Primera Timótiu

6 Pa kes ki é skravu* mostra ses dónu txeu ruspetu, asi pa nunka ka papiadu mal di nómi di Deus i di se ensinu. 2 Alén di kel-li, kes ki ses dónu é krenti es ka debe disruspeta-s sô pamodi es é irmon. Envês di kel-li, es debe sirbi-s midjór inda, pamodi kes ki ta tra pruvetu di ses trabadju é krenti i es kredu txeu.

Kontinua ta inxina i ta da kes konsedju li. 3 Si un algen ta inxina otu dotrina i el ka ta konkorda ku kel instruson ki é bon, ki ta ben di nos Sinhor Jizus Kristu, nen ku kel ensinu ki sta di akordu ku adorason pa Deus, 4 el sta xeiu di orgulhu i el ka ta intende nada. El ta insisti na diskuti* i faze dibati sobri palavras. Kes kuza li ta provoka invéja, diskuson, kalúnia,* diskunfiansa di kunpanheru 5 i diskuson ki ka ta kaba sobri asuntus ki ka é inportanti, entri ómis ki ten menti suju i ki ka tene verdadi. Es ta pensa ma adorason pa Deus é un manera di ganha algun kuza. 6 Má si nu ta adora Deus i nu sta kontenti ku kes kuza ki nu ten, nu ta resebe txeu benson. 7 Pamodi nu ka traze nada pa mundu nen nu ka ta pode leba nada. 8 Pur isu, si nu tene kumida* i ropa,* nu ta fika kontenti ku kes kuza li.

9 Má, kes ki sta disididu na fika riku ta kai na tentason, na armadilha* i na txeu dizeju tolu i ki ta prujudika-s, ki ta funda ómis na distruison i na disgrasa. 10 Pamodi amor pa dinheru é raís di tudu tipu di kuzas mariadu, i alguns na buska kel amor li, es disvia di fé i es poi ses kabésa na txeu sufrimentu.

11 Má abo, ómi di Deus, fuji di kes kuza li. Má inpenha pa justisa, pa adorason pa Deus, pa fé, pa amor, pa kapasidadi di aguenta firmi i pa brandura. 12 Faze kel bon luta di fé. Pega riju na kel vida pa tudu ténpu ki bu txomadu pa el i ki bu da un bon tistimunhu na públiku na frenti di txeu algen.

13 N ta da-u órdi dianti di Deus, ki ta mante tudu kuza ku vida, i di Kristu Jizus, ki da un bon tistimunhu dianti di Pónsiu Pilatus, 14 pa bu obi ku mandamentu di un manera puru i sen kulpa, ti ki nos Sinhor Jizus Kristu mostra se puder.* 15 Kel úniku Sinhor Poderozu i ki é filís ta ben mostra se puder na se ténpu markadu. El é Rei di kes ki ta reina i Sinhor di kes ki ta manda, 16 kel úniku ki nunka ka ta móre, ki ta mora na lus ki ningen ka ta pode txiga na el, ki ninhun ómi ka odja nen ka ta pode odja. Pa el dadu ónra i puder pa tudu ténpu. Amén.

17 Da kes instruson* li pa kes ki é riku na kel mundu li* pa es ka ser orgulhozu* i pa es ka poi ses speransa na kes rikéza ki é ka sértu, má na Deus ki ta da-nu tudu kuza ki ta pô-nu ta xinti alegria. 18 Fla-s pa es faze kel ki é dretu, pa es ser riku di bons óbra, pa es gosta di da,* pa es sta prontu pa dividi ses kuza ku otus, 19 asi es ta konsigi djunta un tizoru pa es ki é un bon alisérsi pa futuru. Di kel manera li, es ta pega riju na kel vida di verdadi.

20 Timótiu, proteje kel ki bu dadu, afasta di kes konbérsu sen valor ki ta viola kel ki é santu i di kel “konhisimentu” falsu ki ta ben di kes konbérsu ki é kontráriu di kel ki é verdadi. 21 Alguns izibi kel konhisimentu li i, pur isu, es disvia di fé.

Pa kel grandi bondadi di Deus sta ku nhos.