Primera Timótiu
3 Kuzê ki N sta ben fla é di kunfiansa: si un ómi sta ta sforsa pa el ser un enkaregadu, el sta ta dizeja un bon trabadju. 2 Pur isu, un enkaregadu debe ser un algen sen kulpa, maridu sô di un mudjer, kontroladu na se ábitus, ki ten bon juís, organizadu,* ki gosta di resebe otus i ki ten kapasidadi pa inxina. 3 El ka debe bebe dimás, nen ser violéntu,* má el debe ser ikilibradu. El ka debe ser konfuzéntu i el ka debe ama dinheru. 4 El debe toma kónta dretu di* se própi família i se fidjus debe obi ku el ku tudu ruspetu. 5 (Pamodi si un ómi ka sabe toma kónta di* se própi família, modi ki el ta pode kuida di kongregason di Deus?) 6 El ka debe ser algen ki ten poku ténpu ki bira kriston, pa el ka intxi di orgulhu i pa el ka resebe kel mésmu julgamentu ki Diabu resebe. 7 Tanbê, kes algen di fóra debe pâpia ben di el,* asi pa el ka kai na dizónra* i na armadilha* di Diabu.
8 Di mésmu manera, kes ajudanti di kongregason debe ser sériu i ómis ki ten sô un palavra.* Es ka debe bebe txeu vinhu, nen ten ganánsia pa ganha algun kuza ku dizonestidadi. 9 Es debe pega na segredu sagradu di fé ku un konsénsia linpu.
10 Tanbê, primeru debe djobedu si es ten kapasidadi.* Dipôs, si es ka sta akuzadu di nada, es pode ser ajudantis di kongregason.
11 Di mésmu manera, mudjer debe ser séria, es ka debe kalúnia ningen, es debe ser kontroladu na ses ábitu i fiel na tudu kuza.
12 Kes ajudanti di kongregason debe ser maridu sô di un mudjer, es debe toma kónta dretu di ses fidjus i di ses própi família. 13 Pamodi kes ómi ki ta sirbi dretu ta ganha un bon nómi pa es i es ta pode pâpia ku grandi kunfiansa* sobri fé na Kristu Jizus.
14 Enbóra N ta spera ma di li poku ténpu N ta ba djobe-u, N sta skrebe-u kes kuza li, 15 asi, si N dura, pa bu sabe modi ki bu debe konporta na família di Deus, ki é kongregason di kel Deus bibu, ki é kel pilar ki ta apoia i ki ta difende verdadi. 16 Na verdadi, ka ten dúvida ma kel segredu sagradu di es adorason pa Deus é grandi: ‘El mostradu na karni, el txomadu justu na spritu, el parse pa anjus, pregadu sobri el pa nasons, mundu kridita na el i el resebedu na séu ku glória.’