Sugunda Tesalonisensis
2 Irmons, nhos sabe sobri prezénsa di nos Sinhor Jizus Kristu i nhos sabe ma nu ta ben sta djuntu ku el, má gósi nu ta pidi nhos, 2 pa nhos ka perde faxi nhos bon juís, nen ka nhos fika ku medu pamodi un mensajen ki ben di un spritu,* ô pamodi un mensajen ki fladu, ô pamodi un karta ki ta parse ma é nos ki manda, ki ta fla ma dia di Jeová* dja txiga.
3 Pa ningen ka ingana nhos di ninhun manera, pamodi kel dia ka ta txiga sen ki primeru txiga kes ki ta rabela kóntra Deus i mostradu kel ómi ki é kóntra lei, ki é fidju di distruison. 4 El é un inimigu i el ta engrandese riba di tudu kuza ki ta txomadu deus ô ki ómis ta uza pa adora. Di kel manera li, el ta xinta na ténplu di Deus, i el ta izibi sima un deus. 5 Nhos ka ta lenbra ma kantu inda N staba ku nhos, N ta kustuma flaba nhos kes kuza li?
6 I gósi nhos sabe kuzê ki sta ta aji sima un barera, asi el ta ben mostradu na ténpu sértu. 7 Na verdadi, maldadi di kel ómi ki sta sukundidu dja sta ta aji, má es maldadi ta kontinua sukundidu ti ki kel ki sta aji sima un barera dizaparse. 8 Nton, di serteza ta ben mostradu kel ómi ki é kóntra lei, kel ki Sinhor Jizus ta ben distrui ku spritu di se bóka i el ta ben kaba ku el óras ki el mostra se prezénsa. 9 Óras ki kel ómi ki é kóntra lei parse, el ta ben faze-l ku puder di Satanás, ku tudu óbra poderozu, ku sinal i milagris falsu, 10 i ku injustisa i tudu tipu di mintira pa kes ki sta na kaminhu di distruison. Kel-li é ses pagamentu pamodi es ka seta amor pa verdadi pa es pode ser salvu. 11 É pur isu ki Deus ta dexa-s ser inganadu pa un ensinu falsu pa es pode kridita na mintira, 12 asi pa es tudu pode julgadu pamodi es ka kridita na verdadi, má es xinti sábi ku injustisa.
13 Má, nu ten obrigason di agradese Deus sénpri pa nhos, irmons ki Jeová* ta ama, pamodi désdi komésu Deus skodje nhos pa salvason kantu el santifika nhos ku se spritu i pamodi nhos fé na verdadi. 14 É pa kel-li ki el txoma nhos através di kes notísia sábi ki nu ta pâpia di es, asi pa nhos pode ten kel glória di nos Sinhor Jizus Kristu. 15 Pur isu irmons, nhos mante firmi i nhos pega na kes tradison ki nu inxina nhos, ka ta inporta si é através di un mensajen ki nu pâpia ô através di un karta ki nu manda nhos. 16 Alén di kel-li, pa nos Sinhor Jizus Kristu i pa Deus, nos Pai, ki ama-nu i ki da-nu konsolu pa tudu ténpu i un speransa sábi através di kel grandi bondadi, 17 konsola nhos korason i poi nhos ta fika firmi,* na tudu kuza dretu ki nhos ta faze i ki nhos ta fla.