Salmu
Pa diretor di múzika. Pa kunpanha ku instrumentu di kórda. Maskil.* Salmu di Davidi.
55 Ó Deus, obi nha orason
I ka bu iginora nha pididu di mizerikórdia.*
2 Presta atenson na mi i responde-m.
Nha preokupason ka sta dexa-m fika trankuilu,
I N sta dizusperadu
3 Pamodi kel ki nha inimigu sta ta fla
I pamodi kes algen mau sta ta fronta-m.
Es sta ta djunta disgrasa riba di mi.
Es sta ku raiba i ku rankor di mi.
4 Nha korason sta angustiadu,
I medu di mórti sta ta toma kónta di mi.
5 N tene medu i N sta ta treme,
Korpu sta ta rapia-m.
6 N sta kontinua ta fla: “Éra pa N tinha aza sima ponba!
N ta buaba pa lonji i N ta moraba na un lugar suguru.
7 N ta fujiba pa un lugar lonji.
N ta xintaba na dizértu. (Selá)
8 N ta baba faxi pa un lugar di proteson,
Lonji di raiba di béntu, lonji di tenpistadi.”
9 Ó Jeová, konfundi-s i straga ses planu,*
Pamodi N odja violénsia i géra na sidadi.
10 Dia ku noti, es ta anda na vólta di muralha di sidadi.
Déntu di sidadi sta maldadi i prubléma.
11 Déntu di sidadi sta disgrasa.
Frónta i mintira nunka ka ta afasta di se prasa.
12 Pamodi ken ki insulta-m é ka un inimigu,
Si éra un inimigu, N ta pode aguentaba.
Ken ki labanta kóntra mi é ka un inimigu,
Si éra un inimigu, N ta pode sukundiba di el.
13 Má é bo, un ómi sima mi,
Nha kunpanheru ki N konxe dretu.
14 Nos éra bons amigu.
Nu ta baba djuntu ku un monti di algen ti kaza di Deus.
15 Pa distruison txiga na es!
Pa es dixi bibu pa Sipultura,*
Pamodi kuza mariadu dja mora na ses meiu i déntu di es.
16 Má ami, N ta txoma Deus,
I Jeová ta ben salva-m.
17 Di noti, di palmanhan i tanbê na meiu-dia, N sta preokupadu i ta jeme,*
I el ta obi nha vós.
18 El ta ben da-m* pas óras ki el libra-m* di kes ki sta luta kóntra mi,
Pamodi un monti di algen sta ta ben kóntra mi.
19 Deus ta ben obi i el ta ben aji kóntra es.
El é kel ki sta xintadu na se tronu désdi ténpu antigu. (Selá)
Kes ki ka ten grandi ruspetu pa Deus,
Ka ta ben krê muda.
20 Nha amigu* ataka kes ki staba na pas ku el,
El viola se kontratu.
21 Ses palavra é más suavi di ki mantega,
Má déntu di se korason el tene gana di briga.
Ses palavra é más suavi di ki azeti,
Má es é sima spada moladu.
22 Lansa bu karga riba di Jeová
I el ta apoia-u.
Nunka el ka ta dexa algen justu kai.
23 Má abo, ó Deus, bu ta ben poi kes algen mau ta dixi na kóba más fundu.
Kes ómi falsu li i ki ten kulpa di sangi, ka ta ben vive nen metadi di ses vida.
Má ami, N ta ben kunfia na bo.