Keɣa 23:4: «Ye mantalɩ cɩkpɛndʋʋ [sɩm] kajalaŋa taa kɔyɔ»

«Paa mɔnɖɔŋ cɩkpɛndʋʋ sɔsɔʋ fɛɛʋ taa yɔ, sɔɔndʋ ɛɛkpaɣ-m se kɩdɛkɛdɩm nabʋyʋ kaatalɩ-m, mbʋ pʋyɔɔ yɔ ŋwɛ mɔn-cɔlɔ; ña-ɖaʋ hɛzɩɣ ma-laŋɩyɛ.»—Keɣa 23:4, Ɛjaɖɛ kɩfaɖɛ tɔm ɖɛzʋʋ.

«Ye mantalɩ cɩkpɛndʋʋ [sɩm] kajalaŋa taa kɔyɔ maakeŋ, kɩdɛkɛdɩm nabʋyʋ ɛɛlakɩ-m; ɛ-ɖaʋ nɛ e-ɖooka pɛwɛɛ nɛ pɛhɛzɩɣ ma-laŋɩyɛ.»—Keɣa 23:4, Takayaɣ kiɖeɖea.

Keɣa 23:4 tɔbʋʋ yɔa

Ɛsɔ huuzuu ɛ-sɛyaa yɔɔ, halɩ pɩkpɛndɩnɩ alɩwaatʋ ndʋ pakatɩɣ kala ndɩ ndɩ yɔ. Pɩsa nɛ pawɩlɩ ɛzɩma Ɛsɔ cɔŋnɩ ɛ-sɛyaa yɔɔ lɛ, mayaɣ ŋga, kɔyɔɔdʋʋ ninɖiɣyu weyi ɛcɔŋnɩ e-heɣa yɔɔ yɔ ɛ-kɩɖaʋ tɔm.b Mayaɣ ŋga kakpaɣ ɖɔɖɔ kaɖɛ alɩwaatʋ nɛ kamaɣzɩnɩ lone nɖɩ ɖɩ-taa cɩkpɛndʋʋ wɛɛ yɔ, nɖɩ ɖɩ-taa ɛyʋ seɣ sɩm sɔɔndʋ yɔ. Wɛtʋ ndʋ tɩ-taa lɛ, Ɛsɔ sɛyaa ɩɩmaɣzɩɣ se pɛwɛ pe-ɖeke. Halɩ pɩlakɩ-wɛ ɛzɩ Ɛsɔ wɛ pɔ-cɔlɔ peeɖe maɣmaɣ yɔ.

Bibl alɩwaatʋ taa, ninɖiɣyu tɩŋaɣnɩ ɛ-ɖaʋ yɔɔ nɛ ɛɖaŋɩɣ e-heɣsi yɔɔ se tɔɔyʋʋ nakʋyʋ ɛtaatɔɔ-wɛ. Pɩsa nɛ ɛwɩlɩ e-heɣsi nʋmɔʋ yaa ɛsɩnɩ-sɩ nɛ sɩtaañɔtɩnɩ kaɖɛ lona lɛ, ɛlakaɣnɩ tʋmɩyɛ ɛ-kpaɖaʋ. Yehowa wɛ ɛzɩ ninɖiɣyu sɔɔlɩm tʋ weyi ehuuzuu ɛ-sɛyaa yɔɔ nɛ ɛwɩlɩɣ-wɛ ɖɔɖɔ nʋmɔʋ yɔ. Yehowa tɩŋɩɣnɩ nʋmɔŋ ndɩ ndɩ yɔɔ nɛ ɛcɔŋnɩ pɔ-yɔɔ halɩ pɩkpɛndɩnɩ alɩwaatʋ ndʋ tɩkɩlɩ kaɖɛ yɔ tɩ-taa.

• Ɛtɩŋɩɣnɩ ɛ-tɔm ndʋ pamawa yɔ tɩ-yɔɔ nɛ ɛwɩlɩɣ-wɛ tɔm nɛ ɛhɛzɩɣ pa-laŋa.—Roma mba 15:4.

• Ewelisiɣ pa-adɩma nɛ ɛhaɣ-wɛ lɩmaɣza nɛ laŋɩyɛ taa laŋhɛzɩyɛ.—Filiipi mba 4:6, 7.

• Ɛtɩŋɩɣnɩ po-koobiya yɔɔ nɛ ɛkpazɩɣ-wɛ ɖoŋ.—Ebree mba 10:24, 25.

• Lidaʋ ŋgʋ ɛha-wɛ yɔ, abʋta fɛyɩ kɩ-yɔɔ; ɛlabɩ-wɛ tamaɣ se ɛkaɣ yebu nɛ pɩñɔɔzɩ cee wayɩ, ɛkaɣ hɩzʋʋ mbʋ payɩ sɔnɔ kʋñɔmɩŋ kɔnaa yɔ.

Tɔm ndʋ tɩcɔ Keɣa 23:4 nɛ tɩta yɔ

Daviid manɩ Keɣa 23 ñɩŋga, ɛɛkɛ ninɖiɣyu alɩwaatʋ ndʋ ɛɛkɛ evebu yɔ; ɛlɛ pʋwayɩ lɛ, ɛpɩsɩ caanaʋ taa Izrayɛɛlɩ ɛjaɖɛ Wiyaʋ (1 Samɩyɛɛlɩ 17:34, 35; 2 Samɩyɛɛlɩ 7:8) Keɣa ŋga ka-ɖɩbazɩyɛ taa, pakpaɣ Yehowa nɛ pamaɣzɩnɩ ninɖiɣyu weyi ɛcalɩɣ e-heɣsi, eɖiyiɣ-sɩ nɛ ɛhɛzɩɣ sɩ-laŋa, ɛzɩ ninɖiɣyu maɣmaɣ lakʋʋ e-heɣsi yɔ.—Keɣa 23:1-3.

Keɣa 23:4 taa, pɩsa nɛ Daviid ñɩɣ niye ɛzɩma Yehowa huuzuu ɛ-sɛyaa yɔɔ yɔ pɩ-yɔɔ lɛ, ɛlɛɣzɩ ɛzɩma ɛyɔɔdaɣ ɛ-tɔm yɔ. Ɛpaɣzɩ yɔɔdʋʋ ɛzɩ Yehowa wɛ ɛ-ɛsɩndaa maɣmaɣ yɔ. Lɛɣzɩtʋ ndʋ tɩwɩlɩɣ se taabalɩyɛ kɩbanɖɛ kaawɛ Daviid nɛ Yehowa pɛ-hɛkʋ taa. Daviid kaanawa se Ɛsɔ cɔŋnɩ e-ɖeɖe nɛ Ɛsɔ sɩm tɩlasɩ nzɩ ɛkatɩɣ yɔ. Pʋyɔɔ lɛ, sɔɔndʋ taakpaɣ Daviid.

Kalɩtʋ 5 nɛ 6 taa lɛ, Daviid kpaɣ ɛgɔm nɛ ɛgɔm mʋyʋ nɛ ɛlɛɣzɩ ninɖiɣyu nɛ e-heɣa pa-kɩɖaʋ lone taa. Ɛzɩ ɛgɔm mʋyʋ kɩbanʋ yɔ, Yehowa lakaɣ Daviid ɛzɩ ɛkɛ ɛgɔm weyi paɖʋ-ɩ hɩɖɛ yɔ. Halɩ Daviid koyindinaa maɣmaɣ ɩɩpɩzɩɣ pala nɛ Ɛsɔ yele Daviid ɖeɖe cɔnʋʋ. Keɣa ŋga ka-ɖɩdɛnɖɛ lɛ, Daviid yɔɔdɩ lidaʋ ŋgʋ ɛwɛna se Yehowa kaɣ-ɩ labʋ kɩbandʋ nɛ ɛwɩlɩ-ɩ sɔɔlɩm e-wezuu kpeekpe taa yɔ pɩ-tɔm.

Kɩɖaŋ weyi pakpaɣ Keɣa 23 taa yɔ, ɩyɔɔdʋʋ sɔɔlɩm mbʋ Ɛsɔ cɔŋnɩnɩ ɛ-sɛyaa yɔɔ yɔ pɩ-tɔm.—1 Pɩyɛɛrɩ 2:25.