Sugunda Koríntius
7 Pur isu, nhas irmon ki N krê txeu, dja ki nu ten kes promésa li, nu linpa di tudu kuza ki ta kontamina korpu* i spritu, asi pa nu pode bira más santu ku kel grandi ruspetu pa Deus.
2 Nhos da-nu un lugar na nhos korason. Nu ka faze injustisa pa ningen, nu ka prujudika ningen, nu ka pruveta di ningen. 3 N ka sta fla kel-li pa kondena nhos. Pamodi dja N flaba nhos antis ma nhos sta na nos korason pa móre djuntu ku nos i pa vive djuntu ku nos. 4 N sta pâpia klaru ku nhos. N ten txeu orgulhu di nhos. N sta xinti txeu konsoladu. N sta kontenti ti dimás na tudu nos frónta.
5 Na verdadi, kantu nu txiga na Masedónia, nu* ka tevi diskansu, má nu kontinua ta pasa pa tudu tipu di sufrimentu: txeu opozison di fóra i medu pa déntu. 6 Má Deus, ki ta konsola kes ki sta dizanimadu, konsola-nu ku prezénsa di Titu; 7 i ka sô ku se prezénsa má tanbê ku konsolu ki el resebe pamodi nhos, dja ki el fla-nu ma nhos tene gana di odja-m, di nhos grandi tristéza i di nhos grandi preokupason* pa mi. I kel-li pô-m ta fika mutu más kontenti inda.
8 Pamodi enbóra nha karta poi nhos ta fika tristi, N ka ta rapende di kel-la. Enbóra N rapende na komésu (kantu N odja ma kel karta poi nhos ta fika tristi, mésmu ki é pa poku ténpu), 9 gósi N sta kontenti, ka pamodi nhos fika tristi, má pamodi nhos tristéza poi nhos ta rapende. Pamodi nhos fika tristi di un manera ki ta agrada Deus, i di kel manera li nhos ka fika prujudikadu pamodi nos. 10 Pamodi tristéza ki ta agrada Deus ta poi pesoas ta rapende i ta leba pa salvason, i ningen ka ta rapende di kel-li. Má tristéza di mundu ta leba pa mórti. 11 Nhos odja kel grandi rezultadu ki kel tristéza ki ta agrada Deus tevi na nhos: kel-li poi nhos ta linpa nhos nómi, ta fika xatiadu, ta ten grandi ruspetu, ta ten un dizeju sinseru, ta mostra zelu, ta koriji kes kuza mariadu! Nhos mostra na tudu kuza ma nhos é puru* na es asuntu. 12 Enbóra N skrebe nhos, N ka faze-l pa kel ki faze kuza mariadu, nen pa kel ki fazedu kuzas mariadu kóntra el, má pa kel sforsu ki nhos sta ta faze na obi ku nos, fika klaru entri nhos i dianti di Deus. 13 É pur isu ki nu konsoladu.
Má fóra kel konsolu ki nu resebe, nu fika mutu más kontenti inda pamodi alegria di Titu, dja ki nhos tudu nhos anima se spritu. 14 Pamodi si N pâpia ku el sobri nhos ku orgulhu, N ka fika na vergónha. Má sima tudu kel ki nu fla nhos é verdadi, tanbê kel ki nu fla Titu ku orgulhu prova ma é verdadi. 15 Tanbê, se amor pa nhos ta bira más txeu óras ki el ta lenbra di nhos obidiensa i di modi ki nhos resebe-l ku txeu ruspetu.* 16 N ta fika kontenti pamodi na tudu kuza N pode ten kunfiansa na nhos.*