Primera Tesalonisensis

4 Nhas irmon, pa tirmina, nu inxina nhos modi ki nhos debe anda pa agrada Deus, sima na verdadi nhos sta ta anda. Gósi, nu ta pidi nhos i nu ta inplora nhos, na nómi di Sinhor Jizus, pa nhos kontinua ta faze-l más dretu inda. 2 Pamodi nhos konxe kes instruson* di Sinhor Jizus ki nu da nhos.

3 Kel-li é vontadi di Deus: nhos debe ser santu i ka ten konportamentu seksual mariadu.* 4 Kada un di nhos debe sabe modi ki el ta kontrola se própi korpu* di manera santu i ku ónra. 5 Nhos ka debe sigi kes nason ki ka konxe Deus, ki ta sigi ses paxon seksual diskontroladu ku ganánsia. 6 Ningen ka debe pasa kes limiti di kel ki é dretu i pruveta di se irmon na kel asuntu li, pamodi Jeová* ta kastiga tudu kes ki ta faze kes kuza li, sima dja nu flaba nhos antis i tanbê nu avizaba nhos ku firméza. 7 Pamodi Deus ka txoma-nu pa nu ser inpuru, má pa nu ser santu. 8 Pur isu, kenha ki ta nega kes avizu li, ka sta nega ómis, má sta nega Deus, ki ta da nhos se spritu santu.

9 Má, nhos ka meste pa nu skrebe nhos sobri kel amor sima di irmon, pamodi Deus sta ta inxina nhos ama kunpanheru. 10 Na verdadi dja nhos sta ta faze-l pa tudu kes irmon na Masedónia interu. Má irmons, nu krê insentiva nhos, pa nhos kontinua ta faze-l kada bês más. 11 Nhos poi obijetivu di vive na pas, di kuida di nhos própi asuntu i trabadja ku nhos própi mô, sima nu inxina nhos, 12 asi pa kes algen di fóra odja ma nhos ta anda dretu i ma nhos ka meste di nada.

13 Irmons, tanbê nu krê pa nhos intende* kuzê ki ta ben kontise ku kes ki sta durmi na mórti, pa nhos ka fika tristi dimás sima kes otu algen ki ka ten speransa. 14 Pamodi si nu ten fé ma Jizus móre i el resusitadu,* tanbê nu ten fé ma Deus ta ben traze djuntu ku el kes ki sta ta durmi na mórti i ki é sigidoris di Jizus. 15 Di akordu ku palavra di Jeová* nu ta fla nhos kel-li: nos, ki sta bibu, ki kontinua ku vida ti prezénsa di Sinhor, di ninhun manera nu ka ta pasa frenti di kes ki durmi na mórti, 16 pamodi própi Sinhor ta ben dixi di séu ku un vós di algen ki ta manda, ku vós di arkanju i ku tronbéta di Deus, i kes disiplu di Kristu ki móre, ta ben resusitadu* primeru. 17 Dipôs, nos ki sta bibu, ki kontinua ku vida, nu ta ben rabatadu djuntu ku es na núven pa nu inkontra ku Sinhor na ar, i asi sénpri nu ta sta ku Sinhor. 18 Pur isu, nhos kontinua ta konsola kunpanheru ku kes palavra li.