Sugunda di Pedru

1 Di Simon Pedru, skravu i apóstlu di Jizus Kristu, pa kes ki konsigi un fé ki ten txeu valor sima di nos,* através di justisa di nos Deus i di nos Salvador Jizus Kristu:

2 Pa nhos ten kada bês más kel grandi bondadi i pas através di konhisimentu izatu di Deus i di Jizus, nos Sinhor, 3 pamodi puder di Deus da-nu* tudu kes kuza ki nu meste pa nu vive un vida didikadu pa el através di konhisimentu izatu di Kel ki txoma-nu pa se glória i bondadi. 4 Através di kes kuza li el da-nu* kes promésa ki é grandi i ki ten txeu valor, asi pa através di es nhos bira spritu sima Deus. El faze kel-li pamodi nu fuji di kes konportamentu mariadu di es mundu, ki é rezultadu di dizejus mariadu.*

5 Pur isu, nhos faze tudu kel ki nhos ta pode pa djunta nhos fé ku virtudi,* nhos virtudi ku konhisimentu, 6 nhos konhisimentu ku nhos kapasidadi di kontrola nhos kabésa, nhos kapasidadi di kontrola nhos kabésa ku kapasidadi di aguenta firmi, nhos kapasidadi di aguenta firmi ku adorason pa Deus, 7 nhos adorason pa Deus ku amor di irmon, nhos amor di irmon ku amor pa tudu algen. 8 Pamodi si kes kuza li izisti na nhos i es ba ta omenta, nhos ta uza nhos konhisimentu izatu sobri nos Sinhor Jizus Kristu i nhos ka ta ser inativu nen nhos ka ta dexa di da frutu.

9 Pamodi ken ki ka ten kes kuza li é ségu, el ta fitxa odju pa lus,* i dja el skese di se pekadu ki purifikadu dja ten txeu ténpu. 10 Pur isu, irmons, nhos sforsa inda más pa nhos mostra ma nhos txomadu i ma nhos skodjedu, pamodi si nhos kontinua ta faze kes kuza li, nunka más nhos ka ta fadja. 11 Na verdadi, di kel manera li nhos ta dadu un entrada xeiu di glória na kel Reinu pa tudu ténpu di nos Sinhor i Salvador Jizus Kristu.

12 Pur isu, N krê lenbra nhos sénpri di kes kuza li, enbóra nhos sabe-s i nhos sta ben finkadu na kes verdadi ki sta na nhos. 13 Má timenti N sta na es ténda,* N ta atxa dretu lenbra nhos di kes kuza li. 14 N sabe ma ka ta dura N ta dexa es ténda, sima nos Sinhor Jizus Kristu dexa-m sabe klaru. 15 N ta ben faze sénpri tudu kel ki N ta pode, asi pa dipôs ki N bai, pa nhos konsigi lenbra* di kes kuza li di nhos pa nhos.

16 Nau, nu ka sigi stórias falsu ki ómis inventa pa poi nhos ta konxe puder i prezénsa di nos Sinhor Jizus Kristu, má envês di kel-li nu odja se glória. 17 Pamodi el resebe ónra i glória di Deus, nos Pai. Kel-li kontise kantu kel fonti di grandi glória fla-l kes palavra li:* “Kel-li é nha Fidju, ki N ta ama i ki ta da-m txeu alegria.” 18 Sin, nu obi kes palavra li ta ben di séu timenti nu staba ku el na kel monti santu.

19 É pur isu ki nu ten serteza ma kes profesia ta kunpri. Nhos sta ta faze dretu na presta atenson na kes profesia ki é sima un kanderu ki ta límia na sukuru, kel-li krê fla na nhos korason (ti ki dia manxe i parse kel stréla di palmanhan). 20 Antis di tudu, nhos sabe ma ninhun profesia di Skrituras ka ta ben di ideia di algun algen. 21 Pamodi profesia nunka ka fazedu pa vontadi di ómi, má kes ómi pâpia di kes kuza ki ben di Deus sima es giadu* pa spritu santu.