Ña-taa pɩzɩɣ nɛ pɩtɛ se Yehowa sɔɔlɩ-ŋ

1. Ɛbɛ yɔɔ ŋkpaɣ ña-tɩ nɛ ŋha Yehowa? (Cɔnɩ ɖɔɖɔ kɩlɛmɩŋ.)

ŊTƆZƲƲ alɩwaatʋ ndʋ ŋkpaɣ ña-tɩ nɛ ŋcɛlɩ Yehowa yɔ tɩ-yɔɔ? Ŋkpaɣ lɩmaɣzɩyɛ nɖɩ, mbʋ pʋyɔɔ yɔ ŋkpɛlɩkaa nɛ ŋtɩlɩ-ɩ nɛ ŋsɔɔlɩ-ɩ. Ŋɖuwaa se ŋkaɣ sɩʋ ɛ-sɔɔlɩm labʋ kajalaɣ ɖeɖe ñe-wezuu caɣʋ taa, nɛ ŋkaɣ wobu pɩ-yɔɔ nɛ ŋsɔɔlʋʋ-ɩ nɛ ña-laŋɩyɛ pilim, ña-kalɩzaɣ pilim, ña-maɣzɩm pilim nɛ ño-ɖoŋ pilim. (Mark. 12:30) Kpaɣnɩ alɩwaatʋ ndʋ lɛ, sɔɔlɩm mbʋ ŋwɛnɩ ɛ-yɔɔ yɔ pɩwɛɛ nɛ pɩpaɣlɩɣ. Ye mbʋ, suwe ŋkaɣ cosuu ye nɔɔyʋ ɛpɔzɩ-ŋ se: «Toovenim taa lɛ ŋsɔɔlɩ Yehowa?» Pɩtʋʋ fɛyɩ se ŋkaɣ cosuu se: «Mɔnsɔɔlɩ-ɩ nɛ pɩkpaɖɩ pɩtɩŋa yaa pɩkpaɖɩ paa anɩ!»

2-3. (a) Tɔm ndʋ Yehowa sɔɔlaa se ɖa-taa ɛtɛmna? (Yereemii 31:3) (b) Nɛ ɛbɛ ɖɩkaɣ naʋ tɔm ñʋʋ kʋnɛ kɩ-taa?

² Ɛlɛ, suwe ŋkaɣ cosuu ye nɔɔyʋ ɛpɔzɩ-ŋ se: «Ña-taa tɛma se Yehowa sɔɔlɩ-ŋ?» Ɛzɩ ŋkaɣ pɩtʋʋ nɛ pɩtɩla ŋmaɣzɩɣ se ŋtɩmʋna se Yehowa ɛsɔɔlɩ-ŋ? Koobu halɩñɩnʋ nɔɔyʋ kaakatɩ kala ɛ-pɩjatʋ taa; ɛyɔɔdaa se: «Manawa se mɔnsɔɔlɩ Yehowa. Maapɩtɩɣ tɔm ndʋ tɩ-yɔɔ. Ɛlɛ ɖoŋ ɖoŋ lɛ, pɩlakɩ-m ɛzɩ Yehowa tɩsɔɔlɩ-m yɔ.» Ɛlɛ lɩmaɣza wena ɖeyi ɖeyi Yehowa wɛnɩ ñɔ-yɔɔ?

³ Yehowa sɔɔlaa se ña-taa ɛtɛ se ɛsɔɔlɩ-ŋ. (Kalɩ Yereemii 31:3.) Toovenim taa lɛ, Yehowa hɔmɩ-ŋ nɛ ɛkɔnɩ ɛ-cɔlɔ. Nɛ alɩwaatʋ ndʋ ŋha ña-tɩ nɛ pamɩyɩsɩ-ŋ lɩm yɔ, ɛlabɩ-ŋ kʋjɔʋ kɩbaŋʋ nakʋyʋ, ŋgʋ lɛ se ɛsɔɔlɩ-ŋ nɛ sɔɔlɩm siɣsiɣ ñɩmbʋ. Pʋ-tɔbʋʋ lɛ se ɛsɔɔlɩ-ŋ siŋŋ nɛ ɛɛkaɣ-ŋ lɔʋ kaaʋ. Sɔɔlɩm mbʋ, piseɣtiɣ-i se ɛkpaɣ ɛ-sɛyaa siɣsiɣ tɩnaa tɩŋa se pɛkɛ ‘ɛ-pʋyʋ weyi ɛwɛ ñɩm ɛ-ɛsɩndaa yɔ,’ pʋyɔɔ lɛ ña ɖɔɖɔ, ŋmʋ ñɩm siŋŋ ɛ-ɛsɩndaa. (Mal. 3:​17, pɩtɛɛ tɔm) Yehowa sɔɔlaa se ña-taa ɛtɛ se ɛsɔɔlɩ-ŋ ɛzɩ apostoloo Pɔɔlɩ taa kaatɛm se ɛsɔɔlɩ-ɩ yɔ. Pʋyɔɔ Pɔɔlɩ mawa se: «Man-taa tɛma se paa pɩtɩɩkɛ sɩm, yaa wezuu, yaa Ɛsɔ tiyiyaa, yaa kominawaa, yaa wondu ndʋ tɩwɛ lɛɛlɛɛyɔ yɔ, yaa wondu ndʋ tɩkaɣ kɔm yɔ, yaa ɖoŋ, yaa kʋkʋyɩŋ, yaa cukaŋ, yaa wonuu kɩlɩzʋʋ lɛɛkʋ nakʋyʋ yɔ, pɩɩkaɣ pɩzʋʋ nɛ pɩyasɩ-ɖʋ nɛ Ɛsɔ sɔɔlɩm.» (Roma 8:​38, 39) Tɔm ñʋʋ kʋnɛ kɩ-taa, ɖɩkaɣ naʋ mbʋ pʋyɔɔ pɩcɛyaa se ɖa-taa ɛtɛ se Yehowa sɔɔlɩ-ɖʋ yɔ nɛ mbʋ pɩpɩzɩɣ pɩsɩnɩ-ɖʋ nɛ ɖa-taa tɛmnɩ tɔm ndʋ yɔ.

ƐBƐ YƆƆ PƖCƐYAA SE ÐA-TAA ƐTƐ SE YEHOWA SƆƆLƖ-ÐƲ?

4. Ɛzɩma ɖɩpɩzɩɣ nɛ ɖɩlʋbɩnɩ Sataŋ «ajitu lakasɩ»?

⁴ Ye ɖa-taa ɛtɛma se Yehowa sɔɔlɩ-ɖʋ yɔ, ɖɩpɩzɩɣ nɛ ɖɩlʋbɩnɩ Sataŋ «ajitu lakasɩ.» (Efɛz. 6:11) Sataŋ sɔɔlaa se ɖiyele Yehowa sɛʋ. Nɛ ɛkaɣ labʋ mbʋ payɩ ɛpɩzɩɣ yɔ se ɛtalɩ kaɖʋwa ŋga. Ɛ-ajitu lakasɩ nasɩyɩ lɛ se eyele nɛ ɖɩmaɣzɩ se Yehowa tɩsɔɔlɩ-ɖʋ; ɛlɛ tɔm ndʋ, tɩtɩkɛ toovenim. Bibl kpaɣ Sataŋ nɛ kɩmaɣzɩnɩ mʋʋzʋʋ. (1 Pɩy. 5:​8, 9) Kpɩna wena afɛyɩ ɖoŋ nɛ aapɩzɩɣ se alʋ a-tɩ yɔɔ yɔ, ana mʋʋzʋʋ sɔɔlɩ kpaʋ. Mbʋ ɖɔɖɔ ɖoŋ ɖoŋ lɛ, alɩwaatʋ ndʋ pitiki-ɖʋ yɔɔɔ yaa pɩnɩɣ-ɖʋ yaa alɩwaatʋ ndʋ mbʋ pɩlaba nɛ pɩɖɛɛ yɔ piyeki nɛ ɖɩwɛɛ laŋwɛɛkɩyɛ taa yɔ, yaa alɩwaatʋ ndʋ ɖɩkatɩɣ kala yɔ yaa alɩwaatʋ ndʋ sɔɔndʋ kpaɣ-ɖʋ nɛ cee wayɩ yɔ, tɩ-taa Sataŋ takɩɣ-ɖʋ. (Adu. 24:10) Sataŋ kaɖʋwa lɛ se ɛla nɛ pitibi-ɖʋ yɔɔɔ nɛ ɖiyele Yehowa sɛʋ. Ɛlɛ ye ɖɩlakɩ mbʋ payɩ ɖɩpɩzɩɣ yɔ se ɖa-taa ɛtɛ se Yehowa sɔɔlɩ-ɖʋ yɔ, pɩsɩɣnɩ-ɖʋ nɛ ‘ɖɩkaɖɩnɩ Eleeu’ nɛ ɖɩfɛɛ ɛ-kpacanaa.—Yak. 4:7.

5. Ɛbɛ yɔɔ pɩcɛyaa se ɖɩtɩlɩ se Yehowa sɔɔlɩ-ɖʋ siŋŋ nɛ ɛhɛndɩɣnɩ-ɖʋ?

⁵ Ye ɖa-taa ɛtɛma se Yehowa sɔɔlɩ-ɖʋ yɔ, ɖɩkaɣ-ɩ ñɔtɩnʋʋ. Iyele nɛ ɖɩna mbʋ pʋyɔɔ ɖɩyɔɔdʋʋ mbʋ yɔ. Yehowa lɩzɩ-ɖʋ lɛ, ɛɖʋ ɖa-taa se ɖɩsɔɔlɩ lalaa nɛ lalaa sɔɔlɩ-ɖʋ ɖɔɖɔ. Pʋyɔɔ lɛ, alɩwaatʋ ndʋ lalaa wɩlɩɣ-ɖʋ sɔɔlɩm yɔ, piseɣtiɣ-ɖʋ se ɖa ɖɔɖɔ ɖɩsɔɔlɩ-wɛ. Mbʋ ɖɔɖɔ alɩwaatʋ ndʋ ɖɩnaɣ se Yehowa sɔɔlɩ-ɖʋ siŋŋ nɛ ɛhɛndɩɣnɩ-ɖʋ yɔ, ɖa ɖɔɖɔ piseɣtiɣ-ɖʋ se ɖɩsɔɔlɩ-ɩ nɛ pɩkɩlɩ. (1 Yoh. 4:19) Nɛ ɖɩwɛɣ nɛ ɖɩsɔɔlʋʋ-ɩ nɛ pɩkɩlɩɣ lɛ, ɛnʋ ɖɔɖɔ ɛsɔɔlʋʋ-ɖʋ nɛ pɩkɩlɩ. Bibl heyiɣ-ɖʋ se: «Ɩñɔtɩ mɩ-tɩ nɛ Ɛsɔ, nɛ ɛkaɣ-mɩ ñɔtɩnʋʋ.» (Yak. 4:8) Ɛlɛ ɛbɛ pɩzɩɣ pɩsɩnɩ-ɖʋ nɛ ɖa-taa tɛ se Yehowa sɔɔlɩ-ɖʋ?

ƐBƐ PƖZƖƔ PƖSƖNƖ-ÐƲ NƐ ÐA-TAA TƐ SE YEHOWA SƆƆLƖ-ÐƲ?

6. Pɩsa nɛ ña-taa tɛ se Yehowa sɔɔlɩ-ŋ lɛ, ɛbɛ ŋpɩzɩɣ nɛ ŋpɔzɩ ña-adɩma taa?

⁶ Wolo pɩ-yɔɔ nɛ ŋtɩmɩɣnɩ Yehowa se ɛsɩnɩ-ŋ nɛ ŋtɩlɩ mbʋ pʋyɔɔ ɛsɔɔlɩ-ŋ yɔ. (Luka 18:1; Roma 12:12) Ye pɩsaŋ yɔ paa evemiye nɖɩ, pɔzʋʋ Yehowa tam sakɩyɛ se ɛsɩnɩ-ŋ nɛ ŋnaɣ ña-tɩ ɛzɩ ɛnaɣʋ-ŋ yɔ. Nabʋyʋ taa, ña-laŋɩyɛ pɩzɩɣ nɛ ɖɩkʋʋ ñɔ-tɔm nɛ pɩlakɩ-ŋ kaɖɛ se ŋtisi se Yehowa sɔɔlɩ-ŋ. Ɛlɛ tɔzɩ se Yehowa kɩlɩ ña-laŋɩyɛ. (1 Yoh. 3:​19, 20) Ɛsɩmɩ-ŋ camɩyɛ nɛ pɩkɩlɩ ɛzɩma ŋsɩm ña-tɩ yɔ; nɛ ɛnaɣ ñɔ-yɔɔ mbʋ ña-maɣmaɣ ŋŋnaɣ yɔ. (1 Sam. 16:7; 2 Kro. 6:30) Ye mbʋ, «kuli ña-laŋɩyɛ» nɛ ŋheyi-i ɛzɩma ɖeyi ɖeyi pɩlakɩ-ŋ yɔ nɛ ŋpɔzɩ-ɩ se ɛsɩnɩ-ŋ nɛ ña-taa tɛ se ɛsɔɔlɩ-ŋ. (Keɣ. 62:8) Ŋtɩmɩɣnɩ-ɩ nɛ pɩtɛ lɛ, pɩcɛyaa se ŋkpɛzɩ nɩŋgbanzɩ nzɩ sɩkɔŋ yɔ.

7-8. Ɛzɩma keɣa maɖʋ Daviid sɩnɩ-ɖʋ se ɖa-taa ɛtɛ se Yehowa sɔɔlɩ-ɖʋ?

⁷ Taa Yehowa tɔm liu. Ɛha ɛyaa e-fezuu kiɖeɖeu nɛ pama Bibl. Pʋyɔɔ lɛ, ɖɩpɩzɩɣ nɛ ɖɩtaa tɔm ndʋ pama ɛ-yɔɔ yɔ liu. Iyele nɛ ɖɩna tɔm kɩbandʋ ndʋ keɣa maɖʋ Daviid yɔɔdɩ Yehowa yɔɔ yɔ. Ɛyɔɔdaa se: «Yehowa ñɔtɩnɩ mba pa-laŋa pʋʋtaa yɔ; ɛyakɩ mba pitibi-wɛ yɔɔɔ yɔ pa-ñʋʋ.» (Keɣ. 34:​18, pɩ-tɛɛ tɔm) Alɩwaatʋ ndʋ pitiki-ŋ yɔɔɔ yɔ, pɩpɩzɩɣ nɛ pɩlabɩ-ŋ ɛzɩ ŋwɛ ñe-ɖeke yɔ. Ɛlɛ Yehowa labɩ tamaɣ se alɩwaatʋ ndʋ tɩ-taa, ɛñɔtʋʋnɩ-ŋ mbʋ pʋyɔɔ yɔ ɛnawa se pɩpɔzʋʋ se ɛsɩnɩ-ŋ alɩwaatʋ ndʋ nɛ pɩkɩlɩ. Keɣa lɛɛka taa, Daviid mawa se: «Teɣzi mɛ-ɛsɩtɛɣlɩm ñɔ-tɔnɛ kokoɖe taa.» (Keɣ. 56:8) Alɩwaatʋ ndʋ ŋwɛɣ laŋwɛɛkɩyɛ nɛ wɩzasɩ taa yɔ, Yehowa naɣ. Ɛmaɣzɩɣ ñɔ-yɔɔ siŋŋ nɛ ɛnɩɣ ñe-siziŋ. Ɛzɩ lɩm mbʋ pɩwɛ tɔnɛ kokoɖe naɖɩyɛ taa yɔ pɩmʋʋ ñɩm ɛyʋ weyi ɛwɛɛ nɛ ɛɖɔŋ nʋmɔʋ kañɩmbusuu taa yɔ ɛ-ɛsɩndaa yɔ, mbʋ ɖɔɖɔ ñɛ-ɛsɩtɛɣlɩm mʋ ñɩm Yehowa ɛsɩndaa, nɛ ɛtɔzʋʋ alɩwaatʋ ndʋ payɩ ŋwɛ laŋwɛɛkɩyɛ taa nɛ ŋtisi ɛsɩtɛɣlɩm yɔ tɩ-yɔɔ. Keɣa 139:3 yɔɔdʋʋ Yehowa yɔɔ se: «Ŋsɩm ma-nʋmɔŋ tɩŋa camɩyɛ.» Yehowa naɣ mbʋ payɩ ŋlakɩ yɔ, ɛlɛ ɛkaŋ ɛ-lɩmaɣza kɩbam mbʋ ŋlakɩ yɔ pɩ-yɔɔ na. (Ebr. 6:10) Ɛbɛ yɔɔ? Mbʋ pʋyɔɔ yɔ pana wena payɩ ŋñakɩ se ñɔ-tɔm ɛkɛdɩnɩ-ɩ yɔ amʋ ñɩm siŋŋ ɛ-ɛsɩndaa.a

⁸ Toovenim taa lɛ, Yehowa wɛɛ nɛ ɛtɩŋɩɣnɩ Bibl taa laŋɩyɛ hɛzʋʋ tɔm ndʋ tɩ-yɔɔ nɛ eheyiɣ-ŋ se: «Mɔnsɔɔlaa se ŋtɩlɩ se mɔnsɔɔlɩ-ŋ siŋŋ nɛ mɔncɔŋnɩ ñɔ-yɔɔ camɩyɛ.» Ɛlɛ ɛzɩ ɖɩnaʋ nɛ pɩɖɛɛ yɔ, Sataŋ sɔɔlaa se ŋmaɣzɩ se Yehowa tɩsɔɔlɩ-ŋ. Ye mbʋ, ye nabʋyʋ taa pɩlakɩ-ŋ ɛzɩ Yehowa tɩsɔɔlɩ-ŋ yɔ, sɩŋ nɛ ŋpɔzɩ ña-tɩ se: «A-tɔm yɔɔ pɩwɛɛ se mentisi? “Cɛtɩm caa” tɔm yɔɔ yaa “toovenim tɛ Ɛsɔ” tɔm yɔɔ?»—Yoh. 8:44; Keɣ. 31:5.

9. Tamaɣ ŋga Yehowa labɩ mba pɔsɔɔlɩ-ɩ? (Ejipiti Lɩʋ 20:​5, 6)

⁹ Maɣzɩ nɛ ŋna lɩmaɣza wena Yehowa wɛnɩ mba pɔsɔɔlɩ-ɩ yɔ pɔ-yɔɔ yɔ. Iyele nɛ ɖɩna tɔm ndʋ Yehowa heyi Moyizi nɛ Izrayɛɛlɩ mba yɔ. (Kalɩ Ejipiti Lɩʋ 20:​5, 6.) Yehowa labɩ-ɖʋ tamaɣ se ɛkaɣ wobu pɩ-yɔɔ nɛ ɛwɩlɩɣ sɔɔlɩm siɣsiɣ ñɩmbʋ mba pɔsɔɔlɩ-ɩ yɔ. Tɔm ndʋ, tiyeki se ɖa-taa ɛtɛ se ɖɛ-Ɛsɔ siɣsiɣ tʋ ɛɛkaɣ yebu sɔɔlʋʋ ɛ-sɛyaa mba pɔsɔɔlɩ-ɩ yɔ. (Neh. 1:5) Ye mbʋ, ye nabʋyʋ taa pɩlakɩ-ŋ ɛzɩ Yehowa tɩsɔɔlɩ-ŋ yɔ, sɩŋ nɛ ŋpɔzɩ ña-tɩ se: «Mɔnsɔɔlɩ Yehowa?» Pʋwayɩ lɛ, ŋmaɣzɩ tɔm tʋnɛ tɩ-yɔɔ: Ye ŋsɔɔlɩ-ɩ nɛ ŋñakɩ pana se ŋla mbʋ payɩ ŋpɩzɩɣ yɔ se ñɔ-tɔm ɛkɛdɩnɩ-ɩ yɔ, ɖɩnɛ ɛlɛ ña-taa pɩzɩɣ nɛ pɩtɛ se ɛsɔɔlɩ-ŋ siŋŋ. (Dan. 9:4; 1 Kɔr. 8:3) Pɩwɩlɩɣ se ye ña-taa ɛtɛma se ŋsɔɔlɩ Yehowa yɔ, pɩtɩcɛyɩ se ŋmaɣzɩ se Yehowa tɩsɔɔlɩ-ŋ. Ña-taa pɩzɩɣ nɛ pɩtɛ kiya se ɛkaɣ-ŋ sɔɔlʋʋ paa ɛzɩmtaa nɛ ɛɛkaɣ-ŋ lɔʋ kaaʋ.

10-11. Lɩmaɣzɩyɛ nɖɩ Yehowa sɔɔlaa se ŋwɛɛnɩ kɩhɛyʋʋ pʋ-ñʋʋ taa kɩlaʋ yɔɔ? (Galaatii mba 2:20)

¹⁰ Maɣzɩ kɩhɛyʋʋ pʋ-ñʋʋ taa kɩlaʋ yɔɔ. Kʋjɔʋ sɔsɔʋ ŋgʋ Yehowa labɩ ɛyaa nɛ kɩ-wayɩ fɛyɩ yɔ, ŋgʋ lɛ Yesu Krɩstʋ kɩhɛyʋʋ pʋ-ñʋʋ taa kɩlaʋ. (Yoh. 3:16) Ɛlɛ Yehowa tiyi ɛ-Pɩyalʋ se ɛsɩ ña ɖɔɖɔ ñɔ-yɔɔ? Ɛɛɛ! Iyele nɛ ɖɩna apostoloo Pɔɔlɩ kɩɖaʋ. Tɔzɩ se pʋcɔ nɛ ɛpɩsɩɣ Krɩstʋ tʋ lɛ, ɛɛlabɩ kɩwɛɛkɩm sɔsɔm sakɩyɛ, nɛ pɩɩwɛɛ ɖɔɖɔ se ewolo pɩ-yɔɔ nɛ ɛlʋkɩnɩ ɛ-maɣmaɣ ɛ-ɛjandʋ. (Roma 7:​24, 25; 1 Tim. 1:​12-14) Paa mbʋ yɔ, ɛ-taa kaatɛma se Yehowa cɛlɩ ɛ-Pɩyalʋ se ɛsɩ ɛ-yɔɔ. (Kalɩ Galaatii mba 2:20.) Tɔzɩ se Yehowa hanɩ Pɔɔlɩ e-fezuu kiɖeɖeu nɛ ɛma tɔm ndʋ. Nɛ tɔm ndʋ payɩ tɩwɛ Bibl taa yɔ, pama-tʋ se pawɩlɩnɩ-ɖʋ lɔŋ. (Roma 15:4) Tɔm ndʋ Pɔɔlɩ mawa yɔ tɩwɩlɩɣ se Yehowa sɔɔlaa se ŋkpaɣ kɩhɛyʋʋ pʋ-ñʋʋ taa kɩlaʋ ɛzɩ kʋjɔʋ ŋgʋ ɛlabɩ ña-maɣmaɣ yɔ. Ye ŋkpaɣ kɩhɛyʋʋ ŋgʋ ɛzɩ kʋjɔʋ ŋgʋ Yehowa labɩ ña-maɣmaɣ yɔ, ña-taa kaɣ tɛm se Yehowa sɔɔlɩ-ŋ.

¹¹ Ðɩsɛɣ Yehowa se ɛlabaɣ lɛ mbʋ pʋyɔɔ yɔ etiyi Yesu tɛtʋ yɔɔ se ɛsɩ ɖɔ-yɔɔ. Ɛlɛ lɩmaɣzɩyɛ lɛɛɖɛ nɖɩ ɖɩ-yɔɔ Yesu kɔm tɛtʋ yɔɔ yɔ, nɖɩ lɛ se eheyi ɛyaa Ɛsɔ yɔɔ toovenim tɔm. (Yoh. 18:37) Toovenim tɔm ndʋ tɩ-taa natʋyʋ lɛ se Yehowa sɔɔlɩ e-piya siŋŋ.

ƐZƖMA YESU SƖNƖ-ÐƲ SE ÐA-TAA ƐTƐ SE YEHOWA SƆƆLƖ-ÐƲ?

12. Ɛbɛ yɔɔ ɖɩpɩzɩɣ nɛ ɖɩtaa liu tɔm ndʋ Yesu yɔɔdɩ Yehowa yɔɔ yɔ?

¹² Yesu kaawɛ tɛtʋ yɔɔ lɛ, pɩɩkɛdɩnɩ-ɩ se eyele nɛ ɛyaa tɩlɩ Ɛsɔ weyi Yehowa kɛnɩ ɖeyi ɖeyi yɔ. (Luka 10:22) Ðɩpɩzɩɣ nɛ ɖɩtaa liu tɔm ndʋ Yesu yɔɔdɩ Yehowa yɔɔ yɔ. Ɛbɛ yɔɔ? Mbʋ pʋyɔɔ yɔ Yesu caɣ wezuu ɛ-Caa cɔlɔ ɛsɔdaa pɩnzɩ miiliyaarɩwaa sakɩyɛ pʋcɔ nɛ ɛkɔŋ tɛtʋ yɔɔ. (Kol. 1:15) Yesu nawa se ɛ-Caa sɔɔlɩ-ɩ siŋŋ. Nɛ ɛna ɖɔɖɔ ɛzɩma ɛ-Caa wɩlɩ sɔɔlɩm ɛ-sɛyaa siɣsiɣ tɩnaa yɔ. Ɛzɩma Yesu sɩnɩ ɛyaa lalaa se pa-taa ɛtɛ se Ɛsɔ sɔɔlɩ-wɛ?

13. Ɛzɩma Yesu sɔɔlaa se ɖɩnaɣ Yehowa?

¹³ Yesu sɔɔlaa se ɖɩnaɣ Yehowa ɛzɩ ɛ-maɣmaɣ ɛnaɣʋ-ɩ yɔ. Evaŋgilimwaa taa, Yesu ya Yehowa se «Caa» nɛ pɩcɛzɩ tam 160. Nɛ ɛyɔɔdaɣnɩ ɛ-wayɩ tɩŋɩyaa lɛ, ɛlabɩnɩ tʋmɩyɛ tɔm loyisi «mɩ-Caa» nɛ «mɩ-Caa weyi ɛwɛ ɛsɔdaa yɔ.» (Mat. 5:16; 6:26) Pʋcɔ nɛ Yesu kɔŋ tɛtʋ yɔɔ lɛ, Yehowa sɛyaa siɣsiɣ tɩnaa yaɣaɣ Yehowa se «Ðoŋ Tɩŋa Tʋ,» «Kɩlɩm,» «Lɩzɩyʋ Sɔsɔ,» nɛ hɩla kɩsɛsɛna lɛɛna. Ɛlɛ ɖoŋ ɖoŋ lɛ, Yesu yaɣaɣ Yehowa se ‘ɖa-Caa.’ Tɔm loyaɣ ŋga, kawɩlɩɣ se Yehowa sɔɔlaa se ɛ-sɛyaa ɩñɔtɩnɩ-ɩ ɛzɩ pɩɣa ñɔtʋʋnɩ ka-lʋlɩyaa kʋsɔɔlaa yɔ. Pɩnaɣ kpayɩ kpayɩ se Yesu kaasɔɔlaa se ɖɩnaɣ ɛ-Caa ɛzɩ ɛ-maɣmaɣ ɛnaɣʋ-ɩ yɔ, pʋ-tɔbʋʋ se ɖɩna-ɩ ɛzɩ ɖa-Caa sɔɔlɩm tʋ, weyi e-piya mʋ ñɩm ɛ-ɛsɩndaa yɔ. Iyele nɛ ɖɩna kɩɖaŋ 2 weyi ɩ-taa Yesu labɩnɩ tʋmɩyɛ tɔm loyaɣ «Caa» yɔ.

14. Ɛzɩma Yesu wɩlaa se ɖa-taa paa weyi mʋ ñɩm ɖa-Caa weyi ɛwɛ ɛsɔdaa yɔ ɛ-ɛsɩndaa? (Maatiyee 10:​29-31) (Cɔnɩ ɖɔɖɔ kɩlɛmʋʋ.)

¹⁴ Kajalaɣ lɛ, iyele nɛ ɖɩna tɔm ndʋ Yesu yɔɔdɩ Maatiyee 10:​29-31 taa yɔ. (Kalɩ Maatiyee 10:​29-31.) Cɩʋcɩʋnaa kɛ sumasɩ cikpesi nzɩ sɩɩkaɣ sɔɔlʋʋ Yehowa yaa sɩɩkaɣ-ɩ sɛʋ kpa yɔ. Paa mbʋ yɔ paa cɩʋcɩʋ weyi lɛ, ɛmʋ ñɩm ɖa-Caa Yehowa ɛsɩndaa nɛ halɩ alɩwaatʋ ndʋ ɛtɔlʋʋ tataa yɔ, Yehowa naɣ. Ye sumaɣ cikpelaɣ ŋga, kamʋ ñɩm siŋŋ Yehowa ɛsɩndaa yɔ, ɖa-taa pɩzɩɣ nɛ pɩtɛ se ɖɩmʋ ñɩm ɛ-ɛsɩndaa nɛ pɩkɩlɩ, mbʋ pʋyɔɔ yɔ ɖɩsɔɔlɩ-ɩ nɛ ɖɩsɛɣ-ɩ. Yesu yɔɔdaa ɖɔɖɔ se: «Halɩ pakalɩ mɩ-ñʋʋ taa ñɔsɩ tɩŋa.» Ye Yehowa ɛsɩm ɖɔ-yɔɔ tɔm cikpetu yɔ, ɖa-taa pɩzɩɣ nɛ pɩtɛ kpem se ɛmaɣzɩɣ ɖɔ-yɔɔ siŋŋ. Pɩtʋʋ fɛyɩ se Yesu ñɩnaɣ se ɖɩtɩlɩ se ɖa-taa paa weyi mʋ ñɩm ɖa-Caa weyi ɛwɛ ɛsɔdaa yɔ ɛ-ɛsɩndaa.

15. Tɔm ndʋ Yesu yɔɔdɩ Yohanɛɛsɩ 6:44 taa yɔ, ɛbɛ tɩkpɛlɩkɩɣ-ŋ ña-Caa Yehowa yɔɔ?

¹⁵ Iyele nɛ ɖɩna kɩɖaʋ naalɛ ñɩŋgʋ ŋgʋ kɩ-taa Yesu labɩnɩ tʋmɩyɛ tɔm piye «Caa» yɔ. (Kalɩ Yohanɛɛsɩ 6:44.) Ña-Caa weyi ɛwɛ ɛsɔdaa yɔ ɛhɔmɩ-ŋ nɛ sɔɔlɩm nɛ ɛkɔnɩ toovenim taa. Ɛbɛ yɔɔ ɛhɔmɩ-ŋ? Mbʋ pʋyɔɔ yɔ ɛnawa se ŋwɛnɩ laŋɩyɛ kɩbanɖɛ. (Tʋma 13:48) Alɩwaatʋ ndʋ Yesu yɔɔdɩ tɔm ndʋ tɩwɛ Yohanɛɛsɩ 6:44 taa yɔ, pɩtɩla tɔm ndʋ Yehowa yɔɔdɩ Yereemii 31:3 taa yɔ tɩ-yɔɔ ɛmaɣzaɣ. Yehowa heyi ɛ-samaɣ mayaɣ ŋga ka-taa se: «Mɔhɔmɩ-ŋ nɛ sɔɔlɩm siɣsiɣ ñɩmbʋ nɛ mɔnkɔnɩ mɔn-cɔlɔ.» (Yer. 31:3; kpaɣ-tʋ nɛ ŋmaɣzɩnɩ Ozee 11:4.) Maɣzɩ tɔm ndʋ tɩ-yɔɔ nɛ ŋna. Paa ɛzɩmtaa lɛ, ɖa-Caa sɔɔlɩm tʋ weyi ɛwɛ ɛsɔdaa yɔ ɛnaɣ wɛtʋ kɩbandʋ ndʋ ŋwɛna nɛ pɩtɩla ña-maɣmaɣ ŋŋnaɣ-tʋ yɔ.

16. (a) Toovenim taa lɛ, tɔm ndʋ Yesu caɣ se eheyi-ɖʋ? (b) Nɛ ɛbɛ yɔɔ pɩwɛɛ se ɖitisi tɔm ndʋ tɩ-yɔɔ? (c) Ɛbɛ pɩzɩɣ pɩsɩnɩ-ŋ nɛ ña-taa tɛ se Yehowa kɛnɩ Caja kɩbanʋ weyi pɩpɔzʋʋ-ŋ yɔ? (Kalɩ aɖakaɣ «Caja weyi pɩpɔzʋʋ ɖa-tɩŋa yɔ.»)

¹⁶ Yesu yaʋ Yehowa se ɖa-Caa yɔ, ɛcaɣ se eheyi-ɖʋ tɔm tʋnɛ: «Yehowa tɩkɛ men-ɖeke man-Caa, ɛlɛ ɛkɛ mɩ ɖɔɖɔ mɩ-Caa. Nɛ mañɩnɩɣ se mɩ-taa ɛtɛ se ɛsɔɔlɩ-mɩ nɛ ɛmaɣzɩɣ mɩ-taa paa weyi lɛ ɛ-yɔɔ siŋŋ.» Ye mbʋ, ye nabʋyʋ taa ŋpɔzʋʋ ña-tɩ se ɛzɩ Yehowa sɔɔlɩ-ŋ yɔ, sɩŋ pazɩ nɛ ŋpɔzɩ ña-tɩ se: «Ɛzɩ pɩfɛyɩ se mantaa liu Pɩyalʋ weyi ɛyɔɔdʋʋ toovenim paa ɛzɩmtaa nɛ ɛsɩm ɖa-Caa camɩyɛ yɔ?»—1 Pɩy. 2:22.

PAA ƐZƖMTAA LƐ ÑA-TAA ƐTƐ SE YEHOWA SƆƆLƖ-Ŋ

17. Ɛbɛ yɔɔ pɩwɛɛ se paa ɛzɩmtaa lɛ, ɖa-taa ɛtɛ se Yehowa sɔɔlɩ-ɖʋ?

¹⁷ Paa ɖa-taa ɛtɛma se Yehowa sɔɔlɩ-ɖʋ yɔ, pɩwɛɛ se paa ɛzɩmtaa lɛ ɖa-taa ɛtɛmnɩ tɔm ndʋ. Ɛzɩ ɖɩnaʋ nɛ pɩɖɛɛ yɔ, ɖo-koyindu Sataŋ kaɣ wobu pɩ-yɔɔ nɛ ɛla mbʋ payɩ ɛpɩzɩɣ yɔ se ɖiyele Yehowa sɛʋ. Pɩsa nɛ ɛla mbʋ lɛ, paa ɛzɩmtaa lɛ ɛkaɣ ñaɣʋ pana se eyele nɛ ɖɩmaɣzɩ se Yehowa tɩsɔɔlɩ-ɖʋ. Pɩtɩpɔzɩ se ɖiyele nɛ Sataŋ wa.—Yɔɔb 27:5.

18. Ɛbɛ ŋpɩzɩɣ ŋla nɛ ña-taa tɛ se Yehowa sɔɔlɩ-ŋ?

¹⁸ Pɩsa nɛ ña-taa tɛ se Yehowa sɔɔlɩ-ŋ lɛ, wolo pɩ-yɔɔ nɛ ŋtɩmɩɣnɩ-ɩ se ɛsɩnɩ-ŋ nɛ ŋnaɣ ña-tɩ ɛzɩ ɛnaɣʋ-ŋ yɔ. Maɣzɩɣ tɔm ndʋ Bibl yɔɔdaa nɛ tɩwɩlɩɣ se Yehowa sɔɔlɩ-ŋ siŋŋ yɔ tɩ-yɔɔ. Tɔzɩ se paa ɛzɩmtaa lɛ, Yehowa kaɣ sɔɔlʋʋ ɛyʋ weyi ɛsɔɔlɩ-ɩ yɔ. Taasɔɔ ɖɔɖɔ se Yehowa cɛlɩ ɛ-Pɩyalʋ ña-maɣmaɣ ñɔ-yɔɔ. Pɩtasɩ lɛ, tisi tɔm ndʋ Yesu yɔɔdaa se Yehowa kɛ ña-Caa weyi ɛwɛ ɛsɔdaa yɔ tɩ-yɔɔ. Ðɩnɛ ɛlɛ ye nɔɔyʋ ɛpɔzɩ-ŋ se: «Ña-taa tɛma se Yehowa sɔɔlɩ-ŋ?» yɔ, ŋkaɣ cosuu kpayɩ se: «Ɛɛɛ, man-taa tɛma! Nɛ paa ɖooye lɛ mañakɩ pana se mawɩlɩ-ɩ se mɔnsɔɔlɩ-ɩ.»