Salmu
Pa diretor di múzika. Un múzika di Davidi.
19 Séu ta pâpia di glória di Deus;
Séu la di riba* ta mostra trabadju di se mô.
2 Tudu dia séu ta kontinua ta pâpia,*
I tudu noti el ta mostra konhisimentu di Deus.
3 El ka ta pâpia ninhun palavra;
Bu ka ta obi se vós.
4 Má ses son obidu na tudu téra,
I ses mensajen txiga na kes lugar más lonji di téra.
Na séu, Deus arma un ténda pa sol.
5 El ta sai ta brilha sima un noivu ki ta sai di se kuartu.
I sol é sima un ómi fórti ki ta fika kontenti di kóre na un korida.
6 El ta sai di un pónta di séu,
I el ta da vólta i el ta bai ti kel otu pónta;
Nada ka ta pode sukundi di se kalor.
7 Lei di Jeová é perfeitu, el ta da forsa otu bês.
Kes konsedju di Jeová é di kunfiansa, es ta da sabedoria pa ken ki ka ten spiriénsia.
8 Kes órdi di Jeová é justu, es ta poi korason kontenti.
Kes mandamentu di Jeová é linpu, es ta poi odju ta brilha.
9 Grandi ruspetu pa Jeová é puru, el ta dura pa tudu ténpu.
Kes julgamentu di Jeová é di kunfiansa, es é justu na tudu sentidu.
10 Es ten más valor di ki oru,
Di ki txeu oru finu,*
Es é más dósi di ki mel, di ki mel puru di abelha.
11 Nha Deus, bu lei ta aviza bu sérvu pa ka bai pa kaminhu mariadu.
Kenha ki ta obi ku el, ta ten un grandi rekonpénsa.
12 Ken ki pode da kónta di ses própi éru?
Purdua-m di kes pekadu ki N ta faze sen da kónta.
13 I ka bu dexa bu sérvu ser orgulhozu;
Ka bu dexa orgulhu toma kónta di mi.
14 Ó Jeová, nha Rótxa i nha Libertador,
Pa palavras di nha bóka i pensamentus* di nha korason ser sábi pa bo.