Primeru livru di Krónikas
16 Nton, es leba Arka di Deus verdaderu pa kel ténda ki Davidi fazeba pa el i es pô-l la. Dipôs, es oferese ofértas kemadu i sakrifisius di pas dianti di Deus verdaderu. 2 Kantu Davidi tirmina di oferese ofértas kemadu i sakrifisius di pas, el abênsua povu na nómi di Jeová. 3 Tanbê, el da pa tudu algen di Israel, pa kada ómi i pa kada mudjer, un pon rodondu, un bolu di tanbra i un bolu di uva séku. 4 Dipôs, el skodje alguns levita pa sirbi dianti di Arka di Jeová, pa da ónra,* pa agradese i pa lova Jeová, kel Deus di Israel. 5 Azafe éra xéfi di kel grupu di kantor i Zakarias éra se ajudanti. Jeiel, Semiramote, Jeiel, Matitias, Eliabe, Benaia, Obede-Edon i Jeiel ta tokaba kes instrumentu di korda i arpa. Azafe ta tokaba sínbalu.* 6 Saserdóti Benaia i saserdóti Jaziel sénpri ta tokaba tronbéta dianti di Arka di Kontratu di Deus verdaderu.
7 Foi na kel dia la ki Davidi manda Azafe i ses irmon pa kanta un kántiku di agradesimentu ki el fazeba pa Jeová. Kel-la foi primeru bês ki Davidi oferese un kántiku. Kel kántiku ta flaba:
8 “Nhos agradese Jeová, nhos invoka se nómi,
I nhos dexa povu sabe kes kuza ki el faze!
10 Nhos pâpia ku orgulhu di Se nómi santu.
Pa korason di kes ki ta djobe Jeová fika kontenti.
11 Nhos buska Jeová i se forsa.
Sénpri nhos djobe se ajuda.*
12 Nhos lenbra di kes kuza grandi ki el faze,
Di kes milagri i di kes julgamentu ki el faze,
13 Anhos ki é disendenti* di Israel, sérvu di Deus,
Nhos ki é fidjus di Jakó, ki é kes ki el skodje.
14 El é Jeová, nos Deus.
Ses julgamentu ta odjadu na téra interu.
15 Nhos lenbra di se kontratu pa tudu ténpu,
Di kel promésa ki el faze* ti na mil jerason.
16 Di kel kontratu ki el faze ku Abraon,
Di kel juramentu ki el faze pa Izaki,
17 Kel juramentu ki el konfirma Jakó através di un lei,
Di kel kontratu ki el faze ku Israel pa tudu ténpu,
18 Kantu el fla: ‘N ta da nhos téra di Kanan
Pa ser nhos eransa.’
19 Kel-li kontise kantu nhos éra poku,
Kantu nhos éra poku dimás, i nhos éra stranjeru na kel téra la.
20 Es anda di un nason pa kel otu,
I di un reinu pa kel otu reinu.
21 El ka dexa ninhun ómi maltrata-s,
Má pamodi es, el koriji* kes rei,
22 Kantu el fla: ‘Ka nhos toka na kes ki N skodje,
Ka nhos faze nhas proféta nada mariadu.’
23 Pa téra interu kanta pa Jeová!
Tudu dia nhos fla otus algen modi ki el salva pesoas!
24 Nhos pâpia di se glória na meiu di tudu nason,
I di kes kuza grandi ki el faze na meiu di tudu povu,
25 Pamodi Jeová é grandi i el merese tudu lovor.
El merese ser ruspetadu más di ki tudu kes otu deus.
26 Tudu deus di kes otu povu ka ta sirbi pa nada,
Má Jeová é kel ki faze séu.
27 El sta rodiadu di glória i beléza.
Na lugar ki el ta mora ten forsa i alegria.
28 Pa tudu família di téra da Jeová kel ki el merese,
Nhos da Jeová kel ki el merese pamodi se glória i se forsa.
29 Nhos da Jeová kel glória ki se nómi merese.
Nhos traze un prezenti i nhos ben fika se dianti.
Nhos inbaxa* dianti di Jeová bistidu ku ropa santu.*
30 Pa tudu algen na téra treme se dianti!
Téra sta ben finkadu. Nada ka ta pode tra-l di se lugar.*
31 Pa séu fika kontenti, i pa téra fika kontenti tanbê.
I pa kes algen di nason fla: ‘Jeová dja bira Rei!’
32 Pa mar i tudu kuza ki ten na el grita di alegria.
Pa kes kanpu i tudu kuza ki ten na es grita di alegria.
33 Omésmu ténpu pa kes arvi grandi di florésta grita di alegria dianti di Jeová,
Pamodi el sta ta ben* julga téra.
34 Nhos agradese Jeová pamodi el é bon.
Se amor lial ta dura pa tudu ténpu.
35 I nhos fla: ‘Ó Deus di nos salvason, salva-nu,
Djunta-nu i libra-nu di kes nason,
Pa nu pode lova bu nómi santu,
I pa nu xinti grandi alegria na lova-u.
I tudu povu fla: “Amén!”* i es lova Jeová.
37 Dipôs, Davidi dexa Azafe ku ses família dianti di Arka di Kontratu di Jeová pa es pode sirbiba sénpri dianti di Arka, di akordu ku prugrama di kada dia. 38 Tanbê el skodje Obede-Edon i 68 algen di se família pa ser porteru. El skodje Obede-Edon, fidju di Jedutun, i Oza pa ser porteru. 39 Zadoki i kes otu saserdóti ta sirbiba dianti di tabernáklu di Jeová, na kel lugar sagradu* ki tinha na Jibion. 40 Sénpri es ta fazeba kes oférta kemadu pa Jeová na altar di oférta kemadu, di palmanhan i di tardinha, i es ta fazeba tudu kel ki staba skrebedu na kel livru di Lei ki Jeová da Israel. 41 Djuntu ku es, staba Eman, Jedutun i kes otu ómi ki skodjedu pa nómi pa agradese Jeová, pamodi “se amor lial ta dura pa tudu ténpu”. 42 Eman i Jedutun staba djuntu ku es pa toka tronbéta, sínbalu, i kes instrumentu ki es ta uzaba pa lova* Deus verdaderu. I kes fidju di Jedutun fika responsável di porton. 43 Dipôs, tudu algen bai pa ses kaza, i Davidi ba abênsua kes algen di se família.