Romanus
5 Pur isu, gósi ki Deus fla ma nos é justu pamodi fé, nu goza di kel pas* ku Deus através di nos Sinhor Jizus Kristu. 2 Nos fé na Jizus ta dexa-nu txiga na Deus i resebe se grandi bondadi. Nu pode fika kontenti* pamodi nu ten speransa di resebe glória di Deus. 3 Ka sô kel-li, má tanbê nu pode fika kontenti* óras ki nu ta pasa pa sufrimentu, dja ki nu sabe ma nos sufrimentu ta inxina-nu aguenta firmi. 4 Si nu aguenta firmi, Deus ta fika kontenti ku nos. Óras ki Deus fika kontenti ku nos, nu ta ten speransa, 5 i nos speransa ka ta diziludi-nu, pamodi amor di Deus bazadu na nos korason através di spritu santu ki nu dadu.
6 Pamodi timenti inda nos éra fraku, Kristu móre pa ómis mau na ténpu markadu. 7 Ta sérba difísil pa un algen móre pa un justu. Má talvês, un algen ta sta dispostu na móre pa un ómi bon. 8 Má Deus mostra-nu se própi amor, kantu Kristu móre pa nos timenti nos éra pekador. 9 Nton, dja ki gósi Deus fla ma nos é justu pamodi sangi di Jizus, nu pode ten mutu más serteza inda ma nu ta ser salvu di raiba di Deus. 10 Pamodi si kantu nos éra inimigus, nu fazedu pas ku Deus através di mórti di se Fidju, ku mutu más serteza inda nu ta ser salvu através di se vida, gósi ki nu sta na pas ku Deus. 11 Má tanbê, nu ta fika kontenti ku kel ki Deus faze através di nos Sinhor Jizus Kristu, dja ki é através di el ki gósi nu ta pode sta na pas ku Deus.
12 É pur isu ki, sima pekadu entra na mundu através di sô un ómi i mórti através di pekadu, i di kel manera li mórti spadja pa tudu ómi, pamodi es tudu tinha pekadu... 13 Pamodi pekadu dja izistiba na mundu antis di Lei, má óras ki ka ten lei ningen ka ta akuzadu di faze pekadu. 14 Má simé, mórti reina désdi Adon ti Muizés, riba ti mésmu di kes ki ka faze pekadu sima Adon, ki é kel ki na alguns kuza é sima kel ki staba pa binha.
15 Má kel prezenti di Deus é ka sima kel fadja. Pamodi fadja di sô un ómi, txeu algen móre. Má kel grandi bondadi di Deus i se prezenti ki el da-nu através di kel grandi bondadi di un ómi, Jizus Kristu, é mutu más grandi. Ku kel prezenti li, Deus ta traze txeu benson pa txeu algen! 16 Tanbê kel prezenti di Deus i kel fadja di sô un ómi, é diferenti di kel manera li: pamodi un fadja poi tudu algen ta kondenadu, má kel prezenti di Deus ki ben pamodi txeu fadja, poi Deus ta fla ma txeu algen é justu. 17 Pamodi si mórti reina através di fadja di sô un ómi, nton é mutu más sértu inda ma kes ki resebe kel grandi bondadi di Deus i se prezenti di justisa, ta ben vive pa reina através di sô un ómi, ki é Jizus Kristu!
18 Nton, sima sô un fadja poi tudu tipu di algen ta kondenadu, asi tanbê un kuza justu ki fazedu, ta poi Deus ta fla ma tudu tipu di algen é justu pa es resebe vida. 19 Pamodi sima txeu algen bira pekador pamodi un ómi ki dizobidese, di mésmu manera txeu algen ta ser justu pamodi un ómi ki obidese. 20 Má Lei ben pa omenta fadja. Má undi pekadu bira txeu, kel grandi bondadi bira más txeu inda. 21 Ku ki obijetivu? Sima pekadu reina djuntu ku mórti, asi tanbê kel grandi bondadi ta reina através di justisa i el ta leba pa vida pa tudu ténpu através di Jizus Kristu, nos Sinhor.