Hendu ndʋ tiyeki se ɖɩñɔtɩnɩ Ɛsɔ nɛ pɩkpaɖɩ yɔ

Minziiki kɛ kʋjɔʋ kɩbaŋʋ ŋgʋ kɩlɩnɩ Yehowa cɔlɔ yɔ. Kɩpɩzɩɣ nɛ kɩwɛɛnɩ ɖoŋ ɖa-maɣzɩm yɔɔ, kɩlɛɣzɩ ɖɛ-wɛtʋ nɛ kiseɣti-ɖʋ. Ðɛ-ɛgbɛyɛ hendu kɩfatʋ wɩlɩɣ se tɔm ndʋ, tɩkɛ toovenim. Toovenim taa lɛ, hendu ndʋ tɩpɩzɩɣ nɛ tɩwazɩ-ɖʋ nɛ pɩkɩlɩ mbʋ; tɩpɩzɩɣ tiyele nɛ ɖɩñɔtɩnɩ Yehowa nɛ pɩkpaɖɩ.

Kpaɣnɩ pɩnaɣ 2014, hendu kɩfatʋ ndʋ palɩzaa yɔ tɩcɛzɩ 70 yɔɔ, nɛ lɛɛlɛɛyɔ lɛ, paa pɩtɩɖɔɔ yɔ tɩ-taa kʋɖʋmtʋ wɛ kʋnʋmɩŋ weyi ɩ-taa yɔ ɩcɛzɩ 500 yɔɔ! Ɛlɛ pɩtɩla, ŋpɔzʋʋ ña-tɩ se: ‘Mba lakɩ tʋmɩyɛ hendu ndʋ tɩ-yɔɔ? Nɛ ɛzɩma pɩɖɔŋ pʋcɔ nɛ palɩzɩɣ-tʋ?’

Na ɛzɩma koobiya lakɩ hendu ndʋ yɔ

Audio-video tʋmlaɖaa mba palakɩ tʋmɩyɛ minziiki yɔɔ yɔ, pa-taa koobiya nabɛyɛ lɩzɩɣnɩ hendu kɩfatʋ. Nɔɔɖɛyaa ɛgbɛyɛ tɛ Tɔm wɩlʋʋ kɔɔmiite cɔŋnɩnɩ tʋmɩyɛ nɖɩ ɖɩ-yɔɔ. Minziiki laɖaa mba, pɛkpɛndɩ koobiya halaa nɛ abalaa 13 nɛ pasɩɣna se palɩzɩ hendu takayɩsɩ, pamakɩ cɩmɩŋ, palakɩ ɖʋtʋ nɛ tʋma lɛɛna wena a-tɔm cɛyaa ɖɔɖɔ yɔ. Pɩtasɩ lɛ, Tɔm wɩlʋʋ kɔɔmiite ha waɖɛ nɛ ɛjaɖɛ kpeekpe yɔɔ koobiya nabɛyɛ wɛɛ pa-ɖɩsɩ nɛ paɖʋʋ nesi tʋmɩyɛ nɖɩ. Pa-taa nabɛyɛ kɛ hendu takayɩsɩ lɩzɩyaa, cɩmɩŋ maɖaa nɛ hendu teyaa. Koobiya mba poluzuu pa-tɩ nɛ palakɩnɩ tʋmɩyɛ hɔɔlɩŋ weyi ɩ-taa pɛwɛ niye yɔ, ɛlɛ paañɩnɩɣ se pa-hɩla ɩsɛɛ.

Ɛzɩma pɩɖɔŋ pʋcɔ nɛ palɩzɩɣ hendu kɩfatʋ? Kajalaɣ lɛ, Tɔm wɩlʋʋ kɔɔmiite lɩzɩɣnɩ masɩ nzɩ sɩ-yɔɔ pɩwɛɛ se patɩŋna nɛ palɩzɩ hendu natʋyʋ yɔ, nɛ ɖoŋ weyi pɔsɔɔlaa se tɩwɛɛnɩ welisiyaa yɔɔ yɔ. Pʋwayɩ lɛ, minziiki laɖaa ɖʋ koobiya tʋma nɛ palɩzɩ hendu takayɩsɩ nɛ pama hendu taa tɔm. Pʋwayɩ ɖɔɖɔ lɛ, pakpaɣ mbʋ pɔñɔɔzaa yɔ tataɣ yɔɔ kajalaɣ ɖeɖe. Tɔm wɩlʋʋ Kɔɔmiite welisiɣ hendu ndʋ pacalɩ kpaɣʋ tataɣ yɔɔ lɛ, kɩtasɩ-wɛ lɔŋ weyi pɩpɔzʋʋ yɔ. Pʋwayɩ minziiki laɖaa ñɔɔzʋʋ hendu ndʋ nɛ pakpaɣ-tʋ tataɣ yɔɔ kɛdɛzaɣ ɖeɖe. Lona ndɩ ndɩ taa pakpakɩɣ hendu ndʋ tatasɩ yɔɔ. A-taa naayɛ lɛ ɛgbɛyɛ pilinzi nɛ ɖɩsɩ nzɩ sɩ-taa menziiniwaa mba pakpakɩɣnɩ ɛyaa nɔsɩ yɔ, pɛwɛɛ yɔ.

Pɩsa nɛ pɔñɔɔzɩ hendu kɩfatʋ nɛ pakpaɣ-tʋ tataɣ yɔɔ lɛ, palakɩnɩ tʋmɩyɛ ordinatɛɛrɩwaa yɔɔ ɖʋtʋ ndɩ ndɩ. Palakɩnɩ tʋmɩyɛ ɖɔɖɔ nɛ wondu ɛzɩ tʋnɛ yɔ: Minziiki wondu, menziini ŋgʋ pɛkpɛndɩɣnɩ ɛyaa nɔsɩ yɔ, hauts-parleur waa nɛ miikroowaa. Miikroo kʋɖʋmʋʋ liidiye pɩzɩɣ nɛ pɩkɛ kpaɣnɩ ɛzɩ dɔlaarɩwaa 100 (yaa 58 125 FCFA mbʋ yɔ) nɛ piwolo dɔlaarɩwaa 1 000 (yaa 581 250 FCFA mbʋ yɔ) yaa pɩcɛzɩ mbʋ. Pɩnaɣ 2020 taa, ɖɩkpaɣ liidiye dɔlaarɩwaa 116 000 (yaa 67 425 000 FCFA mbʋ yɔ) nɛ ɖɩyabɩnɩ wondu ndʋ pakpakɩɣnɩ hendu tatasɩ yɔɔ yɔ.

Ɛzɩma palakɩ nɛ pɔtɔsʋʋ liidiye nɖɩ koobiya haɣ yɔ? Mbʋ ɛzɩ minziiki laɖaa sakɩyɛ kaawɛ Betɛɛlɩ taa lɛ, palakɩnɩ tʋmɩyɛ koobiya mba pahaɣ pa-tɩ faaa se pala tʋmɩyɛ ɖooo pa-ɖɩsɩ taa yɔ. Pɩtasɩ lɛ, mbʋ ɛzɩ minziiki laɖaa sakɩyɛ kaakpeɣlaa se pala minziiki lɛ, ɖoŋ ɖoŋ lɛ, ɖo-koobiya tɩŋɩɣnɩ ordinatɛɛrɩ ɖʋtʋ natʋyʋ yɔɔ nɛ poluki minziikiwaa nɛ pɩwɛɣ ɛzɩ palabɩnɩ tʋmɩyɛ minziiki wondu sakɩyɛ yɔ.

“Hendu ndʋ tiyeba nɛ men-tisuu wɛɛ ɖoŋ”

Koobiya sɔɔlɩ welisuu hendu kɩfatʋ. Tara wɛ Caama ɛjaɖɛ taa nɛ ɛyɔɔdaa se: “Hendu sɩɣnɩ-m nɛ mehikiɣ taa leleŋ alɩwaatʋ ndʋ mɛwɛɣ nɩɣzɛ taa yɔ. Alɩwaatʋ ndʋ mewelisiɣ hendu ndʋ ma-maɣmaɣ man-kʋnʋŋ taa yɔ, pɩlakɩ-m ɛzɩ Yehowa kpaɣ-m ɛ-nɔkɔyʋʋ taa yɔ.” Payaɣ Kazakhstan ɛjaɖɛ taa koobu abalɩñɩnʋ nɔɔyʋ se Dmitry nɛ ɛyɔɔdaa se: “Mɔnsɔɔlɩ welisuu hendu kɩfatʋ nɛ maanɩɣzɩɣ, mbʋ pʋyɔɔ yɔ, manawa se tɩ-taa tɔm ɛɛkaɣ-m seɣtuu se mala mbʋ pɩtɩtʋʋzɩ yɔ ɛzɩ ɛjaɖɛ yɔɔ hendu lakʋʋ yɔ. Kɔzɩ kɔzɩ lɛ, hendu ndʋ tɩsɩɣnɩ-m se manka ma-lɩmaɣza ma nɛ Yehowa ɖa-taabalɩyɛ yɔɔ.”

Delia wɛ Afrika Hadɛ Kiŋ ɛjaɖɛ taa, nɛ ɛyɔɔdɩ lɩmaɣza wena ɛwɛnɩ hendu kɩfatʋ yɔɔ yɔ a-tɔm se: “Tɩkpazɩɣ men-tisuu ɖoŋ. Alɩwaatʋ ndʋ pitiki mon-toma taa yaa malʋkɩnɩ kaɖɛ naɖɩyɛ yɔ, paa ɛzɩmtaa lɛ, hendu natʋyʋ wɛɛ nɛ tɩsɩɣnɩ-m wɛtʋ ndʋ tɩ-taa ɖeyi ɖeyi mɛwɛɛ yɔ. Ðoŋ ɖoŋ lɛ, ɛzɩma pete hendu ndʋ yɔ, pi-ɖeke piyeki nɛ ma-lɩmaɣza lɛɣzɩɣ!”

Koobiya nabɛyɛ sɔɔlɩ hendu kɩfatʋ natʋyʋ nɛ pɩkɩlɩ lɛɛtʋ. Lerato wɛ Afrika Hadɛ Kiŋ ɛjaɖɛ taa ɖɔɖɔ nɛ ɛyɔɔdaa se: “Hendu ndʋ tɩ-ñʋʋ tɔŋ se ‘Pɩñɔtɩ kpam’ nɛ ‘Ɛjaɖɛ kɩfaɖɛ nɖɩ ɖɩkaɣ kɔm yɔ,’ tɩsɩnɩ-m nɛ mamaɣzɩ alɩwaatʋ ndʋ mankaɣ ɖaɣnʋʋ kpibu mon-ɖoo kʋsɔɔlʋ yɔ tɩ-yɔɔ. Alɩwaatʋ ndʋ payɩ mewelisiɣ hendu ndʋ yɔ, manaɣ-ɩ ma-lɩmaɣza taa, eposi e-nesi nɛ eseɣ nɛ ɛkatɩɣ-m se ekpibi-m.”

Hendu kɩfatʋ natʋyʋ kaasɩnɩ pɩɣa peleɣa nakɛyɛ Sri Lanka ɛjaɖɛ taa. Kɔtɔm se: “Mon-sukuli taa wɩlɩyʋ nɔɔyʋ kaakalɩ-m sukulibiya lɛɛsɩ ɛsɩndaa mbʋ pʋyɔɔ yɔ mɛnkɛ Yehowa Aseɣɖe Tʋ. Sɔɔndʋ kaakpa-m nɛ mantaatɩlɩ tɔm ndʋ moncosi yɔ. Menkpem ɖɩɣa lɛ, mon-ɖoo seɣti-m se mewelisi hendu kɩfatʋ ndʋ tɩtɔŋ se ‘Étudier rend fort’ yɔ. Hendu ndʋ tɩsɩnɩ-m nɛ mana se pɩwɛɛ se mañɩnɩ ɛgbɛyɛ takayɩsɩ taa nɛ mɔñɔɔzɩ tɔm cosuu. Teu fema lɛ, ma nɛ wɩlɩyʋ ɛnʋ ɖɩla kɛdaɣ. Ewelisini-m camɩyɛ nɛ eheyi-m se lɛɛlɛɛyɔ lɛ, ɛnʋ nɩ mbʋ pɩ-yɔɔ Yehowa Aseɣɖe Tɩnaa tisiɣ yɔ pɩ-taa camɩyɛ nɛ pɩkpaɖɩ. Mɛnsɛɣ Yehowa ɛgbɛyɛ mbʋ pʋyɔɔ yɔ, ɖɩlɩzɩ hendu ndʋ tɩpɩzɩɣ nɛ tɩkpazɩ ɖe-tisuu ɖoŋ yɔ.”

Le pakpakɩɣ liidiye nɖɩ ɖɩsɩɣnɩ-wɛ nɛ palɩzɩɣ hendu ndʋ yɔ? Haɖɛ nɖɩ ɩtɩŋɩɣna sakɩyɛ taa donate.jw.org yɔɔ nɛ ɩlakɩ nɛ ɩɖʋʋnɩ nesi ɛjaɖɛ kpeekpe yɔɔ tɔm susuu tʋmɩyɛ yɔ, ɖɩ-yɔɔ ɖɩtɩŋɩɣna nɛ ɖɩlakɩ pɩtɩŋa payɩ mbʋ yɔ. Ðɩsɛɣ-mɩ pɩdɩɩfɛyɩ haɖɛ nɖɩ ɩlakɩ yɔ ɖɩ-yɔɔ.