Salmu
Pa diretor di múzika. Un múzika di Davidi kantu proféta Natan bai pâpia ku Davidi dipôs ki Davidi tevi relason seksual ku Batiseba.
51 Ó Deus, ten péna di mi pamodi bu amor lial.
Paga nhas pekadu pamodi bu mizerikórdia é grandi.
2 Laba-m di tudu nha éru
I linpa-m di nha pekadu.
3 Pamodi N sabe dretu ma N peka,
I nha pekadu sta sénpri nha dianti.*
4 N peka kóntra bo, prinsipalmenti kóntra bo,*
N faze kel ki bu ta atxa ma é mariadu.
Pur isu, abo é justu óras ki bu ta pâpia,
Bu ten razon óras ki bu ta julga.
5 Na verdadi, N nase kulpadu,
I mi é pekador désdi ki N staba na bariga di nha mai.*
6 N sabe ma bu ta fika kontenti óras ki un algen ten verdadi na korason.
Inxina-m ten sabedoria di verdadi na nha korason.
7 Purifika-m di nha pekadu ku isopu,* asi pa N fika linpu.
Laba-m, asi pa N fika más branku di ki névi.
8 Pô-m ta obi gritu di alegria pa N pode fika kontenti,
Enbóra bu kebra-m nhas osu.
9 Ka bu odja pa* nhas pekadu,
I paga tudu nhas éru.
10 Ó Deus, da-m un korason puru,
I muda nha manera di pensa, asi pa N pode ser lial.
11 Ka bu tra-m di bu dianti
I ka bu tra-m bu spritu santu.
12 Torna da-m kel alegria di bu salvason.
Labanta déntu di mi kel vontadi di obi ku bo.*
13 N ta ben inxina bus kaminhu pa kes ki ta viola bu lei,
Asi pa kes ki é pekador volta pa bo.
14 Ó Deus, Deus di nha salvason, libra-m di kulpa di sangi,
Asi pa nha língua pâpia sobri bu justisa ku alegria.
15 Ó Jeová, abri nha bóka,
Asi pa N pode lova-u.
16 Pamodi bu ka krê un sakrifisiu, sinon N ta daba bo el.
Bu ka ta fika kontenti ku un oférta kemadu.
17 Un spritu dizanimadu é un sakrifisiu ki ta agrada Deus.
Ó Deus, bu ka ta nega* un korason ki rapende i ki sta dizanimadu.
18 Mostra mizerikórdia i faze kel ki é dretu pa Sion,
Torna faze kes muralha di Jiruzalen.
19 Asi, bu ta fika kontenti ku kes sakrifisiu di kes algen justu,
Ku kes sakrifisiu kemadu i kes oférta interu.
Nton, es ta ben oferese toru na bu altar.