ɛzʋtʋyaa tʋmɩyɛ kpɛndɩyʋ. Ña nɛ ɛzʋtʋyaa ɩkaɣ tazʋʋ tɔm pɔzʋʋ mbʋ pɩkɔŋ tɔm tʋnɛ tɩ-wayɩ yɔ, tɩ-taa se pɩsa nɛ pana se ŋmʋnaa se pamɩyɩsɩ-ŋ lɩm yaa ŋtɩtɩɩmʋnɩta. Ŋpɩzɩɣ nɛ ŋpaɣzɩ tɩ-taa tazʋʋ ñe-ɖeke alɩwaatʋ ndʋ ŋlakɩ tɩ-yɔɔ kpɛlɩkʋʋ yɔ.

Ŋŋñɔɔzʋʋ ña-tɩ lɛ, kpaɣ alɩwaatʋ nɛ ŋkalɩ masɩ nzɩ pahawa yɔ nɛ ŋmaɣzɩ sɩ-taa tɔm yɔɔ. Pɩtɩla yɔ, pɩkɛdɩɣnɩ-ŋ se ŋma tɔm takayaɣ kanɛ ka-taa yaa takayaɣ hayʋʋ nakʋyʋ yɔɔ. Ŋpɩzɩɣ nɛ ŋlabɩnɩ tʋmɩyɛ takayaɣ kanɛ nɛ tɔm ndʋ ŋmawa yɔ, alɩwaatʋ ndʋ ña nɛ ɛgbɛyɛ taa ɛzʋtʋyaa ɩɩtazɩɣ tɔm taa lɛ. Ye tɔm pɔzʋʋ nabʋyʋ taa nɩʋ ɛwɛ-ŋ kaɖɛ yɔ, pɔzɩ weyi ɛkpɛlɩkɩɣnɩ-ŋ Bibl yɔ, yaa ɛzʋtʋyaa nɛ pasɩnɩ-ŋ.

Alɩwaatʋ ndʋ ña nɛ ɛzʋtʋyaa ɩtazɩɣ tɔm taa yɔ, taamaɣzɩ se pɩpɔzʋʋ se ñɔ-tɔm cosuu ɛɖaɣlɩ yaa ŋyɔɔdɩ tɔm ndɩ ndɩ sakɩyɛ. Pɩkɩlɩɣ ɖeu se ñɔ-tɔm cosuu ɛwɛɛ kɛlɛʋ nɛ pɩlɩɩnɩ ña-laŋɩyɛ taa. Alɩwaatʋ sakɩyɛ taa lɛ, pɩwɛɣ ɖeu se ŋtɩŋnɩ Bibl mayaɣ kʋyʋmaɣ yaa naalɛ yɔɔ nɛ ŋcosini tɔm yɔɔ.

Ɛlɛ ye ɛzʋtʋyaa ɩnawa se ŋtɩsɩmtɩ Bibl kajalaɣ wɩlɩtʋ camɩyɛ yɔ, pasɩɣnɩ-ŋ se ŋnɩɩ Masɩ taa camɩyɛ nɛ ŋpɩzɩ ŋlɩzɩ sɩ-taa nɛ ña-maɣmaɣ ñɔ-tɔm pee nɛ paamɩyɩsɩ-ŋ lɩm pʋwayɩ.

[Lɔŋ tasʋʋ ɛgbɛyɛ taa ɛzʋtʋyaa: Ɩkpaɣ lɔŋ tasʋʋ mbʋ pɩwɛ hɔɔlɩŋ 208-212 yɔɔ yɔ, nɛ ɩlabɩnɩ tʋmɩyɛ alɩwaatʋ ndʋ mɩ nɛ mba paha pa-tɩ se pamɩyɩsɩ-wɛ lɩm yɔ, ɩtazɩɣ tɔm taa yɔ.]