Ini Ingathama Kuti Nha Uhane?

TJINOLEBGWA NEBHAYIBHILI

“Banohana banohwa whi leNdzimu bathame zwalinoleba!”​—ULukha 11:28, New World Translation.

IGOKU KUNGAKUTJIDZA TJINI?

Unowhowana ludo gwemalebeswa.​—Kwabase-Efesu 5:28, 29.

Banhu banowhokukudza.​—Kwabase-Efesu 5:33.

Unowhogala usingahle.​—UMakho 10:6-9.

TINGAGALABGWE ZWINOLEBGWA NDEBHAYIBHILI KENE?

Tingajalo, ndentha yezwinhu zwibili:

• Ndzimu ndiye wakatanga nha. Bhayibhili loti ‘miha yose iyapo ndentha’ yaYehova Ndzimu. (Kwabase-Efesu 3:14, 15) Ne amwe matama, nha uyapo ndentha yekuti Yehova ndiye wakawuthama. Ndentha yeni igoku kukudziwa?

  Kumbula: Hape udla zodliwa zwinozipa kakale uhaka ziba kuti kwabhikwa tjini, ungabhuzwa yani? Ungabhuzwa nhu wabhika.

  Ndezila yakafanana, kuti tizibe kuti nha ungahana tjini, takafanila bhuzwa Yehova ndentha yekuti ndiye wakatanga miha yose.​—UGenesisi 2:18-24.

• Ndzimu unandaba ndawe. Miha inolakidza tjenjela hape iwhilila Yehova eyibudza zwekuthama ehingisa Whi lile. Ndentha yeni? “Ndentha yekuti unandaba ndawe.” (1 UPhetro 5:6, 7) Yehova unohaka titjidza kakale​—unotibudza zwinotitjidza lubaka gose.​—IZaga 3:5, 6; U-Isaya 48:17, 18.