Ɛzɩma ɖɩpɩzɩɣ nɛ ɖɩlabɩnɩ presentoir tʋmɩyɛ?

Ye patɩŋnɩ présentoir yaa taabɩlɩnaa mba pɔ-yɔɔ pasɩɣ takayɩsɩ yɔ, pɔ-yɔɔ nɛ posusuu tɔm yɔ, pɩsɩɣna se pɔhɔ ɛyaa mba pɛwɛnɩ laŋa kɩbana nɛ pɔkɔɔ toovenim taa. (Yoh. 6:44) Pʋyɔɔ peseɣti ɛgbɛyɛ taa ɛzʋtʋyaa se pala ɖʋtʋ nɛ pa-agbaa susi tɔm samaɣ taa po-kookasɩ hɔɔlɩŋ weyi ɩ-taa ɛyaa sakɩyɛ ɖɔŋ yɔ. Mba pɔɖɔkʋʋ présentoir waa yɔ, paasɩŋɩɣ ɖoli kʋyʋm, pʋyɔɔ lɛ pɩtɩcɛyɩ se pɔpɔzɩ nʋmɔʋ tɛtʋ taa ñʋndɩnaa. Apɩzɩɣ nɛ ɛla samaɣ taa tɔm susuu tʋmɩyɛ nɖɩ? Tɔm susuyaa mba pasɩm labʋ, patɩlɩ lɛɣtʋ, posuu wondu camɩyɛ nɛ patɩlɩ yɔɔdʋʋ camɩyɛ yɔ. Tɔm ndʋ tɩkɔŋ pɩ-tɛɛ cɩnɛ yɔ, tɩkaɣ sɩnʋʋ tɔm susuyaa nɛ patɩlɩ mbʋ pɩwɛɛ se pala nɛ mbʋ pɩfɛyɩ ɖeu se pala yɔ.

La:

La mba pɔkɔŋ nɛ pɛɖɛɣ ñɔ-cɔlɔ yɔ, talɩ ɖeu nɛ ŋsɩnɩ-wɛ. Tɔm susuyaa nabɛyɛ mʋʋyʋʋ camɩyɛ nɛ pɛsɛɣ mba pɔkɔŋ yɔ. Ye nɔɔyʋ ɛwɛɛ ɛɖɛɣ nɛ ɛcɔŋnɩ mbʋ pɩwɛ présentoir yaa taabɩlɩ yɔɔ yɔ, ŋpɩzɩɣ nɛ ŋheyi-i se: “Ye ŋsɔɔlaa yɔ, ŋpɩzɩɣ nɛ ŋlɩzɩ takayaɣ nakɛyɛ.”
Taakɩlɩ ñɔtɩnʋʋ présentoir yaa taabɩlɩ; ɛlɛ taasɩŋ poliŋ taa ɖɔɖɔ. Hɔɔlɩŋ nɩɩyɩ taa lɛ, tɔm susuyaa nawa se ye pasɩŋ mbʋ pasɩwa yɔ, pɩ-cɔlɔ yɔ, pɩlʋlʋʋ pee kɩbana. Lalaa ñanawa se ye pakɩlɩ ñɔtɩnʋʋ mbʋ pasɩwa yɔ, sɔɔndʋ kpaɣ mba pɔkɔŋ nɛ pɛɖɛɣ yɔ, se pasɩŋ; pʋyɔɔ potuzuu pa-tɩ nɛ pasɩŋ kɩjaʋ nɛ alɩwaatʋ ndʋ panaɣ nɔɔyʋ sɩŋaa nɛ ɛcɔŋnɩ mbʋ pasɩwa yɔ lɛ pɔkɔɔ. Ye ɛyʋ nɔɔyʋ ɛñɔtaa se ɛcɔnɩ takayɩsɩ yɔ, ñaɣ pana nɛ ña nɛ ɩ ɩpaɣzɩ faawɩyɛ labʋ; pɩtɩla ŋpɩzɩɣ nɛ ŋpɔzɩ-ɩ se “Ŋtɛm maɣzʋʋ tɔm tʋnɛ tɩ-yɔɔ wiɖiyi nɛ ŋna?”
Ye pɩlakɩ yɔ, labɩnɩ tʋmɩyɛ Bibl ɖoŋ ɖoŋ.
Ye nɔɔyʋ ɛkpaɣ Bibl kpɛlɩkʋʋ takayaɣ nakɛyɛ, ɛzɩ Ndʋ Bibl Wɩlɩɣ takayaɣ mbʋ yɔ, heyi-i Bibl kpɛlɩkʋʋ ɖʋtʋ tɔm nɛ ŋlɩzɩ-ɩ tɩ-taa. Heyi-i se ye ɛsɔɔlaa yɔ, ŋpɩzɩɣ nɛ ŋwɩlɩ-ɩ video ŋgʋ payaɣ se: “Ɛbɛ yɔɔ pɩcɛyaa se ɛyʋ ɛkpɛlɩkɩ Bibl?”
Ye nɔɔyʋ ɛwɩlaa se ɖɔ-tɔm kɛdɩnɩ-ɩ yɔ, pɔzɩ-ɩ nɛ eheyi-ŋ ɛzɩma ŋpɩzɩɣ ŋla nɛ ŋyaa-ɩ yaa ŋna-ɩ yɔ. Ye ɛyʋ ɛnʋ ɛfɛyɩ ñɛ-ɛgbɛyɛ kooka taa yɔ, ma Veuillez suivre l’interêt (S-43) takayaɣ yɔɔ tɔm nɛ ŋcɛlɩ-kɛ ɛgbɛyɛ taa takayaɣ taa mayʋ lɛɛ lɛɛ.