Ɛzɩma ŋpɩzɩɣ nɛ ŋwɩlɩ Yehowa ñɛ-ɛsɩmɩyɛ kɩhɛyʋʋ pʋ-ñʋʋ taa kɩlaʋ yɔɔ?

1-2. (a) Ɛbɛ pɩwɛɛ se kɩhɛyʋʋ pʋ-ñʋʋ taa kɩlaʋ eseɣti-ɖʋ nɛ ɖɩla? (b) Nɛ ɛbɛ yɔɔ? (2 Kɔrɛntɩ mba 5:​14, 15) (Cɔnɩ ɖɔɖɔ kɩlɛmʋʋ.)

YE KUDUYUU nakʋyʋ ɛɖabɩ ñɔ-yɔɔ nɛ nɔɔyʋ kɔɔ nɛ ɛsɩnɩ-ŋ nɛ ŋlɩɩ tambaɣ tɛɛ yɔ, lɩmaɣza wena ŋwɛɣnɩ ɛ-yɔɔ? Paa pɩtɩkɛ ñe-ɖeke ña-ñʋʋ ɛyaba yɔ, pɩtʋʋ fɛyɩ se ña lɛ, ŋkaɣ yebu se ɛyʋ ɛnʋ ɛtɩlɩ se ŋwɛnɩ ɛsɩmɩyɛ mbʋ ɛlabɩ-ŋ yɔ pɩ-yɔɔ nɛ ŋŋkaɣ pɩ-yɔɔ sɔʋ kpa.

² Ɛzɩ ɖɩnaʋ tɔm ñʋʋ ŋgʋ kɩɖɛwa yɔ kɩ-taa yɔ, pɩpɔzʋʋ se nɔɔyʋ ɛsɩnɩ-ɖʋ pʋcɔ nɛ ɖɩlɩɩ sɩm nɛ kɩwɛɛkɩm po-yomiye taa. Nɛ mbʋ ɖeyi ɖeyi Yehowa laba. Etiyi ɛ-Pɩyalʋ se ɛkɔɔ nɛ ɛhɛyɩ kɩhɛyʋʋ pʋ-ñʋʋ taa ɖɔ-yɔɔ se pɩsa nɛ (1) ɛpɩzɩ nɛ ekpeɣ-ɖʋ ɖa-kɩwɛɛkɩm, (2) ɖɩwɛɛnɩ lidaʋ se ɖɩkaɣ talʋʋ pilim nɛ (3) ɖɩpɩzɩ nɛ ɖɩkɛ ɛ-taabalaa. Kɩhɛyʋʋ pʋ-ñʋʋ taa kɩlaʋ ŋgʋ kɩ-yɔɔ lɛ, ɖɩwɛnɩ lidaʋ se ɖɩkaɣ caɣʋ wezuu tam ɛjaɖɛ kɩfaɖɛ taa. Toovenim taa lɛ, kɩhɛyʋʋ pʋ-ñʋʋ taa kɩlaʋ wɩlɩɣ sɔɔlɩm sɔsɔm mbʋ Yesu wɛnɩ ɛyaa yɔɔ yɔ. Nɛ ɛɛwɛnɩ sɔɔlɩ mbʋ ɛyaa yɔɔ pʋcɔ nɛ ɛkɔŋ tɛtʋ yɔɔ. (Adu. 8:​30, 31) Apostoloo Pɔɔlɩ mawa se «sɔɔlɩm mbʋ Krɩstʋ wɛna yɔ piseɣtiɣ-ɖʋ.» (Kalɩ 2 Kɔrɛntɩ mba 5:​14, 15.) Pɩwɩlɩɣ se pɩwɛɛ se Krɩstʋ sɔɔlɩm mbʋ, piseɣti-ɖʋ nɛ ɖɩwɩlɩ-ɩ ɖɛ-ɛsɩmɩyɛ nɛ ɖɩtaasɔɔ mbʋ ɛlabɩ-ɖʋ yɔɔ pɩ-yɔɔ kaaʋ.

3. Mbʋ ŋlakɩ se ŋwɩlɩ Yehowa ñɛ-ɛsɩmɩyɛ kɩhɛyʋʋ pʋ-ñʋʋ kɩlaʋ yɔɔ yɔ, ɛbɛ yɔɔ pɩpɩzɩɣ nɛ pɩwɛɛ ndɩ nɛ mbʋ nɔɔyʋ lakɩ yɔ?

³ Ɛbɛ ŋpɩzɩɣ ŋla nɛ ŋwɩlɩ Yehowa ñɛ-ɛsɩmɩyɛ kɩhɛyʋʋ pʋ-ñʋʋ taa kɩlaʋ yɔɔ? Tɔm ndʋ ŋcosuu tɔm pɔzʋʋ pʋnɛ pɩ-yɔɔ yɔ, tɩpɩzɩɣ tɩwɛɛ ndɩ nɛ ndʋ nɔɔyʋ cosuu yɔ. Pɩsa nɛ ɖɩnɩɩ pɩ-taa lɛ, ɖɩkpaɣ se ɛyaa nabɛyɛ 3 lɩnɩ tɛtʋ ndɩ ndɩ taa nɛ powoki lone kʋɖʋmɖɩyɛ taa. Pɩtɩkɛ nʋmɔʋ kʋɖʋmʋʋ pa-tɩŋa pakaɣ tɩŋʋʋ se powolo lone nɖɩ ɖɩ-taa. Mbʋ ɖɔɖɔ mbʋ ŋlakɩ se ŋwɩlɩ Yehowa ñɛ-ɛsɩmɩyɛ kɩhɛyʋʋ pʋ-ñʋʋ taa kɩlaʋ yɔɔ yɔ, pɩlɩɣna taabalɩyɛ nɖɩ ɖɩwɛ ña nɛ ɩ mɩ-hɛkʋ taa lɛɛlɛɛyɔ yɔ ɖɩ-cɔlɔ. Tɔm ñʋʋ kʋnɛ kɩ-taa ɖɩkaɣ naʋ ɛzɩma ɛyaa tindima 3 panɛ papɩzɩɣ nɛ pawɩlɩ Yehowa pɛ-ɛsɩmɩyɛ kɩhɛyʋʋ pʋ-ñʋʋ taa kɩlaʋ yɔɔ yɔ: (1) Bibl kpɛlɩkɩyaa, (2) Krɩstʋ ñɩma mba pamɩyɩsɩ-wɛ lɩm yɔ nɛ (3) mba pɛhɛ fezuu taa nɛ poposini ɛgbɛyɛ yɔ.

BIBL KPƐLƖKƖYAA

4. Yehowa naɣ pana wena ŋñakɩ se ŋkpɛlɩkɩ nɛ ŋtɩlɩ-ɩ yɔ lɛ, ɛzɩma pɩlakɩ-ɩ?

⁴ Ye ŋwɛɛ nɛ ŋkpɛlɩkɩɣ Bibl yɔ maɣzɩ tɔm tʋnɛ tɩ-yɔɔ: Ɛzɩma ŋtisaa se ŋkpɛlɩkɩɣ Bibl yɔ pɩwɩlɩɣ se Yehowa sɔɔlaa se ŋpɩsɩ ɛ-taabalʋ. (Yoh. 6:44; Tʋma 13:48) «Yehowa kɛnɩ ɛyaa laŋa taa tazɩyʋ.» Pɩwɩlɩɣ se ɛnaɣ pana wena ŋwɛɛ nɛ ŋñakɩ se ŋkpɛlɩkɩ ɛ-yɔɔ tɔm yɔ nɛ ɛ-taa lakɩ leleŋ nɛ pana wena ŋwɛɛ nɛ ŋñakɩ se ŋla lɛɣzɩtʋ nɛ pɩmʋnɩ ɛ-paɣtʋ kila yɔ. (Adu. 17:3; 27:11) Kɩhɛyʋʋ pʋ-ñʋʋ taa kɩlaʋ haɣ-ŋ waɖɛ se taabalɩyɛ kɩbanɖɛ ɛwɛɛ ña nɛ Yehowa mɩ-hɛkʋ taa. (Roma 5:​10, 11) Taasɔɔ tɔm ndʋ tɩ-yɔɔ kpa.

5. Ɛzɩma Bibl kpɛlɩkɩyaa pɩzɩɣ nɛ pɔɖɔ lɔŋ weyi ɩwɛ Filiipi mba 3:16 taa yɔ ɩ-yɔɔ?

⁵ Ye ŋkɛ Bibl kpɛlɩkɩyʋ yɔ, ɛzɩma ŋpɩzɩɣ nɛ ŋwɩlɩ Yehowa ñɛ-ɛsɩmɩyɛ kɩhɛyʋʋ pʋ-ñʋʋ taa kɩlaʋ yɔɔ? Mbʋ ŋpɩzɩɣ ŋla yɔ pɩ-taa nabʋyʋ lɛ se ŋɖɔ lɔŋ weyi Pɔɔlɩ tasɩ Filiipi mba yɔ ɩ-yɔɔ. Ɛyɔɔdaa se: «Paa ɖitiiwobini ɛsɩndaa ɛzɩma yɔ, iyele nɛ ɖiwolo pɩ-yɔɔ nɛ ɖɩɖɔ ɖɔnɛ nɖɩ ɖɩtʋʋzaa yɔ nʋmɔʋ kʋɖʋmʋʋ ŋgʋ kɩ-taa.» (Filp. 3:16) Pɛɖɛzɩ mayaɣ ŋga Bibl nakʋyʋ taa se: «Pɩwɛɛ se ɖiwolo pɩ-yɔɔ nɛ ɖɩɖɛɣnɩ ɛsɩndaa nʋmɔʋ ŋgʋ ɖɩkpaɣaa yɔ kɩ-taa.» Ye mbʋ taayele nɛ nɔɔyʋ yaa nabʋyʋ ɖɩɣ-ŋ nʋmɔʋ nɛ ŋyele ɖɔm wezuu nʋmɔʋ taa.—Mat. 7:14; Luka 9:62.

6. Ye pɩwɛ Bibl kpɛlɩkɩyaa nabɛyɛ kaɖɛ se pala lɛɣzɩtʋ natʋyʋ yɔ, ɛbɛ papɩzɩɣ nɛ pala? (Wayɩ Wayɩ Paɣtʋ 30:​11-14) (Cɔnɩ ɖɔɖɔ kɩlɛmʋʋ.)

⁶ Pɩtɩla pitileɖi yɔ ŋkpɛlɩkɩ Bibl wɩlɩtʋ natʋyʋ nɛ pɩwɛ-ŋ kaɖɛ se ŋtisi tɩ-yɔɔ. Ɛbɛ ŋpɩzɩɣ nɛ ŋla? Ñɩnɩ wɩlɩtʋ ndʋ tɩ-yɔɔ tɔm nɛ ŋtɩmnɩ Yehowa se ɛsɩnɩ-ŋ nɛ ŋnɩɩ tɩ-taa. (Keɣ. 86:11). Ye ŋlabɩ mbʋ ɛlɛ pɩwɛ-ŋ kaɖɛ se ŋnɩɩ wɩlɩtʋ ndʋ tɩ-taa yɔ, yele tɩ-yɔɔ maɣzʋʋ ɛlɛ taayele Bibl kpɛlɩkʋʋ. Yaa pɩtɩla pɩwɛ-ŋ kaɖɛ se ŋyele lakasɩ kɩdɛkɛdɩsɩ nasɩyɩ labʋ. Ɛbɛ ŋpɩzɩɣ nɛ ŋla? Tɔzɩ se Yehowa ɛɛpɔzʋʋ ɖa ɛyaa mantɩtalɩ pilimwaa se ɖɩla mbʋ pɩcɛzɩ ɖo-ɖoŋ kamaɣ yɔ. Ŋpɩzɩɣ nɛ ŋcaɣ wezuu nɛ pɩla nɔɔ kʋɖʋmaɣ nɛ Yehowa paɣtʋ. (Kalɩ Wayɩ Wayɩ Paɣtʋ 30:​11-14.) Pɩtasɩ lɛ, Yehowa labɩ tamaɣ se ɛkaɣ-ŋ sɩnʋʋ. (Iza. 41:​10, 13; 1 Kɔr. 10:13) Ye mbʋ taalɔ lidaʋ. Taaka ña-lɩmaɣza mbʋ pɩwɛ-ŋ kaɖɛ se ŋla yɔ pɩ-yɔɔ, ɛlɛ kam-yɛ kɩbam mbʋ payɩ Yehowa wɛɛ nɛ ɛlakɩ-ŋ yɔ pɩ-yɔɔ kɔzɩ kɔzɩ kɩhɛyʋʋ pʋ-ñʋʋ taa kɩlaʋ yɔɔ. Sɔɔlɩm mbʋ ŋwɛnɩ Yehowa yɔɔ yɔ pɩwɛɣ nɛ pɩpaɣlɩɣ lɛ, ŋkaɣ ɖiɣzinuu se «ɛ-paɣtʋ fɛyɩ yuŋ.»—1 Yoh. 5:3.a

7. Piya nzɩ sɩ-lʋlɩyaa wɛ toovenim taa yɔ, tɔm ndʋ yɔɔ sɩpɩzɩɣ nɛ sɩmaɣzɩ?

⁷ Piya evelisi, mɩ mba mɩ-lʋlɩyaa wɛ toovenim taa yɔ, ɛbɛ pɩwɛɛ se ɩla? Mɩ ɖɔɖɔ ɩkɛ Bibl kpɛlɩkɩyaa. Toovenim taa lɛ, mɩkɛnɩ Bibl kpɛlɩkɩyaa mba pɔ-tɔm kɩlɩ cɛyɩ mɩ-lʋlɩyaa ɛsɩndaa yɔ. Bibl yɔɔdʋʋ se: «Ɩñɔtɩ mɩ-tɩ nɛ Ɛsɔ, nɛ ɛkaɣ-mɩ ñɔtɩnʋʋ.» (Yak. 4:8; 1 Kro. 28:9) Ye ŋñakɩ pana se ŋñɔtɩnɩ Yehowa yɔ, ɛnʋ ɖɔɖɔ ɛñɔtʋʋnɩ-ŋ. Pɩtɩkɛ ɛzɩma palʋlɩ-ŋ Yehowa Aseɣɖe Tɩnaa hɔʋ taa yɔ pʋyɔɔ Yehowa maɣzɩɣ ñɔ-yɔɔ, ɛlɛ ɛmaɣzɩɣ ñɔ-yɔɔ mbʋ pʋyɔɔ yɔ ɛsɔɔlaa se taabalɩyɛ ɛwɛɛ ña nɛ ɩ mɩ-hɛkʋ taa. Ɛbɛ Yehowa laba se pɩsa nɛ taabalɩyɛ kɩbanɖɛ wɛɛ ña nɛ ɩ mɩ-hɛkʋ taa? Etiyi ɛ-Pɩyalʋ se ɛsɩ ɖɔ-yɔɔ. Taasɔɔ kʋjɔʋ kɩbaŋʋ ŋgʋ kɩ-yɔɔ. (Roma 5:​1, 2) Ye mbʋ pʋcɔ nɛ ŋwolo sɛmɩyɔɔ Yesu sɩm yɔɔ tɔzʋʋ sɔnzɩ taa lɛ, kpaɣ alɩwaatʋ nɛ ŋmaɣzɩ mbʋ Yehowa nɛ Yesu palabɩ-ŋ yɔ pɩ-yɔɔ. Pʋwayɩ lɛ, ŋmaɣzɩ ɖɔɖɔ wezuu ŋgʋ ŋsɔɔlaa se ŋcaɣ nɛ fezuu taa kaɖʋsɩ nzɩ ŋpɩzɩɣ ŋɖʋ ña-tɩ nɛ ŋwɩlɩ se ŋwɛnɩ ɛsɩmɩyɛ mbʋ Yehowa labɩ-ŋ yɔ pɩ-yɔɔ.b

KRƖSTƲ ÑƖMA MBA PAMƖYƖSƖ-WƐ LƖM YƆ

8. Ɛzɩma Krɩstʋ ñɩma mba pamɩyɩsɩ-wɛ lɩm yɔ pawɩlaa se pɛwɛnɩ ɛsɩmɩyɛ kɩhɛyʋʋ pʋ-ñʋʋ taa kɩlaʋ yɔɔ?

⁸ Ye pɛtɛmɩ-ŋ lɩm mɩyɩsʋʋ yɔ, pɩwɩlɩɣ se ŋwɩlɩ hɔɔlɩŋ sakɩyɛ taa se ŋwɛnɩ ɛsɩmɩyɛ kɩhɛyʋʋ pʋ-ñʋʋ taa kɩlaʋ yɔɔ. Kɩɖaŋ nɩɩyɩ yɔ: Ŋlabɩ lɛɣzɩtʋ ñe-wezuu caɣʋ taa se ñɔ-tɔm ɛkɛdɩnɩ Yehowa nɛ ŋpɩsɩ ɛ-taabalʋ. Ŋɖɔm ɖɔɖɔ Yesu paɣtʋ ndʋ tɩtɔŋ se ɛ-wayɩ tɩŋɩyaa ɩla kpɛlɩkɩyaa yɔ tɩ-yɔɔ. Ŋha ña-tɩ Yehowa nɛ ŋyele nɛ pamɩyɩsɩ-ŋ lɩm. Pɩtɩla pakaɖɩnɩ-ŋ yaa panazɩ-ŋ mbʋ pʋyɔɔ yɔ ŋlɩzaa se ŋsɛɣ Yehowa. (2 Tim. 3:12) Paa mbʋ yɔ ŋwobi pɩ-yɔɔ nɛ ŋsɛɣ Yehowa siɣsiɣ nɛ pɩwɩlɩɣ se ŋsɔɔlɩ-ɩ nɛ ŋwɛnɩ ɛsɩmɩyɛ kɩhɛyʋʋ pʋ-ñʋʋ taa kɩlaʋ yɔɔ.—Ebr. 12:​2, 3.

9. Kaɖɛ nɖɩ pɩzɩɣ nɛ ɖɩtalɩ Krɩstʋ ñɩma mba pamɩyɩsɩ-wɛ yɔ?

⁹ Ða mba pamɩyɩsɩ-ɖʋ lɩm nɛ pileɖaa yɔ, ye ɖɩtɩtɩlɩ labʋ yɔ kaɖɛ naɖɩyɛ pɩzɩɣ nɛ ɖɩtalɩ-ɖʋ. Kaɖɛ nɖɩ lɛ se alɩwaatʋ wɛɣ nɛ tɩɖɛɣ lɛ, ɖɩɩtasɩɣ wɛnʋʋ ɛsɩmɩyɛ kɩhɛyʋʋ pʋ-ñʋʋ taa kɩlaʋ yɔɔ. Ɛzɩma pɩpɩzɩɣ nɛ pɩla mbʋ? Iyele nɛ ɖɩna mbʋ pɩɩtalɩ kajalaɣ pɩnzɩ nɩnʋʋ taa Krɩstʋ ñɩma mba paawɛ Efɛɛzɩ yɔ. Yesu sam-wɛ pa-laŋɩyɛ ɖɔkʋʋ yɔɔ. Paa mbʋ yɔ eheyi-wɛ se: «Man-taa wɛnɩ-ŋ nɛ tɔm tʋnɛ: ndʋ lɛ se ŋyebi sɔɔlɩm mbʋ ŋŋwɛnɩ kiɖe tɛɛ yɔ.» (Natʋ 2:​3, 4) Yesu tɔm ndʋ, tɩwɩlɩɣ se Krɩstʋ tʋ nɔɔyʋ pɩzɩɣ nɛ ɛlakɩ fezuu taa tʋma yem se pɔtɔma palabɩ-yɛ, ɛlɛ pɩtɩkɛ sɔɔlɩm tuyuuni-i nɛ ɛlakɩ-yɛ. Krɩstʋ tʋ ɛnʋ, ɛpɩzɩɣ nɛ ɛtɩmɩɣ, ewoki kediɣzisi nɛ ɛlɩɣ tɔm susuu mbʋ pʋyɔɔ yɔ mbʋ ɛtɩɩlakɩ. Ɛlɛ pɩtɩkɛ sɔɔlɩm seɣtiɣni-i nɛ ɛlakɩ tʋma ana. Ɛbɛ ŋpɩzɩɣ ŋla ye ŋɖiɣzinaa se sɔɔlɩm mbʋ ŋŋwɛnɩ Yehowa yɔɔ kiɖe tɛɛ yɔ pɩwɛɛ nɛ pɩhɛɣ?

10. Ɛzɩma ŋpɩzɩɣ nɛ ŋɖɔ tɔm ndʋ Pɔɔlɩ heyi Timootee yɔ tɩ-yɔ? (1 Timootee 4:​13, 15)

¹⁰ Apostoloo Pɔɔlɩ heyi Timootee se ‘ɛmaɣzɩ’ fezuu taa tʋma yɔɔ paa ɛzɩmtaa nɛ ‘ɛkam-yɛ nɛ ñʋʋ.’ (Kalɩ 1 Timootee 4:​13, 15.) Ña ɖɔɖɔ ŋpɩzɩɣ ñɛ ŋmaɣzɩ nɛ ŋna mbʋ ŋpɩzɩɣ ŋla nɛ ŋwɛɛ kpekpeka Yehowa sɛtʋ taa nɛ pɩkɩlɩ yɔ. (Roma 12:11) Kɩɖaŋ nɩɩyɩ yɔ: Ŋpɩzɩɣ nɛ ŋla ɖʋtʋ se ŋñɔɔzʋʋ kediɣzisi camɩyɛ nɛ pɩkɩlɩ. Yaa alɩwaatʋ ndʋ ŋŋlakɩ ña-tɩ yɔɔ kpɛlɩkʋʋ yɔ, ŋpɩzɩɣ nɛ ŋlɩzɩ se ŋwoki lone nɖɩ ɖɩ-taa ŋwɛɣ ñe-ɖeke yɔ se pɩsa nɛ ŋmaɣzɩ ndʋ ŋkpɛlɩkɩɣ yɔ tɩ-yɔɔ camɩyɛ. Piyeki nɛ ña-tɩ yɔɔ kpɛlɩkʋʋ wazɩ-ŋ nɛ pɩkɩlɩ. Ɛzɩ pɩpɔzʋʋ se ŋsɔzʋʋ ɖasɩ miŋ taa nɛ miŋ wolo pɩ-yɔɔ nɛ ɛmʋʋ camɩyɛ yɔ, mbʋ ɖɔɖɔ pɩpɔzʋʋ se ŋlakɩ tʋma ana nɛ pɩsa nɛ ŋwolo pɩ-yɔɔ nɛ ŋwɛɛnɩ ɛsɩmɩyɛ kɩhɛyʋʋ pʋ-ñʋʋ taa kɩlaʋ nɛ wondu lɛɛtʋ ndʋ Yehowa haɣ-ŋ yɔ tɩ-yɔɔ. Pɩtasɩ lɛ, kpɩtaŋ weyi ɩkɔŋ pʋcɔ nɛ Krɩstʋ sɩm yɔɔ tɔzʋʋ kɩyakʋ talɩ yɔ, ŋpɩzɩɣ nɛ ŋmaɣzɩ ɛzɩma Yehowa wɛɛ nɛ ɛwazɩɣ ɛ-samaɣ yɔ pɩ-yɔɔ. Pɩtʋʋ fɛyɩ se pɩkaɣ-ŋ sɩnʋʋ nɛ ŋwɛɛnɩ ɛsɩmɩyɛ kɩhɛyʋʋ pʋ-ñʋʋ taa kɩlaʋ yɔɔ nɛ pɩkɩlɩ, mbʋ pʋyɔɔ yɔ ŋgʋ yebina se taabalɩyɛ kɩbanɖɛ ɛwɛɛ ɖa nɛ Yehowa ɖɛ-hɛkʋ taa.

11-12. Ye alɩwaatʋ natʋyʋ pɩlakɩ-ŋ ɛzɩ ŋtɩtasɩ wɛʋ kpekpeka Yehowa sɛtʋ taa ɛzɩ ɖooo lɛ yɔ, ɛzɩ pɩwɩlɩɣ se Yehowa fezuu tɩtasɩ wɛʋ ñɔ-yɔɔ? Lɩzɩ pɩ-taa. (Cɔnɩ ɖɔɖɔ kɩlɛmʋʋ.)

¹¹ Ye pɩwɛɛ nɛ pɩlakɩ-ŋ ɛzɩ ŋfɛyɩ kpekpeka Yehowa sɛtʋ taa ɛzɩ ɖooo lɛ yɔ, pitaatibi-ŋ yɔɔɔ yaa taakɔ tɔm ñʋʋ se Yehowa fezuu tɩtasɩ wɛʋ ñɔ-yɔɔ. Tɔzɩ tɔm ndʋ apostoloo Pɔɔlɩ ma Kɔrɛntɩ mba pɩlɩɩnɩ ɛ-Ɛsɔ sɛtʋ tʋmɩyɛ yɔɔ yɔ tɩ-yɔɔ. Ɛyɔɔdaa se: «Paa maalakɩ mbʋ nɛ laŋɩyɛ faaa yɔ, pɩkpɛndɩ pɩkɛ ɖɩɣa yɔɔ cɔnʋʋ tʋmɩyɛ nɖɩ paɖʋzɩ me-nesi tɛɛ yɔ.» (1 Kɔr. 9:17) Ɛbɛ ɖɩpɩzɩɣ nɛ ɖɩkpɛlɩkɩ tɔm ndʋ tɩ-taa?

¹² Nabʋyʋ taa pitaaseɣtiɣ Pɔɔlɩ se esusi tɔm. Paa mbʋ yɔ, ɛɛtɛm ɛ-taa se ewoki pɩ-yɔɔ nɛ esusuu tɔm. Ña ɖɔɖɔ ŋpɩzɩɣ nɛ ŋtɛ ña-taa se ŋlakɩ mbʋ. Tɛ ña-taa se ŋlakɩ mbʋ pɩtʋʋzaa yɔ paa piiseɣtiɣ-ŋ se ŋla mbʋ yɔ. Ŋpɩzɩɣ nɛ ŋtɩmnɩ Yehowa se ɛsɩnɩ-ŋ nɛ ‘ŋsɔɔlɩ nɛ ŋtɛ ŋwɛɛnɩ ɖoŋ nɛ ŋla mbʋ payɩ ɛsɔɔlaa yɔ.’ (Filp. 2:13) Wolo pɩ-yɔɔ nɛ ŋlakɩ fezuu taa tʋma wena asɩɣnɩ-ŋ se ŋñɔtɩnɩ Yehowa yɔ. Ðɩnɛ ɛlɛ, ña-taa pɩzɩɣ nɛ pɩtɛ se alɩwaatʋ kaaɖɛɣ lɛ, ŋkaɣ ɖaɣnʋʋ wɛʋ kpekpeka fezuu taa tʋma labʋ taa.

13. Ɛzɩma ɖɩpɩzɩɣ ɖɩla nɛ ɖɩna se ‘ɖɩwɛ tisuu taa’?

¹³ Ðoŋ ɖoŋ lɛ, pɩwɛɣ ɖeu se ɖɩtazɩ ɖa-taa ɛzɩ peseɣtuu-ɖʋ 2 Kɔrɛntɩ mba 13:5 taa yɔ. Pɔyɔɔdɩ peeɖe se: «Ɩwɛɛ nɛ ɩtakɩɣ mɩ-tɩ nɛ ɩna se ɩwɛ tisuu taa; ɩwɛɛ nɛ iwiliɣ mɩ-tɩ nɛ ɩna mbʋ ɩkɛwa yɔ.» Ŋpɩzɩɣ nɛ ŋpɔzɩ ña-tɩ se: «Mɛwɛɛ nɛ mansɩɣ Kewiyaɣ tʋma kajalaɣ lone taa me-wezuu caɣʋ taa?» (Mat. 6:33) «Aleɣya wena malakɩ yaa mbʋ mɔncɔŋna se mancalɩsɩnɩ mɛ-ɛsa yɔ pɩwɩlɩɣ se manpaɖɩɣ mbʋ pɩfɛyɩ ɖeu yɔ?» (Keɣ. 97:10) «Mɛnkɛ ɛyʋ weyi ɛñɩnɩɣ laŋhɛzɩyɛ nɛ eyeki se nɔɔ kʋɖʋmaɣ ɛwɛɛ koobiya hɛkʋ taa yɔ?» (Efɛz. 4:​2, 3) Krɩstʋ sɩm yɔɔ tɔzʋʋ sɔnzɩ kɛ alɩwaatʋ kɩbandʋ ndʋ tɩ-taa pɩwɛɛ se ɖɩmaɣzɩ mbʋ Yehowa nɛ Yesu palabɩ-ɖʋ yɔ pɩ-yɔɔ yɔ. Pɩkaɣ-ɖʋ seɣtuu nɛ ɖɩwɩlɩ-wɛ ɖɛ-ɛsɩmɩyɛ nɛ ɖɩsɔɔlɩ se ɖɩcaɣ wezuu ɛzɩ Krɩstʋ sɔɔlʋʋ yɔ, ɛlɛ ɖɩɩcakɩ-kʋ ɛzɩ ɖa-maɣmaɣ ɖɩsɔɔlʋʋ yɔ.c

ƐYAA MBA PƐHƐ FEZUU TAA NƐ POPOSINI ƐGBƐYƐ YƆ

14. Ɛbɛ pɩzɩɣ piyele nɛ koobiya nabɛyɛ yele kediɣzisi wobu?

¹⁴ Koobiya nabɛyɛ sɛ Yehowa alɩwaatʋ natʋyʋ yaa halɩ pɩnzɩ sakɩyɛ, ɛlɛ pʋwayɩ lɛ peyele kediɣzisi wobu. Ɛbɛ yɔɔ? Pa-taa nabɛyɛ lɛ, «wezuu caɣʋ taa nɩɣzɛ» yebina nɛ peyele wobu kediɣzisi. (Luka 21:34) Lalaa lɛ, pɩtɩla koobu nɔɔyʋ yɔɔdaɣ yaa ɛ-lakasɩ ɖʋnɩ-wɛ ɖɩwɩzɩyɛ nɛ peyele wobu. (Yak. 3:2) Lalaa ɖɔɖɔ lɛ, peyebi wobu, mbʋ pʋyɔɔ yɔ palabɩ kɩwɛɛkɩm sɔsɔm nabʋyʋ nɛ patɩsɔɔlɩ se pɔpɔzɩ nɛ pasɩnɩ-wɛ. Paa ɛbɛ cɔlɔ pɩtɩɩlɩnaa nɛ ŋyele kediɣzisi wobu yɔ, ɛbɛ ŋpɩzɩɣ nɛ ŋla? Ɛbɛ kɩhɛyʋʋ pʋ-ñʋʋ taa kʋjɔʋ ŋgʋ Yehowa labɩ-ŋ nɛ sɔɔlɩm yɔ kɩpɩzɩɣ kiseɣti-ŋ nɛ ŋla?

15. Ɛzɩma Yehowa wɩlɩɣ se ɛmaɣzɩɣ koobiya mba poposini ɛgbɛyɛ yɔ pɔ-yɔɔ? (Ezekɩyɛɛlɩ 34:​11, 12, 16)

¹⁵ Lɩmaɣza wena Yehowa wɛnɩ ɛyaa mba poposini ɛgbɛyɛ yɔ pɔ-yɔɔ? Ɛtɩlɔ-wɛ. Ɛlɛ ɛwɛɛ nɛ ɛñɩnɩɣ-wɛ. Ɛwɛɛ nɛ ɛcalɩɣ-wɛ nɛ ɛsɩɣnɩ-wɛ se papɩsɩ ɛ-cɔlɔ. (Kalɩ Ezekɩyɛɛlɩ 34:​11, 12, 16.) Ɛzɩ Yehowa wɛɛ nɛ ɛlakɩ ña ɖɔɖɔ mbʋ? Ɛɛɛ! Ɛzɩma ŋwɛɛ nɛ ŋkalɩɣ tɔm ñʋʋ kʋnɛ yɔ, pɩwɩlɩɣ se ŋkpɛndɩ ŋsɔɔlaa se ŋla mbʋ pɩkɛdɩnɩ-ɩ yɔ. Ɛzɩ ɛɛnaʋ se ŋwɛnɩ laŋɩyɛ kɩbanɖɛ nɛ ɛhɔmɩ-ŋ nɛ ɛkɔnɩ toovenim taa yɔ, mbʋ ɖɔɖɔ ɛpɩzɩɣ nɛ ɛsɩnɩ-ŋ lɛɛlɛɛyɔ nɛ ŋpɩsɩ ɛgbɛyɛ taa.

16. Ɛbɛ pɩzɩɣ nɛ pɩsɩnɩ mba poposini Yehowa yɔ nɛ papɩsɩ ɛ-cɔlɔ? (Cɔnɩ ɖɔɖɔ kɩlɛmʋʋ.)

¹⁶ Hatʋ cabɩ takayaɣ Pɩsɩ Yehowa cɔlɔ yɔɔdɩ ɖoŋ kpazʋʋ tɔm tʋnɛ: «Ña-taa ɛtɛ se Yehowa kaɣ-ŋ sɩnʋʋ alɩwaatʋ ndʋ ŋñakɩ pana se ŋpɩsɩ ɛ-cɔlɔ yɔ. Ɛkaɣ-ŋ sɩnʋʋ nɛ ŋwɛɛnɩ ɛhʋyɛ kɩbanɖɛ nɛ pɩsa nɛ ŋlʋbɩnɩ nɩɣzɛ, ŋlɔ lɩmaɣza kɩdɛkɛda nɛ ŋhiɣ laŋɩyɛ hɛzʋʋ. Pɩkaɣ-ŋ tuyuu nɛ ŋtasɩ kpɛndʋʋ Yehowa sɛyaa lalaa yɔɔ nɛ ña nɛ wɛ ɩsɛɛ-ɩ.» Tɔzɩ ɖɔɖɔ se ɛgbɛyɛ taa ɛzʋtʋyaa sɔɔlɩ siŋŋ se pasɩnɩ-ŋ. Papɩzɩɣ nɛ pɛkɛ-ŋ «ɖɩmɛlɩyɛ lone helim alɩwaatʋ taa, . . . ɖenɖe ɛyʋ cɔzʋʋ tɛʋ ŋgʋ kɩnɩɣnɩ helim yɔ.» (Iza. 32:2) Pɩsa nɛ ŋwɩlɩ Yehowa ñɛ-ɛsɩmɩyɛ kɩhɛyʋʋ pʋ-ñʋʋ taa kɩlaʋ yɔɔ lɛ, pɔzɩ ña-tɩ se: «Ɛbɛ manpɩzɩɣ mala lɛɛlɛɛyɔ nɛ manpɩsɩ Yehowa cɔlɔ?» (Iza. 1:18; 1 Pɩy. 2:25) Ŋpɩzɩɣ nɛ ŋwolo kediɣzaɣ nakɛyɛ Kewiyaɣ kpaaŋ taa. Ŋpɩzɩɣ nɛ ŋyɔɔdɩnɩ ɛzʋtʋyʋ nɔɔyʋ nɛ ŋheyi-i se ŋsɔɔlaa se pasɩnɩ-ŋ nɛ ŋpɩsɩ Yehowa cɔlɔ. Ɛzʋtʋyʋ ɛnʋ, ɛpɩzɩɣ nɛ ɛñɩnɩ nɔɔyʋ nɛ ɛkpɛlɩkɩnɩ-ŋ Bibl alɩwaatʋ natʋyʋ. Ña-taa pɩzɩɣ nɛ pɩtɛ se Yehowa kaɣ wazʋʋ pana wena ŋñakɩ se ŋpɩsɩ ɛ-cɔlɔ nɛ mbʋ payɩ ŋlakɩ se ŋwɩlɩ se ŋwɛnɩ ɛsɩmɩyɛ kɩhɛyʋʋ pʋ-ñʋʋ taa kɩlaʋ yɔɔ yɔ pɩ-yɔɔ.

ƐBƐ ŊKAƔ LABƲ?

17-18. Pʋcɔ nɛ Krɩstʋ sɩm yɔɔ tɔzʋʋ sɔnzɩ kɩyakʋ talɩ lɛ, ɛzɩma ɖɩpɩzɩɣ nɛ ɖɩlabɩnɩ ɖa-alɩwaatʋ tʋmɩyɛ camɩyɛ?

¹⁷ Yesu yɔɔdaa se pɛhɛyɩ kɩhɛyʋʋ pʋ-ñʋʋ taa «se pɩsa nɛ weyi ɛwɛɣnɩ tisuu ɛ-yɔɔ yɔ, pataaɖɩzɩ-ɩ ɛlɛ ehiɣ wezuu maatɛŋ.» (Yoh. 3:16) Kɩhɛyʋʋ pʋ-ñʋʋ taa kɩlaʋ kɛnɩ nʋmɔʋ ŋgʋ kɩ-yɔɔ Yehowa tɩŋɩɣna se ɛya ɖa-ñʋʋ kɩwɛɛkɩm nɛ sɩm pe-nesi tɛɛ yɔ. Ðɩtɩsɔɔlɩ kpa se ɖiyele wɛnʋʋ ɛsɩmɩyɛ kɩlaʋ ŋgʋ kɩ-yɔɔ. (Roma 3:​23, 24; 2 Kɔr. 6:1) Pʋcɔ nɛ Krɩstʋ sɩm yɔɔ tɔzʋʋ sɔnzɩ kɩyakʋ talɩ lɛ, ɖɩkpaɣ alɩwaatʋ nɛ ɖɩmaɣzɩ sɔɔlɩm mbʋ Yehowa nɛ Yesu pawɩlɩ-ɖʋ yɔ pɩ-yɔɔ. Pɩkaɣ-ɖʋ seɣtuu nɛ ɖɩwɩlɩ-wɛ ɖɛ-ɛsɩmɩyɛ.

¹⁸ Ɛzɩma ŋpɩzɩɣ nɛ ŋwɩlɩ ñɛ-ɛsɩmɩyɛ kɩhɛyʋʋ pʋ-ñʋʋ taa kɩlaʋ yɔɔ? Tɔm ndʋ ŋcosuu yɔ tɩpɩzɩɣ nɛ tɩwɛɛ ndɩ nɛ ndʋ nɔɔyʋ cosuu yɔ. Ɛlɛ ña-taa pɩzɩɣ nɛ pɩtɛ se Yehowa kaɣ-ŋ wazʋʋ pana wena ŋñakɩ se ŋkpɛndɩ ɛ-sɛyaa miiliyɔɔwaa lalaa yɔɔ yɔ a-yɔɔ. Ɛyaa mba palɩzaa se paatasɩɣ ‘caɣʋ wezuu pa-tɩ yɔɔ; ɛlɛ pacakɩ-kʋ weyi ɛsɩbɩ pɔ-yɔɔ’ yɔ ɛ-yɔɔ.—2 Kɔr. 5:15.