Ɛsɔ sɔɔlɩm wɛ tam

1-2. Kala wena Krɩstʋ mba sakɩyɛ katɩɣ?

MAƔZƖ se mɛlɛ nakʋyʋ wɛ teŋgu yɔɔ nɛ helim sɔsɔm nabʋyʋ wɛɛ nɛ pɩmakɩ. Lɩm hola sɔsɔna wɛɛ nɛ pɩcɛŋɛsɩɣ-kʋ. Ye patitisi mɛlɛ kolaɣ lɩm taa yɔ, lɩm hola wokini mɛlɛ hɔɔlɩŋ ndɩ ndɩ taa. Mɛlɛ kolaɣ kaɣ yebu nɛ mɛlɛ sɩŋ ki-ɖeɖe ɖiɣ ɖiɣ, nɛ pɩsɩɣnɩ-kʋ nɛ kɩɩsʋʋ lɩm.

² Alɩwaatʋ ndʋ ŋwɛɣ wɛtʋ kaɖɛ ñɩndʋ natʋyʋ taa yɔ, pɩpɩzɩɣ nɛ pɩlabɩ-ŋ ɛzɩ mɛlɛ ŋgʋ yɔ. Ɛzɩma pɩlakɩ-ŋ yɔ pɩpɩzɩɣ nɛ pɩlɛɣzɩɣ lɛɛ lɛɛ. Evemiye naɖɩyɛ lɛ, ña-taa tɛŋ se Yehowa sɔɔlɩ-ŋ nɛ ɛsɩɣnɩ-ŋ; nɛ evemiye lɛɛɖɛ lɛ, pɩlakɩ-ŋ ɛzɩ Yehowa ɛɛnaɣ wɛtʋ ndʋ tɩ-taa ŋwɛɛ yɔ. (Keɣ. 10:1; 13:1) Pɩtɩla, ña-taabalʋ nɔɔyʋ heyi-ŋ tɔm kɩbandʋ natʋyʋ nɛ pɩkpazɩ-ŋ ɖoŋ alɩwaatʋ pazɩ. (Adu. 17:17; 25:11) Ɛlɛ pʋwayɩ lɛ, ŋɖaɣnɩ paɣzʋʋ maɣzʋʋ se Yehowa ɛɛsɩɣnɩ-ŋ. Halɩ ŋpɩzɩɣ nɛ ŋpɔzɩ ña-tɩ se yaa Yehowa lɔ-ŋ. Ɛbɛ pɩzɩɣ pɩsɩnɩ-ŋ nɛ ŋwɛɛ ñe-ɖeɖe ɖiɣ ɖiɣ ɛzɩ mɛlɛ yɔ alɩwaatʋ ndʋ ŋkatɩɣ kaɖɛ naɖɩyɛ yɔ? Yaa ɛbɛ pɩzɩɣ pɩsɩnɩ-ŋ nɛ paa ɛzɩmtaa lɛ, ña-taa tɛ se Yehowa sɔɔlɩ-ŋ nɛ ɛsɩɣnɩ-ŋ?

3. (a) Ɛzɩ Keɣa 31:7 nɛ 136:1 yɔɔdʋʋ yɔ, tɔm loyaɣ «sɔɔlɩm siɣsiɣ ñɩmbʋ» tɔbʋʋ lɛ suwe? (b) Ɛbɛ yɔɔ ɖɩpɩzɩɣ nɛ ɖɩyɔɔdɩ se Yehowa hanɩ kɩɖaʋ ŋgʋ kɩkpaɖaa yɔ sɔɔlɩm siɣsiɣ ñɩmbʋ wɩlʋʋ nʋmɔʋ taa? (Cɔnɩ ɖɔɖɔ kɩlɛmʋʋ.)

³ Mbʋ pɩpɩzɩɣ pɩsɩnɩ-ŋ nɛ ŋwɛɛ ñe-ɖeɖe ɖiɣ ɖiɣ alɩwaatʋ ndʋ ŋkatɩɣ kaɖɛ naɖɩyɛ yɔ pɩ-taa nabʋyʋ lɛ se ŋtɔzɩ Yehowa sɔɔlɩm siɣsiɣ ñɩmbʋ yɔɔ. (Kalɩ Keɣa 31:7; 136:1.) Tɔm loyaɣ ŋga pɛɖɛzaa se «sɔɔlɩm siɣsiɣ ñɩmbʋ» yɔ, kawɩlɩɣ ɛzɩma nɔɔyʋ sɔɔlɩ lɛlʋ siŋŋ nɛ ɛñɔʋnɩ-ɩ tam yɔ. Yehowa hanɩ kɩɖaʋ ŋgʋ kɩkpaɖaa yɔ sɔɔlɩm siɣsiɣ ñɩmbʋ wɩlʋʋ nʋmɔʋ taa. Halɩ Bibl yɔɔdʋʋ se «ɛ-sɔɔlɩm siɣsiɣ ñɩmbʋ . . . ɖɔ pɩdɩɩfɛyɩ.» (Ejl. 34:​6, 7) Bibl tasɩ yɔɔdʋʋ Yehowa tɔm ɛzʋnɔ: «Mba payɩ payaɣ-ŋ yɔ, ŋwɩlɩɣ-wɛ sɔɔlɩm siɣsiɣ ñɩmbʋ kpem.» (Keɣ. 86:5) Maɣzɩ masɩ nzɩ sɩ-tɔbʋʋ nɩʋ yɔɔ nɛ ŋna: Yehowa ɛɛlɔʋ ɛ-sɛyaa siɣsiɣ tɩnaa kpa! Ye ŋtɔzʋʋ se Yehowa wɛ siɣsiɣ yɔ, pɩpɩzɩɣ nɛ pɩsɩnɩ-ŋ nɛ ŋwɛɛ ñe-ɖeɖe ɖiɣ ɖiɣ alɩwaatʋ ndʋ ŋkatɩɣ kaɖɛ naɖɩyɛ yɔ.—Keɣ. 23:4.

TƆZƖ SE YEHOWA SƆƆLƖM KƐ BIBL TAA KAJALAƔ WƖLƖTƲ NATƲYƲ

4. (a) Yaa Bibl taa kajalaɣ wɩlɩtʋ natʋyʋ. (b) Ɛbɛ yɔɔ ɖɩɩpɩtɩɣ wɩlɩtʋ ndʋ tɩ-yɔɔ?

⁴ Mbʋ ŋpɩzɩɣ ŋla nɛ pɩsɩnɩ-ŋ nɛ ŋcaɣ ɖiɣ ɖiɣ alɩwaatʋ ndʋ ŋkatɩɣ kala yɔ pɩ-taa nabʋyʋ lɛ se ŋtɔzɩ se Yehowa sɔɔlɩm kɛ Bibl taa kajalaɣ wɩlɩtʋ natʋyʋ. Ɛbɛ yɔɔ ŋmaɣzɩɣ alɩwaatʋ ndʋ ŋnɩɣ tɔm loyaɣ «Bibl taa kajalaɣ wɩlɩtʋ» yɔ? Pɩtɩla ŋmaɣzɩɣ Bibl taa toovenim tɔm ndʋ ŋkpɛlɩkaa yɔ tɩ-yɔɔ. Tɩ-taa natʋyʋ yɔ: Payaɣ Ɛsɔ se Yehowa, Yesu kɛnɩ Ɛsɔ Pɩyalʋ ɛgbamɩyɛ, sɩɖaa ɩɩsɩŋ natʋyʋ, tɛtʋ kaɣ pɩsʋʋ paradisuu nɛ ɛyaa caɣ tɩ-yɔɔ tam. (Keɣ. 83:18; Ekl. 9:5; Yoh. 3:16; Natʋ 21:​3, 4) Alɩwaatʋ ndʋ ña-taa tɛma se tɔm ndʋ tɩkɛ toovenim yɔ, pɩwɛ kaɖɛ se nɔɔyʋ eyele nɛ ŋpɩtɩ tɩ-yɔɔ. Ɛbɛ yɔɔ? Mbʋ pʋyɔɔ yɔ ŋɖiɣzinaa se pɩkɛ toovenim tɔm ndʋ pɩtʋʋ fɛyɩ tɩ-yɔɔ yɔ. Ye ɖɩkpakɩɣ Yehowa sɔɔlɩm se pɩkɛ Bibl taa kajalaɣ wɩlɩtʋ natʋyʋ yɔ, pɩpɩzɩɣ pɩsɩnɩ-ɖʋ nɛ ɖiyele maɣzʋʋ se Yehowa ɛɛmaɣzɩɣ ɖɔ-yɔɔ nɛ ɛɛnaɣ wɛtʋ kaɖɛ ñɩndʋ ndʋ tɩ-taa ɖɩwɛɛ yɔ. Ɛzɩma tɩyɛ?

5. Yɔɔdɩ mbʋ ɛyʋ pɩzɩɣ ɛla nɛ ɛlɔ cɛtɩm wɩlɩtʋ yɔ pɩ-tɔm.

⁵ Ŋpaɣzɩ Bibl kpɛlɩkʋʋ lɛ, ɛbɛ sɩnɩ-ŋ nɛ ŋlɔ cɛtɩm wɩlɩtʋ? Pɩtɩla ŋkpaɣ tɔm ndʋ paawɩlɩ-ŋ cooci ŋgʋ ŋwokaɣ yɔ kɩ-taa yɔ nɛ ŋmaɣzɩnɩ ndʋ Bibl wɩlɩɣ yɔ. Kɩɖaʋ nakʋyʋ yɔ: Pɩtɩla ŋtisaɣ se Yesu kɛnɩ Ɛsɔ Ðoŋ Tɩŋa Tʋ. Ɛlɛ ŋwɛɛ nɛ ŋkpɛlɩkɩɣ Bibl lɛ, ŋpɔzɩ ña-tɩ se: «Ɛzɩ tɔm ndʋ tɩkɛ toovenim na?» Ŋkpɛlɩkɩ tɔm ndʋ Bibl wɩlɩɣ Yesu yɔɔ yɔ lɛ, ŋɖiɣzina se Yesu tɩkɛ Ɛsɔ. Peeɖe ŋlɔ cɛtɩm wɩlɩtʋ nɛ ŋlɛɣzɩ ti-lone taa Bibl taa toovenim tɔm tʋnɛ: Yesu kɛnɩ «wondu kɩlɩzɩtʋ tɩŋa taa kajalaɣ pɩɣa,» «Ɛsɔ Pɩyalʋ ɛgbamɩyɛ.» (Kol. 1:15; Yoh. 3:18) Pɩkɛ toovenim se pɩfɛyɩ kɛlɛʋ se ɖɩlɔ cɛtɩm wɩlɩtʋ ndʋ tɩkam lila ɖa-taa yɔ. (2 Kɔr. 10:​4, 5) Ɛlɛ alɩwaatʋ ndʋ ŋpɩzaa nɛ ŋlɔ cɛtɩm wɩlɩtʋ ndʋ yɔ, ŋtɩtasɩ tɩ-wayɩ pɩsʋʋ.—Filp. 3:13.

6. Ɛbɛ yɔɔ ña-taa pɩzɩɣ nɛ pɩtɛ se Yehowa ‘sɔɔlɩm siɣsiɣ ñɩmbʋ wɛ tam’?

⁶ Pɩsa nɛ ña-taa tɛmnɩ tɔm ndʋ Bibl wɩlɩɣ Ɛsɔ sɔɔlɩm yɔɔ yɔ lɛ, ŋpɩzɩɣ nɛ ŋla ɛzɩ ɖɩyɔɔdʋʋ nɛ pɩɖɛɛ yɔ. Ye ŋkatɩɣ kaɖɛ naɖɩyɛ nɛ ŋpaɣzɩ pɩtʋʋ Yehowa sɔɔlɩm yɔɔ yɔ, pɔzɩ ña-tɩ se: «Ma-lɩmaɣza wɛ a-ɖeɖe na?» Kpaɣ abʋta wena ŋwɛnɩ Yehowa sɔɔlɩm yɔɔ yɔ nɛ ŋmaɣzɩnɩ tɔm ndʋ tɩwɛ Keɣa 136:1 taa yɔ; tɔm ndʋ tɩkɛnɩ tɔm ñʋʋ kʋnɛ kɩ-mayaɣ. Ɛbɛ yɔɔ Yehowa yɔɔdʋʋ se ɛ-sɔɔlɩm kɛ «sɔɔlɩm siɣsiɣ ñɩmbʋ»? Ɛbɛ yɔɔ pɔyɔɔdɩ tam 26 Keɣa 136 taa se «ɛ-sɔɔlɩm siɣsiɣ ñɩmbʋ wɛ tam»? Ɛzɩ ɖɩnaʋ nɛ pɩɖɛɛ yɔ, sɔɔlɩm siɣsiɣ ñɩmbʋ mbʋ Yehowa wɛnɩ ɛ-samaɣ yɔɔ yɔ pɩkɛ Bibl taa kajalaɣ wɩlɩtʋ natʋyʋ. Tɩfɛyɩ ndɩ nɛ Bibl taa kajalaɣ wɩlɩtʋ lɛɛtʋ ndʋ tɩ-yɔɔ ŋtisaa yɔ. Lɩmaɣza wena ŋwɛna se ŋfɛyɩ wazaɣ Yehowa ɛsɩndaa yaa ŋtɩmʋna se ɛsɔɔlɩ-ŋ yɔ atɩkɛ toovenim. Pʋyɔɔ lɛ, lɔ lɩmaɣza ana ɛzɩ ŋlɔʋ cɛtɩm wɩlɩtʋ lɛɛtʋ yɔ.

7. Yɔɔdɩ Bibl masɩ nzɩ siyeki se ña-taa ɛtɛ se Yehowa sɔɔlɩ-ŋ yɔ sɩ-taa nasɩyɩ tɔm.

⁷ Bibl taa masɩ sakɩyɛ wɩlɩɣ kpayɩ kpayɩ se Yehowa sɔɔlɩ-ɖʋ. Kɩɖaŋ nɩɩyɩ yɔ: Yesu heyi ɛ-wayɩ tɩŋɩyaa se: «Ɩwɛ wazaɣ nɛ pɩkɩlɩ cɩʋcɩʋnaa sakɩyɛ.» (Mat. 10:31) Yehowa maɣmaɣ heyi ɛ-samaɣ se: «Mankaɣ-ŋ kpazʋʋ ɖoŋ, ɛɛɛ, mankaɣ-ŋ sɩnʋʋ, toovenim taa lɛ, mankaɣ-ŋ ɖɔkʋʋ nɛ men-siɣsiɣ wɛtʋ nɩwaŋ nesi.» (Iza. 41:10) Tɔm ndʋ, tɩ-taa tʋ kpayɩ kpayɩ. Yesu tɩyɔɔdɩ se «pɩtɩla ɩwɛ wazaɣ nɛ pɩkɩlɩ cɩʋcɩʋnaa,» nɛ Yehowa tɩyɔɔdɩ se «pɩtɩla mansɩɣnɩ-ŋ.» Ɛlɛ pɔyɔɔdaa se: «Ɩwɛ wazaɣ nɛ pɩkɩlɩ cɩʋcɩʋnaa» nɛ «mankaɣ-ŋ sɩnʋʋ.» Alɩwaatʋ ndʋ ŋkatɩɣ kaɖɛ naɖɩyɛ yɔ, ye pɩlakɩ-ŋ ɛzɩ Yehowa tɩsɔɔlɩ-ŋ yɔ, masɩ nzɩ siiyeki se pɩlabɩ-ŋ yem se Yehowa sɔɔlɩ-ŋ. Ɛlɛ siyeki ɖɔɖɔ se ña-taa ɛtɛ se ɛsɔɔlɩ-ŋ. Tɔm ndʋ masɩ nzɩ sɩyɔɔdʋʋ yɔ, tɩkɛ toovenim nɛ pɩfɛyɩ se papɩtɩ tɩ-yɔɔ. Ye ŋtɩmɩɣnɩ Yehowa abʋta wena ŋwɛna yɔ a-yɔɔ nɛ ŋmaɣzɩɣ masɩ nzɩ sɩ-yɔɔ camɩyɛ yɔ, ŋkaɣ yɔɔdʋʋ se: «Ðɩkpɛlɩkaa nɛ ɖɩtɩlɩ sɔɔlɩm mbʋ Ɛsɔ wɛnɩ ɖɔ-yɔɔ yɔ nɛ ɖitisi pɩ-yɔɔ.»a—1 Yoh. 4:16.

8. Ye nabʋyʋ taa, pɩlakɩ-ŋ ɛzɩ Yehowa tɩsɔɔlɩ-ŋ yɔ, ɛbɛ ŋpɩzɩɣ nɛ ŋla?

⁸ Ɛlɛ ye nabʋyʋ taa, pɩkpɛndɩ piɖiɣni-ŋ labʋ ɛzɩ Yehowa tɩsɔɔlɩ-ŋ yɔ, ɛbɛ ŋpɩzɩɣ nɛ ŋla? Pɩwɛɣ ɖeu se ŋkpaɣ ɛzɩma pɩlakɩ-ŋ yɔ nɛ ŋmaɣzɩnɩ tɔm ndʋ ŋsɩm Yehowa yɔɔ yɔ. Ɛzɩma pɩlakɩ-ŋ yɔ pɩpɩzɩɣ nɛ pɩlɛɣzɩ, ɛlɛ toovenim tɔm ñaalɛɣzɩɣ; nɛ sɔɔlɩm mbʋ Yehowa wɛnɩ ɖɔ-yɔɔ yɔ, pɩkɛ Bibl taa toovenim tɔm ndʋ tɩɩlɛɣzɩɣ yɔ. Ye ɖiitisiɣ se Yehowa sɔɔlɩ-ɖʋ yɔ, ɖɩnɛ ɛlɛ pɩwɛ ɛzɩ ɖɩsɔwa se sɔɔlɩm kɛnɩ Yehowa wɛtʋ kɩbandʋ ndʋ tɩkpaɖaa yɔ.—1 Yoh. 4:8.

MAƔZƖ SƆƆLƖM MBƲ YEHOWA WƐNƖ ÑƆ-YƆƆ YƆ PƖ-YƆƆ

9-10. Ɛbɛ tɔm Yesu yɔɔdaɣ alɩwaatʋ ndʋ ɛyɔɔdaa se: «Caa maɣmaɣ sɔɔlɩ-mɩ» yɔ? (Yohanɛɛsɩ 16:​26, 27) (Cɔnɩ ɖɔɖɔ kɩlɛmʋʋ.)

⁹ Ye ɖɩtazɩ tɔm ndʋ Yesu heyi ɛ-wayɩ tɩŋɩyaa yɔ tɩ-taa yɔ, ɖɩpɩzɩɣ nɛ ɖɩnɩɩ sɔɔlɩm mbʋ Yehowa wɛnɩ ɖɔ-yɔɔ yɔ pɩ-taa nɛ pɩkɩlɩ. Eheyi-wɛ se: «Caa maɣmaɣ sɔɔlɩ-mɩ.» (Kalɩ Yohanɛɛsɩ 16:​26, 27.) Etiheyi-wɛ tɔm ndʋ se piyele nɛ pa-taa la leleŋ yem na. Ye ɖɩkalɩ masɩ nzɩ sɩkɔma pʋcɔ nɛ Yesu yɔɔdʋʋ tɔm ndʋ yɔ, ɖɩnaɣ se pɩtɩkɛ ɛzɩma pɩlakɩ ɛ-tɔmkpɛlɩkɩyaa yɔ pɩ-tɔm ɛyɔɔdaɣ, ɛlɛ adɩma tɔm ɛyɔɔdaɣ.

¹⁰ Yesu tiheyi ɛ-tɔmkpɛlɩkɩyaa se patɩmnɩ-ɩ ɛlɛ eheyi-wɛ se patɩmɩ ɛ-hɩɖɛ taa. (Yoh. 16:​23, 24) Ɛbɛ yɔɔ pɩɩcɛyaa se patɩlɩ tɔm ndʋ? Mbʋ pʋyɔɔ yɔ Yesu kaakɛ pa-taabalʋ nɛ pʋyɔɔ lɛ, alɩwaatʋ ndʋ pefezi-i yɔ, papɩzaɣ se pamaɣzɩ se ye patɩmnɩ-ɩ yɔ, ɛkaɣ-wɛ welisinuu nɛ ɛpɔzɩ ɛ-Caa se ɛsɩnɩ-wɛ. Lɩmaɣza ana apɩzaɣ se atuyi-wɛ nɛ patɩmnɩ Yesu. Paa mbʋ yɔ Yesu heyi-wɛ se pɩtɩpɔzɩ se pɛwɛɛnɩ lɩmaɣza ana. Ɛbɛ yɔɔ? Mbʋ pʋyɔɔ yɔ, eheyi-wɛ se: «Caa maɣmaɣ sɔɔlɩ-mɩ.» Pɩkɛ toovenim tɔm ndʋ Bibl wɩlɩɣ adɩma yɔɔ yɔ. Ɛzɩma tɔm ndʋ titukuuni-ŋ? Ñe-Bibl kpɛlɩkʋʋ yeba nɛ ŋtɩlɩ Yesu nɛ ŋsɔɔlɩ-ɩ. (Yoh. 14:21) Ɛlɛ ɛzɩ Yesu tɔmkpɛlɩkɩyaa mba yɔ, ŋpɩzɩɣ nɛ ŋtɩmnɩ Yehowa kaalɛyɩtʋ mbʋ pʋyɔɔ yɔ ŋnawa se ‘ɛ-maɣmaɣ ɛsɔɔlɩ-ŋ.’ Alɩwaatʋ ndʋ payɩ ŋtɩmɩɣnɩ Yehowa yɔ, ŋwɩlɩɣ se ŋwɛnɩ tisuu tɔm ndʋ tɩ-yɔɔ.—1 Yoh. 5:14.

ÐƖÑƖNƖ NƐ ÐƖNA MBƲ PIYEBA NƐ ÐƖPƖTƖƔ YƆ

11. Ɛbɛ yɔɔ Sataŋ taa lakɩ leleŋ ye ɖɩpaɣzɩ maɣzʋʋ se Yehowa tɩsɔɔlɩ-ɖʋ yɔ?

¹¹ Ɛbɛ pɩzɩɣ piyele nɛ ɖɩmaɣzɩɣ se Yehowa tɩsɔɔlɩ-ɖʋ? Pɩtɩla ŋcosuu se Sataŋ yekina se ɖɩmaɣzɩ se Yehowa tɩsɔɔlɩ-ɖʋ, nɛ ŋwɛnɩ toovenim. Sataŋ ‘ñɩnɩɣ se ɛtɔɔ-ɖʋ’ nɛ ɛ-taa lakɩ leleŋ ye ɖɩmaɣzɩɣ se Yehowa tɩsɔɔlɩ-ɖʋ yɔ. (1 Pɩy. 5:8) Sɔɔlɩm seɣtini Yehowa nɛ ɛhɛyɩ kɩhɛyʋʋ pʋ-ñʋʋ taa ɖɔ-yɔɔ, ɛlɛ Sataŋ sɔɔlaa se ɖɩmaɣzɩ se ɖa-kɩwɛɛkɩm yɔɔ lɛ ɖɩtɩmʋna se kɩlaʋ ŋgʋ kɩwazɩ-ɖʋ. (Ebr. 2:9) Ye ɖɩmaɣzɩɣ se Yehowa tɩsɔɔlɩ-ɖʋ yɔ, anɩ pɩkɛdɩɣna? Sataŋ pɩkɛdɩɣna. Nɛ ye pitibi-ɖʋ yɔɔɔ nɛ ɖiyele Yehowa sɛʋ yɔ, a-taa lakɩ leleŋ? Sataŋ kʋɖʋm ɛnʋ. Sataŋ sɔɔlaa se ɖɩmaɣzɩ se Yehowa tɩsɔɔlɩ-ɖʋ, ɛlɛ pɩtɩkɛ toovenim. Weyi Yehowa tɩsɔɔlɩ yɔ, ɛnʋ lɛ Sataŋ. Ɛlɛ Sataŋ wɛɛ nɛ ɛñakɩ pana se eyele nɛ ɖɩmaɣzɩ se ɖa Yehowa tɩsɔɔlɩ nɛ ɛlɔ-ɖʋ; pɩkɛnɩ ɛ-ajitu nʋmɔʋ nakʋyʋ. (Efɛz. 6:11) Ye ɖiɖiɣzini mbʋ ɖo-koyindu wɛɛ nɛ ɛñakɩ pana se ɛla yɔ, pɩsɩɣnɩ-ɖʋ nɛ ɖɩtɛ ɖa-taa nɛ ‘ɖɩkaɖɩnɩ-ɩ.’—Yak. 4:7.

12-13. Ɛzɩma kɩwɛɛkɩm mbʋ pɩ-taa palʋlɩ-ɖʋ yɔ pɩpɩzɩɣ piyele nɛ ɖɩmaɣzɩɣ se Yehowa tɩsɔɔlɩ-ɖʋ?

¹² Nabʋyʋ ɖɔɖɔ pɩzɩɣ piyele nɛ ɖɩmaɣzɩɣ se Yehowa tɩsɔɔlɩ-ɖʋ. Mbʋ lɛ kɩwɛɛkɩm mbʋ pɩ-taa palʋlɩ-ɖʋ yɔ. (Keɣ. 51:5; Roma 5:12) Kɩwɛɛkɩm wɛɛkɩ taabalɩyɛ nɖɩ ɖɩɩwɛ ɛyaa nɛ Ɛsɔ pɛ-hɛkʋ taa yɔ. Pɩcamɩ ɖɔɖɔ ɖa-maɣzɩm, ɖa-laŋɩyɛ nɛ ɖo-tomnaɣ.

¹³ Kɩwɛɛkɩm wɛnɩ ɖoŋ kɩdɛkɛdɩŋ ɛzɩma pɩlakɩ-ɖʋ yɔ pɩ-yɔɔ. Alɩwaatʋ ndʋ ɖɩlakɩ kɩwɛɛkɩm yɔ, piyeki nɛ ɖɩkʋʋ ɖa-tɩ tɔm, ɖɩwɛɣ nɩɣzɛ taa, sɔɔndʋ kpaɣ-ɖʋ nɛ fɛyɛ ɖɔɖɔ kpaɣ-ɖʋ. Ɛlɛ pɩpɩzɩɣ ɖɔɖɔ nɛ pɩlabɩ-ɖʋ mbʋ, mbʋ pʋyɔɔ yɔ ɖɩnɩɣzɩɣ paa ɛzɩmtaa ɖɛ-tɛ mantɩtalɩ pilim wɛtʋ yɔɔ. Mantɩtalɩ pilim wɛtʋ ndʋ, tɩwɛ ndɩ kpem nɛ wɛtʋ ndʋ tɩ-taa Yehowa kaalɩzɩ-ɖʋ kiɖe tɛɛ yɔ. (Roma 8:​20, 21) Ðɩwɛ ɛzɩ lɔɔɖɩyɛ pɔbɔɖɛ yɔ. Ye pɔbɔɖɛ ɛtʋlaa yɔ, ɖɩɩpɩzɩɣ nɛ ɖɩla tʋmɩyɛ ɛzɩ pɩpɔzʋʋ yɔ. Ða ɖɔɖɔ, ɖɩɩpɩzɩɣ nɛ ɖɩla tʋmɩyɛ nɛ pɩtalɩ pilim ɛzɩ pɩpɔzʋʋ yɔ mbʋ pʋyɔɔ yɔ ɖɩtɩtalɩ pilim. Ye mbʋ, pɩɩɖɩɣzɩɣ-ɖʋ se nabʋyʋ taa, pɩlakɩ-ɖʋ ɛzɩ Yehowa tɩsɔɔlɩ-ɖʋ yɔ. Ye pɩlakɩ-ɖʋ mbʋ yɔ, pɩwɛɛ se ɖɩtɔzɩ se Yehowa kɛ ‘Ɛsɔ sɔsɔ nɛ ɛcaɣ sɔɔndʋ,’ nɛ ɛkɛ «weyi ɛwɩlɩɣ sɔɔlɩm siɣsiɣ ñɩmbʋ mba pɔsɔɔlɩ-ɩ nɛ pɔɖɔŋ ɛ-paɣtʋ yɔɔ yɔ.»—Neh. 1:5.

14. Ye ɖɩmaɣzɩɣ kɩhɛyʋʋ pʋ-ñʋʋ taa kɩlaʋ yɔɔ yɔ, ɛzɩma pɩpɩzɩɣ pɩsɩnɩ-ɖʋ nɛ ɖa-taa tɛ se Yehowa sɔɔlɩ-ɖʋ? (Roma mba 5:8) (Kalɩ ɖɔɖɔ aɖakaɣ «Kpa ña-tɩ nɛ “ɖoŋ weyi kɩwɛɛkɩm wɛna se pipeɣzi ɛyaa yɔ.”»)

¹⁴ Nabʋyʋ taa, pɩpɩzɩɣ nɛ pɩlabɩ-ɖʋ ɛzɩ ɖɩtɩmʋna se Yehowa ɛsɔɔlɩ-ɖʋ yɔ. Nɛ toovenim taa lɛ ɖɩtɩmʋna se ɛsɔɔlɩ-ɖʋ. Nabʋyʋ fɛyɩ se ɖɩpɩzɩɣ ɖɩla nɛ ɖɩtɔ se pʋyɔɔ lɛ ɖɩmʋnaa se Yehowa ɛsɔɔlɩ-ɖʋ. Paa mbʋ yɔ, Yehowa hɛyɩ kɩhɛyʋʋ pʋ-ñʋʋ taa se pɩsa nɛ ekpeɣ-ɖʋ ɖa-kɩwɛɛkɩm, mbʋ pʋyɔɔ yɔ ɛsɔɔlɩ-ɖʋ. (1 Yoh. 4:10) Pʋyɔɔ lɛ, Yehowa sɔɔlɩm kɛ-ɖʋ kʋjɔʋ ŋgʋ kɩ-wayɩ fɛyɩ yɔ. Tɔzɩ ɖɔɖɔ se kɩwɛɛkɩm laɖaa yɔɔ Yesu kɔma, pɩtɩkɛ ɛyaa mba patalɩ pilim yɔ pɔ-yɔɔ ɛkɔma. (Kalɩ Roma mba 5:8.) Ða-taa nɔɔyʋ ɛɛpɩzɩɣ nɛ ɛla mbʋ pɩtalɩ pilim yɔ, nɛ Yehowa ɛɛpɔzʋʋ-ɖʋ se ɖɩla mbʋ pɩtalɩ pilim yɔ. Ye ɖɩnɩ pɩ-taa se ɖɛ-tɛ mantɩtalɩ pilim wɛtʋ pɩzɩɣ tiyele nɛ ɖɩmaɣzɩ se Yehowa tɩsɔɔlɩ-ɖʋ yɔ, pɩpɩzɩɣ pɩsɩnɩ-ɖʋ nɛ ɖɩtɛ ɖa-taa se ɖɩlʋkɩnɩ lɩmaɣza ana.—Roma 7:​24, 25.

LƖZƖ SE ŊWƐƔ SIƔSIƔ

15-16. (a) Ye ɖɩñɔnɩ Yehowa yɔ, ɛbɛ ɖa-taa pɩzɩɣ nɛ pɩtɛmna? (b) Nɛ ɛbɛ yɔɔ? (2 Samɩyɛɛlɩ 22:26)

¹⁵ Mbʋ Yehowa sɔɔlaa se ɖɩla yɔ, mbʋ lɛ se ‘ɖɩñɔɔnɩ-ɩ cɩŋ cɩŋ.’ (Wp. 30:​19, 20) Ye ɖɩlabɩ mbʋ yɔ, ɖa-taa pɩzɩɣ nɛ pɩtɛ se ɛkaɣ-ɖʋ labʋ mbʋ pɩwɛ siɣsiɣ yɔ. (Kalɩ 2 Samɩyɛɛlɩ 22:26.) Ye ɖiwobi pɩ-yɔɔ nɛ ɖɩwɛɛ siɣsiɣ Yehowa ɛsɩndaa yɔ, ɖa-taa pɩzɩɣ pɩtɛ se ɛkaɣ-ɖʋ sɩnʋʋ wɛtʋ ndʋ payɩ ɖɩkatɩɣ ɖe-wezuu caɣʋ taa yɔ tɩ-taa.

¹⁶ Ɛzɩ ɖɩnaʋ tɔm ñʋʋ kʋnɛ kɩ-taa yɔ, lɩmaɣza sakɩyɛ yɔɔ lɛ, ɖɩpɩzɩɣ nɛ ɖɩcaɣ ɖiɣ ɖiɣ alɩwaatʋ ndʋ ɖɩkatɩɣ kala yɔ. Bibl wɩlɩɣ se Yehowa sɔɔlɩ-ɖʋ nɛ ɛkaɣ-ɖʋ sɩnʋʋ. Ye alɩwaatʋ natʋyʋ taa, pɩlakɩ-ɖʋ ɛzɩ Yehowa tɩsɔɔlɩ-ɖʋ yɔ, mbʋ ɛzɩ ɖɩɩkam ɖa-lɩmaɣza ɛzɩma pɩlakɩ-ɖʋ yɔ pɩ-yɔɔ lɛ, pɩwɛɣ ɖeu se ɖɩtɔzɩ tɔm ndʋ ɖɩsɩm Yehowa sɔɔlɩm yɔɔ yɔ tɩ-yɔɔ. Tɛtɛ nɛ ɖa-taa tɛ se Yehowa sɔɔlɩm siɣsiɣ ñɩmbʋ wɛ tam ɛzɩ Bibl yɔɔdʋʋ yɔ.