Kpɛlɩkʋʋ yɔɔ lɔŋ tasʋʋ
Kpɛlɩkɩ «fezuu taa hendu» nɛ ŋsɩm-tʋ ña-ñʋʋ taa
«Alɩwaatʋ ndʋ mɛwɛɣ laŋwɛɛkɩyɛ taa siŋŋ yɔ, Yehowa tɩŋɩɣnɩ JW Tɔm Ðɩyɔɔdɩyɛ® yɔɔ hendu yɔɔ nɛ ɛkpazɩɣ-m ɖoŋ.»—Lorraine, ɛwɛ Etaazuunii.
«Fezuu taa hendu» kɛnɩ Krɩstʋ ñɩma Ɛsɔ sɛtʋ hɔɔlʋʋ nakʋyʋ. (Kol. 3:16) Ye ŋkpɛlɩkɩ hendu ndʋ nɛ ŋsɩm-tʋ ña-ñʋʋ taa yɔ, pɩpɩzɩɣ nɛ pɩsɩnɩ-ŋ halɩ pɩkpɛndɩnɩ alɩwaatʋ ndʋ hendu takayaɣ yaa elɛkɩtroniiki wonuu nakʋyʋ fɛyɩ ñɔ-cɔlɔ yɔ. Ðɔ lɔŋ tasʋʋ mbʋ pɩkɔŋ yɔ pɩ-yɔɔ nɛ ŋkpɛlɩkɩ hendu natʋyʋ nɛ ŋsɩm-tʋ ña-ñʋʋ taa.
Kalɩ hendu ndʋ tɩ-tɔm pee nɛ ŋnɩɩ tɩ-taa. Ye ŋnɩ tɔm natʋyʋ taa yɔ, ŋpɩzɩɣ nɛ ŋtɔzɩ tɩ-yɔɔ kɛlɛʋ. Ðe-hendu tɩŋa tɔm pee, pɩkpɛndɩnɩ hendu kɩfatʋ nɛ piya hendu tɔm pee wɛ jw.org yɔɔ. Ŋwoki hɔɔlʋʋ Tɔm susuu wondu taa lɛ, ŋsʋʋ Minziiki taa.
Ma hendu tɔm pee takayaɣ nakɛyɛ yɔɔ. Pɩkaɣ-ŋ sɩnʋʋ nɛ ŋtɔzʋʋ tɔm pee ana a-yɔɔ.—Wp. 17:18.
Tee-tʋ nɛ nɔɔ kɩkʋyaɣ. Kalɩɣ hendu ndʋ ɖoŋ ɖoŋ yaa teɣ-tʋ ɖoŋ ɖoŋ.
Tee nɛ ŋna se ŋtɔzʋʋ tɩ-yɔɔ. Ñaɣ pana nɛ ŋtee-tʋ nɛ taacɔnɩ tɔm pee; pʋwayɩ lɛ, ŋcɔna nɛ ŋna se ŋte tɩ-tɩŋa camɩyɛ na.