Salmu
Pa diretor di múzika. Na stilu di Jedutun.* Un múzika di Davidi.
39 N fla: “N ta ben toma kuidadu
Pa N ka peka ku nha língua.
N ta ben tapa nha bóka
Timenti sta kalker algen mau na nha prezénsa.”
3 Déntu di mi, nha korason staba ta kema.*
Timenti N staba ta pensa,* kel lumi kontinua ta kema.
Nton N fla:
4 “Ó Jeová, djuda-m odja modi ki nha vida é kurtu,*
I ma nhas dia é poku.
Djuda-m intende modi ki nha vida ta pasa faxi.
5 Na verdadi, bu da-m un vida kurtu,*
I ténpu ki nha vida ta dura é ka nada bu dianti.
Un kuza é sértu, pa más ki un ómi ta parse fórti, el ka ta pasa di un sinplis folgu. (Selá)
6 Di serteza tudu ómi ta bai i ta ben, sima un sónbra.
Es ta kóre di un ladu pa kel otu* atoa.
Es ta djunta rikéza, sen sabe ken ki ta ben fika ku es.
7 Ó Jeová, ki speransa ki N ten?
Abo é nha úniku speransa.
8 Salva-m di tudu nhas pekadu.
Ka bu dexa pa algen tolu faze trósa di mi.
9 N fika mudu,
N ka konsigi abri nha bóka,
Pamodi é bo ki dexa tudu kes kuza li kontise.
10 Tra bu kastigu* riba di mi.
N sta sen forsa pamodi bu mô sta ta kastiga-m.
11 Bu ta kastiga algen pamodi ses pekadu, asi pa koriji-l.
Bu ta distrui kes kuza ki el ta atxa ma ten valor, sima bitxu ta kaba ku ropa.
Na verdadi, tudu ómi ka ta pasa di un sinplis folgu. (Selá)
12 Ó Jeová, obi nha orason,
Obi nha pididu di ajuda.
Ka bu iginora nhas lágua.
Pamodi pa bo, ami é sô un stranjeru,
Algen ki sta di pasajen,* sima tudu nhas gentis grandi.
13 Ka bu djobe pa mi ku raiba, asi pa N fika kontenti otu bês
Antis di N móre i N dexa di izisti.”