Salmu
136 Nhos agradese Jeová, pamodi el é bon.
Se amor lial ta dura pa tudu ténpu.
2 Nhos agradese kel Deus di tudu deus,
Pamodi se amor lial ta dura pa tudu ténpu.
3 Nhos agradese kel Sinhor di tudu sinhor,
Pamodi se amor lial ta dura pa tudu ténpu.
4 É sô el ki ta faze kuzas grandi i bunitu,
Pamodi se amor lial ta dura pa tudu ténpu.
5 El faze séu ku sabedoria,*
Pamodi se amor lial ta dura pa tudu ténpu.
6 El finka téra riba di agu,
Pamodi se amor lial ta dura pa tudu ténpu.
7 El faze kes lus grandi na séu,
Pamodi se amor lial ta dura pa tudu ténpu.
8 El faze sol pa límia* di dia,
Pamodi se amor lial ta dura pa tudu ténpu.
9 El faze lua i stréla pa límia di noti,
Pamodi se amor lial ta dura pa tudu ténpu.
10 El mata tudu kes primeru fidju di Ijitu,
Pamodi se amor lial ta dura pa tudu ténpu.
11 El tra Israel di Ijitu,
Pamodi se amor lial ta dura pa tudu ténpu.
12 El tra-s di la ku se mô fórti i ku se brasu fórti,
Pamodi se amor lial ta dura pa tudu ténpu.
13 El dividi mar Brumedju na dôs,*
Pamodi se amor lial ta dura pa tudu ténpu.
14 El poi Israel ta pasa na meiu di mar,
Pamodi se amor lial ta dura pa tudu ténpu.
15 El bota Faraó ku ses trópa na mar Brumedju,
Pamodi se amor lial ta dura pa tudu ténpu.
16 El gia se povu na dizértu,
Pamodi se amor lial ta dura pa tudu ténpu.
17 El vense kes rei ki tinha txeu puder,
Pamodi se amor lial ta dura pa tudu ténpu.
18 El mata kes rei poderozu,
Pamodi se amor lial ta dura pa tudu ténpu,
19 Sion, rei di kes amoreu,
Pamodi se amor lial ta dura pa tudu ténpu,
20 I Ogi, rei di Bazan,
Pamodi se amor lial ta dura pa tudu ténpu.
21 El da se povu téra di kes rei pa ser ses eransa,
Pamodi se amor lial ta dura pa tudu ténpu.
22 El da se sérvu Israel téra di kes rei pa ser se eransa,
Pamodi se amor lial ta dura pa tudu ténpu.
23 El lenbra di nos kantu nu staba dizanimadu,*
Pamodi se amor lial ta dura pa tudu ténpu.
24 Sénpri el ta libraba nos di nos inimigu,
Pamodi se amor lial ta dura pa tudu ténpu.
25 El ta da tudu se kriason* kumida,
Pamodi se amor lial ta dura pa tudu ténpu.
26 Nhos agradese kel Deus di séu,
Pamodi se amor lial ta dura pa tudu ténpu.