Kigbeɣluu yɔɔ tɔm kɩtɔzɩtʋ
Ðʋtʋ alɩwaatʋ: Pakaɣ tʋlʋʋ kigbeɣluu nɔnɔsɩ ñɩɣtʋ 8 yɔɔ. Kɔɔnɔɔ minziiki kaɣ paɣzʋʋ ñɩɣtʋ 9 nɛ cɛcɛsɩ 20 yɔɔ avema ana a-naadozo. Pɩtakɩ mbʋ lɛ, pɩwɛɛ se ɖa-taa paa weyi ɛñɩnɩ ɛ-ɖɩjaɣyɛ nɛ kigbeɣluu paɣzɩ camɩyɛ. Ðʋtʋ kaɣ tɛm ñɩɣtʋ 5 yɔɔ mbʋ yɔ kemeɣa nɛ mazaɣ; ɛlɛ kujuka wiye lɛ, tɩkaɣ tɛm ñɩɣtʋ 4 yɔɔ.
‘Tee hendu nɛ ŋsa Yehowa’: Caanaʋ taa Yehowa sɛyaa saŋaɣ-ɩ nɛ hendu. Sɔnɔ ɖɔɖɔ minziiki wɛnɩ lone sɔsɔɖɛ toovenim Ɛsɔ sɛtʋ taa. (Keɣa 27:7) Paa ɖe-kigbeɣluu sɔsɔʋ hɔɔlʋʋ ŋgʋ lɛ, kɩpaɣzɩɣnɩ minziiki nakʋyʋ. Pɩtɩkɛ minziiki yem, ɛlɛ pɔñɔɔzɩ-kʋ se kɩkpɛlɩkɩ-ɖʋ lɔŋ nɛ ɖɩsɛɛ Yehowa. Ye mbʋ, alɩwaatʋ ndʋ tɔm yɔɔdɩyaa yayʋ tɔŋ se minziiki caɣ paɣzʋʋ lɛ, pɩwɩlɩɣ se pɩtalaa se ɖɩñɩnɩ ɖɩjaɣyɛ nɛ ɖɩcaɣ nɛ ɖiwelisi minziiki ŋgʋ nɛ taa leleŋ, pɩtɩmʋna se ɖɩwɛɛ nɛ ɖɩlakɩ faawɩyɛ. Ye ɖɩlakɩ mbʋ yɔ, ɖɩwɩlɩɣ se ɖɩwɛnɩ ɛsɩmɩyɛ koobiya mba pɔñɔɔzɩ minziiki ŋgʋ yɔ, pɔ-yɔɔ. Koobiya halaa nɛ abalaa mba pakpakɩɣ pa-maɣmaɣ pe-liidiye nɛ powoki Patɛrsɔɔnɩ, Niyuu Yɔrɩkɩ ɛjaɖɛ taa, nɛ pɔñɔɔzʋʋ minziikiwaa mba se palabɩ-ɖʋ leleŋ. Ðɩtɛŋ kajalaɣ minziiki ŋgʋ welisuu lɛ, pɩwɛɛ se ɖa-taa paa anɩ ɛkʋyɩ nɛ etee Kewiyaɣ hendu nɛ ɛsa Yehowa.
Lɔɔɖa ɖɩzɩyɛ: Ðenɖe ɖɩlakɩ kigbeɣliŋ payɩ yɔ, lona naayɛ wɛɛ nɛ pasɩɣ lɔɔɖa peeɖe; weyi ɛcalɩɣ kɔm yɔ, ɛnʋ pacalɩɣ lone haʋ. Lone wena awɛ lɔɔɖa ɖɩzɩyɛ yɔ, ɖoŋ ɖoŋ lɛ, atɩɖɔɔ; pʋyɔɔ pɩkɩlɩɣ ɖeu se koobiya ɩkpɛndɩ nɛ pasʋʋ lɔɔɖa kʋyʋmɛɛ.
Ðɩjaɣyɛ ñɩnʋʋ: Paa evemiye nɖɩ patʋlʋʋ kigbeɣluu nɔnɔsɩ lɛ, itaakpidisi se ɩñɩnɩ ɖɩjaɣyɛ wena akɩlɩ ɖeu yɔ nɛ pɩwɛɛ ɛzɩ mɩ nɛ koobiya lalaa ɩlakɩ alɛyɩɣ yɔ. Ðitendi-mɩ, ɩmaɣzɩ lalaa yɔɔ, halɩ pɩwɛɣ ɖeu se ɩwɛnɩ kɩlaʋ lɩmaɣza mi-koobiya yɔɔ. Kɩlaʋ lɩmaɣza wena ɖɩwɛna yɔ, ana patɩlɩɣnɩ-ɖʋ se ɖɩkɛ Krɩstʋ ñɩma toovenim nɛ pituzuu ɛyaa se pasa Ɛsɔ. (Yoh. 13:34, 35; 1 Kɔr. 13:5; 1 Pɩy. 2:12) Ða nɛ koobiya mba ɖɩwɛ ɖɩɣa kʋyʋmaɣ taa yaa ɖa nɛ mba ɖɩsʋ lɔɔɖɩyɛ kʋyʋmɖɩyɛ yaa ɖa nɛ mba ɖiɖiɣni Bibl kpɛlɩkʋʋ yɔ, pe-yeke ɖɩpɩzɩɣ nɛ ɖɩñɩnɩ ɖɩjaɣyɛ. Ðitendi-mɩ, ɩtaasɩɩ wondu lona wena ɩtɩñɩnɩ nɛ ɩsɩɩ lalaa yɔ, a-taa. Ye ɩlakɩ mbʋ yɔ, pɩsɩɣnɩ lalaa nɛ patɩlɩ se lona ana awɛ yem. Mba pɛkɛ ajamaa yaa akpadɩyaa yɔ, pañɩnɩ-wɛ ɖɩjaɣyɛ nɛ pasɩɩ. Ðɩjaɣyɛ lona tɩɖɔɔ peeɖe, ye mbʋ koobiya mba pasɩɣnɩ akpadɩyaa yaa ajamaa yɔ, pe-yeke papɩzɩɣna nɛ pacaɣ pɔ-cɔlɔ.
Ño-wondu suu ɛmʋna: Pɩwɛɛ se wondu ndʋ ɖisuu kigbeɣluu alɩwaatʋ taa yɔ, tɩmʋnɩ camɩyɛ; pʋ-tɔbʋʋ lɛ se ɖɩtaaɖɛlɛsɩ niye nɛ ɖo-wondu suu ɛtaawɛɛ ɖɔɖɔ ɛzɩ mba patɩkɛ Krɩstʋ ñɩma yɔ. (1 Tim. 2:9) Halɩ pɩkpɛndɩnɩ hɛzʋʋ alɩwaatʋ taa yaa alɩwaatʋ ndʋ ɖɩyɛlɩɣ agɔma ɖɩsɩ taa yɔ, pɩtɩpɔzɩ se ɖɩla kaakendu ɖo-wondu suu hɔɔlʋʋ taa. Ye ɖisuu wondu camɩyɛ yɔ, fɛyɛ ɛɛkpaɣ-ɖʋ se ɖɩɖʋ badge waa, nɛ fɛyɛ ɛɛkpaɣ-ɖʋ ɖɔɖɔ alɩwaatʋ ndʋ ɖihikiɣ waɖɛ naɖɩyɛ se ɖisusi tɔm yɔ. Ye ɖɩñɔɔzʋʋ ɖa-tɩ camɩyɛ nɛ ɖɩwɛɛnɩ wɛtʋ kɩbandʋ kigbeɣliŋ weyi ɩwɛnɩ ɛzɩdaa yɔ, ɛ-alɩwaatʋ taa yɔ, pɩkaɣ yebu nɛ laŋa kɩbana tɩnaa welisi wezuu tɔm ndʋ tɩwɛ Bibl taa yɔ, nɛ kɔzɩ kɔzɩ lɛ, pɩkaɣ yebu se Yehowa taa ɛla leleŋ. (Sof. 3:17)
Ðɩɩlakɩnɩ tʋmɩyɛ pɔrtaabɩlɩwaa yaa wondu lɛɛtʋ lɛ, ɖɩwɛnɩ wɛtʋ kɩbandʋ: Ðʋtʋ paɣzɩɣ lɛ, ye ɖɩñɔɔzɩ ɖɔ-pɔrtaabɩlɩwaa yaa wondu lɛɛtʋ se tɩtaacɛyɩ koobiya yɔ, pʋbʋ lɛ ɖɩwɩlɩɣ se ɖɩwɛnɩ wɛtʋ kɩbandʋ. Ye ɖɩlakɩnɩ tʋmɩyɛ video, camera, taablette yaa wondu lɛɛtʋ yɔ, ɖɩmaɣzɩ lalaa yɔɔ; ɖitaakendi-wɛ yaa ɖitaayele nɛ piyiɣdi pa-lɩmaɣza taa. Kigbeɣluu ɖʋtʋ paɣzɩɣ lɛ, ye ɖɩɩmaɣ message waa yɔ, ɖɩwɩlɩɣ se ɖɩwɛnɩ wɛtʋ kɩbandʋ.
Wɩsɩ taa tɔɔnaɣ: Ðitendi-mɩ, ɩkɔnɩ mɩ-tɔɔnaɣ kigbeɣluu ɖɩlaɖɛ, pɩɩsɩnɩ-mɩ nɛ ɩtaalɩɩ awayɩ se ɩya tɔɔnaɣ hɛzʋʋ alɩwaatʋ taa. Ðɩpɩzɩɣ nɛ ɖɩɖɔkɩ huyuu yaa glacière cikpeluu ŋgʋ ɖɩpɩzɩɣ nɛ ɖɩsʋzɩ kpelisi tɛɛ yɔ. Pɩtɩha nʋmɔʋ se powoni huyiŋ sɔsɔŋ yaa glacière waa sɔsaa yaa kpalɩbanaa kigbeɣluu taa.
Haɖɛ: Ðɩpɩzɩɣ nɛ ɖɩla sɔɔlɩm haɖɛ se pɩsɩnɩ ɛjaɖɛ kpeekpe yɔɔ Kewiyaɣ tʋma nɛ pɩwɩlɩ ɖɔɖɔ se kigbeɣluu ɖʋtʋ labɩ-ɖʋ leleŋ. Ye chèque ɖɩlakɩ yɔ, pɩwɛɛ se ɖɩma se liidiye nɖɩ pama chèque ŋgʋ kɩ-yɔɔ yɔ, pɛhɛyɩ-ɖɩ “Association Religieuse Les Témoins de Jéhovah du Bénin.
Kɔyɛ: Ye ŋwɛɛ nɛ ŋliki kɔ naayɛ nɛ pʋpɔzɩ se pama-yɛ pʋcɔ nɛ paya yɔ, ɖitendi-ŋ ŋŋkɔŋ lɛ, kpɛndɩnɩ takayɩsɩ nzɩ pʋpɔzaa yɔ, mbʋ pʋyɔɔ yɔ takayɩsɩ nzɩ sɩfɛyɩ kigbeɣluu ɖɩlaɖɛ. Ñɩma wena pɔsɔkɩnɩ mba pɛwɛnɩ kʋdɔŋ ŋgʋ payaɣ se diabète yɔ, pɩwɛɛ se pɔlɔ-yɛ ɖenɖe pʋpɔzaa yɔ nɛ pawɩlɩ se a-tukunuu pɩzɩɣ nɛ pɩkɔnɩ kaɖɛ; pataalɔ-yɛ kigbeɣliŋ ɖɔkɩŋ taa yaa agɔma ɖɩsɩ ɖɔkɩŋ taa.
Kɛgbɛdɩsasɩ: Ɩcɔnɩ nɛ ɩñɔɔzɩ mbʋ pɩpɩzɩɣ nɛ putuu yaa putuuli ɛyʋ nɛ pɩkɔnɩ-ɩ kɛgbɛdɩsaɣ yɔ. Mbʋ ɛyaa lɛɣ yɔ, mbʋ yekina nɛ kɛgbɛdɩsaɣ talɩɣ-wɛ paa pɩnaɣ ŋga, kɔzɩ kɔzɩ mba pɛlɛɣ naataŋgbala wena akʋyaa yɔ. Pɩkɩlɩɣ weewee se ɛyʋ ɛlɛɛ naataŋgbala wena awɛ kɛlɛʋ nɛ amʋna nɛ apɩzɩɣ se asɩnɩ-ɩ nɛ ɛɖɔ camɩyɛ yaa ɛkpa escaliers waa kɛlɛʋ yem yɔ.
Ðɩzʋyɛ: Ðitendi-ŋ ñaɣ pana nɛ ŋwɛɛnɩ wɛtʋ kɩbandʋ ɖɩɣa ŋga taa ŋsʋʋ yɔ, ɛzɩ camɩyɛ lakasɩ, suuɖu nɛ tɔm taa nɩʋ. Ye ñɛ-ɛyɩsɩm yaa ñɔ-hɔʋ taa tʋ nɔɔyʋ tɛ ŋsʋʋ yɔ, ñaɣ pana nɛ ŋcɛlɩ liidiye pazɩ nɛ pɩsɩnɩ-ɩ, ɖʋ nesi tʋma wena palakɩ ɖɩɣa taa yɔ. Pʋcɔ nɛ ŋkpe lɛ, ñɔɔzɩ ɖenɖe ŋsʋwa yɔ, nɛ pɩwɛɛ cɩɖɩ cɩɖɩ.
Veuillez suivre l’intérêt (s-43) takayɩsɩ: Ye ŋsusi nɔɔyʋ tɔm ɖenɖe ŋwobi kigbeɣluu yɔ, pɩwɛɛ se ŋlabɩnɩ tʋmɩyɛ Veuillez suivre l’intérêt takayaɣ. Ŋmaɣ kɔ-yɔɔ tɔm nɛ pɩtɛ lɛ, ŋpɩzɩɣ nɛ ŋcɛlɩ-kɛ takayɩsɩ tʋmɩyɛ yaa ŋpɩsɩɣ ñɛ-tɛ lɛ, ŋcɛlɩ-kɛ ɛgbɛyɛ taa takayaɣ taa mayʋ.
Faɣlɛɛ: Ŋwobi faɣlɛɛ taa yɔ, la nɛ ña-lakasɩ kɩbanzɩ yele nɛ pɩɖʋ Yehowa hɩɖɛ. Suu wondu ndʋ tɩwɩlɩɣ se ŋkɛ Krɩstʋ tʋ yɔ. Ha nabʋyʋ, ye ŋnawa se pʋmʋnaa se paha mbʋ yɔ.
Agɔma ɖɩsɩ:
Ðitendi-mɩ, itaayele nɛ pakazɩ ɖamɩŋ nɛ pɩcɛzɩ weyi ɩkaɣ ɩ-tɛɛ sʋʋ yɔ, nɛ itaayele nɛ ɛyaa mba pasʋʋ ɖaŋ kʋyʋmʋʋ tɛɛ pɛcɛzɩ ɛyaa ñʋʋ ŋgʋ paɖʋwa se pasʋʋ kɩ-tɛɛ yɔ.
Ye ɩyɔɔdaa se pasɩɩ ɖaŋ nakʋyʋ yɔ, ɩtaapɩsɩnɩ wayɩ pʋwayɩ, ye kaɖɛ tɔm natʋyʋ ɛkɔmna kpɛdɛyɛ yɔ, kalɩ pi-yeke; ɛlɛ pɩlabɩ mbʋ yɔ, iheyi agɔma ɖɩɣa taa ɛyaa lɛɛ lɛɛ nɛ pana se lalaa pɩzɩɣ nɛ pamʋ ɖaŋ ŋgʋ yaa we. (Mat 5:37) Ye ŋŋtasɩɣ wobu se ŋsʋʋ agɔma ɖɩɣa ŋga ka-taa yɔ, yele nɛ agɔma ɖɩɣa taa ɛyaa nɩɩ pɩ-taa camɩyɛ lɔŋ se ŋŋtasɩɣ wobu.
Yele nɛ pɛcɛlɩ-ŋ wondu keekeevi ye ŋnawa se ŋkaɣ-kʋ labɩnʋʋ tʋmɩyɛ kpaagbaa yɔ, nɛ ŋtɩɩtɛŋ lɛ, pɩsɩnɩ-kʋ nɛ pɛcɛlɩ-kʋ lalaa nɛ palabɩnɩ tʋmɩyɛ.
Ye ñɛ-ɛjaɖɛ taa pahaɣ agɔma ɖɩsɩ taa ɛyaa nabʋyʋ pa-tʋmɩyɛ nɖɩ palaba yɔ, ɖɩ-yɔɔ yɔ, pʋbʋ lɛ ha mba pakpakɩɣ ño-wondu nɛ mba pahazɩɣ ña-ɖaŋ tɛɛ yɔ nabʋyʋ.
Ye paha nʋmɔʋ se patɩzɩ peeɖe yɔ, pʋbʋ lɛ tɩzɩ ña-ɖaŋ tɛɛ na
Taawɛɛkɩ mbʋ pɔkɔŋna se ŋtɔɔnɩ tanaŋ tɛɛ tɔɔnaɣ yɔ ɛzɩ kɔfɩ, naalɩm mbʋ pasɩɣ agɔma yɔ.
Yele nɛ pana se ŋwɛnɩ fezuu taa lakasɩ, kɔzɩ kɔzɩ ŋŋñɩnɩɣ se ɖɩɣa taa tʋmlaɖaa ɩlabɩ-ŋ nabʋyʋ lɛ. Ɛyaa mba agɔma ɖɩsɩ taa ɛyaa lakɩ tʋma yɔ, pɔɖɔwa nɛ ɖa-camɩyɛ lakasɩ, ɖo-suuɖu nɛ ɛzɩma ɖɩnɩɣ tɔm taa yɔ, pɩkɛdɩɣnɩ-wɛ
Pɩwɛɛ se lʋlɩyaa ɩcɔnɩ pe-piya yɔɔ paa ɛzɩmtaa paa pɩtɩɩkɛ aleɣya kadaɣ taa, lɩm ɖɩyayɛ yaa hɔɔlɩŋ lɛɛŋ taa yɔ.
Liidiye ñʋʋ ŋgʋ kɩwɛ Liste des lieux d’hébergement recommandés yɔɔ yɔ, nɖɩ pɩwɛɛ se pɛhɛyɩ ɖoo kʋyʋmɛɛ taa ɖaŋ yɔɔ, ye pɔpɔzɩ-ŋ se ŋtasɩ hɛyʋʋ liidiye naɖɩyɛ yɔ, kizi nɛ ŋheyi-tʋ kigbeɣluu ɖɩzʋyɛ ñɩnʋʋ tʋmɩyɛ kpaagbaa.
Ye tɔm natʋyʋ ɛkɔm ña-ɖaŋ yɔɔ agɔma ɖɩɣa taa peeɖe yɔ, heyi-tʋ kigbeɣluu taa ɖʋzɩyɛ ñɩnʋʋ tʋmɩyɛ nɛ pasɩnɩ-ŋ.
Sɔɔlɩm tʋmɩyɛ: Ye ŋsɔɔlaa se ŋɖʋ nesi nɛ pala tʋmɩyɛ naɖɩyɛ kigbeɣluu taa yɔ, wolo nɛ ŋna kigbeɣluu taa sɔɔlɩm tʋmɩyɛ ɖɔkɩyaa. Piya nzɩ sɩtɩtalɩ pɩnzɩ 16 yɔ, sɩpɩzɩɣ nɛ sɩɖʋ nesi kigbeɣluu taa tʋma ɛlɛ pʋpɔzʋʋ se sɩ-lʋlɩyʋ nɔɔyʋ ɩcɔnɩnɩ sɩ-yɔɔ yaa pʋpɔzʋʋ se sɩ-lʋlɩyaa ɩha-mɩ nʋmɔʋ pʋcɔ nɛ ɩpɩzɩ nɛ ɩcɔnɩ sɩ-yɔɔ.