“Ɩɖɔ ɖɔnɛ kɩbanɖɛ ajɛɛ hɛkʋ taa”
1. Ɛbɛ yɔɔ pɩcɛyaa se ɖɩwɛnɩ ɖɔnɛ kɩbanɖɛ kigbeɣliŋ weyi ɖɩkaɣ-ɩ wobu yɔ, ɩ-taa?
1 Paa pɩnaɣ ŋga lɛ, ɛyaa sakɩyɛ lɩmaɣza wɛ ɖɔ-yɔɔ alɩwaatʋ ndʋ ɖɩɩlakɩ ɖe-kigbeɣliŋ yɔ, pʋyɔɔ pɩcɛyɩ siŋŋ se ɖɛ-wɛtʋ ɛmʋnɩ camɩyɛ Ɛsɔ weyi ɖɩsɛɣ-ɩ yɔ. (Levitiki 20:26) Pɩwɛɛ se ɖɩtɩŋnɩ ɖɛ-wɛtʋ kɩbandʋ, ɖo-wondu suu nɛ ɖa-tɩ ñɔɔzʋʋ camɩyɛ yɔɔ nɛ ɖiyele nɛ patɩlɩ-ɖʋ kpayɩ kpayɩ se ɖɩkɛnɩ Krɩstʋ wayɩ tɩŋɩyaa toovenim ñɩma. Alɩwaatʋ ndʋ ɖiwoki ageeta nɛ ajɛɛ kigbeɣliŋ weyi ɩwɛnɩ ɛzɩdaa yɔ, ɩ-taa lɛ, ɛzɩma ɖɩpɩzɩɣ nɛ ɖɩwɩlɩ se ‘ɖɩɖɔŋ ɖɔnɛ kɩbanɖɛ ajɛɛ hɛkʋ taa’ nɛ pɩɖʋ hɩɖɛ ɖa-Caa weyi ɛwɛ ɛsɔdaa yɔ?—1 Pɩy. 2:12.
2. Alɩwaatʋ ndʋ ɖiwoki kigbeɣluu yɔ, nʋmɔŋ weyi yɔɔ ɖɩpɩzɩɣ ɖɩtɩŋna nɛ ɖɩlɩzɩ Krɩstʋ wɛtʋ nɛ ɖɩwɩlɩ lalaa?
2 Wɛnɩ Krɩstʋ wɛtʋ: Sɔɔlɩm mbʋ ɖɩwɩlɩɣ ɖama nɛ wɛtʋ kɩbandʋ ndʋ ɖɩwɩlɩɣ “agbaaɣdaa mba” yɔ, pɩwɛ ndɩ siŋŋ nɛ Sataŋ ɛjaɖɛ fezuu. (Koloosi 3:10; 4:5; 2 Tim. 3:1-5) Paa tɔm ɛkɔma yɔ, pɩwɛɛ se ɖɩwɛɛnɩ suuɖu nɛ ɖa-lakasɩ tʋʋzɩ camɩyɛ alɩwaatʋ ndʋ ɖa nɛ agbaaɣdaa mba ɖɩkaɣ lɔɔɖɩyɛ yaa ɖɩkpɛndɩɣ pʋyʋ yɔ. Ye ɖɩwɛnɩ wɛtʋ kɩbandʋ yɔ, ɖɩkaɣ sɛʋ sanzɩ pɛdɩyaa mba palakɩ-ɖʋ tʋma cikpena naayɛ yɔ, yaa mba pɔcɔŋnɩ kpokponaa ɖɩzɩyɛ yɔɔ yaa mba pɔcɔŋnɩ lona lɛɛna yɔɔ yɔ se “ŋlabaɣ lɛ.”
3. Ɛbɛ pɩcɛyaa se lʋlɩyaa ɩla? Nɛ ɛbɛ yɔɔ?
3 Pɩcɛyaa se lʋlɩyaa ɩcɔnɩ pe-piya ɖeɖe camɩyɛ, ɖenɖe pakaɣ-wɛ mʋʋ ɛgɔndʋ tɛtʋ ndʋ tɩ-taa palakɩ kigbeɣluu yɔ. (Aduwa 29:15) Agɔma ɖɩɣa taa faɣɖɛ naɖɩyɛ yɔɔ cɔnɩyʋ heyi lʋlɩyaa nabɛyɛ se: “Ðɩsɔɔlɩ mɩ-tɔm pɩdɩɩfɛyɩ. Mɩ-hɔŋ ta ñɩma nɛ mi-piya pɛwɛnɩ wɛtʋ kɩbandʋ nɛ pañaŋ ɛyaa camɩyɛ. Ðɩɣa taa cɩnɛ tʋmlaɖaa tɩŋa wɛɛ nɛ pasaŋ-mɩ nɛ ye ɩkɔŋ paa mazasɩ nɛ kujukasɩ tɩŋa yɔ, pɩkɛdɩɣnɩ-ɖʋ siŋŋ.”
4. Alɩwaatʋ ndʋ ɖɩtalɩɣ tɛtʋ ndʋ tɩ-taa palakɩ kigbeɣluu yɔ, ɛzɩma pɩwɛɛ se ɖa-tɩ ñɔɔzʋʋ ɛwɛɛ?
4 Ño-wondu suu ɛmʋna: Pɩwɛɛ se wondu ndʋ ɖisuu kigbeɣluu alɩwaatʋ taa yɔ, tɩmʋnɩ camɩyɛ, pʋ-tɔbʋʋ lɛ se ɖɩtaaɖɛlɛsɩ niye nɛ ɖo-wondu suu ɛtaawɛɛ ɖɔɖɔ ɛzɩ mba patɩkɛ Krɩstʋ ñɩma yɔ. (1 Tim. 2:9) Halɩ pɩkpɛndɩnɩ hɛzʋʋ alɩwaatʋ taa, pɩtɩpɔzɩ se ɖɩla kaakendu ɖo-wondu suu hɔɔlʋʋ taa. Ye ɖɩlakɩ mbʋ yɔ, pɩkaɣ-ɖʋ kɛdɩnʋʋ se ɖɩɖʋ badge waa, nɛ fɛyɛ ɛɛkpaɣ-ɖʋ alɩwaatʋ ndʋ ɖihikiɣ waɖɛ naɖɩyɛ se ɖisusi tɔm yɔ. Ye ɖɩñɔɔzʋʋ ɖa-tɩ camɩyɛ nɛ ɖɩwɛɛnɩ ɖɔɖɔ wɛtʋ kɩbandʋ kigbeɣliŋ weyi ɩwɛnɩ ɛzɩdaa yɔ, ɛ-alɩwaatʋ taa yɔ, pɩkaɣ yebu nɛ laŋa kɩbana tɩnaa welisi wezuu tɔm ndʋ tɩwɛ Bibl taa yɔ, nɛ kɔzɩ kɔzɩ lɛ, pɩkaɣ ɖɔɖɔ yebu se Yehowa taa ɛla leleŋ.—Sofoniya 3:17.
[Apotin to weda 2-5]
2014 ageeta kigbeɣluu yɔɔ tɔm kɩtɔzɩtʋ
◼ Ðʋtʋ alɩwaatʋ: Pakaɣ tʋlʋʋ kigbeɣluu nɔnɔsɩ ñɩɣtʋ 8 yɔɔ. Kɔɔnɔɔ minziiki kaɣ paɣzʋʋ ñɩɣtʋ 9 nɛ cɛcɛsɩ 20 yɔɔ kɩyakɩŋ ɛnɩ ɩ-naadozo. Pɩtakɩ mbʋ lɛ, pɩwɛɛ se ɖa-taa paa weyi ɩñɩnɩ ɛ-ɖɩjaɣyɛ nɛ kigbeɣluu paɣzɩ camɩyɛ. Kɛdɛzaɣ hendu nɛ kɛdɛzaɣ adɩma papaɣzɩɣ ñɩɣtʋ 4 nɛ cɛcɛsɩ 55 yɔɔ kemeɣa wiye nɛ mazaɣ nɛ kujuka lɛ, papaɣzɩɣ ñɩɣtʋ 3 nɛ cɛcɛsɩ 50 yɔɔ.
◼ Ajɛɛ kigbeɣliŋ: Pakaɣ labʋ ajɛɛ kigbeɣliŋ hɔɔlɩŋ nɩɩyɩ taa. Taasɔɔ se pʋcɔ nɛ ɛgbɛyɛ piliŋa yaɣ agbaa naayɛ nɛ ajɛɛ lɛɛna taa ɛyaa nabɛyɛ se powolo kigbeɣliŋ ɛnɩ lɛ, ɖɩmaɣzɩ ɖɩjaɣyɛ, lɔɔɖa ɖɩzɩyɛ, agɔma ɖɩsɩ nzɩ sɩwɛ peeɖe yɔ, pɩ-yɔɔ camɩyɛ. Ye koobiya iwobi ajɛɛ kigbeɣluu ŋgʋ kɩ-taa patɩyaa-wɛ yɔ, ɛyaa kɩlɩɣ ɖɔʋ nɛ pɩkɔŋnɩ kaɖɛ. Ye nabʋyʋ ɛlaba nɛ ŋŋpɩzɩɣ se ŋwolo ageeta kigbeɣluu ŋgʋ kɩ-taa pɔtɔm se ñɛ-ɛgbɛyɛ ewolo yɔ, taawolo ajɛɛ kigbeɣluu nakʋyʋ taa.
◼ Lɔɔɖa ɖɩzɩyɛ: Ðenɖe ɖɩlakɩ kigbeɣliŋ payɩ yɔ, lona naayɛ wɛɛ nɛ pasɩɣ lɔɔɖa peeɖe; weyi ɛcalɩɣ kɔm yɔ, ɛnʋ pacalɩɣ lone haʋ. Lona wena awɛ lɔɔɖa ɖɩzɩyɛ yɔ, ɖoŋ ɖoŋ lɛ, atɩɖɔɔ; pʋyɔɔ pɩkɩlɩɣ ɖeu se koobiya ɩkpɛndɩ nɛ pasʋʋ lɔɔɖa kʋyʋmɛɛ.
◼ Ðɩjaɣyɛ ñɩnʋʋ: Paa evemiye nɖɩ patʋlʋʋ kigbeɣluu ɖɩlaɖɛ nɔnɔsɩ lɛ, itaakpidisi se ɩñɩnɩ ɖɩjaɣyɛ wena akɩlɩ ɖeu nɛ pɩwɛɛ ɛzɩ mɩ nɛ koobiya lalaa ɩlakɩ alayɩɣ yɔ. Kɩlaʋ lɩmaɣza wena ɖɩwɛna nɛ ɖɩñɩnɩɣ lalaa kɛzɛɣa kajalaɣ ɖeɖe yɔ, ana patɩlɩɣnɩ-ɖʋ se ɖɩkɛ Krɩstʋ ñɩma toovenim nɛ pituzuu ɛyaa se pasa Ɛsɔ. (Yoh. 13:34, 35; 1 Kɔr. 13:4, 5; 1 Pɩy. 2:12) Ða nɛ Koobiya mba ɖɩwɛ ɖɩɣa kʋyʋmaɣ taa yaa ɖa nɛ mba ɖɩsʋ lɔɔɖɩyɛ kʋyʋmɖɩyɛ yaa ɖa nɛ mba ɖiɖiɣni kpɛlɩkʋʋ Bibl yɔ, pe-ɖeke ɖɩpɩzɩɣ nɛ ɖɩñɩnɩ ɖɩjaɣyɛ. Mba pɛkɛ ajamaa yɔ, pañɩnɩ-wɛ ɖɩjaɣyɛ nɛ pasɩɩ. Ðɩjaɣyɛ lona tɩɖɔɔ peeɖe, ye mbʋ koobiya mba pasɩɣnɩ akpadɩyaa yaa ajamaa yɔ, pe-ɖeke papɩzɩɣna nɛ pacaɣ pɔ-cɔlɔ.
◼ Wɩsɩ taa tɔɔnaɣ: Ðitendiɣ-mɩ se ɩkɔnɩ mɩ-tɔɔnaɣ kigbeɣluu ɖɩlaɖɛ, pɩsɩɣnɩ-mɩ nɛ ɩtaalɩɩ se ɛya tɔɔnaɣ awayɩ hɛzʋʋ alɩwaatʋ taa. Ðɩpɩzɩɣ nɛ ɖɩɖɔkɩ huyuu yaa ‘glacière’ cikpeluu ŋgʋ ɖɩpɩzɩɣ nɛ ɖɩsʋzɩ kpelisi tɛɛ yɔ. Pɩtɩha nʋmɔʋ se powoni huyiŋ sɔsɔŋ yaa ‘glaciere’ waa sɔsaa yaa kpalɩbanaa kigbeɣluu taa.
◼ Haɖɛ: Ðɩpɩzɩɣ nɛ ɖɩla sɔɔlɩm haɖɛ se pɩsɩnɩ ɛjaɖɛ kpeekpe yɔɔ kewiyaɣ tʋma nɛ pɩwɩlɩ ɖɔɖɔ se kigbeɣluu ɖʋtʋ labɩ-ɖʋ leleŋ. Ye ‘chèque’ ɖɩlakɩ yɔ, pɩwɛɛ se ɖɩma se liidiye nɖɩ pama ‘chèque’ ŋgʋ kɩ-yɔɔ yɔ, pɛhɛyɩ-ɖɩ “Association Religieuse Les Témoins de Jéhovah du Bénin.”
◼ Kɔyɛ: Ye ŋwɛɛ nɛ ŋliki kɔ naayɛ nɛ pʋpɔzɩ se pama-yɛ pʋcɔ nɛ paya yɔ, ɖitendi-ŋ ŋŋkɔŋ lɛ, kpɛndɩnɩ takayɩsɩ nzɩ pʋpɔzaa yɔ, mbʋ pʋyɔɔ yɔ takayɩsɩ nzɩ sɩfɛyɩ kigbeɣluu ɖɩlaɖɛ. Ñɩma wena pɔsɔkɩnɩ mba pɛwɛnɩ kʋdɔŋ ŋgʋ payaɣ se ‘diabète’ yɔ, pɩwɛɛ se pɔlɔ-yɛ ɖenɖe pʋpɔzaa yɔ nɛ pawɩlɩ se a-tukunuu pɩzɩɣ nɛ pɩkɔnɩ kaɖɛ; pataalɔ-yɛ kigbeɣluu ɖɔkɩŋ yaa agɔma ɖɩɣa taa ɖɔkɩŋ taa.
◼ Kɛgbɛdɩsasɩ: Ɩcɔnɩ nɛ ɩñɔɔzɩ mbʋ pɩpɩzɩɣ nɛ putuu yaa putuuli ɛyʋ nɛ pɩkɔnɩ-ɩ kɛgbɛdɩsaɣ yɔ. Mbʋ ɛyaa lɛɣ paa pɩnaɣ ŋga yɔ, mbʋ yekina nɛ kɛgbɛdɩsaɣ talɩɣ-wɛ, kɔzɩ kɔzɩ mba pɛlɛɣ naataŋgbala wena akʋyaa yɔ. Pɩkɩlɩɣ weewee se ɛyʋ ɛlɛɛ naataŋgbala wena awɛ kɛlɛʋ nɛ amʋna nɛ apɩzɩɣ se asɩnɩ-ɩ nɛ ɛɖɔ camɩyɛ yaa ɛkpa ‘escaliers’ waa kɛlɛʋ yem yɔ.
◼ Veuillez suivre l’intérêt (S-43) takayɩsɩ: Ye ɖisusi nɔɔyʋ tɔm ɖenɖe ɖiwobi kigbeɣluu yɔ, pɩwɛɛ se ɖɩlabɩnɩ tʋmɩyɛ Veuillez suivre l’intérêt takayaɣ. Ðɩmaɣ kɔ-yɔɔ tɔm nɛ pɩtɛ lɛ, ɖɩpɩzɩɣ nɛ ɖɩcɛlɩ-kɛ takayɩsɩ tʋmɩyɛ yaa ɖɩpɩsɩɣ ɖɛ-tɛ lɛ, ɖɩcɛlɩ-kɛ ɖɛ-ɛgbɛyɛ taa takayaɣ taa mayʋ.
◼ Faɣlɛɛ: Ŋwobi faɣlɛɛ taa yɔ, la nɛ ña-lakasɩ kɩbanzɩ yele nɛ pɩɖʋ Yehowa hɩɖɛ. Suu wondu ndʋ tɩwɩlɩɣ se ŋkɛ Krɩstʋ tʋ yɔ. Ha nabʋyʋ, ye ŋnawa se pʋmʋnaa se paha mbʋ yɔ.